ᠷᠣᠮᠠ ᠶᠢᠰᠦ
ᠪᠤᠷᠬᠠᠨ ᠤ ᠳᠡᠭᠡᠳᠦ ᠡᠷᠬᠡ ᠲᠠᠢ ᠰᠣᠩ᠋ᠭᠣᠯᠲᠠ
1 ᠪᠢ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠬᠤᠳᠠᠯ ᠢ ᠪᠢᠰᠢ᠂ ᠦᠨᠡᠨ ᠢ ᠬᠡᠯᠡᠳᠡᠭ᠃ 2 ᠵᠢᠷᠦᠬᠡ ᠰᠡᠳᠬᠢᠯ ᠳᠤ ᠮᠢᠨᠢ ᠦᠯᠡᠮᠵᠢ ᠶᠡᠬᠡ ᠤᠢᠳᠬᠠᠷᠯᠠᠯ᠂ ᠦᠷᠭᠦᠯᠵᠢ ᠶᠢᠨ ᠭᠤᠨᠢᠭᠯᠠᠯ ᠪᠠᠢᠭᠠ ᠶᠢ ᠮᠥᠰᠥ ᠴᠢᠨᠠᠷ ᠮᠢᠨᠢ ᠴᠤ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠳᠣᠲᠣᠷᠠ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ 3 ᠮᠢᠬᠠᠨ ᠪᠡᠶᠡ ᠶᠢᠨ ᠠᠬᠠ ᠳᠡᠭᠦᠦᠰ ᠪᠠ ᠤᠭᠰᠠᠭᠠᠳᠠᠨ ᠤ ᠪᠠᠨ ᠲᠥᠯᠥᠭᠡ ᠶᠤᠮ ᠪᠣᠯ᠂ ᠾᠷᠢᠰᠲ᠋ᠣᠰ ᠠᠴᠠ ᠰᠠᠯᠭᠠᠭᠳᠠᠨ ᠬᠠᠷᠢᠶᠠᠭᠳᠠᠭᠰᠠᠨ ᠴᠤ ᠪᠢ ᠳᠤᠷᠠᠲᠠᠢ᠃ 4 ᠲᠡᠳᠡ ᠪᠣᠯ ᠢᠰᠷᠧᠯᠴᠦᠳ᠃ ᠦᠷᠡᠴᠢᠯᠡᠭᠳᠡᠯ᠂ ᠠᠯᠳᠠᠷ ᠰᠤᠤ᠂ ᠭᠡᠷᠡ ᠨᠦᠭᠦᠳ᠂ ᠬᠠᠤᠯᠢ ᠬᠦᠯᠢᠶᠡᠯᠲᠡ᠂ ᠮᠥᠷᠭᠥᠯ ᠪᠠ ᠠᠮᠠᠯᠠᠯᠲᠠ ᠨᠤᠭᠤᠳ ᠨᠢ ᠲᠡᠳᠡᠨ ᠦ ᠬᠢ ᠮᠥᠨ᠃ 5 ᠡᠪᠦᠭᠡ ᠳᠡᠭᠡᠳᠦᠰ ᠴᠤ ᠲᠡᠳᠡᠨ ᠦ ᠬᠢ᠃ ᠾᠷᠢᠰᠲ᠋ᠣᠰ ᠴᠤ ᠮᠢᠬᠠᠨ ᠪᠡᠶᠡ ᠶᠢᠨ ᠶᠣᠰᠣᠭᠠᠷ ᠲᠡᠳᠡᠨ ᠡᠴᠡ ᠭᠠᠷᠤᠯ ᠲᠠᠢ᠂ ᠲᠡᠷᠡ ᠪᠣᠯ ᠬᠠᠮᠤᠭ ᠤᠨ ᠳᠡᠭᠡᠷᠡ ᠣᠷᠣᠰᠢᠳᠠᠭ᠂ ᠥᠨᠢᠳᠡ ᠮᠠᠭᠲᠠᠭᠳᠠᠭᠤᠰᠢᠲᠠᠢ ᠪᠤᠷᠬᠠᠨ ᠪᠢᠯᠡ᠃ ᠠᠮᠧᠨ᠃
6 ᠪᠤᠷᠬᠠᠨ ᠤ ᠦᠭᠡ ᠬᠦᠴᠦᠨ ᠦᠭᠡᠢ ᠪᠣᠯᠣᠭᠰᠠᠨ ᠪᠢᠰᠢ᠂ ᠤᠴᠢᠷ ᠨᠢ᠂ ᠢᠰᠷᠧᠯ ᠡᠴᠡ ᠭᠠᠷᠤᠯ ᠲᠠᠢ ᠪᠣᠯᠭᠠᠨ ᠢᠰᠷᠧᠯ ᠤᠨ ᠬᠢ ᠪᠢᠰᠢ ᠪᠥᠭᠡᠳ 7 ᠠᠪᠷᠠᠬᠠᠮ ᠤᠨ ᠬᠡᠦᠬᠡᠳ ᠪᠣᠯᠭᠠᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠪᠢᠰᠢ᠂ ᠬᠠᠷᠢᠨ 《ᠢᠰᠠᠺ ᠠᠴᠠ ᠭᠠᠷᠤᠯ ᠲᠠᠢ ᠨᠢ ᠯᠠ ᠴᠢᠨᠦ ᠦᠷᠡ ᠤᠳᠤᠮ ᠭᠡᠵᠦ ᠨᠡᠷᠡᠯᠡᠭᠳᠡᠨᠡ》 ᠭᠡᠰᠡᠨ ᠪᠠᠢᠳᠠᠭ᠃ 8 ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ 《ᠮᠢᠬᠠᠨ ᠪᠡᠶᠡ ᠶᠢᠨ ᠬᠡᠦᠬᠡᠳ ᠪᠣᠯᠣᠭᠰᠠᠨ ᠢᠶᠠᠷ ᠪᠤᠷᠬᠠᠨ ᠤ ᠬᠡᠦᠬᠡᠳ ᠪᠣᠯᠳᠠᠭ ᠪᠢᠰᠢ᠂ ᠠᠮᠠᠯᠠᠯᠲᠠ ᠶᠢᠨ ᠬᠡᠦᠬᠡᠳ ᠯᠠ ᠦᠷᠡ ᠤᠳᠤᠮ ᠨᠢ ᠭᠡᠵᠦ ᠲᠣᠭᠠᠴᠠᠭᠳᠠᠳᠠᠭ᠃》 9 ᠪᠤᠷᠬᠠᠨ ᠠᠮᠠᠯᠠᠬᠤ ᠳᠠᠭᠠᠨ᠄ 《ᠢᠷᠡᠬᠦ ᠵᠢᠯ ᠤᠨ ᠡᠨᠡ ᠴᠠᠭ ᠲᠤ ᠪᠢ ᠡᠷᠭᠢᠵᠦ ᠢᠷᠡᠨᠡ᠂ ᠲᠡᠭᠡᠬᠦ ᠳᠦ ᠰᠠᠷᠠᠾ ᠬᠦᠦ ᠲᠠᠢ ᠪᠣᠯᠣᠨᠠ》 ᠭᠡᠰᠡᠨ᠃ 10 ᠡᠭᠦᠨ ᠢᠶᠡᠷ ᠦᠯᠦ ᠪᠠᠷᠠᠮ᠂ ᠷᠧᠪᠧᠺᠠ ᠪᠠᠷ ᠭᠠᠭᠴᠠ ᠬᠥᠮᠦᠨ ᠡᠴᠡ᠂ ᠲᠤᠬᠠᠢᠯᠠᠪᠠᠯ ᠪᠢᠳᠡᠨ ᠦ ᠳᠡᠭᠡᠳᠦᠰ ᠢᠰᠠᠺ ᠠᠴᠠ ᠵᠢᠷᠮᠦᠰᠦᠯᠡᠭᠡᠳ ᠪᠠᠢᠬᠤ ᠳᠤ᠂ 11 ᠢᠬᠡᠷᠡ ᠬᠡᠦᠬᠡᠳ ᠲᠥᠷᠥᠬᠦ ᠡᠴᠡ ᠡᠮᠦᠨᠡ᠂ ᠰᠠᠢᠨ ᠮᠠᠭᠤ ᠶᠢ ᠦᠢᠯᠡᠳᠬᠦ ᠡᠴᠡ ᠨᠢ ᠴᠤ ᠡᠮᠦᠨᠡ᠂ 12 ᠪᠤᠷᠬᠠᠨ 《ᠦᠢᠯᠡᠰ ᠦᠨ ᠳᠠᠭᠠᠤ ᠪᠤᠰᠤ᠂ ᠳᠠᠭᠤᠳᠠᠯᠭᠠ ᠶᠢᠨ ᠳᠠᠭᠠᠤ》 ᠰᠣᠩ᠋ᠭᠣᠬᠤ ᠵᠠᠷᠴᠢᠮ ᠢᠶᠠᠷ ᠢᠶᠠᠨ ᠷᠧᠪᠧᠺᠠ ᠳᠤ᠄ 《ᠠᠬᠠ ᠨᠢ ᠳᠡᠭᠦᠦ ᠳᠡᠭᠡᠨ ᠵᠠᠷᠤᠴᠠᠯᠠᠭᠳᠠᠨᠠ》 ᠭᠡᠵᠡᠢ᠃ 13 ᠡᠨᠡ ᠨᠢ 《ᠪᠢ ᠶᠠᠺᠣᠪ ᠢ ᠬᠠᠢᠷᠠᠯᠠᠵᠤ᠂ ᠡᠰᠠᠦ᠋ ᠶᠢ ᠵᠢᠭ᠍ᠰᠢᠭᠰᠡᠨ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨᠴᠢᠯᠡᠨ ᠪᠣᠯᠪᠠ᠃
14 ᠡᠳᠡᠭᠡᠷ ᠦᠨ ᠲᠤᠬᠠᠢ ᠪᠢᠳᠡ ᠶᠠᠭᠤ ᠬᠡᠯᠡᠬᠦ ᠪᠤᠢ︖ ᠪᠤᠷᠬᠠᠨ ᠭᠣᠣᠯᠴᠢ ᠪᠤᠰᠤ ᠭᠡᠵᠢ ᠤᠤ︖ ᠣᠭᠲᠣ ᠲᠡᠢᠮᠦ ᠪᠢᠰᠢ᠃ 15 ᠲᠡᠷᠡ ᠮᠣᠰᠧ ᠳᠤ᠄ 《ᠪᠢ ᠡᠨᠡᠷᠢᠬᠦ ᠬᠥᠮᠦᠨ ᠢᠶᠡᠨ ᠡᠨᠡᠷᠢᠵᠦ᠂ ᠥᠷᠥ ᠡᠪᠡᠳᠬᠦ ᠬᠥᠮᠦᠨ ᠢᠶᠡᠨ ᠥᠷᠥ ᠡᠪᠡᠳᠦᠨᠡ》 ᠭᠡᠵᠦ ᠪᠠᠢᠨᠠ᠃ 16 ᠲᠡᠢᠮᠦ ᠡᠴᠡ ᠬᠥᠮᠦᠨ ᠦ ᠰᠠᠨᠠᠭᠠ ᠪᠤᠶᠤ ᠴᠢᠷᠮᠠᠢᠯᠲᠠ ᠪᠠᠷ ᠪᠢᠰᠢ᠂ ᠡᠨᠡᠷᠢᠭ᠍ᠴᠢ ᠪᠤᠷᠬᠠᠨ ᠠᠴᠠ ᠰᠢᠯᠲᠠᠭᠠᠯᠠᠳᠠᠭ᠃ 17 ᠠᠷᠢᠭᠤᠨ ᠨᠣᠮ᠄ 《ᠪᠢ ᠴᠢᠮᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠬᠦᠴᠦ ᠪᠡᠨ ᠦᠵᠡᠭᠦᠯᠵᠦ ᠭᠠᠵᠠᠷ ᠳᠠᠶᠠᠭᠠᠷ ᠨᠡᠷᠡ ᠪᠡᠨ ᠲᠤᠩ᠋ᠬᠠᠭᠯᠠᠬᠤ ᠵᠣᠷᠢᠯᠭᠠ ᠪᠠᠷ ᠴᠢᠮᠠᠶᠢ ᠪᠣᠰᠬᠠᠭᠰᠠᠨ ᠶᠤᠮ》 ᠭᠡᠵᠦ ᠹᠠᠷᠠᠣ᠋ ᠳᠤ ᠠᠢᠯᠠᠳᠤᠭᠰᠠᠨ ᠪᠠᠢᠳᠠᠭ᠃ 18 ᠡᠢᠨ ᠬᠦ ᠪᠤᠷᠬᠠᠨ ᠰᠣᠩ᠋ᠭᠣᠭᠰᠠᠨ ᠬᠥᠮᠦᠨ ᠢᠶᠡᠨ ᠡᠨᠡᠷᠢᠳᠡᠭ᠂ ᠰᠣᠩ᠋ᠭᠣᠭᠰᠠᠨ ᠬᠥᠮᠦᠨ ᠢᠶᠡᠨ ᠬᠠᠲᠠᠭᠤᠷᠠᠭᠤᠯᠳᠠᠭ᠃
19 ᠲᠡᠭᠡᠪᠡᠯ 《ᠪᠤᠷᠬᠠᠨ ᠶᠠᠭᠤᠨ ᠳᠤ ᠪᠤᠷᠤᠭᠤᠳᠬᠠᠭᠰᠠᠭᠠᠷ ᠪᠠᠢᠨᠠ ᠪᠤᠢ︖ ᠲᠡᠭᠦᠨ ᠦ ᠲᠠᠭᠠᠯᠠᠯ ᠢ ᠬᠡᠨ ᠡᠰᠡᠷᠭᠦᠴᠡᠨᠡ ᠪᠤᠢ︖》 ᠭᠡᠵᠦ ᠨᠠᠳᠠ ᠳᠤ ᠬᠡᠯᠡᠵᠦ ᠮᠡᠳᠡᠨᠡ᠃ 20 ᠥ᠂ ᠬᠥᠮᠦᠨ ᠡ᠂ ᠲᠠ ᠬᠡᠨ ᠪᠣᠯᠣᠭᠠᠳ ᠪᠤᠷᠬᠠᠨ ᠲᠠᠢ ᠥᠰᠢᠶᠡᠷᠬᠡᠨᠡ ᠪᠤᠢ︖ ᠪᠦᠲᠦᠭᠡᠯ ᠨᠢ ᠪᠦᠲᠦᠭᠡᠭᠴᠢ ᠳᠡᠭᠡᠨ᠄ 《ᠲᠠ ᠶᠠᠭᠤᠨ ᠳᠤ ᠨᠠᠮᠠᠶᠢ ᠢᠩᠭᠢᠵᠦ ᠬᠢᠭᠰᠡᠨ ᠪᠤᠢ︖》 ᠭᠡᠨᠡ ᠤᠤ︖ 21 ᠸᠠᠭᠠᠷᠴᠢᠨ ᠠᠳᠠᠯᠢᠬᠠᠨ ᠪᠥᠭᠡᠮ ᠰᠢᠪᠠᠷ ᠢᠶᠠᠷ ᠨᠠᠨᠳᠢᠨ ᠰᠠᠪᠠ ᠶᠢ ᠴᠤ᠂ ᠵᠢᠷ ᠤᠨ ᠰᠠᠪᠠ ᠶᠢ ᠴᠤ ᠬᠢᠬᠦ ᠡᠷᠬᠡ ᠦᠭᠡᠢ ᠭᠡᠵᠢ ᠤᠤ︖ 22 ᠪᠤᠷᠬᠠᠨ ᠠᠭᠤᠷ ᠢᠶᠠᠨ ᠭᠠᠷᠭᠠᠨ ᠬᠦᠴᠦ ᠪᠡᠨ ᠦᠵᠡᠭᠦᠯᠵᠦ ᠪᠣᠯᠬᠤ ᠪᠠᠢᠭᠰᠠᠨ ᠴᠤ ᠰᠦᠢᠷᠡᠯ ᠳᠦ ᠪᠡᠯᠡᠳᠬᠡᠭᠰᠡᠨ ᠠᠭᠤᠷ ᠬᠢᠯᠢᠩ ᠤᠨ ᠰᠠᠪᠠ ᠨᠤᠭᠤᠳ ᠢ ᠶᠡᠬᠡᠳᠡ ᠲᠡᠪᠴᠢᠶᠡᠷᠢ ᠲᠠᠢ ᠪᠠᠷ ᠬᠦᠯᠢᠴᠡᠭᠰᠡᠨ ᠪᠢᠰᠢ ᠤᠤ︖ ᠪᠠᠰᠠ 23 ᠤᠷᠢᠳᠤ ᠠᠴᠠ ᠪᠡᠯᠡᠳᠬᠡᠭᠰᠡᠨ ᠠᠯᠳᠠᠷ ᠰᠤᠤᠲᠤ ᠡᠨᠡᠷᠢᠯ ᠤᠨ ᠰᠠᠪᠠ ᠨᠤᠭᠤᠳ ᠢᠶᠠᠷ ᠥᠪᠡᠷ ᠦᠨ ᠢᠶᠠᠨ ᠦᠯᠡᠮᠵᠢ ᠠᠯᠳᠠᠷ ᠰᠤᠤ ᠶᠢ ᠮᠡᠳᠡᠭᠳᠡᠭᠰᠡᠨ ᠪᠢᠰᠢ ᠤᠤ︖ 24 ᠪᠤᠷᠬᠠᠨ ᠡᠨᠡᠷᠢᠯ ᠤᠨ ᠰᠠᠪᠠ ᠨᠤᠭᠤᠳ ᠪᠣᠯᠬᠤ ᠪᠢᠳᠡᠨ ᠢ ᠶᠦᠳᠠᠢᠴᠤᠳ ᠢᠶᠠᠷ ᠦᠯᠦ ᠪᠠᠷᠠᠮ᠂ ᠬᠠᠷᠢᠴᠤᠳ ᠤᠨ ᠳᠤᠮᠳᠠ ᠠᠴᠠ ᠴᠤ ᠳᠠᠭᠤᠳᠠᠭᠰᠠᠨ᠃ 25 ᠡᠭᠦᠨ ᠦ ᠲᠤᠬᠠᠢ ᠬᠣᠰᠧᠶᠠ ᠨᠣᠮ ᠳᠤ᠄ 《ᠪᠢ ᠥᠪᠡᠷ ᠦᠨ ᠬᠢ ᠪᠤᠰᠤ ᠠᠷᠠᠳ ᠲᠦᠮᠡᠨ ᠢ 〈ᠥᠪᠡᠷ ᠦᠨ ᠠᠷᠠᠳ ᠲᠦᠮᠡᠨ〉 ᠭᠡᠵᠦ᠂ ᠬᠠᠢᠷᠠᠲᠤ ᠪᠤᠰᠤ ᠪᠠᠨ 〈ᠬᠠᠢᠷᠠᠲᠤ〉 ᠭᠡᠵᠦ ᠳᠠᠭᠤᠳᠠᠬᠤ ᠪᠣᠯᠣᠨᠠ᠃ 26 ᠪᠠᠰᠠ ᠲᠡᠳᠡ 〈ᠲᠠ ᠨᠠᠷ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠢᠰᠢ〉 ᠭᠡᠭᠳᠡᠭᠰᠡᠨ ᠭᠠᠵᠠᠷ ᠳᠡᠭᠡᠷᠡ ᠪᠡᠨ 〈ᠠᠮᠢᠳᠤ ᠪᠤᠷᠬᠠᠨ ᠤ ᠬᠡᠦᠬᠡᠳ ᠤᠳ〉 ᠭᠡᠵᠦ ᠳᠠᠭᠤᠳᠠᠭᠳᠠᠬᠤ ᠪᠣᠯᠣᠨᠠ》 ᠭᠡᠰᠡᠨ᠃
27 ᠢᠰᠠᠢᠶᠠ ᠢᠰᠷᠧᠯ ᠤᠨ ᠲᠤᠬᠠᠢ ᠥᠨᠳᠥᠷ ᠳᠠᠭᠤ ᠪᠠᠷ᠄ 《ᠢᠰᠷᠧᠯᠴᠦᠳ ᠦᠨ ᠲᠣᠭᠠ ᠳᠠᠯᠠᠢ ᠶᠢᠨ ᠡᠯᠡᠰᠦ ᠮᠡᠲᠦ ᠪᠠᠢᠯᠠ ᠴᠤ ᠦᠯᠡᠳᠡᠭᠰᠡᠳ ᠨᠢ ᠯᠠ ᠠᠪᠤᠷᠠᠭᠳᠠᠨᠠ᠃ 28 ᠤᠴᠢᠷ ᠨᠢ ᠡᠵᠡᠨ ᠠᠢᠯᠠᠳᠤᠭᠰᠠᠨ ᠢᠶᠠᠨ ᠭᠠᠵᠠᠷ ᠳᠡᠭᠡᠷᠡ ᠭᠦᠢᠴᠡᠳ ᠲᠦᠷᠭᠡᠨ ᠪᠡᠶᠡᠯᠡᠭᠦᠯᠦᠨᠡ》 ᠭᠡᠪᠡ᠃ 29 ᠤᠷᠢᠳᠠ ᠠᠴᠠ ᠢᠰᠠᠢᠶᠠ᠄ 《ᠲᠦᠮᠡᠨ ᠴᠡᠷᠢᠭ ᠤᠨ ᠡᠵᠡᠨ ᠪᠢᠳᠡᠨ ᠳᠦ ᠦᠷᠡ ᠬᠣᠢᠴᠢ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ ᠪᠣᠯ᠂ ᠪᠢᠳᠡ ᠰᠣᠳᠣᠮ ᠰᠢᠭ᠋᠂ ᠭᠣᠮᠣᠷᠠ ᠮᠡᠲᠦ ᠪᠣᠯᠬᠤ ᠪᠠᠢᠭᠰᠠᠨ》 ᠭᠡᠰᠡᠨ ᠶᠤᠮ᠃
ᠢᠰᠷᠧᠯ ᠤᠨ ᠬᠣᠭᠣᠰᠣᠨ ᠴᠢᠷᠮᠠᠢᠯᠭᠠ
30 ᠡᠳᠡᠭᠡᠷ ᠦᠨ ᠲᠤᠬᠠᠢ ᠪᠢᠳᠡ ᠶᠠᠭᠤ ᠬᠡᠯᠡᠬᠦ ᠪᠤᠢ︖ ᠵᠥᠪ ᠢ ᠬᠥᠭᠡᠭᠡᠴᠡᠯᠳᠦᠭᠡ ᠦᠭᠡᠢ ᠬᠠᠷᠢᠴᠤᠳ ᠵᠥᠪ᠂ ᠲᠤᠬᠠᠢᠯᠠᠪᠠᠯ ᠢᠲᠡᠭᠡᠯ ᠡᠴᠡ ᠰᠢᠯᠲᠠᠭᠠᠯᠠᠳᠠᠭ ᠵᠥᠪ ᠢ ᠣᠯᠣᠭᠰᠠᠨ ᠪᠠᠢᠬᠤ ᠳᠤ᠂ 31 ᠵᠥᠪ ᠦᠨ ᠬᠠᠤᠯᠢ ᠶᠢ ᠬᠥᠭᠡᠭᠡᠴᠡᠯᠳᠦᠭᠰᠡᠨ ᠢᠰᠷᠧᠯ ᠲᠡᠷᠡ ᠬᠠᠤᠯᠢ ᠳᠤ ᠬᠦᠷᠦᠭᠰᠡᠨ ᠦᠭᠡᠢ᠃ 32 ᠶᠠᠭᠤᠨ ᠤ ᠤᠴᠢᠷ ᠪᠤᠢ︖ ᠲᠡᠳᠡ ᠢᠲᠡᠭᠡᠯ ᠢᠶᠡᠷ ᠪᠢᠰᠢ᠂ ᠦᠢᠯᠡᠰ ᠢᠶᠡᠷ ᠬᠥᠭᠡᠭᠡᠴᠡᠯᠳᠦᠭᠰᠡᠨ᠃ ᠲᠡᠳᠡ ᠪᠦᠳᠦᠷᠢᠭᠦᠯᠦᠭᠴᠢ ᠴᠢᠯᠠᠭᠤᠨ ᠳᠤ ᠪᠦᠳᠦᠷᠢᠵᠡᠭᠡᠵᠡᠢ᠃ 33 ᠡᠨᠡ ᠨᠢ᠄ 《ᠬᠠᠷᠠ᠂ ᠪᠢ ᠪᠦᠳᠦᠷᠢᠭᠦᠯᠬᠦ ᠴᠢᠯᠠᠭᠤ᠂ ᠣᠢᠴᠢᠭᠤᠯᠬᠤ ᠬᠠᠳᠠ ᠶᠢ ᠽᠢᠶᠣᠨ ᠳᠤ ᠲᠠᠯᠪᠢᠨᠠ᠂ ᠲᠡᠭᠦᠨ ᠳᠦ ᠢᠲᠡᠭᠡᠭᠴᠢ ᠨᠢ ᠢᠴᠢᠭᠦᠷᠢ ᠳᠤ ᠣᠷᠣᠬᠤ ᠦᠭᠡᠢ》 ᠭᠡᠰᠡᠨ ᠲᠡᠢ ᠠᠳᠠᠯᠢ᠃