ᠡᠽᠧᠺᠢᠶᠧᠯ ᠠᠷᠪᠠᠨ ᠬᠣᠶᠠᠷ
ᠴᠥᠯᠡᠭᠳᠡᠬᠦ ᠲᠤᠬᠠᠢ ᠳᠦᠷᠰᠦᠯᠡᠯ
1 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 2 《ᠬᠥᠮᠦᠨ ᠦ ᠬᠦᠦ ᠡ᠂ ᠴᠢ ᠲᠡᠷᠰᠯᠡᠭᠦᠦ ᠭᠡᠷ ᠦᠨ ᠬᠢᠨ ᠤ ᠳᠤᠮᠳᠠ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃ ᠲᠡᠳᠡ ᠪᠣᠯ ᠲᠡᠷᠰᠯᠡᠭᠦᠦ ᠭᠡᠷ ᠦᠨ ᠬᠢᠨ ᠤᠴᠢᠷ ᠠᠴᠠ ᠬᠠᠷᠠᠬᠤ ᠨᠢᠳᠦ ᠲᠠᠢ ᠪᠣᠯᠪᠠᠴᠤ ᠬᠠᠷᠠᠬᠤ ᠦᠭᠡᠢ᠂ ᠰᠣᠨᠣᠰᠬᠤ ᠴᠢᠬᠢ ᠲᠠᠢ ᠪᠣᠯᠪᠠᠴᠤ ᠰᠣᠨᠣᠰᠬᠤ ᠦᠭᠡᠢ᠃ 3 ᠲᠡᠢᠮᠦ ᠡᠴᠡ ᠬᠥᠮᠦᠨ ᠦ ᠬᠦᠦ ᠴᠢ ᠥᠪᠡᠷ ᠢᠶᠡᠨ ᠴᠥᠯᠡᠭᠳᠡᠬᠦ ᠬᠥᠮᠦᠨ ᠮᠡᠲᠦ ᠠᠴᠢᠶᠠ ᠪᠡᠯᠡᠳᠴᠦ᠂ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠡᠳᠦᠷ ᠢᠶᠡᠷ ᠴᠥᠯᠡᠯᠭᠡ ᠳᠦ ᠶᠠᠪᠤ᠃ ᠴᠢ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠥᠪᠡᠷ ᠦᠨ ᠢᠶᠠᠨ ᠭᠠᠵᠠᠷ ᠠᠴᠠ ᠥᠭᠡᠷᠡ ᠭᠠᠵᠠᠷ ᠤᠷᠤᠭᠤ ᠴᠥᠯᠡᠭᠳᠡᠭᠰᠡᠨ ᠬᠥᠮᠦᠨ ᠮᠡᠲᠦ ᠶᠠᠪᠤ᠃ ᠲᠡᠳᠡ ᠲᠡᠷᠰᠯᠡᠭᠦᠦ ᠭᠡᠷ ᠦᠨ ᠬᠢᠨ ᠪᠣᠯᠪᠠᠴᠤ ᠣᠢᠯᠠᠭᠠᠵᠤ ᠮᠠᠭᠠᠳ ᠦᠭᠡᠢ᠃ 4 ᠴᠢ ᠡᠳᠦᠷ ᠢᠶᠡᠷ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠠᠴᠢᠶᠠ ᠪᠠᠨ ᠴᠥᠯᠡᠯᠭᠡ ᠶᠢᠨ ᠠᠴᠢᠶᠠ ᠮᠡᠲᠦ ᠭᠠᠷᠭᠠᠵᠤ᠂ ᠦᠳᠡᠰᠢ ᠪᠠᠷ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠥᠪᠡᠷ ᠢᠶᠡᠨ ᠴᠥᠯᠡᠯᠭᠡ ᠳᠦ ᠶᠠᠪᠤᠭᠠ ᠬᠥᠮᠦᠨ ᠮᠡᠲᠦ ᠭᠠᠷᠴᠤ ᠶᠠᠪᠤ᠃ 5 ᠴᠢ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠬᠠᠨᠠ ᠶᠢ ᠨᠦᠬᠡᠯᠡᠨ᠂ ᠲᠡᠷᠡᠭᠦᠷ ᠠᠴᠢᠶᠠ ᠪᠠᠨ ᠭᠠᠷᠭᠠ᠃ 