ᠰᠢᠭᠦᠭᠴᠢᠳ ᠶᠢᠰᠦ
ᠠᠪᠢᠮᠧᠯᠧᠺ ᠬᠠᠭᠠᠨ ᠪᠣᠯᠪᠠ
1 ᠶᠧᠷᠦ᠋ᠪᠠᠯ ᠤᠨ ᠬᠥᠪᠡᠭᠦᠨ ᠠᠪᠢᠮᠧᠯᠧᠺ ᠱᠧᠺᠧᠮ ᠳᠤ ᠣᠴᠢᠭᠠᠳ ᠨᠠᠭᠠᠴᠤ ᠨᠠᠷ ᠲᠠᠢ ᠪᠠᠨ ᠠᠭᠤᠯᠵᠠᠨ᠂ ᠲᠡᠳᠡᠨ ᠡᠴᠡ᠂ ᠮᠥᠨ ᠡᠬᠡ ᠶᠢᠨ ᠢᠶᠠᠨ ᠡᠴᠢᠭᠡ ᠶᠢᠨ ᠪᠦᠬᠦ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠳᠤ᠄ 2 《ᠲᠠ ᠨᠠᠷ ᠱᠧᠺᠧᠮ ᠤᠨ ᠪᠦᠬᠦ ᠢᠷᠭᠡᠨ ᠡᠴᠡ᠄ 〈ᠶᠧᠷᠦ᠋ᠪᠠᠯ ᠤᠨ ᠪᠦᠬᠦ ᠬᠥᠪᠡᠭᠦᠨ ᠪᠣᠯᠬᠤ ᠳᠠᠯᠠᠨ ᠬᠥᠮᠦᠨ ᠳᠦ ᠵᠠᠬᠢᠷᠤᠭᠳᠠᠬᠤ᠂ ᠡᠰᠡᠪᠡᠯ ᠭᠠᠭᠴᠠ ᠬᠥᠮᠦᠨ ᠳᠦ ᠵᠠᠬᠢᠷᠤᠭᠳᠠᠬᠤ ᠶᠢᠨ ᠠᠯᠢ ᠨᠢ ᠲᠠ ᠨᠠᠷ ᠲᠤ ᠳᠡᠭᠡᠷᠡ ᠪᠤᠢ︖〉 ᠭᠡᠵᠦ ᠠᠰᠠᠭᠤᠭᠠᠴᠢ᠃ ᠪᠢ ᠪᠣᠯ ᠲᠠ ᠨᠠᠷ ᠤᠨ ᠶᠠᠰᠤ ᠮᠢᠬᠠᠨ ᠤ ᠲᠠᠰᠤᠷᠬᠠᠢ ᠭᠡᠳᠡᠭ ᠢ ᠰᠠᠨᠠᠭᠠᠴᠢ》 ᠭᠡᠪᠡ᠃ 3 ᠲᠡᠭᠦᠨ ᠦ ᠨᠠᠭᠠᠴᠤ ᠨᠠᠷ ᠡᠳᠡᠭᠡᠷ ᠦᠭᠡ ᠶᠢ ᠱᠧᠺᠧᠮ ᠤᠨ ᠪᠦᠬᠦ ᠢᠷᠭᠡᠨ ᠳᠦ ᠳᠤᠭᠤᠯᠭᠠᠪᠠ᠂ ᠠᠪᠢᠮᠧᠯᠧᠺ ᠲᠡᠳᠡᠨ ᠦ ᠬᠠᠮᠢᠶᠠᠲᠠᠨ ᠪᠣᠯᠬᠣᠷ ᠲᠡᠳᠡᠨ ᠦ ᠰᠡᠳᠬᠢᠯ ᠲᠡᠭᠦᠨ ᠤᠷᠤᠭᠤ ᠲᠠᠲᠠᠭᠳᠠᠵᠠᠢ᠃ 4 ᠲᠡᠳᠡ ᠪᠠᠯ ᠪᠧᠷᠢᠲ 10 ᠤᠨ ᠳᠤᠭᠠᠩ ᠠᠴᠠ ᠳᠠᠯᠠᠨ ᠮᠥᠩᠭᠥᠨ ᠵᠣᠭᠣᠰ ᠠᠪᠴᠤ ᠠᠪᠢᠮᠧᠯᠧᠺ ᠲᠤ ᠥᠭᠭᠥᠭᠰᠡᠨ ᠳᠦ᠂ ᠲᠡᠷᠡ ᠡᠭᠦᠨ ᠢᠶᠡᠷ ᠬᠥᠩᠭᠡᠨ ᠬᠠᠭᠤᠮᠠᠭᠠᠢ ᠬᠥᠮᠦᠰ ᠢ ᠬᠥᠯᠥᠰᠥᠯᠡᠪᠡ᠃ ᠲᠡᠳᠡ ᠠᠪᠢᠮᠧᠯᠧᠺ ᠢ ᠳᠠᠭᠠᠵᠤ ᠶᠠᠪᠤᠵᠠᠢ᠃ 5 ᠲᠡᠭᠡᠭᠡᠳ ᠲᠡᠷᠡ ᠣᠹᠷᠠ ᠳᠠᠬᠢ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠲᠦ ᠣᠴᠢᠵᠤ᠂ ᠶᠧᠷᠦ᠋ᠪᠠᠯ ᠤᠨ ᠬᠥᠪᠡᠭᠦᠳ᠂ ᠲᠤᠬᠠᠢᠯᠠᠪᠠᠯ ᠥᠪᠡᠷ ᠦᠨ ᠠᠬᠠ ᠳᠡᠭᠦᠦ ᠪᠣᠯᠬᠤ ᠳᠠᠯᠠᠨ ᠬᠥᠮᠦᠨ ᠢ ᠨᠢᠭᠡ ᠬᠠᠳᠠᠨ ᠳᠡᠭᠡᠷᠡ ᠠᠯᠠᠭᠰᠠᠨ ᠪᠠᠢᠨᠠ᠃ ᠭᠠᠭᠴᠠ ᠬᠦ ᠶᠧᠷᠦ᠋ᠪᠠᠯ ᠤᠨ ᠣᠳᠬᠣᠨ ᠬᠥᠪᠡᠭᠦᠨ ᠶᠣᠲ᠋ᠠᠮ ᠨᠢᠭᠤᠭᠳᠠᠭᠰᠠᠨ ᠲᠤᠯᠠ ᠠᠮᠢᠳᠤ ᠭᠠᠷᠴᠠᠢ᠃ 6 ᠱᠧᠺᠧᠮ ᠪᠣᠯᠣᠨ ᠪᠧᠲ ᠮᠢᠯᠣ᠋ ᠶᠢᠨ ᠪᠦᠬᠦ ᠢᠷᠭᠡᠨ ᠱᠧᠺᠧᠮ ᠳᠤ ᠪᠠᠢᠳᠠᠭ ᠰᠢᠲᠦᠭᠡᠨ ᠦ ᠪᠠᠭᠠᠨᠠ ᠶᠢᠨ ᠳᠡᠷᠭᠡᠳᠡᠬᠢ ᠴᠠᠷᠠᠰᠤᠨ ᠮᠣᠳᠣᠨ ᠳᠣᠣᠷᠠ ᠠᠪᠢᠮᠧᠯᠧᠺ ᠢ ᠬᠠᠭᠠᠨ ᠢᠶᠠᠷ ᠡᠷᠭᠦᠮᠵᠢᠯᠡᠪᠡ᠃
ᠶᠣᠲ᠋ᠠᠮ ᠤᠨ ᠦᠯᠢᠭᠡᠷᠯᠡᠯ
