ᠡᠽᠧᠺᠢᠶᠧᠯ ᠳᠥᠴᠢᠨ ᠳᠣᠯᠣᠭᠠ
ᠥᠷᠭᠥᠭᠡᠨ ᠡᠴᠡ ᠭᠠᠷᠬᠤ ᠤᠷᠤᠰᠬᠠᠯ
1 ᠲᠡᠷᠡ ᠬᠥᠮᠦᠨ ᠨᠠᠮᠠᠶᠢ ᠥᠷᠭᠥᠭᠡᠨ ᠦ ᠬᠠᠭᠠᠯᠭᠠᠨ ᠳᠤ ᠪᠤᠴᠠᠭᠠᠵᠤ ᠠᠪᠠᠴᠢᠪᠠ᠂ ᠬᠠᠷᠠ᠂ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠥᠷᠭᠥᠭᠡᠨ ᠦ ᠪᠣᠱᠣᠭᠠᠨ ᠳᠣᠣᠷᠠ ᠠᠴᠠ ᠤᠰᠤ ᠭᠠᠷᠤᠨ ᠵᠡᠭᠦᠨᠰᠢ ᠤᠷᠤᠰᠴᠤ ᠪᠠᠢᠪᠠ᠃ ᠤᠰᠤ ᠨᠢ ᠥᠷᠭᠥᠭᠡᠨ ᠦ ᠡᠮᠦᠨᠡ ᠵᠦᠭ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠡᠮᠦᠨᠡ ᠲᠠᠯᠠ ᠠᠴᠠ ᠳᠣᠷᠣᠭᠰᠢ ᠤᠷᠤᠰᠴᠤ ᠪᠠᠢᠪᠠ᠃ 2 ᠲᠡᠭᠡᠭᠡᠳ ᠲᠡᠷᠡ ᠨᠠᠮᠠᠶᠢ ᠬᠣᠢᠲᠤ ᠬᠠᠭᠠᠯᠭᠠ ᠪᠠᠷ ᠭᠠᠳᠠᠭᠰᠢ ᠭᠠᠷᠭᠠᠨ᠂ ᠪᠤᠯᠤᠩ ᠢ ᠲᠣᠭᠣᠷᠢᠵᠤ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠭᠠᠳᠠᠨᠠᠬᠢ ᠬᠠᠭᠠᠯᠭᠠᠨ ᠳᠤ ᠠᠪᠴᠢᠷᠠᠪᠠ᠃ ᠬᠠᠷᠠ᠂ ᠡᠮᠦᠨᠡ ᠲᠠᠯᠠ ᠠᠴᠠ ᠤᠰᠤ ᠤᠷᠤᠰᠴᠤ ᠪᠠᠢᠪᠠ᠃
3 ᠲᠡᠷᠡ ᠬᠥᠮᠦᠨ ᠭᠠᠷ ᠲᠠᠭᠠᠨ ᠱᠤᠭᠤᠮ ᠪᠠᠷᠢᠵᠤ᠂ ᠵᠡᠭᠦᠨᠰᠢ ᠶᠠᠪᠤᠭᠰᠠᠨ ᠢᠶᠠᠨ ᠮᠢᠩ᠋ᠭᠠᠨ ᠲᠣᠬᠣᠢ ᠶᠢ ᠬᠡᠮᠵᠢᠵᠦ᠂ ᠨᠠᠮᠠᠶᠢ ᠤᠰᠤᠨ ᠳᠤᠮᠳᠠᠭᠤᠷ ᠥᠩᠭᠡᠷᠡᠭᠦᠯᠬᠦ ᠳᠦ᠂ ᠤᠰᠤ ᠱᠠᠭᠠ ᠳᠤ ᠲᠤᠯᠵᠤ ᠪᠠᠢᠪᠠ᠃ 4 ᠲᠡᠷᠡ ᠳᠠᠬᠢᠨ ᠨᠢᠭᠡ ᠮᠢᠩ᠋ᠭᠠ ᠶᠢ ᠬᠡᠮᠵᠢᠵᠦ᠂ ᠨᠠᠮᠠᠶᠢ ᠤᠰᠤᠨ ᠳᠤᠮᠳᠠᠭᠤᠷ ᠥᠩᠭᠡᠷᠡᠭᠦᠯᠬᠦ ᠳᠦ᠂ ᠤᠰᠤ ᠡᠪᠦᠳᠦᠭ ᠬᠦᠷᠴᠦ᠂ ᠳᠠᠬᠢᠨ ᠮᠢᠩ᠋ᠭᠠ ᠶᠢ ᠬᠡᠮᠵᠢᠵᠦ᠂ ᠨᠠᠮᠠᠶᠢ ᠥᠩᠭᠡᠷᠡᠭᠦᠯᠬᠦ ᠳᠦ᠂ ᠤᠰᠤ ᠪᠦᠰᠡᠯᠡᠭᠦᠷ ᠲᠦ ᠬᠦᠷᠴᠡᠢ᠃ 5 ᠳᠠᠬᠢᠨ ᠮᠢᠩ᠋ᠭᠠ ᠶᠢ ᠬᠡᠮᠵᠢᠬᠦ ᠳᠦᠨᠢ᠂ ᠮᠢᠨᠦ ᠭᠠᠲᠤᠯᠵᠤ ᠦᠯᠦ ᠴᠢᠳᠠᠬᠤ ᠭᠣᠣᠯ ᠪᠣᠯᠣᠭᠰᠠᠨ ᠪᠠᠢᠪᠠ᠃ ᠤᠰᠤ ᠨᠡᠮᠡᠭᠳᠡᠭᠰᠡᠨ ᠲᠤᠯᠠ ᠤᠮᠪᠠᠬᠤ ᠦᠭᠡᠢ ᠪᠠᠷ ᠭᠠᠲᠤᠯᠤᠰᠢ ᠦᠭᠡᠢ ᠭᠣᠣᠯ ᠪᠣᠯᠵᠠᠢ᠃ 6 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠡᠭᠦᠨ ᠢ ᠬᠠᠷᠠᠪᠠ ᠤᠤ︖》 ᠭᠡᠳ ᠨᠠᠮᠠᠶᠢ ᠭᠣᠣᠯ ᠤᠨ ᠬᠥᠪᠡᠭᠡᠨ ᠳᠦ ᠪᠤᠴᠠᠭᠠᠨ ᠠᠪᠠᠴᠢᠪᠠ᠃ 7 ᠪᠢ ᠪᠤᠴᠠᠵᠤ ᠢᠷᠡᠭᠡᠳ ᠬᠠᠷᠠᠬᠤ ᠳᠤ᠂ ᠭᠣᠣᠯ ᠤᠨ ᠨᠠᠭᠠᠨᠠ ᠲᠠᠯᠠ ᠪᠠ ᠴᠠᠭᠠᠨᠠ ᠲᠠᠯᠠ ᠳᠤ ᠣᠯᠠᠨ ᠮᠣᠳᠣ ᠪᠠᠢᠪᠠ᠃ 8 ᠲᠡᠷᠡ ᠨᠠᠳᠠ ᠳᠤ ᠠᠢᠯᠠᠳᠤᠨ᠄ 《ᠡᠨᠡ ᠤᠰᠤ ᠳᠣᠷᠣᠨᠠᠲᠤ ᠨᠤᠲᠤᠭ ᠤᠷᠤᠭᠤ ᠤᠷᠤᠰᠴᠤ᠂ ᠬᠥᠨᠳᠡᠢ ᠤᠷᠤᠭᠤ ᠤᠷᠤᠭᠤᠳᠠᠨ ᠲᠠᠩᠭᠢᠰ ᠲᠤ ᠴᠢᠳᠬᠤᠨ ᠣᠷᠣᠨᠠ᠃ ᠲᠡᠷᠡ ᠤᠷᠤᠰᠬᠠᠯ ᠲᠠᠩᠭᠢᠰ ᠲᠤ ᠴᠢᠳᠬᠤᠨ ᠣᠷᠣᠪᠠᠯ ᠲᠡᠨᠳᠡᠬᠢ ᠶᠢᠨ ᠤᠰᠤ ᠴᠡᠪᠡᠷᠰᠢᠨᠡ 26 ᠃ 9 ᠡᠨᠡ ᠭᠣᠣᠯ ᠤᠨ ᠴᠢᠳᠬᠤᠨ ᠣᠷᠣᠭᠰᠠᠨ ᠭᠠᠵᠠᠷ ᠪᠦᠷᠢ ᠶᠢᠨ ᠬᠢᠨᠢ ᠬᠥᠳᠡᠯᠳᠡᠭ ᠠᠮᠢᠲᠠᠨ ᠪᠦᠷᠢ ᠠᠮᠢᠳᠤᠷᠠᠬᠤ ᠪᠣᠯᠣᠨᠠ᠂ ᠡᠨᠡ ᠤᠰᠤ ᠴᠢᠳᠬᠤᠭᠰᠠᠨ ᠭᠠᠵᠠᠷ ᠪᠦᠷᠢ ᠶᠢᠨ ᠢᠶᠠᠨ ᠤᠰᠤ ᠶᠢ ᠴᠡᠪᠡᠷᠰᠢᠭᠦᠯᠳᠡᠭ᠌ ᠤᠴᠢᠷ ᠠᠴᠠ ᠲᠡᠨᠳᠡ ᠨᠢ ᠦᠢ ᠣᠯᠠᠨ ᠵᠢᠭᠠᠰᠤ ᠪᠠᠢᠬᠤ ᠪᠣᠯᠣᠨᠠ᠃ ᠡᠢᠨ ᠬᠦ ᠭᠣᠣᠯ ᠴᠢᠳᠬᠤᠨ ᠣᠷᠣᠭᠰᠠᠨ ᠭᠠᠵᠠᠷ ᠤᠨ ᠬᠠᠮᠤᠭ ᠶᠠᠭᠤᠮᠠ ᠠᠮᠢᠳᠤᠷᠠᠬᠤ ᠪᠣᠯᠣᠨᠠ᠃ 10 ᠵᠢᠭᠠᠰᠤᠴᠢᠳ ᠬᠥᠪᠡᠭᠡᠨ ᠳᠦᠨᠢ ᠵᠣᠭᠰᠣᠨᠠ᠂ ᠧᠨ ᠭᠧᠳᠢ ᠡᠴᠡ ᠧᠨ ᠡᠭᠯᠠᠢᠮ 27 ᠬᠦᠷᠲᠡᠯᠡᠬᠢ ᠨᠢ ᠲᠣᠣᠷ ᠲᠠᠯᠪᠢᠬᠤ ᠭᠠᠵᠠᠷ ᠤᠳ ᠪᠠᠢᠬᠤ ᠪᠣᠯᠣᠨᠠ᠃ ᠲᠡᠨᠳᠡᠬᠢ ᠶᠢᠨ ᠵᠢᠭᠠᠰᠤ ᠨᠢ ᠲᠥᠷᠥᠯ ᠵᠦᠢᠯ ᠢᠶᠠᠷ ᠢᠶᠠᠨ ᠶᠡᠬᠡ ᠲᠠᠩᠭᠢᠰ ᠤᠨ ᠵᠢᠭᠠᠰᠤ ᠠᠳᠠᠯᠢ ᠦᠯᠡᠮᠵᠢ ᠣᠯᠠᠨ ᠪᠣᠯᠣᠨᠠ᠃ 11 ᠨᠠᠮᠤᠭ ᠪᠣᠯᠣᠨ ᠪᠠᠯᠴᠢᠭ ᠭᠠᠵᠠᠷ ᠤᠳ ᠴᠡᠪᠡᠷᠰᠢᠬᠦ ᠦᠭᠡᠢ᠂ ᠳᠠᠪᠤᠰᠤ ᠲᠠᠢ ᠪᠠᠢᠭᠰᠠᠭᠠᠷ ᠪᠠᠢᠬᠤ ᠪᠣᠯᠣᠨᠠ᠃ 12 ᠭᠣᠣᠯ ᠤᠨ ᠬᠣᠶᠠᠷ ᠬᠥᠪᠡᠭᠡᠨ ᠳᠡᠭᠡᠷᠡ᠂ ᠬᠣᠭᠣᠯᠠ ᠬᠦᠨᠡᠰᠦ ᠪᠣᠯᠣᠮᠠᠷ ᠲᠥᠷᠥᠯ ᠪᠦᠷᠢ ᠶᠢᠨ ᠮᠣᠳᠣ ᠤᠷᠭᠤᠨᠠ᠃ ᠨᠠᠪᠴᠢᠰ ᠨᠢ ᠬᠠᠲᠠᠬᠤ ᠦᠭᠡᠢ᠂ ᠵᠢᠮᠢᠰ ᠨᠢ ᠳᠠᠭᠤᠰᠬᠤ ᠦᠭᠡᠢ᠂ ᠰᠠᠷᠠ ᠪᠦᠷᠢ ᠵᠢᠮᠢᠰ ᠭᠠᠷᠭᠠᠨᠠ᠃ ᠤᠰᠤ ᠠᠷᠢᠭᠤᠨ ᠭᠠᠵᠠᠷ ᠠᠴᠠ ᠤᠷᠤᠰᠴᠤ ᠢᠷᠡᠨᠡ᠂ ᠲᠡᠢᠮᠦ ᠡᠴᠡ ᠲᠡᠳᠡᠭᠡᠷ ᠦᠨ ᠵᠢᠮᠢᠰ ᠢ ᠨᠢ ᠬᠦᠨᠡᠰᠦᠨ ᠳᠦ᠂ ᠨᠠᠪᠴᠢ ᠶᠢ ᠨᠢ ᠡᠳᠡᠭᠡᠷᠡᠯ ᠳᠦ ᠬᠡᠷᠡᠭᠯᠡᠨᠡ》 ᠭᠡᠪᠡ᠃
ᠭᠠᠵᠠᠷ ᠤᠨ ᠬᠢᠯᠢ ᠬᠢᠵᠠᠭᠠᠷ ᠤᠳ
13 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠢᠰᠷᠧᠯ ᠤᠨ ᠠᠷᠪᠠᠨ ᠬᠣᠶᠠᠷ ᠣᠪᠣᠭ ᠲᠤ ᠥᠪ ᠪᠣᠯᠭᠠᠨ ᠬᠤᠪᠢᠶᠠᠵᠤ ᠥᠭᠬᠦ ᠨᠤᠲᠤᠭ ᠤᠨ ᠬᠢᠯᠢ ᠬᠢᠵᠠᠭᠠᠷ ᠡᠢᠮᠦ ᠶᠤᠮ᠄ ᠶᠣᠰᠧᠹ ᠬᠣᠶᠠᠷ ᠬᠤᠪᠢ ᠶᠢ ᠠᠪᠬᠤ ᠶᠣᠰᠣᠲᠠᠢ᠃ 14 ᠲᠠ ᠨᠠᠷ ᠡᠭᠦᠨ ᠢ ᠥᠪ ᠪᠣᠯᠭᠠᠨ ᠨᠢᠭᠡ ᠬᠤᠪᠢ ᠶᠢ ᠨᠢ ᠨᠥᠭᠥᠭᠡ ᠲᠠᠢ ᠨᠢ ᠲᠡᠩᠴᠡᠭᠦᠦ ᠪᠠᠢᠯᠭᠠᠬᠤ ᠶᠣᠰᠣᠲᠠᠢ᠃ ᠪᠢ ᠡᠴᠢᠭᠡ ᠡᠪᠦᠭᠡᠳ ᠲᠦ ᠴᠢᠨᠢ ᠥᠭᠬᠦ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠤᠴᠢᠷ ᠠᠴᠠ ᠡᠨᠡ ᠭᠠᠵᠠᠷ ᠥᠪ ᠪᠣᠯᠵᠤ᠂ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠣᠷᠣᠨᠠ᠃
15 ᠡᠨᠡ ᠭᠠᠵᠠᠷ ᠤᠨ ᠬᠢᠯᠢ ᠭᠡᠪᠡᠯ᠂ ᠬᠣᠢᠲᠤ ᠬᠢᠯᠢ ᠨᠢ ᠶᠡᠬᠡ ᠲᠠᠩᠭᠢᠰ ᠠᠴᠠ ᠾᠧᠲ᠋ᠯᠣᠨ ᠤ ᠵᠠᠮ ᠢᠶᠠᠷ ᠽᠧᠳᠠᠳ᠋ ᠢᠶᠠᠷ ᠳᠠᠭᠠᠷᠢᠨ᠂ 16 ᠳ᠋ᠠᠮᠠᠰᠺᠦ᠋ᠰ ᠪᠣᠯᠣᠨ ᠬᠠᠮᠠᠲ ᠤᠨ ᠬᠢᠯᠢ ᠶᠢᠨ ᠬᠣᠭᠣᠷᠣᠨᠳᠣ ᠪᠤᠢ ᠪᠧᠷᠣᠲ᠋ᠠ ᠪᠠ ᠰᠢᠪᠷᠠᠢᠮ ᠢᠶᠠᠷ ᠥᠩᠭᠡᠷᠡᠨ᠂ ᠬᠠᠶᠦ᠋ᠷᠠᠨ ᠤ ᠬᠢᠯᠢ ᠳᠡᠭᠡᠷᠡᠬᠢ ᠬᠠᠽᠧᠷ ᠬᠠᠲ᠋ᠢᠺᠣᠨ ᠳᠤ ᠬᠦᠷᠦᠨᠡ᠂ 17 ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠶᠡᠬᠡ ᠲᠠᠩᠭᠢᠰ ᠠᠴᠠ ᠳ᠋ᠠᠮᠠᠰᠺᠦ᠋ᠰ ᠤᠨ ᠬᠢᠯᠢ ᠳᠠᠬᠢ ᠬᠠᠽᠠᠷ ᠧᠨᠠᠨ ᠬᠦᠷᠲᠡᠯᠡᠬᠢ ᠬᠢᠯᠢ ᠨᠢ ᠬᠣᠢᠲᠤ ᠬᠢᠵᠠᠭᠠᠷ ᠪᠣᠯᠣᠨᠠ᠃
18 ᠵᠡᠭᠦᠨ ᠬᠢᠯᠢ ᠨᠢ ᠬᠠᠶᠦ᠋ᠷᠠᠨ ᠪᠣᠯᠣᠨ ᠳ᠋ᠠᠮᠠᠰᠺᠦ᠋ᠰ ᠤᠨ ᠬᠣᠭᠣᠷᠣᠨᠳᠣ ᠠᠴᠠ ᠡᠬᠢᠯᠡᠨ ᠭᠢᠯᠧᠶᠠᠳ᠋ ᠪᠠ ᠢᠰᠷᠧᠯ ᠤᠨ ᠬᠢᠯᠢ ᠪᠣᠯᠬᠤ ᠶᠣᠷᠳᠠᠨ ᠢᠶᠠᠷ ᠥᠩᠭᠡᠷᠡᠨ᠂ ᠰᠥᠨᠥᠭᠰᠡᠨ ᠲᠠᠩᠭᠢᠰ ᠤᠨ ᠵᠡᠭᠦᠨ ᠲᠠᠯᠠ ᠠᠴᠠ ᠴᠠᠰᠢ ᠪᠠᠨ ᠲᠠᠮᠠᠷ ᠲᠤ ᠬᠦᠷᠦᠨᠡ᠃ ᠡᠨᠡ ᠪᠣᠯ ᠵᠡᠭᠦᠨ ᠬᠢᠵᠠᠭᠠᠷ ᠶᠤᠮ᠃
19 ᠡᠮᠦᠨᠡᠲᠦ ᠬᠢᠯᠢ ᠨᠢ ᠲᠠᠮᠠᠷ ᠠᠴᠠ ᠡᠬᠢᠯᠡᠨ ᠮᠧᠷᠢᠪ ᠺᠠᠳᠧᠱ ᠤᠨ ᠪᠤᠯᠠᠭ᠂ ᠶᠧᠵᠢᠫᠲ ᠤᠨ ᠭᠣᠷᠣᠬᠠ ᠪᠠᠷ ᠥᠩᠭᠡᠷᠡᠨ ᠶᠡᠬᠡ ᠲᠠᠩᠭᠢᠰ ᠲᠤ ᠬᠦᠷᠬᠦ ᠶᠣᠰᠣᠲᠠᠢ᠃ ᠡᠨᠡ ᠨᠢ ᠡᠮᠦᠨᠡᠲᠦ ᠬᠢᠵᠠᠭᠠᠷ ᠶᠤᠮ᠃
20 ᠪᠠᠷᠠᠭᠤᠨ ᠬᠢᠯᠢ ᠨᠢ ᠶᠡᠬᠡ ᠲᠠᠩᠭᠢᠰ ᠪᠥᠭᠡᠳ ᠡᠮᠦᠨᠡᠲᠦ ᠬᠢᠯᠢ ᠡᠴᠡ ᠯᠧᠪᠣᠬᠠᠮᠠᠲ ᠤᠨ ᠬᠠᠷᠠᠯᠳᠤᠭᠠ ᠬᠦᠷᠦᠨᠡ᠃ ᠡᠨᠡ ᠪᠣᠯ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠶᠤᠮ᠃
21 ᠡᠨᠡ ᠭᠠᠵᠠᠷ ᠢ ᠲᠠ ᠨᠠᠷ ᠢᠰᠷᠧᠯ ᠤᠨ ᠣᠪᠣᠭ ᠤᠳ ᠤᠨ ᠳᠠᠭᠠᠤ ᠥᠪᠡᠷᠰᠡᠳ ᠦᠨ ᠢᠶᠠᠨ ᠳᠤᠮᠳᠠ ᠬᠤᠪᠢᠶᠠᠭᠲᠤᠨ᠃ 22 ᠲᠠ ᠨᠠᠷ ᠡᠭᠦᠨ ᠢ ᠥᠪᠡᠷᠰᠡᠳ ᠲᠡᠭᠡᠨ᠂ ᠮᠥᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠦᠷᠡ ᠬᠡᠦᠬᠡᠳ ᠲᠥᠷᠥᠭᠦᠯᠵᠦ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠬᠠᠷᠢ ᠶᠢᠨ ᠬᠢᠨ ᠳᠤ ᠥᠪ ᠪᠣᠯᠭᠠᠨ᠂ ᠰᠢᠪᠠᠭᠠ ᠣᠷᠬᠢᠵᠤ ᠬᠤᠪᠢᠶᠠᠬᠤ ᠶᠣᠰᠣᠲᠠᠢ᠃ ᠲᠠ ᠨᠠᠷ ᠲᠡᠳᠡᠨ ᠢ ᠤᠤᠭᠠᠯ ᠢᠰᠷᠧᠯᠴᠦᠳ ᠲᠡᠢ ᠠᠳᠠᠯᠢᠬᠠᠨ ᠳᠤ ᠲᠣᠭᠠᠴᠠ᠃ ᠲᠡᠳᠡ ᠴᠤ ᠢᠰᠷᠧᠯ ᠤᠨ ᠣᠪᠣᠭ ᠤᠳ ᠤᠨ ᠳᠤᠮᠳᠠ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠰᠢᠪᠠᠭᠠ ᠪᠠᠷ ᠥᠪ ᠣᠯᠣᠨᠠ᠃ 23 ᠬᠠᠷᠢ ᠬᠥᠮᠦᠨ ᠠᠯᠢ ᠣᠪᠣᠭ ᠤᠨ ᠳᠤᠮᠳᠠ ᠰᠠᠭᠤᠭᠰᠠᠨ ᠴᠤ ᠲᠠ ᠨᠠᠷ ᠲᠡᠭᠦᠨ ᠳᠦ ᠥᠪ ᠢ ᠨᠢ ᠥᠭᠬᠦ ᠶᠣᠰᠣᠲᠠᠢ᠃ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