ᠡᠽᠧᠺᠢᠶᠧᠯ ᠨᠠᠢ᠌ᠮᠠ
ᠥᠷᠭᠥᠭᠡᠨ ᠳᠠᠬᠢ ᠰᠢᠲᠦᠭᠡᠨ ᠰᠢᠲᠦᠭᠴᠢᠳ
1 ᠵᠢᠷᠭᠤᠳᠠᠬᠢ ᠣᠨ ᠤ ᠵᠢᠷᠭᠤᠳᠤᠭᠠᠷ ᠰᠠᠷᠠ ᠶᠢᠨ ᠲᠠᠪᠤᠨ ᠤ ᠡᠳᠦᠷ ᠪᠢ ᠭᠡᠷ ᠲᠡᠭᠡᠨ ᠰᠠᠭᠤᠵᠤ᠂ ᠶᠦᠳᠠ ᠶᠢᠨ ᠠᠬᠠᠮᠠᠳ ᠤᠳ ᠮᠢᠨᠦ ᠡᠮᠦᠨᠡ ᠰᠠᠭᠤᠵᠤ ᠪᠠᠢᠯᠠ᠃ ᠲᠡᠨᠳᠡ ᠡᠵᠡᠨ ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠨᠠᠳᠠ ᠳᠤ ᠬᠦᠷᠪᠡ᠃ 2 ᠲᠡᠭᠡᠬᠦ ᠳᠦ ᠪᠢ ᠬᠥᠮᠦᠨ 4 ᠰᠢᠭ ᠳᠦᠷᠰᠦ ᠶᠢ ᠬᠠᠷᠠᠯᠠ︕ ᠲᠡᠭᠦᠨ ᠦ ᠪᠡᠯᠬᠡᠭᠦᠰᠦᠨ ᠡᠴᠡ ᠳᠣᠭᠣᠭᠰᠢᠬᠢ ᠨᠢ ᠭᠠᠯ ᠮᠡᠲᠦ᠂ ᠪᠡᠯᠬᠡᠭᠦᠰᠦᠨ ᠡᠴᠡ ᠳᠡᠭᠡᠭᠰᠢᠬᠢ ᠨᠢ ᠤᠯᠠᠢᠰᠤᠭᠰᠠᠨ ᠲᠡᠮᠦᠷ ᠮᠡᠲᠦ ᠭᠡᠷᠡᠯᠲᠦᠵᠦ ᠬᠠᠷᠠᠭᠳᠠᠪᠠ᠃ 3 ᠲᠡᠷᠡ ᠪᠡᠷ ᠭᠠᠷ ᠮᠡᠲᠦ ᠶᠠᠭᠤᠮᠠ ᠶᠢ ᠰᠤᠩ᠋ᠭᠠᠨ᠂ ᠮᠢᠨᠦ ᠲᠣᠯᠣᠭᠠᠢ ᠶᠢᠨ ᠦᠰᠦᠨ ᠡᠴᠡ ᠪᠠᠷᠢᠪᠠ᠃ ᠲᠡᠭᠡᠬᠦ ᠳᠦ ᠪᠤᠷᠬᠠᠨ ᠤ ᠦᠵᠡᠭᠳᠡᠯ ᠳᠣᠲᠣᠷᠠ ᠰᠦᠨᠡᠰᠦ ᠨᠠᠮᠠᠶᠢ ᠲᠩᠷᠢ ᠭᠠᠵᠠᠷ ᠤᠨ ᠬᠣᠭᠣᠷᠣᠨᠳᠣ ᠡᠷᠭᠦᠨ᠂ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠠᠪᠠᠴᠢᠵᠤ᠂ ᠳᠣᠲᠣᠭᠣᠳᠤ ᠬᠦᠷᠢᠶᠡᠨ ᠦ ᠬᠣᠢᠲᠤ ᠬᠠᠭᠠᠯᠭᠠᠨ ᠳᠤ ᠬᠦᠷᠭᠡᠪᠡ᠃ ᠬᠠᠷᠠᠳᠠᠯᠲᠠ ᠶᠢ ᠬᠥᠳᠡᠯᠭᠡᠭᠴᠢ ᠠᠲᠠᠭᠠᠷᠬᠠᠯ ᠤᠨ ᠰᠢᠲᠦᠭᠡᠨ ᠲᠡᠨᠳᠡ ᠪᠠᠢᠷᠢᠯᠠᠵᠤ ᠪᠠᠢᠯᠠ᠃ 4 