7 ᠬᠥᠮᠦᠰ ᠡᠨᠡ ᠲᠤᠬᠠᠢ ᠶᠣᠲ᠋ᠠᠮ ᠳᠤ ᠮᠡᠳᠡᠭᠳᠡᠬᠦ ᠳᠦ᠂ ᠲᠡᠷᠡ ᠭᠧᠷᠢᠽᠢᠮ ᠠᠭᠤᠯᠠ ᠶᠢᠨ ᠣᠷᠭᠢᠯ ᠳᠡᠭᠡᠷᠡ ᠭᠠᠷᠴᠤ ᠵᠣᠭᠰᠣᠭᠠᠳ᠂ ᠲᠡᠳᠡᠨ ᠳᠦ ᠥᠨᠳᠥᠷ ᠳᠠᠭᠤ ᠪᠠᠷ ᠬᠠᠰᠬᠢᠷᠤᠨ ᠬᠡᠯᠡᠪᠡ᠄ 《ᠮᠢᠨᠦᠬᠢ ᠶᠢ ᠰᠣᠨᠣᠰᠴᠠᠭᠠ᠂ ᠱᠧᠺᠧᠮ ᠤᠨ ᠢᠷᠭᠡᠳ ᠡ᠂ ᠲᠡᠭᠡᠪᠡᠯ ᠪᠤᠷᠬᠠᠨ ᠴᠤ ᠲᠠ ᠨᠠᠷ ᠤᠨ ᠬᠢ ᠶᠢ ᠰᠣᠨᠣᠰᠣᠨᠠ᠃ 8 ᠨᠢᠭᠡᠨ ᠡᠳᠦᠷ ᠮᠣᠳᠣᠳ ᠥᠪᠡᠷᠰᠡᠳ ᠦᠨ ᠢᠶᠠᠨ ᠬᠠᠭᠠᠨ ᠢ ᠡᠷᠭᠦᠮᠵᠢᠯᠡᠨ ᠲᠣᠰᠣᠯᠠᠬᠤ ᠪᠠᠷ ᠶᠠᠪᠤᠵᠠᠭᠠᠵᠠᠢ᠃ ᠲᠡᠳᠡ ᠴᠢᠳᠦᠨ ᠮᠣᠳᠣᠨ ᠳᠤ᠄ 〈ᠮᠠᠨ ᠤ ᠬᠠᠭᠠᠨ ᠪᠣᠯᠣᠭᠠᠴᠢ〉 ᠭᠡᠰᠡᠨ ᠳᠦ᠂ 9 ᠴᠢᠳᠦᠨ ᠮᠣᠳᠣ ᠲᠡᠳᠡᠨ ᠳᠦ᠄ 〈ᠪᠢ ᠲᠣᠰᠣ ᠪᠠᠷ ᠢᠶᠠᠨ ᠪᠤᠷᠬᠠᠨ ᠪᠠ ᠬᠥᠮᠦᠰ ᠲᠦ ᠠᠯᠳᠠᠷ ᠬᠦᠨᠳᠦ ᠥᠭᠴᠦ ᠪᠠᠢᠲᠠᠯᠠ ᠪᠠᠨ ᠲᠣᠰᠣ ᠥᠭᠬᠦ ᠪᠡᠨ ᠪᠣᠯᠢᠵᠤ᠂ ᠲᠡᠨᠳᠡ ᠣᠴᠢᠭᠠᠳ ᠮᠣᠳᠣᠳ ᠤᠨ ᠳᠡᠭᠡᠭᠦᠷ ᠨᠠᠢᠭᠤᠨ ᠭᠠᠩ᠋ᠬᠤᠬᠤ ᠭᠡᠵᠢ ᠤᠤ︖〉 ᠬᠡᠮᠡᠪᠡ᠃ 10 ᠲᠡᠭᠡᠬᠦ ᠪᠡᠷ ᠨᠢ ᠮᠣᠳᠣᠳ ᠢᠨᠵᠢᠷ ᠤᠨ ᠮᠣᠳᠣᠨ ᠳᠤ᠄ 〈ᠲᠠ ᠢᠷᠡᠵᠦ᠂ ᠮᠠᠨ ᠤ ᠬᠠᠲᠤᠨ ᠪᠣᠯᠣᠭᠠᠴᠢ〉 ᠭᠡᠰᠡᠨ ᠳᠦ᠂ 11 ᠢᠨᠵᠢᠷ ᠤᠨ ᠮᠣᠳᠣ᠄ 〈ᠪᠢ ᠠᠮᠲᠠᠯᠢᠭ ᠰᠠᠢᠬᠠᠨ ᠦᠷᠡ ᠵᠢᠮᠢᠰ ᠥᠭᠬᠦ ᠪᠡᠨ ᠪᠣᠯᠢᠵᠤ᠂ ᠲᠡᠨᠳᠡ ᠣᠴᠢᠭᠠᠳ ᠮᠣᠳᠣᠳ ᠤᠨ ᠳᠡᠭᠡᠭᠦᠷ ᠨᠠᠢᠭᠤᠨ ᠭᠠᠩ᠋ᠬᠤᠬᠤ ᠭᠡᠵᠢ ᠤᠤ︖〉 ᠭᠡᠵᠦ ᠬᠡᠯᠡᠪᠡ᠃ 12 ᠮᠣᠳᠣᠳ ᠦᠵᠦᠮ ᠦᠨ ᠮᠣᠳᠣᠨ ᠳᠤ᠄ 〈ᠲᠠ ᠢᠷᠡᠵᠦ᠂ ᠮᠠᠨ ᠤ ᠬᠠᠲᠤᠨ ᠪᠣᠯᠣᠭᠠᠴᠢ〉 ᠭᠡᠰᠡᠨ ᠳᠦ᠂ 13 ᠦᠵᠦᠮ ᠦᠨ ᠮᠣᠳᠣ ᠲᠡᠳᠡᠨ ᠳᠦ᠄ 〈ᠪᠢ ᠥᠪᠡᠷ ᠦᠨ ᠳᠠᠷᠠᠰᠤ ᠪᠠᠷ ᠪᠤᠷᠬᠠᠨ ᠪᠣᠯᠣᠨ ᠬᠥᠮᠦᠰ ᠢ ᠪᠠᠶᠠᠷᠯᠠᠭᠤᠯᠵᠤ ᠪᠠᠢᠭᠠ ᠪᠠᠢᠲᠠᠯᠠ ᠪᠠᠨ ᠳᠠᠷᠠᠰᠤ ᠥᠭᠬᠦ ᠪᠡᠨ ᠪᠣᠯᠢᠵᠤ᠂ ᠲᠡᠨᠳᠡ ᠣᠴᠢᠭᠠᠳ ᠮᠣᠳᠣᠳ ᠤᠨ ᠳᠡᠭᠡᠭᠦᠷ ᠨᠠᠢᠭᠤᠨ ᠭᠠᠩ᠋ᠬᠤᠬᠤ ᠬᠡᠷᠡᠭ ᠤᠤ︖〉 ᠭᠡᠪᠡ᠃ 14 ᠡᠴᠦᠰ ᠲᠤᠨᠢ ᠮᠣᠳᠣᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠥᠷᠭᠡᠰᠦᠲᠦ ᠦᠭᠦᠷᠭᠡᠨᠡ ᠳᠦ᠄ 〈ᠲᠠ ᠢᠷᠡᠵᠦ᠂ ᠪᠢᠳᠡᠨ ᠦ ᠬᠠᠭᠠᠨ ᠪᠣᠯᠣᠭᠠᠴᠢ〉 ᠭᠡᠰᠡᠨ ᠳᠦ᠂ 15 ᠥᠷᠭᠡᠰᠦᠲᠦ ᠮᠣᠳᠣ ᠲᠡᠳᠡᠭᠡᠷ ᠮᠣᠳᠣᠨ ᠳᠤ᠄ 〈ᠲᠠ ᠨᠠᠷ ᠦᠨᠡᠬᠡᠷ ᠨᠠᠮᠠᠶᠢ ᠬᠠᠭᠠᠨ ᠢᠶᠠᠨ ᠪᠣᠯᠭᠠᠨ ᠲᠣᠰᠣᠯᠠᠵᠤ ᠪᠠᠢᠭᠠ ᠪᠣᠯ᠂ ᠮᠢᠨᠦ ᠰᠡᠭᠦᠳᠡᠷ ᠲᠦ ᠢᠷᠡᠵᠦ ᠬᠣᠷᠭᠣᠳᠠᠭᠲᠤᠨ᠃ ᠡᠰᠡ ᠲᠡᠭᠡᠪᠡᠰᠦ ᠥᠷᠭᠡᠰᠦᠲᠦ ᠮᠣᠳᠣᠨ ᠠᠴᠠ ᠭᠠᠯ ᠭᠠᠷᠴᠤ ᠯᠧᠪᠠᠨᠣᠨ ᠤ ᠬᠤᠱᠢ ᠶᠢᠨ ᠣᠢ ᠶᠢ ᠴᠤ ᠰᠢᠲᠠᠭᠠᠨᠠ〉 ᠭᠡᠰᠡᠨ ᠪᠢᠯᠡ᠃
16 ᠣᠳᠣ ᠲᠠ ᠨᠠᠷ ᠤᠨ ᠬᠤᠪᠢ ᠳᠤ᠂ ᠠᠪᠢᠮᠧᠯᠧᠺ ᠢ ᠬᠠᠭᠠᠨ ᠢᠶᠠᠷ ᠡᠷᠭᠦᠮᠵᠢᠯᠡᠭᠰᠡᠨ ᠨᠢ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠷ ᠦᠢᠯᠡᠳᠦᠭᠰᠡᠨ ᠪᠠᠢᠨᠠ ᠤᠤ︖ ᠲᠠ ᠨᠠᠷ ᠶᠧᠷᠦ᠋ᠪᠠᠯ ᠪᠣᠯᠣᠨ ᠲᠡᠭᠦᠨ ᠦ ᠭᠡᠷ ᠦᠨ ᠬᠢᠨ ᠳᠤ ᠰᠠᠢᠨ ᠰᠠᠢᠬᠠᠨ ᠢᠶᠠᠷ ᠬᠠᠨᠳᠤᠵᠤ᠂ ᠲᠡᠭᠦᠨ ᠦ ᠬᠢᠭᠰᠡᠨ ᠠᠴᠢᠲᠤ ᠦᠢᠯᠡᠰ ᠦᠨ ᠬᠢᠨᠢ ᠶᠣᠰᠣᠭᠠᠷ ᠬᠠᠷᠢᠭᠤᠯᠪᠠ ᠤᠤ︖ 17 ᠮᠠᠨ ᠤ ᠡᠴᠢᠭᠡ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠠᠮᠢ ᠴᠥᠯᠡᠨ ᠲᠤᠯᠤᠯᠳᠤᠵᠤ᠂ ᠲᠠ ᠨᠠᠷ ᠢ ᠮᠢᠳᠢᠶᠠᠨ ᠤ ᠰᠠᠪᠠᠷ ᠠᠴᠠ ᠴᠢᠯᠥᠭᠡᠯᠡᠭᠰᠡᠨ ᠠᠲᠠᠯᠠ 18 ᠲᠠ ᠨᠠᠷ ᠥᠨᠥᠳᠥᠷ ᠮᠢᠨᠦ ᠡᠴᠢᠭᠡ ᠶᠢᠨ ᠭᠡᠷ ᠦᠨ ᠡᠰᠡᠷᠭᠦ ᠪᠣᠰᠴᠤ᠂ ᠲᠡᠭᠦᠨ ᠦ ᠳᠠᠯᠠᠨ ᠬᠦᠦ ᠶᠢ ᠨᠢᠭᠡ ᠬᠠᠳᠠᠨ ᠳᠡᠭᠡᠷᠡ ᠠᠯᠠᠵᠤ᠂ ᠰᠢᠪᠡᠭᠴᠢᠨ ᠤ ᠬᠢᠨᠢ ᠬᠥᠪᠡᠭᠦᠨ ᠠᠪᠢᠮᠧᠯᠧᠺ ᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠬᠠᠮᠢᠶᠠᠲᠠᠨ ᠭᠡᠳ ᠱᠧᠺᠧᠮ ᠤᠨ ᠢᠷᠭᠡᠳ ᠦᠨ ᠬᠠᠭᠠᠨ ᠪᠣᠯᠭᠠᠵᠠᠢ᠃ 19 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠄ ᠬᠡᠷᠪᠡ ᠲᠠ ᠨᠠᠷ ᠥᠨᠥᠳᠥᠷ ᠶᠧᠷᠦ᠋ᠪᠠᠯ ᠪᠣᠯᠣᠨ ᠲᠡᠭᠦᠨ ᠦ ᠭᠡᠷ ᠲᠦ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠷ ᠬᠠᠨᠳᠤᠵᠤ ᠪᠠᠢᠭᠠ ᠪᠣᠯ᠂ ᠠᠪᠢᠮᠧᠯᠧᠺ ᠲᠠᠢ ᠬᠠᠮᠲᠤ ᠪᠠᠶᠠᠷᠯᠠᠬᠤ ᠪᠥᠭᠡᠳ ᠲᠡᠷᠡ ᠴᠤ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠶᠠᠷᠯᠠᠬᠤ ᠪᠣᠯᠣᠨᠠ᠃ 20 ᠬᠠᠷᠢᠨ ᠲᠡᠢᠮᠦ ᠪᠤᠰᠤ ᠠᠪᠠᠰᠤ᠂ ᠠᠪᠢᠮᠧᠯᠧᠺ ᠠᠴᠠ ᠭᠠᠯ ᠭᠠᠷᠴᠤ᠂ ᠱᠧᠺᠧᠮ ᠪᠣᠯᠣᠨ ᠪᠧᠲ ᠮᠢᠯᠣ᠋ ᠶᠢᠨ ᠢᠷᠭᠡᠳ ᠢ ᠰᠢᠲᠠᠭᠠᠬᠤ ᠪᠥᠭᠡᠳ ᠱᠧᠺᠧᠮ ᠪᠣᠯᠣᠨ ᠪᠧᠲ ᠮᠢᠯᠣ᠋ ᠶᠢᠨ ᠢᠷᠭᠡᠳ ᠡᠴᠡ ᠴᠤ ᠭᠠᠯ ᠭᠠᠷᠴᠤ᠂ ᠠᠪᠢᠮᠧᠯᠧᠺ ᠢ ᠰᠢᠲᠠᠭᠠᠨᠠ》 ᠭᠡᠪᠡ᠃ 21 ᠲᠡᠭᠡᠭᠡᠳ ᠶᠣᠲ᠋ᠠᠮ ᠠᠬᠠ ᠠᠪᠢᠮᠧᠯᠧᠺ ᠠᠴᠠ ᠪᠠᠨ ᠠᠶᠤᠨ᠂ ᠣᠷᠭᠣᠨ ᠵᠠᠢᠯᠠᠵᠤ ᠪᠧᠷ ᠲᠤ ᠬᠦᠷᠦᠭᠡᠳ ᠲᠡᠨᠳᠡ ᠰᠠᠭᠤᠷᠢᠰᠢᠭᠰᠠᠨ ᠪᠠᠢᠨᠠ᠃
