ᠡᠽᠧᠺᠢᠶᠧᠯ ᠳᠥᠴᠢᠨ ᠭᠤᠷᠪᠠ
ᠶᠣᠬᠣᠸᠠ ᠶᠢᠨ ᠵᠢᠪᠬᠤᠯᠠᠩ ᠪᠤᠴᠠᠵᠤ ᠢᠷᠡᠪᠡ
1 ᠳᠠᠷᠠᠭᠠ ᠨᠢ ᠲᠡᠷᠡ ᠨᠠᠮᠠᠶᠢ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠬᠠᠭᠠᠯᠭᠠ ᠤᠷᠤᠭᠤ ᠠᠪᠠᠴᠢᠪᠠ᠃ 2 ᠬᠠᠷᠠ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠴᠣᠭ ᠵᠢᠪᠬᠤᠯᠠᠩ ᠵᠡᠭᠦᠨ ᠵᠦᠭ ᠡᠴᠡ ᠢᠷᠡᠯᠡ᠃ ᠲᠡᠭᠦᠨ ᠦ ᠳᠠᠭᠤ ᠶᠡᠬᠡ ᠤᠰᠤᠨ ᠤ ᠴᠢᠮᠡᠭᠡ ᠮᠡᠲᠦ᠂ ᠲᠡᠭᠦᠨ ᠦ ᠴᠣᠭ ᠵᠢᠪᠬᠤᠯᠠᠩ ᠳᠤ ᠭᠠᠵᠠᠷ ᠭᠡᠷᠡᠯᠲᠦᠪᠡ᠃ 3 ᠡᠨᠡ ᠦᠵᠡᠭᠳᠡᠯ ᠶᠧᠷᠦ᠋ᠰᠠᠯᠧᠮ ᠬᠣᠲᠠ ᠶᠢ ᠤᠰᠠᠳᠬᠠᠬᠤ ᠪᠠᠷ ᠢᠷᠡᠭᠰᠡᠨ ᠦᠶᠡ ᠳᠦᠨᠢ ᠮᠢᠨᠦ ᠦᠵᠡᠭᠰᠡᠨ ᠦᠵᠡᠭᠳᠡᠯ ᠲᠡᠢ ᠠᠳᠠᠯᠢ᠂ ᠮᠥᠨ ᠺᠧᠪᠠᠷ ᠭᠣᠣᠯ ᠤᠨ ᠳᠡᠷᠭᠡᠳᠡ ᠮᠢᠨᠦ ᠦᠵᠡᠭᠰᠡᠨ ᠦᠵᠡᠭᠳᠡᠯ ᠤᠳ ᠲᠠᠢ ᠠᠳᠠᠯᠢ ᠪᠠᠢᠯᠠ᠃ ᠪᠢ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠨᠠᠭᠠᠪᠠ᠃ 4 ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠬᠠᠭᠠᠯᠭᠠ ᠪᠠᠷ ᠥᠷᠭᠥᠭᠡᠨ ᠳᠦ ᠣᠷᠣᠪᠠ᠂ 5 ᠰᠦᠨᠡᠰᠦ ᠨᠠᠮᠠᠶᠢ ᠡᠷᠭᠦᠨ᠂ ᠳᠣᠲᠣᠭᠠᠳᠤ ᠬᠦᠷᠢᠶᠡ ᠤᠷᠤᠭᠤ ᠠᠪᠴᠢᠷᠠᠪᠠ᠃ ᠪᠢ ᠬᠠᠷᠠᠬᠤ ᠳᠤ᠂ ᠶᠣᠬᠣᠸᠠ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠥᠷᠭᠥᠭᠡ ᠶᠢ ᠳᠦᠭᠦᠷᠭᠡᠪᠡ︕
6 ᠨᠥᠭᠥᠭᠡ ᠬᠥᠮᠦᠨ ᠮᠢᠨᠦ ᠬᠠᠵᠠᠭᠤ ᠳᠤ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠥᠷᠭᠥᠭᠡᠨ ᠡᠴᠡ ᠬᠡᠨ ᠨᠢᠭᠡᠨ ᠨᠠᠳᠠ ᠳᠤ ᠶᠠᠷᠢᠬᠤ ᠶᠢ ᠪᠢ ᠰᠣᠨᠣᠰᠣᠯᠠ᠃ 7 ᠲᠡᠷᠡ ᠨᠠᠳᠠ ᠳᠤ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠮᠢᠨᠦ ᠰᠡᠨᠲᠢ ᠶᠢᠨ ᠭᠠᠵᠠᠷ᠂ ᠮᠢᠨᠦ ᠬᠥᠯ ᠦᠨ ᠤᠯᠠ ᠭᠢᠰᠬᠢᠬᠦ ᠭᠠᠵᠠᠷ᠂ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠮᠥᠩᠬᠡᠳᠡ ᠣᠷᠣᠰᠢᠬᠤ ᠭᠠᠵᠠᠷ ᠮᠢᠨᠢ ᠡᠨᠡ ᠪᠢᠯᠡ᠃ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠥᠪᠡᠷᠰᠡᠳ ᠢᠶᠡᠨ ᠴᠤ᠂ ᠲᠡᠳᠡᠨ ᠦ ᠬᠠᠭᠠᠳ ᠴᠤ ᠵᠠᠪᠬᠠᠢᠷᠠᠯ ᠪᠣᠯᠣᠨ ᠬᠠᠭᠠᠳ ᠤᠨ ᠢᠶᠠᠨ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠳᠡᠭᠡᠷᠡᠬᠢ ᠠᠮᠢ ᠦᠭᠡᠢ ᠰᠢᠲᠦᠭᠡᠨ ᠨᠦᠭᠦᠳ ᠢᠶᠡᠷ ᠠᠷᠢᠭᠤᠨ ᠨᠡᠷᠡ ᠶᠢ ᠮᠢᠨᠢ ᠳᠠᠬᠢᠨ ᠭᠤᠲᠤᠭᠠᠵᠤ ᠪᠣᠯᠬᠤ ᠦᠭᠡᠢ᠃ 8 ᠲᠡᠳᠡ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠣᠱᠣᠭᠠ ᠶᠢ ᠮᠢᠨᠦ ᠪᠣᠱᠣᠭᠠᠨ ᠤ ᠳᠡᠷᠭᠡᠳᠡ᠂ ᠬᠠᠭᠠᠯᠭᠠᠨ ᠤ ᠬᠠᠲᠠᠪᠴᠢ ᠪᠠᠨ ᠮᠢᠨᠦ ᠬᠠᠭᠠᠯᠭᠠᠨ ᠤ ᠬᠠᠲᠠᠪᠴᠢ ᠶᠢᠨ ᠳᠡᠷᠭᠡᠳᠡ ᠪᠠᠢᠯᠭᠠᠭᠰᠠᠨ ᠢᠶᠠᠷ ᠪᠢ ᠪᠣᠯᠣᠨ ᠲᠡᠳᠡᠨ ᠦ ᠬᠣᠭᠣᠷᠣᠨᠳᠣ ᠨᠢᠭᠡ ᠬᠡᠷᠡᠮ ᠯᠠ ᠪᠠᠢᠬᠤ ᠳᠤ᠂ ᠲᠡᠳᠡ ᠵᠢᠭᠰᠢᠭᠦᠷᠢ ᠶᠢ ᠦᠢᠯᠡᠳᠳᠡᠭ ᠢᠶᠡᠷ ᠢᠶᠠᠨ ᠠᠷᠢᠭᠤᠨ ᠨᠡᠷᠡ ᠶᠢ ᠮᠢᠨᠢ ᠳᠣᠷᠣᠮᠵᠢᠯᠠᠪᠠ᠃ ᠲᠡᠢᠮᠦ ᠡᠴᠡ ᠪᠢ ᠠᠭᠤᠷ ᠬᠢᠯᠢᠩ ᠲᠠᠢ ᠪᠠᠷ ᠲᠡᠳᠡᠨ ᠢ ᠮᠥᠬᠥᠭᠡᠪᠡ᠃ 9 ᠣᠳᠣ ᠲᠡᠳᠡ ᠥᠪᠡᠷᠰᠡᠳ ᠦᠨ ᠢᠶᠠᠨ ᠵᠠᠪᠬᠠᠢᠷᠠᠯ ᠪᠣᠯᠣᠨ ᠬᠠᠭᠠᠳ ᠤᠨ ᠢᠶᠠᠨ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠳᠡᠭᠡᠷᠡᠬᠢ ᠠᠮᠢ ᠦᠭᠡᠢ ᠰᠢᠲᠦᠭᠡᠨ ᠨᠦᠭᠦᠳ ᠢ ᠨᠠᠳᠠ ᠠᠴᠠ ᠬᠣᠯᠠᠳᠠᠭᠤᠯᠬᠤ ᠶᠣᠰᠣᠲᠠᠢ᠃ ᠲᠡᠭᠡᠪᠡᠯ ᠪᠢ ᠲᠡᠳᠡᠨ ᠦ ᠳᠤᠮᠳᠠ ᠮᠥᠩᠬᠡᠳᠡ ᠣᠷᠣᠰᠢᠬᠤ ᠪᠣᠯᠣᠨᠠ᠃