ᠲᠡᠭᠡᠲᠡᠯᠡ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠴᠣᠭ ᠵᠢᠪᠬᠤᠯᠠᠩ ᠲᠡᠨᠳᠡ ᠦᠵᠡᠭᠳᠡᠪᠡ᠃ ᠲᠡᠷᠡ ᠨᠢ ᠮᠢᠨᠦ ᠲᠠᠯᠠ ᠳᠡᠭᠡᠷᠡ ᠦᠵᠡᠭᠰᠡᠨ ᠦᠵᠡᠭᠳᠡᠯ ᠦᠨ ᠬᠢ ᠲᠠᠢ ᠠᠳᠠᠯᠢ ᠪᠠᠢᠪᠠ᠃
5 ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠬᠠᠷᠠᠭᠠ ᠪᠠᠨ ᠬᠣᠢᠰᠢ ᠴᠢᠭᠯᠡᠭᠦᠯ》 ᠭᠡᠰᠡᠨ ᠳᠦ᠂ ᠪᠢ ᠬᠠᠷᠠᠭᠠ ᠪᠠᠨ ᠬᠣᠢᠰᠢ ᠴᠢᠭᠯᠡᠭᠦᠯᠬᠦ ᠳᠦ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠲᠦ ᠬᠠᠭᠠᠯᠭᠠᠨ ᠤ ᠬᠣᠢᠲᠤ ᠲᠠᠯᠠ ᠳᠤ ᠨᠥᠭᠥᠭᠡ ᠠᠲᠠᠭᠠᠷᠬᠠᠯ ᠤᠨ ᠰᠢᠲᠦᠭᠡᠨ ᠪᠠᠢᠪᠠ᠃ 6 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠢᠰᠷᠧᠯ ᠤᠨ ᠭᠡᠷ ᠦᠨ ᠡ᠊ᠨᠳᠡ ᠶᠠᠭᠤ ᠦᠢᠯᠡᠳᠴᠦ ᠪᠠᠢᠭᠠ ᠶᠢ ᠬᠠᠷᠠᠵᠤ ᠪᠠᠢᠨᠠ ᠤᠤ︖ ᠲᠡᠳᠡ ᠮᠠᠰᠢ ᠶᠡᠬᠡ ᠵᠢᠭᠰᠢᠭᠦᠷᠢᠲᠦ ᠵᠦᠢᠯᠡᠰ ᠢ ᠦᠢᠯᠡᠳᠴᠦ᠂ ᠨᠠᠮᠠᠶᠢ ᠠᠷᠢᠭᠤᠨ ᠭᠠᠵᠠᠷ ᠠᠴᠠ ᠮᠢᠨᠢ ᠬᠣᠯᠠᠳᠠᠭᠤᠯᠬᠤ ᠭᠡᠵᠦ ᠪᠠᠢᠨᠠ᠃ ᠬᠠᠷᠢᠨ ᠴᠢ ᠡᠭᠦᠨ ᠡᠴᠡ ᠢᠯᠡᠭᠦᠦ ᠵᠢᠭᠰᠢᠭᠦᠷᠢᠲᠦ ᠵᠦᠢᠯᠡᠰ ᠢ ᠬᠠᠷᠠᠬᠤ ᠪᠣᠯᠣᠨᠠ》 ᠭᠡᠪᠡ᠃
7 ᠳᠠᠷᠠᠭᠠ ᠨᠢ ᠲᠡᠷᠡ ᠨᠠᠮᠠᠶᠢ ᠬᠦᠷᠢᠶᠡᠨ ᠦ ᠡᠭᠦᠳᠡᠨ ᠳᠦ ᠠᠪᠴᠢᠷᠠᠪᠠ᠃ ᠪᠢ ᠬᠠᠷᠠᠬᠤ ᠳᠤ᠂ ᠬᠠᠨᠠᠨ ᠳᠤᠨᠢ ᠨᠢᠭᠡ ᠨᠦᠬᠡ ᠪᠠᠢᠪᠠ᠃ 8 ᠲᠡᠷᠡ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠬᠠᠨᠠ ᠶᠢ ᠨᠦᠬᠡᠯᠡ》 ᠭᠡᠰᠡᠨ ᠳᠦ᠂ ᠪᠢ ᠬᠠᠨᠠ ᠶᠢ ᠨᠦᠬᠡᠯᠡᠬᠦ ᠳᠦ᠂ ᠨᠢᠭᠡᠨ ᠡᠭᠦᠳᠡ ᠪᠠᠢᠪᠠ᠃ 9 ᠲᠡᠷᠡ᠄ 《ᠳᠣᠲᠣᠭᠰᠢ ᠣᠷᠣᠵᠤ᠂ ᠲᠡᠳᠡᠨ ᠦ ᠡ᠊ᠨᠳᠡ ᠦᠢᠯᠡᠳᠴᠦ ᠪᠤᠢ ᠪᠤᠵᠠᠷ ᠵᠢᠭᠰᠢᠭᠦᠷᠢᠲᠦ ᠵᠦᠢᠯᠡᠰ ᠢ ᠬᠠᠷᠠ》 ᠭᠡᠪᠡ᠃ 10 ᠪᠢ ᠣᠷᠣᠵᠤ ᠬᠠᠷᠠᠬᠤ ᠳᠤ᠂ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠬᠠᠨᠠ ᠳᠡᠭᠡᠷᠡ ᠶᠠᠩᠵᠤ ᠪᠦᠷᠢ ᠶᠢᠨ ᠮᠥᠯᠬᠥᠭᠴᠢᠳ᠂ ᠵᠢᠭᠰᠢᠭᠦᠷᠢᠲᠦ ᠠᠮᠢᠲᠠᠳ ᠪᠣᠯᠣᠨ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠠᠮᠤᠭ ᠰᠢᠲᠦᠭᠡᠨ ᠰᠡᠢᠯᠦᠭᠳᠡᠭᠰᠡᠨ ᠪᠠᠢᠪᠠ᠃ 11 ᠲᠡᠳᠡᠭᠡᠷ ᠦᠨ ᠡᠮᠦᠨᠡ ᠢᠰᠷᠧᠯ ᠤᠨ ᠭᠡᠷ ᠦᠨ ᠳᠠᠯᠠᠨ ᠠᠬᠠᠮᠠᠳ ᠵᠣᠭᠰᠣᠵᠤ᠂ ᠱᠠᠹᠠᠨ ᠤ ᠬᠦᠦ ᠶᠠᠽᠠᠨᠢᠶᠠ ᠴᠤ ᠲᠡᠳᠡᠨ ᠦ ᠳᠤᠮᠳᠠ ᠵᠣᠭᠰᠣᠵᠤ ᠪᠠᠢᠪᠠ᠃ ᠬᠥᠮᠦᠨ ᠪᠦᠷᠢ ᠭᠠᠷ ᠲᠠᠭᠠᠨ ᠪᠣᠢᠫᠣᠷ ᠪᠠᠷᠢᠵᠤ᠂ ᠠᠩᠬᠢᠯᠤᠭᠤᠨ ᠦᠨᠦᠷᠲᠦ ᠤᠲᠤᠯᠭᠠ ᠶᠢᠨ ᠤᠲᠤᠭᠠᠨ ᠡᠭᠦᠯᠡ ᠬᠥᠭᠡᠷᠴᠦ ᠪᠠᠢᠪᠠ᠃ 12 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠢᠰᠷᠧᠯ ᠤᠨ ᠭᠡᠷ ᠦᠨ ᠠᠬᠠᠮᠠᠳ ᠤᠳ ᠬᠠᠷᠠᠩ᠋ᠭᠤᠢ ᠳᠤ᠂ ᠬᠥᠮᠦᠨ ᠪᠦᠷᠢ ᠰᠢᠲᠦᠭᠡᠨ ᠦ ᠪᠠᠨ ᠥᠷᠥᠭᠡᠨ ᠳᠦ ᠶᠠᠭᠤ ᠦᠢᠯᠡᠳᠴᠦ ᠪᠠᠢᠭᠠ ᠶᠢ ᠬᠠᠷᠠᠪᠠ ᠤᠤ︖ ᠲᠡᠳᠡ᠄ 〈ᠶᠣᠬᠣᠸᠠ ᠪᠢᠳᠡᠨ ᠢ ᠬᠠᠷᠠᠳᠠᠭ ᠦᠭᠡᠢ᠃ ᠶᠣᠬᠣᠸᠠ ᠡᠨᠡ ᠨᠤᠲᠤᠭ ᠢ ᠬᠠᠶᠠᠪᠠ〉 ᠭᠡᠯᠴᠡᠵᠦ ᠪᠠᠢᠨᠠ》 ᠭᠡᠪᠡ᠃ 13 ᠲᠡᠷᠡ ᠨᠠᠳᠠ ᠳᠤ᠄ 《ᠬᠠᠷᠢᠨ ᠴᠢ ᠲᠡᠳᠡᠨ ᠦ ᠡᠭᠦᠨ ᠡᠴᠡ ᠢᠯᠡᠭᠦᠦ ᠵᠢᠭᠰᠢᠭᠦᠷᠢᠲᠦ ᠵᠦᠢᠯᠡᠰ ᠢ ᠦᠢᠯᠡᠳᠴᠦ ᠪᠠᠢᠭᠠ ᠶᠢ ᠬᠠᠷᠠᠬᠤ ᠪᠣᠯᠣᠨᠠ》 ᠭᠡᠪᠡ᠃ 14 ᠳᠠᠷᠠᠭᠠ ᠨᠢ ᠲᠡᠷᠡ ᠨᠠᠮᠠᠶᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠬᠣᠢᠰᠢ ᠪᠠᠨ ᠬᠠᠷᠠᠭᠰᠠᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠠᠪᠴᠢᠷᠠᠯᠠ᠃ ᠪᠢ ᠦᠵᠡᠬᠦ ᠳᠦ᠂ ᠡᠮᠡᠭᠲᠡᠢᠴᠦᠳ ᠲᠠᠮᠣᠽ 5 ᠤᠨ ᠲᠥᠯᠥᠭᠡ ᠭᠠᠰᠢᠭᠤᠳᠠᠨ ᠲᠡᠨᠳᠡ ᠰᠠᠭᠤᠵᠠᠭᠠᠵᠤ ᠪᠠᠢᠪᠠ︕ 15 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠬᠠᠷᠠᠪᠠ ᠤᠤ︖ ᠬᠠᠷᠢᠨ ᠴᠢ ᠡᠳᠡᠭᠡᠷ ᠡᠴᠡ ᠴᠤ ᠢᠯᠡᠭᠦᠦ ᠵᠢᠭᠰᠢᠭᠦᠷᠢᠲᠦ ᠵᠦᠢᠯᠡᠰ ᠢ ᠬᠠᠷᠠᠬᠤ ᠪᠣᠯᠣᠨᠠ》 ᠭᠡᠪᠡ᠃
16 ᠢᠩᠭᠢᠭᠡᠳ ᠲᠡᠷᠡ ᠨᠠᠮᠠᠶᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠳᠣᠲᠣᠭᠠᠳᠤ ᠬᠦᠷᠢᠶᠡᠨ ᠳᠦ ᠠᠪᠴᠢᠷᠠᠪᠠ᠃ ᠪᠢ ᠬᠠᠷᠠᠬᠤ ᠳᠤ᠂ ᠡᠭᠦᠳᠡᠨ ᠦ ᠲᠠᠩᠬᠢᠮ ᠪᠣᠯᠣᠨ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠣᠭᠣᠷᠣᠨᠳᠣᠬᠢ ᠶᠣᠬᠣᠸᠠ ᠶᠢᠨ ᠣᠷᠳᠣᠨ ᠤ ᠡᠭᠦᠳᠡᠨ ᠳᠦ ᠬᠣᠷᠢᠨ ᠲᠠᠪᠤ ᠣᠷᠴᠢᠮ ᠡᠷᠡ ᠨᠢᠷᠤᠭᠤ ᠪᠠᠨ ᠣᠷᠳᠣᠨ ᠤᠷᠤᠭᠤ᠂ ᠨᠢᠭᠤᠷ ᠢᠶᠠᠨ ᠵᠡᠭᠦᠨᠰᠢ ᠬᠠᠷᠠᠭᠤᠯᠤᠨ ᠵᠡᠭᠦᠨ ᠲᠡᠰᠢ ᠬᠠᠨᠳᠤᠨ ᠨᠠᠷᠠᠨ ᠳᠤ ᠮᠥᠷᠭᠥᠵᠦ ᠪᠠᠢᠪᠠ᠃ 17 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠡᠭᠦᠨ ᠢ ᠬᠠᠷᠠᠪᠠ ᠤᠤ︖ ᠶᠦᠳᠠ ᠶᠢᠨ ᠭᠡᠷ ᠦᠨ ᠬᠢᠨ ᠤ ᠦᠢᠯᠡᠳᠴᠦ ᠪᠠᠢᠭᠠ ᠡᠳᠡᠭᠡᠷ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠨᠢ ᠪᠠᠭᠠ ᠭᠡᠵᠢ ᠤᠤ︖ ᠲᠡᠳᠡ ᠡᠨᠡ ᠭᠠᠵᠠᠷ ᠢ ᠬᠦᠴᠦᠷᠬᠡᠭᠯᠡᠯ ᠢᠶᠡᠷ ᠳᠦᠭᠦᠷᠭᠡᠵᠦ᠂ ᠮᠢᠨᠦ ᠠᠭᠤᠷ ᠢ ᠬᠥᠳᠡᠯᠭᠡᠬᠦ ᠪᠡᠷ ᠦᠯᠦ ᠪᠠᠷᠠᠮ ᠬᠠᠮᠠᠷ ᠳᠡᠭᠡᠷᠡ ᠪᠡᠨ ᠮᠥᠴᠢᠷ ᠬᠦᠷᠭᠡᠵᠦ 6 ᠪᠠᠢᠨᠠ︕ 18 ᠲᠡᠢᠮᠦ ᠡᠴᠡ ᠪᠢ ᠴᠤ ᠠᠭᠤᠷ ᠲᠠᠢ ᠪᠠᠷ ᠦᠢᠯᠡᠳᠦᠨᠡ᠃ ᠪᠢ ᠲᠡᠳᠡᠨ ᠢ ᠥᠷᠥ ᠡᠪᠡᠳᠦᠨ ᠬᠠᠷᠠᠬᠤ ᠦᠭᠡᠢ᠂ ᠥᠷᠥᠰᠢᠶᠡᠬᠦ ᠦᠭᠡᠢ᠃ ᠲᠡᠳᠡ ᠴᠢᠬᠢᠨ ᠳᠤ ᠮᠢᠨᠢ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠤᠭᠰᠠᠨ ᠴᠤ ᠪᠢ ᠲᠡᠳᠡᠨ ᠦ ᠬᠢ ᠶᠢ ᠰᠣᠨᠣᠰᠬᠤ ᠦᠭᠡᠢ》 ᠭᠡᠪᠡ᠃