ᠡᠽᠧᠺᠢᠶᠧᠯ ᠬᠣᠷᠢᠨ ᠨᠠᠢ᠌ᠮᠠ
ᠲᠢᠷ ᠤᠨ ᠬᠠᠭᠠᠨ ᠤ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠯᠭᠡ
1 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄
2 《ᠬᠥᠮᠦᠨ ᠦ ᠬᠦᠦ ᠡ᠂ ᠲᠢᠷ ᠤᠨ ᠵᠠᠬᠢᠷᠤᠭᠴᠢ ᠳᠤ ᠶᠠᠷᠢ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠪᠠᠷᠳᠠᠮ ᠰᠠᠨᠠᠭᠠ ᠪᠠᠷ ᠴᠢ᠄ 〈ᠪᠢ ᠪᠤᠷᠬᠠᠨ᠂ ᠳᠠᠯᠠᠢ ᠶᠢᠨ ᠵᠢᠷᠦᠬᠡᠨ ᠳᠦ ᠪᠤᠷᠬᠠᠳ ᠤᠨ ᠰᠠᠭᠤᠳᠠᠯ ᠳᠤ ᠰᠠᠭᠤᠶᠠ〉 ᠭᠡᠳ ᠥᠪᠡᠷ ᠢᠶᠡᠨ ᠪᠤᠷᠬᠠᠨ ᠪᠢᠰᠢ ᠬᠥᠮᠦᠨ ᠪᠠᠢᠲᠠᠯᠠ ᠪᠠᠨ ᠥᠪᠡᠷ ᠦᠨ ᠢᠶᠠᠨ ᠰᠠᠨᠠᠭᠠ ᠶᠢ ᠪᠤᠷᠬᠠᠨ ᠤ ᠰᠠᠨᠠᠭᠠ ᠲᠠᠢ ᠠᠳᠠᠯᠢᠳᠬᠠᠳᠠᠭ
3 ᠴᠢ ᠳ᠋ᠠᠨᠢᠶᠧᠯ ᠡᠴᠡ ᠢᠯᠡᠭᠦᠦ ᠮᠡᠷᠭᠡᠨ ᠭᠡᠵᠢ ᠤᠤ︖ ᠴᠢᠮᠠ ᠠᠴᠠ ᠳᠠᠯᠳᠠᠯᠠᠭᠳᠠᠬᠤ ᠶᠠᠮᠠᠷ ᠴᠤ ᠨᠢᠭᠤᠴᠠ ᠦᠭᠡᠢ ᠭᠡᠵᠢ ᠤᠤ︖
4 ᠴᠢ ᠰᠡᠴᠡᠨ ᠮᠡᠷᠭᠡᠨ ᠢᠶᠡᠷ ᠡᠳ᠋ ᠬᠥᠷᠥᠩᠭᠡ ᠣᠯᠵᠤ ᠠᠯᠲᠠ᠂ ᠮᠥᠩᠭᠥ ᠶᠢ ᠬᠥᠮᠥᠷᠭᠡ ᠳᠡᠭᠡᠨ ᠬᠤᠷᠢᠶᠠᠨ
5 ᠶᠡᠬᠡ ᠮᠡᠷᠭᠡᠨ ᠤᠬᠠᠭᠠᠨ ᠢᠶᠠᠷ ᠠᠷᠠᠯᠵᠢᠶᠠ ᠬᠢᠵᠦ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠡᠯᠪᠡᠭᠵᠢᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠡᠳ᠋ ᠬᠥᠷᠥᠩᠭᠡ ᠡᠴᠡ ᠪᠡᠨ ᠪᠣᠯᠵᠤ ᠵᠢᠷᠦᠬᠡ ᠴᠢᠨᠢ ᠪᠠᠷᠳᠠᠮ ᠪᠣᠯᠵᠠᠢ᠃
6 ᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠴᠢ ᠥᠪᠡᠷ ᠦᠨ ᠢᠶᠠᠨ ᠰᠠᠨᠠᠭᠠ ᠶᠢ ᠪᠤᠷᠬᠠᠨ ᠤ ᠰᠠᠨᠠᠭᠠ ᠲᠠᠢ ᠠᠳᠠᠯᠢᠳᠬᠠᠳᠠᠭ ᠤᠴᠢᠷ ᠠᠴᠠ
7 ᠴᠢᠨᠦ ᠳᠡᠭᠡᠷᠡ ᠪᠢ ᠬᠠᠷᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠠᠮᠤᠭ ᠤᠨ ᠬᠡᠷᠴᠡᠭᠡᠢ ᠶᠢ ᠨᠢ ᠠᠪᠴᠢᠷᠠᠨᠠ ᠲᠡᠳᠡ ᠭᠠᠢᠬᠠᠮᠰᠢᠭᠲᠠᠢ ᠮᠡᠷᠭᠡᠨ ᠤᠬᠠᠭᠠᠨ ᠤᠷᠤᠭᠤ ᠴᠢᠨᠢ ᠰᠡᠯᠡᠮᠡ ᠪᠡᠨ ᠰᠤᠭᠤᠯᠵᠤ᠂ ᠰᠦᠷ ᠵᠢᠪᠬᠤᠯᠠᠩ ᠢ ᠴᠢᠨᠢ ᠪᠤᠵᠠᠷᠯᠠᠨᠠ᠂
8 ᠴᠢᠮᠠᠶᠢ ᠨᠦᠬᠡᠨ ᠳᠦ ᠬᠠᠶᠠᠨᠠ ᠴᠢ ᠳᠠᠯᠠᠢ ᠶᠢᠨ ᠵᠢᠷᠦᠬᠡᠨ ᠳᠦ ᠠᠶᠤᠮᠰᠢᠭᠲᠠᠢ ᠪᠠᠷ ᠦᠬᠦᠬᠦ ᠪᠣᠯᠣᠨᠠ᠃
9 ᠥᠪᠡᠷ ᠢ ᠴᠢᠨᠢ ᠠᠯᠠᠬᠤ ᠬᠥᠮᠦᠨ ᠦ ᠡᠮᠦᠨᠡ ᠴᠢ ᠥᠪᠡᠷ ᠢ ᠪᠠᠨ ᠪᠤᠷᠬᠠᠨ ᠭᠡᠭᠰᠡᠭᠡᠷ ᠪᠠᠢᠬᠤ ᠤᠤ︖ ᠥᠪᠡᠷ ᠢ ᠴᠢᠨᠢ ᠬᠣᠷᠣᠭᠠᠬᠤ ᠬᠥᠮᠦᠨ ᠦ ᠭᠠᠷ ᠲᠤ ᠴᠢ ᠪᠤᠷᠬᠠᠨ ᠪᠢᠰᠢ᠂ ᠬᠥᠮᠦᠨ ᠯᠠ ᠶᠤᠮ
10 ᠬᠠᠷᠢ ᠬᠥᠮᠦᠰ ᠦᠨ ᠭᠠᠷ ᠲᠤ ᠴᠢ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠬᠥᠮᠦᠨ ᠦ ᠶᠣᠰᠣᠭᠠᠷ ᠦᠬᠦᠨᠡ᠃ ᠪᠢ ᠡᠭᠦᠨ ᠢ ᠶᠠᠷᠢᠯᠠ᠃〉》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
11 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄
12 《ᠬᠥᠮᠦᠨ ᠦ ᠬᠦᠦ ᠡ᠂ ᠲᠢᠷ ᠤᠨ ᠬᠠᠭᠠᠨ ᠤ ᠲᠤᠬᠠᠢ ᠭᠠᠰᠢᠭᠤᠳᠠᠯ ᠤᠨ ᠳᠠᠭᠤᠤ ᠵᠣᠬᠢᠶᠠᠨ᠂ ᠲᠡᠭᠦᠨ ᠳᠦ ᠶᠠᠷᠢ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠡᠯᠪᠡᠭ ᠮᠡᠷᠭᠡᠨ ᠤᠬᠠᠭᠠᠨ᠂ ᠲᠡᠭᠦᠰ ᠰᠠᠢᠬᠠᠨ ᠢᠶᠠᠷ ᠲᠡᠭᠦᠯᠳᠡᠷᠵᠢᠭᠰᠡᠨ ᠲᠠᠮᠠᠭᠠ ᠴᠢ᠂
13 ᠴᠢ ᠪᠤᠷᠬᠠᠨ ᠤ ᠴᠡᠴᠡᠷᠯᠢᠭ ᠡᠳᠧᠨ ᠳᠤ ᠪᠠᠢᠬᠤ ᠳᠤ ᠪᠦᠬᠦ ᠲᠥᠷᠥᠯ ᠦᠨ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠴᠢᠮᠠᠶᠢ ᠴᠢᠮᠡᠪᠡ ᠪᠠᠳᠮᠠᠷᠠᠭᠠ᠂ ᠮᠣᠯᠣᠷ᠂ ᠠᠯᠮᠠᠰ᠂ ᠪᠢᠳᠦᠷᠶᠡ᠂ ᠰᠤᠳᠠᠯᠲᠤ ᠮᠠᠨᠤᠬᠤ᠂ ᠬᠠᠰ᠂ ᠢᠨᠳᠠᠷᠨᠢᠯᠠ᠂ ᠣᠭ᠍ᠶᠤ᠂ ᠨᠣᠮᠢᠨ᠂ ᠪᠦᠭᠦᠳᠡ ᠠᠯᠲᠠᠨ ᠬᠦᠷᠢᠶᠡᠨ ᠳᠦ ᠰᠢᠭᠢᠳᠬᠡᠭᠳᠡᠵᠦ ᠴᠢᠮᠠᠶᠢ ᠪᠦᠲᠦᠭᠡᠭᠰᠡᠨ ᠡᠳᠦᠷ ᠴᠢᠮᠠ ᠳᠤ ᠰᠣᠶᠣᠷᠬᠠᠭᠳᠠᠭᠰᠠᠨ ᠶᠤᠮ᠃
14 ᠴᠢᠮᠠᠶᠢ ᠪᠢ ᠲᠣᠰᠣᠯᠠᠨ᠂ ᠬᠠᠮᠠᠭᠠᠯᠠᠭᠴᠢ ᠺᠧᠷᠣᠪ ᠢᠶᠠᠷ ᠲᠣᠮᠢᠯᠠᠭᠰᠠᠨ ᠴᠢ ᠪᠤᠷᠬᠠᠨ ᠤ ᠠᠷᠢᠭᠤᠨ ᠠᠭᠤᠯᠠᠨ ᠳᠤ ᠪᠠᠢᠵᠤ ᠭᠠᠯᠲᠤ ᠴᠢᠯᠠᠭᠤᠳ ᠤᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠪᠠᠢᠯᠠ᠃
15 ᠪᠦᠲᠦᠭᠡᠭᠳᠡᠭᠰᠡᠨ ᠡᠳᠦᠷ ᠡᠴᠡ ᠪᠡᠨ ᠬᠣᠢᠰᠢ ᠴᠢᠨᠦ ᠵᠠᠮ ᠮᠥᠷ ᠥ ᠦᠭᠡᠢ ᠪᠠᠢᠭᠰᠠᠨ ᠴᠤ ᠬᠣᠵᠢᠮ ᠨᠢ ᠴᠢᠮᠠ ᠠᠴᠠ ᠵᠥᠪ ᠪᠤᠰᠤ ᠶᠠᠪᠤᠳᠠᠯ ᠣᠯᠳᠠᠵᠠᠢ᠃
16 ᠠᠷᠠᠯᠵᠢᠶᠠ ᠴᠢᠨᠢ ᠶᠡᠬᠡᠰᠬᠦ ᠳᠦ᠂ ᠴᠢ ᠬᠦᠴᠦᠷᠬᠡᠭᠯᠡᠯ ᠢᠶᠡᠷ ᠳᠦᠭᠦᠷᠴᠦ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠲᠤᠯᠠ ᠪᠤᠷᠬᠠᠨ ᠤ ᠠᠭᠤᠯᠠᠨ ᠠᠴᠠ ᠪᠢ ᠴᠢᠮᠠᠶᠢ ᠪᠤᠵᠠᠷᠲᠤᠭᠰᠠᠨ ᠶᠠᠭᠤᠮᠠ ᠮᠡᠲᠦ ᠬᠠᠶᠠᠭᠰᠠᠨ ᠬᠠᠮᠠᠭᠠᠯᠠᠭᠴᠢ ᠺᠧᠷᠣᠪ ᠴᠢᠮᠠᠶᠢ ᠪᠢ ᠭᠠᠯᠲᠤ ᠴᠢᠯᠠᠭᠤᠳ ᠤᠨ ᠳᠤᠮᠳᠠ ᠠᠴᠠ ᠤᠰᠠᠳᠬᠠᠪᠠ᠃
17 ᠭᠣᠶᠣ ᠦᠵᠡᠰᠬᠦᠯᠡᠩ ᠡᠴᠡ ᠪᠡᠨ ᠪᠣᠯᠵᠤ ᠰᠡᠳᠬᠢᠯ ᠴᠢᠨᠢ ᠪᠠᠷᠳᠠᠮ ᠪᠣᠯᠪᠠ ᠰᠦᠷ ᠵᠢᠪᠬᠤᠯᠠᠩ ᠤᠨ ᠢᠶᠠᠨ ᠤᠯᠠᠮ ᠠᠴᠠ ᠴᠢ ᠴᠡᠴᠡᠨ ᠤᠬᠠᠭᠠᠨ ᠢᠶᠠᠨ ᠳᠣᠷᠣᠢᠲᠠᠭᠤᠯᠵᠠᠢ ᠪᠢ ᠴᠢᠮᠠᠶᠢ ᠭᠠᠵᠠᠷ ᠲᠤ ᠬᠠᠶᠠᠨ᠂ ᠬᠠᠭᠠᠳ ᠤᠨ ᠡᠮᠦᠨᠡ ᠢᠯᠡᠴᠢᠯᠡᠵᠦ ᠲᠡᠳᠡᠨ ᠳᠦ ᠬᠠᠷᠠᠭᠤᠯᠤᠨᠠ᠃
18 ᠣᠯᠠᠨ ᠨᠢᠭᠦᠯ᠂ ᠵᠥᠪ ᠪᠤᠰᠤ ᠬᠤᠳᠠᠯᠳᠤᠭᠠ ᠪᠠᠷ ᠢᠶᠠᠨ ᠴᠢ ᠠᠷᠢᠭᠤᠨ ᠭᠠᠵᠠᠷ ᠤᠳ ᠢᠶᠠᠨ ᠪᠤᠵᠠᠷᠯᠠᠭᠰᠠᠨ ᠲᠤᠯᠠ ᠪᠢ ᠴᠢᠨᠦ ᠳᠣᠲᠣᠷᠠ ᠠᠴᠠ ᠭᠠᠯ ᠭᠠᠷᠭᠠᠵᠤ᠂ ᠴᠢᠮᠠᠶᠢ ᠰᠢᠲᠠᠭᠠᠨ ᠬᠠᠷᠠᠳᠠᠭ ᠪᠦᠬᠦᠨ ᠦ ᠴᠢᠨᠢ ᠨᠢᠳᠦᠨ ᠳᠡᠭᠡᠷᠡ ᠴᠢᠮᠠᠶᠢ ᠭᠠᠵᠠᠷ ᠤᠨ ᠦᠨᠡᠰᠦ ᠪᠣᠯᠭᠠᠪᠠ᠃
19 ᠴᠢᠮᠠᠶᠢ ᠲᠠᠨᠢᠳᠠᠭ ᠦᠨᠳᠦᠰᠦᠲᠡᠨ ᠪᠦᠷᠢ ᠴᠢᠮᠠᠶᠢ ᠬᠠᠷᠠᠭᠠᠳ ᠰᠣᠴᠢᠨᠠ ᠴᠢ ᠠᠶᠤᠮᠰᠢᠭᠲᠠᠢ ᠪᠠᠷ ᠡᠴᠦᠰᠯᠡᠵᠦ᠂ ᠡᠭᠦᠷᠢᠳᠡ ᠠᠯᠠᠭᠠ ᠪᠣᠯᠣᠨᠠ᠃〉》
ᠰᠢᠢᠳᠣᠨ ᠤ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠯᠭᠡ
20 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄
21 《ᠬᠥᠮᠦᠨ ᠦ ᠬᠦᠦ ᠡ᠂ ᠰᠢᠢᠳᠣᠨ ᠤ ᠵᠦᠭ ᠨᠢᠭᠤᠷ ᠢᠶᠠᠨ ᠬᠠᠨᠳᠤᠭᠤᠯᠤᠨ ᠲᠡᠭᠦᠨ ᠦ ᠡᠰᠡᠷᠭᠦ ᠡᠰᠢ ᠦᠵᠡᠭᠦᠯ᠄
22 ᠶᠣᠬᠣᠸᠠ ᠪᠤᠷᠬᠠᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠰᠢᠢᠳᠣᠨ ᠡ᠂ ᠪᠢ ᠴᠢᠨᠦ ᠡᠰᠡᠷᠭᠦ ᠪᠠᠢᠨᠠ ᠴᠢᠨᠦ ᠳᠣᠲᠣᠷᠠ ᠪᠢ ᠥᠪᠡᠷ ᠦᠨ ᠢᠶᠠᠨ ᠠᠯᠳᠠᠷ ᠢ ᠬᠠᠷᠠᠭᠤᠯᠤᠨᠠ᠂〉 ᠲᠡᠭᠦᠨ ᠳᠦ ᠪᠢ ᠰᠢᠳᠬᠡᠯ ᠪᠠᠭᠤᠯᠭᠠᠨ᠂ ᠲᠡᠭᠦᠨ ᠳᠦ ᠠᠷᠢᠭᠤᠨ ᠪᠠᠢᠳᠠᠯ ᠢᠶᠠᠨ ᠦᠵᠡᠭᠦᠯᠬᠦ ᠳᠦ᠂ ᠲᠡᠳᠡ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃
23 ᠲᠡᠭᠦᠨ ᠤᠷᠤᠭᠤ ᠪᠢ ᠲᠠᠬᠤᠯ ᠢᠯᠡᠭᠡᠵᠦ᠂ ᠭᠤᠳᠤᠮᠵᠢᠨ ᠳᠤᠨᠢ ᠴᠢᠰᠤ ᠤᠷᠤᠰᠬᠠᠨᠠ ᠲᠠᠯᠠ ᠪᠦᠷᠢ ᠡᠴᠡ ᠢᠷᠡᠬᠦ ᠢᠯᠳᠦᠨ ᠳᠦ ᠰᠢᠷᠬᠠᠲᠤᠭᠰᠠᠳ ᠲᠡᠭᠦᠨ ᠦ ᠳᠣᠲᠣᠷᠠ ᠤᠨᠠᠬᠤ ᠳᠤ ᠲᠡᠳᠡ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃
24 ᠲᠡᠢᠨ ᠬᠦ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠢ ᠬᠠᠳᠬᠤᠬᠤ ᠥᠷᠭᠡᠰᠦ᠂ ᠡᠪᠡᠳᠬᠡᠬᠦ ᠦᠭᠦᠷᠭᠡᠨᠡ᠂ ᠵᠢᠭᠰᠢᠬᠦ ᠬᠥᠷᠰᠢ ᠪᠠᠢᠬᠤ ᠦᠭᠡᠢ ᠪᠣᠯᠬᠤ ᠳᠤ ᠲᠡᠳᠡ ᠨᠠᠮᠠᠶᠢ ᠡᠵᠡᠨ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃
25 ᠶᠣᠬᠣᠸᠠ ᠪᠤᠷᠬᠠᠨ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠪᠢ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠢ ᠲᠠᠷᠬᠠᠨ ᠣᠴᠢᠭᠰᠠᠨ ᠭᠦᠷᠦᠨ ᠨᠦᠭᠦᠳ ᠡᠴᠡ ᠨᠢ ᠴᠤᠭᠯᠠᠭᠤᠯᠵᠤ᠂ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠨᠢᠳᠦᠨ ᠦ ᠡᠮᠦᠨᠡ ᠲᠡᠳᠡᠨ ᠦ ᠳᠤᠮᠳᠠ ᠠᠷᠢᠭᠤᠨ ᠪᠠᠢᠳᠠᠯ ᠢᠶᠠᠨ ᠬᠠᠷᠠᠭᠤᠯᠤᠨᠠ᠂ ᠲᠡᠭᠡᠬᠦ ᠳᠦ ᠲᠡᠳᠡ ᠥᠪᠡᠷᠰᠡᠳ ᠦᠨ ᠢᠶᠠᠨ ᠨᠤᠲᠤᠭ᠂ ᠮᠢᠨᠦ ᠵᠠᠷᠤᠴᠠ ᠶᠠᠺᠣᠪ ᠲᠠᠭᠠᠨ ᠥᠭᠭᠥᠭᠰᠡᠨ ᠨᠤᠲᠤᠭ ᠲᠤ ᠰᠠᠭᠤᠬᠤ ᠪᠣᠯᠣᠨᠠ᠃ 26 ᠲᠡᠳᠡ ᠪᠠᠢᠰᠢᠩ ᠪᠠᠷᠢᠵᠤ᠂ ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠪᠠᠢᠭᠤᠯᠤᠨ᠂ ᠲᠡᠨᠳᠡ ᠠᠶᠤᠯ ᠦᠭᠡᠢ ᠠᠮᠢᠳᠤᠷᠠᠨᠠ᠃ ᠵᠢᠭ᠍ᠰᠢᠭ᠍ᠴᠢ ᠬᠥᠷᠰᠢ ᠪᠣᠯᠭᠠᠨ ᠢ ᠨᠢ ᠪᠢ ᠰᠢᠭᠦᠬᠦ ᠴᠠᠭ ᠲᠤ᠂ ᠲᠡᠳᠡ ᠠᠶᠤᠯ ᠦᠭᠡᠢ ᠠᠮᠢᠳᠤᠷᠠᠨᠠ᠃ ᠲᠡᠭᠡᠭᠡᠳ ᠲᠡᠳᠡ ᠨᠠᠮᠠᠶᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃〉》