ᠡᠽᠧᠺᠢᠶᠧᠯ ᠠᠷᠪᠠᠨ ᠭᠤᠷᠪᠠ
ᠬᠠᠭᠤᠷᠮᠠᠴᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠰᠢᠳᠬᠡᠭᠳᠡᠨᠡ
1 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 2 《ᠬᠥᠮᠦᠨ ᠦ ᠬᠦᠦ ᠡ᠂ ᠡᠳᠦᠭᠡ ᠢᠰᠷᠧᠯ ᠳᠤ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠭᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠡᠰᠡᠷᠭᠦ ᠡᠰᠢ ᠦᠵᠡᠭᠦᠯ᠂ ᠳᠤᠷᠠ ᠪᠠᠷ ᠢᠶᠠᠨ ᠡᠰᠢ ᠦᠵᠡᠭᠦᠯᠵᠦ ᠪᠤᠢ ᠬᠥᠮᠦᠰ ᠲᠦ ᠴᠢ᠄ 〈ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠴᠠᠭᠠ︕ 3 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠶᠠᠭᠤ ᠴᠤ ᠦᠵᠡᠭᠡ ᠦᠭᠡᠢ ᠠᠲᠠᠯᠠ ᠪᠠᠨ ᠥᠪᠡᠷ ᠦᠨ ᠢᠶᠠᠨ ᠰᠠᠨᠠᠭᠠ ᠶᠢ ᠳᠠᠭᠠᠳᠠᠭ ᠮᠤᠩ᠋ᠬᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠭᠠᠰᠠᠯᠠᠩᠲᠠᠶᠠ᠃ 4 ᠢᠰᠷᠧᠯ ᠡ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠴᠢᠨᠢ ᠪᠠᠯᠭᠠᠰᠤ ᠳᠣᠲᠣᠷᠠᠬᠢ ᠦᠨᠡᠭᠡ ᠠᠳᠠᠯᠢ᠃ 5 ᠲᠡᠳᠡ ᠬᠡᠷᠡᠮ ᠦᠨ ᠨᠤᠷᠠᠩᠬᠢ ᠳᠡᠭᠡᠷᠡ ᠣᠴᠢᠭᠠ ᠦᠭᠡᠢ᠂ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠢ ᠶᠣᠬᠣᠸᠠ ᠶᠢᠨ ᠡᠳᠦᠷ ᠦᠨ ᠲᠤᠯᠤᠯᠳᠤᠭᠠᠨ ᠳᠤ ᠪᠠᠲᠤ ᠵᠣᠭᠰᠣᠭᠠᠬᠤ ᠶᠢᠨ ᠲᠤᠯᠠᠳᠠ ᠬᠡᠷᠡᠮ ᠪᠣᠰᠬᠠᠵᠤ ᠪᠠᠢᠭᠠ ᠦᠭᠡᠢ᠃ 6 ᠲᠡᠳᠡᠨ ᠦ ᠦᠵᠡᠳᠡᠭ ᠦᠵᠡᠭᠳᠡᠯ ᠬᠣᠭᠣᠰᠣᠨ᠂ ᠮᠡᠷᠭᠡ ᠬᠤᠳᠠᠯ᠂ ᠶᠣᠬᠣᠸᠠ ᠲᠡᠳᠡᠨ ᠢ ᠢᠯᠡᠭᠡᠭᠡ ᠦᠭᠡᠢ ᠪᠠᠢᠬᠤ ᠳᠤ᠂ ᠲᠡᠳᠡ 〈ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ〉 ᠭᠡᠳ ᠥᠪᠡᠷᠰᠡᠳ ᠦᠨ ᠢᠶᠠᠨ ᠦᠭᠡ ᠶᠢ ᠪᠡᠶᠡᠯᠡᠭᠳᠡᠨᠡ ᠭᠡᠵᠦ ᠨᠠᠢᠳᠠᠨ᠂ 7 ᠪᠢ ᠶᠠᠷᠢᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ 〈ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ〉 ᠭᠡᠵᠦ ᠪᠠᠢᠨᠠ᠂ ᠡᠢᠨ ᠬᠦ ᠲᠠ ᠨᠠᠷ ᠬᠣᠭᠣᠰᠣᠨ ᠦᠵᠡᠭᠳᠡᠯ ᠢ ᠦᠵᠡᠵᠦ᠂ ᠬᠤᠳᠠᠯ ᠮᠡᠷᠭᠡ ᠶᠢ ᠬᠡᠯᠡᠭᠰᠡᠨ ᠪᠤᠰᠤ ᠤᠤ︖〉》 ᠭᠡᠪᠡ᠃
8 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠠ ᠨᠠᠷ ᠬᠣᠭᠣᠰᠣᠨ ᠢ ᠶᠠᠷᠢᠵᠤ᠂ ᠬᠤᠳᠠᠯ ᠢ ᠦᠵᠡᠭᠰᠡᠨ ᠤᠴᠢᠷ ᠠᠴᠠ ᠪᠢ ᠲᠠ ᠨᠠᠷ ᠤᠨ ᠡᠰᠡᠷᠭᠦ ᠪᠠᠢᠨᠠ᠂ ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ 9 ᠲᠡᠢᠮᠦ ᠡᠴᠡ ᠮᠢᠨᠦ ᠮᠤᠲᠤᠷ ᠬᠣᠭᠣᠰᠣᠨ ᠦᠵᠡᠭᠳᠡᠯ ᠢ ᠦᠵᠡᠵᠦ᠂ ᠬᠤᠳᠠᠯ ᠮᠡᠷᠭᠡ ᠶᠢ ᠶᠠᠷᠢᠳᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠡᠰᠡᠷᠭᠦ ᠪᠠᠢᠨᠠ᠃ ᠲᠡᠳᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠦ ᠬᠤᠷᠠᠯᠲᠠᠢ ᠳᠤ ᠬᠠᠮᠤᠷᠤᠭᠳᠠᠬᠤ ᠦᠭᠡᠢ᠂ ᠢᠰᠷᠧᠯ ᠤᠨ ᠭᠡᠷ ᠦᠨ ᠴᠠᠳᠢᠭ ᠲᠤ ᠪᠢᠴᠢᠭᠳᠡᠬᠦ ᠦᠭᠡᠢ᠂ ᠢᠰᠷᠧᠯ ᠤᠨ ᠨᠤᠲᠤᠭ ᠲᠤ ᠴᠤ ᠣᠷᠣᠬᠤ ᠦᠭᠡᠢ᠃ ᠲᠡᠢᠨ ᠬᠦ ᠲᠠ ᠨᠠᠷ ᠨᠠᠮᠠᠶᠢ ᠡᠵᠡᠨ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 10 ᠤᠴᠢᠷ ᠨᠢ ᠲᠡᠳᠡ ᠠᠮᠤᠷ ᠲᠠᠢᠪᠤᠩ ᠪᠢᠰᠢ ᠠᠲᠠᠯᠠ᠄ 〈ᠠᠮᠤᠷ ᠲᠠᠢᠪᠤᠩ〉 ᠭᠡᠵᠦ ᠶᠠᠷᠢᠨ ᠠᠷᠠᠳ ᠲᠦᠮᠡᠨ ᠢ ᠮᠢᠨᠢ ᠲᠥᠭᠡᠷᠢᠯᠳᠦᠭᠦᠯᠳᠡᠭ᠌᠃ ᠬᠡᠨ ᠨᠢᠭᠡᠨ ᠨᠢ ᠬᠠᠨᠠ ᠪᠠᠷᠢᠬᠤ ᠳᠤ᠂ ᠲᠡᠳᠡ ᠲᠡᠭᠦᠨ ᠢ ᠴᠣᠬᠣᠢ ᠪᠠᠷ ᠪᠦᠷᠬᠦᠳᠡᠭ᠃ 11 ᠲᠡᠢᠮᠦ ᠡᠴᠡ ᠴᠢ ᠴᠣᠬᠣᠢᠳᠠᠭᠴᠢᠳ ᠲᠤ ᠡᠨᠡ ᠨᠢ ᠨᠤᠷᠠᠬᠤ ᠪᠣᠯᠣᠨᠠ ᠭᠡᠳᠡᠭ ᠢ ᠬᠡᠯᠡ᠃ ᠠᠭᠠᠳᠠᠷ ᠪᠣᠷᠣᠭᠠᠨ ᠣᠷᠣᠵᠤ᠂ ᠰᠢᠷᠦᠭᠦᠨ ᠮᠥᠨᠳᠥᠷ ᠪᠠᠭᠤᠨ᠂ ᠳᠣᠭᠰᠢᠨ ᠰᠠᠯᠬᠢ ᠬᠥᠳᠡᠯᠬᠦ ᠳᠦ᠂ 12 ᠲᠡᠷᠡ ᠬᠠᠨᠠ ᠨᠤᠷᠠᠨᠠ︕ ᠲᠡᠭᠡᠬᠦ ᠳᠦ ᠬᠥᠮᠦᠰ᠄ 〈ᠲᠠ ᠨᠠᠷ ᠡᠭᠦᠨ ᠢ ᠴᠣᠬᠣᠢ ᠪᠠᠷ ᠴᠣᠬᠣᠢᠳᠠᠭᠰᠠᠨ ᠪᠢᠰᠢ ᠤᠤ︖〉 ᠭᠡᠵᠦ ᠠᠰᠠᠭᠤᠬᠤ ᠪᠤᠰᠤ ᠤᠤ︖ 13 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠪᠢ ᠠᠭᠤᠷ ᠢᠶᠠᠷ ᠢᠶᠠᠨ ᠳᠣᠭᠰᠢᠨ ᠰᠠᠯᠬᠢ ᠬᠥᠳᠡᠯᠭᠡᠵᠦ᠂ ᠬᠢᠯᠢᠩ ᠢᠶᠠᠷ ᠢᠶᠠᠨ ᠠᠭᠠᠳᠠᠷ ᠪᠣᠷᠣᠭᠠᠨ ᠣᠷᠣᠭᠤᠯᠵᠤ᠂ ᠬᠢᠯᠢᠩ ᠳᠣᠲᠣᠷᠠ ᠰᠢᠷᠦᠭᠦᠨ ᠮᠥᠨᠳᠥᠷ ᠢᠶᠡᠷ ᠲᠡᠭᠦᠨ ᠢ ᠤᠰᠠᠳᠬᠠᠨᠠ᠃ 14 ᠲᠡᠢᠨ ᠬᠦ ᠪᠢ ᠲᠠ ᠨᠠᠷ ᠤᠨ ᠴᠣᠬᠣᠢᠳᠠᠭᠰᠠᠨ ᠬᠠᠨᠠ ᠶᠢ ᠨᠤᠷᠠᠭᠠᠵᠤ᠂ ᠲᠡᠭᠦᠨ ᠢ ᠭᠠᠵᠠᠷ ᠲᠤ ᠤᠨᠠᠭᠠᠭᠰᠠᠨ ᠢᠶᠠᠷ ᠰᠠᠭᠤᠷᠢ ᠨᠢ ᠢᠯᠡ ᠭᠠᠷᠤᠨᠠ᠃ ᠬᠠᠨᠠ ᠨᠤᠷᠠᠬᠤ ᠳᠤ᠂ ᠲᠠ ᠨᠠᠷ ᠲᠡᠭᠦᠨ ᠳᠣᠲᠣᠷᠠ ᠤᠰᠠᠳᠬᠤ ᠪᠣᠯᠣᠨᠠ᠃ ᠡᠭᠦᠨ ᠢᠶᠡᠷ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 15 ᠲᠡᠢᠨ ᠬᠦ ᠪᠢ ᠬᠠᠨᠠ ᠪᠣᠯᠣᠨ ᠲᠡᠭᠦᠨ ᠢ ᠴᠣᠬᠣᠢᠳᠠᠭᠴᠢᠳ ᠳᠡᠭᠡᠷᠡ ᠬᠢᠯᠢᠩ ᠢᠶᠠᠨ ᠭᠦᠢᠴᠡᠭᠡᠵᠦ᠂ 〈ᠲᠠ ᠨᠠᠷ ᠲᠤ ᠬᠠᠨᠠ ᠴᠤ ᠠᠯᠠᠭᠠ᠂ ᠲᠡᠭᠦᠨ ᠢ ᠴᠣᠬᠣᠢᠳᠠᠭᠴᠢᠳ᠂ ᠲᠤᠬᠠᠢᠯᠠᠪᠠᠯ 16 ᠠᠮᠤᠷ ᠲᠠᠢᠪᠤᠩ ᠪᠢᠰᠢ ᠠᠲᠠᠯᠠ ᠶᠧᠷᠦ᠋ᠰᠠᠯᠧᠮ ᠳᠤ ᠡᠰᠢ ᠦᠵᠡᠭᠦᠯᠦᠨ᠂ ᠠᠮᠤᠷ ᠲᠠᠢᠪᠤᠩ ᠤᠨ ᠦᠵᠡᠭᠳᠡᠯ ᠢ ᠦᠵᠡᠵᠦ ᠪᠠᠢᠭᠰᠠᠨ ᠢᠰᠷᠧᠯ ᠤᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠴᠤ ᠠᠯᠠᠭᠠ ᠪᠣᠯᠣᠯᠠ〉 ᠭᠡᠬᠦ ᠪᠣᠯᠣᠨᠠ᠃》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
17 《ᠣᠳᠣ ᠬᠥᠮᠦᠨ ᠦ ᠬᠦᠦ ᠡ᠂ ᠴᠢ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠳᠤᠮᠳᠠ ᠳᠤᠷᠠ ᠪᠠᠷ ᠢᠶᠠᠨ ᠡᠰᠢ ᠦᠵᠡᠭᠦᠯᠳᠡᠭ ᠡᠮᠡᠭᠲᠡᠢᠴᠦᠳ ᠤᠷᠤᠭᠤ ᠬᠠᠨᠳᠤᠨ ᠲᠡᠳᠡᠨ ᠦ ᠡᠰᠡᠷᠭᠦ ᠡᠰᠢ ᠦᠵᠡᠭᠦᠯᠵᠦ᠄ 18 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠪᠠᠭᠤᠤ ᠪᠣᠯᠭᠠᠨ ᠳᠠᠭᠠᠨ ᠰᠢᠳᠢᠲᠦ ᠰᠠᠬᠢᠭᠤᠰᠤ ᠣᠶᠣᠵᠤ᠂ ᠬᠥᠮᠦᠰ ᠲᠦ ᠥᠨᠳᠥᠷ ᠦᠨ ᠬᠡᠮᠵᠢᠶᠡ ᠪᠡᠷ ᠨᠢ ᠲᠣᠯᠣᠭᠠᠢ ᠶᠢᠨ ᠭᠢᠪᠯᠡᠭᠦᠷ ᠤᠳ ᠬᠢᠵᠦ᠂ ᠬᠥᠮᠦᠨ ᠦ ᠠᠮᠢ ᠶᠢ ᠠᠩᠨᠠᠳᠠᠭ ᠡᠮᠡᠭᠲᠡᠢᠴᠦᠳ ᠭᠠᠰᠠᠯᠠᠩᠲᠠᠶᠠ᠃ ᠲᠠ ᠨᠠᠷ ᠠᠷᠠᠳ ᠲᠦᠮᠡᠨ ᠦ ᠮᠢᠨᠢ ᠠᠮᠢ ᠶᠢ ᠠᠩᠨᠠᠳᠠᠭ ᠪᠠᠢᠲᠠᠯᠠ ᠪᠠᠨ ᠥᠪᠡᠷᠰᠡᠳ ᠦᠨ ᠢᠶᠠᠨ ᠠᠮᠢ ᠶᠢ ᠬᠠᠮᠠᠭᠠᠯᠠᠬᠤ ᠭᠡᠬᠦ ᠨᠢ ᠤᠤ︖ 19 ᠲᠠ ᠨᠠᠷ ᠠᠳᠬᠤ ᠠᠷᠪᠠᠢ᠂ ᠵᠦᠰᠦᠮ ᠪᠣᠣᠪᠣ ᠶᠢᠨ ᠲᠥᠯᠥᠭᠡ ᠠᠷᠠᠳ ᠲᠦᠮᠡᠨ ᠦ ᠮᠢᠨᠢ ᠳᠤᠮᠳᠠ ᠨᠠᠮᠠᠶᠢ ᠭᠤᠲᠤᠭᠠᠳᠠᠭ᠂ ᠢᠩᠭᠢᠭᠡᠳ ᠬᠤᠳᠠᠯ ᠢ ᠰᠣᠨᠣᠰᠳᠠᠭ ᠠᠷᠠᠳ ᠲᠦᠮᠡᠨ ᠳᠦ ᠮᠢᠨᠢ ᠬᠤᠳᠠᠯ ᠬᠡᠯᠡᠭᠰᠡᠨ ᠢᠶᠡᠷ ᠢᠶᠠᠨ ᠦᠬᠦᠬᠦ ᠶᠣᠰᠣ ᠦᠭᠡᠢ ᠠᠮᠢ ᠶᠢ ᠦᠬᠦᠭᠦᠯᠵᠦ᠂ ᠠᠮᠢᠳᠤᠷᠠᠬᠤ ᠶᠣᠰᠣ ᠦᠭᠡᠢ ᠠᠮᠢ ᠶᠢ ᠠᠮᠢᠳᠤᠷᠠᠭᠤᠯᠳᠠᠭ〉》 ᠭᠡᠵᠦ ᠬᠡᠯᠡ᠃
