ᠡᠽᠧᠺᠢᠶᠧᠯ ᠠᠷᠪᠠᠨ ᠨᠢᠭᠡ
ᠤᠳᠤᠷᠢᠳᠤᠭᠴᠢᠳ ᠰᠢᠳᠬᠡᠭᠳᠡᠨᠡ
1 ᠰᠦᠨᠡᠰᠦ ᠨᠠᠮᠠᠶᠢ ᠡᠷᠭᠦᠵᠦ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠵᠡᠭᠦᠨ ᠬᠠᠭᠠᠯᠭᠠᠨ ᠳᠤ ᠠᠪᠴᠢᠷᠠᠪᠠ᠃ ᠪᠢ ᠦᠵᠡᠬᠦ ᠳᠦ᠂ ᠬᠠᠭᠠᠯᠭᠠᠨ ᠳᠤ ᠬᠣᠷᠢᠨ ᠲᠠᠪᠤᠨ ᠬᠥᠮᠦᠨ ᠪᠠᠢᠯᠠ᠂ ᠠᠷᠠᠳ ᠲᠦᠮᠡᠨ ᠦ ᠤᠳᠤᠷᠢᠳᠤᠭᠴᠢ ᠠᠽᠦ᠋ᠷ ᠤᠨ ᠬᠦᠦ ᠶᠠᠽᠠᠨᠢᠶᠠ ᠪᠣᠯᠣᠨ ᠪᠧᠨᠠᠢᠶᠠ ᠶᠢᠨ ᠬᠦᠦ ᠫᠧᠯᠠᠲ᠋ᠢᠶᠠ ᠴᠤ ᠲᠡᠳᠡᠨ ᠦ ᠳᠤᠮᠳᠠ ᠪᠠᠢᠬᠤ ᠶᠢ ᠪᠢ ᠬᠠᠷᠠᠪᠠ᠃ 2 ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠲᠡᠳᠡ ᠪᠣᠯ ᠡᠨᠡ ᠬᠣᠲᠠ ᠳᠤ ᠭᠡᠮ ᠪᠤᠷᠤᠭᠤ ᠶᠢ ᠰᠡᠳᠦᠵᠦ᠂ ᠬᠣᠷᠣᠨ ᠮᠠᠭᠤ ᠵᠥᠪᠯᠡᠯᠭᠡ ᠥᠭᠳᠡᠭ ᠬᠥᠮᠦᠰ ᠶᠤᠮ᠃ 3 ᠲᠡᠳᠡ᠄ 〈ᠭᠡᠷ ᠪᠠᠷᠢᠬᠤ ᠴᠠᠭ ᠣᠢᠷᠠᠲᠤᠭᠠ ᠦᠭᠡᠢ᠂ ᠡᠨᠡ ᠬᠣᠲᠠ ᠪᠣᠯ ᠬᠠᠮᠠᠭᠠᠯᠠᠬᠤ ᠲᠣᠭᠣᠭᠠ᠂ ᠪᠢᠳᠡ ᠪᠣᠯ ᠮᠢᠬᠠ〉 ᠭᠡᠵᠡᠭᠡᠵᠦ ᠪᠠᠢᠨᠠ᠃ 4 ᠴᠢ ᠲᠡᠳᠡᠨ ᠦ ᠡᠰᠡᠷᠭᠦ ᠡᠰᠢ ᠦᠵᠡᠭᠦᠯ᠂ ᠬᠥᠮᠦᠨ ᠦ ᠬᠦᠦ ᠡ᠂ ᠡᠰᠢ ᠦᠵᠡᠭᠦᠯ》 ᠭᠡᠪᠡ᠃
5 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠨᠠᠳᠠ ᠳᠡᠭᠡᠷᠡ ᠪᠠᠭᠤᠵᠤ᠂ ᠨᠠᠳᠠ ᠳᠤ᠄ 《〈ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠢᠰᠷᠧᠯ ᠤᠨ ᠭᠡᠷ ᠡ᠂ ᠲᠠ ᠨᠠᠷ ᠤᠨ ᠪᠣᠳᠣᠯ ᠪᠣᠯ ᠡᠢᠮᠦ᠂ ᠲᠠ ᠨᠠᠷ ᠳᠣᠲᠣᠷᠠ ᠪᠠᠨ ᠶᠠᠭᠤ ᠪᠣᠳᠣᠵᠤ ᠪᠠᠢᠭᠠ ᠶᠢ ᠪᠢ ᠮᠡᠳᠡᠨᠡ᠃ 6 ᠲᠠ ᠨᠠᠷ ᠡᠨᠡ ᠬᠣᠲᠠ ᠳᠤ ᠠᠯᠠᠭᠳᠠᠭᠰᠠᠳ ᠢᠶᠠᠨ ᠣᠯᠠᠰᠢᠷᠠᠭᠤᠯᠵᠤ᠂ ᠭᠤᠳᠤᠮᠵᠢ ᠨᠤᠭᠤᠳ ᠢ ᠨᠢ ᠠᠯᠠᠭᠳᠠᠭᠰᠠᠳ ᠢᠶᠠᠷ ᠳᠦᠭᠦᠷᠭᠡᠭᠰᠡᠨ ᠪᠠᠢᠨᠠ᠃ 7 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠲᠠ ᠨᠠᠷ ᠤᠨ ᠲᠡᠨᠳᠡ ᠬᠠᠶᠠᠭᠰᠠᠨ ᠬᠡᠭᠦᠷ ᠤᠳ ᠪᠣᠯ ᠮᠢᠬᠠ᠂ ᠡᠨᠡ ᠬᠣᠲᠠ ᠪᠣᠯ ᠲᠣᠭᠣᠭᠠ ᠶᠤᠮ᠃ ᠬᠠᠷᠢᠨ ᠪᠢ ᠲᠠ ᠨᠠᠷ ᠢ ᠳᠣᠲᠣᠷᠠ ᠠᠴᠠ ᠨᠢ ᠭᠠᠷᠭᠠᠨᠠ᠃ 8 ᠲᠠ ᠨᠠᠷ ᠢᠯᠳᠦᠨ ᠡᠴᠡ ᠠᠶᠤᠳᠠᠭ ᠲᠤᠯᠠ ᠪᠢ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠢᠯᠳᠦ ᠠᠪᠴᠢᠷᠠᠨᠠ ᠬᠡᠮᠡᠨ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 9 ᠪᠢ ᠲᠠ ᠨᠠᠷ ᠢ ᠬᠣᠲᠠ ᠠᠴᠠ ᠭᠠᠷᠭᠠᠵᠤ᠂ ᠬᠠᠷᠢ ᠶᠢᠨ ᠬᠢᠨ ᠤ ᠭᠠᠷ ᠲᠤ ᠲᠤᠰᠢᠶᠠᠨ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠰᠢᠳᠬᠡᠯ ᠪᠠᠭᠤᠯᠭᠠᠨᠠ᠃ 10 ᠲᠠ ᠨᠠᠷ ᠢᠯᠳᠦᠨ ᠳᠦ ᠤᠨᠠᠬᠤ ᠪᠥᠭᠡᠳ ᠪᠢ ᠲᠠ ᠨᠠᠷ ᠢ ᠢᠰᠷᠧᠯ ᠤᠨ ᠬᠢᠯᠢ ᠳᠡᠭᠡᠷᠡ ᠰᠢᠳᠬᠡᠨᠡ᠃ ᠲᠡᠭᠡᠪᠡᠯ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 11 ᠡᠨᠡ ᠬᠣᠲᠠ ᠲᠠ ᠨᠠᠷ ᠲᠤ ᠲᠣᠭᠣᠭᠠ ᠪᠢᠰᠢ᠂ ᠲᠠ ᠨᠠᠷ ᠴᠤ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠮᠢᠬᠠ ᠪᠢᠰᠢ ᠪᠣᠯᠣᠨᠠ᠃ ᠪᠢ ᠢᠰᠷᠧᠯ ᠤᠨ ᠬᠢᠯᠢ ᠳᠡᠭᠡᠷᠡ ᠲᠠ ᠨᠠᠷ ᠢ ᠰᠢᠳᠬᠡᠨᠡ᠃ 12 ᠲᠡᠢᠨ ᠬᠦ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠲᠣᠭᠲᠠᠭᠠᠯ ᠤᠳ ᠢ ᠮᠢᠨᠢ ᠮᠥᠷᠳᠡᠯ ᠦᠭᠡᠢ᠂ ᠵᠢᠷᠤᠮ ᠤᠳ ᠢ ᠮᠢᠨᠢ ᠰᠠᠬᠢᠯ ᠦᠭᠡᠢ᠂ ᠡᠷᠭᠢᠨ ᠲᠣᠭᠣᠷᠢᠨ ᠤ ᠪᠠᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠶᠣᠰᠣ ᠵᠢᠷᠤᠮ ᠤᠳ ᠢ ᠳᠠᠭᠠᠭᠰᠠᠨ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃
13 ᠪᠢ ᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠬᠤ ᠳᠤ᠂ ᠪᠧᠨᠠᠢᠶᠠ ᠶᠢᠨ ᠬᠦᠦ ᠫᠧᠯᠠᠲ᠋ᠢᠶᠠ ᠦᠬᠦᠪᠡ᠃ ᠪᠢ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ᠂ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠥ᠂ ᠡᠵᠡᠨ ᠶᠣᠬᠣᠸᠠ᠃ ᠲᠠ ᠢᠰᠷᠧᠯ ᠤᠨ ᠦᠯᠡᠳᠡᠭᠰᠡᠳ ᠢ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠨᠠ ᠭᠡᠵᠢ ᠤᠤ︖》 ᠭᠡᠪᠡ᠃
14 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 15 《ᠬᠥᠮᠦᠨ ᠦ ᠬᠦᠦ ᠡ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠨᠢ ᠴᠢᠨᠦ ᠴᠥᠯᠡᠭᠳᠡᠭᠰᠡᠨ ᠠᠬᠠ ᠳᠡᠭᠦᠦᠰ ᠬᠢᠭᠡᠳ ᠴᠢᠨᠦ ᠠᠬᠠ ᠳᠡᠭᠦᠦᠰ ᠪᠣᠯᠬᠤ ᠬᠠᠮᠢᠶᠠᠲᠠᠨ᠂ ᠢᠰᠷᠧᠯ ᠤᠨ ᠪᠦᠬᠦ ᠭᠡᠷ ᠦᠨ ᠬᠢᠨ ᠤ ᠲᠤᠬᠠᠢ᠄ 〈ᠶᠣᠬᠣᠸᠠ ᠠᠴᠠ ᠬᠣᠯᠠ ᠪᠠᠢᠭᠠᠷᠠᠢ᠃ ᠡᠨᠡ ᠭᠠᠵᠠᠷ ᠪᠢᠳᠡᠨ ᠳᠦ ᠡᠵᠡᠮᠰᠢᠯ ᠪᠣᠯᠭᠠᠨ ᠰᠣᠶᠣᠷᠬᠠᠭᠳᠠᠭᠰᠠᠨ〉 ᠭᠡᠯᠴᠡᠵᠦ ᠪᠠᠢᠨᠠ᠃
ᠢᠰᠷᠧᠯ ᠢ ᠪᠤᠴᠠᠭᠠᠬᠤ ᠠᠮᠠᠯᠠᠯᠲᠠ
16 ᠲᠡᠢᠮᠦ ᠡᠴᠡ ᠴᠢ᠄ 〈ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠪᠢ ᠲᠡᠳᠡᠨ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠬᠥᠭᠡᠭᠡᠵᠦ᠂ ᠭᠦᠷᠦᠨ ᠨᠦᠭᠦᠳ ᠦᠨ ᠳᠤᠮᠳᠠ ᠲᠠᠷᠬᠠᠭᠠᠭᠰᠠᠨ ᠪᠣᠯᠪᠠᠴᠤ ᠣᠴᠢᠭᠰᠠᠨ ᠭᠦᠷᠦᠨ ᠨᠦᠭᠦᠳ ᠲᠤᠨᠢ ᠪᠢ ᠥᠪᠡᠷ ᠢᠶᠡᠨ ᠲᠦᠷ ᠵᠠᠭᠤᠷᠠ ᠲᠡᠳᠡᠨ ᠦ ᠠᠷᠢᠭᠤᠨ ᠭᠠᠵᠠᠷ ᠨᠢ ᠪᠣᠯᠣᠭᠰᠠᠨ ᠶᠤᠮ〉 ᠭᠡᠵᠦ ᠬᠡᠯᠡ᠂ 17 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠪᠢ ᠲᠠ ᠨᠠᠷ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡᠴᠡ ᠴᠤᠭᠯᠠᠭᠤᠯᠵᠤ᠂ ᠲᠠᠷᠬᠠᠭᠠᠭᠳᠠᠨ ᠣᠴᠢᠭᠰᠠᠨ ᠭᠦᠷᠦᠨ ᠨᠦᠭᠦᠳ ᠡᠴᠡ ᠴᠢᠨᠢ ᠪᠤᠴᠠᠭᠠᠨ ᠠᠪᠴᠢᠷᠠᠭᠠᠳ ᠢᠰᠷᠧᠯ ᠤᠨ ᠨᠤᠲᠤᠭ ᠢ ᠲᠠ ᠨᠠᠷ ᠲᠤ ᠥᠭᠭᠥᠨᠡ〉 ᠭᠡᠵᠦ ᠬᠡᠯᠡ᠂ 18 ᠲᠡᠳᠡ ᠲᠡᠢᠨ ᠬᠦ ᠪᠤᠴᠠᠵᠤ᠂ ᠲᠡᠨᠳᠡᠬᠢ ᠶᠢᠨ ᠵᠢᠭᠰᠢᠭᠦᠷᠢᠲᠦ ᠪᠤᠵᠠᠷ ᠪᠦᠬᠦᠨ ᠢ ᠬᠠᠶᠠᠨᠠ᠃ 19 ᠪᠢ ᠲᠡᠳᠡᠨ ᠳᠦ ᠨᠢᠭᠡ ᠵᠢᠷᠦᠬᠡ ᠶᠢ ᠥᠭᠴᠦ᠂ ᠲᠡᠳᠡᠨ ᠦ ᠳᠣᠲᠣᠷᠠ ᠰᠢᠨᠡ ᠰᠦᠨᠡᠰᠦ ᠶᠢ ᠣᠷᠣᠭᠤᠯᠤᠨᠠ᠃ ᠪᠢ ᠲᠡᠳᠡᠨ ᠦ ᠮᠢᠬᠠᠨ ᠪᠡᠶᠡ ᠡᠴᠡ ᠴᠢᠯᠠᠭᠤᠨ ᠵᠢᠷᠦᠬᠡ ᠶᠢ ᠨᠢ ᠠᠪᠴᠤ᠂ ᠮᠢᠬᠠᠨ ᠵᠢᠷᠦᠬᠡ ᠶᠢ ᠥᠭᠭᠥᠨᠡ᠃ 20 ᠲᠡᠢᠨ ᠬᠦ ᠲᠡᠳᠡ ᠲᠣᠭᠲᠠᠭᠠᠯ ᠤᠳ ᠢ ᠮᠢᠨᠢ ᠮᠥᠷᠳᠡᠵᠦ᠂ ᠵᠢᠭᠠᠪᠤᠷᠢ ᠨᠤᠭᠤᠳ ᠢ ᠮᠢᠨᠢ ᠰᠠᠬᠢᠨ ᠪᠡᠶᠡᠯᠡᠭᠦᠯᠦᠨᠡ᠃ ᠲᠡᠳᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠣᠯᠵᠤ᠂ ᠪᠢ ᠲᠡᠳᠡᠨ ᠦ ᠪᠤᠷᠬᠠᠨ ᠪᠣᠯᠣᠨᠠ᠃ 21 ᠬᠠᠷᠢᠨ ᠵᠢᠭᠰᠢᠭᠦᠷᠢᠲᠦ ᠪᠤᠵᠠᠷ ᠵᠦᠢᠯᠡᠰ ᠲᠦ ᠵᠢᠷᠦᠬᠡ ᠪᠡᠨ ᠵᠣᠷᠢᠭᠤᠯᠤᠭᠰᠠᠨ ᠬᠥᠮᠦᠰ ᠦᠨ ᠬᠤᠪᠢ ᠳᠤ᠂ ᠪᠢ ᠦᠢᠯᠡᠰ ᠦᠨ ᠬᠢᠨᠢ ᠦᠷᠡ ᠳᠠᠭᠠᠪᠤᠷᠢ ᠶᠢ ᠲᠡᠳᠡᠨ ᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠯᠭᠠᠨᠠ᠂ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ》 ᠭᠡᠪᠡ᠃
22 ᠲᠡᠭᠡᠬᠦ ᠳᠦ ᠺᠧᠷᠣᠪ ᠤᠳ ᠳᠠᠯᠠᠪᠴᠢ ᠪᠠᠨ ᠳᠡᠯᠭᠡᠪᠡ᠂ ᠬᠦᠷᠳᠦ ᠨᠦᠭᠦᠳ ᠲᠡᠳᠡᠨ ᠦ ᠳᠡᠷᠭᠡᠳᠡ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠴᠣᠭ ᠵᠢᠪᠬᠤᠯᠠᠩ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠢᠪᠠ᠃ 23 ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠬᠣᠲᠠ ᠶᠢᠨ ᠳᠣᠲᠣᠷᠠ ᠠᠴᠠ ᠬᠥᠭᠡᠷᠴᠦ᠂ ᠬᠣᠲᠠ ᠶᠢᠨ ᠵᠡᠭᠦᠨ ᠲᠠᠯᠠ ᠶᠢᠨ ᠠᠭᠤᠯᠠᠨ ᠳᠡᠭᠡᠷᠡ ᠲᠣᠭᠲᠠᠪᠠ᠃ 24 ᠪᠤᠷᠬᠠᠨ ᠤ ᠰᠦᠨᠡᠰᠦᠨ ᠦ ᠰᠣᠶᠣᠷᠬᠠᠭᠰᠠᠨ ᠦᠵᠡᠭᠳᠡᠯ ᠳᠣᠲᠣᠷᠠ ᠰᠦᠨᠡᠰᠦ ᠨᠠᠮᠠᠶᠢ ᠡᠷᠭᠦᠵᠦ᠂ ᠪᠠᠪᠢᠯᠣᠨ ᠳᠤ ᠪᠠᠢᠭᠠ ᠴᠥᠯᠡᠭᠳᠡᠭᠰᠡᠳ ᠤᠷᠤᠭᠤ ᠠᠪᠴᠢᠷᠠᠭᠰᠠᠨ ᠳᠤ᠂ ᠮᠢᠨᠦ ᠦᠵᠡᠭᠰᠡᠨ ᠦᠵᠡᠭᠳᠡᠯ ᠮᠢᠨᠦ ᠳᠡᠭᠡᠷᠡ ᠡᠴᠡ ᠬᠥᠭᠡᠷᠪᠡ᠃ 25 ᠳᠠᠷᠠᠭᠠ ᠨᠢ ᠪᠢ ᠶᠣᠬᠣᠸᠠ ᠶᠢᠨ ᠨᠠᠳᠠ ᠳᠤ ᠦᠵᠡᠭᠦᠯᠦᠭᠰᠡᠨ ᠪᠦᠭᠦᠳᠡ ᠶᠢ ᠴᠥᠯᠡᠭᠳᠡᠭᠰᠡᠳ ᠲᠦ ᠶᠠᠷᠢᠪᠠ᠃