ᠡᠽᠧᠺᠢᠶᠧᠯ ᠳᠥᠷᠪᠡ
ᠶᠧᠷᠦ᠋ᠰᠠᠯᠧᠮ ᠪᠦᠰᠡᠯᠡᠭᠳᠡᠬᠦ ᠲᠤᠬᠠᠢ ᠳᠦᠷᠰᠦᠯᠡᠯ
1 ᠬᠥᠮᠦᠨ ᠦ ᠬᠦᠦ ᠴᠢ ᠰᠢᠪᠠᠷ ᠰᠠᠮᠪᠠᠷᠠ ᠠᠪᠴᠢᠷᠠᠵᠤ᠂ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠲᠠᠯᠪᠢᠭᠠᠳ᠂ ᠳᠡᠭᠡᠷᠡ ᠨᠢ ᠨᠢᠭᠡ ᠬᠣᠲᠠ᠂ ᠲᠤᠬᠠᠢᠯᠠᠪᠠᠯ ᠶᠧᠷᠦ᠋ᠰᠠᠯᠧᠮ ᠢ ᠰᠡᠢᠯ᠂ 2 ᠲᠡᠭᠡᠭᠡᠳ ᠲᠡᠭᠦᠨ ᠢ ᠲᠣᠭᠣᠷᠢᠭᠤᠯᠤᠨ ᠴᠠᠮᠬᠠᠭ ᠪᠠᠷᠢᠵᠤ᠂ ᠪᠡᠬᠢᠯᠡᠯᠲᠡ ᠪᠣᠰᠬᠠᠨ᠂ ᠬᠤᠸᠠᠷᠠᠨ ᠨᠤᠭᠤᠳ ᠪᠠᠢᠭᠤᠯᠵᠤ᠂ ᠡᠷᠭᠢᠨ ᠲᠣᠭᠣᠷᠢᠨ ᠳᠤᠨᠢ ᠨᠤᠷᠠᠭᠠᠭᠤᠷ ᠢ ᠪᠠᠢᠷᠢᠯᠠᠭᠤᠯ᠃ 3 ᠲᠡᠭᠡᠭᠡᠳ ᠲᠡᠮᠦᠷ ᠬᠠᠢᠪᠢ ᠠᠪᠴᠢᠷᠠᠵᠤ᠂ ᠲᠡᠭᠦᠨ ᠢ ᠬᠣᠲᠠ ᠪᠠ ᠥᠪᠡᠷ ᠦᠨ ᠢᠶᠠᠨ ᠬᠣᠭᠣᠷᠣᠨᠳᠣ ᠲᠡᠮᠦᠷ ᠬᠡᠷᠡᠮ ᠮᠡᠲᠦ ᠪᠣᠰᠬᠠᠵᠤ᠂ ᠨᠢᠭᠤᠷ ᠢᠶᠠᠨ ᠲᠡᠭᠦᠨ ᠤᠷᠤᠭᠤ ᠬᠠᠨᠳᠤᠭᠤᠯᠤᠭᠠᠷᠠᠢ᠃ ᠲᠡᠢᠨ ᠬᠦ ᠴᠢ ᠲᠡᠷᠡ ᠬᠣᠲᠠ ᠶᠢ ᠪᠦᠰᠡᠯᠡᠵᠦ᠂ ᠲᠡᠷᠡ ᠪᠦᠰᠡᠯᠡᠭᠳᠡᠨᠡ᠃ ᠢᠰᠷᠧᠯ ᠤᠨ ᠭᠡᠷ ᠲᠦ ᠥᠭᠬᠦ ᠲᠡᠮᠳᠡᠭ ᠡᠨᠡ ᠶᠤᠮ᠃
4 ᠴᠢ ᠵᠡᠭᠦᠨ ᠲᠠᠯᠠ ᠪᠠᠷ ᠢᠶᠠᠨ ᠬᠡᠪᠲᠡᠵᠦ᠂ ᠢᠰᠷᠧᠯ ᠤᠨ ᠭᠡᠷ ᠦᠨ ᠨᠢᠭᠦᠯ ᠢ ᠥᠪᠡᠷ ᠦᠨ ᠢᠶᠠᠨ ᠳᠡᠭᠡᠷᠡ ᠲᠠᠯᠪᠢ᠃ ᠢᠩᠭᠢᠵᠦ ᠬᠠᠵᠠᠭᠤᠯᠳᠠᠨ ᠬᠡᠪᠲᠡᠬᠦ ᠬᠣᠨᠣᠭ ᠤᠨ ᠢᠶᠠᠨ ᠲᠣᠭᠠ ᠪᠠᠷ ᠴᠢ ᠲᠡᠳᠡᠨ ᠦ ᠨᠢᠭᠦᠯ ᠢ ᠡᠭᠦᠷᠬᠦ ᠪᠣᠯᠣᠨᠠ᠃ 5 ᠪᠢ ᠲᠡᠳᠡᠨ ᠦ ᠨᠢᠭᠦᠯ ᠦᠨ ᠵᠢᠯ ᠤᠳ ᠲᠤ ᠨᠡᠢᠴᠡᠬᠦ ᠬᠣᠨᠣᠭ ᠤᠨ ᠲᠣᠭᠠ ᠶᠢ ᠴᠢᠮᠠ ᠳᠡᠭᠡᠷᠡ ᠲᠣᠬᠣᠭᠰᠠᠨ᠃ ᠴᠢ ᠢᠰᠷᠧᠯ ᠤᠨ ᠭᠡᠷ ᠦᠨ ᠨᠢᠭᠦᠯ ᠢ ᠭᠤᠷᠪᠠᠨ ᠵᠠᠭᠤ ᠶᠡᠷᠡᠨ ᠡᠳᠦᠷ ᠡᠭᠦᠷᠦᠨᠡ᠃ 6 ᠴᠢ ᠡᠭᠦᠨ ᠢ ᠳᠠᠭᠤᠰᠬᠠᠭᠰᠠᠨ ᠤ ᠳᠠᠷᠠᠭᠠ᠂ ᠳᠠᠬᠢᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠢᠶᠠᠨ ᠬᠡᠪᠲᠡᠵᠦ᠂ ᠶᠦᠳᠠ ᠶᠢᠨ ᠭᠡᠷ ᠦᠨ ᠨᠢᠭᠦᠯ ᠢ ᠡᠭᠦᠷ᠃ ᠪᠢ ᠨᠢᠭᠡ ᠵᠢᠯ ᠢ ᠨᠢᠭᠡ ᠡᠳᠦᠷ ᠢᠶᠡᠷ ᠪᠣᠳᠣᠨ᠂ ᠴᠢᠮᠠ ᠳᠡᠭᠡᠷᠡ ᠳᠥᠴᠢᠨ ᠡᠳᠦᠷ ᠢ ᠲᠣᠬᠣᠯᠠ᠃ 7 ᠴᠢ ᠪᠦᠰᠡᠯᠡᠭᠳᠡᠭᠰᠡᠨ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠨᠢᠭᠤᠷ ᠢᠶᠠᠨ ᠬᠠᠨᠳᠤᠭᠤᠯᠵᠤ᠂ ᠬᠠᠨᠴᠤᠢ ᠪᠠᠨ ᠰᠢᠮᠠᠯᠠᠨ᠂ ᠡᠰᠢ ᠦᠵᠡᠭᠦᠯ᠃ 8 ᠬᠠᠷᠠ᠂ ᠪᠢ ᠴᠢᠮᠠᠶᠢ ᠣᠯᠣᠰᠣ ᠪᠠᠷ ᠬᠦᠯᠢᠬᠦ ᠪᠣᠯᠣᠨᠠ᠃ ᠢᠩᠭᠢᠭᠰᠡᠨ ᠢᠶᠡᠷ ᠴᠢ ᠪᠦᠰᠡᠯᠡᠯᠲᠡ ᠶᠢᠨ ᠢᠶᠠᠨ ᠡᠳᠦᠷ ᠤᠳ ᠢ ᠳᠠᠭᠤᠰᠬᠠᠬᠤ ᠬᠦᠷᠲᠡᠯᠡ ᠨᠢᠭᠡ ᠲᠠᠯᠠ ᠠᠴᠠ ᠨᠥᠭᠥᠭᠡ ᠲᠠᠯᠠ ᠤᠷᠤᠭᠤ ᠪᠠᠨ ᠡᠷᠭᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠨᠠ᠃
9 ᠬᠠᠷᠢᠨ ᠴᠢ ᠨᠢᠭᠡ ᠰᠠᠪᠠᠨ ᠳᠤ ᠤᠯᠠᠭᠠᠨ ᠪᠤᠭᠤᠳᠠᠢ᠂ ᠠᠷᠪᠠᠢ᠂ ᠪᠤᠷᠴᠠᠭ᠂ ᠤᠯᠠᠭᠠᠨ ᠪᠤᠷᠴᠠᠭ᠂ ᠬᠠᠷᠠ ᠪᠤᠳᠠᠭᠠ ᠪᠠ ᠰᠢᠷᠠ ᠪᠤᠳᠠᠭᠠ ᠬᠢᠵᠦ᠂ ᠲᠡᠳᠡᠭᠡᠷ ᠢᠶᠡᠷ ᠪᠣᠣᠪᠣ ᠬᠢ᠂ ᠲᠡᠭᠡᠭᠡᠳ ᠬᠠᠵᠠᠭᠤᠯᠳᠠᠨ ᠬᠡᠪᠲᠡᠬᠦ ᠭᠤᠷᠪᠠᠨ ᠵᠠᠭᠤ ᠶᠡᠷᠡᠨ ᠡᠳᠦᠷ ᠦᠨ ᠲᠤᠷᠰᠢ ᠲᠡᠭᠦᠨ ᠢ ᠢᠳᠡ᠃ 10 ᠴᠢ ᠡᠳᠦᠷ ᠪᠦᠷᠢ ᠴᠠᠭ ᠲᠠᠭᠠᠨ ᠬᠣᠷᠢᠨ ᠱᠧᠺᠧᠯ 2 ᠤᠨ ᠬᠡᠮᠵᠢᠶᠡ ᠲᠠᠢ ᠢᠳᠡᠭᠡᠨ ᠢᠳᠡᠵᠦ᠂ 11 ᠴᠠᠭ ᠲᠠᠭᠠᠨ ᠾᠢᠨ ᠤ ᠵᠢᠷᠭᠤᠭᠠᠨ ᠤ ᠨᠢᠭᠡ ᠶᠢᠨ ᠬᠡᠮᠵᠢᠶᠡ ᠲᠠᠢ ᠤᠰᠤ ᠤᠤᠭᠤᠬᠤ ᠪᠣᠯᠣᠨᠠ᠃ 12 ᠴᠢ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠠᠷᠪᠠᠢ ᠶᠢᠨ ᠪᠣᠭᠣᠷᠰᠣᠭ ᠵᠡᠷᠭᠡ ᠶᠢ ᠬᠥᠮᠦᠨ ᠦ ᠪᠠᠭᠠᠰᠤ ᠪᠠᠷ ᠪᠣᠯᠭᠣᠵᠤ ᠢᠳᠡᠨᠡ》 ᠭᠡᠪᠡ᠃ 13 ᠶᠣᠬᠣᠸᠠ᠄ 《ᠡᠢᠨ ᠬᠦ ᠪᠢ ᠢᠰᠷᠧᠯᠴᠦᠳ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠴᠥᠯᠡᠪᠡᠯ᠂ ᠲᠡᠳᠡ ᠲᠡᠨᠳᠡ ᠪᠤᠵᠠᠷ ᠪᠣᠣᠪᠣ ᠪᠠᠨ ᠢᠳᠡᠬᠦ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 14 ᠪᠢ᠄ 《ᠥ᠂ ᠡᠵᠡᠨ ᠶᠣᠬᠣᠸᠠ ᠡ᠂ ᠬᠠᠷᠠᠭᠠᠴᠢ᠂ ᠪᠢ ᠶᠡᠷᠦ ᠡᠴᠡ ᠪᠡᠨ ᠪᠡᠶᠡ ᠪᠡᠨ ᠪᠤᠵᠠᠷᠲᠤᠭᠤᠯᠵᠤ ᠪᠠᠢᠭᠠ ᠦᠭᠡᠢ︕ ᠪᠢ ᠪᠠᠭᠠ ᠠᠴᠠ ᠪᠠᠨ ᠡᠳᠦᠭᠡ ᠬᠦᠷᠲᠡᠯᠡ ᠥᠪᠡᠷ ᠢᠶᠡᠨ ᠦᠬᠦᠭᠰᠡᠨ ᠪᠤᠶᠤ ᠠᠷᠢᠶᠠᠲᠠᠨ ᠳᠤ ᠲᠠᠰᠤᠳᠠᠴᠢᠭᠤᠯᠤᠨ ᠦᠬᠦᠭᠰᠡᠨ ᠠᠮᠢᠲᠠᠨ ᠢ ᠬᠡᠵᠢᠶᠡ ᠴᠤ ᠢᠳᠡᠵᠦ ᠪᠠᠢᠭᠠ ᠦᠭᠡᠢ᠂ ᠮᠥᠨ ᠴᠡᠪᠡᠷ ᠪᠤᠰᠤ ᠮᠢᠬᠠ ᠶᠢ ᠠᠮᠠᠨ ᠳᠠᠭᠠᠨ ᠣᠷᠣᠭᠤᠯᠵᠤ ᠪᠠᠢᠭᠠ ᠦᠭᠡᠢ》 ᠭᠡᠪᠡ᠃ 15 ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠵᠠ᠂ ᠪᠢ ᠴᠢᠮᠠ ᠳᠤ ᠬᠥᠮᠦᠨ ᠦ ᠪᠠᠭᠠᠰᠤᠨ ᠤ ᠣᠷᠣᠨ ᠳᠤ ᠠᠷᠭᠠᠯ ᠥᠭᠭᠥᠶᠡ᠃ ᠴᠢ ᠲᠡᠭᠦᠨ ᠳᠡᠭᠡᠷᠡ ᠪᠣᠣᠪᠣ ᠪᠠᠨ ᠬᠢᠭᠲᠦᠨ》 ᠭᠡᠪᠡ᠃
16 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠬᠠᠷᠠ᠃ ᠪᠢ ᠶᠧᠷᠦ᠋ᠰᠠᠯᠧᠮ ᠤᠨ ᠬᠦᠨᠡᠰᠦᠨ ᠦ ᠬᠠᠩ᠋ᠭᠠᠯᠭᠠ ᠶᠢ ᠲᠠᠰᠤᠯᠬᠤ ᠭᠡᠵᠦ ᠪᠠᠢᠨᠠ᠃ ᠬᠥᠮᠦᠰ ᠬᠦᠨᠡᠰᠦ ᠪᠡᠨ ᠵᠢᠩᠯᠡᠨ ᠵᠣᠪᠠᠨᠢᠯ ᠲᠠᠢ ᠪᠠᠷ ᠢᠳᠡᠵᠦ᠂ ᠤᠰᠤ ᠪᠠᠨ ᠬᠡᠮᠵᠢᠵᠦ ᠲᠦᠭᠰᠢᠭᠦᠷᠢ ᠲᠠᠢ ᠪᠠᠷ ᠤᠤᠭᠤᠨᠠ᠃ 17 ᠲᠡᠭᠡᠭᠡᠳ ᠬᠦᠨᠡᠰᠦ ᠤᠰᠤ ᠨᠢ ᠬᠣᠮᠰᠠ ᠪᠣᠯᠬᠤ ᠳᠤ᠂ ᠲᠡᠳᠡ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠨ ᠲᠦᠭᠰᠢᠵᠦ᠂ ᠨᠢᠭᠦᠯ ᠦᠨ ᠢᠶᠠᠨ ᠤᠯᠠᠮ ᠢᠶᠠᠷ ᠡᠴᠡᠵᠦ ᠲᠤᠷᠠᠨᠠ᠃