ᠡᠽᠧᠺᠢᠶᠧᠯ ᠭᠤᠴᠢᠨ ᠳᠣᠯᠣᠭᠠ
ᠬᠤᠪᠠᠬᠠᠢ ᠶᠠᠰᠤᠨ ᠤ ᠬᠥᠨᠳᠡᠢ
1 ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠮᠢᠨᠦ ᠳᠡᠭᠡᠷᠡ ᠢᠷᠡᠵᠦ᠂ ᠨᠠᠮᠠᠶᠢ ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠪᠡᠷ ᠠᠪᠴᠤ ᠭᠠᠷᠤᠭᠠᠳ ᠬᠥᠨᠳᠡᠢ ᠶᠢᠨ ᠳᠤᠮᠳᠠ ᠲᠠᠯᠪᠢᠪᠠ᠃ ᠲᠡᠨᠳᠡ ᠶᠠᠰᠤ ᠪᠠᠷ ᠳᠦᠭᠦᠷᠡᠩ ᠪᠠᠢᠯᠠ᠃ 2 ᠲᠡᠷᠡ ᠨᠠᠮᠠᠶᠢ ᠲᠡᠳᠡᠭᠡᠷ ᠦᠨ ᠳᠡᠭᠡᠭᠦᠷ ᠨᠠᠰᠢ ᠴᠠᠰᠢ ᠶᠠᠪᠤᠭᠤᠯᠪᠠ᠃ ᠬᠠᠷᠠ᠂ ᠲᠡᠷᠡ ᠬᠥᠨᠳᠡᠢ ᠶᠢᠨ ᠭᠠᠳᠠᠷᠭᠤ ᠳᠡᠭᠡᠷᠡ ᠮᠠᠰᠢ ᠣᠯᠠᠨ ᠶᠠᠰᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠳᠡᠭᠡᠷ ᠨᠢ ᠶᠡᠬᠡᠳᠡ ᠬᠤᠪᠠᠬᠠᠢᠷᠠᠭᠰᠠᠨ ᠪᠠᠢᠪᠠ᠃ 3 ᠲᠡᠷᠡ ᠨᠠᠳᠠ ᠠᠴᠠ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠡᠳᠡᠭᠡᠷ ᠶᠠᠰᠤ ᠠᠮᠢᠯᠠᠬᠤ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠪᠢ᠄ 《ᠡᠵᠡᠨ ᠶᠣᠬᠣᠸᠠ᠂ ᠲᠠ ᠮᠡᠳᠡᠨᠡ》 ᠭᠡᠪᠡ᠃ 4 ᠲᠡᠷᠡ ᠨᠠᠳᠠ ᠳᠤ᠄ 《ᠡᠳᠡᠭᠡᠷ ᠶᠠᠰᠤᠨ ᠳᠤ ᠡᠰᠢ ᠦᠵᠡᠭᠦᠯᠦᠨ᠄ 〈ᠬᠤᠪᠠᠬᠠᠢ ᠶᠠᠰᠤ ᠨᠤᠭᠤᠳ ᠡ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰ〉 ᠭᠡᠵᠦ ᠶᠠᠷᠢ᠃ 5 ᠡᠵᠡᠨ ᠶᠣᠬᠣᠸᠠ ᠡᠳᠡᠭᠡᠷ ᠶᠠᠰᠤᠨ ᠳᠤ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠲᠠ ᠨᠠᠷ ᠲᠤ ᠠᠮᠢᠰᠬᠤᠯ ᠣᠷᠣᠭᠤᠯᠵᠤ᠂ ᠲᠠ ᠨᠠᠷ ᠠᠮᠢᠯᠠᠬᠤ ᠪᠣᠯᠣᠨᠠ᠃ 6 ᠪᠢ ᠲᠠ ᠨᠠᠷ ᠢ ᠰᠢᠷᠪᠥᠰᠥ ᠲᠠᠢ ᠪᠣᠯᠭᠠᠨ᠂ ᠮᠢᠬᠠ ᠤᠷᠭᠤᠭᠤᠯᠵᠤ᠂ ᠲᠠ ᠨᠠᠷ ᠢ ᠠᠷᠠᠰᠤ ᠪᠠᠷ ᠪᠦᠷᠬᠦᠨ᠂ ᠲᠠ ᠨᠠᠷ ᠲᠤ ᠠᠮᠢᠰᠬᠤᠯ ᠣᠷᠣᠭᠤᠯᠤᠨᠠ᠃ ᠲᠠ ᠨᠠᠷ ᠠᠮᠢᠯᠠᠵᠤ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ〉》 ᠭᠡᠪᠡ᠃
7 ᠪᠢ ᠲᠡᠭᠦᠨ ᠦ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠡᠰᠢ ᠦᠵᠡᠭᠦᠯᠪᠡ᠃ ᠪᠢ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠬᠤ ᠳᠤ ᠴᠢᠮᠡᠭᠡ ᠭᠠᠷᠴᠠᠢ᠃ ᠬᠠᠷᠠ᠂ ᠶᠠᠰᠤ ᠨᠤᠭᠤᠳ ᠨᠢ ᠲᠠᠷᠴᠢᠭᠢᠨᠠᠭᠰᠠᠨ ᠴᠢᠮᠡᠭᠡ ᠭᠠᠷᠭᠠᠵᠤ᠂ ᠶᠠᠰᠤ ᠶᠠᠰᠤ ᠲᠠᠢ ᠪᠠᠨ ᠨᠡᠢᠯᠡᠪᠡ᠃ 8 ᠪᠢ ᠬᠠᠷᠠᠬᠤ ᠳᠤ᠂ ᠶᠠᠰᠤ ᠨᠤᠭᠤᠳ ᠤᠨ ᠳᠡᠭᠡᠷᠡ ᠰᠢᠷᠪᠥᠰᠥ ᠪᠣᠯᠣᠨ ᠮᠢᠬᠠ ᠤᠷᠭᠤᠵᠤ᠂ ᠲᠡᠳᠡᠨ ᠦ ᠳᠡᠭᠡᠷᠡ ᠠᠷᠠᠰᠤ ᠪᠦᠷᠬᠦᠭᠰᠡᠨ ᠪᠣᠯᠪᠠᠴᠤ ᠠᠮᠢᠰᠬᠤᠯ ᠦᠭᠡᠢ ᠪᠠᠢᠪᠠ᠃ 9 ᠲᠡᠭᠡᠲᠡᠯᠡ ᠲᠡᠷᠡ ᠨᠠᠳᠠ ᠳᠤ ᠠᠢᠯᠠᠳᠤᠨ᠄ 《ᠬᠥᠮᠦᠨ ᠦ ᠬᠦᠦ ᠠᠮᠢᠰᠬᠤᠯ ᠳᠤ ᠡᠰᠢ ᠦᠵᠡᠭᠦᠯ᠂ ᠠᠮᠢᠰᠬᠤᠯ ᠳᠤ ᠡᠰᠢ ᠦᠵᠡᠭᠦᠯᠦᠨ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠠᠮᠢᠰᠬᠤᠯ ᠡ᠂ ᠳᠥᠷᠪᠡᠨ ᠵᠦᠭ ᠡᠴᠡ ᠢᠷᠡᠵᠦ᠂ ᠡᠨᠡ ᠠᠯᠠᠭᠳᠠᠭᠰᠠᠳ ᠤᠷᠤᠭᠤ ᠦᠯᠢᠶᠡᠵᠦ᠂ ᠲᠡᠳᠡᠨ ᠢ ᠠᠮᠢᠯᠠᠭᠤᠯ〉 ᠭᠡᠵᠦ ᠶᠠᠷᠢ》 ᠭᠡᠪᠡ᠃ 10 ᠪᠢ ᠲᠡᠭᠦᠨ ᠦ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠡᠰᠢ ᠦᠵᠡᠭᠦᠯᠬᠦ ᠳᠦ᠂ ᠲᠡᠳᠡᠨ ᠳᠦ ᠠᠮᠢᠰᠬᠤᠯ ᠣᠷᠣᠯᠠ᠂ ᠲᠡᠢᠨ ᠬᠦ ᠲᠡᠳᠡ ᠠᠮᠢᠯᠠᠵᠤ ᠬᠥᠯ ᠳᠡᠭᠡᠷᠡ ᠪᠡᠨ ᠪᠣᠰᠣᠨ᠂ ᠠᠰᠤᠷᠤ ᠠᠰᠤᠷᠤ ᠶᠡᠬᠡ ᠴᠡᠷᠢᠭ ᠪᠣᠯᠪᠠ᠃
