ᠡᠽᠧᠺᠢᠶᠧᠯ ᠬᠣᠷᠢᠨ ᠳᠣᠯᠣᠭᠠ
ᠲᠢᠷ ᠤᠨ ᠲᠤᠬᠠᠢ ᠭᠠᠰᠢᠭᠤᠳᠠᠯ
1 ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠵᠦ᠄ 2 《ᠬᠥᠮᠦᠨ ᠦ ᠬᠦᠦ ᠡ᠂ ᠲᠢᠷ ᠤᠨ ᠲᠤᠬᠠᠢ ᠭᠠᠰᠢᠭᠤᠳᠠᠯ ᠤᠨ ᠳᠠᠭᠤᠤ ᠵᠣᠬᠢᠶᠠᠵᠤ᠂ 3 ᠳᠠᠯᠠᠢ ᠶᠢᠨ ᠠᠮᠠᠨ ᠳᠤ ᠣᠷᠣᠰᠢᠵᠤ᠂ ᠡᠷᠭᠢ ᠶᠢᠨ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠠᠷᠠᠯᠵᠢᠶᠠᠨ ᠤ ᠲᠥᠪ ᠪᠣᠯᠣᠭᠰᠠᠨ ᠲᠢᠷ ᠲᠤ ᠶᠠᠷᠢ᠂ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠥᠪᠡᠷ ᠢ ᠪᠠᠨ ᠲᠡᠭᠦᠰ ᠦᠵᠡᠰᠬᠦᠯᠡᠩ ᠲᠡᠢ ᠭᠡᠵᠡᠢ᠂ ᠲᠢᠷ ᠴᠢ︕
4 ᠴᠢᠨᠦ ᠬᠢᠯᠢ ᠬᠢᠵᠠᠭᠠᠷ ᠲᠠᠩᠭᠢᠰ ᠤᠨ ᠵᠢᠷᠦᠬᠡᠨ ᠳᠦ ᠪᠤᠢ ᠴᠢᠮᠠᠶᠢ ᠪᠠᠢᠭᠤᠯᠤᠭᠴᠢᠳ ᠦᠵᠡᠰᠬᠦᠯᠡᠩ ᠢ ᠴᠢᠨᠢ ᠲᠡᠭᠦᠯᠳᠡᠷᠵᠢᠭᠦᠯᠪᠡ᠃
5 ᠰᠧᠨᠢᠷ ᠤᠨ ᠨᠠᠷᠠᠰᠤᠨ ᠮᠣᠳᠣ ᠪᠠᠷ ᠲᠡᠳᠡ ᠬᠠᠮᠤᠭ ᠪᠠᠩ᠋ᠵᠠ ᠶᠢ ᠴᠢᠨᠢ ᠬᠢᠵᠦ ᠱᠤᠷᠠᠭ ᠬᠢᠬᠦ ᠪᠡᠷ ᠯᠧᠪᠠᠨᠣᠨ ᠤ ᠬᠤᠱᠢ ᠮᠣᠳᠣ ᠶᠢ ᠠᠪᠴᠢᠷᠠᠪᠠ᠃