6 ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠠᠴᠢᠶᠠ ᠪᠠᠨ ᠮᠥᠷᠥᠨ ᠳᠡᠭᠡᠨ ᠡᠭᠦᠷᠴᠦ᠂ ᠬᠠᠷᠠᠩ᠋ᠭᠤᠢ ᠳᠤ ᠠᠪᠴᠤ ᠶᠠᠪᠤ᠃ ᠪᠢ ᠴᠢᠮᠠᠶᠢ ᠢᠰᠷᠧᠯ ᠤᠨ ᠭᠡᠷ ᠲᠦ ᠵᠣᠷᠢᠭᠤᠯᠤᠭᠰᠠᠨ ᠲᠡᠮᠳᠡᠭ ᠪᠣᠯᠭᠠᠭᠰᠠᠨ᠂ ᠴᠢ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠨ ᠭᠠᠵᠠᠷ ᠢ ᠪᠦᠦ ᠬᠠᠷᠠ》 ᠭᠡᠪᠡ᠃
7 ᠪᠢ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠨᠢ ᠭᠦᠢᠴᠡᠳᠬᠡᠪᠡ᠃ ᠪᠢ ᠡᠳᠦᠷ ᠢᠶᠡᠷ ᠠᠴᠢᠶᠠ ᠪᠠᠨ ᠴᠥᠯᠡᠯᠭᠡ ᠶᠢᠨ ᠠᠴᠢᠶᠠ ᠮᠡᠲᠦ ᠭᠠᠷᠭᠠᠵᠤ᠂ ᠦᠳᠡᠰᠢ ᠨᠢ ᠭᠠᠷ ᠢᠶᠠᠷ ᠢᠶᠠᠨ ᠬᠠᠨᠠ ᠶᠢ ᠨᠦᠬᠡᠯᠡᠵᠦ᠂ ᠬᠠᠷᠠᠩ᠋ᠭᠤᠢ ᠳᠤ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠠᠴᠢᠶᠠ ᠪᠠᠨ ᠮᠥᠷᠥᠨ ᠳᠡᠭᠡᠷᠡ ᠪᠡᠨ ᠡᠭᠦᠷᠦᠨ ᠭᠠᠷᠴᠤ ᠶᠠᠪᠤᠯᠠ᠃
8 ᠥᠷᠯᠥᠭᠡ ᠨᠢ ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 9 《ᠬᠥᠮᠦᠨ ᠦ ᠬᠦᠦ ᠡ᠂ ᠲᠡᠷᠰᠯᠡᠭᠦᠦ ᠢᠰᠷᠧᠯ ᠤᠨ ᠭᠡᠷ ᠴᠢᠮᠠ ᠳᠤ᠄ 〈ᠴᠢ ᠶᠠᠭᠤ ᠦᠢᠯᠡᠳᠴᠦ ᠪᠠᠢᠨᠠ ᠪᠤᠢ︖〉 ᠭᠡᠵᠦ ᠬᠡᠯᠡᠭᠡ ᠦᠭᠡᠢ ᠤᠤ︖ 10 ᠴᠢ ᠲᠡᠳᠡᠨ ᠳᠦ᠄ 〈ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠡᠨᠡ ᠨᠢ ᠶᠧᠷᠦ᠋ᠰᠠᠯᠧᠮ ᠤᠨ ᠲᠡᠷᠢᠭᠦᠨ ᠬᠢᠭᠡᠳ ᠲᠡᠨᠳᠡ ᠪᠠᠢᠭᠠ ᠢᠰᠷᠧᠯ ᠤᠨ ᠪᠦᠬᠦ ᠭᠡᠷ ᠦᠨ ᠬᠢᠨ ᠤ ᠲᠤᠬᠠᠢ ᠵᠥᠩ ᠶᠤᠮ〉 ᠭᠡᠵᠦ ᠬᠡᠯᠡ᠃ 11 ᠪᠠᠰᠠ᠄ 〈ᠪᠢ ᠲᠠ ᠨᠠᠷ ᠲᠤ ᠲᠡᠮᠳᠡᠭ ᠪᠣᠯᠣᠨᠠ᠂ ᠮᠢᠨᠦ ᠦᠢᠯᠡᠳᠦᠭᠰᠡᠨ ᠶᠣᠰᠣᠭᠠᠷ ᠲᠠ ᠨᠠᠷ ᠲᠤ ᠦᠢᠯᠡᠳᠦᠭᠳᠡᠬᠦ ᠪᠣᠯᠣᠨᠠ᠃ ᠲᠠ ᠨᠠᠷ ᠣᠯᠵᠠᠯᠠᠭᠳᠠᠭᠠᠳ ᠴᠥᠯᠡᠯᠭᠡ ᠳᠦ ᠶᠠᠪᠤᠨᠠ᠂ 12 ᠲᠠ ᠨᠠᠷ ᠤᠨ ᠳᠤᠮᠳᠠᠬᠢ ᠤᠳᠤᠷᠢᠳᠤᠭᠴᠢ ᠨᠢ ᠬᠠᠷᠠᠩ᠋ᠭᠤᠢ ᠳᠤ ᠠᠴᠢᠶᠠ ᠪᠠᠨ ᠮᠥᠷᠥᠨ ᠳᠡᠭᠡᠨ ᠡᠭᠦᠷᠦᠨ ᠭᠠᠷᠴᠤ ᠶᠠᠪᠤᠨᠠ᠃ ᠬᠥᠮᠦᠰ ᠠᠴᠢᠶᠡ ᠪᠡᠨ ᠭᠠᠷᠭᠠᠬᠤ ᠶᠢᠨ ᠲᠤᠯᠠᠳᠠ ᠬᠠᠨᠠ ᠶᠢ ᠨᠦᠬᠡᠯᠡᠨᠡ᠃ ᠤᠳᠤᠷᠢᠳᠤᠭᠴᠢ ᠨᠢ ᠨᠢᠭᠤᠷ ᠢᠶᠠᠨ ᠪᠦᠲᠡᠭᠡᠬᠦ ᠪᠥᠭᠡᠳ ᠨᠢᠳᠦ ᠨᠢ ᠭᠠᠵᠠᠷ ᠢ ᠳᠠᠬᠢᠵᠤ ᠬᠠᠷᠠᠬᠤ ᠦᠭᠡᠢ ᠪᠣᠯᠣᠨᠠ᠃ 13 ᠪᠢ ᠲᠡᠭᠦᠨ ᠦ ᠳᠡᠭᠡᠷᠡ ᠲᠣᠣᠷ ᠢᠶᠠᠨ ᠬᠠᠶᠠᠵᠤ᠂ ᠲᠡᠷᠡ ᠮᠢᠨᠦ ᠤᠷᠠᠬᠠᠨ ᠳᠤ ᠣᠷᠣᠨᠠ᠃ ᠪᠢ ᠲᠡᠭᠦᠨ ᠢ ᠺᠠᠯᠳᠧᠶᠠᠴᠤᠳ ᠤᠨ ᠨᠤᠲᠤᠭ᠂ ᠪᠠᠪᠢᠯᠣᠨ ᠳᠤ ᠠᠪᠠᠴᠢᠨᠠ᠃ ᠬᠠᠷᠢᠨ ᠲᠡᠷᠡ ᠪᠡᠷ ᠲᠡᠷᠡ ᠭᠠᠵᠠᠷ ᠢ ᠦᠵᠡᠬᠦ ᠦᠭᠡᠢ ᠪᠠᠷ ᠲᠡᠨᠳᠡ ᠦᠬᠦᠨᠡ᠃ 14 ᠪᠢ ᠲᠡᠭᠦᠨ ᠦ ᠲᠣᠭᠣᠷᠢᠨ ᠳᠠᠬᠢ ᠲᠤᠰᠠᠯᠠᠭᠴᠢᠳ ᠪᠠ ᠴᠡᠷᠢᠭ ᠤᠳ ᠢ ᠪᠦᠭᠦᠳᠡ ᠶᠢ ᠵᠦᠭ ᠪᠦᠷᠢ ᠳᠤ ᠲᠠᠷᠬᠠᠭᠠᠬᠤ ᠪᠥᠭᠡᠳ ᠠᠷᠤ ᠠᠴᠠ ᠨᠢ ᠢᠯᠳᠦ ᠰᠤᠭᠤᠯᠬᠤ ᠪᠣᠯᠣᠨᠠ᠃ 15 ᠲᠡᠢᠨ ᠬᠦ ᠪᠢ ᠲᠡᠳᠡᠨ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠲᠠᠷᠬᠠᠭᠠᠵᠤ᠂ ᠭᠦᠷᠦᠨ ᠨᠦᠭᠦᠳ ᠦᠨ ᠳᠤᠮᠳᠠ ᠪᠤᠲᠠᠷᠠᠭᠠᠬᠤ ᠦᠶᠡ ᠳᠦ᠂ ᠲᠡᠳᠡ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 16 ᠬᠠᠷᠢᠨ ᠪᠢ ᠵᠠᠷᠢᠮ ᠢ ᠨᠢ ᠦᠯᠡᠳᠡᠭᠡᠨᠡ᠂ ᠲᠡᠳᠡ ᠢᠯᠳᠦ᠂ ᠥᠯᠥᠰᠬᠥᠯᠡᠩ ᠪᠣᠯᠣᠨ ᠲᠠᠬᠤᠯ ᠠᠴᠠ ᠮᠤᠯᠲᠤᠷᠠᠵᠤ᠂ ᠬᠠᠷᠢᠴᠤᠳ ᠤᠨ ᠳᠤᠮᠳᠠ ᠣᠴᠢᠭᠠᠳ ᠬᠢᠭᠰᠡᠨ ᠪᠦᠬᠦ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠢᠶᠠᠨ ᠥᠴᠢᠬᠦ ᠪᠣᠯᠣᠨᠠ᠃ ᠲᠡᠢᠨ ᠬᠦ ᠲᠡᠳᠡ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠶᠤᠮ》 ᠭᠡᠪᠡ᠃
