ᠰᠢᠭᠦᠭᠴᠢᠳ ᠠᠷᠪᠠᠨ ᠬᠣᠶᠠᠷ
ᠶᠧᠹᠲ᠋ᠠ ᠬᠢᠭᠡᠳ ᠡᠹᠷᠠᠢᠮᠴᠤᠳ ᠤᠨ ᠮᠥᠷᠭᠥᠯᠳᠦᠭᠡᠨ
1 ᠡᠹᠷᠠᠢᠮ ᠤᠨ ᠡᠷᠡᠴᠦᠳ ᠴᠡᠷᠢᠭ ᠢᠶᠠᠨ ᠳᠠᠢᠴᠢᠯᠠᠨ ᠬᠣᠢᠲᠤ ᠵᠦᠭ ᠲᠦ ᠶᠧᠹᠲ᠋ᠠ ᠤᠷᠤᠭᠤ ᠣᠴᠢᠭᠠᠳ᠄ 《ᠴᠢ ᠠᠮᠣᠨᠴᠤᠳ ᠲᠠᠢ ᠳᠠᠢᠲᠤᠬᠤ ᠪᠠᠷ ᠶᠠᠪᠤᠬᠤ ᠳᠠᠭᠠᠨ ᠶᠠᠭᠤᠨ ᠳᠤ ᠪᠢᠳᠡᠨ ᠢ ᠳᠠᠭᠤᠳᠠᠭᠰᠠᠨ ᠦᠭᠡᠢ ᠪᠤᠢ︖ ᠪᠢᠳᠡ ᠴᠢᠮᠠᠶᠢ ᠭᠡᠷ ᠣᠷᠣᠨ ᠲᠠᠢ ᠴᠢᠨᠢ ᠬᠠᠮᠲᠤ ᠭᠠᠯᠳᠠᠨ ᠰᠢᠲᠠᠭᠠᠨᠠ》 ᠭᠡᠵᠡᠢ᠃ 2 ᠶᠧᠹᠲ᠋ᠠ ᠲᠡᠳᠡᠨ ᠳᠦ᠄ 《ᠪᠢ ᠪᠣᠯᠣᠨ ᠮᠠᠨ ᠤ ᠠᠷᠠᠳ ᠲᠦᠮᠡᠨ ᠠᠮᠣᠨᠴᠤᠳ ᠲᠠᠢ ᠰᠢᠷᠦᠭᠦᠨ ᠲᠡᠮᠡᠴᠡᠭᠡᠨ ᠪᠣᠯᠵᠤ ᠪᠠᠢᠬᠤ ᠳᠠᠭᠠᠨ ᠲᠠ ᠨᠠᠷ ᠢ ᠳᠠᠭᠤᠳᠠᠭᠰᠠᠨ ᠪᠣᠯᠪᠠᠴᠤ ᠲᠠ ᠨᠠᠷ ᠨᠠᠮᠠᠶᠢ ᠲᠡᠳᠡᠨ ᠦ ᠰᠠᠪᠠᠷ ᠠᠴᠠ ᠠᠪᠤᠷᠠᠭᠰᠠᠨ ᠦᠭᠡᠢ᠃ 3 ᠲᠠ ᠨᠠᠷ ᠤᠨ ᠠᠪᠤᠷᠠᠬᠤ ᠦᠭᠡᠢ ᠶᠢ ᠬᠠᠷᠠᠭᠠᠳ ᠪᠢ ᠠᠮᠢ ᠴᠥᠯᠡᠨ ᠠᠮᠣᠨᠴᠤᠳ ᠲᠠᠢ ᠳᠠᠢᠲᠤᠬᠤ ᠪᠠᠷ ᠮᠣᠷᠳᠠᠬᠤ ᠳᠤ᠂ ᠶᠣᠬᠣᠸᠠ ᠲᠡᠳᠡᠨ ᠢ ᠮᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠥᠨᠥᠳᠥᠷ ᠲᠠ ᠨᠠᠷ ᠶᠠᠭᠤᠨ ᠳᠤ ᠨᠠᠳᠠ ᠲᠠᠢ ᠳᠠᠢᠲᠤᠬᠤ ᠪᠠᠷ ᠨᠠᠰᠢ ᠢᠷᠡᠵᠦ ᠪᠠᠢᠨᠠ ᠪᠤᠢ︖》 ᠭᠡᠪᠡ᠃ 4 ᠤᠤᠯ ᠨᠢ ᠡᠹᠷᠠᠢᠮᠴᠤᠳ ᠭᠢᠯᠧᠶᠠᠳ᠋ᠴᠤᠳ ᠲᠤ᠄ 《ᠲᠠ ᠨᠠᠷ ᠪᠣᠯ ᠡᠹᠷᠠᠢᠮ ᠪᠣᠯᠣᠨ ᠮᠠᠨᠠᠰᠧ ᠶᠢᠨ ᠣᠷᠭᠣᠳᠤᠤᠯ ᠶᠤᠮ》 ᠬᠡᠮᠡᠳᠡᠭ ᠪᠠᠢᠪᠠ᠃ ᠬᠠᠷᠢᠨ ᠶᠧᠹᠲ᠋ᠠ ᠭᠢᠯᠧᠶᠠᠳ᠋ ᠤᠨ ᠪᠦᠬᠦ ᠡᠷᠡᠰ ᠢ ᠳᠠᠢᠴᠢᠯᠠᠨ ᠡᠹᠷᠠᠢᠮ ᠲᠠᠢ ᠳᠠᠢᠲᠤᠭᠠᠳ ᠡᠹᠷᠠᠢᠮᠴᠤᠳ ᠢ ᠪᠤᠲᠠ ᠴᠣᠬᠢᠭᠰᠠᠨ ᠪᠠᠢᠨᠠ᠃ 5 ᠭᠢᠯᠧᠶᠠᠳ᠋ᠴᠤᠳ ᠡᠹᠷᠠᠢᠮ ᠳᠤ ᠬᠦᠷᠬᠦ ᠶᠣᠷᠳᠠᠨ ᠣᠯᠣᠮ ᠢ ᠡᠵᠡᠯᠡᠪᠡ᠃ ᠡᠹᠷᠠᠢᠮ ᠤᠨ ᠣᠷᠭᠣᠳᠤᠤᠯ ᠢᠷᠡᠭᠡᠳ᠄ 《ᠭᠣᠣᠯ ᠭᠠᠲᠤᠯᠤᠶᠠ》 ᠭᠡᠪᠡᠯ᠂ 《ᠴᠢ ᠡᠹᠷᠠᠢᠮ ᠬᠥᠮᠦᠨ ᠤᠤ︖》 ᠭᠡᠵᠦ ᠠᠰᠠᠭᠤᠳᠠᠭ ᠪᠠᠢᠵᠠᠢ᠃ ᠲᠡᠷᠡ ᠬᠥᠮᠦᠨ᠄ 《ᠪᠢᠰᠢ》 ᠭᠡᠪᠡᠯ 6 ᠲᠡᠳᠡ᠄ 《ᠴᠢ 〈ᠱᠢᠪᠣᠯᠧᠲ〉 ᠭᠡᠵᠦ ᠬᠡᠯᠡ ᠳᠠ》 ᠭᠡᠳᠡᠭ ᠪᠠᠢᠪᠠ᠃ ᠬᠡᠷᠪᠡ ᠲᠡᠳᠡ ᠵᠥᠪ ᠠᠶᠠᠯᠭᠤ ᠪᠠᠷ ᠬᠡᠯᠡᠵᠦ ᠡᠰᠡ ᠴᠢᠳᠠᠨ 《ᠰᠢᠪᠣᠯᠧᠲ》 ᠭᠡᠪᠡᠯ᠂ ᠲᠡᠳᠡ ᠪᠠᠷᠢᠵᠤ ᠠᠪᠤᠭᠠᠳ ᠲᠡᠭᠦᠨ ᠢ ᠶᠣᠷᠳᠠᠨ ᠣᠯᠣᠮ ᠳᠡᠭᠡᠷᠡ ᠠᠯᠠᠳᠠᠭ ᠪᠠᠢᠪᠠ᠃ ᠲᠡᠷᠡ ᠦᠶᠡ ᠳᠦ ᠳᠥᠷᠪᠡᠨ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠᠨ ᠡᠹᠷᠠᠢᠮ ᠬᠥᠮᠦᠨ ᠠᠯᠠᠭᠳᠠᠵᠠᠢ᠃
7 ᠶᠧᠹᠲ᠋ᠠ ᠢᠰᠷᠧᠯ ᠢ ᠵᠢᠷᠭᠤᠭᠠᠨ ᠵᠢᠯ ᠤᠳᠤᠷᠢᠳᠪᠠ᠃ ᠲᠡᠭᠡᠭᠡᠳ ᠭᠢᠯᠧᠶᠠᠳ᠋ ᠬᠥᠮᠦᠨ ᠶᠧᠹᠲ᠋ᠠ ᠥᠭᠡᠳᠡ ᠪᠣᠯᠵᠤ᠂ ᠲᠡᠭᠦᠨ ᠢ ᠭᠢᠯᠧᠶᠠᠳ᠋ ᠤᠨ ᠨᠢᠭᠡᠨ ᠲᠣᠰᠬᠣᠨ ᠳᠤ ᠬᠥᠳᠡᠭᠡᠯᠡᠭᠦᠯᠵᠡᠢ᠃
ᠰᠢᠭᠦᠭᠴᠢ ᠢᠪᠽᠠᠨ᠂ ᠡᠯᠣᠨ᠂ ᠠᠪᠳᠣᠨ
8 ᠲᠡᠭᠦᠨ ᠦ ᠳᠠᠷᠠᠭᠠ ᠪᠧᠲ᠋ᠯᠧᠾᠧᠮ ᠤᠨ ᠢᠪᠽᠠᠨ ᠢᠰᠷᠧᠯ ᠤᠨ ᠰᠢᠭᠦᠭᠴᠢ ᠪᠣᠯᠪᠠ᠃ 9 ᠲᠡᠭᠦᠨ ᠳᠦ ᠭᠤᠴᠢᠨ ᠬᠥᠪᠡᠭᠦᠨ ᠭᠤᠴᠢᠨ ᠥᠬᠢᠨ ᠲᠠᠢ ᠪᠠᠢᠪᠠ᠃ ᠲᠡᠷᠡ ᠥᠬᠢᠳ ᠢᠶᠠᠨ ᠭᠠᠳᠠᠨᠠ ᠶᠢᠨ ᠣᠪᠣᠭ ᠤᠳ ᠲᠤ ᠮᠣᠷᠳᠠᠭᠤᠯᠵᠤ᠂ ᠬᠥᠪᠡᠭᠦᠨ ᠲᠡᠭᠡᠨ ᠴᠤ ᠭᠠᠳᠠᠨᠠ ᠶᠢᠨ ᠣᠪᠣᠭ ᠤᠳ ᠠᠴᠠ ᠪᠡᠷᠢ ᠪᠠᠭᠤᠯᠭᠠᠨ ᠠᠪᠴᠠᠢ᠃ ᠢᠪᠽᠠᠨ ᠳᠣᠯᠣᠭᠠᠨ ᠵᠢᠯ ᠢᠰᠷᠧᠯ ᠢ ᠤᠳᠤᠷᠢᠳᠪᠠ᠃ 10 ᠲᠡᠭᠦᠨ ᠢ ᠥᠭᠡᠳᠡ ᠪᠣᠯᠬᠤ ᠳᠤ᠂ ᠪᠧᠲ᠋ᠯᠧᠾᠧᠮ ᠳᠤ ᠬᠥᠳᠡᠭᠡᠯᠡᠭᠦᠯᠵᠡᠢ᠃
11 ᠲᠡᠭᠦᠨ ᠦ ᠳᠠᠷᠠᠭᠠ ᠽᠧᠪᠦ᠋ᠯᠣᠨ ᠬᠥᠮᠦᠨ ᠡᠯᠣᠨ ᠰᠢᠭᠦᠭᠴᠢ ᠪᠣᠯᠣᠭᠠᠳ ᠢᠰᠷᠧᠯ ᠢ ᠠᠷᠪᠠᠨ ᠵᠢᠯ ᠤᠳᠤᠷᠢᠳᠪᠠ᠃ 12 ᠽᠧᠪᠦ᠋ᠯᠣᠨ ᠬᠥᠮᠦᠨ ᠡᠯᠣᠨ ᠥᠭᠡᠳᠡ ᠪᠣᠯᠬᠤ ᠳᠤ᠂ ᠲᠡᠭᠦᠨ ᠢ ᠽᠧᠪᠦ᠋ᠯᠣᠨ ᠨᠤᠲᠤᠭ ᠤᠨ ᠠᠶᠠᠯᠣᠨ ᠳᠤ ᠬᠥᠳᠡᠭᠡᠯᠡᠭᠦᠯᠵᠡᠢ᠃
13 ᠲᠡᠭᠦᠨ ᠦ ᠳᠠᠷᠠᠭᠠ ᠫᠢᠷᠠᠲ᠋ᠣᠨ ᠬᠥᠮᠦᠨ ᠾᠢᠯᠧᠯ ᠤᠨ ᠬᠥᠪᠡᠭᠦᠨ ᠠᠪᠳᠣᠨ ᠢᠰᠷᠧᠯ ᠤᠨ ᠰᠢᠭᠦᠭᠴᠢ ᠪᠣᠯᠪᠠ᠃ 14 ᠲᠡᠭᠦᠨ ᠳᠦ ᠳᠥᠴᠢᠨ ᠬᠥᠪᠡᠭᠦᠨ᠂ ᠭᠤᠴᠢᠨ ᠠᠴᠢ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠳᠡ ᠳᠠᠯᠠᠨ ᠡᠯᠵᠢᠭᠡ ᠤᠨᠤᠳᠠᠭ ᠪᠠᠢᠪᠠ᠃ ᠲᠡᠷᠡ ᠨᠠᠢ᠌ᠮᠠᠨ ᠵᠢᠯ ᠢᠰᠷᠧᠯ ᠢ ᠤᠳᠤᠷᠢᠳᠪᠠ᠃ 15 ᠲᠡᠭᠡᠭᠡᠳ ᠫᠢᠷᠠᠲ᠋ᠣᠨ ᠬᠥᠮᠦᠨ ᠾᠢᠯᠧᠯ ᠤᠨ ᠬᠥᠪᠡᠭᠦᠨ ᠠᠪᠳᠣᠨ ᠥᠭᠡᠳᠡ ᠪᠣᠯᠵᠤ᠂ ᠲᠡᠭᠦᠨ ᠢ ᠠᠮᠠᠯᠧᠺᠴᠤᠳ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ᠂ ᠲᠤᠬᠠᠢᠯᠠᠪᠠᠯ ᠡᠹᠷᠠᠢᠮ ᠳᠠᠬᠢ ᠫᠢᠷᠠᠲ᠋ᠣᠨ ᠳᠤ ᠣᠷᠣᠰᠢᠭᠤᠯᠪᠠ᠃