ᠡᠽᠧᠺᠢᠶᠧᠯ ᠠᠷᠪᠠ
ᠶᠣᠬᠣᠸᠠ ᠶᠢᠨ ᠵᠢᠪᠬᠤᠯᠠᠩ ᠥᠷᠭᠥᠭᠡᠨ ᠡᠴᠡ ᠬᠣᠯᠠᠳᠠᠪᠠ
1 ᠲᠡᠭᠡᠲᠡᠯᠡ ᠪᠢ ᠺᠧᠷᠣᠪ ᠤᠳ ᠤᠨ ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠲᠣᠭᠣᠷᠠᠭ ᠣᠷᠣᠢ ᠳᠡᠭᠡᠭᠦᠷ ᠢᠨᠳᠠᠷᠨᠢᠯᠠ ᠴᠢᠯᠠᠭᠤ ᠮᠡᠲᠦ᠂ ᠰᠡᠨᠲᠢ ᠮᠡᠲᠦ ᠳᠦᠷᠰᠦ ᠶᠢ ᠬᠠᠷᠠᠪᠠ᠃ 2 ᠶᠣᠬᠣᠸᠠ ᠨᠥᠭᠥᠭᠡ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠳᠦ᠄ 《ᠴᠢ ᠺᠧᠷᠣᠪ ᠤᠳ ᠤᠨ ᠳᠣᠣᠷᠠ ᠪᠤᠢ ᠬᠦᠷᠳᠦ ᠨᠦᠭᠦᠳ ᠦᠨ ᠬᠣᠭᠣᠷᠣᠨᠳᠣ ᠣᠷᠣᠭᠠᠳ᠂ ᠺᠧᠷᠣᠪ ᠤᠳ ᠤᠨ ᠳᠤᠮᠳᠠ ᠠᠴᠠ ᠠᠳᠬᠤ ᠳᠦᠭᠦᠷᠡᠩ ᠭᠠᠯ ᠲᠠᠢ ᠨᠡᠭᠦᠷᠡᠰᠦ ᠠᠪᠴᠤ᠂ ᠬᠣᠲᠠ ᠶᠢᠨ ᠳᠡᠭᠡᠭᠦᠷ ᠰᠠᠴᠤ》 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠳᠤ᠂ ᠲᠡᠷᠡ ᠪᠡᠷ ᠮᠢᠨᠦ ᠨᠢᠳᠦᠨ ᠦ ᠡᠮᠦᠨᠡ ᠳᠣᠲᠣᠭᠰᠢ ᠣᠷᠣᠪᠠ᠃ 3 ᠲᠡᠷᠡ ᠬᠥᠮᠦᠨ ᠣᠷᠣᠬᠤ ᠳᠤ᠂ ᠥᠷᠭᠥᠭᠡᠨ ᠦ ᠡᠮᠦᠨᠡ ᠲᠠᠯᠠ ᠳᠤ ᠺᠧᠷᠣᠪ ᠤᠳ ᠵᠣᠭᠰᠣᠵᠤ᠂ ᠳᠣᠲᠣᠭᠠᠳᠤ ᠬᠦᠷᠢᠶᠡ ᠡᠭᠦᠯᠡ ᠪᠡᠷ ᠳᠦᠭᠦᠷᠦᠭᠰᠡᠨ ᠪᠠᠢᠪᠠ᠃ 4 ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠨᠥᠭᠥᠭᠡ ᠺᠧᠷᠣᠪ ᠠᠴᠠ ᠳᠡᠭᠡᠭᠰᠢᠯᠡᠨ᠂ ᠥᠷᠭᠥᠭᠡᠨ ᠦ ᠪᠣᠱᠣᠭᠠ ᠳᠡᠭᠡᠷᠡ ᠲᠣᠭᠲᠠᠬᠤ ᠳᠤ᠂ ᠥᠷᠭᠥᠭᠡ ᠡᠭᠦᠯᠡ ᠪᠡᠷ ᠳᠦᠭᠦᠷᠴᠦ᠂ ᠬᠦᠷᠢᠶᠡ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠤᠨ ᠲᠤᠶᠠᠭᠠ ᠪᠠᠷ ᠳᠦᠭᠦᠷᠪᠡ᠃ 5 ᠺᠧᠷᠣᠪ ᠤᠳ ᠤᠨ ᠳᠠᠯᠠᠪᠴᠢᠨ ᠤ ᠴᠢᠮᠡᠭᠡ ᠭᠠᠳᠠᠨᠠᠬᠢ ᠬᠦᠷᠢᠶᠡᠨ ᠳᠦ ᠬᠦᠷᠲᠡᠯᠡ ᠰᠣᠨᠣᠰᠳᠠᠪᠠ᠃ ᠲᠡᠷᠡ ᠨᠢ ᠲᠡᠭᠦᠰ ᠬᠦᠴᠦᠲᠦ ᠪᠤᠷᠬᠠᠨ ᠤ ᠶᠠᠷᠢᠬᠤ ᠳᠠᠭᠤ ᠮᠡᠲᠦ ᠪᠠᠢᠯᠠ᠃
6 ᠶᠣᠬᠣᠸᠠ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠳᠦ᠄ 《ᠺᠧᠷᠣᠪ ᠤᠳ ᠤᠨ ᠳᠣᠣᠷᠠᠬᠢ ᠬᠦᠷᠳᠦ ᠨᠦᠭᠦᠳ ᠦᠨ ᠳᠤᠮᠳᠠ ᠠᠴᠠ ᠭᠠᠯ ᠠᠪ》 ᠭᠡᠰᠡᠨ ᠳᠦ᠂ ᠲᠡᠷᠡ ᠳᠣᠲᠣᠭᠰᠢ ᠣᠷᠣᠵᠤ᠂ ᠬᠦᠷᠳᠦ ᠶᠢᠨ ᠳᠡᠷᠭᠡᠳᠡ ᠵᠣᠭᠰᠣᠯᠠ᠃ 7 ᠨᠢᠭᠡ ᠺᠧᠷᠣᠪ ᠨᠢ ᠺᠧᠷᠣᠪ ᠤᠳ ᠤᠨ ᠳᠤᠮᠳᠠ ᠠᠴᠠ ᠭᠠᠷ ᠢᠶᠠᠨ ᠰᠤᠩ᠋ᠭᠠᠵᠤ ᠺᠧᠷᠣᠪ ᠤᠳ ᠤᠨ ᠬᠣᠭᠣᠷᠣᠨᠳᠣᠬᠢ ᠭᠠᠯ ᠠᠴᠠ ᠠᠪᠴᠤ᠂ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠦ ᠬᠣᠶᠠᠷ ᠭᠠᠷ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠳᠤ᠂ ᠲᠡᠷᠡ ᠠᠪᠤᠭᠠᠳ ᠭᠠᠷᠪᠠ᠃ 8 ᠢᠩᠭᠢᠬᠦ ᠳᠦ ᠺᠧᠷᠣᠪ ᠤᠳ ᠤᠨ ᠳᠠᠯᠠᠪᠴᠢᠨ ᠤ ᠳᠣᠣᠷᠠ ᠬᠥᠮᠦᠨ ᠦ ᠭᠠᠷ ᠮᠡᠲᠦ ᠳᠦᠷᠰᠦ ᠬᠠᠷᠠᠭᠳᠠᠵᠠᠢ᠃
9 ᠪᠢ ᠬᠠᠷᠠᠬᠤ ᠳᠤ᠂ ᠺᠧᠷᠣᠪ ᠤᠳ ᠤᠨ ᠳᠡᠷᠭᠡᠳᠡ ᠳᠥᠷᠪᠡᠨ ᠬᠦᠷᠳᠦ᠂ ᠺᠧᠷᠣᠪ ᠪᠣᠯᠭᠠᠨ ᠤ ᠳᠡᠷᠭᠡᠳᠡ ᠨᠢᠭᠡ ᠬᠦᠷᠳᠦ ᠪᠠᠢᠵᠠᠢ᠃ ᠬᠦᠷᠳᠦ ᠨᠦᠭᠦᠳ ᠪᠢᠳᠦᠷᠶᠡ ᠮᠡᠲᠦ ᠭᠢᠯᠪᠠᠭᠠ ᠲᠠᠢ ᠪᠠᠢᠯᠠ᠃ 10 ᠲᠥᠷᠬᠥ ᠨᠢ ᠭᠡᠪᠡᠯ᠂ ᠲᠡᠳᠡ ᠳᠥᠷᠪᠡᠭᠦᠯᠡ ᠠᠳᠠᠯᠢᠬᠠᠨ ᠪᠥᠭᠡᠳ ᠨᠢᠭᠡ ᠬᠦᠷᠳᠦ ᠨᠢ ᠨᠥᠭᠥᠭᠡ ᠬᠦᠷᠳᠦ ᠶᠢᠨ ᠳᠣᠲᠣᠷᠠ ᠪᠠᠢᠭᠠ ᠮᠡᠲᠦ᠃ 11 ᠲᠡᠳᠡ ᠬᠥᠳᠡᠯᠬᠦ ᠳᠡᠭᠡᠨ᠂ ᠺᠧᠷᠣᠪ ᠤᠳ ᠤᠨ ᠴᠢᠭᠯᠡᠭᠰᠡᠨ ᠶᠣᠰᠣᠭᠠᠷ ᠳᠥᠷᠪᠡᠨ ᠵᠦᠭ ᠦᠨ ᠠᠯᠢ ᠨᠢᠭᠡ ᠲᠡᠰᠢ ᠶᠠᠪᠤᠵᠤ ᠪᠠᠢᠯᠠ᠃ ᠺᠧᠷᠣᠪ ᠤᠳ ᠶᠠᠪᠤᠬᠤ ᠳᠤ᠂ ᠬᠦᠷᠳᠦ ᠨᠦᠭᠦᠳ ᠨᠢ ᠡᠷᠭᠢᠵᠦ᠂ ᠺᠧᠷᠣᠪ ᠤᠳ ᠲᠣᠯᠣᠭᠠᠢ ᠶᠢᠨ ᠢᠶᠠᠨ ᠴᠢᠭᠯᠡᠭᠰᠡᠨ ᠵᠦᠭ ᠶᠠᠪᠤᠵᠤ᠂ ᠶᠠᠪᠤᠬᠤ ᠳᠠᠭᠠᠨ ᠡᠷᠭᠢᠬᠦ ᠦᠭᠡᠢ ᠪᠠᠢᠯᠠ᠃ 12 ᠲᠡᠳᠡᠨ ᠦ ᠪᠦᠲᠦᠨ ᠪᠡᠶᠡ᠂ ᠨᠢᠷᠤᠭᠤ᠂ ᠭᠠᠷ᠂ ᠳᠠᠯᠠᠪᠴᠢ᠂ ᠬᠦᠷᠳᠦᠨ ᠳᠡᠭᠡᠷᠡ ᠳᠦᠭᠦᠷᠡᠩ ᠨᠢᠳᠦ ᠲᠠᠢ᠃ ᠳᠥᠷᠪᠡᠨ ᠺᠧᠷᠣᠪ ᠶᠢᠨ ᠬᠦᠷᠳᠦ ᠨᠦᠭᠦᠳ ᠦᠨ ᠡᠷᠭᠢᠨ ᠲᠣᠭᠣᠷᠢᠨ ᠳᠤ ᠴᠤ ᠡᠢᠮᠦ ᠪᠠᠢᠪᠠ᠃ 13 ᠨᠥᠭᠥᠭᠡ ᠬᠦᠷᠳᠦ ᠨᠦᠭᠦᠳ ᠢ 《ᠡᠷᠭᠢᠯᠳᠦᠭᠦᠷ》 ᠭᠡᠵᠦ ᠳᠠᠭᠤᠳᠠᠬᠤ ᠨᠢ ᠨᠠᠳᠠ ᠳᠤ ᠰᠣᠨᠣᠰᠳᠠᠪᠠ᠃ 14 ᠺᠧᠷᠣᠪ ᠪᠦᠷᠢ ᠳᠥᠷᠪᠡᠨ ᠨᠢᠭᠤᠷ ᠲᠠᠢ᠃ ᠡᠬᠢᠨ ᠤ ᠨᠢᠭᠤᠷ ᠨᠢ ᠺᠧᠷᠣᠪ ᠤᠨ᠂ ᠬᠣᠶᠠᠳᠠᠬᠢ ᠨᠢ ᠬᠥᠮᠦᠨ ᠦ᠂ ᠭᠤᠷᠪᠠᠳᠠᠬᠢ ᠨᠢ ᠠᠷᠰᠯᠠᠨ ᠤ ᠪᠥᠭᠡᠳ ᠳᠥᠷᠪᠡᠳᠡᠬᠢ ᠨᠢ ᠪᠦᠷᠭᠦᠳ ᠦᠨ ᠬᠢ ᠪᠠᠢᠪᠠ᠃
15 ᠺᠧᠷᠣᠪ ᠤᠳ ᠳᠡᠭᠡᠭᠰᠢᠯᠡᠪᠡ᠃ ᠲᠡᠳᠡ ᠪᠣᠯ ᠺᠧᠪᠠᠷ ᠭᠣᠣᠯ ᠤᠨ ᠳᠡᠷᠭᠡᠳᠡ ᠮᠢᠨᠦ ᠦᠵᠡᠭᠰᠡᠨ ᠨᠥᠭᠥᠭᠡ ᠠᠮᠢᠳᠤ ᠪᠡᠶᠡᠲᠡᠳ ᠪᠠᠢᠯᠠ᠃ 16 ᠺᠧᠷᠣᠪ ᠤᠳ ᠬᠥᠳᠡᠯᠬᠦ ᠳᠦ᠂ ᠬᠦᠷᠳᠦ ᠨᠦᠭᠦᠳ ᠴᠤ ᠳᠡᠷᠭᠡᠳᠡ ᠨᠢ ᠬᠥᠳᠡᠯᠦᠨᠡ᠃ ᠺᠧᠷᠣᠪ ᠤᠳ ᠳᠠᠯᠠᠪᠴᠢ ᠪᠠᠨ ᠳᠡᠯᠭᠡᠵᠦ ᠭᠠᠵᠠᠷ ᠠᠴᠠ ᠬᠥᠭᠡᠷᠬᠦ ᠳᠦ᠂ ᠬᠦᠷᠳᠦ ᠨᠦᠭᠦᠳ ᠳᠡᠷᠭᠡᠳᠡ ᠡᠴᠡ ᠨᠢ ᠰᠠᠯᠳᠠᠭ ᠦᠭᠡᠢ᠃ 17 ᠺᠧᠷᠣᠪ ᠤᠳ ᠵᠣᠭᠰᠣᠬᠤ ᠳᠤ᠂ ᠬᠦᠷᠳᠦ ᠨᠦᠭᠦᠳ ᠵᠣᠭᠰᠣᠨᠠ᠂ ᠬᠥᠭᠡᠷᠬᠦ ᠳᠦ᠂ ᠬᠦᠷᠳᠦ ᠨᠦᠭᠦᠳ ᠴᠤ ᠬᠠᠮᠲᠤ ᠬᠥᠭᠡᠷᠦᠨᠡ᠃ ᠤᠴᠢᠷ ᠨᠢ ᠠᠮᠢᠳᠤ ᠪᠡᠶᠡᠲᠡᠳ ᠦᠨ ᠰᠦᠨᠡᠰᠦ ᠲᠡᠳᠡᠨ ᠦ ᠳᠣᠲᠣᠷᠠ ᠪᠤᠢ᠃
18 ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠥᠷᠭᠥᠭᠡᠨ ᠦ ᠪᠣᠱᠣᠭᠠᠨ ᠠᠴᠠ ᠰᠠᠯᠵᠤ᠂ ᠺᠧᠷᠣᠪ ᠤᠳ ᠤᠨ ᠳᠡᠭᠡᠷᠡ ᠲᠣᠭᠲᠠᠪᠠ᠃ 19 ᠲᠡᠭᠡᠬᠦ ᠳᠦ ᠺᠧᠷᠣᠪ ᠤᠳ ᠨᠢ ᠳᠠᠯᠠᠪᠴᠢ ᠪᠠᠨ ᠳᠡᠯᠭᠡᠨ ᠮᠢᠨᠦ ᠨᠢᠳᠦᠨ ᠦ ᠡᠮᠦᠨᠡ ᠭᠠᠵᠠᠷ ᠠᠴᠠ ᠬᠥᠭᠡᠷᠪᠡ᠃ ᠲᠡᠳᠡ ᠬᠥᠭᠡᠷᠬᠦ ᠳᠦ᠂ ᠬᠦᠷᠳᠦ ᠨᠦᠭᠦᠳ ᠴᠤ ᠬᠠᠮᠲᠤ ᠬᠥᠭᠡᠷᠪᠡ᠃ ᠢᠩᠭᠢᠭᠡᠳ ᠲᠡᠳᠡ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠵᠡᠭᠦᠨ ᠬᠠᠭᠠᠯᠭᠠᠨ ᠳᠤ ᠵᠣᠭᠰᠣᠯᠠ᠃ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠴᠣᠭ ᠵᠢᠪᠬᠤᠯᠠᠩ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠢᠪᠠ᠃
20 ᠲᠡᠳᠡᠭᠡᠷ ᠨᠢ ᠺᠧᠪᠠᠷ ᠭᠣᠣᠯ ᠤᠨ ᠳᠡᠷᠭᠡᠳᠡ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠳᠣᠣᠷᠠ ᠮᠢᠨᠦ ᠦᠵᠡᠭᠰᠡᠨ ᠨᠥᠭᠥᠭᠡ ᠠᠮᠢᠳᠤ ᠪᠡᠶᠡᠲᠡᠳ ᠪᠠᠢᠯᠠ᠃ ᠪᠢ ᠲᠡᠷᠡ ᠠᠮᠢᠳᠤ ᠪᠡᠶᠡᠲᠡᠳ ᠨᠢ ᠺᠧᠷᠣᠪ ᠤᠳ ᠪᠣᠯᠬᠤ ᠶᠢ ᠮᠡᠳᠡᠪᠡ᠃ 21 ᠲᠡᠳᠡ ᠲᠤᠰ ᠪᠦᠷᠢ ᠳᠥᠷᠪᠡᠨ ᠨᠢᠭᠤᠷ ᠲᠠᠢ᠂ ᠳᠥᠷᠪᠡᠨ ᠳᠠᠯᠠᠪᠴᠢ ᠲᠠᠢ ᠪᠠᠢᠪᠠ᠂ ᠳᠠᠯᠠᠪᠴᠢᠨ ᠳᠣᠣᠷᠠ ᠪᠠᠨ ᠬᠥᠮᠦᠨ ᠦ ᠭᠠᠷ ᠮᠡᠲᠦ ᠶᠠᠭᠤᠮᠠ ᠲᠠᠢ ᠪᠠᠢᠪᠠ᠃ 22 ᠲᠡᠳᠡᠨ ᠦ ᠨᠢᠭᠤᠷ ᠴᠤ ᠺᠧᠪᠠᠷ ᠭᠣᠣᠯ ᠤᠨ ᠳᠡᠷᠭᠡᠳᠡ ᠮᠢᠨᠦ ᠦᠵᠡᠭᠰᠡᠨ ᠨᠢᠭᠤᠷ ᠲᠠᠢ ᠠᠳᠠᠯᠢ ᠬᠠᠷᠠᠭᠳᠠᠵᠤ᠂ ᠲᠤᠰ ᠪᠦᠷᠢ ᠴᠢᠭ ᠢᠶᠠᠷ ᠢᠶᠠᠨ ᠤᠷᠤᠭᠰᠢᠯᠠᠵᠤ ᠪᠠᠢᠪᠠ᠃