17 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 18 《ᠬᠥᠮᠦᠨ ᠦ ᠬᠦᠦ ᠡ᠂ ᠴᠢ ᠴᠡᠴᠡᠷᠡᠨ ᠪᠠᠢᠵᠤ ᠬᠣᠭᠣᠯᠠ ᠪᠠᠨ ᠢᠳᠡᠨ᠂ ᠳᠠᠭᠵᠢᠨ ᠲᠦᠭᠰᠢᠵᠦ ᠤᠰᠤ ᠪᠠᠨ ᠤᠤᠭᠤ᠃ 19 ᠲᠡᠭᠡᠭᠡᠳ ᠨᠤᠲᠤᠭ ᠤᠨ ᠠᠷᠠᠳ ᠲᠦᠮᠡᠨ ᠳᠦ᠄ 〈ᠶᠧᠷᠦ᠋ᠰᠠᠯᠧᠮ ᠪᠣᠯᠣᠨ ᠢᠰᠷᠧᠯ ᠨᠤᠲᠤᠭ ᠤᠨ ᠰᠠᠭᠤᠭᠠᠯᠢᠴᠢᠳ ᠤᠨ ᠲᠤᠬᠠᠢ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠲᠡᠳᠡ ᠲᠦᠭᠰᠢᠭᠦᠷᠢ ᠲᠠᠢ ᠪᠠᠷ ᠬᠣᠭᠣᠯᠠ ᠪᠠᠨ ᠢᠳᠡᠵᠦ᠂ ᠠᠢᠳᠠᠰ ᠲᠠᠢ ᠪᠠᠷ ᠤᠰᠤ ᠪᠠᠨ ᠤᠤᠭᠤᠬᠤ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠲᠡᠳᠡᠨ ᠦ ᠨᠤᠲᠤᠭ ᠰᠠᠭᠤᠭᠠᠯᠢᠴᠢᠳ ᠪᠦᠭᠦᠳᠡ ᠶᠢᠨ ᠢᠶᠠᠨ ᠬᠦᠴᠦᠷᠬᠡᠭᠯᠡᠯ ᠡᠴᠡ ᠪᠣᠯᠵᠤ᠂ ᠠᠭᠤᠯᠳᠠᠭ ᠪᠦᠬᠦᠨ ᠢᠶᠡᠨ ᠠᠯᠳᠠᠨᠠ᠃ 20 ᠬᠥᠮᠦᠨ ᠰᠠᠭᠤᠳᠠᠭ ᠬᠣᠲᠠ ᠨᠤᠭᠤᠳ ᠪᠠᠯᠭᠠᠰᠤ ᠪᠣᠯᠵᠤ᠂ ᠨᠤᠲᠤᠭ ᠨᠢ ᠡᠵᠡᠭᠦᠢᠷᠡᠨᠡ᠃ ᠲᠡᠢᠨ ᠬᠦ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ〉 ᠭᠡᠵᠦ ᠬᠡᠯᠡ》 ᠭᠡᠯᠡ᠃
ᠶᠣᠬᠣᠸᠠ ᠶᠢᠨ ᠦᠭᠡ ᠪᠡᠶᠡᠯᠡᠭᠳᠡᠨᠡ
21 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 22 《ᠬᠥᠮᠦᠨ ᠦ ᠬᠦᠦ᠂ ᠢᠰᠷᠧᠯ ᠤᠨ ᠨᠤᠲᠤᠭ ᠳᠠᠶᠠᠭᠠᠷ ᠶᠠᠭᠠᠬᠢᠭᠠᠳ 〈ᠡᠳᠦᠷ ᠬᠣᠨᠣᠭ ᠥᠩᠭᠡᠷᠡᠵᠦ᠂ ᠦᠵᠡᠭᠳᠡᠯ ᠤᠳ ᠪᠡᠶᠡᠯᠡᠭᠳᠡᠭᠡ ᠦᠭᠡᠢ ᠪᠠᠢᠭᠰᠠᠭᠠᠷ〉 ᠭᠡᠳᠡᠭ ᠵᠦᠢᠷ ᠦᠭᠡ ᠪᠠᠢᠨᠠ ᠪᠤᠢ︖ 23 ᠲᠡᠢᠮᠦ ᠡᠴᠡ ᠴᠢ ᠲᠡᠳᠡᠨ ᠳᠦ᠄ 〈ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠪᠢ ᠡᠨᠡ ᠵᠦᠢᠷ ᠦᠭᠡ ᠶᠢ ᠡᠴᠦᠰᠯᠡᠭᠦᠯᠵᠦ᠂ ᠢᠰᠷᠧᠯ ᠳᠤ ᠬᠥᠮᠦᠰ ᠡᠨᠡ ᠵᠦᠢᠷ ᠦᠭᠡ ᠶᠢ ᠵᠣᠭᠰᠣᠭᠠᠨᠠ〉᠂ ᠬᠠᠷᠢᠨ ᠲᠡᠳᠡᠨ ᠳᠦ᠄ 〈ᠪᠦᠬᠦ ᠦᠵᠡᠭᠳᠡᠯ ᠪᠡᠶᠡᠯᠡᠭᠳᠡᠬᠦ ᠡᠳᠦᠷ ᠬᠣᠨᠣᠭ ᠣᠢᠷᠠᠲᠤᠯᠠ〉 ᠭᠡᠵᠦ ᠬᠡᠯᠡ᠃ 24 〈ᠢᠰᠷᠧᠯ ᠤᠨ ᠭᠡᠷ ᠦᠨ ᠳᠣᠲᠣᠷᠠ ᠳᠠᠬᠢᠵᠤ ᠬᠣᠭᠣᠰᠣᠨ ᠦᠵᠡᠭᠳᠡᠯ ᠪᠤᠶᠤ ᠵᠢᠰᠤᠷᠳᠠᠬᠤ ᠮᠡᠷᠭᠡ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ 25 ᠤᠴᠢᠷ ᠨᠢ ᠶᠣᠬᠣᠸᠠ ᠪᠢ ᠶᠠᠷᠢᠬᠤ ᠦᠭᠡ ᠪᠡᠨ ᠶᠠᠷᠢᠬᠤ ᠳᠤ᠂ ᠲᠡᠷᠡ ᠨᠢ ᠬᠣᠢᠰᠢᠯᠠᠯ ᠦᠭᠡᠢ ᠪᠡᠶᠡᠯᠡᠭᠳᠡᠨᠡ᠃ ᠲᠡᠷᠰᠯᠡᠭᠦᠦ ᠭᠡᠷ ᠦᠨ ᠬᠢᠨ ᠡ᠂ ᠴᠢᠨᠦ ᠡᠳᠦᠷ ᠤᠳ ᠲᠤ ᠪᠢ ᠦᠭᠡ ᠪᠡᠨ ᠠᠢᠯᠠᠳᠴᠤ᠂ ᠲᠡᠭᠦᠨ ᠢ ᠪᠠᠨ ᠪᠡᠶᠡᠯᠡᠭᠦᠯᠦᠨᠡ᠂ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃
26 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 27 《ᠬᠥᠮᠦᠨ ᠦ ᠬᠦᠦ ᠡ᠂ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ᠄ 〈ᠲᠡᠭᠦᠨ ᠦ ᠦᠵᠡᠳᠡᠭ ᠦᠵᠡᠭᠳᠡᠯ ᠪᠣᠯ ᠣᠳᠣ ᠠᠴᠠ ᠣᠯᠠᠨ ᠵᠢᠯ ᠤᠨ ᠬᠣᠢᠨᠠᠬᠢ ᠦᠶᠡ ᠶᠢᠨ ᠬᠢ᠂ ᠲᠡᠷᠡ ᠠᠯᠤᠰ ᠢᠷᠡᠭᠡᠳᠦᠢ ᠶᠢᠨ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠨᠠ〉 ᠭᠡᠯᠴᠡᠵᠦ ᠪᠠᠢᠨᠠ︕ 28 ᠲᠡᠢᠮᠦ ᠡᠴᠡ ᠴᠢ ᠲᠡᠳᠡᠨ ᠳᠦ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠮᠢᠨᠦ ᠦᠭᠡᠰ ᠦᠨ ᠠᠯᠢ ᠨᠢ ᠴᠤ ᠬᠣᠢᠰᠢᠯᠠᠬᠤ ᠦᠭᠡᠢ᠂ ᠶᠠᠷᠢᠬᠤ ᠦᠭᠡ ᠪᠦᠷᠢ ᠮᠢᠨᠢ ᠪᠡᠶᠡᠯᠡᠭᠳᠡᠨᠡ᠂ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