20 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠠᠷᠠ᠂ ᠪᠢ ᠰᠦᠨᠡᠰᠦ ᠶᠢ ᠰᠢᠪᠠᠭᠤ ᠮᠡᠲᠦ ᠠᠩᠨᠠᠳᠠᠭ ᠰᠢᠳᠢᠲᠦ ᠰᠠᠬᠢᠭᠤᠰᠤ ᠶᠢᠨ ᠡᠰᠡᠷᠭᠦ ᠪᠠᠢᠨᠠ᠂ ᠪᠢ ᠲᠡᠳᠡᠭᠡᠷ ᠢ ᠲᠠ ᠨᠠᠷ ᠤᠨ ᠭᠠᠷ ᠠᠴᠠ ᠲᠠᠰᠤᠯᠵᠤ᠂ ᠲᠠ ᠨᠠᠷ ᠤᠨ ᠰᠢᠪᠠᠭᠤ ᠮᠡᠲᠦ ᠠᠩᠨᠠᠭᠰᠠᠨ ᠰᠦᠨᠡᠰᠦ ᠨᠦᠭᠦᠳ ᠢ ᠴᠢᠯᠥᠭᠡᠯᠡᠨᠡ᠃ 21 ᠪᠢ ᠭᠢᠪᠯᠡᠭᠦᠷ ᠤᠳ ᠢ ᠴᠢᠨᠢ ᠬᠠᠤ ᠲᠠᠲᠠᠵᠤ᠂ ᠠᠷᠠᠳ ᠲᠦᠮᠡᠨ ᠢᠶᠡᠨ ᠲᠠ ᠨᠠᠷ ᠤᠨ ᠭᠠᠷ ᠠᠴᠠ ᠠᠪᠤᠷᠠᠨᠠ᠃ ᠲᠡᠳᠡ ᠳᠠᠬᠢᠨ ᠠᠪᠠᠯᠠᠭᠳᠠᠬᠤ ᠪᠠᠷ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠣᠷᠣᠬᠤ ᠦᠭᠡᠢ᠃ ᠲᠡᠢᠨ ᠬᠦ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 22 ᠪᠢ ᠵᠥᠪᠲᠡᠨ ᠦ ᠰᠡᠳᠬᠢᠯ ᠢ ᠭᠤᠨᠢᠭᠯᠠᠭᠤᠯᠳᠠᠭ ᠦᠭᠡᠢ ᠪᠠᠢᠬᠤ ᠳᠤ᠂ ᠲᠠ ᠨᠠᠷ ᠬᠤᠳᠠᠯ ᠢᠶᠠᠷ ᠢᠶᠠᠨ ᠲᠡᠭᠦᠨ ᠢ ᠭᠤᠨᠢᠭᠯᠠᠭᠤᠯᠳᠠᠭ᠂ ᠬᠠᠷᠢᠨ ᠲᠠ ᠨᠠᠷ ᠪᠤᠷᠤᠭᠤᠲᠠᠨ ᠢ ᠤᠷᠮᠠᠰᠢᠭᠤᠯᠳᠠᠭ ᠲᠤᠯᠠ ᠲᠡᠷᠡ ᠠᠮᠢ ᠪᠠᠨ ᠠᠪᠤᠷᠠᠬᠤ ᠪᠠᠷ ᠬᠣᠷᠣᠨ ᠮᠠᠭᠤ ᠵᠠᠮ ᠠᠴᠠ ᠪᠠᠨ ᠡᠷᠭᠢᠳᠡᠭ ᠦᠭᠡᠢ᠃ 23 ᠡᠢᠮᠦ ᠡᠴᠡ ᠡᠮᠡᠭᠲᠡᠢᠴᠦᠳ ᠲᠠ ᠨᠠᠷ ᠳᠠᠬᠢᠭᠠᠳ ᠬᠣᠭᠣᠰᠣᠨ ᠦᠵᠡᠭᠳᠡᠯ ᠢ ᠦᠵᠡᠵᠦ᠂ ᠮᠡᠷᠭᠡ ᠲᠥᠯᠭᠡ ᠦᠢᠯᠡᠳᠴᠦ ᠪᠣᠯᠬᠤ ᠦᠭᠡᠢ᠃ ᠪᠢ ᠠᠷᠠᠳ ᠲᠦᠮᠡᠨ ᠢᠶᠡᠨ ᠲᠠ ᠨᠠᠷ ᠤᠨ ᠭᠠᠷ ᠠᠴᠠ ᠠᠪᠤᠷᠠᠨᠠ᠃ ᠡᠢᠨ ᠬᠦ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃》