ᠰᠢᠭᠦᠭᠴᠢᠳ ᠠᠷᠪᠠᠨ ᠨᠠᠢ᠌ᠮᠠ
ᠳ᠋ᠠᠨᠴᠤᠳ ᠭᠠᠵᠠᠷ ᠪᠠ ᠰᠢᠲᠦᠭᠡᠨ ᠢ ᠨᠢ ᠪᠤᠯᠢᠶᠠᠪᠠ
1 ᠲᠡᠷᠡ ᠡᠳᠦᠷ ᠤᠳ ᠢᠶᠠᠷ ᠢᠰᠷᠧᠯ ᠳᠤ ᠬᠠᠭᠠᠨ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠷᠡ ᠡᠳᠦᠷ ᠤᠳ ᠢᠶᠠᠷ ᠳ᠋ᠠᠨ ᠣᠪᠣᠭ ᠤᠨ ᠬᠢᠨ ᠰᠠᠭᠤᠷᠢᠰᠢᠬᠤ ᠥᠪ ᠨᠤᠲᠤᠭ ᠢᠶᠠᠨ ᠬᠠᠢᠭᠰᠠᠭᠠᠷ ᠪᠠᠢᠪᠠ᠃ ᠤᠴᠢᠷ ᠨᠢ ᠲᠡᠷᠡ ᠡᠳᠦᠷ ᠪᠣᠯᠲᠠᠯᠠ ᠲᠡᠳᠡ ᠢᠰᠷᠧᠯ ᠤᠨ ᠣᠪᠣᠭ ᠤᠳ ᠤᠨ ᠢᠶᠠᠨ ᠳᠤᠮᠳᠠ ᠥᠪ ᠨᠤᠲᠤᠭ ᠢᠶᠠᠨ ᠭᠠᠷ ᠲᠠᠭᠠᠨ ᠣᠷᠣᠭᠤᠯᠤᠭᠠ ᠦᠭᠡᠢ ᠪᠠᠢᠪᠠ᠃ 2 ᠡᠢᠮᠦ ᠡᠴᠡ ᠳ᠋ᠠᠨᠴᠤᠳ ᠽᠣᠷᠠ ᠪᠣᠯᠣᠨ ᠡᠱᠲ᠋ᠠᠶᠣᠯ ᠳᠠᠬᠢ ᠠᠢᠮᠠᠭ ᠤᠨ ᠢᠶᠠᠨ ᠲᠠᠪᠤᠨ ᠳᠠᠢᠴᠢᠨ ᠳᠤ᠄ 《ᠶᠠᠪᠤᠵᠤ᠂ ᠭᠠᠵᠠᠷ ᠢ ᠲᠠᠩᠨᠠᠭᠲᠤᠨ》 ᠭᠡᠳ ᠲᠠᠩᠨᠠᠭᠤᠯᠵᠤ᠂ ᠰᠤᠳᠤᠯᠤᠭᠤᠯᠬᠤ ᠪᠠᠷ ᠲᠡᠳᠡᠨ ᠢ ᠶᠠᠪᠤᠭᠤᠯᠪᠠ᠃ ᠲᠡᠳᠡ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠲᠤ ᠣᠷᠣᠭᠠᠳ ᠮᠢᠺᠠ ᠶᠢᠨ ᠭᠡᠷ ᠲᠦ ᠬᠦᠷᠴᠦ ᠲᠡᠨᠳᠡ ᠬᠣᠨᠣᠭᠯᠠᠪᠠ᠃ 3 ᠲᠡᠳᠡ ᠮᠢᠺᠠ ᠶᠢᠨ ᠭᠡᠷ ᠲᠦ ᠪᠠᠢᠬᠤ ᠳᠠᠭᠠᠨ ᠨᠥᠭᠥᠭᠡ ᠯᠧᠸᠢ ᠵᠠᠯᠠᠭᠤ ᠶᠢᠨ ᠠᠶᠠᠯᠭᠤ ᠶᠢ ᠲᠠᠨᠢᠭᠠᠳ᠂ ᠲᠡᠭᠦᠨ ᠳᠦ ᠳᠥᠭᠥᠨ ᠣᠴᠢᠵᠤ᠄ 《ᠬᠡᠨ ᠲᠠᠨ ᠢ ᠡ᠊ᠨᠳᠡ ᠠᠪᠴᠢᠷᠠᠪᠠ︖ ᠲᠠ ᠡ᠊ᠨᠳᠡ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠤᠮ ᠪᠤᠢ︖ ᠶᠠᠭᠤᠨ ᠤ ᠤᠴᠢᠷ ᠠᠴᠠ ᠡ᠊ᠨᠳᠡ ᠪᠠᠢᠵᠤ ᠪᠠᠢᠭᠠ ᠶᠤᠮ ᠪᠤᠢ︖》 ᠭᠡᠵᠡᠭᠡᠪᠡ᠃ 4 ᠲᠡᠷᠡ ᠮᠢᠺᠠ ᠶᠢᠨ ᠥᠪᠡᠷ ᠲᠤᠨᠢ ᠬᠢᠭᠰᠡᠨ ᠡᠢᠮᠦ ᠲᠡᠢᠮᠦ ᠵᠦᠢᠯ ᠢ ᠥᠴᠢᠵᠦ᠄ 《ᠲᠡᠷᠡ ᠨᠠᠮᠠᠶᠢ ᠬᠥᠯᠥᠰᠥᠯᠡᠵᠦ ᠥᠪᠡᠷ ᠦᠨ ᠢᠶᠠᠨ ᠲᠠᠬᠢᠯᠴᠢ ᠪᠣᠯᠭᠠᠭᠰᠠᠨ ᠶᠤᠮ》 ᠭᠡᠰᠡᠨ ᠳᠦ᠂ 5 ᠲᠡᠳᠡ᠄ 《ᠪᠤᠷᠬᠠᠨ ᠠᠴᠠ ᠠᠰᠠᠭᠤᠭᠠᠴᠢ᠂ ᠠᠶᠠᠨ ᠵᠠᠮ ᠤᠨ ᠮᠢᠨᠢ ᠥᠯᠵᠡᠢ ᠲᠡᠢ ᠪᠠᠢᠬᠤ ᠡᠰᠡᠬᠦ ᠶᠢ ᠪᠢᠳᠡ ᠮᠡᠳᠡᠮᠡᠷ ᠪᠠᠢᠨᠠ》 ᠭᠡᠪᠡ᠃ 6 ᠲᠠᠬᠢᠯᠴᠢ ᠬᠠᠷᠢᠭᠤ ᠳᠤᠨᠢ᠄ 《ᠠᠮᠤᠷ ᠲᠠᠢᠪᠤᠩ ᠶᠠᠪᠤᠭᠲᠤᠨ᠃ ᠲᠠ ᠨᠠᠷ ᠤᠨ ᠠᠶᠠᠨ ᠵᠠᠮ ᠳᠤ ᠶᠣᠬᠣᠸᠠ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃
7 ᠲᠠᠪᠤᠨ ᠡᠷᠡ ᠴᠠᠭᠠᠰᠢᠯᠠᠨ᠂ ᠯᠠᠢᠱ ᠲᠤ ᠬᠦᠷᠴᠦ ᠦᠵᠡᠬᠦ ᠳᠦ᠂ ᠲᠡᠨᠳᠡᠬᠢ ᠶᠢᠨ ᠠᠷᠠᠳ ᠣᠯᠠᠨ ᠰᠢᠢᠳᠣᠨᠴᠤᠳ ᠲᠠᠢ ᠠᠳᠠᠯᠢ ᠠᠶᠤᠯ ᠲᠦᠭᠰᠢᠭᠦᠷᠢ ᠦᠭᠡᠢ ᠲᠠᠢᠪᠤᠩ ᠠᠮᠢᠳᠤᠷᠠᠵᠤ ᠪᠠᠢᠯᠠ᠃ ᠲᠡᠷᠡ ᠨᠤᠲᠤᠭ ᠲᠤ ᠡᠳ᠋ ᠶᠠᠭᠤᠮᠠ ᠳᠤᠲᠠᠭᠳᠠᠬᠤ ᠦᠭᠡᠢ᠂ ᠡᠷᠬᠡ ᠪᠠᠷᠢᠭᠴᠢ ᠦᠭᠡᠢ᠂ ᠲᠡᠳᠡ ᠪᠤᠰᠤᠳ ᠲᠠᠢ ᠬᠠᠷᠢᠯᠴᠠᠳᠠᠭ ᠦᠭᠡᠢ ᠪᠥᠭᠡᠳ ᠰᠢᠢᠳᠣᠨᠴᠤᠳ ᠠᠴᠠ ᠴᠤ ᠬᠣᠯᠠ ᠰᠠᠭᠤᠳᠠᠭ ᠪᠠᠢᠪᠠ᠃ 8 ᠲᠤᠷᠰᠢᠭᠤᠯ ᠤᠳ ᠽᠣᠷᠠ ᠪᠣᠯᠣᠨ ᠡᠱᠲ᠋ᠠᠶᠣᠯ ᠳᠤ ᠪᠤᠴᠠᠵᠤ ᠢᠷᠡᠬᠦ ᠳᠦ᠂ ᠠᠬᠠ ᠳᠡᠭᠦᠦᠰ ᠨᠢ᠄ 《ᠲᠠ ᠨᠠᠷ ᠶᠠᠭᠤ ᠣᠯᠵᠤ ᠮᠡᠳᠡᠪᠡ︖》 ᠭᠡᠰᠡᠨ ᠳᠦ᠂ 9 ᠲᠡᠳᠡ᠄ 《ᠪᠣᠰᠴᠠᠭᠠ᠂ ᠲᠡᠳᠡᠨ ᠤᠷᠤᠭᠤ ᠳᠣᠪᠲᠣᠯᠵᠠᠭᠠᠶᠠ᠃ ᠪᠢᠳᠡᠨ ᠦ ᠦᠵᠡᠭᠰᠡᠨ ᠲᠡᠷᠡ ᠭᠠᠵᠠᠷ ᠲᠤᠩ ᠰᠠᠢᠬᠠᠨ ᠡ︕ ᠲᠠ ᠨᠠᠷ ᠬᠥᠳᠡᠯᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠂ ᠠᠯᠭᠤᠷᠯᠠᠯ ᠦᠭᠡᠢ ᠶᠠᠪᠤᠵᠤ ᠬᠦᠷᠦᠭᠡᠳ ᠲᠡᠷᠡ ᠨᠤᠲᠤᠭ ᠢ ᠡᠵᠡᠮᠰᠢᠶᠡ᠃ 10 ᠲᠡᠨᠳᠡ ᠣᠴᠢᠪᠠᠯ ᠲᠠ ᠨᠠᠷ ᠲᠦᠭᠰᠢᠭᠦᠷᠢ ᠦᠭᠡᠢ ᠰᠠᠭᠤᠵᠤ ᠪᠠᠢᠭᠠ ᠬᠥᠮᠦᠰ ᠪᠣᠯᠣᠨ ᠠᠭᠤᠳᠠᠮ ᠲᠠᠯᠠ ᠶᠢ ᠬᠠᠷᠠᠬᠤ ᠪᠣᠯᠣᠨᠠ᠃ ᠪᠤᠷᠬᠠᠨ ᠦᠨᠡᠬᠡᠷ ᠭᠠᠵᠠᠷ ᠳᠡᠭᠡᠷᠡᠬᠢ ᠶᠠᠮᠠᠷ ᠴᠤ ᠡᠳ᠋ ᠶᠠᠭᠤᠮᠠ ᠪᠠᠷ ᠳᠤᠲᠠᠭᠳᠠᠬᠤ ᠦᠭᠡᠢ ᠲᠡᠷᠡ ᠨᠤᠲᠤᠭ ᠢ ᠮᠠᠨ ᠤ ᠭᠠᠷ ᠲᠤ ᠥᠭᠭᠥᠭᠰᠡᠨ ᠪᠠᠢᠨᠠ︕》 ᠭᠡᠪᠡ᠃
11 ᠢᠩᠭᠢᠭᠡᠳ ᠳ᠋ᠠᠨᠴᠤᠳ ᠤᠨ ᠤᠷᠤᠭ ᠠᠴᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠥᠮᠦᠨ ᠵᠡᠪᠰᠡᠭᠯᠡᠵᠦ ᠽᠣᠷᠠ ᠪᠠ ᠡᠱᠲ᠋ᠠᠶᠣᠯ ᠠᠴᠠ ᠮᠣᠷᠳᠠᠪᠠ᠃ 12 ᠲᠡᠳᠡ ᠶᠠᠪᠤᠬᠤ ᠵᠠᠮ ᠳᠠᠭᠠᠨ ᠶᠦᠳᠠ ᠶᠢᠨ ᠺᠢᠷᠢᠶᠠᠲ ᠶᠧᠶᠠᠷᠢᠮ ᠤᠨ ᠣᠢᠷᠠ ᠬᠤᠸᠠᠷᠠᠩᠨᠠᠪᠠ᠃ ᠡᠭᠦᠨ ᠦ ᠤᠴᠢᠷ ᠢᠶᠠᠷ ᠲᠡᠷᠡ ᠭᠠᠵᠠᠷ ᠣᠳᠣ ᠪᠣᠯᠲᠠᠯᠠ ᠮᠠᠬᠠᠨᠧᠳᠠᠨ 22 ᠭᠡᠵᠦ ᠨᠡᠷᠡᠯᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃ ᠲᠡᠷᠡ ᠨᠢ ᠺᠢᠷᠢᠶᠠᠲ ᠶᠧᠶᠠᠷᠢᠮ ᠤᠨ ᠪᠠᠷᠠᠭᠤᠨ ᠲᠠᠯᠠ ᠳᠤ ᠪᠤᠢ᠃ 13 ᠲᠡᠳᠡ ᠲᠡᠷᠡᠭᠦᠷ ᠥᠩᠭᠡᠷᠡᠨ᠂ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠲᠤ ᠣᠷᠣᠭᠠᠳ ᠮᠢᠺᠠ ᠶᠢᠨ ᠭᠡᠷ ᠲᠦ ᠬᠦᠷᠪᠡ᠃
14 ᠯᠠᠢᠱ ᠨᠤᠲᠤᠭ ᠢ ᠲᠠᠩᠨᠠᠭᠰᠠᠨ ᠨᠥᠭᠥᠭᠡ ᠲᠠᠪᠤᠨ ᠬᠥᠮᠦᠨ ᠠᠬᠠ ᠳᠡᠭᠦᠦᠰ ᠲᠡᠭᠡᠨ᠄ 《ᠡᠨᠡ ᠭᠡᠷ ᠲᠦ ᠡᠹᠣᠳ᠂ ᠭᠡᠷ ᠦᠨ ᠰᠢᠲᠦᠭᠡᠨ ᠨᠦᠭᠦᠳ᠂ ᠰᠡᠢᠯᠦᠮᠡᠯ ᠪᠠ ᠴᠢᠳᠬᠤᠮᠠᠯ ᠰᠢᠲᠦᠭᠡᠨ ᠴᠤ ᠪᠠᠢᠭᠠ ᠶᠢ ᠲᠠ ᠨᠠᠷ ᠮᠡᠳᠡᠨᠡ ᠪᠢᠵᠡ︖ ᠲᠡᠭᠡᠬᠦᠯᠡᠷ ᠣᠳᠣ ᠲᠠ ᠨᠠᠷ ᠶᠠᠭᠤ ᠦᠢᠯᠡᠳᠬᠦ ᠶᠣᠰᠣᠲᠠᠢ ᠪᠠᠨ ᠮᠡᠳᠡᠭᠡᠷᠡᠢ》 ᠭᠡᠳ 15 ᠲᠡᠰᠢ ᠴᠢᠭᠯᠡᠨ ᠮᠢᠺᠠ ᠶᠢᠨ ᠭᠡᠷ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠨᠥᠭᠥᠭᠡ ᠵᠠᠯᠠᠭᠤ ᠯᠧᠸᠢ ᠬᠥᠮᠦᠨ ᠦ ᠭᠡᠷ ᠲᠦ ᠣᠴᠢᠵᠤ᠂ ᠲᠡᠭᠦᠨ ᠦ ᠠᠮᠤᠷ ᠮᠡᠨᠳᠦ ᠶᠢ ᠠᠰᠠᠭᠤᠬᠤ ᠳᠤ᠂ 16 ᠨᠥᠭᠥᠭᠡ ᠵᠢᠷᠭᠤᠭᠠᠨ ᠵᠠᠭᠤᠨ ᠳ᠋ᠠᠨ ᠬᠥᠮᠦᠨ ᠵᠡᠪᠰᠡᠭ ᠪᠠᠷᠢᠨ ᠡᠭᠦᠳᠡᠨ ᠳᠦ ᠵᠣᠭᠰᠣᠵᠤ ᠪᠠᠢᠯᠠ᠃ 17 ᠲᠠᠬᠢᠯᠴᠢ ᠵᠡᠪᠰᠡᠭ ᠪᠠᠷᠢᠭᠰᠠᠨ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠥᠮᠦᠨ ᠲᠡᠢ ᠬᠠᠮᠲᠤ ᠡᠭᠦᠳᠡᠨ ᠳᠦ ᠵᠣᠭᠰᠣᠵᠤ ᠪᠠᠢᠬᠤ ᠵᠠᠭᠤᠷᠠ᠂ ᠲᠡᠷᠡ ᠭᠠᠵᠠᠷ ᠢ ᠲᠠᠩᠨᠠᠭᠰᠠᠨ ᠲᠠᠪᠤᠨ ᠬᠥᠮᠦᠨ ᠳᠡᠭᠡᠭᠰᠢ ᠭᠠᠷᠤᠨ ᠳᠤᠭᠠᠩ ᠳᠤ ᠣᠷᠣᠵᠤ ᠰᠡᠢᠯᠦᠮᠡᠯ ᠰᠢᠲᠦᠭᠡᠨ᠂ ᠡᠹᠣᠳ᠂ ᠭᠡᠷ ᠦᠨ ᠰᠢᠲᠦᠭᠡᠨ ᠨᠦᠭᠦᠳ ᠪᠣᠯᠣᠨ ᠴᠢᠳᠬᠤᠮᠠᠯ ᠰᠢᠲᠦᠭᠡᠨ ᠢ ᠨᠢ ᠪᠠᠭᠴᠠᠯᠠᠨ ᠠᠪᠤᠪᠠ᠃ 18 ᠲᠡᠷᠡ ᠬᠥᠮᠦᠰ ᠮᠢᠺᠠ ᠶᠢᠨ ᠳᠤᠭᠠᠩ ᠳᠤ ᠣᠷᠣᠵᠤ᠂ ᠰᠡᠢᠯᠦᠮᠡᠯ ᠰᠢᠲᠦᠭᠡᠨ᠂ ᠡᠹᠣᠳ᠂ ᠭᠡᠷ ᠦᠨ ᠰᠢᠲᠦᠭᠡᠨ ᠨᠦᠭᠦᠳ ᠪᠣᠯᠣᠨ ᠴᠢᠳᠬᠤᠮᠠᠯ ᠰᠢᠲᠦᠭᠡᠨ ᠢ ᠨᠢ ᠬᠤᠷᠢᠶᠠᠨ ᠠᠪᠴᠤ ᠪᠠᠢᠬᠤ ᠳᠤ᠂ ᠲᠠᠬᠢᠯᠴᠢ᠄ 《ᠲᠠ ᠨᠠᠷ ᠶᠠᠭᠤ ᠬᠢᠵᠦ ᠪᠠᠢᠭᠠ ᠨᠢ ᠡᠨᠡ ᠪᠤᠢ︖》 ᠭᠡᠰᠡᠨ ᠳᠦ᠂ 19 ᠲᠡᠳᠡ᠄ 《ᠳᠠᠭᠤ ᠦᠭᠡᠢ ᠪᠠᠢ᠂ ᠭᠠᠷ ᠢᠶᠠᠷ ᠢᠶᠠᠨ ᠠᠮᠠ ᠪᠠᠨ ᠲᠠᠭᠯᠠᠭᠠᠳ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠵᠤ ᠪᠢᠳᠡᠨ ᠦ ᠡᠴᠢᠭᠡ᠂ ᠪᠢᠳᠡᠨ ᠦ ᠲᠠᠬᠢᠯᠴᠢ ᠪᠣᠯᠣᠭᠲᠤᠨ᠃ ᠭᠠᠭᠴᠠ ᠬᠥᠮᠦᠨ ᠦ ᠭᠡᠷ ᠦᠨ ᠲᠠᠬᠢᠯᠴᠢ ᠪᠠᠢᠬᠤ ᠠᠴᠠ ᠢᠰᠷᠧᠯ ᠣᠪᠣᠭ ᠠᠢᠮᠠᠭ ᠤᠨ ᠲᠠᠬᠢᠯᠴᠢ ᠪᠠᠢᠬᠤ ᠨᠢ ᠳᠡᠭᠡᠷᠡ ᠪᠢᠰᠢ ᠤᠤ︖》 ᠭᠡᠪᠡ᠃ 20 ᠲᠠᠬᠢᠯᠴᠢ ᠳᠣᠲᠣᠷᠠ ᠪᠠᠨ ᠪᠠᠶᠠᠷᠯᠠᠵᠤ᠂ ᠡᠹᠣᠳ᠂ ᠭᠡᠷ ᠦᠨ ᠰᠢᠲᠦᠭᠡᠨ ᠨᠦᠭᠦᠳ᠂ ᠰᠡᠢᠯᠦᠮᠡᠯ ᠰᠢᠲᠦᠭᠡᠨ ᠢ ᠠᠪᠴᠤ᠂ ᠬᠥᠮᠦᠰ ᠦᠨ ᠳᠤᠮᠳᠠ ᠣᠷᠣᠵᠤ ᠶᠠᠪᠤᠯᠠ᠃
21 ᠢᠩᠭᠢᠭᠡᠳ ᠲᠡᠳᠡ ᠪᠤᠴᠠᠬᠤ ᠪᠠᠷ ᠪᠠᠭᠠᠴᠤᠳ᠂ ᠮᠠᠯ ᠰᠦᠷᠦᠭ ᠪᠣᠯᠣᠨ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠡᠮᠦᠨᠡ ᠪᠡᠨ ᠣᠷᠣᠭᠤᠯᠵᠤ᠂ ᠳᠠᠬᠢᠨ ᠠᠶᠠᠨ ᠳᠠᠭᠠᠨ ᠭᠠᠷᠴᠠᠢ᠃ 22 ᠬᠠᠷᠢᠨ ᠲᠡᠳᠡ ᠮᠢᠺᠠ ᠶᠢᠨ ᠭᠡᠷ ᠡᠴᠡ ᠬᠣᠯᠠᠳᠠᠭᠰᠠᠨ ᠤ ᠬᠣᠢᠨᠠ ᠮᠢᠺᠠ ᠶᠢᠨ ᠬᠥᠷᠰᠢ ᠠᠢᠯ ᠤᠳ ᠤᠨ ᠡᠷᠡᠴᠦᠳ ᠴᠤᠭᠯᠠᠷᠠᠵᠤ᠂ ᠳ᠋ᠠᠨᠴᠤᠳ ᠢ ᠭᠦᠢᠴᠡᠨ ᠢᠷᠡᠭᠡᠳ 23 ᠲᠡᠳᠡᠨ ᠤᠷᠤᠭᠤ ᠬᠠᠰᠬᠢᠷᠪᠠ᠃ ᠳ᠋ᠠᠨᠴᠤᠳ ᠡᠷᠭᠢᠵᠦ ᠬᠠᠷᠠᠭᠠᠳ ᠮᠢᠺᠠ ᠳᠤ᠄ 《ᠴᠢ ᠡᠳᠡ ᠨᠠᠷ ᠢ ᠳᠠᠭᠤᠳᠠᠵᠤ ᠴᠤᠭᠯᠠᠭᠤᠯᠤᠭᠠᠳ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠨᠠ︖》 ᠭᠡᠵᠡᠢ᠃ 24 ᠮᠢᠺᠠ᠄ 《ᠲᠠ ᠨᠠᠷ ᠮᠢᠨᠦ ᠪᠦᠲᠦᠭᠡᠭᠰᠡᠨ ᠰᠢᠲᠦᠭᠡᠨ ᠨᠦᠭᠦᠳ᠂ ᠮᠢᠨᠦ ᠲᠠᠬᠢᠯᠴᠢ ᠶᠢ ᠠᠪᠴᠤ ᠶᠠᠪᠤᠴᠢᠬᠠᠭᠠᠳ ᠨᠠᠳᠠ ᠳᠤ ᠶᠠᠭᠤ ᠦᠯᠡᠳᠡᠭᠡᠭᠰᠡᠨ ᠶᠤᠮ ᠪᠤᠢ︖ ᠲᠡᠭᠡᠭᠰᠡᠨ ᠬᠢᠷᠢ ᠨᠢ 〈ᠴᠢ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠨᠠ︖〉 ᠭᠡᠵᠦ ᠨᠠᠳᠠ ᠳᠤ ᠬᠡᠯᠡᠬᠦ ᠨᠢ ᠤᠤ︖》 ᠭᠡᠰᠡᠨ ᠳᠦ᠂ 25 ᠳ᠋ᠠᠨᠴᠤᠳ᠄ 《ᠳᠠᠭᠤ ᠦᠭᠡᠢ ᠪᠠᠢ᠂ ᠲᠡᠢᠮᠦ ᠪᠢᠰᠢ ᠪᠣᠯ ᠳᠣᠭᠰᠢᠨ ᠵᠠᠩ ᠲᠠᠢ ᠮᠠᠨ ᠤ ᠡᠷᠡᠴᠦᠳ ᠲᠠ ᠨᠠᠷ ᠤᠷᠤᠭᠤ ᠳᠠᠭᠠᠷᠢᠵᠤ ᠠᠮᠢ ᠶᠢ ᠴᠢᠨᠢ᠂ ᠭᠡᠷ ᠦᠨ ᠬᠢᠨ ᠤ ᠴᠢᠨᠢ ᠠᠮᠢ ᠶᠢ ᠴᠤ ᠠᠪᠬᠤ ᠪᠣᠯᠣᠨᠠ》 ᠭᠡᠪᠡ᠃ 26 ᠢᠩᠭᠢᠭᠡᠳ ᠳ᠋ᠠᠨ ᠤ ᠬᠥᠪᠡᠭᠦᠳ ᠵᠠᠮ ᠢᠶᠠᠨ ᠬᠥᠭᠡᠭᠡᠨ ᠣᠳᠪᠠ᠃ ᠲᠡᠳᠡᠨ ᠦ ᠥᠪᠡᠷ ᠡᠴᠡ ᠨᠢ ᠬᠦᠴᠦᠲᠡᠢ ᠪᠠᠢᠬᠤ ᠶᠢ ᠮᠢᠺᠠ ᠬᠠᠷᠠᠭᠠᠳ᠂ ᠡᠷᠭᠢᠨ ᠭᠡᠷ ᠥᠭᠡᠳᠡ ᠪᠡᠨ ᠪᠤᠴᠠᠯᠠ᠃
27 ᠲᠡᠢᠨ ᠬᠦ ᠳ᠋ᠠᠨᠴᠤᠳ ᠮᠢᠺᠠ ᠶᠢᠨ ᠪᠦᠲᠦᠭᠡᠭᠰᠡᠨ ᠶᠠᠭᠤᠮᠠᠰ ᠪᠣᠯᠣᠨ ᠲᠡᠭᠦᠨ ᠦ ᠲᠠᠬᠢᠯᠴᠢ ᠶᠢ ᠪᠤᠯᠢᠶᠠᠵᠤ ᠠᠪᠤᠭᠠᠳ ᠯᠠᠢᠱ ᠲᠤ ᠬᠦᠷᠴᠦ᠂ ᠲᠡᠨᠳᠡᠬᠢ ᠶᠢᠨ ᠠᠶᠤᠯ ᠦᠭᠡᠢ ᠲᠠᠢᠪᠤᠩ ᠰᠠᠭᠤᠵᠤ ᠪᠤᠢ ᠬᠥᠮᠦᠰ ᠢ ᠳᠠᠭᠠᠷᠢᠨ ᠲᠡᠳᠡᠨ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠴᠣᠬᠢᠵᠤ ᠬᠣᠲᠠ ᠶᠢ ᠨᠢ ᠭᠠᠯᠳᠠᠬᠤ ᠳᠤ᠂ 28 ᠲᠡᠳᠡᠨ ᠢ ᠠᠪᠤᠷᠠᠬᠤ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠷᠡ ᠬᠣᠲᠠ ᠪᠤᠰᠤᠳ ᠲᠠᠢ ᠬᠠᠷᠢᠯᠴᠠᠭᠠ ᠦᠭᠡᠢ᠂ ᠰᠢᠢᠳᠣᠨ ᠠᠴᠠ ᠴᠤ ᠬᠣᠯᠠ ᠪᠧᠲ ᠷᠧᠬᠣᠪ ᠤᠨ ᠬᠥᠨᠳᠡᠢ ᠳᠦ ᠪᠠᠢᠪᠠ᠃ ᠳ᠋ᠠᠨᠴᠤᠳ ᠬᠣᠲᠠ ᠶᠢ ᠳᠠᠬᠢᠨ ᠰᠡᠷᠭᠦᠭᠡᠨ ᠪᠣᠰᠬᠠᠵᠤ᠂ ᠲᠡᠨᠳᠡ ᠪᠡᠨ ᠰᠠᠭᠤᠷᠢᠰᠢᠭᠰᠠᠨ ᠪᠥᠭᠡᠳ 29 ᠢᠰᠷᠧᠯ ᠤᠨ ᠲᠥᠷᠥᠭᠦᠯᠦᠭᠰᠡᠨ᠂ ᠥᠪᠡᠷᠰᠡᠳ ᠦᠨ ᠡᠴᠢᠭᠡ ᠳ᠋ᠠᠨ ᠤ ᠨᠡᠷᠡ ᠪᠡᠷ ᠲᠡᠷᠡ ᠬᠣᠲᠠ ᠶᠢ ᠳ᠋ᠠᠨ ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠤᠤᠯ ᠨᠢ ᠲᠡᠷᠡ ᠬᠣᠲᠠ ᠶᠢ ᠯᠠᠢᠱ ᠭᠡᠳᠡᠭ ᠪᠠᠢᠪᠠ᠃ 30 ᠳ᠋ᠠᠨᠴᠤᠳ ᠥᠪᠡᠷᠰᠡᠳ ᠲᠡᠭᠡᠨ ᠵᠣᠷᠢᠭᠤᠯᠤᠨ ᠨᠥᠭᠥᠭᠡ ᠰᠡᠢᠯᠦᠮᠡᠯ ᠰᠢᠲᠦᠭᠡᠨ ᠢ ᠪᠣᠰᠬᠠᠵᠠᠢ᠃ ᠮᠣᠰᠧ ᠶᠢᠨ ᠦᠷᠡ ᠤᠳᠤᠮ᠂ ᠭᠧᠷᠱᠣᠮ ᠤᠨ ᠬᠥᠪᠡᠭᠦᠨ ᠶᠣᠨᠠᠲ᠋ᠠᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠨᠤᠲᠤᠭ ᠠᠴᠠ ᠪᠠᠨ ᠴᠥᠯᠡᠭᠳᠡᠬᠦ ᠡᠳᠦᠷ ᠪᠣᠯᠲᠠᠯᠠ ᠳ᠋ᠠᠨ ᠣᠪᠣᠭ ᠤᠨ ᠲᠠᠬᠢᠯᠴᠢ ᠶᠢᠨ ᠠᠯᠪᠠ ᠶᠢ ᠭᠦᠢᠴᠡᠳᠬᠡᠪᠡ᠃ 31 ᠲᠡᠢᠨ ᠬᠦ ᠪᠤᠷᠬᠠᠨ ᠤ ᠥᠷᠭᠥᠭᠡ ᠶᠢ ᠱᠢᠯᠣ᠋ ᠳᠤ ᠪᠠᠢᠭᠰᠠᠨ ᠪᠦᠬᠦ ᠬᠤᠭᠤᠴᠠᠭᠠᠨ ᠤ ᠲᠤᠷᠰᠢ ᠲᠡᠳᠡ ᠮᠢᠺᠠ ᠶᠢᠨ ᠪᠦᠲᠦᠭᠡᠭᠰᠡᠨ ᠰᠡᠢᠯᠦᠮᠡᠯ ᠰᠢᠲᠦᠭᠡᠨ ᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠲᠥᠯᠥᠭᠡ ᠲᠡᠨᠳᠡ ᠪᠡᠨ ᠪᠠᠢᠯᠭᠠᠵᠠᠢ᠃