ᠡᠽᠧᠺᠢᠶᠧᠯ ᠭᠤᠴᠢᠨ ᠨᠢᠭᠡ
ᠬᠤᠱᠢ ᠶᠢᠨ ᠦᠯᠢᠭᠡᠷᠯᠡᠯ
1 ᠠᠷᠪᠠᠨ ᠨᠢᠭᠡᠳᠡᠬᠢ ᠣᠨ ᠤ ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶᠢᠨ ᠨᠢᠭᠡᠨ ᠳᠦ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠨᠠᠳᠠ ᠳᠤ ᠢᠷᠡᠪᠡ᠄
2 《ᠬᠥᠮᠦᠨ ᠦ ᠬᠦᠦ ᠡ᠂ ᠶᠧᠵᠢᠫᠲ ᠤᠨ ᠬᠠᠭᠠᠨ ᠹᠠᠷᠠᠣ᠋ ᠪᠣᠯᠣᠨ ᠲᠡᠭᠦᠨ ᠦ ᠣᠯᠠᠨ ᠲᠦᠮᠡᠨ ᠳᠦ ᠶᠠᠷᠢ᠄ 〈ᠢᠷᠠᠭᠤ ᠠᠯᠳᠠᠷ ᠢᠶᠠᠷ ᠬᠡᠨ ᠴᠢᠮᠠ ᠲᠠᠢ ᠵᠡᠷᠭᠡᠴᠡᠬᠦ ᠪᠤᠢ︖
3 ᠠᠰᠢᠷᠢᠶᠠ ᠶᠢ ᠬᠠᠷᠠ᠂ ᠲᠡᠷᠡ ᠯᠧᠪᠠᠨᠣᠨ ᠤ ᠬᠤᠱᠢ ᠪᠠᠢᠭᠰᠠᠨ ᠣᠢ ᠮᠣᠳᠣ ᠶᠢ ᠰᠡᠭᠦᠳᠡᠷᠯᠡᠭᠦᠯᠳᠡᠭ᠌ ᠰᠠᠢᠬᠠᠨ ᠮᠥᠴᠢᠷ ᠤᠳ ᠲᠠᠢ ᠣᠷᠣᠢ ᠨᠢ ᠡᠭᠦᠯᠡᠨ ᠳᠦ ᠲᠤᠯᠤᠮᠠ ᠥᠨᠳᠥᠷ᠂
4 ᠤᠷᠤᠰᠬᠠᠯ ᠤᠳ ᠲᠡᠭᠦᠨ ᠦ ᠰᠠᠭᠤᠷᠢ ᠶᠢ ᠬᠦᠷᠢᠶᠡᠯᠡᠵᠦ ᠣᠢ ᠶᠢᠨ ᠪᠦᠬᠦ ᠮᠣᠳᠣ ᠤᠷᠤᠭᠤ ᠰᠠᠯᠪᠤᠷᠢᠯᠠᠨ ᠤᠷᠤᠰᠳᠠᠭ ᠪᠠᠢᠪᠠ᠃
5 ᠶᠡᠬᠡ ᠤᠰᠤ ᠲᠠᠢ ᠤᠴᠢᠷ ᠠᠴᠠ ᠲᠡᠷᠡ ᠲᠠᠯᠠ ᠶᠢᠨ ᠪᠤᠰᠤᠳ ᠮᠣᠳᠣᠳ ᠠᠴᠠ ᠥᠨᠳᠥᠷ ᠪᠣᠯᠵᠤ ᠰᠠᠯᠠᠭᠠ ᠨᠢ ᠣᠯᠠᠰᠢᠷᠠᠵᠤ ᠮᠥᠴᠢᠷ ᠤᠳ ᠨᠢ ᠤᠷᠲᠤᠰᠪᠠ᠃
6 ᠰᠠᠯᠠᠭᠠᠨ ᠳᠤᠨᠢ ᠣᠭᠲᠠᠷᠭᠤᠢ ᠶᠢᠨ ᠪᠦᠬᠦ ᠰᠢᠪᠠᠭᠤ ᠡᠭᠦᠷᠯᠡᠵᠦ ᠮᠥᠴᠢᠷ ᠤᠳ ᠤᠨ ᠬᠢᠨᠢ ᠳᠣᠣᠷᠠ ᠬᠡᠭᠡᠷᠡ ᠶᠢᠨ ᠪᠦᠬᠦ ᠠᠷᠢᠶᠠᠲᠠᠨ ᠦᠷᠡᠵᠢᠨ ᠰᠡᠭᠦᠳᠡᠷ ᠲᠤᠨᠢ ᠪᠦᠬᠦ ᠬᠦᠴᠦᠲᠦ ᠭᠦᠷᠦᠨ ᠰᠠᠭᠤᠵᠠᠭᠠᠪᠠ᠃
7 ᠦᠨᠳᠦᠰᠦ ᠨᠢ ᠶᠡᠬᠡ ᠤᠰᠤᠨ ᠳᠤ ᠬᠦᠷᠦᠭᠰᠡᠨ ᠤᠴᠢᠷ ᠠᠴᠠ ᠮᠣᠳᠣ ᠨᠢ ᠲᠣᠮᠣ᠂ ᠮᠥᠴᠢᠷ ᠤᠳ ᠨᠢ ᠤᠷᠲᠤ᠂ ᠦᠵᠡᠰᠬᠦᠯᠡᠩ ᠲᠡᠢ ᠪᠠᠢᠯᠠ
8 ᠪᠤᠷᠬᠠᠨ ᠤ ᠴᠡᠴᠡᠷᠯᠢᠭ ᠤᠨ ᠬᠤᠱᠢ ᠨᠤᠭᠤᠳ ᠴᠤ ᠲᠡᠭᠦᠨ ᠡᠴᠡ ᠳᠠᠪᠠᠬᠤ ᠦᠭᠡᠢ ᠨᠠᠷᠠᠰᠤ ᠨᠤᠭᠤᠳ ᠴᠤ ᠲᠡᠭᠦᠨ ᠦ ᠰᠠᠯᠠᠭᠠ ᠨᠤᠭᠤᠳ ᠲᠠᠢ ᠬᠠᠷᠢᠴᠠᠭᠤᠯᠤᠰᠢ ᠦᠭᠡᠢ ᠠᠭᠠᠷᠤ ᠮᠣᠳᠣ ᠴᠤ ᠲᠡᠭᠦᠨ ᠦ ᠮᠥᠴᠢᠷ ᠤᠳ ᠲᠠᠢ ᠠᠳᠠᠯᠢᠳᠬᠠᠰᠢ ᠦᠭᠡᠢ ᠪᠤᠷᠬᠠᠨ ᠤ ᠴᠡᠴᠡᠷᠯᠢᠭ ᠤᠨ ᠠᠯᠢ ᠴᠤ ᠮᠣᠳᠣ ᠭᠤᠸᠠ ᠰᠠᠢᠬᠠᠨ ᠢᠶᠠᠷ ᠢᠶᠠᠨ ᠲᠡᠭᠦᠨ ᠲᠡᠢ ᠬᠠᠷᠢᠴᠠᠭᠤᠯᠤᠰᠢ ᠦᠭᠡᠢ ᠪᠠᠢᠪᠠ᠃
9 ᠪᠢ ᠮᠥᠴᠢᠷ ᠢ ᠨᠢ ᠣᠯᠠᠰᠢᠷᠠᠭᠤᠯᠵᠤ᠂ ᠲᠡᠭᠦᠨ ᠢ ᠦᠵᠡᠰᠬᠦᠯᠡᠩ ᠲᠡᠢ ᠪᠣᠯᠭᠠᠬᠤ ᠳᠤ ᠪᠤᠷᠬᠠᠨ ᠤ ᠴᠡᠴᠡᠷᠯᠢᠭ ᠪᠣᠯᠬᠤ ᠡᠳᠧᠨ ᠤ ᠬᠠᠮᠤᠭ ᠮᠣᠳᠣ ᠲᠡᠭᠦᠨ ᠲᠡᠢ ᠠᠲᠠᠭᠠᠷᠬᠠᠪᠠ᠃〉》
10 ᠲᠡᠢᠮᠦ ᠡᠴᠡ ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠡᠷᠡ ᠪᠡᠷ ᠥᠨᠳᠥᠷ ᠪᠣᠯᠵᠤ᠂ ᠣᠷᠣᠢ ᠨᠢ ᠡᠭᠦᠯᠡᠨ ᠳᠦ ᠲᠤᠯᠬᠤ ᠳᠤ᠂ ᠲᠡᠭᠦᠨ ᠦ ᠰᠡᠳᠬᠢᠯ ᠥᠨᠳᠥᠷ ᠢᠶᠡᠷ ᠢᠶᠠᠨ ᠪᠠᠷᠳᠠᠮᠨᠠᠭᠰᠠᠨ᠃ 11 ᠲᠡᠢᠮᠦ ᠡᠴᠡ ᠪᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠦᠴᠦᠲᠡᠨ ᠦ ᠭᠠᠷ ᠲᠤ ᠲᠡᠭᠦᠨ ᠢ ᠲᠤᠰᠢᠶᠠᠭᠰᠠᠨ᠂ ᠲᠡᠷᠡ ᠬᠣᠷᠣᠨ ᠮᠠᠭᠤ ᠦᠢᠯᠡᠰ ᠦᠨ ᠬᠢᠨᠢ ᠳᠠᠭᠠᠤ ᠲᠡᠭᠦᠨ ᠳᠦ ᠭᠦᠢᠴᠡᠳ ᠦᠢᠯᠡᠳᠦᠭᠰᠡᠨ᠂ ᠪᠢ ᠲᠡᠭᠦᠨ ᠢ ᠬᠥᠭᠡᠭᠡᠭᠰᠡᠨ᠃ 12 ᠬᠠᠷᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠠᠮᠤᠭ ᠤᠨ ᠬᠡᠷᠴᠡᠭᠡᠢ ᠨᠢ ᠲᠡᠭᠦᠨ ᠢ ᠲᠠᠰᠤᠯᠤᠨ ᠬᠠᠶᠠᠪᠠ᠃ ᠰᠠᠯᠠᠭᠠ ᠨᠤᠭᠤᠳ ᠨᠢ ᠬᠠᠮᠤᠭ ᠠᠭᠤᠯᠠ ᠬᠥᠨᠳᠡᠢ ᠪᠠᠷ ᠤᠨᠠᠨ᠂ ᠮᠥᠴᠢᠷ ᠤᠳ ᠨᠢ ᠭᠠᠵᠠᠷ ᠤᠨ ᠬᠠᠮᠤᠭ ᠭᠣᠷᠣᠬᠠ ᠶᠢᠨ ᠳᠡᠷᠭᠡᠳᠡ ᠬᠤᠭᠤᠯᠤᠭᠳᠠᠵᠠᠢ᠃ ᠭᠠᠵᠠᠷ ᠤᠨ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠡᠨᠡ ᠮᠣᠳᠣᠨ ᠤ ᠰᠡᠭᠦᠳᠡᠷ ᠳᠣᠣᠷᠠ ᠠᠴᠠ ᠭᠠᠷᠴᠤ᠂ ᠲᠡᠭᠦᠨ ᠢ ᠣᠷᠬᠢᠪᠠ᠂ 13 ᠣᠭᠲᠠᠷᠭᠤᠢ ᠶᠢᠨ ᠬᠠᠮᠤᠭ ᠰᠢᠪᠠᠭᠤ ᠬᠤᠭᠤᠷᠬᠠᠢ ᠳᠡᠭᠡᠷᠡ ᠨᠢ ᠦᠯᠡᠳᠡᠵᠦ᠂ ᠬᠡᠭᠡᠷᠡ ᠶᠢᠨ ᠪᠦᠬᠦ ᠠᠷᠢᠶᠠᠲᠠᠨ ᠤᠨᠠᠭᠰᠠᠨ ᠰᠠᠯᠠᠭᠠᠨ ᠳᠡᠭᠡᠷᠡ ᠨᠢ ᠪᠠᠢᠪᠠ᠃ 14 ᠲᠡᠢᠨ ᠬᠦ ᠤᠰᠤᠨ ᠤ ᠳᠡᠷᠭᠡᠳᠡᠬᠢ ᠪᠤᠰᠤᠳ ᠮᠣᠳᠣᠳ ᠣᠷᠣᠢ ᠪᠠᠨ ᠡᠭᠦᠯᠡᠨ ᠳᠦ ᠲᠤᠯᠭᠠᠬᠤ ᠦᠭᠡᠢ᠂ ᠥᠨᠳᠥᠷ ᠢᠶᠡᠷ ᠢᠶᠠᠨ ᠪᠠᠷᠳᠠᠮᠨᠠᠬᠤ ᠦᠭᠡᠢ᠂ ᠰᠠᠢᠲᠤᠷ ᠤᠰᠤᠯᠠᠭᠳᠠᠳᠠᠭ ᠥᠭᠡᠷᠡ ᠮᠣᠳᠣ ᠴᠤ ᠲᠡᠢᠮᠦ ᠥᠨᠳᠥᠷ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠳᠡ ᠨᠦᠬᠡ ᠤᠷᠤᠭᠤ ᠪᠠᠭᠤᠬᠤ ᠬᠥᠮᠦᠰ ᠲᠡᠢ ᠬᠠᠮᠲᠤ ᠪᠠᠷ ᠪᠦᠭᠦᠳᠡ ᠦᠬᠦᠯ ᠳᠦ᠂ ᠳᠣᠣᠷᠠᠬᠢ ᠭᠠᠵᠠᠷ ᠤᠷᠤᠭᠤ ᠲᠤᠰᠢᠶᠠᠭᠳᠠᠭᠰᠠᠨ ᠪᠢᠯᠡ᠃》
15 ᠡᠵᠡᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠬᠤᠱᠢ ᠮᠣᠳᠣ ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠤᠨᠠᠬᠤ ᠡᠳᠦᠷ ᠪᠢ ᠭᠦᠨ ᠤᠰᠤ ᠶᠢ ᠪᠢᠲᠡᠭᠦᠮᠵᠢᠯᠡᠵᠦ᠂ ᠤᠷᠤᠰᠬᠠᠯ ᠢ ᠨᠢ ᠬᠠᠭᠠᠵᠤ᠂ ᠶᠡᠬᠡ ᠤᠰᠤ ᠶᠢ ᠨᠢ ᠵᠣᠭᠰᠣᠭᠠᠭᠰᠠᠨ᠃ ᠲᠡᠭᠦᠨ ᠦ ᠲᠥᠯᠥᠭᠡ ᠪᠢ ᠯᠧᠪᠠᠨᠣᠨ ᠢ ᠬᠠᠷᠠᠩ᠋ᠭᠤᠢᠯᠠᠭᠤᠯᠵᠤ᠂ ᠬᠡᠭᠡᠷᠡ ᠲᠠᠯᠠ ᠶᠢᠨ ᠬᠠᠮᠤᠭ ᠮᠣᠳᠣ ᠶᠢ ᠬᠠᠲᠠᠭᠠᠨᠠ᠃ 16 ᠪᠢ ᠲᠡᠭᠦᠨ ᠢ ᠨᠦᠬᠡᠨ ᠳᠦ ᠤᠨᠠᠭᠰᠠᠳ ᠲᠠᠢ ᠬᠠᠮᠲᠤ ᠦᠬᠦᠭᠰᠡᠳ ᠦᠨ ᠣᠷᠣᠨ ᠤᠷᠤᠭᠤ ᠬᠠᠶᠠᠬᠤ ᠳᠠᠭᠠᠨ ᠲᠡᠭᠦᠨ ᠦ ᠤᠨᠠᠬᠤ ᠳᠠᠭᠤ ᠪᠠᠷ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠴᠡᠴᠡᠷᠡᠭᠦᠯᠪᠡ᠃ ᠲᠡᠭᠡᠬᠦ ᠳᠦ᠂ ᠡᠳᠧᠨ ᠤ ᠰᠠᠢᠨ ᠤᠰᠤᠯᠠᠭᠳᠠᠳᠠᠭ ᠬᠠᠮᠤᠭ ᠮᠣᠳᠣ᠂ ᠯᠧᠪᠠᠨᠣᠨ ᠤ ᠰᠢᠯᠢᠮᠡᠯ ᠰᠠᠢᠨ ᠮᠣᠳᠣᠳ ᠭᠠᠵᠠᠷ ᠳᠣᠣᠷᠠ ᠲᠠᠢᠳᠬᠤᠷᠠᠪᠠ᠃ 17 ᠬᠤᠱᠢ ᠮᠣᠳᠣᠨ ᠤ ᠰᠡᠭᠦᠳᠡᠷ ᠲᠦ ᠰᠠᠭᠤᠵᠤ ᠪᠠᠢᠭᠰᠠᠨ ᠬᠣᠯᠪᠣᠭᠠᠲᠠᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠨᠢ ᠴᠤ ᠲᠡᠭᠦᠨ ᠲᠡᠢ ᠬᠠᠮᠲᠤ ᠦᠬᠦᠭᠰᠡᠳ ᠦᠨ ᠣᠷᠣᠨ ᠤᠷᠤᠭᠤ ᠤᠨᠠᠵᠤ᠂ ᠢᠯᠳᠦᠨ ᠳᠦ ᠠᠯᠠᠭᠳᠠᠭᠰᠠᠳ ᠤᠷᠤᠭᠤ ᠣᠴᠢᠭᠰᠠᠨ ᠪᠢᠯᠡ᠃ 18 ᠡᠳᠧᠨ ᠤ ᠮᠣᠳᠣᠳ ᠤᠨ ᠳᠤᠮᠳᠠ ᠠᠴᠠ ᠠᠯᠢ ᠮᠣᠳᠣ ᠨᠢ ᠰᠦᠷ ᠪᠠ ᠵᠢᠪᠬᠤᠯᠠᠩ ᠤᠨ ᠲᠠᠯᠠ ᠪᠠᠷ ᠴᠢᠮᠠ ᠲᠠᠢ ᠠᠳᠠᠯᠢ ᠪᠠᠢᠪᠠ︖ ᠬᠠᠷᠢᠨ ᠴᠢ ᠪᠠᠰᠠ ᠡᠳᠧᠨ ᠤ ᠮᠣᠳᠣᠳ ᠲᠠᠢ ᠬᠠᠮᠲᠤ ᠭᠠᠵᠠᠷ ᠤᠨ ᠳᠣᠣᠷᠠ ᠤᠨᠠᠵᠤ᠂ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠬᠥᠮᠦᠰ ᠦᠨ ᠳᠤᠮᠳᠠ᠂ ᠢᠯᠳᠦᠨ ᠳᠦ ᠠᠯᠠᠭᠳᠠᠭᠰᠠᠳ ᠲᠠᠢ ᠬᠠᠮᠲᠤ ᠲᠡᠨᠳᠡ ᠬᠡᠪᠲᠡᠬᠦ ᠪᠣᠯᠣᠨᠠ᠃ ᠹᠠᠷᠠᠣ᠋ ᠪᠣᠯᠣᠨ ᠲᠡᠭᠦᠨ ᠦ ᠬᠠᠮᠤᠭ ᠣᠯᠠᠨ ᠲᠦᠮᠡᠨ ᠲᠡᠢᠮᠦ ᠪᠣᠯᠣᠨᠠ᠃》 ᠡᠵᠡᠨ ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠃