ᠰᠢᠭᠦᠭᠴᠢᠳ ᠠᠷᠪᠠᠨ ᠭᠤᠷᠪᠠ
ᠰᠠᠮᠰᠣᠨ ᠲᠥᠷᠥᠪᠡ
1 ᠢᠰᠷᠧᠯᠴᠦᠳ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠶᠢᠨ ᠡᠮᠦᠨᠡ ᠳᠠᠬᠢᠨᠲᠠ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠳᠦ᠂ ᠶᠣᠬᠣᠸᠠ ᠲᠡᠳᠡᠨ ᠢ ᠳᠥᠴᠢᠨ ᠵᠢᠯ ᠹᠢᠯᠢᠰᠲ᠋ᠴᠦᠳ ᠦᠨ ᠭᠠᠷ ᠲᠤ ᠲᠤᠰᠢᠶᠠᠪᠠ᠃
2 ᠽᠣᠷᠠ ᠨᠤᠲᠤᠭ ᠲᠤ᠂ ᠳ᠋ᠠᠨ ᠣᠪᠣᠭ ᠤᠨ ᠨᠢᠭᠡᠨ ᠪᠦᠯᠢ ᠳᠤ ᠮᠠᠨᠣᠶᠠ ᠭᠡᠳᠡᠭ ᠡᠷᠡ ᠪᠠᠢᠵᠠᠢ᠃ ᠲᠡᠭᠦᠨ ᠦ ᠡᠬᠡᠨᠡᠷ ᠬᠡᠭᠦᠰᠡᠷ ᠪᠣᠯᠬᠣᠷ ᠬᠡᠦᠬᠡᠳ ᠲᠥᠷᠥᠭᠦᠯᠦᠭᠡ ᠦᠭᠡᠢ ᠪᠠᠢᠪᠠ᠃ 3 ᠶᠣᠬᠣᠸᠠ ᠶᠢᠨ ᠡᠯᠴᠢ ᠲᠡᠷᠡ ᠡᠮᠡᠭᠲᠡᠢ ᠳᠦ ᠦᠵᠡᠭᠳᠡᠨ᠄ 《ᠬᠠᠷᠠ᠂ ᠴᠢ ᠬᠡᠭᠦᠰᠡᠷ ᠪᠣᠯᠬᠣᠷ ᠬᠡᠦᠬᠡᠳ ᠲᠥᠷᠥᠭᠦᠯᠦᠭᠡ ᠦᠭᠡᠢ ᠪᠣᠯᠪᠠᠴᠤ ᠵᠢᠷᠮᠦᠰᠦᠯᠡᠵᠦ ᠬᠦᠦ ᠲᠥᠷᠥᠭᠦᠯᠦᠨᠡ︕ 4 ᠣᠳᠣ ᠠᠴᠠ ᠡᠬᠢᠯᠡᠨ ᠪᠣᠯᠭᠣᠮᠵᠢᠲᠠᠢ ᠪᠠᠢᠵᠤ᠂ ᠠᠷᠢᠬᠢ ᠳᠠᠷᠠᠰᠤ ᠪᠦᠦ ᠤᠤᠭᠤ᠂ ᠶᠠᠮᠠᠷ ᠴᠤ ᠪᠤᠵᠠᠷ ᠶᠠᠭᠤᠮᠠ ᠪᠦᠦ ᠢᠳᠡ᠃ 5 ᠴᠢ ᠯᠠᠪᠲᠠᠢ ᠵᠢᠷᠮᠦᠰᠦᠯᠡᠵᠦ ᠬᠦᠦ ᠲᠥᠷᠥᠭᠦᠯᠬᠦ ᠪᠣᠯᠣᠨᠠ᠃ ᠲᠡᠷᠡ ᠬᠥᠪᠡᠭᠦᠨ ᠡᠬᠡ ᠶᠢᠨ ᠬᠡᠪᠡᠯᠢ ᠳᠤ ᠪᠠᠢᠬᠤ ᠠᠴᠠ ᠪᠠᠨ ᠪᠤᠷᠬᠠᠨ ᠳᠤ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠨᠠᠽᠢᠷ 12 ᠬᠥᠮᠦᠨ ᠪᠣᠯᠬᠣᠷ ᠲᠡᠭᠦᠨ ᠦ ᠲᠣᠯᠣᠭᠠᠢ ᠳᠤ ᠲᠣᠩ᠋ᠭᠣᠷᠠᠭ ᠬᠦᠷᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠲᠡᠷᠡ ᠢᠰᠷᠧᠯ ᠢ ᠹᠢᠯᠢᠰᠲ᠋ᠴᠦᠳ ᠦᠨ ᠰᠠᠪᠠᠷ ᠠᠴᠠ ᠠᠪᠤᠷᠠᠵᠤ ᠡᠬᠢᠯᠡᠨᠡ》 ᠭᠡᠪᠡ᠃ 6 ᠨᠥᠭᠥᠭᠡ ᠡᠮᠡᠭᠲᠡᠢ ᠨᠥᠬᠥᠷ ᠲᠡᠭᠡᠨ ᠣᠴᠢᠵᠤ᠄ 《ᠪᠤᠷᠬᠠᠨ ᠤ ᠬᠥᠮᠦᠨ ᠨᠠᠳᠠ ᠳᠡᠭᠡᠷᠡ ᠢᠷᠡᠪᠡ᠃ ᠲᠡᠷᠡ ᠪᠤᠷᠬᠠᠨ ᠤ ᠡᠯᠴᠢ ᠮᠡᠲᠦ ᠬᠠᠷᠠᠭᠳᠠᠵᠤ ᠶᠡᠬᠡᠳᠡ ᠠᠶᠤᠮᠰᠢᠭᠲᠠᠢ ᠪᠣᠯᠬᠣᠷ ᠲᠡᠭᠦᠨ ᠦ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠢ ᠪᠢ ᠯᠠᠪᠯᠠᠭᠰᠠᠨ ᠦᠭᠡᠢ᠂ ᠲᠡᠷᠡ ᠴᠤ ᠨᠠᠳᠠ ᠳᠤ ᠨᠡᠷᠡ ᠪᠡᠨ ᠬᠡᠯᠡᠭᠰᠡᠨ ᠦᠭᠡᠢ᠃ 7 ᠲᠡᠷᠡ ᠨᠠᠳᠠ ᠳᠤ ᠠᠢᠯᠠᠳᠤᠨ᠄ 〈ᠬᠠᠷᠠ᠂ ᠴᠢ ᠵᠢᠷᠮᠦᠰᠦᠯᠡᠵᠦ ᠬᠦᠦ ᠲᠥᠷᠥᠭᠦᠯᠦᠨᠡ᠃ ᠣᠳᠣ ᠠᠴᠠ ᠡᠬᠢᠯᠡᠨ ᠠᠷᠢᠬᠢ ᠳᠠᠷᠠᠰᠤ ᠪᠦᠦ ᠤᠤᠭᠤ᠂ ᠪᠤᠵᠠᠷ ᠶᠠᠭᠤᠮᠠ ᠪᠦᠦ ᠢᠳᠡ᠂ ᠤᠴᠢᠷ ᠨᠢ ᠬᠥᠪᠡᠭᠦᠨ ᠴᠢᠨᠢ ᠡᠬᠡ ᠶᠢᠨ ᠬᠡᠪᠡᠯᠢ ᠳᠤ ᠪᠠᠢᠬᠤ ᠠᠴᠠ ᠪᠠᠨ ᠦᠬᠦᠬᠦ ᠡᠳᠦᠷ ᠬᠦᠷᠲᠡᠯᠡ ᠪᠡᠨ ᠪᠤᠷᠬᠠᠨ ᠳᠤ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠨᠠᠽᠢᠷ ᠬᠥᠮᠦᠨ ᠪᠣᠯᠬᠤ ᠶᠤᠮ〉 ᠭᠡᠰᠡᠨ》 ᠭᠡᠪᠡ᠃
8 ᠮᠠᠨᠣᠶᠠ ᠶᠣᠬᠣᠸᠠ ᠳᠤ ᠳᠠᠭᠠᠳᠬᠠᠨ᠄ 《ᠡᠵᠡᠨ ᠮᠢᠨᠢ᠂ ᠲᠠᠨ ᠠᠴᠠ ᠭᠤᠶᠤᠶᠠ᠃ ᠢᠯᠡᠭᠡᠭᠰᠡᠨ ᠪᠤᠷᠬᠠᠨ ᠤ ᠬᠥᠮᠦᠨ ᠢᠶᠡᠨ ᠳᠠᠬᠢᠨ ᠪᠢᠳᠡᠨ ᠤᠷᠤᠭᠤ ᠢᠷᠡᠭᠦᠯᠵᠦ᠂ ᠲᠥᠷᠥᠬᠦ ᠬᠥᠪᠡᠭᠦᠨ ᠳᠡᠭᠡᠨ ᠶᠠᠭᠤ ᠬᠢᠬᠦ ᠶᠣᠰᠣᠲᠠᠢ ᠶᠢ ᠮᠢᠨᠢ ᠵᠢᠭᠠᠵᠤ ᠥᠭᠭᠥᠭᠡᠴᠢ》 ᠭᠡᠰᠡᠨ ᠳᠦ᠂ 9 ᠪᠤᠷᠬᠠᠨ ᠮᠠᠨᠣᠶᠠ ᠶᠢᠨ ᠳᠠᠭᠤ ᠶᠢ ᠰᠣᠨᠣᠰᠴᠠᠢ᠃ ᠥᠨᠥᠬᠢ ᠡᠮᠡᠭᠲᠡᠢ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ ᠳᠤ ᠰᠠᠭᠤᠵᠤ ᠪᠠᠢᠬᠤ ᠳᠤ᠂ ᠪᠤᠷᠬᠠᠨ ᠤ ᠡᠯᠴᠢ ᠳᠠᠬᠢᠨ ᠲᠡᠭᠦᠨ ᠤᠷᠤᠭᠤ ᠢᠷᠡᠯᠡ᠃ ᠨᠥᠬᠥᠷ ᠮᠠᠨᠣᠶᠠ ᠨᠢ ᠬᠠᠵᠠᠭᠤ ᠳᠤᠨᠢ ᠪᠠᠢᠭᠰᠠᠨ ᠦᠭᠡᠢ ᠪᠣᠯᠬᠣᠷ 10 ᠡᠮᠡᠭᠲᠡᠢ ᠶᠠᠭᠠᠷᠠᠨ ᠭᠦᠶᠦᠵᠦ ᠨᠥᠬᠥᠷ ᠲᠡᠭᠡᠨ ᠣᠴᠢᠭᠠᠳ᠄ 《ᠬᠥᠶᠶ᠂ ᠲᠡᠷᠡ ᠡᠳᠦᠷ ᠢᠷᠡᠭᠰᠡᠨ ᠬᠥᠮᠦᠨ ᠨᠠᠳᠠ ᠳᠤ ᠰᠠᠶ᠋ᠢᠬᠠᠨ ᠦᠵᠡᠭᠳᠡᠯᠡ︕》 ᠭᠡᠵᠦ ᠬᠡᠯᠡᠪᠡ᠃ 11 ᠮᠠᠨᠣᠶᠠ ᠪᠣᠰᠴᠤ ᠡᠬᠡᠨᠡᠷ ᠢᠶᠡᠨ ᠳᠠᠭᠠᠵᠤ ᠶᠠᠪᠤᠭᠠᠳ᠂ ᠨᠥᠭᠥᠭᠡ ᠬᠥᠮᠦᠨ ᠳᠡᠭᠡᠷᠡ ᠬᠦᠷᠴᠦ᠄ 《ᠡᠨᠡ ᠡᠮᠡᠭᠲᠡᠢ ᠲᠡᠢ ᠶᠠᠷᠢᠭᠰᠠᠨ ᠬᠥᠮᠦᠨ ᠲᠠ ᠮᠥᠨ ᠤᠤ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠪᠢ ᠮᠥᠨ ᠪᠠᠢᠨᠠ》 ᠭᠡᠪᠡ᠃ 12 ᠮᠠᠨᠣᠶᠠ᠄ 《ᠲᠠᠨ ᠤ ᠦᠭᠡ ᠪᠡᠶᠡᠯᠡᠭᠳᠡᠬᠦ ᠳᠦ᠂ ᠡᠨᠡ ᠬᠥᠪᠡᠭᠦᠨ ᠦ ᠠᠮᠢᠳᠤᠷᠠᠯ ᠪᠣᠯᠣᠨ ᠠᠵᠢᠯ ᠳᠤ ᠶᠠᠮᠠᠷ ᠶᠣᠰᠣ ᠵᠢᠷᠤᠮ ᠪᠠᠢᠬᠤ ᠶᠣᠰᠣᠲᠠᠢ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 13 ᠶᠣᠬᠣᠸᠠ ᠶᠢᠨ ᠡᠯᠴᠢ ᠬᠠᠷᠢᠭᠤ ᠳᠤᠨᠢ᠄ 《ᠴᠢᠨᠦ ᠡᠬᠡᠨᠡᠷ ᠬᠡᠯᠡᠭᠰᠡᠨ ᠪᠦᠬᠦᠨ ᠳᠦ ᠮᠢᠨᠢ ᠠᠩ᠋ᠬᠠᠷᠤᠯ ᠲᠠᠯᠪᠢᠬᠤ ᠶᠣᠰᠣᠲᠠᠢ᠃ 14 ᠲᠡᠷᠡ ᠪᠡᠷ ᠦᠵᠦᠮ ᠦᠨ ᠮᠣᠳᠣᠨ ᠠᠴᠠ ᠭᠠᠷᠤᠭᠰᠠᠨ ᠪᠣᠯᠭᠠᠨ ᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ ᠪᠣᠯᠬᠤ ᠦᠭᠡᠢ᠃ ᠪᠤᠵᠠᠷ ᠶᠠᠭᠤᠮᠠ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠡᠢᠨ ᠬᠦ ᠲᠤᠰᠢᠶᠠᠭᠰᠠᠨ ᠪᠦᠬᠦᠨ ᠢ ᠮᠢᠨᠢ ᠰᠠᠬᠢᠬᠤ ᠶᠣᠰᠣᠲᠠᠢ》 ᠭᠡᠪᠡ᠃
15 ᠮᠠᠨᠣᠶᠠ ᠶᠣᠬᠣᠸᠠ ᠶᠢᠨ ᠡᠯᠴᠢ ᠳᠤ᠄ 《ᠲᠠ ᠮᠠᠨ ᠤ ᠡ᠊ᠨᠳᠡ ᠲᠦᠷ ᠰᠠᠭᠠᠲᠠᠨᠠ ᠤᠤ︖ ᠪᠢᠳᠡ ᠲᠠᠨ ᠳᠤ ᠨᠢᠭᠡ ᠢᠰᠢᠭᠡ ᠲᠥᠬᠥᠭᠡᠷᠦᠶᠡ》 ᠭᠡᠰᠡᠨ ᠳᠦ᠂ 16 ᠶᠣᠬᠣᠸᠠ ᠶᠢᠨ ᠡᠯᠴᠢ ᠮᠠᠨᠣᠶᠠ ᠳᠤ᠄ 《ᠴᠢ ᠨᠠᠮᠠᠶᠢ ᠰᠠᠭᠠᠲᠠᠭᠤᠯᠤᠭᠰᠠᠨ ᠴᠤ ᠪᠢ ᠴᠢᠨᠦ ᠢᠳᠡᠭᠡᠨ ᠡᠴᠡ ᠢᠳᠡᠬᠦ ᠦᠭᠡᠢ᠃ ᠬᠠᠷᠢᠨ ᠴᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠶᠡ ᠭᠡᠪᠡᠯ᠂ ᠲᠡᠭᠦᠨ ᠢ ᠪᠠᠨ ᠶᠣᠬᠣᠸᠠ ᠳᠤ ᠡᠷᠭᠦᠭᠲᠦᠨ》 ᠭᠡᠪᠡ᠃ ᠮᠠᠨᠣᠶᠠ ᠲᠡᠭᠦᠨ ᠢ ᠶᠣᠬᠣᠸᠠ ᠶᠢᠨ ᠡᠯᠴᠢ ᠭᠡᠵᠦ ᠮᠡᠳᠡᠭᠡ ᠦᠭᠡᠢ ᠪᠠᠢᠪᠠ᠃ 17 ᠮᠠᠨᠣᠶᠠ ᠶᠣᠬᠣᠸᠠ ᠶᠢᠨ ᠡᠯᠴᠢ ᠳᠤ᠄ 《ᠲᠠᠨ ᠤ ᠠᠯᠳᠠᠷ ᠬᠡᠨ ᠪᠤᠢ︖ ᠲᠠᠨ ᠤ ᠦᠭᠡ ᠪᠡᠶᠡᠯᠡᠭᠳᠡᠬᠦ ᠳᠦ ᠲᠠᠨ ᠳᠤ ᠪᠢᠳᠡ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠦᠶᠡ》 ᠭᠡᠬᠦ ᠳᠦ᠂ 18 ᠶᠣᠬᠣᠸᠠ ᠶᠢᠨ ᠡᠯᠴᠢ ᠲᠡᠭᠦᠨ ᠳᠦ᠄ 《ᠮᠢᠨᠦ ᠨᠡᠷᠡ ᠶᠢ ᠠᠰᠠᠭᠤᠵᠤ ᠶᠠᠭᠠᠬᠢᠬᠤ ᠶᠤᠮ ᠪᠤᠢ︖ ᠲᠡᠷᠡ ᠪᠣᠯ ᠤᠬᠠᠭᠠᠷᠠᠭᠳᠠᠰᠢ ᠦᠭᠡᠢ 13 ᠶᠤᠮ》 ᠭᠡᠯᠡ᠃
19 ᠮᠠᠨᠣᠶᠠ ᠢᠳᠡᠭᠡᠨ ᠲᠠᠬᠢᠯ ᠲᠠᠢ ᠬᠠᠮᠲᠤ ᠨᠢᠭᠡ ᠢᠰᠢᠭᠡ ᠠᠪᠴᠢᠷᠠᠵᠤ᠂ ᠬᠠᠳᠠᠨ ᠳᠡᠭᠡᠷᠡ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠳᠦ᠂ ᠶᠣᠬᠣᠸᠠ ᠶᠢᠨ ᠡᠯᠴᠢ ᠮᠠᠨᠣᠶᠠ ᠪᠣᠯᠣᠨ ᠡᠬᠡᠨᠡᠷ ᠦᠨ ᠬᠢᠨᠢ ᠨᠢᠳᠦᠨ ᠡᠮᠦᠨᠡ ᠭᠠᠢᠬᠠᠮᠰᠢᠭ ᠢ ᠦᠢᠯᠡᠳᠴᠡᠢ᠃ 20 ᠭᠠᠯ ᠤᠨ ᠳᠥᠯᠥ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠡᠴᠡ ᠲᠩᠷᠢ ᠥᠭᠡᠳᠡ ᠳᠦᠷᠡᠯᠵᠡᠭᠰᠡᠨ ᠳᠦ᠂ ᠶᠣᠬᠣᠸᠠ ᠶᠢᠨ ᠡᠯᠴᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠳᠥᠯᠥ ᠶᠢᠨ ᠳᠤᠮᠳᠠᠭᠤᠷ ᠳᠡᠭᠡᠭᠰᠢᠯᠡᠨ ᠣᠳᠪᠠ᠃ ᠮᠠᠨᠣᠶᠠ ᠪᠣᠯᠣᠨ ᠲᠡᠭᠦᠨ ᠦ ᠡᠬᠡᠨᠡᠷ ᠡᠭᠦᠨ ᠢ ᠬᠠᠷᠠᠭᠠᠳ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠪᠥᠬᠥᠢᠪᠡ᠃ 21 ᠶᠣᠬᠣᠸᠠ ᠶᠢᠨ ᠡᠯᠴᠢ ᠮᠠᠨᠣᠶᠠ ᠪᠣᠯᠣᠨ ᠲᠡᠭᠦᠨ ᠦ ᠡᠬᠡᠨᠡᠷ ᠲᠦ ᠳᠠᠬᠢᠭᠠᠳ ᠦᠵᠡᠭᠳᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠦᠶᠡ ᠳᠦ ᠮᠠᠨᠣᠶᠠ ᠲᠡᠭᠦᠨ ᠢ ᠶᠣᠬᠣᠸᠠ ᠶᠢᠨ ᠡᠯᠴᠢ ᠪᠠᠢᠭᠰᠠᠨ ᠢ ᠨᠢ ᠮᠡᠳᠡᠪᠡ᠃ 22 ᠮᠠᠨᠣᠶᠠ ᠡᠬᠡᠨᠡᠷ ᠲᠡᠭᠡᠨ᠄ 《ᠪᠢᠳᠡ ᠪᠤᠷᠬᠠᠨ ᠢ ᠦᠵᠡᠭᠰᠡᠨ ᠲᠤᠯᠠ ᠵᠠᠢᠯᠠᠰᠢ ᠦᠭᠡᠢ ᠦᠬᠦᠨᠡ》 ᠭᠡᠬᠦ ᠳᠦ᠂ 23 ᠡᠬᠡᠨᠡᠷ ᠨᠢ ᠲᠡᠭᠦᠨ ᠳᠦ᠄ 《ᠬᠡᠷᠪᠡ ᠶᠣᠬᠣᠸᠠ ᠪᠢᠳᠡᠨ ᠢ ᠠᠯᠠᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠭᠰᠠᠨ ᠪᠣᠯ᠂ ᠲᠡᠷᠡ ᠪᠢᠳᠡᠨ ᠦ ᠭᠠᠷ ᠠᠴᠠ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠤᠶᠤ ᠢᠳᠡᠭᠡᠨ ᠲᠠᠬᠢᠯ ᠢ ᠠᠪᠬᠤ ᠦᠭᠡᠢ ᠪᠠᠢᠬᠤ ᠪᠠᠢᠭᠰᠠᠨ᠂ ᠡᠨᠡ ᠪᠦᠭᠦᠳᠡ ᠶᠢ ᠴᠤ ᠪᠢᠳᠡᠨ ᠳᠦ ᠦᠵᠡᠭᠦᠯᠬᠦ ᠦᠭᠡᠢ᠂ ᠪᠠᠰᠠ ᠡᠳᠡᠭᠡᠷ ᠢ ᠪᠢᠳᠡᠨ ᠳᠦ ᠰᠣᠨᠣᠰᠬᠠᠬᠤ ᠴᠤ ᠦᠭᠡᠢ ᠪᠠᠢᠬᠤ ᠪᠠᠢᠭᠰᠠᠨ》 ᠭᠡᠪᠡ᠃
24 ᠲᠡᠷᠡ ᠡᠮᠡᠭᠲᠡᠢ ᠬᠥᠪᠡᠭᠦᠨ ᠲᠥᠷᠥᠭᠦᠯᠵᠦ᠂ ᠲᠡᠭᠦᠨ ᠢ ᠰᠠᠮᠰᠣᠨ ᠭᠡᠵᠦ ᠨᠡᠷᠡᠯᠡᠪᠡ᠃ ᠬᠥᠪᠡᠭᠦᠨ ᠥᠰᠴᠦ ᠥᠭᠡᠯᠡᠢ ᠪᠣᠯᠬᠤ ᠳᠤ᠂ ᠶᠣᠬᠣᠸᠠ ᠲᠡᠭᠦᠨ ᠢ ᠢᠪᠡᠭᠡᠪᠡ᠃ 25 ᠲᠡᠭᠦᠨ ᠢ ᠽᠣᠷᠠ᠂ ᠡᠱᠲ᠋ᠠᠶᠣᠯ ᠤᠨ ᠬᠣᠭᠣᠷᠣᠨᠳᠣᠬᠢ ᠮᠠᠬᠠᠨᠧᠳᠠᠨ ᠳᠤ ᠪᠠᠢᠬᠤ ᠳᠤ᠂ ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠲᠡᠭᠦᠨ ᠢ ᠬᠥᠳᠡᠯᠭᠡᠵᠦ ᠡᠬᠢᠯᠡᠪᠡ᠃