ᠡᠽᠧᠺᠢᠶᠧᠯ ᠳᠥᠴᠢᠨ ᠵᠢᠷᠭᠤᠭᠠ
1 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠳᠣᠲᠣᠭᠠᠳᠤ ᠬᠦᠷᠢᠶᠡᠨ ᠦ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠬᠠᠭᠠᠯᠭᠠ ᠨᠢ ᠠᠵᠢᠯ ᠤᠨ ᠵᠢᠷᠭᠤᠭᠠᠨ ᠡᠳᠦᠷ ᠲᠦ ᠬᠠᠭᠠᠯᠲᠠᠲᠠᠢ ᠪᠠᠢᠵᠤ᠂ ᠠᠮᠠᠷᠠᠯ ᠤᠨ ᠡᠳᠦᠷ ᠨᠡᠭᠡᠭᠡᠯᠲᠡᠲᠡᠢ ᠪᠠᠢᠬᠤ ᠪᠣᠯᠣᠨᠠ᠂ ᠰᠢᠨᠡ ᠰᠠᠷᠠ ᠶᠢᠨ ᠪᠠᠶᠠᠷ ᠤᠨ ᠡᠳᠦᠷ ᠴᠤ ᠨᠡᠭᠡᠭᠡᠯᠲᠡᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ 2 ᠬᠠᠭᠠᠨ ᠭᠠᠳᠠᠨᠠ ᠠᠴᠠ ᠬᠠᠭᠠᠯᠭᠠᠨ ᠵᠠᠮ ᠤᠨ ᠬᠣᠩᠭᠢᠯ ᠢᠶᠠᠷ ᠣᠷᠣᠵᠤ᠂ ᠬᠠᠭᠠᠯᠭᠠᠨ ᠤ ᠪᠠᠭᠠᠨᠠ ᠶᠢᠨ ᠳᠡᠷᠭᠡᠳᠡ ᠵᠣᠭᠰᠣᠪᠠᠯ᠂ ᠲᠠᠬᠢᠯᠴᠢᠳ ᠲᠡᠭᠦᠨ ᠦ ᠠᠪᠴᠢᠷᠠᠭᠰᠠᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠤᠳ ᠢ ᠡᠷᠭᠦᠬᠦ ᠪᠣᠯᠣᠨᠠ᠂ ᠬᠠᠭᠠᠨ ᠬᠠᠭᠠᠯᠭᠠᠨ ᠤ ᠪᠣᠱᠣᠭᠠᠨ ᠳᠡᠭᠡᠷᠡ ᠮᠥᠷᠭᠥᠭᠡᠳ ᠭᠠᠳᠠᠭᠰᠢ ᠭᠠᠷᠬᠤ ᠪᠣᠯᠣᠨᠠ᠃ ᠬᠠᠭᠠᠯᠭᠠ ᠦᠳᠡᠰᠢ ᠬᠦᠷᠲᠡᠯᠡ ᠬᠠᠭᠠᠭᠳᠠᠬᠤ ᠦᠭᠡᠢ᠃ 3 ᠨᠤᠲᠤᠭ ᠤᠨ ᠠᠷᠠᠳ ᠲᠦᠮᠡᠨ ᠴᠤ ᠠᠮᠠᠷᠠᠯ ᠤᠨ ᠡᠳᠦᠷ ᠪᠠ ᠰᠢᠨᠡ ᠰᠠᠷᠠ ᠶᠢᠨ ᠪᠠᠶᠠᠷ ᠢᠶᠠᠷ ᠨᠥᠭᠥᠭᠡ ᠬᠠᠭᠠᠯᠭᠠᠨ ᠵᠠᠮ ᠤᠨ ᠣᠷᠣᠬᠤ ᠡᠭᠦᠳᠡᠨ ᠳᠦ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠮᠥᠷᠭᠥᠬᠦ ᠪᠣᠯᠣᠨᠠ᠃ 4 ᠠᠮᠠᠷᠠᠯ ᠤᠨ ᠡᠳᠦᠷ ᠬᠠᠭᠠᠨ ᠤ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠨᠢ ᠰᠣᠭᠣᠭ ᠦᠭᠡᠢ ᠵᠢᠷᠭᠤᠭᠠᠨ ᠬᠤᠷᠠᠭᠠ ᠪᠣᠯᠣᠨ ᠰᠣᠭᠣᠭ ᠦᠭᠡᠢ ᠨᠢᠭᠡ ᠬᠤᠴᠠ ᠶᠤᠮ᠃ 5 ᠢᠳᠡᠭᠡᠨ ᠡᠷᠭᠦᠯ ᠨᠢ ᠲᠡᠷᠡ ᠬᠤᠴᠠ ᠲᠠᠢ ᠬᠠᠮᠲᠤ ᠨᠢᠭᠡ ᠡᠹᠠ ᠭᠤᠯᠢᠷ᠂ ᠲᠡᠳᠡᠭᠡᠷ ᠬᠤᠷᠠᠭᠠ ᠲᠠᠢ ᠬᠠᠮᠲᠤ ᠴᠢᠳᠠᠯ ᠤᠨ ᠢᠶᠠᠨ ᠬᠢᠷᠢ ᠪᠠᠷ ᠥᠭᠬᠦ ᠭᠤᠯᠢᠷ ᠬᠢᠭᠡᠳ ᠨᠢᠭᠡ ᠡᠹᠠ ᠳᠤ ᠨᠢᠭᠡ ᠾᠢᠨ ᠲᠣᠰᠣ ᠪᠠᠢᠬᠤ ᠶᠣᠰᠣᠲᠠᠢ᠃ 6 ᠰᠢᠨᠡ ᠰᠠᠷᠠ ᠶᠢᠨ ᠪᠠᠶᠠᠷ ᠤᠨ ᠡᠳᠦᠷ ᠲᠦ ᠰᠣᠭᠣᠭ ᠦᠭᠡᠢ ᠨᠢᠭᠡ ᠵᠠᠯᠠᠭᠤ ᠪᠤᠬᠠ᠂ ᠰᠣᠭᠣᠭ ᠦᠭᠡᠢ ᠵᠢᠷᠭᠤᠭᠠᠨ ᠬᠤᠷᠠᠭᠠ ᠪᠠ ᠨᠢᠭᠡ ᠬᠤᠴᠠ ᠶᠢ ᠡᠷᠭᠦᠬᠦ ᠶᠣᠰᠣᠲᠠᠢ᠃ 7 ᠢᠳᠡᠭᠡᠨ ᠡᠷᠭᠦᠯ ᠨᠢ ᠨᠥᠭᠥᠭᠡ ᠪᠤᠬᠠ ᠲᠠᠢ ᠬᠠᠮᠲᠤ ᠨᠢᠭᠡ ᠡᠹᠠ ᠭᠤᠯᠢᠷ᠂ ᠨᠥᠭᠥᠭᠡ ᠬᠤᠴᠠ ᠲᠠᠢ ᠬᠠᠮᠲᠤ ᠨᠢᠭᠡ ᠡᠹᠠ ᠭᠤᠯᠢᠷ᠂ ᠲᠡᠳᠡᠭᠡᠷ ᠬᠤᠷᠠᠭᠠ ᠲᠠᠢ ᠬᠠᠮᠲᠤ ᠴᠢᠳᠠᠯ ᠤᠨ ᠢᠶᠠᠨ ᠬᠢᠷᠢ ᠪᠠᠷ ᠥᠭᠬᠦ ᠭᠤᠯᠢᠷ ᠬᠢᠭᠡᠳ ᠨᠢᠭᠡ ᠡᠹᠠ ᠳᠤ ᠨᠢᠭᠡ ᠾᠢᠨ ᠲᠣᠰᠣ ᠪᠠᠢᠬᠤ ᠶᠣᠰᠣᠲᠠᠢ᠃ 8 ᠬᠠᠭᠠᠨ ᠣᠷᠣᠬᠤ ᠳᠠᠭᠠᠨ ᠬᠠᠭᠠᠯᠭᠠᠨ ᠵᠠᠮ ᠤᠨ ᠬᠣᠩᠭᠢᠯ ᠢᠶᠠᠷ ᠣᠷᠣᠵᠤ᠂ ᠮᠥᠨ ᠲᠡᠷᠡ ᠵᠠᠮ ᠢᠶᠠᠷ ᠢᠶᠠᠨ ᠭᠠᠷᠬᠤ ᠶᠣᠰᠣᠲᠠᠢ᠃
9 ᠬᠠᠷᠢᠨ ᠨᠤᠲᠤᠭ ᠤᠨ ᠠᠷᠠᠳ ᠣᠯᠠᠨ ᠲᠣᠭᠲᠠᠭᠰᠠᠨ ᠪᠠᠶᠠᠷ ᠢᠶᠠᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠢᠷᠡᠬᠦ ᠲᠣᠬᠢᠶᠠᠯᠳᠤᠯ ᠳᠤ᠂ ᠬᠣᠢᠨᠠ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠮᠥᠷᠭᠥᠯ ᠦᠢᠯᠡᠳᠦᠭᠰᠡᠨ ᠬᠥᠮᠦᠨ ᠨᠢ ᠡᠮᠦᠨᠡ ᠬᠠᠭᠠᠯᠭᠠ ᠪᠠᠷ ᠭᠠᠷᠬᠤ ᠪᠥᠭᠡᠳ ᠡᠮᠦᠨᠡ ᠬᠠᠭᠠᠯᠭᠠ ᠪᠠᠷ ᠣᠷᠣᠭᠰᠠᠨ ᠬᠥᠮᠦᠨ ᠨᠢ ᠬᠣᠢᠨᠠ ᠬᠠᠭᠠᠯᠭᠠ ᠪᠠᠷ ᠭᠠᠷᠬᠤ ᠶᠣᠰᠣᠲᠠᠢ᠃ ᠬᠡᠨ ᠴᠤ ᠣᠷᠣᠭᠰᠠᠨ ᠬᠠᠭᠠᠯᠭᠠ ᠪᠠᠷ ᠢᠶᠠᠨ ᠭᠠᠷᠴᠤ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠴᠢᠭ ᠢᠶᠠᠷ ᠢᠶᠠᠨ ᠶᠠᠪᠤᠭᠰᠠᠭᠠᠷ ᠭᠠᠷᠬᠤ ᠶᠣᠰᠣᠲᠠᠢ᠃ 10 ᠬᠠᠭᠠᠨ ᠲᠡᠳᠡᠨ ᠦ ᠳᠤᠮᠳᠠ ᠪᠠᠢᠭᠰᠠᠭᠠᠷ᠂ ᠲᠡᠳᠡ ᠣᠷᠣᠬᠤ ᠳᠤ ᠣᠷᠣᠵᠤ᠂ ᠲᠡᠳᠡ ᠭᠠᠷᠬᠤ ᠳᠤ ᠭᠠᠷᠬᠤ ᠶᠣᠰᠣᠲᠠᠢ᠃
11 ᠪᠠᠶᠠᠷ ᠨᠠᠭᠠᠳᠤᠮ ᠪᠣᠯᠣᠨ ᠲᠣᠭᠲᠠᠭᠰᠠᠨ ᠪᠠᠶᠠᠷ ᠳᠡᠭᠡᠷᠡᠬᠢ ᠢᠳᠡᠭᠡᠨ ᠡᠷᠭᠦᠯ ᠨᠢ ᠨᠢᠭᠡ ᠪᠤᠬᠠ ᠲᠠᠢ ᠬᠠᠮᠲᠤ ᠨᠢᠭᠡ ᠡᠹᠠ ᠭᠤᠯᠢᠷ᠂ ᠨᠢᠭᠡ ᠬᠤᠴᠠ ᠲᠠᠢ ᠬᠠᠮᠲᠤ ᠨᠢᠭᠡ ᠡᠹᠠ ᠭᠤᠯᠢᠷ᠂ ᠬᠤᠷᠠᠭᠠ ᠨᠤᠭᠤᠳ ᠲᠠᠢ ᠬᠠᠮᠲᠤ ᠴᠢᠳᠠᠯ ᠤᠨ ᠢᠶᠠᠨ ᠬᠢᠷᠢ ᠪᠠᠷ ᠥᠭᠬᠦ ᠭᠤᠯᠢᠷ ᠬᠢᠭᠡᠳ ᠨᠢᠭᠡ ᠡᠹᠠ ᠳᠤ ᠨᠢᠭᠡ ᠾᠢᠨ ᠲᠣᠰᠣ ᠪᠠᠢᠬᠤ ᠶᠣᠰᠣᠲᠠᠢ᠃ 12 ᠬᠠᠭᠠᠨ ᠰᠠᠢᠨ ᠳᠤᠷᠠ ᠶᠢᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ᠂ ᠡᠰᠡᠪᠡᠯ ᠰᠠᠢᠨ ᠳᠤᠷᠠ ᠶᠢᠨ ᠡᠪ ᠦᠨ ᠲᠠᠬᠢᠯ ᠢ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠭᠡᠪᠡᠯ᠂ ᠲᠡᠭᠦᠨ ᠳᠦ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠬᠠᠭᠠᠯᠭᠠ ᠶᠢ ᠨᠡᠭᠡᠭᠡᠵᠦ ᠥᠭ᠃ ᠲᠡᠷᠡ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠢ ᠠᠮᠠᠷᠠᠯ ᠤᠨ ᠡᠳᠦᠷ ᠡᠷᠭᠦᠳᠡᠭ ᠰᠢᠭ ᠢᠶᠠᠨ ᠡᠷᠭᠦᠭᠰᠡᠨ ᠦ ᠳᠠᠷᠠᠭᠠ ᠭᠠᠷᠴᠤ ᠶᠠᠪᠤᠪᠠᠯ᠂ ᠲᠡᠷᠡ ᠭᠠᠷᠤᠭᠰᠠᠨ ᠤ ᠳᠠᠷᠠᠭᠠ ᠬᠠᠭᠠᠯᠭᠠ ᠬᠠᠭᠠᠭᠳᠠᠬᠤ ᠪᠣᠯᠣᠨᠠ᠃