11 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠡᠳᠡᠭᠡᠷ ᠶᠠᠰᠤ ᠪᠣᠯ ᠢᠰᠷᠧᠯ ᠤᠨ ᠬᠠᠮᠤᠭ ᠭᠡᠷ ᠦᠨ ᠬᠢᠨ ᠶᠤᠮ᠃ ᠲᠡᠳᠡ᠄ 〈ᠪᠢᠳᠡᠨ ᠦ ᠶᠠᠰᠤ ᠬᠤᠪᠠᠬᠠᠢᠷᠠᠵᠤ᠂ ᠪᠢᠳᠡᠨ ᠦ ᠨᠠᠢᠳᠠᠪᠤᠷᠢ ᠲᠠᠰᠤᠷᠠᠨ᠂ ᠪᠢᠳᠡ ᠪᠦᠷᠢᠮᠦᠰᠦᠨ ᠤᠰᠠᠳᠤᠯᠠ〉 ᠭᠡᠯᠴᠡᠳᠡᠭ᠃ 12 ᠲᠡᠢᠮᠦ ᠡᠴᠡ ᠴᠢ ᠡᠰᠢ ᠦᠵᠡᠭᠦᠯᠦᠨ ᠶᠠᠷᠢ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠪᠤᠯᠠᠰᠢ ᠨᠤᠭᠤᠳ ᠢ ᠴᠢᠨᠢ ᠨᠡᠭᠡᠭᠡᠨᠡ︕ ᠠᠷᠠᠳ ᠲᠦᠮᠡᠨ ᠮᠢᠨᠢ᠂ ᠪᠢ ᠲᠠ ᠨᠠᠷ ᠢ ᠪᠤᠯᠠᠰᠢ ᠨᠤᠭᠤᠳ ᠠᠴᠠ ᠴᠢᠨᠢ ᠭᠠᠷᠭᠠᠵᠤ᠂ ᠢᠰᠷᠧᠯ ᠤᠨ ᠨᠤᠲᠤᠭ ᠲᠤ ᠣᠷᠣᠭᠤᠯᠤᠨᠠ᠃ 13 ᠠᠷᠠᠳ ᠲᠦᠮᠡᠨ ᠮᠢᠨᠢ᠂ ᠲᠡᠢᠨ ᠬᠦ ᠪᠢ ᠪᠤᠯᠠᠰᠢ ᠨᠤᠭᠤᠳ ᠢ ᠴᠢᠨᠢ ᠨᠡᠭᠡᠭᠡᠵᠦ᠂ ᠲᠠ ᠨᠠᠷ ᠢ ᠪᠤᠯᠠᠰᠢ ᠨᠤᠭᠤᠳ ᠠᠴᠠ ᠴᠢᠨᠢ ᠭᠠᠷᠭᠠᠬᠤ ᠳᠤ᠂ ᠲᠠ ᠨᠠᠷ ᠨᠠᠮᠠᠶᠢ ᠶᠣᠬᠣᠸᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 14 ᠪᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠰᠦᠨᠡᠰᠦ ᠪᠡᠨ ᠣᠷᠣᠭᠤᠯᠤᠨ᠂ ᠲᠠ ᠨᠠᠷ ᠠᠮᠢᠯᠠᠨᠠ᠂ ᠪᠢ ᠲᠠ ᠨᠠᠷ ᠢ ᠨᠤᠲᠤᠭ ᠲᠤ ᠴᠢᠨᠢ ᠰᠠᠭᠤᠯᠭᠠᠨᠠ᠃ ᠶᠣᠬᠣᠸᠠ ᠪᠢ ᠲᠡᠢᠨ ᠬᠦ ᠶᠠᠷᠢᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯᠦᠭᠰᠡᠨ ᠢ ᠲᠠ ᠨᠠᠷ ᠲᠡᠷᠡ ᠦᠶᠡ ᠳᠦ ᠮᠡᠳᠡᠬᠦ ᠪᠣᠯᠣᠨᠠ᠂〉》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃
ᠶᠦᠳᠠ ᠢᠰᠷᠧᠯ ᠤᠨ ᠨᠢᠭᠡᠳᠦᠯ
15 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄ 16 《ᠬᠥᠮᠦᠨ ᠦ ᠬᠦᠦ ᠨᠢᠭᠡ ᠰᠠᠪᠠᠭᠠ ᠠᠪᠴᠢᠷᠠᠵᠤ᠂ ᠳᠡᠭᠡᠷᠡ ᠨᠢ᠄ 〈ᠶᠦᠳᠠ ᠪᠣᠯᠣᠨ ᠲᠡᠭᠦᠨ ᠦ ᠬᠠᠮᠲᠤᠷᠠᠭᠴᠢ ᠢᠰᠷᠧᠯᠴᠦᠳ ᠦᠨ ᠬᠢ〉 ᠭᠡᠵᠦ ᠪᠢᠴᠢ᠃ ᠪᠠᠰᠠ ᠥᠭᠡᠷᠡ ᠨᠢᠭᠡ ᠰᠠᠪᠠᠭᠠ ᠠᠪᠴᠢᠷᠠᠵᠤ᠂ ᠳᠡᠭᠡᠷᠡ ᠨᠢ᠄ 〈ᠡᠹᠷᠠᠢᠮ ᠤᠨ ᠰᠠᠪᠠᠭᠠ᠂ ᠶᠣᠰᠧᠹ ᠪᠠ ᠲᠡᠭᠦᠨ ᠦ ᠬᠠᠮᠲᠤᠷᠠᠭᠴᠢ ᠢᠰᠷᠧᠯ ᠤᠨ ᠪᠦᠬᠦ ᠭᠡᠷ ᠦᠨ ᠬᠢ〉 ᠭᠡᠵᠦ ᠪᠢᠴᠢ᠃ 17 ᠳᠠᠷᠠᠭᠠ ᠨᠢ ᠨᠢᠭᠡ ᠶᠢ ᠨᠢ ᠨᠥᠭᠥᠭᠡ ᠲᠠᠢ ᠨᠢ ᠨᠡᠢᠯᠡᠭᠦᠯ᠂ ᠲᠡᠢᠨ ᠬᠦ ᠭᠠᠷ ᠢᠶᠠᠷ ᠢᠶᠠᠨ ᠲᠡᠳᠡᠭᠡᠷ ᠢ ᠨᠢᠭᠡ ᠪᠣᠯᠭᠠ᠃ 18 ᠬᠡᠷᠪᠡ ᠲᠠᠨ ᠤ ᠬᠢᠨ ᠴᠢᠮᠠ ᠠᠴᠠ᠄ 〈ᠡᠳᠡᠭᠡᠷ ᠵᠦᠢᠯ ᠴᠢᠨᠢ ᠶᠠᠮᠠᠷ ᠤᠳᠬᠠ ᠲᠠᠢ ᠶᠢ ᠪᠢᠳᠡᠨ ᠳᠦ ᠮᠡᠳᠡᠭᠦᠯᠬᠦ ᠦᠭᠡᠢ ᠤᠤ︖〉 ᠭᠡᠪᠡᠯ᠂ 19 ᠴᠢ ᠲᠡᠳᠡᠨ ᠳᠦ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠡᠹᠷᠠᠢᠮ ᠤᠨ ᠭᠠᠷ ᠲᠤ ᠪᠤᠢ ᠶᠣᠰᠧᠹ ᠪᠣᠯᠣᠨ ᠲᠡᠭᠦᠨ ᠦ ᠬᠠᠮᠲᠤᠷᠠᠭᠴᠢ ᠢᠰᠷᠧᠯ ᠤᠨ ᠣᠪᠣᠭ ᠤᠳ ᠤᠨ ᠰᠠᠪᠠᠭᠠ ᠶᠢ ᠠᠪᠴᠤ᠂ ᠲᠡᠭᠦᠨ ᠢ ᠶᠦᠳᠠ ᠶᠢᠨ ᠰᠠᠪᠠᠭᠠ ᠲᠠᠢ ᠨᠡᠢᠯᠡᠭᠦᠯᠵᠦ᠂ ᠨᠢᠭᠡ ᠰᠠᠪᠠᠭᠠ ᠪᠣᠯᠭᠠᠨᠠ᠃ ᠡᠢᠨ ᠬᠦ ᠲᠡᠳᠡ ᠮᠢᠨᠦ ᠭᠠᠷ ᠢᠶᠠᠷ ᠨᠢᠭᠡ ᠪᠣᠯᠣᠨᠠ〉 ᠭᠡᠰᠡᠨ》 ᠭᠡᠵᠦ ᠶᠠᠷᠢ᠃ 20 ᠴᠢ ᠲᠡᠢᠨ ᠬᠦ ᠪᠢᠴᠢᠭᠰᠡᠨ ᠰᠠᠪᠠᠭᠠ ᠪᠠᠨ ᠲᠡᠳᠡᠨ ᠦ ᠨᠢᠳᠦᠨ ᠳᠡᠭᠡᠷᠡ ᠭᠠᠷ ᠲᠠᠭᠠᠨ ᠪᠠᠷᠢᠨ 21 ᠲᠡᠳᠡᠨ ᠳᠦ ᠡᠢᠨ ᠬᠦ ᠶᠠᠷᠢ᠄ 《ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠢᠰᠷᠧᠯᠴᠦᠳ ᠢ ᠣᠴᠢᠭᠰᠠᠨ ᠭᠦᠷᠦᠨ ᠨᠦᠭᠦᠳ ᠡᠴᠡ ᠨᠢ ᠭᠠᠷᠭᠠᠨ᠂ ᠵᠦᠭ ᠪᠦᠷᠢ ᠡᠴᠡ ᠴᠤᠭᠯᠠᠭᠤᠯᠵᠤ᠂ ᠨᠤᠲᠤᠭ ᠲᠤᠨᠢ ᠠᠪᠠᠴᠢᠨᠠ᠃ 22 ᠪᠢ ᠲᠡᠳᠡᠨ ᠢ ᠲᠡᠷᠡ ᠭᠠᠵᠠᠷ ᠲᠤ᠂ ᠢᠰᠷᠧᠯ ᠤᠨ ᠠᠭᠤᠯᠠᠰ ᠳᠡᠭᠡᠷᠡ ᠨᠢᠭᠡᠨ ᠤᠯᠤᠰ ᠪᠣᠯᠭᠠᠨᠠ᠃ ᠨᠢᠭᠡ ᠯᠠ ᠬᠠᠭᠠᠨ ᠪᠦᠭᠦᠳᠡ ᠶᠢᠨ ᠬᠢᠨᠢ ᠬᠠᠭᠠᠨ ᠪᠣᠯᠵᠤ᠂ ᠲᠡᠳᠡ ᠬᠣᠢᠰᠢᠳᠠ ᠬᠣᠶᠠᠷ ᠠᠷᠠᠳ ᠲᠦᠮᠡᠨ ᠪᠣᠯᠬᠤ ᠦᠭᠡᠢ᠂ ᠬᠣᠶᠠᠷ ᠬᠠᠭᠠᠨᠴᠢᠯᠠᠯ ᠳᠤ ᠬᠤᠪᠢᠶᠠᠭᠳᠠᠬᠤ ᠦᠭᠡᠢ᠃ 23 ᠲᠡᠳᠡ ᠵᠢᠭᠰᠢᠭᠦᠷᠢᠲᠦ ᠱᠤᠭᠤᠮᠠᠯ ᠰᠢᠲᠦᠭᠡᠨ ᠢᠶᠡᠷ ᠢᠶᠠᠨ᠂ ᠡᠰᠡᠪᠡᠯ ᠠᠯᠢᠪᠠ ᠨᠢᠭᠦᠯ ᠢᠶᠡᠷ ᠢᠶᠠᠨ ᠥᠪᠡᠷᠰᠡᠳ ᠢ ᠪᠠᠨ ᠪᠤᠵᠠᠷᠯᠠᠬᠤ ᠦᠭᠡᠢ᠂ ᠪᠢ ᠲᠡᠳᠡᠨ ᠢ ᠨᠢᠭᠦᠯ ᠦᠢᠯᠡᠳᠳᠡᠭ ᠠᠯᠢᠪᠠ ᠭᠠᠵᠠᠷ ᠠᠴᠠ ᠨᠢ ᠠᠪᠤᠷᠠᠵᠤ᠂ ᠲᠡᠳᠡᠨ ᠢ ᠴᠡᠪᠡᠷᠯᠡᠨᠡ᠃ ᠡᠢᠨ ᠬᠦ ᠲᠡᠳᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠣᠯᠵᠤ᠂ ᠪᠢ ᠲᠡᠳᠡᠨ ᠦ ᠪᠤᠷᠬᠠᠨ ᠪᠣᠯᠣᠨᠠ᠃
24 ᠮᠢᠨᠦ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠲᠡᠳᠡᠨ ᠦ ᠬᠠᠭᠠᠨ ᠪᠣᠯᠵᠤ᠂ ᠲᠡᠳᠡ ᠪᠦᠭᠦᠳᠡ ᠨᠢᠭᠡ ᠬᠣᠨᠢᠴᠢᠨ ᠲᠠᠢ ᠪᠣᠯᠣᠨᠠ᠃ ᠲᠡᠳᠡ ᠵᠢᠭᠠᠪᠤᠷᠢ ᠨᠤᠭᠤᠳ ᠢ ᠮᠢᠨᠢ ᠮᠥᠷᠳᠡᠵᠦ᠂ ᠲᠣᠭᠲᠠᠭᠠᠯ ᠤᠳ ᠢ ᠮᠢᠨᠢ ᠰᠠᠬᠢᠨ ᠪᠡᠶᠡᠯᠡᠭᠦᠯᠦᠨᠡ᠃ 25 ᠲᠡᠳᠡ ᠮᠢᠨᠦ ᠵᠠᠷᠤᠴᠠ ᠶᠠᠺᠣᠪ ᠲᠠᠭᠠᠨ ᠥᠭᠭᠥᠭᠰᠡᠨ ᠨᠤᠲᠤᠭ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠠᠮᠢᠳᠤᠷᠠᠭᠰᠠᠨ ᠲᠡᠷᠡ ᠨᠤᠲᠤᠭ ᠲᠤ ᠠᠮᠢᠳᠤᠷᠠᠨᠠ᠃ ᠲᠡᠳᠡ᠂ ᠲᠡᠳᠡᠨ ᠦ ᠬᠡᠦᠬᠡᠳ ᠤᠳ᠂ ᠬᠡᠦᠬᠡᠳ ᠤᠳ ᠤᠨ ᠬᠢᠨᠢ ᠬᠡᠦᠬᠡᠳ ᠤᠳ ᠴᠤ ᠲᠡᠨᠳᠡ ᠦᠶᠡ ᠶᠢᠨ ᠦᠶᠡ ᠳᠦ ᠠᠮᠢᠳᠤᠷᠠᠬᠤ ᠪᠥᠭᠡᠳ ᠮᠢᠨᠦ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠡᠭᠦᠷᠢᠳᠡ ᠲᠡᠳᠡᠨ ᠦ ᠬᠠᠭᠠᠨ ᠪᠠᠢᠬᠤ ᠪᠣᠯᠣᠨᠠ᠃ 26 ᠪᠢ ᠲᠡᠳᠡᠨ ᠲᠡᠢ ᠡᠩᠬᠡ ᠲᠠᠢᠪᠤᠩ ᠤᠨ ᠭᠡᠷᠡ ᠪᠠᠢᠭᠤᠯᠬᠤ ᠪᠥᠭᠡᠳ ᠲᠡᠷᠡ ᠨᠢ ᠮᠥᠩᠬᠡ ᠶᠢᠨ ᠭᠡᠷᠡ ᠪᠣᠯᠣᠨᠠ᠃ ᠪᠢ ᠲᠡᠳᠡᠨ ᠢ ᠲᠣᠭᠲᠠᠭᠠᠨ᠂ ᠥᠨᠢᠷ ᠣᠯᠠᠨ ᠪᠣᠯᠭᠠᠵᠤ᠂ ᠥᠪᠡᠷ ᠦᠨ ᠢᠶᠠᠨ ᠠᠷᠢᠭᠤᠨ ᠭᠠᠵᠠᠷ ᠢ ᠲᠡᠳᠡᠨ ᠦ ᠳᠤᠮᠳᠠ ᠮᠥᠩᠬᠡᠳᠡ ᠪᠠᠢᠯᠭᠠᠨᠠ᠃ 27 ᠲᠡᠢᠨ ᠬᠦ ᠮᠢᠨᠦ ᠣᠷᠣᠰᠢᠳᠠᠭ ᠭᠠᠵᠠᠷ ᠲᠡᠳᠡᠨ ᠦ ᠳᠤᠮᠳᠠ ᠪᠠᠢᠬᠤ ᠪᠥᠭᠡᠳ ᠪᠢ ᠲᠡᠳᠡᠨ ᠦ ᠪᠤᠷᠬᠠᠨ ᠪᠣᠯᠵᠤ᠂ ᠲᠡᠳᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠪᠣᠯᠣᠨᠠ᠃ 28 ᠠᠷᠢᠭᠤᠨ ᠭᠠᠵᠠᠷ ᠮᠢᠨᠢ ᠲᠡᠳᠡᠨ ᠦ ᠳᠤᠮᠳᠠ ᠮᠥᠩᠬᠡᠳᠡ ᠣᠷᠣᠰᠢᠬᠤ ᠳᠤ᠂ ᠢᠰᠷᠧᠯ ᠢ ᠠᠷᠢᠭᠤᠰᠬᠠᠭᠴᠢ ᠨᠢ ᠶᠣᠬᠣᠸᠠ ᠪᠢ ᠭᠡᠳᠡᠭ ᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠮᠡᠳᠡᠬᠦ ᠪᠣᠯᠣᠨᠠ᠃〉》