10 ᠬᠥᠮᠦᠨ ᠦ ᠬᠦᠦ ᠡ᠂ ᠴᠢ ᠢᠰᠷᠧᠯ ᠤᠨ ᠭᠡᠷ ᠦᠨ ᠬᠢᠨ ᠳᠤ ᠡᠨᠡ ᠥᠷᠭᠥᠭᠡᠨ ᠦ ᠲᠤᠬᠠᠢ ᠬᠡᠯᠡᠵᠦ ᠥᠭ᠂ ᠲᠡᠳᠡ ᠲᠡᠷᠡ ᠲᠥᠰᠥᠯ ᠦᠨ ᠳᠠᠭᠠᠤ ᠬᠡᠮᠵᠢᠭ᠃ ᠲᠡᠳᠡ ᠭᠡᠮ ᠨᠢᠭᠦᠯ ᠡᠴᠡ ᠪᠡᠨ ᠢᠴᠢᠬᠦ ᠶᠣᠰᠣᠲᠠᠢ᠃ 11 ᠬᠡᠷᠪᠡ ᠲᠡᠳᠡ ᠬᠢᠭᠰᠡᠨ ᠪᠦᠬᠦᠨ ᠡᠴᠡ ᠪᠡᠨ ᠢᠴᠢᠪᠡᠯ᠂ ᠲᠡᠳᠡᠨ ᠳᠦ ᠥᠷᠭᠥᠭᠡᠨ ᠦ ᠪᠦᠬᠦ ᠵᠠᠭᠪᠤᠷ᠂ ᠲᠤᠬᠠᠢᠯᠠᠪᠠᠯ᠂ ᠲᠡᠭᠦᠨ ᠦ ᠪᠦᠲᠦᠴᠡ᠂ ᠣᠷᠣᠵᠤ ᠭᠠᠷᠬᠤ ᠬᠠᠭᠠᠯᠭᠠ ᠶᠢᠨ ᠪᠦᠬᠦ ᠵᠠᠭᠪᠤᠷ ᠢ ᠬᠠᠮᠤᠭ ᠲᠣᠭᠲᠠᠭᠠᠯ᠂ ᠬᠠᠮᠤᠭ ᠵᠠᠭᠪᠤᠷ ᠪᠠ ᠬᠠᠮᠤᠭ ᠬᠠᠤᠯᠢ ᠲᠠᠢ ᠨᠢ ᠬᠠᠮᠲᠤ ᠮᠡᠳᠡᠭᠦᠯᠵᠦ᠂ ᠡᠳᠡᠭᠡᠷ ᠢ ᠲᠡᠳᠡᠨ ᠦ ᠨᠢᠳᠦᠨ ᠦ ᠡᠮᠦᠨᠡ ᠪᠢᠴᠢ᠃ ᠲᠡᠳᠡ ᠪᠦᠬᠦ ᠵᠠᠭᠪᠤᠷ ᠪᠠ ᠬᠠᠮᠤᠭ ᠲᠣᠭᠲᠠᠭᠠᠯ ᠢ ᠨᠢ ᠮᠥᠷᠳᠡᠨ ᠪᠡᠶᠡᠯᠡᠭᠦᠯᠬᠦ ᠤᠴᠢᠷ ᠲᠠᠢ᠃ 12 ᠥᠷᠭᠥᠭᠡᠨ ᠦ ᠬᠠᠤᠯᠢ ᠨᠢ ᠡᠨᠡ᠄ 〈ᠠᠭᠤᠯᠠ ᠶᠢᠨ ᠣᠷᠣᠢ ᠶᠢ ᠲᠣᠭᠣᠷᠢᠭᠰᠠᠨ ᠪᠦᠬᠦ ᠭᠠᠵᠠᠷ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠠᠩ᠋ᠬᠠᠷᠤᠭᠲᠤᠨ᠂ ᠥᠷᠭᠥᠭᠡᠨ ᠦ ᠬᠠᠤᠯᠢ ᠨᠢ ᠡᠨᠡ᠃〉
13 ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠤᠷᠲᠤ ᠲᠣᠬᠣᠢ ᠪᠠᠷ᠂ ᠨᠢᠭᠡ ᠲᠣᠬᠣᠢ ᠳᠡᠭᠡᠷᠡ ᠨᠢᠭᠡ ᠠᠯᠠᠭᠠᠨ ᠤ ᠡᠩ ᠢ ᠨᠡᠮᠡᠭᠰᠡᠨ ᠲᠣᠬᠣᠢ ᠪᠠᠷ ᠬᠡᠮᠵᠢᠭᠰᠡᠨ ᠨᠢ ᠡᠨᠡ᠃ ᠰᠠᠭᠤᠷᠢ ᠨᠢ ᠨᠢᠭᠡ ᠲᠣᠬᠣᠢ ᠥᠨᠳᠥᠷ᠂ ᠨᠢᠭᠡ ᠲᠣᠬᠣᠢ ᠥᠷᠭᠡᠨ ᠪᠥᠭᠡᠳ ᠨᠢᠭᠡ ᠰᠥᠭᠥᠮ ᠬᠥᠪᠡᠭᠡ ᠲᠠᠢ᠃ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠥᠨᠳᠥᠷ ᠨᠢ ᠭᠡᠪᠡᠯ᠂ 14 ᠨᠢᠭᠡ ᠲᠣᠬᠣᠢ ᠬᠥᠪᠡᠭᠡ ᠲᠠᠢ ᠳᠣᠣᠷᠠᠳᠤ ᠬᠡᠰᠡᠭ ᠨᠢ ᠭᠠᠵᠠᠷ ᠳᠡᠭᠡᠷᠡᠬᠢ ᠰᠠᠭᠤᠷᠢ ᠡᠴᠡ ᠬᠣᠶᠠᠷ ᠲᠣᠬᠣᠢ ᠥᠨᠳᠥᠷ᠂ ᠨᠢᠭᠡ ᠲᠣᠬᠣᠢ ᠬᠥᠪᠡᠭᠡ ᠲᠠᠢ ᠳᠡᠭᠡᠳᠦ ᠬᠡᠰᠡᠭ ᠨᠢ ᠳᠣᠣᠷᠠᠳᠤ ᠬᠡᠰᠡᠭ ᠡᠴᠡ ᠳᠥᠷᠪᠡᠨ ᠲᠣᠬᠣᠢ ᠥᠨᠳᠥᠷ᠃ 15 ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠵᠤᠤᠬᠠ ᠨᠢ ᠳᠥᠷᠪᠡᠨ ᠲᠣᠬᠣᠢ ᠥᠨᠳᠥᠷ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠵᠤᠤᠬᠠᠨ ᠠᠴᠠ ᠳᠡᠭᠡᠭᠰᠢ ᠭᠠᠷᠤᠭᠰᠠᠨ ᠳᠥᠷᠪᠡᠨ ᠡᠪᠡᠷ ᠪᠤᠢ᠃ 16 ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠵᠤᠤᠬᠠ ᠨᠢ ᠠᠷᠪᠠᠨ ᠬᠣᠶᠠᠷ ᠲᠣᠬᠣᠢ ᠤᠷᠲᠤ᠂ ᠠᠷᠪᠠᠨ ᠬᠣᠶᠠᠷ ᠲᠣᠬᠣᠢ ᠥᠷᠭᠡᠨ᠂ ᠲᠡᠭᠰᠢ ᠳᠥᠷᠪᠡᠯᠵᠢᠨ ᠶᠤᠮ᠃ 17 ᠳᠡᠭᠡᠳᠦ ᠬᠡᠰᠡᠭ ᠨᠢ ᠴᠤ ᠲᠡᠭᠰᠢ ᠳᠥᠷᠪᠡᠯᠵᠢᠨ ᠪᠠᠢᠪᠠ᠃ ᠤᠷᠲᠤ ᠨᠢ ᠠᠷᠪᠠᠨ ᠳᠥᠷᠪᠡᠨ ᠲᠣᠬᠣᠢ᠂ ᠥᠷᠭᠡᠨ ᠨᠢ ᠠᠷᠪᠠᠨ ᠳᠥᠷᠪᠡᠨ ᠲᠣᠬᠣᠢ᠂ ᠬᠦᠷᠢᠶᠡ ᠲᠠᠢ ᠬᠥᠪᠡᠭᠡ ᠨᠢ ᠬᠠᠭᠠᠰ ᠲᠣᠬᠣᠢ ᠪᠠ ᠬᠥᠪᠡᠭᠡ ᠨᠢ ᠨᠢᠭᠡ ᠲᠣᠬᠣᠢ᠂ ᠱᠠᠲᠤ ᠨᠢ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠪᠠᠢᠨᠠ》 ᠭᠡᠪᠡ᠃
18 ᠲᠡᠷᠡ ᠨᠠᠳᠠ ᠳᠤ ᠠᠢᠯᠠᠳᠤᠨ᠄ 《ᠬᠥᠮᠦᠨ ᠦ ᠬᠦᠦ ᠡ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠪᠣᠰᠬᠠᠬᠤ ᠡᠳᠦᠷ ᠲᠡᠭᠦᠨ ᠳᠡᠭᠡᠷᠡ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠵᠦ᠂ ᠴᠢᠰᠤ ᠶᠢ ᠰᠠᠴᠤᠬᠤ ᠲᠠᠯᠠ ᠪᠠᠷ ᠬᠢ ᠲᠣᠭᠲᠠᠭᠠᠯ ᠤᠳ ᠨᠢ ᠡᠨᠡ ᠶᠤᠮ᠃ 19 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃ ᠨᠠᠳᠠ ᠳᠤ ᠣᠢᠷᠠᠲᠤᠵᠤ ᠦᠢᠯᠡᠴᠢᠯᠡᠳᠡᠭ᠌ ᠽᠠᠳᠣᠺ ᠤᠨ ᠦᠷᠡ ᠤᠳᠤᠮ ᠲᠠᠬᠢᠯᠴᠢ ᠯᠧᠸᠢᠴᠦᠳ ᠲᠦ ᠴᠢ ᠵᠠᠯᠠᠭᠤ ᠪᠤᠬᠠ ᠶᠢ ᠥᠭᠭᠥᠨ ᠨᠢᠭᠦᠯ ᠦᠨ ᠲᠥᠯᠥᠭᠡᠬᠢ ᠲᠠᠬᠢᠯ ᠪᠣᠯᠭᠠᠵᠤ᠂ 20 ᠴᠢᠰᠤ ᠶᠢ ᠨᠢ ᠠᠪᠤᠨ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠳᠥᠷᠪᠡᠨ ᠡᠪᠡᠷ᠂ ᠮᠥᠨ ᠪᠤᠯᠤᠩ ᠤᠨ ᠳᠥᠷᠪᠡᠨ ᠥᠨᠴᠥᠭ᠂ ᠬᠦᠷᠢᠶᠡ ᠲᠠᠢ ᠬᠥᠪᠡᠭᠡ ᠳᠦ ᠲᠦᠷᠬᠢᠭᠲᠦᠨ᠃ ᠡᠢᠨ ᠬᠦ ᠴᠢ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠴᠡᠪᠡᠷᠰᠢᠭᠦᠯᠵᠦ᠂ ᠲᠡᠭᠦᠨ ᠦ ᠲᠥᠯᠥᠭᠡ ᠭᠡᠮ ᠦᠨ ᠬᠡᠯᠲᠦᠷᠢᠭᠦᠯᠦᠯᠭᠡ ᠬᠢ᠃ 21 ᠨᠢᠭᠦᠯ ᠦᠨ ᠲᠥᠯᠥᠭᠡᠬᠢ ᠲᠠᠬᠢᠯ ᠪᠣᠯᠬᠤ ᠪᠤᠬᠠ ᠶᠢ ᠠᠪᠴᠤ᠂ ᠠᠷᠢᠭᠤᠨ ᠭᠠᠵᠠᠷ ᠤᠨ ᠭᠠᠳᠠᠨᠠ᠂ ᠥᠷᠭᠥᠭᠡᠨ ᠦ ᠲᠣᠭᠲᠠᠭᠰᠠᠨ ᠭᠠᠵᠠᠷ ᠲᠤ ᠰᠢᠲᠠᠭᠠᠬᠤ ᠶᠣᠰᠣᠲᠠᠢ᠃
22 ᠬᠣᠶᠠᠳᠠᠬᠢ ᠡᠳᠦᠷ ᠲᠦ᠂ ᠴᠢ ᠰᠣᠭᠣᠭ ᠦᠭᠡᠢ ᠤᠬᠤᠨᠠ ᠶᠢ ᠨᠢᠭᠦᠯ ᠦᠨ ᠲᠥᠯᠥᠭᠡᠬᠢ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠭᠲᠦᠨ᠃ ᠲᠡᠢᠨ ᠬᠦ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠪᠤᠬᠠ ᠪᠠᠷ ᠴᠡᠪᠡᠷᠰᠢᠭᠦᠯᠦᠭᠰᠡᠨ ᠲᠡᠢ ᠠᠳᠠᠯᠢ ᠴᠡᠪᠡᠷᠰᠢᠭᠦᠯᠬᠦ ᠶᠣᠰᠣᠲᠠᠢ᠃ 23 ᠴᠡᠪᠡᠷᠰᠢᠭᠦᠯᠵᠦ ᠳᠠᠭᠤᠰᠤᠭᠠᠳ ᠴᠢ ᠨᠢᠭᠡ ᠵᠠᠯᠠᠭᠤ ᠪᠤᠬᠠ ᠶᠢ ᠪᠣᠭ ᠮᠠᠯ ᠠᠴᠠ ᠠᠪᠤᠭᠰᠠᠨ ᠨᠢᠭᠡ ᠰᠣᠭᠣᠭ ᠦᠭᠡᠢ ᠬᠤᠴᠠ ᠲᠠᠢ ᠡᠷᠭᠦ᠃ 24 ᠴᠢ ᠲᠡᠳᠡᠭᠡᠷ ᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠪᠴᠢᠷᠠᠪᠠᠯ᠂ ᠲᠠᠬᠢᠯᠴᠢᠳ ᠳᠡᠭᠡᠷᠡ ᠨᠢ ᠳᠠᠪᠤᠰᠤ ᠰᠠᠴᠤᠵᠤ᠂ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠭᠠᠨ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠶᠣᠰᠣᠲᠠᠢ᠃ 25 ᠳᠣᠯᠣᠭᠠᠨ ᠬᠣᠨᠣᠭ ᠤᠨ ᠲᠤᠷᠰᠢ ᠴᠢ ᠡᠳᠦᠷ ᠪᠦᠷᠢ ᠨᠢᠭᠦᠯ ᠦᠨ ᠲᠥᠯᠥᠭᠡᠬᠢ ᠲᠠᠬᠢᠯ ᠳᠤ ᠵᠣᠷᠢᠭᠤᠯᠤᠨ ᠨᠢᠭᠡ ᠤᠬᠤᠨᠠ᠂ ᠰᠣᠭᠣᠭ ᠦᠭᠡᠢ ᠨᠢᠭᠡ ᠪᠤᠬᠠ ᠪᠣᠯᠣᠨ ᠪᠣᠭ ᠮᠠᠯ ᠠᠴᠠ ᠠᠪᠤᠭᠰᠠᠨ ᠨᠢᠭᠡ ᠬᠤᠴᠠ ᠶᠢ ᠪᠡᠯᠡᠳᠬᠡ᠃ 26 ᠲᠡᠢᠨ ᠬᠦ ᠲᠡᠳᠡ ᠳᠣᠯᠣᠭᠠᠨ ᠬᠣᠨᠣᠭ ᠤᠨ ᠲᠤᠷᠰᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠲᠥᠯᠥᠭᠡ ᠭᠡᠮ ᠦᠨ ᠬᠡᠯᠲᠦᠷᠢᠭᠦᠯᠦᠯᠭᠡ ᠶᠢ ᠬᠢᠵᠦ᠂ ᠲᠡᠭᠦᠨ ᠢ ᠠᠷᠢᠭᠤᠰᠬᠠᠵᠤ᠂ ᠲᠡᠭᠦᠨ ᠢ ᠵᠣᠷᠢᠭᠤᠯᠬᠤ ᠪᠣᠯᠣᠨᠠ᠃ 27 ᠡᠨᠡ ᠡᠳᠦᠷ ᠤᠳ ᠭᠦᠢᠴᠡᠬᠦ ᠳᠦ᠂ ᠨᠠᠢ᠌ᠮᠠᠳᠠᠬᠢ ᠡᠳᠦᠷ ᠡᠴᠡ ᠡᠬᠢᠯᠡᠨ ᠲᠠᠬᠢᠯᠴᠢᠳ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠ ᠨᠠᠷ ᠤᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠢ ᠡᠷᠭᠦᠬᠦ ᠪᠥᠭᠡᠳ ᠪᠢ ᠲᠠ ᠨᠠᠷ ᠢ ᠬᠦᠯᠢᠶᠡᠨ ᠠᠪᠬᠤ ᠪᠣᠯᠣᠨᠠ᠂〉 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ》 ᠭᠡᠪᠡ᠃