13 ᠴᠢ ᠡᠳᠦᠷ ᠪᠦᠷᠢ ᠨᠢᠭᠡ ᠰᠣᠭᠣᠭ ᠦᠭᠡᠢ ᠬᠤᠷᠠᠭᠠ ᠶᠢ ᠶᠣᠬᠣᠸᠠ ᠳᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠭᠠᠨ ᠪᠡᠯᠡᠳᠬᠡᠬᠦ ᠶᠣᠰᠣᠲᠠᠢ᠃ ᠥᠷᠯᠥᠭᠡ ᠪᠦᠷᠢ ᠡᠭᠦᠨ ᠢ ᠪᠡᠯᠡᠳᠬᠡ᠃ 14 ᠮᠥᠨ ᠡᠭᠦᠨ ᠦ ᠬᠠᠮᠲᠤ ᠥᠷᠯᠥᠭᠡ ᠪᠦᠷᠢ ᠢᠳᠡᠭᠡᠨ ᠡᠷᠭᠦᠯ ᠳᠦ ᠡᠹᠠ ᠶᠢᠨ ᠵᠢᠷᠭᠤᠭᠠᠨ ᠤ ᠨᠢᠭᠡ 25 ᠶᠢᠨ ᠰᠠᠢᠨ ᠭᠤᠯᠢᠷ ᠢ ᠾᠢᠨ ᠤ ᠭᠤᠷᠪᠠᠨ ᠤ ᠨᠢᠭᠡ ᠶᠢᠨ ᠴᠢᠭᠢᠭᠰᠢᠭᠦᠯᠬᠦ ᠲᠣᠰᠣ ᠲᠠᠢ ᠬᠠᠮᠲᠤ ᠪᠡᠯᠡᠳᠬᠡ᠃ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠢᠳᠡᠭᠡᠨ ᠲᠠᠬᠢᠯ ᠤᠨ ᠲᠠᠯᠠ ᠪᠠᠷ ᠬᠢ ᠦᠶᠡ ᠶᠢᠨ ᠦᠶᠡ ᠳᠦ ᠦᠷᠭᠦᠯᠵᠢᠯᠡᠬᠦ ᠲᠣᠭᠲᠠᠭᠠᠯ ᠨᠢ ᠡᠨᠡ ᠶᠤᠮ᠃ 15 ᠡᠢᠨ ᠬᠦ ᠪᠠᠢᠩ᠋ᠭᠤ ᠶᠢᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠳᠤ ᠥᠷᠯᠥᠭᠡ ᠪᠦᠷᠢ ᠬᠤᠷᠠᠭᠠ᠂ ᠢᠳᠡᠭᠡᠨ ᠡᠷᠭᠦᠯ ᠪᠠ ᠲᠣᠰᠣ ᠶᠢ ᠪᠡᠯᠡᠳᠬᠡᠬᠦ ᠶᠣᠰᠣᠲᠠᠢ᠃》
16 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠡᠷᠪᠡ ᠬᠠᠭᠠᠨ ᠬᠥᠪᠡᠭᠦᠳ ᠦᠨ ᠢᠶᠠᠨ ᠠᠯᠢ ᠨᠢᠭᠡᠨ ᠳᠦᠨᠢ ᠥᠪ ᠡᠴᠡ ᠪᠡᠨ ᠪᠡᠯᠡᠭ ᠥᠭᠪᠡᠯ᠂ ᠲᠡᠷᠡ ᠪᠡᠯᠡᠭ ᠲᠡᠭᠦᠨ ᠦ ᠦᠷᠡ ᠬᠣᠢᠴᠢ ᠶᠢᠨ ᠥᠪ ᠡᠵᠡᠮᠰᠢᠯ ᠪᠣᠯᠣᠨᠠ᠃ 17 ᠬᠡᠷᠪᠡ ᠲᠡᠷᠡ ᠪᠡᠷ ᠵᠠᠷᠤᠴᠠ ᠨᠠᠷ ᠤᠨ ᠢᠶᠠᠨ ᠨᠢᠭᠡᠨ ᠳᠦ ᠥᠪ ᠡᠴᠡ ᠪᠡᠨ ᠪᠡᠯᠡᠭ ᠥᠭᠪᠡᠯ᠂ ᠲᠡᠷᠡ ᠪᠡᠯᠡᠭ ᠨᠢ ᠴᠢᠯᠥᠭᠡᠯᠡᠯᠲᠡ ᠶᠢᠨ ᠵᠢᠯ ᠪᠣᠯᠲᠠᠯᠠ ᠲᠡᠷᠡ ᠵᠠᠷᠤᠴᠠ ᠶᠢᠨ ᠬᠢ ᠪᠠᠢᠵᠤ᠂ ᠳᠠᠷᠠᠭᠠ ᠨᠢ ᠬᠠᠭᠠᠨ ᠳᠤ ᠪᠤᠴᠠᠭᠠᠭᠳᠠᠬᠤ ᠪᠣᠯᠣᠨᠠ᠃ ᠲᠡᠭᠦᠨ ᠦ ᠥᠪ ᠵᠥᠪᠬᠡᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠲᠦ ᠬᠠᠷᠢᠶᠠᠯᠠᠭᠳᠠᠬᠤ ᠶᠣᠰᠣᠲᠠᠢ᠃ 18 ᠬᠠᠭᠠᠨ ᠠᠷᠠᠳ ᠲᠦᠮᠡᠨ ᠢ ᠡᠵᠡᠮᠰᠢᠯ ᠡᠴᠡ ᠨᠢ ᠬᠥᠭᠡᠭᠡᠨ ᠭᠠᠷᠭᠠᠵᠤ᠂ ᠥᠪ ᠢ ᠨᠢ ᠪᠤᠯᠢᠶᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠷᠡ ᠬᠥᠪᠡᠭᠦᠳ ᠲᠡᠭᠡᠨ ᠥᠪᠡᠷ ᠦᠨ ᠢᠶᠠᠨ ᠡᠵᠡᠮᠰᠢᠯ ᠡᠴᠡ ᠯᠠ ᠥᠪ ᠥᠭᠬᠦ ᠶᠣᠰᠣᠲᠠᠢ᠃ ᠲᠡᠢᠨ ᠬᠦ ᠠᠷᠠᠳ ᠲᠦᠮᠡᠨ ᠦ ᠮᠢᠨᠢ ᠬᠡᠨ ᠨᠢ ᠴᠤ ᠡᠵᠡᠮᠰᠢᠯ ᠡᠴᠡ ᠪᠡᠨ ᠪᠦᠦ ᠰᠠᠯᠤᠭ᠃》
19 ᠨᠥᠭᠥᠭᠡ ᠬᠥᠮᠦᠨ ᠨᠠᠮᠠᠶᠢ ᠳᠠᠭᠠᠭᠤᠯᠤᠨ ᠬᠠᠭᠠᠯᠭᠠᠨ ᠤ ᠬᠠᠵᠠᠭᠤ ᠳᠠᠬᠢ ᠡᠭᠦᠳᠡ ᠪᠡᠷ ᠳᠠᠮᠵᠢᠵᠤ᠂ ᠬᠣᠢᠰᠢ ᠪᠠᠨ ᠬᠠᠷᠠᠭᠰᠠᠨ ᠲᠠᠬᠢᠯᠴᠢᠳ ᠤᠨ ᠠᠷᠢᠭᠤᠨ ᠥᠷᠥᠭᠡ ᠨᠦᠭᠦᠳ ᠲᠦ ᠠᠪᠴᠢᠷᠠᠪᠠ᠃ ᠬᠠᠷᠠ᠂ ᠪᠠᠷᠠᠭᠤᠨ ᠵᠠᠬᠠ ᠳᠤ ᠨᠢᠭᠡᠨ ᠭᠠᠵᠠᠷ ᠪᠠᠢᠪᠠ᠃ 20 ᠲᠡᠷᠡ ᠨᠠᠳᠠ ᠳᠤ᠄ 《ᠡᠨᠡ ᠪᠣᠯ ᠲᠠᠬᠢᠯᠴᠢᠳ ᠭᠡᠮ ᠦᠨ ᠲᠥᠯᠥᠭᠡᠬᠢ ᠲᠠᠬᠢᠯ᠂ ᠨᠢᠭᠦᠯ ᠦᠨ ᠲᠥᠯᠥᠭᠡᠬᠢ ᠲᠠᠬᠢᠯ ᠢ ᠴᠢᠨᠠᠵᠤ᠂ ᠢᠳᠡᠭᠡᠨ ᠡᠷᠭᠦᠯ ᠢ ᠪᠣᠯᠭᠣᠬᠤ ᠭᠠᠵᠠᠷ ᠶᠤᠮ᠃ ᠲᠡᠳᠡ ᠡᠳᠡᠭᠡᠷ ᠢ ᠭᠠᠳᠠᠨᠠᠬᠢ ᠬᠦᠷᠢᠶᠡᠨ ᠳᠦ ᠠᠪᠠᠴᠢᠭᠰᠠᠨ ᠤ ᠤᠯᠠᠮ ᠢᠶᠠᠷ ᠠᠷᠠᠳ ᠣᠯᠠᠨ ᠳᠤ ᠠᠷᠢᠭᠤᠨ ᠨᠥᠯᠥᠭᠡ ᠶᠢ ᠬᠦᠷᠭᠡᠬᠦ ᠦᠭᠡᠢ ᠶᠢᠨ ᠲᠤᠯᠠᠳᠠ ᠡ᠊ᠨᠳᠡ ᠴᠢᠨᠠᠳᠠᠭ ᠶᠤᠮ》 ᠭᠡᠪᠡ᠃
21 ᠲᠡᠷᠡ ᠨᠠᠮᠠᠶᠢ ᠭᠠᠷᠭᠠᠨ ᠭᠠᠳᠠᠨᠠᠬᠢ ᠬᠦᠷᠢᠶᠡᠨ ᠳᠦ ᠠᠪᠴᠢᠷᠠᠵᠤ᠂ ᠬᠦᠷᠢᠶᠡᠨ ᠦ ᠳᠥᠷᠪᠡᠨ ᠪᠤᠯᠤᠩ ᠢᠶᠠᠷ ᠲᠣᠭᠣᠷᠢᠭᠤᠯᠬᠤ ᠳᠤ᠂ ᠪᠤᠯᠤᠩ ᠪᠦᠷᠢ ᠳᠤ ᠵᠢᠵᠢᠭ ᠬᠦᠷᠢᠶᠡ ᠪᠠᠢᠬᠤ ᠶᠢ ᠪᠢ ᠬᠠᠷᠠᠪᠠ᠃ 22 ᠬᠦᠷᠢᠶᠡᠨ ᠦ ᠳᠥᠷᠪᠡᠨ ᠪᠤᠯᠤᠩ ᠳᠠᠬᠢ ᠵᠢᠵᠢᠭ ᠬᠦᠷᠢᠶᠡ ᠨᠢ ᠳᠥᠴᠢᠨ ᠲᠣᠬᠣᠢ ᠤᠷᠲᠤ᠂ ᠭᠤᠴᠢᠨ ᠲᠣᠬᠣᠢ ᠥᠷᠭᠡᠨ ᠪᠥᠭᠡᠳ ᠳᠥᠷᠪᠡᠭᠦᠯᠡ ᠠᠳᠠᠯᠢ ᠬᠡᠮᠵᠢᠶᠡ ᠲᠠᠢ ᠪᠠᠢᠪᠠ᠃ 23 ᠳᠥᠷᠪᠡᠨ ᠬᠦᠷᠢᠶᠡᠨ ᠦ ᠳᠣᠲᠣᠷᠠ ᠲᠠᠯᠠ ᠶᠢ ᠬᠦᠷᠢᠶᠡᠯᠡᠭᠰᠡᠨ ᠴᠢᠯᠠᠭᠤᠨ ᠬᠡᠷᠡᠮ ᠪᠤᠢ᠂ ᠲᠡᠷᠡ ᠬᠡᠷᠡᠮ ᠦᠨ ᠳᠣᠣᠷᠠ ᠵᠤᠤᠬᠠ ᠪᠠᠢᠪᠠ᠃ 24 ᠨᠥᠭᠥᠭᠡ ᠬᠥᠮᠦᠨ ᠨᠠᠳᠠ ᠳᠤ᠄ 《ᠡᠳᠡᠭᠡᠷ ᠨᠢ ᠥᠷᠭᠥᠭᠡᠨ ᠦ ᠦᠢᠯᠡᠴᠢᠯᠡᠭᠴᠢᠳ ᠤᠨ ᠠᠷᠠᠳ ᠣᠯᠠᠨ ᠤ ᠲᠠᠬᠢᠯ ᠤᠳ ᠢ ᠴᠢᠨᠠᠳᠠᠭ ᠭᠠᠵᠠᠷ ᠶᠤᠮ》 ᠭᠡᠪᠡ᠃