ᠡᠽᠧᠺᠢᠶᠧᠯ ᠬᠣᠷᠢᠨ ᠲᠠᠪᠤ
ᠠᠮᠣᠨ ᠤ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠯᠭᠡ
1 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄ 2 《ᠬᠥᠮᠦᠨ ᠦ ᠬᠦᠦ ᠡ᠂ ᠠᠮᠣᠨᠴᠤᠳ ᠤᠷᠤᠭᠤ ᠨᠢᠭᠤᠷ ᠢᠶᠠᠨ ᠬᠠᠨᠳᠤᠭᠤᠯᠵᠤ᠂ ᠲᠡᠳᠡᠨ ᠦ ᠡᠰᠡᠷᠭᠦ ᠡᠰᠢ ᠦᠵᠡᠭᠦᠯᠦᠨ᠂ 3 ᠠᠮᠣᠨᠴᠤᠳ ᠲᠤ ᠶᠠᠷᠢ᠄ 〈ᠡᠵᠡᠨ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰ︕ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠠᠷᠢᠭᠤᠨ ᠭᠠᠵᠠᠷ ᠮᠢᠨᠢ ᠪᠤᠵᠠᠷᠯᠠᠭᠳᠠᠬᠤ ᠳᠤ᠂ ᠢᠰᠷᠧᠯ ᠤᠨ ᠨᠤᠲᠤᠭ ᠡᠵᠡᠭᠦᠢᠷᠡᠬᠦ ᠳᠦ᠂ ᠶᠦᠳᠠ ᠶᠢᠨ ᠭᠡᠷ ᠦᠨ ᠬᠢᠨ ᠴᠥᠯᠡᠭᠳᠡᠬᠦ ᠳᠦ ᠴᠢ 〈ᠬᠠ᠂ ᠬᠠ〉 ᠬᠡᠮᠡᠭᠰᠡᠨ᠃ 4 ᠲᠡᠢᠮᠦ ᠡᠴᠡ ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠴᠢᠮᠠᠶᠢ ᠳᠣᠷᠣᠨᠠ ᠶᠢᠨ ᠦᠨᠳᠦᠰᠦᠲᠡᠨ ᠦ ᠥᠮᠴᠢ ᠪᠣᠯᠭᠠᠨ ᠲᠡᠳᠡᠨ ᠳᠦ ᠥᠭᠭᠥᠨᠡ᠃ ᠲᠡᠳᠡ ᠴᠢᠨᠦ ᠬᠣᠲᠠ ᠶᠢᠨ ᠳᠤᠮᠳᠠ ᠬᠤᠸᠠᠷᠠᠨ ᠢᠶᠠᠨ ᠪᠠᠷᠢᠵᠤ᠂ ᠭᠡᠷ ᠤᠳ ᠢᠶᠠᠨ ᠪᠣᠰᠬᠠᠨ᠂ ᠦᠷᠡ ᠵᠢᠮᠢᠰ ᠢ ᠴᠢᠨᠢ ᠢᠳᠡᠵᠦ᠂ ᠰᠦ᠋ ᠶᠢ ᠴᠢᠨᠢ ᠤᠤᠭᠤᠬᠤ ᠪᠣᠯᠣᠨᠠ᠃ 5 ᠪᠢ ᠷᠠᠪᠠ ᠶᠢ ᠲᠡᠮᠡᠭᠡᠨ ᠦ ᠪᠡᠯᠴᠢᠭᠡᠷ᠂ ᠠᠮᠣᠨ ᠢ ᠬᠣᠨᠢᠨ ᠤ ᠬᠡᠪᠲᠡᠷᠢ ᠪᠣᠯᠭᠠᠨᠠ᠃ ᠲᠡᠢᠨ ᠬᠦ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃〉》 6 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠴᠢ ᠢᠰᠷᠧᠯ ᠤᠨ ᠨᠤᠲᠤᠭ ᠢ ᠲᠤᠢᠯ ᠢᠶᠠᠷ ᠵᠢᠭ᠍ᠰᠢᠨ᠂ ᠠᠯᠠᠭᠠ ᠪᠠᠨ ᠲᠠᠰᠢᠵᠤ᠂ ᠬᠥᠯ ᠢᠶᠡᠨ ᠳᠡᠪᠰᠡᠯᠡᠨ ᠰᠡᠳᠬᠢᠯ ᠳᠡᠭᠡᠨ ᠳᠠᠪᠠᠯᠠᠭᠰᠠᠨ᠃ 7 ᠪᠢ ᠴᠢᠮᠠ ᠤᠷᠤᠭᠤ ᠮᠤᠲᠤᠷ ᠢᠶᠠᠨ ᠰᠤᠩ᠋ᠭᠠᠵᠤ᠂ ᠴᠢᠮᠠᠶᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠲᠦ ᠣᠯᠵᠠ ᠪᠣᠯᠭᠠᠨ ᠥᠭᠭᠥᠨᠡ᠃ ᠪᠢ ᠴᠢᠮᠠᠶᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡᠴᠡ ᠲᠠᠰᠤᠯᠤᠨ᠂ ᠭᠦᠷᠦᠨ ᠨᠦᠭᠦᠳ ᠡᠴᠡ ᠤᠰᠠᠳᠬᠠᠵᠤ ᠰᠥᠨᠥᠭᠡᠨᠡ᠃ ᠡᠢᠨ ᠬᠦ ᠴᠢ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃》
ᠮᠣᠶᠠᠪ ᠤᠨ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠯᠭᠡ
8 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠮᠣᠶᠠᠪ ᠪᠣᠯᠣᠨ ᠰᠧᠷ᠄ 〈ᠬᠠᠷᠠ᠂ ᠶᠦᠳᠠ ᠶᠢᠨ ᠭᠡᠷ ᠪᠤᠰᠤᠳ ᠪᠦᠬᠦ ᠦᠨᠳᠦᠰᠦᠲᠡᠨ ᠲᠡᠢ ᠠᠳᠠᠯᠢ〉 ᠭᠡᠯᠴᠡᠳᠡᠭ᠃ 9 ᠲᠡᠢᠮᠦ ᠡᠴᠡ ᠪᠢ ᠲᠡᠷᠡ ᠨᠤᠲᠤᠭ ᠤᠨ ᠪᠠᠬᠠᠷᠬᠠᠯ ᠪᠣᠯᠬᠤ ᠪᠧᠲ ᠶᠧᠱᠢᠮᠣᠲ᠂ ᠪᠠᠯ ᠮᠧᠶᠣᠨ᠂ ᠺᠢᠷᠢᠶᠠᠲ᠋ᠠᠢᠮ ᠵᠡᠷᠭᠡ ᠬᠢᠯᠢ ᠬᠢᠵᠠᠭᠠᠷ ᠤᠨ ᠬᠣᠲᠠ ᠨᠤᠭᠤᠳ ᠠᠴᠠ ᠨᠢ ᠡᠬᠢᠯᠡᠨ ᠮᠣᠶᠠᠪ ᠤᠨ ᠬᠠᠵᠠᠭᠤ ᠲᠠᠯᠠ ᠶᠢ ᠣᠩ᠋ᠭᠣᠢᠯᠭᠠᠬᠤ ᠭᠡᠵᠦ ᠪᠠᠢᠨᠠ᠃ 10 ᠪᠢ ᠮᠣᠶᠠᠪ ᠢ ᠠᠮᠣᠨᠴᠤᠳ ᠲᠠᠢ ᠬᠠᠮᠲᠤ ᠳᠣᠷᠣᠨᠠ ᠶᠢᠨ ᠦᠨᠳᠦᠰᠦᠲᠡᠨ ᠳᠦ ᠥᠮᠴᠢ ᠪᠣᠯᠭᠠᠨ ᠥᠭᠭᠥᠨᠡ᠂ ᠡᠢᠨ ᠬᠦ ᠠᠮᠣᠨᠴᠤᠳ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠳᠤᠷᠠᠰᠤᠭᠳᠠᠬᠤ ᠦᠭᠡᠢ ᠪᠣᠯᠣᠨᠠ᠃ 11 ᠪᠢ ᠮᠣᠶᠠᠪ ᠲᠤ ᠰᠢᠳᠬᠡᠯ ᠪᠠᠭᠤᠯᠭᠠᠬᠤ ᠳᠤ᠂ ᠲᠡᠳᠡ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃》
ᠡᠳᠣᠮ ᠤᠨ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠯᠭᠡ
12 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠡᠳᠣᠮ ᠶᠦᠳᠠ ᠶᠢᠨ ᠭᠡᠷ ᠡᠴᠡ ᠥᠰᠢᠶᠡ ᠠᠪᠤᠭᠰᠠᠨ᠂ ᠬᠠᠷᠢᠨ ᠥᠰᠢᠶᠡ ᠠᠪᠤᠭᠰᠠᠨ ᠢᠶᠠᠷ ᠢᠶᠠᠨ ᠶᠡᠬᠡ ᠨᠢᠭᠦᠯ ᠦᠢᠯᠡᠳᠪᠡ᠃》 13 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠪᠢ ᠡᠳᠣᠮ ᠤᠷᠤᠭᠤ ᠮᠤᠲᠤᠷ ᠢᠶᠠᠨ ᠰᠤᠩ᠋ᠭᠠᠵᠤ᠂ ᠲᠡᠭᠦᠨ ᠡᠴᠡ ᠬᠥᠮᠦᠨ ᠠᠮᠢᠲᠠᠨ ᠢ ᠲᠠᠰᠤᠯᠤᠨ᠂ ᠲᠡᠭᠦᠨ ᠢ ᠪᠠᠯᠭᠠᠰᠤ ᠪᠣᠯᠭᠠᠨᠠ᠃ ᠲᠧᠮᠠᠨ ᠠᠴᠠ ᠳ᠋ᠧᠳᠠᠨ ᠬᠦᠷᠲᠡᠯᠡ ᠲᠡᠳᠡ ᠢᠯᠳᠦᠨ ᠳᠦ ᠤᠨᠠᠨᠠ᠃ 14 ᠪᠢ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠢᠶᠠᠨ ᠭᠠᠷ ᠢᠶᠠᠷ ᠡᠳᠣᠮ ᠠᠴᠠ ᠥᠰᠢᠶᠡ ᠪᠡᠨ ᠠᠪᠤᠨᠠ᠂ ᠲᠡᠳᠡ ᠮᠢᠨᠦ ᠠᠭᠤᠷ ᠬᠢᠯᠢᠩ ᠤᠨ ᠳᠠᠭᠠᠤ ᠡᠳᠣᠮ ᠳᠤ ᠦᠢᠯᠡᠳᠬᠦ ᠪᠣᠯᠣᠨᠠ᠃ ᠲᠡᠢᠨ ᠬᠦ ᠪᠢ ᠥᠰᠢᠶᠡ ᠠᠪᠴᠤ ᠪᠠᠢᠭᠠ ᠶᠢ ᠡᠳᠣᠮ ᠮᠡᠳᠡᠬᠦ ᠪᠣᠯᠣᠨᠠ᠃》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
ᠹᠢᠯᠢᠰᠲ ᠶᠢᠨ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠯᠭᠡ
15 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠹᠢᠯᠢᠰᠲ᠋ᠴᠦᠳ ᠡᠷᠲᠡᠨ ᠡᠴᠡ ᠶᠦᠳᠠ ᠶᠢ ᠳᠠᠢᠰᠤᠩᠨᠠᠨ ᠤᠰᠠᠳᠬᠠᠬᠤ ᠭᠡᠵᠦ ᠬᠣᠷᠣᠰᠣᠯ ᠲᠠᠢ ᠪᠠᠷ ᠦᠢᠯᠡᠳᠦᠨ᠂ ᠬᠣᠷᠣᠨ ᠮᠠᠭᠤ ᠰᠠᠨᠠᠭᠠ ᠪᠠᠷ ᠥᠰᠢᠶᠡ ᠠᠪᠤᠭᠰᠠᠨ ᠤᠴᠢᠷ ᠠᠴᠠ᠂ 16 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠪᠢ ᠹᠢᠯᠢᠰᠲ᠋ᠴᠦᠳ ᠤᠷᠤᠭᠤ ᠮᠤᠲᠤᠷ ᠢᠶᠠᠨ ᠰᠤᠩ᠋ᠭᠠᠵᠤ᠂ ᠬᠧᠷᠧᠲ᠋ᠴᠦᠳ ᠢ ᠲᠠᠰᠤᠯᠤᠨ᠂ ᠳᠠᠯᠠᠢ ᠶᠢᠨ ᠬᠥᠪᠡᠭᠡ ᠶᠢᠨ ᠦᠯᠡᠳᠡᠭᠰᠡᠳ ᠢ ᠴᠤ ᠤᠰᠠᠳᠬᠠᠨᠠ᠃ 17 ᠪᠢ ᠠᠭᠤᠷ ᠲᠠᠢ ᠪᠠᠷ ᠲᠡᠳᠡᠨ ᠢ ᠰᠢᠳᠬᠡᠨ᠂ ᠠᠶᠤᠮᠰᠢᠭᠲᠤ ᠥᠰᠢᠶᠡ ᠠᠪᠤᠯᠲᠠ ᠶᠢ ᠭᠦᠢᠴᠡᠯᠳᠦᠭᠦᠯᠬᠦ ᠪᠣᠯᠣᠨᠠ᠃ ᠪᠢ ᠲᠡᠳᠡᠨ ᠡᠴᠡ ᠥᠰᠢᠶᠡ ᠠᠪᠬᠤ ᠳᠤ᠂ ᠲᠡᠳᠡ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