ᠰᠢᠭᠦᠭᠴᠢᠳ ᠬᠣᠷᠢ
ᠪᠢᠨᠶᠠᠮᠢᠨᠴᠤᠳ ᠯᠤᠭᠠ ᠶᠢᠨ ᠳᠠᠢᠨ
1 ᠢᠩᠭᠢᠭᠡᠳ ᠪᠦᠬᠦ ᠢᠰᠷᠧᠯ ᠳ᠋ᠠᠨ ᠠᠴᠠ ᠪᠧᠷᠣᠲ ᠱᠧᠪᠠ ᠬᠦᠷᠲᠡᠯᠡᠬᠢ ᠨᠤᠲᠤᠭ᠂ ᠮᠥᠨ ᠭᠢᠯᠧᠶᠠᠳ᠋ ᠤᠨ ᠨᠤᠲᠤᠭ ᠠᠴᠠ ᠭᠠᠷᠴᠤ ᠢᠷᠡᠭᠡᠳ ᠮᠢᠽᠫᠠ ᠳᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠨᠢᠭᠡ ᠬᠥᠮᠦᠨ ᠮᠡᠲᠦ ᠴᠤᠭᠯᠠᠷᠠᠭᠰᠠᠨ ᠪᠠᠢᠨᠠ᠃ 2 ᠢᠰᠷᠧᠯ ᠤᠨ ᠣᠪᠣᠭ ᠪᠦᠷᠢ ᠶᠢᠨ ᠤᠳᠤᠷᠢᠳᠤᠭᠴᠢᠳ ᠪᠤᠷᠬᠠᠨ ᠤ ᠠᠷᠠᠳ ᠲᠦᠮᠡᠨ ᠦ ᠡᠨᠡ ᠬᠤᠷᠠᠯ ᠳᠤ ᠣᠷᠣᠯᠴᠠᠪᠠ᠃ ᠢᠯᠳᠦ ᠠᠭᠰᠠᠭᠰᠠᠨ ᠳᠥᠴᠢᠨ ᠲᠦᠮᠡᠨ ᠶᠠᠪᠠᠭᠠᠨ ᠴᠡᠷᠢᠭ ᠴᠤ ᠲᠡᠨᠳᠡ ᠪᠠᠢᠯᠠ᠃ 3 ᠢᠰᠷᠧᠯᠴᠦᠳ ᠦᠨ ᠮᠢᠽᠫᠠ ᠳᠤ ᠬᠦᠷᠴᠦ ᠢᠷᠡᠭᠰᠡᠨ ᠨᠢ ᠪᠢᠨᠶᠠᠮᠢᠨᠴᠤᠳ ᠤᠨ ᠰᠣᠨᠣᠷ ᠲᠤ ᠬᠦᠷᠴᠡᠢ᠃ ᠢᠰᠷᠧᠯᠴᠦᠳ᠄ 《ᠡᠨᠡ ᠪᠤᠵᠠᠷ ᠬᠡᠷᠡᠭ ᠬᠡᠷᠬᠢᠨ ᠡᠭᠦᠰᠦᠭᠰᠡᠨ ᠢ ᠪᠢᠳᠡᠨ ᠳᠦ ᠥᠴᠢᠭᠲᠦᠨ》 ᠭᠡᠬᠦ ᠳᠦ᠂ 4 ᠨᠥᠭᠥᠭᠡ ᠯᠧᠸᠢ ᠬᠥᠮᠦᠨ᠂ ᠲᠤᠬᠠᠢᠯᠠᠪᠠᠯ ᠠᠯᠠᠭᠳᠠᠭᠰᠠᠨ ᠡᠮᠡᠭᠲᠡᠢ ᠶᠢᠨ ᠨᠥᠬᠥᠷ ᠬᠠᠷᠢᠭᠤ ᠳᠤᠨᠢ᠄ 《ᠪᠢ ᠲᠠᠲᠠᠪᠤᠷᠢ ᠡᠮᠡ ᠲᠠᠢ ᠪᠠᠨ ᠪᠢᠨᠶᠠᠮᠢᠨ ᠤ ᠬᠠᠷᠢᠶᠠ ᠭᠢᠪᠧᠶᠠ ᠳᠤ ᠣᠴᠢᠵᠤ ᠲᠡᠨᠳᠡ ᠰᠥᠨᠢ ᠶᠢ ᠥᠩᠭᠡᠷᠡᠭᠡᠬᠦ ᠭᠡᠰᠡᠨ ᠪᠢᠯᠡ᠃ 5 ᠭᠡᠲᠡᠯᠡ ᠭᠢᠪᠧᠶᠠ ᠶᠢᠨ ᠢᠷᠭᠡᠳ ᠮᠢᠨᠦ ᠡᠰᠡᠷᠭᠦ ᠪᠣᠰᠴᠠᠭᠠᠵᠤ᠂ ᠰᠥᠨᠢ ᠪᠠᠷ ᠮᠢᠨᠦ ᠪᠠᠭᠤᠭᠰᠠᠨ ᠪᠠᠢᠰᠢᠩ ᠢ ᠪᠦᠰᠡᠯᠡᠵᠡᠢ᠃ ᠲᠡᠳᠡ ᠨᠠᠮᠠᠶᠢ ᠠᠯᠠᠬᠤ ᠪᠠᠷ ᠰᠠᠨᠠᠭᠠᠷᠬᠠᠭᠰᠠᠨ ᠪᠥᠭᠡᠳ ᠣᠷᠣᠨ ᠳᠤᠨᠢ ᠮᠢᠨᠦ ᠲᠠᠲᠠᠪᠤᠷᠢ ᠡᠮᠡ ᠶᠢ ᠬᠦᠴᠦᠷᠬᠡᠭᠯᠡᠭᠰᠡᠨ ᠢᠶᠡᠷ ᠲᠡᠷᠡ ᠦᠬᠦᠭᠰᠡᠨ᠃ 6 ᠢᠩᠭᠢᠭᠡᠳ ᠪᠢ ᠲᠠᠲᠠᠪᠤᠷᠢ ᠡᠮᠡ ᠪᠡᠨ ᠲᠤᠶᠠᠴᠢᠵᠤ᠂ ᠢᠰᠷᠧᠯ ᠤᠨ ᠥᠪᠯᠡᠭᠰᠡᠨ ᠪᠦᠬᠦ ᠭᠠᠵᠠᠷ ᠢᠶᠠᠷ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠪᠢᠨᠶᠠᠮᠢᠨᠴᠤᠳ ᠢᠰᠷᠧᠯ ᠤᠨ ᠳᠤᠮᠳᠠ ᠡᠢᠮᠦ ᠪᠤᠵᠠᠷ ᠬᠡᠷᠡᠭ ᠢ ᠦᠢᠯᠡᠳᠦᠭᠰᠡᠨ ᠦ ᠤᠴᠢᠷ ᠢᠶᠠᠷ ᠶᠤᠮ᠃ 7 ᠪᠦᠬᠦ ᠢᠰᠷᠧᠯᠴᠦᠳ ᠲᠠ ᠨᠠᠷ ᠡ᠊ᠨᠳᠡ ᠬᠡᠯᠡᠯᠴᠡᠵᠦ ᠰᠢᠢᠳᠪᠦᠷᠢᠯᠡᠭᠡᠴᠢ》 ᠭᠡᠪᠡ᠃
8 ᠲᠡᠭᠡᠲᠡᠯᠡ ᠪᠦᠬᠦ ᠠᠷᠠᠳ ᠲᠦᠮᠡᠨ ᠨᠢᠭᠡ ᠬᠥᠮᠦᠨ ᠮᠡᠲᠦ ᠪᠣᠰᠴᠤ᠄ 《ᠪᠢᠳᠡᠨ ᠦ ᠬᠡᠨ ᠨᠢ ᠴᠤ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠬᠤ ᠦᠭᠡᠢ᠂ ᠪᠢᠳᠡᠨ ᠦ ᠬᠡᠨ ᠨᠢ ᠴᠤ ᠣᠷᠣᠨ ᠰᠠᠭᠤᠴᠠ ᠳᠠᠭᠠᠨ ᠪᠤᠴᠠᠬᠤ ᠦᠭᠡᠢ᠃ 9 ᠣᠳᠣ ᠪᠢᠳᠡ ᠭᠢᠪᠧᠶᠠᠴᠤᠳ ᠲᠤ ᠢᠩᠭᠢᠵᠦ ᠬᠢᠶᠡ᠂ ᠰᠢᠪᠠᠭᠠ ᠪᠠᠭᠤᠭᠰᠠᠨ ᠶᠣᠰᠣᠭᠠᠷ ᠪᠢᠳᠡ ᠲᠡᠳᠡᠨ ᠦ ᠡᠰᠡᠷᠭᠦ ᠮᠣᠷᠳᠠᠨᠠ᠃ 10 ᠪᠢᠳᠡ ᠢᠰᠷᠧᠯ ᠣᠪᠣᠭ ᠪᠣᠯᠭᠠᠨ ᠤ ᠵᠠᠭᠤᠨ ᠬᠥᠮᠦᠨ ᠪᠦᠷᠢ ᠡᠴᠡ ᠠᠷᠪᠠᠨ ᠬᠥᠮᠦᠨ᠂ ᠮᠢᠩ᠋ᠭᠠᠨ ᠬᠥᠮᠦᠨ ᠪᠦᠷᠢ ᠡᠴᠡ ᠵᠠᠭᠤᠨ ᠬᠥᠮᠦᠨ᠂ ᠲᠦᠮᠡᠨ ᠬᠥᠮᠦᠨ ᠪᠦᠷᠢ ᠡᠴᠡ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠰᠢᠯᠢᠵᠦ ᠠᠪᠤᠭᠠᠳ ᠲᠡᠳᠡᠨ ᠢᠶᠡᠷ ᠴᠡᠷᠢᠭ ᠤᠨ ᠬᠦᠨᠡᠰᠦ ᠶᠢ ᠬᠠᠷᠢᠭᠤᠴᠠᠭᠤᠯᠤᠶᠠ᠃ ᠲᠡᠭᠡᠪᠡᠯ ᠴᠡᠷᠢᠭ ᠤᠳ ᠪᠢᠨᠶᠠᠮᠢᠨ ᠤ ᠭᠢᠪᠧᠶᠠ ᠳᠤ ᠣᠴᠢᠵᠤ ᠲᠡᠳᠡᠨ ᠦ ᠢᠰᠷᠧᠯ ᠤᠨ ᠳᠤᠮᠳᠠ ᠦᠢᠯᠡᠳᠦᠭᠰᠡᠨ ᠠᠯᠢᠪᠠ ᠪᠤᠵᠠᠷ ᠶᠠᠪᠤᠳᠠᠯ ᠢ ᠰᠢᠳᠬᠡᠬᠦ ᠪᠣᠯᠣᠨᠠ》 ᠭᠡᠪᠡ᠃ 11 ᠡᠢᠨ ᠬᠦ ᠢᠰᠷᠧᠯ ᠤᠨ ᠪᠦᠬᠦ ᠴᠡᠷᠢᠭ ᠲᠡᠷᠡ ᠬᠣᠲᠠ ᠶᠢ ᠴᠣᠬᠢᠬᠤ ᠶᠢᠨ ᠲᠤᠯᠠᠳᠠ ᠨᠢᠭᠡ ᠬᠥᠮᠦᠨ ᠮᠡᠲᠦ ᠨᠢᠭᠡᠳᠦᠨ ᠴᠤᠭᠯᠠᠷᠠᠭᠰᠠᠨ ᠪᠠᠢᠪᠠ᠃
12 ᠢᠰᠷᠧᠯ ᠤᠨ ᠣᠪᠣᠭ ᠤᠳ ᠪᠢᠨᠶᠠᠮᠢᠨ ᠣᠪᠣᠭ ᠳᠠᠶᠠᠭᠠᠷ ᠬᠥᠮᠦᠨ ᠢᠯᠡᠭᠡᠵᠦ᠄ 《ᠲᠠᠨ ᠤ ᠲᠡᠨᠳᠡ ᠶᠠᠮᠠᠷ ᠪᠤᠵᠠᠷ ᠮᠠᠭᠤ ᠶᠠᠪᠤᠳᠠᠯ ᠪᠣᠯᠪᠠ︖ 13 ᠣᠳᠣ ᠭᠢᠪᠧᠶᠠ ᠳᠠᠬᠢ ᠲᠡᠳᠡᠭᠡᠷ ᠪᠦᠲᠦᠯ ᠦᠭᠡᠢ ᠡᠲᠡᠭᠡᠳ ᠢ ᠭᠠᠷᠭᠠᠵᠤ ᠥᠭᠭᠥᠭᠲᠦᠨ᠃ ᠪᠢᠳᠡ ᠲᠡᠳᠡᠨ ᠢ ᠴᠠᠭᠠᠵᠠᠯᠠᠵᠤ ᠢᠰᠷᠧᠯ ᠡᠴᠡ ᠡᠨᠡ ᠮᠠᠭᠤᠬᠠᠢ ᠶᠠᠪᠤᠳᠠᠯ ᠢ ᠤᠰᠠᠳᠬᠠᠶᠠ》 ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠪᠢᠨᠶᠠᠮᠢᠨᠴᠤᠳ ᠠᠬᠠ ᠳᠡᠭᠦᠦᠰ ᠢᠰᠷᠧᠯᠴᠦᠳ ᠦᠨ ᠬᠢ ᠶᠢ ᠰᠣᠨᠣᠰᠬᠤ ᠳᠤᠷᠠ ᠦᠭᠡᠢ᠂ 14 ᠬᠠᠷᠢᠨ ᠢᠰᠷᠧᠯᠴᠦᠳ ᠲᠡᠢ ᠳᠠᠢᠲᠤᠬᠤ ᠪᠠᠷ ᠬᠣᠲᠠ ᠲᠣᠰᠬᠣᠳ ᠠᠴᠠ ᠪᠠᠨ ᠭᠠᠷᠴᠤ ᠭᠢᠪᠧᠶᠠ ᠳᠤ ᠴᠤᠭᠯᠠᠷᠠᠪᠠ᠃ 15 ᠲᠡᠷᠡ ᠡᠳᠦᠷ ᠬᠣᠲᠠ ᠲᠣᠰᠬᠣᠨ ᠪᠦᠷᠢ ᠡᠴᠡ ᠴᠤᠭᠯᠠᠷᠠᠭᠰᠠᠨ ᠪᠢᠨᠶᠠᠮᠢᠨᠴᠤᠳ ᠢ ᠲᠣᠭᠠᠯᠠᠬᠤ ᠳᠤ᠂ ᠭᠢᠪᠧᠶᠠ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠠᠴᠠ ᠰᠢᠯᠢᠭᠰᠡᠨ ᠳᠣᠯᠣᠭᠠᠨ ᠵᠠᠭᠤᠨ ᠬᠥᠮᠦᠨ ᠡᠴᠡ ᠭᠠᠳᠠᠨᠠ ᠢᠯᠳᠦ ᠠᠭᠰᠠᠭᠰᠠᠨ ᠬᠣᠶᠠᠷ ᠲᠦᠮᠡ ᠵᠢᠷᠭᠤᠭᠠᠨ ᠮᠢᠩ᠋ᠭᠠᠨ ᠬᠥᠮᠦᠨ ᠪᠠᠢᠵᠠᠢ᠃ 16 ᠲᠡᠳᠡᠭᠡᠷ ᠬᠥᠮᠦᠰ ᠦᠨ ᠳᠣᠲᠣᠷᠠ ᠰᠢᠯᠢᠳᠡᠭ ᠳᠣᠯᠣᠭᠠᠨ ᠵᠠᠭᠤᠨ ᠰᠣᠯᠣᠭᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠪᠠ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠰᠢᠷᠬᠡᠭ ᠦᠰᠦ ᠶᠢ ᠴᠤ ᠴᠢᠯᠠᠭᠤ ᠪᠠᠷ ᠠᠯᠳᠠᠯ ᠦᠭᠡᠢ ᠳᠦᠦᠭᠡᠦᠷᠳᠡᠵᠦ ᠴᠢᠳᠠᠳᠠᠭ ᠪᠠᠢᠯᠠ᠃ 17 ᠪᠤᠰᠤᠳ ᠢᠰᠷᠧᠯᠴᠦᠳ ᠢ ᠲᠣᠭᠠᠯᠠᠬᠤ ᠳᠤ᠂ ᠢᠯᠳᠦ ᠠᠭᠰᠠᠭᠰᠠᠨ ᠳᠥᠴᠢᠨ ᠲᠦᠮᠡᠨ ᠬᠥᠮᠦᠨ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡᠭᠡᠷ ᠳᠠᠢᠴᠢᠨ ᠬᠥᠮᠦᠰ ᠪᠠᠢᠪᠠ᠃
18 ᠢᠰᠷᠧᠯᠴᠦᠳ ᠪᠧᠲ᠋ᠧᠯ ᠥᠭᠡᠳᠡ ᠣᠴᠢᠨ᠂ ᠪᠤᠷᠬᠠᠨ ᠠᠴᠠ ᠠᠰᠠᠭᠤᠪᠠ᠃ ᠲᠡᠳᠡ᠄ 《ᠪᠢᠨᠶᠠᠮᠢᠨ ᠲᠠᠢ ᠲᠤᠯᠤᠯᠳᠤᠬᠤ ᠳᠤ ᠪᠢᠳᠡᠨ ᠦ ᠬᠡᠨ ᠨᠢ ᠲᠦᠷᠦᠭᠦᠯᠡᠵᠦ ᠶᠠᠪᠤᠬᠤ ᠪᠤᠢ︖》 ᠭᠡᠰᠡᠨ ᠳᠦ᠂ ᠶᠣᠬᠣᠸᠠ᠄ 《ᠶᠦᠳᠠ ᠲᠦᠷᠦᠭᠦᠯᠡᠨᠡ》 ᠭᠡᠵᠦ ᠠᠢᠯᠠᠳᠪᠠ᠃
19 ᠢᠰᠷᠧᠯᠴᠦᠳ ᠥᠷᠯᠥᠭᠡ ᠪᠣᠰᠴᠤ᠂ ᠭᠢᠪᠧᠶᠠ ᠶᠢᠨ ᠬᠠᠷᠠᠯᠳᠤᠭᠠ ᠬᠤᠸᠠᠷᠠᠩᠨᠠᠪᠠ᠃ 20 ᠢᠰᠷᠧᠯ ᠡᠷᠡᠴᠦᠳ ᠪᠠᠢᠯᠳᠤᠭᠠᠨ ᠤ ᠵᠢᠭᠰᠠᠭᠠᠯ ᠪᠡᠯᠡᠳᠦᠭᠡᠳ ᠭᠢᠪᠧᠶᠠ ᠳᠤ ᠪᠢᠨᠶᠠᠮᠢᠨ ᠲᠠᠢ ᠪᠠᠢᠯᠳᠤᠬᠤ ᠭᠡᠵᠦ ᠪᠠᠢᠲᠠᠯᠠ᠂ 21 ᠪᠢᠨᠶᠠᠮᠢᠨᠴᠤᠳ ᠭᠢᠪᠧᠶᠠ ᠠᠴᠠ ᠭᠠᠷᠴᠤ ᠢᠷᠡᠭᠡᠳ ᠲᠡᠷᠡ ᠡᠳᠦᠷ ᠲᠡᠭᠡᠨ ᠢᠰᠷᠧᠯ ᠤᠨ ᠬᠣᠶᠠᠷ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠭᠠᠵᠠᠷ ᠲᠤ ᠤᠨᠠᠭᠠᠪᠠ᠃ 22 ᠬᠠᠷᠢᠨ ᠢᠰᠷᠧᠯ ᠤᠨ ᠡᠷᠡᠴᠦᠳ ᠪᠡᠶᠡ ᠪᠡᠶᠡ ᠪᠡᠨ ᠵᠣᠷᠢᠭᠵᠢᠭᠤᠯᠤᠨ᠂ ᠡᠬᠢᠨ ᠤ ᠡᠳᠦᠷ ᠦᠨ ᠵᠢᠭᠰᠠᠭᠠᠯ ᠪᠡᠯᠡᠳᠦᠭᠰᠡᠨ ᠭᠠᠵᠠᠷ ᠲᠠᠭᠠᠨ ᠳᠠᠬᠢᠨ ᠪᠠᠢᠯᠳᠤᠭᠠᠨ ᠤ ᠵᠢᠭᠰᠠᠭᠠᠯ ᠪᠡᠯᠡᠳᠪᠡ᠃ 23 ᠢᠰᠷᠧᠯᠴᠦᠳ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠥᠭᠰᠥᠨ ᠣᠴᠢᠵᠤ᠂ ᠦᠳᠡᠰᠢ ᠪᠣᠯᠲᠠᠯᠠ ᠤᠬᠢᠯᠠᠯᠳᠤᠭᠰᠠᠭᠠᠷ ᠶᠣᠬᠣᠸᠠ ᠠᠴᠠ᠄ 《ᠪᠢᠳᠡ ᠳᠠᠬᠢᠨ ᠶᠠᠪᠤᠵᠤ ᠳᠡᠭᠦᠦ ᠪᠢᠨᠶᠠᠮᠢᠨᠴᠤᠳ ᠲᠠᠢ ᠪᠠᠨ ᠲᠤᠯᠤᠯᠳᠤᠬᠤ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠶᠣᠬᠣᠸᠠ᠄ 《ᠶᠠᠪᠤᠵᠤ ᠳᠠᠢᠲᠤ》 ᠭᠡᠰᠡᠨ ᠠᠵᠢ᠃
24 ᠬᠣᠶᠠᠳᠠᠬᠢ ᠡᠳᠦᠷ ᠨᠢ ᠢᠰᠷᠧᠯᠴᠦᠳ ᠪᠢᠨᠶᠠᠮᠢᠨᠴᠤᠳ ᠲᠤ ᠣᠢᠷᠠᠲᠤᠨ ᠣᠴᠢᠬᠤ ᠳᠤ᠂ 25 ᠪᠢᠨᠶᠠᠮᠢᠨᠴᠤᠳ ᠴᠤ ᠲᠡᠷᠡ ᠡᠳᠦᠷ ᠲᠡᠳᠡᠨ ᠲᠡᠢ ᠳᠠᠢᠲᠤᠬᠤ ᠪᠠᠷ ᠭᠢᠪᠧᠶᠠ ᠠᠴᠠ ᠭᠠᠷᠴᠤ ᠢᠷᠡᠭᠡᠳ ᠢᠰᠷᠧᠯᠴᠦᠳ ᠡᠴᠡ ᠳᠠᠬᠢᠨᠲᠠ ᠲᠦᠮᠡ ᠨᠠᠢ᠌ᠮᠠᠨ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠭᠠᠵᠠᠷ ᠲᠤ ᠤᠨᠠᠭᠠᠭᠰᠠᠨ ᠪᠥᠭᠡᠳ ᠲᠡᠳᠡᠭᠡᠷ ᠦᠷᠡᠭᠳᠡᠭᠴᠢ ᠨᠢ ᠪᠦᠭᠦᠳᠡ ᠢᠯᠳᠦ ᠠᠭᠰᠠᠭᠴᠢ ᠪᠠᠢᠯᠠ᠃ 26 ᠢᠰᠷᠧᠯᠴᠦᠳ ᠦᠨ ᠪᠦᠬᠦ ᠴᠡᠷᠢᠭ ᠪᠧᠲ᠋ᠧᠯ ᠥᠭᠡᠳᠡ ᠣᠴᠢᠵᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠤᠬᠢᠯᠠᠯᠳᠤᠨ ᠰᠠᠭᠤᠭᠰᠠᠭᠠᠷ ᠦᠳᠡᠰᠢ ᠪᠣᠯᠲᠠᠯᠠ ᠪᠠᠴᠠᠭ ᠪᠠᠷᠢᠨ ᠶᠣᠬᠣᠸᠠ ᠳᠤ ᠰᠢᠲᠠᠭᠠᠯᠭᠠᠲᠤ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠤᠳ ᠡᠷᠭᠦᠵᠦ᠂ 27 ᠶᠣᠬᠣᠸᠠ ᠠᠴᠠ ᠠᠰᠠᠭᠤᠪᠠ᠃ ᠲᠤᠬᠠᠢ ᠶᠢᠨ ᠦᠶᠡ ᠳᠦ ᠪᠤᠷᠬᠠᠨ ᠤ ᠭᠡᠷᠡ ᠶᠢᠨ ᠠᠪᠳᠠᠷᠠ ᠪᠧᠲ᠋ᠧᠯ ᠳᠤ ᠪᠠᠢᠭᠰᠠᠨ ᠪᠥᠭᠡᠳ 28 ᠠᠷᠣᠨ ᠤ ᠠᠴᠢ᠂ ᠡᠯᠧᠶᠠᠽᠠᠷ ᠤᠨ ᠬᠥᠪᠡᠭᠦᠨ ᠹᠢᠨᠧᠬᠠᠰ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠦᠢᠯᠡᠴᠢᠯᠡᠵᠦ ᠪᠠᠢᠪᠠ᠃ ᠲᠡᠳᠡ᠄ 《ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠳᠡᠭᠦᠦ ᠪᠢᠨᠶᠠᠮᠢᠨ ᠲᠠᠢ ᠪᠠᠨ ᠲᠤᠯᠤᠯᠳᠤᠬᠤ ᠪᠠᠷ ᠮᠣᠷᠳᠠᠬᠤ ᠤᠤ᠂ ᠪᠣᠯᠢᠬᠤ ᠤᠤ︖》 ᠭᠡᠬᠦ ᠳᠦ᠂ ᠶᠣᠬᠣᠸᠠ᠄ 《ᠶᠠᠪᠤ᠂ ᠮᠠᠷᠭᠠᠰᠢ ᠪᠢ ᠲᠡᠭᠦᠨ ᠢ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠲᠤᠰᠢᠶᠠᠬᠤ ᠪᠣᠯᠣᠨᠠ》 ᠭᠡᠵᠦ ᠠᠢᠯᠠᠳᠪᠠ᠃
29 ᠢᠰᠷᠧᠯ ᠭᠢᠪᠧᠶᠠ ᠶᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠳᠤ ᠴᠡᠷᠢᠭ ᠪᠦᠭᠬᠦᠭᠦᠯᠪᠡ᠃ 30 ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠢᠰᠷᠧᠯᠴᠦᠳ ᠪᠢᠨᠶᠠᠮᠢᠨᠴᠤᠳ ᠲᠠᠢ ᠳᠠᠢᠲᠤᠬᠤ ᠪᠠᠷ ᠶᠠᠪᠤᠵᠤ᠂ ᠡᠮᠦᠨᠡᠬᠢ ᠲᠠᠢ ᠪᠠᠨ ᠠᠳᠠᠯᠢ ᠭᠢᠪᠧᠶᠠ ᠶᠢᠨ ᠬᠠᠷᠠᠯᠳᠤᠭᠠ ᠵᠢᠭᠰᠠᠭᠠᠯ ᠪᠡᠯᠡᠳᠪᠡ᠃ 31 ᠪᠢᠨᠶᠠᠮᠢᠨᠴᠤᠳ ᠭᠠᠷᠴᠤ ᠢᠷᠡᠭᠡᠳ ᠲᠡᠳᠡᠨ ᠲᠡᠢ ᠲᠡᠮᠡᠴᠡᠯᠳᠦᠬᠦ ᠳᠡᠭᠡᠨ ᠥᠭᠡᠰᠢᠨ ᠳᠤ ᠣᠷᠣᠵᠤ ᠬᠣᠲᠠ ᠠᠴᠠ ᠪᠠᠨ ᠬᠣᠯᠠᠳᠠᠪᠠ᠃ ᠲᠡᠳᠡ ᠵᠠᠳᠠᠭᠠᠢ ᠲᠠᠯᠠ ᠳᠤ᠂ ᠪᠧᠲ᠋ᠧᠯ ᠬᠦᠷᠬᠦ ᠵᠠᠮ ᠪᠣᠯᠣᠨ ᠭᠢᠪᠧᠶᠠ ᠬᠦᠷᠬᠦ ᠵᠠᠮ ᠳᠡᠭᠡᠷᠡ ᠡᠮᠦᠨᠡᠬᠢ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠢᠰᠷᠧᠯᠴᠦᠳ ᠢ ᠴᠣᠬᠢᠵᠤ ᠡᠬᠢᠯᠡᠨ ᠲᠡᠳᠡᠨ ᠦ ᠭᠤᠴᠢᠭᠠᠳ ᠬᠥᠮᠦᠨ ᠢ ᠤᠨᠠᠭᠠᠪᠠ᠃ 32 ᠪᠢᠨᠶᠠᠮᠢᠨᠴᠤᠳ 《ᠲᠡᠳᠡ ᠤᠷᠢᠳᠤ ᠶᠢᠨ ᠠᠳᠠᠯᠢ ᠪᠢᠳᠡᠨ ᠦ ᠡᠮᠦᠨᠡ ᠴᠣᠬᠢᠭᠳᠠᠵᠤ ᠪᠠᠢᠨᠠ》 ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯ᠂ ᠢᠰᠷᠧᠯᠴᠦᠳ᠄ 《ᠵᠢᠭᠤᠲᠠᠨ ᠶᠠᠪᠤᠵᠤ ᠲᠡᠳᠡᠨ ᠢ ᠬᠣᠲᠠ ᠠᠴᠠ ᠨᠢ ᠵᠠᠮ ᠤᠷᠤᠭᠤ ᠭᠠᠷᠭᠠᠶᠠ》 ᠭᠡᠵᠡᠭᠡᠵᠦ ᠪᠠᠢᠯᠠ᠃ 33 ᠢᠰᠷᠧᠯ ᠤᠨ ᠭᠣᠣᠯ ᠬᠦᠴᠦᠨ ᠪᠠᠯ ᠲᠠᠮᠠᠷ ᠲᠤ ᠬᠦᠷᠦᠭᠡᠳ ᠡᠷᠭᠢᠵᠦ ᠪᠠᠢᠯᠳᠤᠭᠠᠨ ᠤ ᠵᠢᠭᠰᠠᠭᠠᠯ ᠪᠡᠯᠡᠳᠬᠦ ᠳᠦ᠂ ᠢᠰᠷᠧᠯ ᠤᠨ ᠪᠦᠭᠬᠦᠭᠴᠢᠳ ᠴᠤ ᠭᠢᠪᠧᠶᠠ ᠶᠢᠨ ᠪᠠᠷᠠᠭᠤᠨ ᠲᠠᠯᠠ ᠳᠠᠬᠢ ᠨᠢᠭᠤᠪᠴᠢ ᠡᠴᠡ ᠪᠡᠨ ᠵᠡᠷᠭᠡ ᠪᠡᠷ ᠭᠠᠷᠴᠤ ᠢᠷᠡᠪᠡ᠃ 34 ᠪᠦᠬᠦ ᠢᠰᠷᠧᠯ ᠡᠴᠡ ᠰᠢᠯᠢᠭᠳᠡᠭᠰᠡᠨ ᠲᠦᠮᠡᠨ ᠡᠷᠡ ᠭᠢᠪᠧᠶᠠ ᠶᠢᠨ ᠥᠭᠡᠳᠡ ᠡᠴᠡ ᠢᠷᠡᠵᠦ ᠲᠤᠯᠤᠯᠳᠤᠭᠠᠨ ᠰᠢᠷᠦᠭᠦᠰᠬᠦ ᠳᠦ᠂ ᠪᠢᠨᠶᠠᠮᠢᠨ ᠠᠶᠤᠯ ᠭᠠᠮᠰᠢᠭ ᠲᠤᠯᠵᠤ ᠢᠷᠡᠭᠰᠡᠨ ᠢ ᠮᠡᠳᠡᠭᠰᠡᠨ ᠦᠭᠡᠢ᠃
35 ᠶᠣᠬᠣᠸᠠ ᠢᠰᠷᠧᠯ ᠤᠨ ᠡᠮᠦᠨᠡ ᠪᠢᠨᠶᠠᠮᠢᠨ ᠢ ᠴᠣᠬᠢᠭᠰᠠᠨ ᠳᠤ᠂ ᠲᠡᠷᠡ ᠡᠳᠦᠷ ᠢᠰᠷᠧᠯᠴᠦᠳ ᠪᠢᠨᠶᠠᠮᠢᠨ ᠤ ᠬᠣᠶᠠᠷ ᠲᠦᠮᠡ ᠲᠠᠪᠤᠨ ᠮᠢᠩ᠋ᠭᠠ ᠨᠢᠭᠡ ᠵᠠᠭᠤᠨ ᠢᠯᠳᠦ ᠠᠭᠰᠠᠭᠴᠢ ᠶᠢ ᠰᠥᠨᠥᠭᠡᠭᠰᠡᠨ ᠪᠠᠢᠨᠠ᠃
36 ᠲᠡᠭᠡᠬᠦ ᠳᠦ ᠪᠢᠨᠶᠠᠮᠢᠨᠴᠤᠳ ᠢᠯᠠᠭᠳᠠᠭᠰᠠᠨ ᠢᠶᠠᠨ ᠤᠬᠠᠭᠠᠷᠠᠪᠠ᠃
37 ᠪᠦᠭᠬᠦᠭᠰᠡᠨ ᠴᠡᠷᠢᠭ ᠶᠠᠭᠠᠷᠠᠪᠴᠢᠯᠠᠨ ᠭᠢᠪᠧᠶᠠ ᠳᠤ ᠴᠥᠮᠥᠷᠥᠨ ᠣᠷᠣᠵᠤ᠂ ᠬᠦᠴᠦ ᠪᠡᠨ ᠲᠠᠷᠬᠠᠭᠠᠨ᠂ ᠪᠦᠬᠦ ᠬᠣᠲᠠ ᠶᠢᠨ ᠬᠢᠨ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠴᠣᠬᠢᠪᠠ᠃ 38 ᠤᠤᠯ ᠨᠢ ᠢᠰᠷᠧᠯ ᠤᠨ ᠭᠣᠣᠯ ᠬᠦᠴᠦ ᠪᠣᠯᠣᠨ ᠪᠦᠭᠬᠦᠭᠰᠡᠨ ᠴᠡᠷᠢᠭ ᠤᠨ ᠬᠣᠭᠣᠷᠣᠨᠳᠣ ᠲᠣᠬᠢᠷᠠᠯᠴᠠᠭᠠ ᠪᠠᠢᠵᠠᠢ᠃ ᠬᠣᠲᠠ ᠠᠴᠠ ᠶᠡᠬᠡ ᠤᠲᠤᠭᠠ ᠭᠠᠷᠪᠠᠯ 39 ᠢᠰᠷᠧᠯ ᠤᠨ ᠭᠣᠣᠯ ᠬᠦᠴᠦ ᠲᠤᠯᠤᠯᠳᠤᠭᠠᠨ ᠳᠤ ᠪᠤᠴᠠᠵᠤ ᠢᠷᠡᠬᠦ ᠶᠣᠰᠣᠲᠠᠢ ᠪᠠᠢᠪᠠ᠃ ᠪᠢᠨᠶᠠᠮᠢᠨᠴᠤᠳ ᠢᠰᠷᠧᠯᠴᠦᠳ ᠢ ᠴᠣᠬᠢᠵᠤ ᠡᠬᠢᠯᠡᠨ᠂ ᠭᠤᠴᠢᠭᠠᠳ ᠬᠥᠮᠦᠨ ᠢ ᠤᠨᠠᠭᠠᠬᠤ ᠳᠠᠭᠠᠨ᠄ 《ᠲᠡᠳᠡ ᠤᠷᠢᠳᠤ ᠶᠢᠨ ᠬᠢ ᠰᠢᠭ᠋ ᠪᠢᠳᠡᠨ ᠦ ᠡᠮᠦᠨᠡ ᠭᠠᠷᠴᠠᠭᠠ ᠦᠭᠡᠢ ᠴᠣᠬᠢᠭᠳᠠᠵᠠᠢ》 ᠭᠡᠵᠦ ᠪᠣᠳᠣᠭᠰᠠᠨ ᠪᠠᠢᠪᠠ᠃ 40 ᠬᠠᠷᠢᠨ ᠬᠣᠲᠠ ᠠᠴᠠ ᠤᠲᠤᠭᠠ ᠪᠠᠭᠠᠬᠢᠵᠤ ᠡᠬᠢᠯᠡᠪᠡ᠃ ᠪᠢᠨᠶᠠᠮᠢᠨᠴᠤᠳ ᠡᠷᠭᠢᠨ ᠬᠠᠷᠠᠲᠠᠯᠠ᠂ ᠪᠦᠬᠦ ᠬᠣᠲᠠ ᠳᠤ ᠭᠠᠯ ᠳᠦᠷᠡᠯᠵᠡᠵᠦ ᠤᠲᠤᠭᠠ ᠨᠢ ᠲᠩᠷᠢ ᠥᠭᠡᠳᠡ ᠪᠤᠷᠭᠢᠵᠤ ᠪᠠᠢᠯᠠ︕ 41 ᠢᠰᠷᠧᠯ ᠤᠨ ᠭᠣᠣᠯ ᠬᠦᠴᠦ ᠡᠷᠭᠢᠵᠦ ᠳᠠᠭᠠᠷᠢᠭᠰᠠᠨ ᠳᠤ᠂ ᠪᠢᠨᠶᠠᠮᠢᠨᠴᠤᠳ ᠭᠠᠢ ᠳᠤ ᠥᠷᠲᠥᠭᠰᠡᠨ ᠢᠶᠡᠨ ᠤᠬᠠᠭᠠᠷᠠᠵᠤ ᠰᠠᠨᠳᠤᠷᠴᠠᠭᠠᠪᠠ᠃ 42 ᠲᠡᠳᠡ ᠢᠰᠷᠧᠯᠴᠦᠳ ᠲᠦ ᠨᠢᠷᠤᠭᠤ ᠪᠠᠨ ᠬᠠᠷᠠᠭᠤᠯᠤᠨ᠂ ᠴᠥᠯ ᠦᠨ ᠵᠠᠮ ᠢᠶᠠᠷ ᠵᠢᠭᠤᠲᠠᠭᠰᠠᠨ ᠪᠣᠯᠪᠠᠴᠤ ᠬᠣᠲᠠ ᠠᠴᠠ ᠭᠠᠷᠴᠤ ᠢᠷᠡᠭᠰᠡᠨ ᠢᠰᠷᠧᠯᠴᠦᠳ ᠴᠤ ᠠᠷᠤ ᠠᠴᠠ ᠨᠢ ᠢᠷᠡᠵᠦ᠂ ᠲᠡᠳᠡᠨ ᠢ ᠴᠣᠬᠢᠭᠰᠠᠨ ᠲᠤᠯᠠ ᠲᠡᠳᠡ ᠲᠤᠯᠤᠯᠳᠤᠭᠠᠨ ᠠᠴᠠ ᠵᠠᠢᠯᠠᠬᠤ ᠠᠷᠭᠠ ᠦᠭᠡᠢ ᠪᠣᠯᠵᠤ ᠤᠰᠠᠳᠬᠠᠭᠳᠠᠪᠠ᠃ 43 ᠢᠰᠷᠧᠯᠴᠦᠳ ᠪᠢᠨᠶᠠᠮᠢᠨᠴᠤᠳ ᠢ ᠪᠦᠰᠡᠯᠡᠨ᠂ ᠲᠡᠳᠡᠨ ᠢ ᠠᠮᠤᠰᠬᠢᠯᠭᠡᠯ ᠦᠭᠡᠢ᠂ ᠵᠡᠭᠦᠨ ᠲᠡᠰᠢ ᠭᠢᠪᠧᠶᠠ ᠶᠢᠨ ᠴᠠᠭᠠᠨᠠ ᠬᠦᠷᠲᠡᠯᠡ ᠨᠡᠬᠡᠵᠦ ᠲᠡᠳᠡᠨ ᠢ ᠰᠦᠢᠷᠡᠭᠦᠯᠪᠡ᠃ 44 ᠲᠡᠢᠨ ᠬᠦ ᠪᠢᠨᠶᠠᠮᠢᠨ ᠤ ᠲᠦᠮᠡ ᠨᠠᠢ᠌ᠮᠠᠨ ᠮᠢᠩ᠋ᠭᠠᠨ ᠡᠷᠡ ᠤᠨᠠᠭᠰᠠᠨ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡᠭᠡᠷ ᠡᠷᠡᠯᠬᠡᠭ ᠳᠠᠢᠴᠢᠨ ᠪᠠᠢᠪᠠ᠃ 45 ᠦᠯᠡᠳᠡᠭᠰᠡᠨ ᠨᠢ ᠴᠢᠭᠯᠡᠯ ᠢᠶᠡᠨ ᠥᠭᠡᠷᠡᠴᠢᠯᠡᠵᠦ᠂ ᠴᠥᠯ ᠲᠡᠰᠢ ᠷᠢᠮᠣᠨ ᠤ ᠬᠠᠳᠠ ᠤᠷᠤᠭᠤ ᠵᠢᠭᠤᠲᠠᠭᠰᠠᠨ ᠪᠣᠯᠪᠠᠴᠤ ᠢᠰᠷᠧᠯᠴᠦᠳ ᠲᠡᠳᠡᠨ ᠦ ᠲᠠᠪᠤᠨ ᠮᠢᠩ᠋ᠭᠠ ᠶᠢ ᠨᠢ ᠵᠠᠮ ᠳᠤᠨᠢ ᠪᠤᠲᠠ ᠴᠣᠬᠢᠨ᠂ ᠦᠯᠡᠳᠡᠭᠰᠡᠨ ᠢ ᠨᠢ ᠭᠢᠳᠣᠮ ᠬᠦᠷᠲᠡᠯᠡ ᠪᠣᠷᠪᠢᠳᠠᠨ ᠨᠡᠬᠡᠭᠰᠡᠭᠡᠷ ᠳᠠᠬᠢᠨ ᠬᠣᠶᠠᠷ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠠᠯᠠᠪᠠ᠃ 46 ᠲᠡᠷᠡ ᠡᠳᠦᠷ ᠪᠢᠨᠶᠠᠮᠢᠨᠴᠤᠳ ᠠᠴᠠ ᠢᠯᠳᠦ ᠠᠭᠰᠠᠭᠰᠠᠨ ᠬᠣᠶᠠᠷ ᠲᠦᠮᠡ ᠲᠠᠪᠤᠨ ᠮᠢᠩ᠋ᠭᠠᠨ ᠬᠥᠮᠦᠨ ᠤᠨᠠᠭᠰᠠᠨ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡᠭᠡᠷ ᠡᠷᠡᠯᠬᠡᠭ ᠳᠠᠢᠴᠢᠨ ᠪᠠᠢᠵᠠᠢ᠃ 47 ᠬᠠᠷᠢᠨ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠥᠮᠦᠨ ᠨᠢ ᠴᠢᠭᠯᠡᠯ ᠢᠶᠡᠨ ᠥᠭᠡᠷᠡᠴᠢᠯᠡᠵᠦ ᠴᠥᠯ ᠲᠡᠰᠢ ᠷᠢᠮᠣᠨ ᠤ ᠬᠠᠳᠠ ᠤᠷᠤᠭᠤ ᠵᠢᠭᠤᠲᠠᠨ᠂ ᠲᠡᠨᠳᠡ ᠳᠥᠷᠪᠡᠨ ᠰᠠᠷᠠ ᠪᠠᠢᠪᠠ᠃ 48 ᠢᠰᠷᠧᠯᠴᠦᠳ ᠪᠢᠨᠶᠠᠮᠢᠨᠴᠤᠳ ᠤᠷᠤᠭᠤ ᠪᠤᠴᠠᠨ ᠣᠴᠢᠵᠤ᠂ ᠪᠦᠬᠦ ᠬᠣᠲᠠ ᠶᠢᠨ ᠬᠢᠨ ᠢ ᠬᠥᠮᠦᠨ ᠮᠠᠯ ᠢᠯᠭᠠᠯ ᠦᠭᠡᠢ ᠪᠦᠭᠦᠳᠡ ᠶᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠴᠣᠬᠢᠵᠤ᠂ ᠬᠦᠷᠦᠭᠰᠡᠨ ᠪᠦᠬᠦ ᠬᠣᠲᠠ ᠲᠣᠰᠬᠣᠨ ᠢᠶᠠᠨ ᠭᠠᠯᠳᠠᠨ ᠰᠢᠲᠠᠭᠠᠪᠠ᠃