6 ᠰᠡᠯᠢᠭᠦᠷ ᠤᠳ ᠢ ᠴᠢᠨᠢ ᠲᠡᠳᠡ ᠪᠠᠱᠠᠨ ᠤ ᠴᠠᠷᠠᠰᠤᠨ ᠮᠣᠳᠣ ᠪᠠᠷ ᠬᠢᠵᠦ ᠲᠠᠪᠴᠠᠩ ᠢ ᠴᠢᠨᠢ ᠰᠠᠢᠫᠷᠦ᠋ᠰ ᠤᠨ ᠡᠷᠭᠢ ᠶᠢᠨ ᠨᠠᠷᠠᠰᠤᠨ ᠮᠣᠳᠣ ᠪᠠᠷ ᠬᠢᠵᠦ᠂ ᠵᠠᠭᠠᠨ ᠤ ᠰᠣᠶᠣᠭᠠ ᠰᠢᠭᠢᠳᠬᠡᠵᠡᠢ᠃
7 ᠶᠧᠵᠢᠫᠲ ᠤᠨ ᠨᠡᠬᠡᠮᠡᠯ ᠮᠠᠭᠠᠯᠢᠩ᠋ᠭᠤ ᠪᠠᠷ ᠳᠠᠷᠪᠠᠭᠤᠯ ᠬᠢᠵᠦ ᠴᠢᠨᠦ ᠲᠤᠭ ᠪᠣᠯᠭᠠᠵᠤ ᠡᠯᠢᠱᠠ ᠶᠢᠨ ᠡᠷᠭᠢ ᠡᠴᠡ ᠠᠪᠤᠭᠰᠠᠨ ᠬᠥᠬᠡ᠂ ᠨᠢᠯ ᠶᠠᠭᠠᠨ ᠪᠥᠰ ᠢᠶᠡᠷ ᠰᠡᠭᠦᠳᠡᠷᠡᠪᠴᠢ ᠶᠢ ᠴᠢᠨᠢ ᠬᠢᠪᠡ᠃
8 ᠰᠢᠢᠳᠣᠨ᠂ ᠠᠷᠸᠠᠳ᠋ ᠤᠨ ᠰᠠᠭᠤᠭᠠᠯᠢᠴᠢᠳ ᠴᠢᠨᠦ ᠰᠡᠯᠢᠭᠦᠷᠴᠢᠳ ᠪᠣᠯᠪᠠ ᠲᠢᠷ ᠡ᠂ ᠴᠢᠨᠦ ᠳᠣᠲᠣᠷᠠ ᠮᠡᠷᠭᠡᠵᠢᠯᠲᠡᠳ ᠵᠠᠯᠠᠭᠤᠷᠴᠢᠨ ᠪᠣᠯᠪᠠ᠃
9 ᠭᠧᠪᠠᠯ ᠤᠨ ᠠᠬᠠᠮᠠᠳ ᠤᠳ ᠪᠠ ᠮᠡᠷᠭᠡᠵᠢᠯᠲᠡᠳ ᠴᠢᠨᠦ ᠳᠣᠲᠣᠷᠠ ᠪᠠᠢᠵᠤ᠂ ᠣᠩ᠋ᠭᠣᠴᠠᠨ ᠤ ᠴᠢᠨᠢ ᠵᠠᠪᠰᠠᠷ ᠢ ᠪᠥᠭᠯᠡᠵᠦ ᠪᠠᠢᠪᠠ᠃ ᠳᠠᠯᠠᠢ ᠶᠢᠨ ᠬᠠᠮᠤᠭ ᠣᠩ᠋ᠭᠣᠴᠠ ᠪᠠ ᠳᠠᠯᠠᠢᠴᠢᠳ ᠨᠢ ᠴᠢᠨᠦ ᠳᠣᠲᠣᠷᠠ ᠪᠠᠢᠵᠤ᠂ ᠴᠢᠮᠠ ᠲᠠᠢ ᠬᠤᠳᠠᠯᠳᠤᠭᠠ ᠬᠢᠵᠦ ᠪᠠᠢᠪᠠ᠃
10 ᠫᠧᠷᠰ᠂ ᠯᠦᠳ᠋ ᠪᠠ ᠫᠦᠲ᠋ᠴᠤᠳ ᠴᠡᠷᠢᠭ ᠤᠨ ᠴᠢᠨᠢ ᠳᠠᠢᠴᠢᠳ ᠪᠣᠯᠪᠠ᠃ ᠲᠡᠳᠡ ᠪᠠᠮᠪᠠᠢ᠂ ᠳᠤᠭᠤᠯᠠᠭᠠ ᠪᠠᠨ ᠬᠠᠨᠠᠨ ᠳᠤ ᠴᠢᠨᠢ ᠡᠯᠭᠦᠵᠦ᠂ ᠰᠦᠷ ᠢ ᠴᠢᠨᠢ ᠨᠡᠮᠡᠪᠡ᠃
11 ᠡᠷᠭᠢᠨ ᠲᠣᠭᠣᠷᠢᠨ ᠤ ᠴᠢᠨᠢ ᠬᠡᠷᠡᠮ ᠳᠡᠭᠡᠷᠡ ᠴᠢᠨᠦ ᠴᠡᠷᠢᠭ ᠪᠣᠯᠣᠨ ᠠᠷᠸᠠᠳ᠋ᠴᠤᠳ ᠪᠠᠢᠵᠤ᠂ ᠴᠠᠮᠬᠠᠭ ᠲᠤ ᠴᠢᠨᠢ ᠭᠠᠮᠠᠳ᠋ᠴᠤᠳ ᠪᠠᠢᠪᠠ᠃ ᠲᠡᠳᠡ ᠡᠷᠭᠢᠨ ᠲᠣᠭᠣᠷᠢᠨ ᠤ ᠴᠢᠨᠢ ᠬᠡᠷᠡᠮ ᠳᠡᠭᠡᠷᠡ ᠪᠠᠮᠪᠠᠢ ᠨᠤᠭᠤᠳ ᠢᠶᠠᠨ ᠡᠯᠭᠦᠵᠦ᠂ ᠦᠵᠡᠰᠬᠦᠯᠡᠩ ᠢ ᠴᠢᠨᠢ ᠲᠡᠭᠦᠯᠳᠡᠷᠵᠢᠭᠦᠯᠪᠡ᠃
12 ᠴᠢ ᠡᠯᠪᠡᠭ ᠳᠡᠯᠪᠡᠭ ᠲᠥᠷᠥᠯ ᠪᠦᠷᠢ ᠶᠢᠨ ᠡᠳ᠋ ᠪᠠᠶᠠᠯᠢᠭ ᠲᠠᠢ ᠤᠴᠢᠷ ᠠᠴᠠ ᠲᠠᠷᠱᠢᠱ ᠴᠢᠮᠠ ᠲᠠᠢ ᠬᠤᠳᠠᠯᠳᠤᠭᠠ ᠬᠢᠵᠦ ᠪᠠᠢᠪᠠ᠃ ᠲᠡᠳᠡ ᠴᠢᠨᠦ ᠪᠠᠷᠠᠭᠠ ᠶᠢ ᠮᠥᠩᠭᠥ᠂ ᠲᠡᠮᠦᠷ᠂ ᠴᠠᠭᠠᠨ ᠲᠤᠭᠤᠯᠭᠠ᠂ ᠬᠠᠷᠠ ᠲᠤᠭᠤᠯᠭᠠ ᠪᠠᠷ ᠰᠣᠯᠢᠳᠠᠭ ᠪᠠᠢᠪᠠ᠃ 13 ᠶᠠᠪᠠᠨ᠂ ᠲᠦᠪᠠᠯ᠂ ᠮᠧᠱᠧᠺ ᠨᠠᠷ ᠴᠤ ᠴᠢᠮᠠ ᠲᠠᠢ ᠠᠷᠠᠯᠵᠢᠶᠠ ᠬᠢᠵᠦ ᠪᠠᠢᠭᠰᠠᠨ᠃ ᠲᠡᠳᠡ ᠴᠢᠨᠦ ᠡᠳ᠋ ᠪᠠᠷᠠᠭᠠ ᠶᠢ ᠪᠣᠭᠣᠯ 14 ᠪᠣᠯᠣᠨ ᠬᠦᠷᠡᠯ ᠬᠡᠷᠡᠭᠰᠡᠯ ᠢᠶᠡᠷ ᠰᠣᠯᠢᠵᠤ ᠪᠠᠢᠪᠠ᠃ 14 ᠪᠧᠲ ᠲᠣᠭᠠᠷᠮᠠ ᠶᠢᠨ ᠬᠢᠨ ᠡᠳ᠋ ᠪᠠᠷᠠᠭᠠ ᠶᠢ ᠴᠢᠨᠢ ᠮᠣᠷᠢ᠂ ᠳᠠᠢᠨ ᠤ ᠮᠣᠷᠢ᠂ ᠡᠯᠵᠢᠭᠡ ᠪᠡᠷ ᠰᠣᠯᠢᠵᠤ ᠪᠠᠢᠪᠠ᠃ 15 ᠳ᠋ᠧᠳᠠᠨ ᠤ ᠬᠢᠨ ᠴᠢᠮᠠ ᠲᠠᠢ ᠠᠷᠠᠯᠵᠢᠶᠠ ᠬᠢᠵᠦ ᠪᠠᠢᠭᠰᠠᠨ᠂ ᠣᠯᠠᠨ ᠠᠷᠠᠯ ᠤᠨ ᠬᠢᠨ ᠴᠤ ᠴᠢᠨᠦ ᠬᠤᠳᠠᠯᠳᠤᠨ ᠠᠪᠤᠭᠴᠢ ᠪᠠᠢᠭᠰᠠᠨ᠃ ᠲᠡᠳᠡ ᠵᠠᠭᠠᠨ ᠤ ᠶᠠᠰᠤ᠂ ᠬᠠᠷᠠ ᠮᠣᠳᠣ ᠶᠢ ᠲᠥᠯᠥᠪᠥᠷᠢ ᠪᠣᠯᠭᠠᠨ ᠴᠢᠮᠠ ᠳᠤ ᠠᠪᠴᠢᠷᠠᠳᠠᠭ ᠪᠠᠢᠪᠠ᠃ 16 ᠴᠢ ᠡᠯᠪᠡᠭ ᠪᠠᠷᠠᠭᠠ ᠲᠠᠢ ᠤᠴᠢᠷ ᠠᠴᠠ ᠠᠷᠠᠮ ᠴᠢᠮᠠ ᠲᠠᠢ ᠬᠤᠳᠠᠯᠳᠤᠭᠠ ᠬᠢᠵᠦ ᠪᠠᠢᠪᠠ᠃ ᠲᠡᠳᠡ ᠪᠠᠷᠠᠭᠠ ᠶᠢ ᠴᠢᠨᠢ ᠣᠭ᠍ᠶᠤ᠂ ᠨᠢᠯ ᠶᠠᠭᠠᠨ ᠥᠩᠭᠡ ᠶᠢᠨ ᠪᠥᠰ᠂ ᠬᠠᠳᠬᠤᠮᠠᠯ᠂ ᠨᠠᠷᠢᠨ ᠮᠠᠭᠠᠯᠢᠩ᠋ᠭᠤ᠂ ᠱᠢᠷᠦ᠂ ᠪᠠᠳᠮᠠᠷᠠᠭᠠ ᠪᠠᠷ ᠰᠣᠯᠢᠳᠠᠭ ᠪᠠᠢᠪᠠ᠃ 17 ᠶᠦᠳᠠ ᠪᠠ ᠢᠰᠷᠧᠯ ᠴᠢᠮᠠ ᠲᠠᠢ ᠠᠷᠠᠯᠵᠢᠶᠠ ᠬᠢᠵᠦ ᠪᠠᠢᠭᠰᠠᠨ᠃ ᠲᠡᠳᠡ ᠴᠢᠨᠦ ᠪᠠᠷᠠᠭᠠ ᠶᠢ ᠮᠢᠨᠢᠲ ᠤᠨ ᠪᠤᠭᠤᠳᠠᠢ᠂ ᠪᠣᠣᠪᠣ᠂ ᠵᠥᠭᠡᠢ ᠶᠢᠨ ᠪᠠᠯ᠂ ᠲᠣᠰᠣ ᠪᠣᠯᠣᠨ ᠭᠠᠪᠤᠷ ᠢᠶᠠᠷ ᠰᠣᠯᠢᠵᠤ ᠪᠠᠢᠪᠠ᠃ 18 ᠴᠢ ᠣᠯᠠᠨ ᠪᠠᠷᠠᠭᠠ ᠲᠠᠢ᠂ ᠡᠯᠪᠡᠭ ᠳᠡᠯᠪᠡᠭ ᠲᠥᠷᠥᠯ ᠪᠦᠷᠢ ᠶᠢᠨ ᠡᠳ᠋ ᠪᠠᠶᠠᠯᠢᠭ ᠲᠠᠢ ᠤᠴᠢᠷ ᠠᠴᠠ ᠳ᠋ᠠᠮᠠᠰᠺᠦ᠋ᠰ ᠤᠨ ᠬᠢᠨ ᠾᠧᠯᠪᠣᠨ ᠤ ᠳᠠᠷᠠᠰᠤ᠂ ᠽᠠᠬᠠᠷ ᠤᠨ ᠨᠣᠣᠰᠣ ᠪᠠᠷ ᠴᠢᠮᠠ ᠲᠠᠢ ᠬᠤᠳᠠᠯᠳᠤᠭᠠ ᠬᠢᠵᠦ ᠪᠠᠢᠪᠠ᠃ 19 ᠳ᠋ᠠᠨᠴᠤᠳ ᠪᠠ ᠦᠽᠠᠯ ᠤᠨ ᠭᠷᠧᠭᠴᠦᠳ ᠴᠤ ᠴᠢᠨᠦ ᠡᠳ᠋ ᠪᠠᠷᠠᠭᠠ ᠶᠢ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠭᠰᠠᠨ᠃ ᠲᠡᠳᠡ ᠴᠢᠨᠦ ᠪᠠᠷᠠᠭᠠ ᠶᠢ ᠰᠢᠷᠡᠮᠦ᠂ ᠭᠠᠪᠢᠷᠠ ᠪᠣᠯᠣᠨ ᠨᠢᠰᠢᠩᠭᠦ ᠪᠡᠷ ᠰᠣᠯᠢᠵᠤ ᠪᠠᠢᠪᠠ᠃ 20 ᠳ᠋ᠧᠳᠠᠨ ᠡᠮᠡᠭᠡᠯ ᠦᠨ ᠲᠣᠬᠣᠮ ᠢᠶᠠᠷ ᠴᠢᠮᠠ ᠲᠠᠢ ᠬᠤᠳᠠᠯᠳᠤᠭᠠ ᠬᠢᠵᠦ ᠪᠠᠢᠪᠠ᠃ 21 ᠠᠷᠠᠪ ᠪᠠ ᠺᠧᠳᠠᠷ ᠤᠨ ᠬᠠᠮᠤᠭ ᠨᠣᠶᠠᠨ ᠴᠤ ᠴᠢᠨᠦ ᠬᠤᠳᠠᠯᠳᠤᠨ ᠠᠪᠤᠭᠴᠢ ᠪᠣᠯᠵᠤ᠂ ᠴᠢᠮᠠ ᠲᠠᠢ ᠬᠤᠷᠠᠭᠠ᠂ ᠬᠤᠴᠠ ᠪᠣᠯᠣᠨ ᠢᠮᠠᠭᠠ ᠪᠠᠷ ᠬᠤᠳᠠᠯᠳᠤᠭᠠ ᠬᠢᠵᠦ ᠪᠠᠢᠯᠠ᠃ 22 ᠱᠧᠪᠠ ᠪᠠ ᠷᠠᠮᠠ ᠶᠢᠨ ᠬᠤᠳᠠᠯᠳᠤᠭᠠᠴᠢᠳ ᠴᠢᠮᠠ ᠲᠠᠢ ᠠᠷᠠᠯᠵᠢᠶᠠ ᠬᠢᠵᠦ ᠪᠠᠢᠭᠰᠠᠨ᠃ ᠲᠡᠳᠡ ᠴᠢᠨᠦ ᠪᠠᠷᠠᠭᠠ ᠶᠢ ᠪᠦᠬᠦ ᠲᠥᠷᠥᠯ ᠦᠨ ᠦᠨᠦᠷᠲᠡᠨ ᠦ ᠳᠡᠭᠡᠳᠦ ᠪᠡᠷ᠂ ᠪᠦᠬᠦ ᠲᠥᠷᠥᠯ ᠦᠨ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠪᠠ ᠠᠯᠲᠠ ᠪᠠᠷ ᠰᠣᠯᠢᠵᠤ ᠪᠠᠢᠭᠰᠠᠨ᠃ 23 ᠾᠠᠷᠠᠨ᠂ ᠺᠠᠨᠧ᠂ ᠡᠳᠧᠨ᠂ ᠱᠧᠪᠠ ᠶᠢᠨ ᠬᠤᠳᠠᠯᠳᠤᠭᠠᠴᠢᠳ᠂ ᠠᠱᠦ᠋ᠷ ᠪᠠ ᠺᠢᠯᠮᠠᠳ᠋ ᠲᠤ ᠴᠤ ᠴᠢᠮᠠ ᠲᠠᠢ ᠠᠷᠠᠯᠵᠢᠶᠠ ᠬᠢᠵᠦ ᠪᠠᠢᠪᠠ᠃ 24 ᠲᠡᠳᠡ ᠭᠣᠶᠣ ᠡᠳ᠋ ᠪᠠᠷᠠᠭᠠ᠂ ᠲᠤᠬᠠᠢᠯᠠᠪᠠᠯ ᠬᠥᠬᠡ ᠥᠩᠭᠡ ᠶᠢᠨ ᠬᠤᠪᠴᠠᠰᠤ᠂ ᠤᠷᠠᠨ ᠬᠠᠳᠬᠤᠮᠠᠯ᠂ ᠡᠷᠢᠶᠡᠨ ᠬᠡᠪᠢᠰ᠂ ᠴᠢᠩᠭ᠍ᠠ ᠲᠠᠮᠤᠭᠰᠠᠨ ᠣᠯᠣᠰᠣ ᠪᠠᠷ ᠴᠢᠨᠦ ᠵᠠᠬᠠ ᠵᠡᠭᠡᠯᠢ ᠳᠤ ᠠᠷᠠᠯᠵᠢᠶᠠ ᠬᠢᠵᠦ ᠪᠠᠢᠪᠠ᠃ 25 ᠲᠠᠷᠱᠢᠱ ᠤᠨ ᠣᠩ᠋ᠭᠣᠴᠠ ᠨᠤᠭᠤᠳ ᠴᠢᠨᠦ ᠪᠠᠷᠠᠭᠠ ᠶᠢ ᠵᠥᠭᠡᠭᠡᠵᠦ ᠪᠠᠢᠪᠠ ᠳᠠᠯᠠᠢ ᠶᠢᠨ ᠵᠢᠷᠦᠬᠡ ᠴᠢᠨᠦ ᠬᠦᠨᠳᠦ ᠠᠴᠢᠶᠠ ᠪᠠᠷ ᠳᠦᠭᠦᠷᠪᠡ᠃
26 ᠳᠠᠯᠠᠢ ᠶᠢᠨ ᠭᠦᠨ ᠳᠦ ᠰᠡᠯᠢᠭᠦᠷᠴᠢᠳ ᠴᠢᠮᠠᠶᠢ ᠬᠦᠷᠭᠡᠬᠦ ᠳᠦ ᠳᠣᠷᠣᠨᠠ ᠶᠢᠨ ᠰᠠᠯᠬᠢ ᠴᠢᠮᠠᠶᠢ ᠳᠠᠯᠠᠢ ᠶᠢᠨ ᠵᠢᠷᠦᠬᠡᠨ ᠳᠦ ᠴᠣᠬᠢᠵᠤ ᠡᠪᠳᠡᠪᠡ᠃
27 ᠴᠢᠨᠦ ᠰᠦᠢᠷᠡᠯ ᠦᠨ ᠡᠳᠦᠷ ᠲᠦ ᠴᠢᠨᠦ ᠪᠠᠶᠠᠯᠢᠭ᠂ ᠴᠢᠨᠦ ᠡᠳ᠋ ᠪᠠᠷᠠᠭᠠ ᠴᠢᠨᠦ ᠳᠠᠯᠠᠢᠴᠢᠳ᠂ ᠴᠢᠨᠦ ᠵᠠᠯᠠᠭᠤᠷᠴᠢᠳ᠂ ᠴᠢᠨᠦ ᠣᠩ᠋ᠭᠣᠴᠠᠨ ᠤ ᠵᠠᠪᠰᠠᠷ ᠢ ᠪᠥᠭᠯᠡᠭᠴᠢᠳ ᠴᠢᠨᠦ ᠬᠤᠳᠠᠯᠳᠤᠭᠠᠴᠢᠳ᠂ ᠴᠢᠨᠦ ᠳᠣᠲᠣᠷᠠᠬᠢ ᠪᠦᠬᠦ ᠳᠠᠢᠴᠢᠨ᠂ ᠴᠢᠨᠦ ᠳᠤᠮᠳᠠᠬᠢ ᠪᠦᠬᠦᠨ ᠳᠠᠯᠠᠢ ᠶᠢᠨ ᠵᠢᠷᠦᠬᠡᠨ ᠳᠦ ᠵᠢᠪᠬᠦ ᠪᠣᠯᠣᠨᠠ᠃
28 ᠵᠠᠯᠠᠭᠤᠷᠴᠢᠳ ᠤᠨ ᠴᠢᠨᠢ ᠬᠠᠰᠬᠢᠷᠬᠤ ᠳᠠᠭᠤᠨ ᠳᠤ ᠡᠷᠭᠢ ᠶᠢᠨ ᠪᠡᠯᠴᠢᠭᠡᠷ ᠳᠣᠷᠭᠢᠨᠠ᠃
29 ᠪᠦᠬᠦ ᠰᠡᠯᠢᠭᠦᠷᠴᠢᠨ ᠣᠩ᠋ᠭᠣᠴᠠ ᠪᠠᠨ ᠬᠠᠶᠠᠨᠠ᠂ ᠪᠦᠬᠦ ᠳᠠᠯᠠᠢᠴᠢᠨ ᠪᠠ ᠵᠠᠯᠠᠭᠤᠷᠴᠢᠨ ᠡᠷᠭᠢ ᠳᠡᠭᠡᠷᠡ ᠵᠣᠭᠰᠣᠨᠠ᠃
30 ᠲᠡᠳᠡ ᠴᠢᠨᠦ ᠲᠥᠯᠥᠭᠡ ᠳᠠᠭᠤ ᠪᠠᠨ ᠥᠨᠳᠥᠷᠰᠡᠭᠡᠨ ᠭᠠᠰᠢᠭᠤᠳᠠᠨ ᠤᠬᠢᠯᠠᠨᠠ ᠲᠣᠯᠣᠭᠠᠢ ᠳᠠᠭᠠᠨ ᠰᠢᠷᠣᠢ ᠰᠠᠴᠤᠨ᠂ ᠦᠨᠡᠰᠦᠨ ᠳᠡᠭᠡᠷᠡ ᠥᠩᠬᠥᠷᠢᠨᠠ᠃
31 ᠴᠢᠨᠦ ᠲᠥᠯᠥᠭᠡ ᠲᠡᠳᠡ ᠦᠰᠦ ᠪᠡᠨ ᠬᠤᠰᠤᠵᠤ᠂ ᠲᠠᠭᠠᠷ ᠨᠥᠮᠥᠷᠥᠨ ᠴᠢᠨᠦ ᠲᠥᠯᠥᠭᠡ ᠭᠠᠰᠢᠭᠤᠳᠠᠨ ᠰᠢᠨᠠᠯᠤᠭᠰᠠᠨ ᠰᠡᠳᠬᠢᠯ ᠢᠶᠠᠷ ᠤᠬᠢᠯᠠᠨᠠ᠃〉
32 ᠴᠢᠨᠦ ᠲᠥᠯᠥᠭᠡ ᠲᠡᠳᠡ ᠭᠠᠰᠢᠭᠤᠳᠠᠨ ᠤᠬᠢᠯᠠᠵᠤ᠂ ᠴᠢᠨᠦ ᠲᠤᠬᠠᠢ ᠭᠠᠰᠢᠭᠤᠳᠠᠯ ᠤᠨ ᠳᠠᠭᠤᠤ ᠳᠡᠪᠰᠢᠭᠦᠯᠦᠨ᠄ 〈ᠲᠠᠩᠭᠢᠰ ᠤᠨ ᠳᠤᠮᠳᠠ ᠬᠡᠨ ᠲᠢᠷ ᠮᠡᠲᠦ ᠰᠦᠢᠷᠡᠪᠡ︖
33 ᠡᠳ᠋ ᠪᠠᠷᠠᠭᠠ ᠪᠠᠨ ᠴᠢ ᠳᠠᠯᠠᠢ ᠤᠷᠤᠭᠤ ᠭᠠᠷᠭᠠᠵᠤ᠂ ᠣᠯᠠᠨ ᠦᠨᠳᠦᠰᠦᠲᠡᠨ ᠢ ᠴᠠᠳᠬᠠᠵᠤ ᠪᠠᠢᠭᠰᠠᠨ ᠡᠯᠪᠡᠭ ᠳᠡᠯᠪᠡᠭ ᠡᠳ᠋ ᠪᠠᠶᠠᠯᠢᠭ ᠢᠶᠠᠷ ᠢᠶᠠᠨ ᠴᠢ ᠶᠢᠷᠲᠢᠨᠴᠦ ᠶᠢᠨ ᠬᠠᠭᠠᠳ ᠢ ᠪᠠᠶᠠᠵᠢᠭᠤᠯᠵᠤ ᠪᠠᠢᠭᠰᠠᠨ᠃
34 ᠡᠳᠦᠭᠡ ᠴᠢ ᠲᠠᠩᠭᠢᠰ ᠤᠨ ᠭᠦᠨ ᠳᠦ ᠰᠦᠢᠷᠡᠬᠦ ᠳᠦ ᠡᠳ᠋ ᠪᠠᠷᠠᠭᠠ ᠪᠣᠯᠣᠨ ᠬᠠᠮᠲᠤ ᠪᠠᠢᠭᠰᠠᠳ ᠴᠢᠨᠢ ᠪᠦᠭᠦᠳᠡ ᠴᠢᠮᠠ ᠲᠠᠢ ᠬᠠᠮᠲᠤ ᠵᠢᠪᠪᠦᠪᠡ᠃
35 ᠡᠷᠭᠢ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠪᠦᠭᠦᠳᠡ ᠴᠢᠮᠠᠶᠢ ᠬᠠᠷᠠᠨ ᠰᠣᠴᠢᠨᠠ ᠶᠡᠬᠡᠳᠡ ᠠᠶᠤᠭᠰᠠᠨ ᠬᠠᠭᠠᠳ ᠨᠢᠭᠤᠷ ᠢᠶᠠᠨ ᠦᠷᠴᠢᠢᠯᠭᠡᠨᠡ᠃
36 ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠᠬᠢ ᠬᠤᠳᠠᠯᠳᠤᠭᠠᠴᠢᠳ ᠴᠢᠮᠠ ᠤᠷᠤᠭᠤ ᠢᠰᠭᠡᠷᠦᠨᠡ ᠴᠢ ᠠᠶᠤᠮᠰᠢᠭ ᠲᠠᠢ ᠪᠠᠷ ᠡᠴᠦᠰᠯᠡᠵᠦ᠂ ᠡᠭᠦᠷᠢᠳᠡ ᠠᠯᠠᠭᠠ ᠪᠣᠯᠣᠨᠠ〉》 ᠭᠡᠪᠡ᠃