ᠰᠢᠭᠦᠭᠴᠢᠳ ᠳᠥᠷᠪᠡ
ᠳ᠋ᠧᠪᠣᠷᠠ ᠪᠣᠯᠣᠨ ᠪᠠᠷᠠᠺ
1 ᠶᠧᠾᠦ᠋ᠳ᠋ ᠥᠭᠡᠳᠡ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠢᠰᠷᠧᠯᠴᠦᠳ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠶᠢᠨ ᠡᠮᠦᠨᠡ ᠳᠠᠬᠢᠨ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠳᠦ᠂ 2 ᠶᠣᠬᠣᠸᠠ ᠲᠡᠳᠡᠨ ᠢ ᠬᠠᠽᠣᠷ ᠲᠤ ᠬᠠᠭᠠᠨᠴᠢᠯᠠᠵᠤ ᠪᠤᠢ ᠺᠠᠨᠠᠨ ᠤ ᠬᠠᠭᠠᠨ ᠶᠠᠪᠢᠨ ᠤ ᠭᠠᠷ ᠲᠤ ᠲᠤᠰᠢᠶᠠᠪᠠ᠃ ᠶᠠᠪᠢᠨ ᠤ ᠴᠡᠷᠢᠭ ᠤᠨ ᠵᠠᠩᠵᠤᠨ ᠢ ᠰᠢᠰᠧᠷᠠ ᠭᠡᠳᠡᠭ᠂ ᠲᠡᠷᠡ ᠬᠠᠷᠢᠴᠤᠳ ᠤᠨ ᠨᠤᠲᠤᠭ ᠬᠠᠷᠣᠱᠧᠲ ᠲᠤ ᠰᠠᠭᠤᠵᠤ ᠪᠠᠢᠪᠠ᠃ 3 ᠲᠡᠭᠦᠨ ᠳᠦ ᠶᠢᠰᠦᠨ ᠵᠠᠭᠤᠨ ᠲᠡᠮᠦᠷ ᠲᠡᠷᠭᠡ ᠲᠠᠢ ᠪᠠᠢᠳᠠᠭ ᠪᠠ ᠬᠣᠷᠢᠨ ᠵᠢᠯ ᠤᠨ ᠲᠤᠷᠰᠢ ᠢᠰᠷᠧᠯᠴᠦᠳ ᠢ ᠬᠠᠷᠭᠢᠰᠯᠠᠨ ᠳᠠᠷᠤᠯᠠᠭᠰᠠᠨ ᠤᠴᠢᠷ ᠠᠴᠠ ᠢᠰᠷᠧᠯᠴᠦᠳ ᠶᠣᠬᠣᠸᠠ ᠤᠷᠤᠭᠤ ᠬᠠᠰᠬᠢᠷᠤᠭᠰᠠᠨ ᠪᠠᠢᠯᠠ᠃
4 ᠲᠡᠷᠡ ᠦᠶᠡ ᠳᠦ ᠢᠰᠷᠧᠯ ᠤᠨ ᠰᠢᠭᠦᠭᠴᠢ ᠨᠢ ᠯᠠᠫᠢᠳᠣᠲ ᠤᠨ ᠡᠬᠡᠨᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠡᠮᠡᠭᠲᠡᠢ ᠳ᠋ᠧᠪᠣᠷᠠ ᠪᠠᠢᠯᠠ᠃ 5 ᠲᠡᠷᠡ ᠡᠮᠡᠭᠲᠡᠢ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠤᠨ ᠷᠠᠮᠠ ᠪᠣᠯᠣᠨ ᠪᠧᠲ᠋ᠧᠯ ᠤᠨ ᠬᠣᠭᠣᠷᠣᠨᠳᠣ ᠪᠤᠢ ᠳ᠋ᠧᠪᠣᠷᠠ ᠶᠢᠨ ᠬᠢᠯᠭᠠᠰᠤᠲᠤ ᠮᠣᠳᠣᠨ ᠤ ᠳᠣᠣᠷᠠ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠪᠥᠭᠡᠳ ᠢᠰᠷᠧᠯᠴᠦᠳ ᠲᠡᠭᠦᠨ ᠳᠡᠭᠡᠷᠡ ᠣᠴᠢᠵᠤ ᠰᠢᠭᠦᠯᠭᠡᠳᠡᠭ ᠪᠠᠢᠪᠠ᠃ 6 ᠨᠢᠭᠡᠨ ᠡᠳᠦᠷ ᠳ᠋ᠧᠪᠣᠷᠠ ᠨᠠᠹᠲ᠋ᠠᠯᠢ ᠶᠢᠨ ᠺᠧᠳᠧᠱ ᠲᠤ ᠪᠠᠢᠭᠠ ᠠᠪᠢᠨᠣᠶᠠᠮ ᠤᠨ ᠬᠥᠪᠡᠭᠦᠨ ᠪᠠᠷᠠᠺ ᠲᠤ ᠦᠭᠡ ᠢᠯᠡᠭᠡᠨ᠂ ᠲᠡᠭᠦᠨ ᠢ ᠳᠠᠭᠤᠳᠠᠭᠤᠯᠵᠤ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠲᠠᠨ ᠳᠤ ᠲᠤᠰᠢᠶᠠᠬᠤ ᠳᠠᠭᠠᠨ᠄ 〈ᠴᠢ ᠨᠠᠹᠲ᠋ᠠᠯᠢᠴᠤᠳ ᠪᠣᠯᠣᠨ ᠽᠧᠪᠦ᠋ᠯᠣᠨᠴᠤᠳ ᠠᠴᠠ ᠲᠦᠮᠡᠨ ᠬᠥᠮᠦᠨ ᠠᠪᠴᠤ᠂ ᠲᠡᠳᠡᠨ ᠢ ᠳᠠᠭᠠᠭᠤᠯᠤᠨ ᠲᠠᠪᠣᠷ ᠠᠭᠤᠯᠠᠨ ᠳᠤ ᠭᠠᠷ᠃ 7 ᠪᠢ ᠶᠠᠪᠢᠨ ᠤ ᠴᠡᠷᠢᠭ ᠤᠨ ᠵᠠᠩᠵᠤᠨ ᠰᠢᠰᠧᠷᠠ ᠶᠢ ᠲᠡᠷᠭᠡ ᠨᠦᠭᠦᠳ ᠲᠡᠢ ᠨᠢ᠂ ᠮᠥᠨ ᠴᠡᠷᠢᠭ ᠲᠠᠢ ᠨᠢ ᠺᠢᠱᠣᠨ ᠭᠣᠣᠯ ᠤᠷᠤᠭᠤ ᠠᠪᠴᠢᠷᠠᠵᠤ᠂ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠶᠠ〉 ᠭᠡᠰᠡᠨ》 ᠭᠡᠪᠡ᠃ 8 ᠪᠠᠷᠠᠺ ᠲᠡᠭᠦᠨ ᠳᠦ᠄ 《ᠬᠡᠷᠪᠡ ᠲᠠ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠪᠠᠯ᠂ ᠪᠢ ᠶᠠᠪᠤᠨᠠ᠃ ᠲᠠ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ ᠪᠣᠯ ᠪᠢ ᠶᠠᠪᠤᠬᠤ ᠦᠭᠡᠢ》 ᠭᠡᠰᠡᠨ ᠳᠦ᠂ 9 ᠳ᠋ᠧᠪᠣᠷᠠ᠄ 《ᠪᠢ ᠯᠠᠪᠲᠠᠢ ᠲᠠᠨ ᠲᠠᠢ ᠬᠠᠮᠲᠤ ᠶᠠᠪᠤᠨᠠ᠂ ᠬᠠᠷᠢᠨ ᠲᠠ ᠡᠨᠡ ᠠᠶᠠᠨ ᠳᠤ ᠠᠯᠳᠠᠷ ᠬᠦᠨᠳᠦ ᠶᠢ ᠣᠯᠬᠤ ᠦᠭᠡᠢ᠂ ᠶᠣᠬᠣᠸᠠ ᠰᠢᠰᠧᠷᠠ ᠶᠢ ᠨᠢᠭᠡᠨ ᠡᠮᠡᠭᠲᠡᠢ ᠶᠢᠨ ᠭᠠᠷ ᠲᠤ ᠣᠷᠣᠭᠤᠯᠬᠤ ᠪᠣᠯᠣᠨᠠ︕》 ᠭᠡᠪᠡ᠃ ᠲᠡᠢᠨ ᠬᠦ ᠳ᠋ᠧᠪᠣᠷᠠ ᠪᠠᠷᠠᠺ ᠲᠠᠢ ᠬᠠᠮᠲᠤ ᠺᠧᠳᠧᠱ ᠤᠷᠤᠭᠤ ᠶᠠᠪᠤᠵᠠᠢ᠃ 10 ᠪᠠᠷᠠᠺ ᠽᠧᠪᠦ᠋ᠯᠣᠨᠴᠤᠳ ᠪᠣᠯᠣᠨ ᠨᠠᠹᠲ᠋ᠠᠯᠢᠴᠤᠳ ᠢ ᠳᠠᠭᠤᠳᠠᠨ ᠺᠧᠳᠧᠱ ᠲᠤ ᠴᠤᠭᠯᠠᠭᠤᠯᠬᠤ ᠳᠤ᠂ ᠲᠦᠮᠡᠨ ᠬᠥᠮᠦᠨ ᠲᠡᠭᠦᠨ ᠢ ᠳᠠᠭᠠᠭᠰᠠᠨ ᠪᠥᠭᠡᠳ ᠳ᠋ᠧᠪᠣᠷᠠ ᠴᠤ ᠲᠡᠭᠦᠨ ᠲᠡᠢ ᠬᠠᠮᠲᠤ ᠶᠠᠪᠤᠪᠠ᠃
11 ᠲᠡᠷᠡ ᠦᠶᠡ ᠳᠦ ᠺᠧᠨ ᠬᠥᠮᠦᠨ᠂ ᠮᠣᠰᠧ ᠶᠢᠨ ᠬᠠᠳᠠᠮ ᠡᠴᠢᠭᠡ ᠬᠣᠪᠠᠪ ᠤᠨ ᠬᠣᠢᠴᠢ ᠪᠣᠯᠬᠤ ᠾᠧᠪᠧᠷ ᠪᠤᠰᠤᠳ ᠺᠧᠨᠴᠦᠳ ᠡᠴᠡ ᠰᠠᠯᠵᠤ᠂ ᠺᠧᠳᠧᠱ ᠤᠨ ᠣᠢᠷᠠᠯᠴᠠᠭᠠ ᠬᠦᠷᠴᠦ ᠽᠠᠨᠠᠨᠢᠮ ᠳᠠᠬᠢ ᠴᠠᠷᠠᠰᠤᠨ ᠮᠣᠳᠣᠨ ᠤ ᠳᠡᠷᠭᠡᠳᠡ ᠮᠠᠢᠬᠠᠨ ᠢᠶᠠᠨ ᠪᠣᠰᠬᠠᠭᠰᠠᠨ ᠪᠠᠢᠯᠠ᠃
12 ᠬᠥᠮᠦᠰ ᠰᠢᠰᠧᠷᠠ ᠳᠤ ᠠᠪᠢᠨᠣᠶᠠᠮ ᠤᠨ ᠬᠥᠪᠡᠭᠦᠨ ᠪᠠᠷᠠᠺ ᠤᠨ ᠲᠠᠪᠣᠷ ᠠᠭᠤᠯᠠᠨ ᠳᠤ ᠭᠠᠷᠤᠭᠰᠠᠨ ᠢ ᠮᠡᠳᠡᠭᠳᠡᠭᠰᠡᠨ ᠳᠦ᠂ 13 ᠰᠢᠰᠧᠷᠠ ᠶᠢᠰᠦᠨ ᠵᠠᠭᠤᠨ ᠲᠡᠮᠦᠷ ᠲᠡᠷᠭᠡ ᠪᠡᠨ ᠠᠪᠴᠤ᠂ ᠬᠠᠷᠢᠶᠠ ᠴᠡᠷᠢᠭ ᠢᠶᠠᠨ ᠴᠤᠭᠯᠠᠭᠤᠯᠤᠨ ᠬᠠᠷᠢᠴᠤᠳ ᠤᠨ ᠨᠤᠲᠤᠭ ᠬᠠᠷᠣᠱᠧᠲ ᠠᠴᠠ ᠪᠠᠨ ᠺᠢᠱᠣᠨ ᠭᠣᠣᠯ ᠤᠷᠤᠭᠤ ᠬᠥᠳᠡᠯᠪᠡ᠃ 14 ᠳ᠋ᠧᠪᠣᠷᠠ ᠪᠠᠷᠠᠺ ᠲᠤ᠄ 《ᠶᠠᠪᠤ︕ ᠶᠣᠬᠣᠸᠠ ᠥᠨᠥᠳᠥᠷ ᠰᠢᠰᠧᠷᠠ ᠶᠢ ᠲᠠᠨ ᠤ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ᠃ ᠶᠣᠬᠣᠸᠠ ᠴᠢᠨᠦ ᠡᠮᠦᠨᠡ ᠶᠠᠪᠤᠭᠰᠠᠨ ᠰᠢᠦ︕》 ᠭᠡᠪᠡ᠃ ᠢᠩᠭᠢᠭᠡᠳ ᠪᠠᠷᠠᠺ ᠲᠦᠮᠡᠨ ᠬᠥᠮᠦᠨ ᠳᠠᠭᠠᠭᠤᠯᠤᠨ ᠲᠠᠪᠣᠷ ᠠᠭᠤᠯᠠᠨ ᠠᠴᠠ ᠪᠠᠭᠤᠯᠠ᠃ 15 ᠶᠣᠬᠣᠸᠠ ᠪᠠᠷᠠᠺ ᠤᠨ ᠡᠮᠦᠨᠡ ᠰᠢᠰᠧᠷᠠ ᠪᠣᠯᠣᠨ ᠲᠡᠭᠦᠨ ᠦ ᠪᠦᠬᠦ ᠲᠡᠷᠭᠡ᠂ ᠪᠦᠬᠦ ᠴᠡᠷᠢᠭ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠰᠦᠢᠷᠡᠭᠦᠯᠦᠭᠰᠡᠨ ᠳᠦ᠂ ᠰᠢᠰᠧᠷᠠ ᠲᠡᠷᠭᠡᠨ ᠡᠴᠡ ᠪᠡᠨ ᠪᠠᠭᠤᠵᠤ᠂ ᠶᠠᠪᠠᠭᠠᠨ ᠢᠶᠠᠷ ᠵᠢᠭᠤᠲᠠᠪᠠ᠃ 16 ᠪᠠᠷᠠᠺ ᠲᠡᠭᠦᠨ ᠦ ᠲᠡᠷᠭᠡ ᠨᠦᠭᠦᠳ ᠪᠣᠯᠣᠨ ᠴᠡᠷᠢᠭ ᠤᠳ ᠢ ᠬᠠᠷᠢᠴᠤᠳ ᠤᠨ ᠨᠤᠲᠤᠭ ᠬᠠᠷᠣᠱᠧᠲ ᠬᠦᠷᠲᠡᠯᠡ ᠬᠥᠭᠡᠭᠡᠨ᠂ ᠰᠢᠰᠧᠷᠠ ᠶᠢᠨ ᠴᠡᠷᠢᠭ ᠤᠳ ᠠᠴᠠ ᠨᠢᠭᠡ ᠶᠢ ᠨᠢ ᠴᠤ ᠦᠯᠡᠳᠡᠭᠡᠯ ᠦᠭᠡᠢ ᠪᠦᠬᠦᠨ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠰᠥᠨᠥᠭᠡᠭᠰᠡᠨ ᠪᠠᠢᠨᠠ᠃
17 ᠬᠠᠷᠢᠨ ᠰᠢᠰᠧᠷᠠ ᠶᠠᠪᠠᠭᠠᠨ ᠵᠢᠭᠤᠲᠠᠭᠰᠠᠭᠠᠷ ᠺᠧᠨ ᠬᠥᠮᠦᠨ ᠾᠧᠪᠧᠷ ᠤᠨ ᠡᠬᠡᠨᠡᠷ ᠶᠠᠶᠧᠯ ᠤᠨ ᠮᠠᠢᠬᠠᠨ ᠳᠤ ᠬᠦᠷᠪᠡ᠃ ᠤᠤᠯ ᠨᠢ ᠬᠠᠽᠣᠷ ᠤᠨ ᠬᠠᠭᠠᠨ ᠶᠠᠪᠢᠨ ᠪᠣᠯᠣᠨ ᠺᠧᠨ ᠬᠥᠮᠦᠨ ᠾᠧᠪᠧᠷ ᠤᠨ ᠭᠡᠷ ᠪᠦᠯᠢ ᠬᠣᠭᠣᠷᠣᠨᠳᠣ ᠪᠠᠨ ᠡᠪ ᠲᠡᠢ ᠪᠠᠢᠪᠠ᠃ 18 ᠶᠠᠶᠧᠯ ᠰᠢᠰᠧᠷᠠ ᠶᠢ ᠤᠭᠲᠤᠬᠤ ᠪᠠᠷ ᠭᠠᠷᠴᠤ ᠢᠷᠡᠭᠡᠳ᠂ ᠲᠡᠭᠦᠨ ᠳᠦ᠄ 《ᠲᠠᠪᠠᠲᠠᠢ ᠮᠣᠷᠢᠯᠠᠨᠠ ᠤᠤ︖ ᠡᠵᠡᠨᠲᠡᠨ ᠮᠢᠨᠢ᠃ ᠮᠠᠨ ᠤ ᠳᠤ ᠣᠷᠣᠵᠤ ᠬᠠᠢᠷᠠᠯᠠ᠂ ᠪᠦᠦ ᠠᠶᠤ》 ᠭᠡᠪᠡ᠃ ᠰᠢᠰᠧᠷᠠ ᠲᠡᠭᠦᠨ ᠦ ᠮᠠᠢᠬᠠᠨ ᠳᠤ ᠣᠷᠣᠭᠰᠠᠨ ᠳᠤ᠂ ᠶᠠᠶᠧᠯ ᠲᠡᠭᠦᠨ ᠢ ᠬᠥᠨᠵᠢᠯᠡ ᠪᠡᠷ ᠬᠤᠴᠢᠪᠠ᠃ 19 ᠰᠢᠰᠧᠷᠠ᠄ 《ᠪᠢ ᠴᠠᠩ᠋ᠭᠠᠵᠤ ᠪᠠᠢᠨᠠ᠂ ᠵᠢᠭᠠᠬᠠᠨ ᠤᠰᠤ ᠥᠭᠭᠥᠭᠡᠴᠢ》 ᠭᠡᠰᠡᠨ ᠳᠦ᠂ ᠶᠠᠶᠧᠯ ᠰᠦ᠋ ᠲᠠᠢ ᠠᠷᠠᠰᠤᠨ ᠲᠤᠯᠤᠮ ᠢ ᠣᠩ᠋ᠭᠣᠢᠯᠭᠠᠵᠤ ᠤᠤᠭᠤᠯᠭᠠᠭᠠᠳ᠂ ᠳᠠᠬᠢᠨ ᠲᠡᠭᠦᠨ ᠢ ᠬᠤᠴᠢᠪᠠ᠃ 20 ᠰᠢᠰᠧᠷᠠ ᠲᠡᠭᠦᠨ ᠳᠦ᠄ 《ᠮᠠᠢᠬᠠᠨ ᠤ ᠡᠭᠦᠳᠡᠨ ᠳᠦ ᠵᠣᠭᠰᠣᠭᠠᠳ ᠪᠠᠢᠭᠠᠷᠠᠢ᠂ ᠬᠡᠷᠪᠡ ᠬᠡᠨ ᠨᠢᠭᠡ ᠨᠢ ᠢᠷᠡᠵᠦ᠄ 〈ᠡ᠊ᠨᠳᠡ ᠬᠥᠮᠦᠨ ᠪᠠᠢᠨᠠ ᠤᠤ︖〉 ᠭᠡᠵᠦ ᠠᠰᠠᠭᠤᠪᠠᠯ᠂ 〈ᠪᠠᠢᠬᠤ ᠦᠭᠡᠢ〉 ᠭᠡᠵᠦ ᠬᠡᠯᠡᠭᠡᠷᠡᠢ》 ᠭᠡᠪᠡ᠃ 21 ᠬᠠᠷᠢᠨ ᠾᠧᠪᠧᠷ ᠤᠨ ᠡᠬᠡᠨᠡᠷ ᠶᠠᠶᠧᠯ ᠮᠠᠢᠬᠠᠨ ᠤ ᠭᠠᠳᠠᠰᠤ ᠶᠢ ᠠᠪᠴᠤ᠂ ᠭᠠᠷ ᠲᠠᠭᠠᠨ ᠠᠯᠤᠬᠠ ᠪᠠᠷᠢᠨ ᠰᠢᠰᠧᠷᠠ ᠤᠷᠤᠭᠤ ᠰᠡᠮᠬᠡᠨ ᠳᠥᠭᠥᠵᠦ ᠣᠴᠢᠭᠠᠳ ᠴᠢᠮᠠᠷᠬᠠᠢ ᠤᠷᠤᠭᠤ ᠨᠢ ᠭᠠᠳᠠᠰᠤ ᠪᠠᠨ ᠰᠢᠭᠠᠵᠤ᠂ ᠭᠠᠵᠠᠷ ᠲᠤ ᠵᠣᠭᠣᠪᠠ᠃ ᠰᠢᠰᠧᠷᠠ ᠶᠠᠳᠠᠷᠠᠭᠠᠳ ᠪᠥᠭᠡ ᠤᠨᠲᠠᠵᠤ ᠪᠠᠢᠬᠤ ᠳᠠᠭᠠᠨ ᠡᠢᠨ ᠬᠦ ᠨᠠᠰᠤ ᠪᠠᠷᠠᠵᠠᠢ᠃ 22 ᠲᠡᠭᠡᠲᠡᠯᠡ ᠪᠠᠷᠠᠺ ᠰᠢᠰᠧᠷᠠ ᠶᠢ ᠮᠥᠰᠬᠢᠨ ᠢᠷᠡᠵᠦ ᠪᠠᠢᠯᠠ︕ ᠶᠠᠶᠧᠯ ᠲᠡᠭᠦᠨ ᠢ ᠤᠭᠲᠤᠨ ᠭᠠᠷᠴᠤ ᠢᠷᠡᠭᠡᠳ᠄ 《ᠨᠠᠰᠢ ᠢᠷᠡ᠂ ᠲᠠᠨ ᠤ ᠬᠠᠢᠵᠤ ᠪᠠᠢᠭᠠ ᠬᠥᠮᠦᠨ ᠢ ᠬᠠᠷᠠᠭᠤᠯᠤᠶᠠ》 ᠭᠡᠪᠡ᠃ ᠪᠠᠷᠠᠺ ᠮᠠᠢᠬᠠᠨ ᠳᠤᠨᠢ ᠣᠷᠣᠵᠤ ᠦᠵᠡᠬᠦ ᠳᠦ᠂ ᠰᠢᠰᠧᠷᠠ ᠴᠢᠮᠠᠷᠬᠠᠢ ᠳᠠᠭᠠᠨ ᠮᠠᠢᠬᠠᠨ ᠤ ᠭᠠᠳᠠᠰᠤ ᠵᠣᠭᠤᠯᠭᠠᠨ ᠦᠬᠦᠭᠰᠡᠨ ᠬᠡᠪᠲᠡᠵᠦ ᠪᠠᠢᠯᠠ᠃
23 ᠡᠢᠨ ᠬᠦ ᠪᠤᠷᠬᠠᠨ ᠲᠡᠷᠡ ᠡᠳᠦᠷ ᠢᠰᠷᠧᠯᠴᠦᠳ ᠦᠨ ᠡᠮᠦᠨᠡ ᠺᠠᠨᠠᠨ ᠤ ᠬᠠᠭᠠᠨ ᠶᠠᠪᠢᠨ ᠢ ᠨᠣᠮᠣᠬᠠᠳᠬᠠᠪᠠ᠃ 24 ᠢᠰᠷᠧᠯᠴᠦᠳ ᠦᠨ ᠭᠠᠷ ᠺᠠᠨᠠᠨ ᠤ ᠬᠠᠭᠠᠨ ᠶᠠᠪᠢᠨ ᠤ ᠡᠰᠡᠷᠭᠦ ᠬᠦᠴᠦᠷᠬᠡᠭᠵᠢᠭᠰᠡᠭᠡᠷ ᠡᠴᠦᠰ ᠲᠤᠨᠢ ᠺᠠᠨᠠᠨ ᠤ ᠬᠠᠭᠠᠨ ᠶᠠᠪᠢᠨ ᠢ ᠤᠰᠠᠳᠬᠠᠭᠰᠠᠨ ᠪᠠᠢᠨᠠ᠃