ᠠᠪᠢᠮᠧᠯᠧᠺ ᠤᠨ ᠬᠦᠯᠢᠶᠡᠭᠰᠡᠨ ᠰᠢᠳᠬᠡᠯ
22 ᠠᠪᠢᠮᠧᠯᠧᠺ ᠢᠰᠷᠧᠯ ᠢ ᠭᠤᠷᠪᠠᠨ ᠵᠢᠯ ᠵᠠᠬᠢᠷᠤᠭᠰᠠᠨ ᠤ ᠳᠠᠷᠠᠭᠠ᠂ 23 ᠪᠤᠷᠬᠠᠨ ᠠᠪᠢᠮᠧᠯᠧᠺ ᠪᠣᠯᠣᠨ ᠱᠧᠺᠧᠮ ᠤᠨ ᠢᠷᠭᠡᠳ ᠦᠨ ᠬᠣᠭᠣᠷᠣᠨᠳᠣ ᠮᠠᠭᠤ ᠰᠦᠨᠡᠰᠦ ᠢᠯᠡᠭᠡᠭᠰᠡᠨ ᠳᠦ᠂ ᠱᠧᠺᠧᠮ ᠤᠨ ᠢᠷᠭᠡᠳ ᠠᠪᠢᠮᠧᠯᠧᠺ ᠠᠴᠠ ᠤᠷᠪᠠᠪᠠ᠃ 24 ᠲᠡᠢᠨ ᠬᠦ ᠶᠧᠷᠦ᠋ᠪᠠᠯ ᠤᠨ ᠳᠠᠯᠠᠨ ᠬᠥᠪᠡᠭᠦᠨ ᠳᠦ ᠦᠢᠯᠡᠳᠦᠭᠰᠡᠨ ᠬᠠᠷᠭᠢᠰᠯᠠᠯ ᠨᠢ ᠦᠢᠯᠡᠳᠦᠭᠰᠡᠨ ᠬᠥᠮᠦᠨ ᠳᠡᠭᠡᠨ ᠪᠤᠴᠠᠵᠤ᠂ ᠴᠢᠰᠤᠨ ᠤ ᠬᠢᠨᠢ ᠬᠠᠷᠢᠭᠤ ᠠᠬᠠ ᠳᠡᠭᠦᠦ ᠪᠡᠨ ᠠᠯᠠᠭᠰᠠᠨ ᠠᠪᠢᠮᠧᠯᠧᠺ ᠳᠡᠭᠡᠷᠡ᠂ ᠮᠥᠨ ᠲᠡᠳᠡᠨ ᠢ ᠠᠯᠠᠬᠤ ᠳᠤ ᠲᠡᠭᠦᠨ ᠢ ᠳᠡᠮᠵᠢᠭᠰᠡᠨ ᠱᠧᠺᠧᠮ ᠤᠨ ᠢᠷᠭᠡᠳ ᠦᠨ ᠳᠡᠭᠡᠷᠡ ᠪᠠᠭᠤᠬᠤ ᠪᠣᠯᠣᠯᠠ᠃ 25 ᠱᠧᠺᠧᠮ ᠤᠨ ᠢᠷᠭᠡᠳ ᠠᠭᠤᠯᠠᠰ ᠤᠨ ᠣᠷᠣᠢ ᠪᠠᠷ ᠠᠪᠢᠮᠧᠯᠧᠺ ᠢ ᠣᠲᠣᠬᠤ ᠬᠥᠮᠦᠨ ᠢ ᠰᠠᠭᠤᠯᠭᠠᠬᠤ ᠳᠤ᠂ ᠲᠡᠳᠡ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠬᠦ ᠪᠦᠬᠦᠨ ᠢ ᠳᠡᠭᠡᠷᠡᠮᠳᠡᠵᠦ ᠪᠠᠢᠪᠠ᠃ ᠡᠨᠡ ᠬᠡᠷᠡᠭ ᠠᠪᠢᠮᠧᠯᠧᠺ ᠲᠤ ᠳᠤᠭᠤᠯᠳᠠᠪᠠ᠃
26 ᠨᠢᠭᠡᠨ ᠡᠳᠦᠷ ᠡᠪᠧᠳ᠋ ᠤᠨ ᠬᠥᠪᠡᠭᠦᠨ ᠭᠠᠶᠠᠯ ᠬᠠᠮᠢᠶᠠᠲᠠᠨ ᠲᠠᠢ ᠪᠠᠨ ᠬᠠᠮᠲᠤ ᠱᠧᠺᠧᠮ ᠳᠤ ᠨᠡᠭᠦᠨ ᠢᠷᠡᠵᠡᠢ᠃ ᠱᠧᠺᠧᠮ ᠤᠨ ᠢᠷᠭᠡᠳ ᠲᠡᠭᠦᠨ ᠳᠦ ᠨᠠᠢᠳᠠᠪᠤᠷᠢ ᠲᠠᠯᠪᠢᠬᠤ ᠪᠣᠯᠪᠠ᠃ 27 ᠡᠢᠮᠦ ᠡᠴᠡ ᠲᠡᠳᠡ ᠲᠠᠷᠢᠶᠠᠨ ᠳᠤ ᠭᠠᠷᠴᠤ᠂ ᠦᠵᠦᠮ ᠦᠨ ᠲᠠᠯᠠᠪᠠᠢ ᠠᠴᠠ ᠪᠠᠨ ᠦᠵᠦᠮ ᠬᠤᠷᠢᠶᠠᠨ ᠰᠢᠬᠠᠵᠤ᠂ ᠨᠠᠢᠷ ᠬᠢᠬᠦ ᠳᠡᠭᠡᠨ ᠪᠤᠷᠬᠠᠨ ᠤ ᠪᠠᠨ ᠳᠤᠭᠠᠩ ᠳᠤ ᠣᠷᠣᠵᠤ᠂ ᠢᠳᠡᠵᠦ ᠤᠤᠭᠤᠨ ᠠᠪᠢᠮᠧᠯᠧᠺ ᠢ ᠬᠠᠷᠢᠶᠠᠪᠠ᠃ 28 ᠲᠡᠭᠡᠬᠦ ᠳᠦ᠂ ᠡᠪᠧᠳ᠋ ᠤᠨ ᠬᠥᠪᠡᠭᠦᠨ ᠭᠠᠶᠠᠯ᠄ 《ᠠᠪᠢᠮᠧᠯᠧᠺ ᠭᠡᠭᠴᠢ ᠬᠡᠨ ᠪᠤᠢ︖ ᠱᠧᠺᠧᠮ ᠤᠨ ᠬᠢ ᠭᠡᠭᠳᠡᠳᠡᠭ ᠪᠢᠳᠡ ᠬᠡᠨ ᠪᠤᠢ︖ ᠪᠢᠳᠡ ᠶᠠᠭᠤᠨ ᠤ ᠤᠴᠢᠷ ᠲᠡᠭᠦᠨ ᠳᠦ ᠵᠠᠷᠤᠭᠳᠠᠬᠤ ᠶᠣᠰᠣᠲᠠᠢ ᠪᠤᠢ︖ ᠶᠧᠷᠦ᠋ᠪᠠᠯ ᠤᠨ ᠬᠥᠪᠡᠭᠦᠨ ᠪᠣᠯᠣᠨ ᠲᠡᠭᠦᠨ ᠦ ᠲᠤᠰᠠᠯᠠᠭᠴᠢ ᠽᠧᠪᠦ᠋ᠯ ᠨᠢ ᠱᠧᠺᠧᠮ ᠤᠨ ᠡᠴᠢᠭᠡ ᠬᠠᠮᠣᠷ ᠤᠨ ᠦᠷᠡ ᠤᠳᠤᠮ ᠪᠣᠯᠣᠭᠰᠠᠨ ᠪᠢᠳᠡᠨ ᠳᠦ ᠵᠠᠷᠤᠭᠳᠠᠬᠤ ᠶᠣᠰᠣᠲᠠᠢ ᠪᠢᠰᠢ ᠤᠤ︖ ᠶᠠᠭᠤᠨ ᠳᠤ ᠪᠢᠳᠡ ᠲᠡᠭᠦᠨ ᠳᠦ ᠵᠠᠷᠤᠭᠳᠠᠨᠠ ᠪᠤᠢ︖ 29 ᠡᠨᠡ ᠠᠷᠠᠳ ᠲᠦᠮᠡᠨ ᠮᠢᠨᠦ ᠮᠡᠳᠡᠯ ᠳᠣᠣᠷᠠ ᠪᠠᠢᠭᠰᠠᠨ ᠴᠤ ᠪᠣᠯᠣᠭᠠᠰᠠᠢ︕ ᠲᠡᠭᠡᠪᠡᠯ ᠪᠢ ᠠᠪᠢᠮᠧᠯᠧᠺ ᠢ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠵᠤ᠂ ᠠᠪᠢᠮᠧᠯᠧᠺ ᠲᠤ ᠴᠡᠷᠢᠭ ᠢᠶᠠᠨ ᠳᠠᠢᠴᠢᠯᠠᠭᠠᠳ ᠭᠠᠷᠴᠤ ᠢᠷᠡ ᠭᠡᠵᠦ ᠬᠡᠯᠡᠬᠦ ᠰᠠᠨ》 ᠭᠡᠪᠡ᠃
30 ᠬᠣᠲᠠ ᠶᠢᠨ ᠵᠠᠬᠢᠷᠤᠭᠴᠢ ᠽᠧᠪᠦ᠋ᠯ ᠡᠪᠧᠳ᠋ ᠤᠨ ᠬᠥᠪᠡᠭᠦᠨ ᠭᠠᠶᠠᠯ ᠤᠨ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠶᠡᠬᠡᠳᠡ ᠠᠭᠤᠷᠯᠠᠵᠤ᠂ 31 ᠠᠪᠢᠮᠧᠯᠧᠺ ᠤᠷᠤᠭᠤ ᠰᠡᠮᠬᠡᠨ ᠡᠯᠴᠢᠳ ᠢᠯᠡᠭᠡᠵᠦ᠄ 《ᠬᠠᠷᠠ᠂ ᠡᠪᠧᠳ᠋ ᠤᠨ ᠬᠥᠪᠡᠭᠦᠨ ᠭᠠᠶᠠᠯ ᠠᠬᠠ ᠳᠡᠭᠦᠦᠰ ᠲᠡᠢ ᠪᠡᠨ ᠬᠠᠮᠲᠤ ᠱᠧᠺᠧᠮ ᠳᠤ ᠢᠷᠡᠭᠡᠳ ᠲᠠᠨ ᠤ ᠡᠰᠡᠷᠭᠦ ᠬᠣᠲᠠ ᠶᠢᠨ ᠬᠢᠨ ᠢ ᠥᠳᠥᠭᠡᠵᠦ ᠪᠠᠢᠨᠠ᠃ 32 ᠡᠢᠮᠦ ᠡᠴᠡ ᠲᠠ ᠬᠠᠷᠢᠶᠠ ᠴᠡᠷᠢᠭ ᠲᠠᠢ ᠪᠠᠨ ᠬᠠᠮᠲᠤ ᠰᠥᠨᠢ ᠪᠠᠷ ᠭᠠᠷᠴᠤ᠂ ᠲᠠᠯᠠ ᠳᠤ ᠣᠲᠣᠵᠤ ᠪᠠᠢᠭᠠᠷᠠᠢ᠃ 33 ᠥᠷᠯᠥᠭᠡ ᠡᠷᠲᠡ ᠨᠠᠷᠠ ᠮᠠᠨᠳᠤᠮᠠᠭᠴᠠ ᠲᠠ ᠬᠣᠲᠠ ᠤᠷᠤᠭᠤ ᠳᠠᠭᠠᠷᠢᠭᠲᠤᠨ᠃ ᠭᠠᠶᠠᠯ ᠪᠣᠯᠣᠨ ᠲᠡᠭᠦᠨ ᠦ ᠬᠠᠷᠢᠶᠠ ᠬᠥᠮᠦᠰ ᠭᠠᠷᠴᠤ ᠢᠷᠡᠬᠦ ᠴᠠᠭ ᠲᠤ ᠲᠠ ᠥᠪᠡᠷ ᠦᠨ ᠬᠢᠵᠦ ᠴᠢᠳᠠᠬᠤ ᠪᠦᠬᠦ ᠵᠦᠢᠯ ᠢᠶᠠᠨ ᠦᠢᠯᠡᠳᠦᠭᠲᠦᠨ》 ᠭᠡᠵᠦ ᠬᠡᠯᠡᠭᠦᠯᠪᠡ᠃
34 ᠠᠪᠢᠮᠧᠯᠧᠺ ᠰᠥᠨᠢ ᠪᠠᠷ ᠬᠠᠮᠤᠭ ᠬᠠᠷᠢᠶᠠ ᠴᠡᠷᠢᠭ ᠲᠠᠢ ᠪᠠᠨ ᠬᠠᠮᠲᠤ ᠭᠠᠷᠴᠤ᠂ ᠲᠡᠳᠡᠨ ᠢ ᠳᠥᠷᠪᠡᠨ ᠠᠩ᠋ᠬᠢ ᠬᠤᠪᠢᠶᠠᠵᠤ᠂ ᠱᠧᠺᠧᠮ ᠤᠨ ᠬᠠᠷᠠᠯᠳᠤᠭᠠ ᠣᠲᠣᠵᠤ ᠪᠠᠢᠪᠠ᠃ 35 ᠡᠪᠧᠳ᠋ ᠤᠨ ᠬᠥᠪᠡᠭᠦᠨ ᠭᠠᠶᠠᠯ ᠭᠠᠷᠴᠤ ᠢᠷᠡᠭᠡᠳ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠤ ᠡᠭᠦᠳᠡᠨ ᠳᠡᠭᠡᠷᠡ ᠵᠣᠭᠰᠣᠬᠤ ᠳᠤ᠂ ᠠᠪᠢᠮᠧᠯᠧᠺ ᠬᠠᠷᠢᠶᠠ ᠴᠡᠷᠢᠭ ᠲᠠᠢ ᠪᠠᠨ ᠬᠠᠮᠲᠤ ᠨᠢᠭᠤᠭᠳᠠᠭᠰᠠᠨ ᠭᠠᠵᠠᠷ ᠠᠴᠠ ᠪᠠᠨ ᠪᠣᠰᠴᠠᠭᠠᠯᠠ᠃ 36 ᠭᠠᠶᠠᠯ ᠲᠡᠷᠡ ᠬᠥᠮᠦᠰ ᠢ ᠬᠠᠷᠠᠭᠠᠳ ᠽᠧᠪᠦ᠋ᠯ ᠳᠤ᠄ 《ᠬᠠᠷᠠ᠂ ᠬᠥᠮᠦᠰ ᠠᠭᠤᠯᠠᠰ ᠤᠨ ᠣᠷᠣᠢ ᠠᠴᠠ ᠪᠠᠭᠤᠨ ᠢᠷᠡᠵᠦ ᠪᠠᠢᠨᠠ︕》 ᠭᠡᠰᠡᠨ ᠳᠦ᠂ ᠽᠧᠪᠦ᠋ᠯ᠄ 《ᠲᠠ ᠠᠭᠤᠯᠠᠰ ᠤᠨ ᠰᠡᠭᠦᠳᠡᠷ ᠢ ᠬᠥᠮᠦᠰ ᠭᠡᠵᠦ ᠬᠠᠷᠠᠵᠤ ᠯᠠ ᠳᠠ》 ᠭᠡᠪᠡ᠃ 37 ᠭᠠᠶᠠᠯ ᠳᠠᠬᠢᠨ᠄ 《ᠬᠠᠷᠠ᠂ ᠬᠥᠮᠦᠰ ᠡᠨᠡ ᠨᠤᠲᠤᠭ ᠤᠨ ᠲᠣᠯᠣᠭᠠᠳ ᠠᠴᠠ ᠪᠠᠭᠤᠵᠤ ᠢᠷᠡᠵᠦ ᠪᠠᠢᠨᠠ︕ ᠪᠠᠰᠠ ᠨᠢᠭᠡ ᠠᠩ᠋ᠬᠢ ᠨᠢ ᠮᠡᠷᠭᠡᠴᠢ ᠶᠢᠨ ᠴᠠᠷᠠᠰᠤᠨ ᠮᠣᠳᠣᠨ ᠤ ᠵᠠᠮ ᠢᠶᠠᠷ ᠢᠷᠡᠵᠦ ᠪᠠᠢᠨᠠ》 ᠭᠡᠪᠡ᠃ 38 ᠽᠧᠪᠦ᠋ᠯ᠄ 《ᠲᠠᠨ ᠤ ᠶᠡᠬᠡ ᠦᠭᠡ ᠣᠳᠣ ᠬᠠᠮᠢᠭᠠ ᠣᠴᠢᠴᠢᠬᠠᠪᠠ︖ 〈ᠠᠪᠢᠮᠧᠯᠧᠺ ᠭᠡᠭᠴᠢ ᠬᠡᠨ ᠶᠤᠮ ᠪᠤᠢ︖ ᠶᠠᠭᠤᠨ ᠤ ᠤᠴᠢᠷ ᠠᠴᠠ ᠪᠢᠳᠡ ᠲᠡᠭᠦᠨ ᠳᠦ ᠵᠠᠷᠤᠭᠳᠠᠬᠤ ᠶᠣᠰᠣᠲᠠᠢ ᠪᠤᠢ︖〉 ᠬᠡᠮᠡᠨ ᠪᠠᠰᠤᠮᠵᠢᠯᠠᠭᠰᠠᠨ ᠬᠥᠮᠦᠰ ᠴᠢᠨᠢ ᠡᠳᠡ ᠪᠢᠰᠢ ᠤᠤ︖ ᠣᠳᠣ ᠭᠠᠷᠴᠤ ᠣᠴᠢᠭᠠᠳ ᠲᠡᠳᠡᠨ ᠲᠡᠢ ᠲᠤᠯᠤᠯᠳᠤᠭᠲᠤᠨ》 ᠭᠡᠪᠡ᠃ 39 ᠲᠡᠭᠡᠬᠦ ᠳᠦ ᠭᠠᠶᠠᠯ ᠱᠧᠺᠧᠮ ᠤᠨ ᠢᠷᠭᠡᠳ ᠢ ᠬᠣᠰᠢᠭᠤᠴᠢᠯᠠᠨ ᠭᠠᠷᠴᠤ᠂ ᠠᠪᠢᠮᠧᠯᠧᠺ ᠲᠠᠢ ᠲᠤᠯᠤᠯᠳᠤᠯᠠ᠃ 40 ᠭᠠᠶᠠᠯ ᠠᠪᠢᠮᠧᠯᠧᠺ ᠲᠤ ᠰᠢᠬᠠᠭᠳᠠᠵᠤ ᠵᠢᠭᠤᠲᠠᠪᠠ᠃ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠬᠦᠷᠲᠡᠯᠡᠬᠢ ᠵᠠᠮ ᠳᠤ ᠣᠯᠠᠨ ᠬᠥᠮᠦᠨ ᠡᠷᠡᠰᠳᠡᠨ ᠤᠨᠠᠪᠠ᠃ 41 ᠢᠩᠭᠢᠭᠡᠳ ᠠᠪᠢᠮᠧᠯᠧᠺ ᠠᠷᠦ᠋ᠮᠠ ᠳᠤ ᠬᠠᠷᠢᠵᠤ ᠲᠡᠨᠳᠡ ᠦᠯᠡᠳᠡᠭᠰᠡᠨ ᠪᠥᠭᠡᠳ ᠽᠧᠪᠦ᠋ᠯ ᠭᠠᠶᠠᠯ ᠢ ᠠᠬᠠ ᠳᠡᠭᠦᠦᠰ ᠲᠡᠢ ᠨᠢ ᠬᠠᠮᠲᠤ ᠱᠧᠺᠧᠮ ᠡᠴᠡ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠪᠠ᠃ 42 ᠮᠠᠷᠭᠠᠰᠢ ᠨᠢ ᠱᠧᠺᠧᠮ ᠤᠨ ᠬᠢᠨ ᠤ ᠲᠠᠯᠠᠪᠠᠢ ᠤᠷᠤᠭᠤ ᠭᠠᠷᠤᠭᠰᠠᠨ ᠨᠢ ᠠᠪᠢᠮᠧᠯᠧᠺ ᠲᠤ ᠳᠤᠭᠤᠯᠳᠠᠪᠠ᠃ 43 ᠲᠡᠷᠡ ᠬᠠᠷᠢᠶᠠ ᠴᠡᠷᠢᠭ ᠢᠶᠠᠨ ᠳᠠᠢᠴᠢᠯᠠᠨ ᠭᠤᠷᠪᠠᠨ ᠠᠩ᠋ᠭᠢ ᠬᠤᠪᠢᠶᠠᠵᠤ᠂ ᠲᠠᠯᠠ ᠳᠤ ᠤᠳᠤᠭᠤᠯᠤᠭᠰᠠᠨ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠡᠳᠡ ᠬᠣᠲᠠ ᠶᠢᠨ ᠬᠢᠨ ᠤ ᠭᠠᠷᠴᠤ ᠢᠷᠡᠬᠦ ᠶᠢ ᠬᠠᠷᠠᠭᠠᠳ᠂ ᠪᠣᠰᠴᠤ ᠳᠣᠪᠲᠣᠯᠪᠠ᠃ 44 ᠠᠪᠢᠮᠧᠯᠧᠺ ᠪᠠ ᠲᠡᠭᠦᠨ ᠦ ᠬᠠᠷᠢᠶᠠ ᠬᠥᠮᠦᠰ ᠤᠷᠤᠭᠰᠢᠯᠠᠨ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠵᠣᠭᠰᠣᠵᠤ᠂ ᠨᠥᠭᠥᠭᠡ ᠬᠣᠶᠠᠷ ᠠᠩ᠋ᠭᠢ ᠨᠢ ᠲᠠᠯᠠᠪᠠᠢ ᠳᠤ ᠪᠠᠢᠭᠰᠠᠨ ᠣᠯᠠᠨ ᠤᠷᠤᠭᠤ ᠳᠣᠪᠲᠣᠯᠵᠤ᠂ ᠲᠡᠳᠡᠨ ᠢ ᠤᠰᠠᠳᠬᠠᠵᠠᠢ᠃ 45 ᠠᠪᠢᠮᠧᠯᠧᠺ ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠲᠠᠢ ᠡᠳᠦᠷᠵᠢᠨ ᠲᠤᠯᠤᠯᠳᠤᠭᠰᠠᠭᠠᠷ ᠬᠣᠲᠠ ᠶᠢ ᠡᠵᠡᠯᠡᠨ ᠠᠪᠤᠪᠠ᠃ ᠲᠡᠭᠡᠭᠡᠳ ᠲᠡᠨᠳᠡ ᠪᠠᠢᠭᠰᠠᠨ ᠬᠥᠮᠦᠰ ᠢ ᠠᠯᠠᠵᠤ ᠬᠣᠲᠠ ᠶᠢ ᠨᠤᠷᠠᠭᠠᠨ᠂ ᠳᠡᠭᠡᠷᠡ ᠨᠢ ᠳᠠᠪᠤᠰᠤ ᠰᠠᠴᠤᠭᠰᠠᠨ ᠪᠠᠢᠯᠠ᠃
46 ᠡᠭᠦᠨ ᠢ ᠰᠣᠨᠣᠰᠣᠭᠠᠳ᠂ ᠱᠧᠺᠧᠮ ᠤᠨ ᠪᠡᠬᠢᠯᠡᠯᠲᠡ ᠳᠦ ᠪᠠᠢᠭᠰᠠᠨ ᠪᠦᠬᠦ ᠢᠷᠭᠡᠨ ᠡᠯᠪᠧᠷᠢᠲ ᠤᠨ ᠳᠤᠭᠠᠩ ᠤᠨ ᠳᠣᠣᠷᠠᠳᠤ ᠬᠣᠩᠭᠢᠯ ᠳᠤ ᠣᠷᠣᠵᠠᠭᠠᠪᠠ᠃ 47 ᠢᠷᠭᠡᠳ ᠱᠧᠺᠧᠮ ᠤᠨ ᠪᠡᠬᠢᠯᠡᠯᠲᠡ ᠳᠦ ᠴᠤᠭᠯᠠᠷᠠᠭᠰᠠᠨ ᠢ ᠠᠪᠢᠮᠧᠯᠧᠺ ᠰᠣᠨᠣᠰᠣᠭᠠᠳ 48 ᠪᠦᠬᠦ ᠬᠠᠷᠢᠶᠠ ᠴᠡᠷᠢᠭ ᠲᠠᠢ ᠪᠠᠨ ᠬᠠᠮᠲᠤ ᠽᠠᠯᠮᠣᠨ ᠠᠭᠤᠯᠠᠨ ᠳᠤ ᠭᠠᠷᠪᠠ᠃ ᠠᠪᠢᠮᠧᠯᠧᠺ ᠭᠠᠷ ᠲᠠᠭᠠᠨ ᠰᠦᠬᠡ ᠪᠠᠷᠢᠵᠤ᠂ ᠮᠣᠳᠣᠨ ᠤ ᠮᠥᠴᠢᠷ ᠴᠠᠪᠴᠢᠨ ᠠᠪᠤᠭᠠᠳ᠂ ᠮᠥᠷᠥᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠨ᠂ ᠴᠡᠷᠢᠭ ᠤᠳ ᠲᠡᠭᠡᠨ᠄ 《ᠬᠤᠷᠳᠤᠯᠠ᠂ ᠲᠠ ᠨᠠᠷ ᠮᠢᠨᠦ ᠬᠢᠭᠰᠡᠨ ᠢ ᠬᠠᠷᠠᠭᠰᠠᠨ᠂ ᠳᠠᠭᠤᠷᠢᠶᠠᠨ ᠦᠢᠯᠡᠳᠦᠭᠲᠦᠨ》 ᠭᠡᠵᠦ ᠬᠡᠯᠡᠪᠡ᠃ 49 ᠴᠡᠷᠢᠭ ᠤᠳ ᠨᠢ ᠬᠥᠮᠦᠨ ᠪᠦᠷᠢ ᠨᠢᠭᠡ ᠮᠥᠴᠢᠷ ᠴᠠᠪᠴᠢᠵᠤ ᠠᠪᠤᠭᠠᠳ᠂ ᠠᠪᠢᠮᠧᠯᠧᠺ ᠢ ᠳᠠᠭᠠᠨ ᠶᠠᠪᠤᠵᠤ᠂ ᠲᠡᠳᠡᠭᠡᠷ ᠢ ᠳᠣᠣᠷᠠᠳᠤ ᠬᠣᠩᠭᠢᠯ ᠤᠨ ᠳᠡᠭᠡᠷᠡ ᠲᠠᠯᠪᠢᠵᠤ᠂ ᠳᠣᠲᠣᠷᠠ ᠨᠢ ᠪᠠᠢᠭᠰᠠᠳ ᠤᠨ ᠳᠡᠭᠡᠷᠡ ᠭᠠᠯ ᠠᠰᠠᠭᠠᠪᠠ᠃ ᠢᠩᠭᠢᠬᠦ ᠳᠦ ᠱᠧᠺᠧᠮ ᠤᠨ ᠪᠡᠬᠢᠯᠡᠯᠲᠡ ᠳᠦ ᠪᠠᠢᠭᠰᠠᠨ ᠮᠢᠩ᠋ᠭᠠ ᠣᠷᠴᠢᠮ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠪᠦᠭᠦᠳᠡᠭᠡᠷ ᠢᠶᠡᠨ ᠦᠬᠦᠵᠡᠭᠡᠭᠰᠡᠨ ᠪᠠᠢᠨᠠ᠃
50 ᠳᠠᠷᠠᠭᠠ ᠨᠢ ᠠᠪᠢᠮᠧᠯᠧᠺ ᠲᠧᠪᠧᠽ ᠤᠷᠤᠭᠤ ᠶᠠᠪᠤᠪᠠ᠃ ᠲᠡᠷᠡ ᠲᠧᠪᠧᠽ ᠤᠨ ᠬᠠᠷᠠᠯᠳᠤᠭᠠ ᠬᠤᠸᠠᠷᠠᠩᠨᠠᠵᠤ᠂ ᠲᠡᠭᠦᠨ ᠢ ᠡᠵᠡᠯᠡᠵᠡᠢ᠃ 51 ᠭᠡᠪᠡᠴᠦ ᠬᠣᠲᠠ ᠶᠢᠨ ᠲᠥᠪ ᠲᠤ ᠨᠢᠭᠡᠨ ᠪᠠᠲᠤ ᠪᠡᠬᠢᠯᠡᠯᠲᠡ ᠪᠠᠢᠯᠠ᠃ ᠬᠣᠲᠠ ᠶᠢᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠪᠦᠭᠦᠳᠡᠭᠡᠷ ᠲᠡᠰᠢ ᠪᠠᠨ ᠵᠢᠭᠤᠲᠠᠨ ᠣᠷᠣᠵᠤ᠂ ᠪᠢᠲᠡᠭᠦᠮᠵᠢᠯᠡᠭᠡᠳ᠂ ᠪᠡᠬᠢᠯᠡᠯᠲᠡ ᠶᠢᠨ ᠳᠡᠭᠡᠪᠦᠷ ᠥᠭᠡᠳᠡ ᠠᠪᠠᠷᠢᠨ ᠭᠠᠷᠪᠠ᠃ 52 ᠠᠪᠢᠮᠧᠯᠧᠺ ᠬᠦᠷᠴᠦ ᠪᠡᠬᠢᠯᠡᠯᠲᠡ ᠤᠷᠤᠭᠤ ᠳᠠᠭᠠᠷᠢᠪᠠ᠃ ᠲᠡᠷᠡ ᠭᠠᠯ ᠲᠠᠯᠪᠢᠬᠤ ᠪᠠᠷ ᠪᠡᠬᠢᠯᠡᠯᠲᠡ ᠶᠢᠨ ᠡᠭᠦᠳᠡᠨ ᠳᠦ ᠣᠢᠷᠠᠲᠤᠲᠠᠯᠠ 53 ᠨᠢᠭᠡᠨ ᠡᠮᠡᠭᠲᠡᠢ ᠠᠪᠢᠮᠧᠯᠧᠺ ᠤᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠡᠭᠡᠷᠮᠡ ᠶᠢᠨ ᠪᠤᠯᠤ ᠴᠢᠯᠠᠭᠤ ᠬᠠᠶᠠᠵᠤ ᠭᠠᠪᠠᠯᠠ ᠶᠢ ᠨᠢ ᠬᠠᠭᠠᠯᠪᠠ᠃ 54 ᠠᠪᠢᠮᠧᠯᠧᠺ ᠥᠪᠡᠷ ᠦᠨ ᠬᠢᠨᠢ ᠵᠡᠪᠰᠡᠭ ᠢ ᠪᠠᠷᠢᠭᠴᠢ ᠵᠠᠯᠠᠭᠤ ᠶᠢ ᠶᠠᠭᠠᠷᠠᠨ ᠳᠠᠭᠤᠳᠠᠵᠤ᠄ 《ᠴᠢ ᠢᠯᠳᠦ ᠪᠡᠨ ᠰᠤᠭᠤᠯᠤᠨ ᠨᠠᠮᠠᠶᠢ ᠠᠯᠠᠭᠲᠤᠨ᠃ ᠡᠰᠡ ᠲᠡᠭᠡᠪᠡᠯ ᠬᠥᠮᠦᠰ ᠨᠠᠮᠠᠶᠢ᠄ 〈ᠲᠡᠷᠡ ᠡᠮᠡᠭᠲᠡᠢ ᠬᠥᠮᠦᠨ ᠳᠦ ᠠᠯᠠᠭᠳᠠᠭᠰᠠᠨ ᠶᠤᠮ〉 ᠭᠡᠵᠦ ᠬᠡᠯᠡᠬᠦ ᠪᠣᠯᠣᠨᠠ》 ᠭᠡᠪᠡ᠃ ᠲᠡᠷᠡ ᠵᠠᠯᠠᠭᠤ ᠬᠠᠳᠬᠤᠭᠰᠠᠨ ᠳᠤ᠂ ᠲᠡᠷᠡ ᠦᠬᠦᠪᠡ᠃ 55 ᠠᠪᠢᠮᠧᠯᠧᠺ ᠤᠨ ᠦᠬᠦᠭᠰᠡᠨ ᠢ ᠢᠰᠷᠧᠯᠴᠦᠳ ᠬᠠᠷᠠᠭᠠᠳ ᠬᠥᠮᠦᠨ ᠪᠦᠷᠢ ᠭᠡᠷ ᠨᠤᠲᠤᠭ ᠤᠷᠤᠭᠤ ᠪᠠᠨ ᠬᠠᠷᠢᠵᠠᠭᠠᠪᠠ᠃ 56 ᠲᠡᠢᠨ ᠬᠦ ᠪᠤᠷᠬᠠᠨ ᠠᠪᠢᠮᠧᠯᠧᠺ ᠤᠨ ᠳᠠᠯᠠᠨ ᠠᠬᠠ ᠳᠡᠭᠦᠦ ᠪᠡᠨ ᠠᠯᠠᠵᠤ᠂ ᠡᠴᠢᠭᠡ ᠳᠡᠭᠡᠨ ᠦᠢᠯᠡᠳᠦᠭᠰᠡᠨ ᠬᠣᠷᠣᠨ ᠮᠠᠭᠤ ᠶᠢ ᠨᠢ ᠥᠪᠡᠷ ᠲᠤᠨᠢ ᠬᠠᠷᠢᠭᠤᠯᠵᠠᠢ᠃ 57 ᠪᠤᠷᠬᠠᠨ ᠪᠠᠰᠠ ᠱᠧᠺᠧᠮᠴᠦᠳ ᠦᠨ ᠠᠯᠢᠪᠠ ᠬᠣᠷᠣᠨ ᠮᠠᠭᠤ ᠶᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠬᠠᠷᠢᠭᠤᠯᠪᠠ᠃ ᠲᠡᠢᠨ ᠬᠦ ᠶᠧᠷᠦ᠋ᠪᠠᠯ ᠤᠨ ᠬᠥᠪᠡᠭᠦᠨ ᠶᠣᠲ᠋ᠠᠮ ᠤᠨ ᠬᠠᠷᠢᠶᠠᠯ ᠲᠡᠳᠡᠨ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠪᠠᠢᠯᠠ᠃