ᠡᠽᠧᠺᠢᠶᠧᠯ ᠶᠢᠰᠦ
ᠰᠢᠲᠦᠭᠡᠨ ᠰᠢᠲᠦᠭᠴᠢᠳ ᠰᠢᠳᠬᠡᠭᠳᠡᠪᠡ
1 ᠲᠡᠷᠡ ᠮᠢᠨᠦ ᠴᠢᠬᠢᠨ ᠳᠤ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠡᠨᠡ ᠬᠣᠲᠠ ᠶᠢ ᠰᠦᠢᠳᠬᠡᠭᠴᠢᠳ ᠡ᠂ ᠬᠥᠮᠦᠨ ᠪᠦᠷᠢ ᠵᠡᠪᠰᠡᠭ ᠢᠶᠡᠨ ᠭᠠᠷ ᠲᠠᠭᠠᠨ ᠪᠠᠷᠢᠨ ᠭᠠᠷᠴᠤ ᠢᠷᠡ》 ᠭᠡᠵᠦ ᠠᠢᠯᠠᠳᠪᠠ᠃ 2 ᠲᠡᠭᠡᠲᠡᠯᠡ ᠵᠢᠷᠭᠤᠭᠠᠨ ᠡᠷᠡ ᠲᠤᠰ ᠪᠦᠷᠢ ᠭᠠᠷ ᠲᠠᠭᠠᠨ ᠠᠯᠠᠬᠤ ᠵᠡᠪᠰᠡᠭ ᠪᠠᠷᠢᠨ ᠬᠣᠢᠰᠢ ᠪᠠᠨ ᠬᠠᠷᠠᠭᠰᠠᠨ ᠳᠡᠭᠡᠳᠦ ᠬᠠᠭᠠᠯᠭᠠ ᠶᠢᠨ ᠵᠦᠭ ᠡᠴᠡ ᠢᠷᠡᠵᠦ ᠪᠠᠢᠯᠠ᠃ ᠲᠡᠳᠡᠨ ᠦ ᠨᠢᠭᠡ ᠨᠢ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠲᠠᠰᠢᠶᠠᠨ ᠳᠠᠭᠠᠨ ᠪᠢᠴᠢᠭ ᠪᠡᠬᠡ ᠶᠢᠨ ᠰᠠᠪᠠ ᠵᠡᠭᠦᠭᠰᠡᠨ ᠪᠠᠢᠪᠠ᠃ ᠲᠡᠳᠡ ᠣᠷᠣᠵᠤ ᠢᠷᠡᠭᠡᠳ᠂ ᠬᠦᠷᠡᠯ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠳᠡᠷᠭᠡᠳᠡ ᠵᠣᠭᠰᠣᠪᠠ᠃
3 ᠺᠧᠷᠣᠪ ᠤᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠴᠣᠭ ᠵᠢᠪᠬᠤᠯᠠᠩ ᠳᠡᠭᠡᠭᠰᠢ ᠬᠥᠭᠡᠷᠴᠦ᠂ ᠥᠷᠭᠥᠭᠡᠨ ᠦ ᠪᠣᠱᠣᠭᠠᠨ ᠳᠤ ᠢᠷᠡᠪᠡ᠃ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠲᠠᠰᠢᠶᠠᠨ ᠳᠠᠭᠠᠨ ᠪᠢᠴᠢᠭ ᠪᠡᠬᠡ ᠶᠢᠨ ᠰᠠᠪᠠ ᠵᠡᠭᠦᠭᠰᠡᠨ ᠨᠥᠭᠥᠭᠡ ᠬᠥᠮᠦᠨ ᠢ ᠶᠣᠬᠣᠸᠠ ᠳᠠᠭᠤᠳᠠᠨ᠂ 4 ᠲᠡᠭᠦᠨ ᠳᠦ᠄ 《ᠴᠢ ᠶᠧᠷᠦ᠋ᠰᠠᠯᠧᠮ ᠬᠣᠲᠠ ᠶᠢᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ᠂ ᠬᠣᠲᠠ ᠳᠣᠲᠣᠷᠠ ᠪᠣᠯᠵᠤ ᠪᠤᠢ ᠬᠠᠮᠤᠭ ᠵᠢᠭᠰᠢᠭᠦᠷᠢᠲᠦ ᠶᠠᠪᠤᠳᠠᠯ ᠤᠨ ᠤᠴᠢᠷ ᠲᠤ ᠰᠢᠨᠠᠯᠤᠨ ᠭᠠᠰᠢᠭᠤᠳᠠᠵᠤ ᠪᠤᠢ ᠬᠥᠮᠦᠰ ᠦᠨ ᠮᠠᠩᠨᠠᠢ ᠳᠡᠭᠡᠷᠡ ᠲᠡᠮᠳᠡᠭ ᠲᠠᠯᠪᠢ》 ᠭᠡᠪᠡ᠃ 5 ᠲᠡᠭᠡᠭᠡᠳ ᠪᠢ ᠰᠣᠨᠣᠰᠴᠤ ᠪᠠᠢᠬᠤ ᠳᠤ᠂ ᠲᠡᠷᠡ ᠮᠥᠨ ᠪᠤᠰᠤᠳ ᠡᠷᠡᠴᠦᠳ ᠲᠦ ᠠᠢᠯᠠᠳᠤᠨ᠄ 《ᠲᠠ ᠨᠠᠷ ᠲᠡᠭᠦᠨ ᠦ ᠠᠷᠤ ᠠᠴᠠ ᠳᠠᠭᠠᠨ ᠬᠣᠲᠠ ᠶᠢᠨ ᠬᠢᠨ ᠤ ᠳᠤᠮᠳᠠᠭᠤᠷ ᠶᠠᠪᠤᠵᠤ᠂ ᠲᠡᠳᠡᠨ ᠢ ᠴᠣᠬᠢ᠃ ᠲᠠ ᠨᠠᠷ ᠥᠷᠥ ᠡᠪᠡᠳᠦᠨ ᠬᠠᠷᠠᠬᠤ ᠬᠡᠷᠡᠭ ᠦᠭᠡᠢ᠂ ᠥᠷᠥᠰᠢᠶᠡᠬᠦ ᠬᠡᠷᠡᠭ ᠦᠭᠡᠢ᠃ 6 ᠬᠥᠭᠰᠢᠨ ᠵᠠᠯᠠᠭᠤ ᠢᠯᠭᠠᠯ ᠦᠭᠡᠢ᠂ ᠥᠬᠢᠳ᠂ ᠪᠠᠭᠠᠴᠤᠳ ᠪᠠ ᠡᠬᠡᠨᠡᠷ ᠤᠳ ᠢ ᠴᠤ ᠪᠦᠷᠢᠮᠦᠰᠦᠨ ᠤᠰᠠᠳᠬᠠ᠂ ᠬᠠᠷᠢᠨ ᠲᠡᠮᠳᠡᠭ ᠲᠡᠢ ᠬᠥᠮᠦᠰ ᠲᠦ ᠪᠦᠦ ᠬᠦᠷ᠃ ᠲᠠ ᠨᠠᠷ ᠮᠢᠨᠦ ᠠᠷᠢᠭᠤᠨ ᠭᠠᠵᠠᠷ ᠠᠴᠠ ᠡᠬᠢᠯᠡᠭᠲᠦᠨ》 ᠭᠡᠬᠦ ᠳᠦ᠂ ᠲᠡᠳᠡ ᠥᠷᠭᠥᠭᠡᠨ ᠦ ᠡᠮᠦᠨᠡ ᠪᠠᠢᠭᠰᠠᠨ ᠠᠬᠠᠮᠠᠳ ᠤᠳ ᠠᠴᠠ ᠡᠬᠢᠯᠡᠪᠡ᠃ 7 ᠲᠡᠷᠡ ᠪᠠᠰᠠ᠄ 《ᠥᠷᠭᠥᠭᠡ ᠶᠢ ᠪᠤᠵᠠᠷᠯᠠ᠂ ᠬᠦᠷᠢᠶᠡ ᠨᠦᠭᠦᠳ ᠢ ᠠᠯᠠᠭᠳᠠᠭᠰᠠᠳ ᠢᠶᠠᠷ ᠳᠦᠭᠦᠷᠭᠡ᠃ ᠣᠳᠣ ᠭᠠᠷᠴᠤ ᠶᠠᠪᠤ》 ᠭᠡᠰᠡᠨ ᠳᠦ᠂ ᠲᠡᠳᠡ ᠭᠠᠷᠴᠤ ᠬᠣᠲᠠ ᠶᠢᠨ ᠬᠢᠨ ᠢ ᠴᠣᠬᠢᠪᠠ᠃ 8 ᠲᠡᠳᠡ ᠴᠣᠬᠢᠵᠤ ᠪᠠᠢᠬᠤ ᠳᠤ᠂ ᠪᠢ ᠭᠠᠭᠴᠠᠭᠠᠷ ᠢᠶᠠᠨ ᠦᠯᠡᠳᠡᠵᠦ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠥ᠂ ᠡᠵᠡᠨ ᠶᠣᠬᠣᠸᠠ᠂ ᠲᠠ ᠶᠧᠷᠦ᠋ᠰᠠᠯᠧᠮ ᠤᠨ ᠳᠡᠭᠡᠷᠡ ᠬᠢᠯᠢᠩ ᠢᠶᠠᠨ ᠠᠰᠬᠠᠨ ᠢᠰᠷᠧᠯ ᠤᠨ ᠬᠠᠮᠤᠭ ᠦᠯᠡᠳᠡᠭᠰᠡᠳ ᠢ ᠤᠰᠠᠳᠬᠠᠨᠠ ᠭᠡᠵᠢ ᠤᠤ︖》 ᠭᠡᠪᠡ᠃ 9 ᠲᠡᠭᠡᠬᠦ ᠳᠦ᠂ ᠲᠡᠷᠡ ᠨᠠᠳᠠ ᠳᠤ᠄ 《ᠢᠰᠷᠧᠯ ᠪᠣᠯᠣᠨ ᠶᠦᠳᠠ ᠶᠢᠨ ᠭᠡᠷ ᠦᠨ ᠨᠢᠭᠦᠯ ᠮᠠᠰᠢ ᠶᠡᠬᠡ᠂ ᠨᠤᠲᠤᠭ ᠨᠢ ᠴᠢᠰᠤ ᠪᠠᠷ ᠳᠦᠭᠦᠷᠴᠦ᠂ ᠬᠣᠲᠠ ᠨᠢ ᠭᠠᠵᠢ ᠶᠠᠪᠤᠳᠠᠯ ᠢᠶᠠᠷ ᠳᠦᠭᠦᠷᠡᠩ ᠪᠠᠢᠨᠠ᠃ ᠬᠠᠷᠢᠨ ᠲᠡᠳᠡ᠄ 〈ᠶᠣᠬᠣᠸᠠ ᠡᠨᠡ ᠨᠤᠲᠤᠭ ᠢ ᠬᠠᠶᠠᠪᠠ᠂ ᠶᠣᠬᠣᠸᠠ ᠬᠠᠷᠠᠳᠠᠭ ᠦᠭᠡᠢ〉 ᠭᠡᠯᠴᠡᠳᠡᠭ᠃ 10 ᠡᠢᠮᠦ ᠡᠴᠡ ᠪᠢ ᠴᠤ ᠲᠡᠳᠡᠨ ᠢ ᠥᠷᠥ ᠡᠪᠡᠳᠦᠨ ᠬᠠᠷᠠᠬᠤ ᠦᠭᠡᠢ᠂ ᠥᠷᠥᠰᠢᠶᠡᠬᠦ ᠦᠭᠡᠢ᠃ ᠬᠠᠷᠢᠨ ᠪᠢ ᠦᠢᠯᠡᠰ ᠦᠨ ᠬᠢᠨᠢ ᠦᠷᠡ ᠳᠠᠭᠠᠪᠤᠷᠢ ᠶᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠯᠭᠠᠨᠠ》 ᠭᠡᠪᠡ᠃
11 ᠲᠡᠭᠡᠲᠡᠯᠡ ᠮᠠᠭᠠᠯᠢᠩ᠋ᠭᠤᠨ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠲᠠᠰᠢᠶᠠᠨ ᠳᠠᠭᠠᠨ ᠪᠢᠴᠢᠭ ᠪᠡᠬᠡ ᠶᠢᠨ ᠰᠠᠪᠠ ᠵᠡᠭᠦᠭᠰᠡᠨ ᠲᠡᠷᠡ ᠬᠥᠮᠦᠨ ᠬᠠᠷᠢᠭᠤ ᠮᠡᠳᠡᠭᠦᠯᠦᠨ᠄ 《ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠲᠠᠨᠢ ᠪᠢ ᠭᠦᠢᠴᠡᠳᠬᠡᠪᠡ》 ᠭᠡᠯᠡ᠃