ᠰᠢᠭᠦᠭᠴᠢᠳ ᠨᠠᠢ᠌ᠮᠠ
ᠮᠢᠳᠢᠶᠠᠨ ᠤ ᠬᠣᠶᠠᠷ ᠬᠠᠭᠠᠨ ᠤ ᠲᠡᠭᠦᠰᠬᠡᠯ
1 ᠡᠹᠷᠠᠢᠮᠴᠤᠳ ᠭᠢᠳᠧᠶᠣᠨ ᠳᠤ᠄ 《ᠲᠠ ᠪᠢᠳᠡᠨ ᠳᠦ ᠶᠠᠭᠤ ᠬᠢᠴᠢᠬᠡᠬᠦ ᠨᠢ ᠡᠨᠡ ᠪᠤᠢ︖ ᠮᠢᠳᠢᠶᠠᠨᠴᠤᠳ ᠲᠠᠢ ᠲᠤᠯᠤᠯᠳᠤᠬᠤ ᠪᠠᠷ ᠬᠥᠳᠡᠯᠬᠦ ᠳᠡᠭᠡᠨ ᠪᠢᠳᠡᠨ ᠢ ᠳᠠᠭᠤᠳᠠᠭᠰᠠᠨ ᠦᠭᠡᠢ》 ᠭᠡᠳ ᠲᠡᠭᠦᠨ ᠢ ᠰᠢᠷᠦᠭᠦᠨ ᠵᠢᠮᠡᠯᠡᠪᠡ᠃ 2 ᠭᠢᠳᠧᠶᠣᠨ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠲᠠᠢ ᠬᠠᠷᠢᠴᠠᠭᠤᠯᠬᠤ ᠳᠤ᠂ ᠮᠢᠨᠦ ᠬᠢᠭᠰᠡᠨ ᠵᠦᠢᠯ ᠨᠢ ᠶᠠᠭᠤ ᠶᠤᠮ ᠪᠤᠢ︖ ᠡᠹᠷᠠᠢᠮ ᠤᠨ ᠵᠢᠮᠢᠰ ᠤᠨ ᠬᠠᠶᠠᠭᠳᠠᠯ ᠨᠢ ᠠᠪᠢᠶᠧᠽᠧᠷ ᠶᠢᠨ ᠦᠵᠦᠮ ᠦᠨ ᠤᠷᠭᠤᠴᠠᠨ ᠠᠴᠠ ᠳᠡᠭᠡᠷᠡ ᠪᠢᠰᠢ ᠤᠤ︖ 3 ᠪᠤᠷᠬᠠᠨ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠮᠢᠳᠢᠶᠠᠨ ᠤ ᠨᠣᠶᠠᠨ ᠣᠷᠧᠪ ᠽᠧᠪ ᠨᠠᠷ ᠢ ᠲᠤᠰᠢᠶᠠᠭᠰᠠᠨ ᠪᠣᠯᠬᠣᠷ ᠲᠠ ᠨᠠᠷ ᠤᠨ ᠬᠢ ᠲᠠᠢ ᠬᠠᠷᠢᠴᠠᠭᠤᠯᠬᠤ ᠪᠠᠷ ᠬᠢᠵᠦ ᠴᠢᠳᠠᠭᠰᠠᠨ ᠵᠦᠢᠯ ᠮᠠᠨᠢ ᠶᠠᠭᠤ ᠪᠠᠢᠬᠤ ᠪᠤᠢ︖》 ᠭᠡᠪᠡ᠃ ᠲᠡᠭᠦᠨ ᠦ ᠡᠨᠡ ᠦᠭᠡ ᠪᠡᠷ ᠲᠡᠳᠡᠨ ᠦ ᠠᠭᠤᠷ ᠬᠢᠯᠢᠩ ᠨᠠᠮᠳᠠᠭᠰᠠᠨ ᠪᠠᠢᠯᠠ᠃
4 ᠭᠢᠳᠧᠶᠣᠨ ᠶᠣᠷᠳᠠᠨ ᠳᠤ ᠬᠦᠷᠴᠦ᠂ ᠬᠠᠷᠢᠶᠠ ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠲᠡᠢ ᠪᠡᠨ ᠬᠠᠮᠲᠤ ᠭᠣᠣᠯ ᠭᠠᠲᠤᠯᠪᠠ᠃ ᠲᠡᠳᠡ ᠶᠠᠳᠠᠷᠠᠵᠤ ᠪᠠᠢᠪᠠᠴᠤ ᠨᠡᠬᠡᠭᠰᠡᠭᠡᠷ ᠪᠠᠢᠯᠠ᠃ 5 ᠭᠢᠳᠧᠶᠣᠨ ᠰᠦᠺᠣᠲ ᠤᠨ ᠬᠥᠮᠦᠰ ᠡᠴᠡ᠄ 《ᠨᠠᠮᠠᠶᠢ ᠳᠠᠭᠠᠵᠤ ᠶᠠᠪᠤᠭᠠ ᠬᠥᠮᠦᠰ ᠲᠦ ᠬᠣᠭᠣᠯᠠ ᠬᠦᠨᠡᠰᠦ ᠥᠭᠭᠥᠨᠡ ᠤᠤ︖ ᠲᠡᠳᠡ ᠶᠠᠳᠠᠷᠠᠵᠠᠢ᠃ ᠮᠠᠨ ᠤ ᠬᠢᠨ ᠮᠢᠳᠢᠶᠠᠨ ᠤ ᠬᠠᠭᠠᠳ ᠽᠧᠪᠠ᠂ ᠽᠠᠯᠮᠣᠨᠠ ᠨᠠᠷ ᠢ ᠨᠡᠬᠡᠵᠦ ᠶᠠᠪᠤᠨᠠ》 ᠭᠡᠵᠦ ᠭᠤᠶᠤᠬᠤ ᠳᠤ᠂ 6 ᠰᠦᠺᠣᠲ ᠤᠨ ᠨᠣᠶᠠᠳ᠄ 《ᠽᠧᠪᠠ᠂ ᠽᠠᠯᠮᠣᠨᠠ ᠨᠠᠷ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠣᠷᠣᠴᠢᠬᠠᠭᠠᠳ ᠪᠠᠢᠨᠠ ᠤᠤ︖ ᠪᠢᠳᠡ ᠶᠠᠭᠤᠨ ᠳᠤ ᠲᠠᠨ ᠤ ᠬᠥᠮᠦᠰ ᠲᠦ ᠬᠣᠭᠣᠯᠠ ᠬᠦᠨᠡᠰᠦ ᠥᠭᠬᠦ ᠪᠢᠯᠡ︖》 ᠭᠡᠵᠡᠢ᠃ 7 ᠭᠢᠳᠧᠶᠣᠨ᠄ 《ᠵᠠ᠂ ᠶᠣᠬᠣᠸᠠ ᠮᠢᠨᠦ ᠭᠠᠷ ᠲᠤ ᠽᠧᠪᠠ᠂ ᠽᠠᠯᠮᠣᠨᠠ ᠨᠠᠷ ᠢ ᠲᠤᠰᠢᠶᠠᠬᠤ ᠴᠠᠭ ᠲᠤ ᠪᠢ ᠭᠣᠪᠢ ᠶᠢᠨ ᠥᠷᠭᠡᠰᠦ ᠪᠣᠯᠣᠨ ᠬᠠᠯᠠᠭᠠᠢ ᠪᠠᠷ ᠲᠠ ᠨᠠᠷ ᠤᠨ ᠮᠢᠬᠠ ᠶᠢ ᠤᠷᠠᠨᠠ ᠳᠠ》 ᠭᠡᠪᠡ᠃ 8 ᠭᠢᠳᠧᠶᠣᠨ ᠲᠡᠨᠳᠡ ᠡᠴᠡ ᠫᠧᠨᠢᠶᠧᠯ ᠥᠭᠡᠳᠡ ᠣᠴᠢᠨ᠂ ᠠᠩ᠋ᠬᠠᠨ ᠤ ᠠᠳᠠᠯᠢ ᠬᠡᠯᠡᠬᠦ ᠳᠦ᠂ ᠫᠧᠨᠢᠶᠧᠯᠴᠦᠳ ᠴᠤ ᠰᠦᠺᠣᠲ᠋ᠴᠤᠳ ᠤᠨ ᠠᠳᠠᠯᠢ ᠬᠠᠷᠢᠭᠤᠯᠪᠠ᠃ 9 ᠲᠡᠷᠡ ᠫᠧᠨᠢᠶᠧᠯᠴᠦᠳ ᠲᠦ ᠴᠤ᠄ 《ᠪᠢ ᠡᠰᠡᠨ ᠮᠡᠨᠳᠦ ᠪᠤᠴᠠᠵᠤ ᠢᠷᠡᠬᠦ ᠳᠡᠭᠡᠨ ᠡᠨᠡ ᠴᠠᠮᠬᠠᠭ ᠢ ᠴᠢᠨᠢ ᠨᠤᠷᠠᠭᠠᠨᠠ ᠳᠠ》 ᠭᠡᠪᠡ᠃
10 ᠲᠡᠷᠡ ᠦᠶᠡ ᠳᠦ ᠽᠧᠪᠠ᠂ ᠽᠠᠯᠮᠣᠨᠠ ᠨᠠᠷ ᠺᠠᠷᠺᠣᠷ ᠲᠤ ᠪᠠᠢᠪᠠ᠃ ᠳᠣᠷᠣᠨᠠ ᠶᠢᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠪᠦᠬᠦ ᠴᠡᠷᠢᠭ ᠤᠨ ᠳᠤᠮᠳᠠ ᠠᠴᠠ ᠠᠷᠪᠠᠨ ᠬᠣᠶᠠᠷ ᠲᠦᠮᠡᠨ ᠰᠡᠯᠡᠮᠡᠲᠡᠨ ᠠᠯᠠᠭᠳᠠᠭᠰᠠᠨ ᠪᠥᠭᠡᠳ ᠠᠮᠢᠳᠤ ᠦᠯᠡᠳᠡᠭᠰᠡᠳ ᠡᠴᠡ ᠲᠦᠮᠡ ᠲᠠᠪᠤᠨ ᠮᠢᠩ᠋ᠭᠠ ᠣᠷᠴᠢᠮ ᠬᠥᠮᠦᠨ ᠲᠡᠷᠡ ᠬᠣᠶᠠᠷ ᠲᠠᠢ ᠬᠠᠮᠲᠤ ᠪᠠᠢᠯᠠ᠃ 11 ᠲᠡᠳᠡ ᠰᠡᠵᠢᠭ ᠠᠪᠤᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ ᠭᠢᠳᠧᠶᠣᠨ ᠨᠡᠭᠦᠳᠡᠯᠴᠢᠨ ᠤ ᠵᠠᠮ ᠢ ᠳᠠᠭᠠᠨ ᠵᠡᠭᠦᠨ ᠲᠠᠯᠠ ᠶᠢᠨ ᠨᠣᠪᠠ ᠪᠠ ᠶᠣᠭᠪᠧᠬᠠ ᠬᠦᠷᠲᠡᠯᠡ ᠥᠭᠰᠥᠨ ᠣᠴᠢᠵᠤ᠂ ᠲᠡᠳᠡᠨ ᠦ ᠬᠤᠸᠠᠷᠠᠨ ᠢ ᠳᠣᠪᠲᠣᠯᠪᠠ᠃ 12 ᠽᠧᠪᠠ ᠪᠣᠯᠣᠨ ᠽᠠᠯᠮᠣᠨᠠ ᠨᠠᠷ ᠵᠢᠭᠤᠲᠠᠭᠰᠠᠨ ᠳᠤ᠂ ᠭᠢᠳᠧᠶᠣᠨ ᠨᠡᠬᠡᠵᠦ ᠮᠢᠳᠢᠶᠠᠨ ᠤ ᠬᠣᠶᠠᠷ ᠬᠠᠭᠠᠨ ᠽᠧᠪᠠ ᠪᠣᠯᠣᠨ ᠽᠠᠯᠮᠣᠨᠠ ᠨᠠᠷ ᠢ ᠣᠯᠵᠠᠯᠠᠭᠰᠠᠨ ᠪᠥᠭᠡᠳ ᠪᠦᠬᠦ ᠴᠡᠷᠢᠭ ᠢ ᠨᠢ ᠪᠤᠲᠠ ᠴᠣᠬᠢᠵᠠᠢ᠃
13 ᠶᠣᠶᠠᠱ ᠤᠨ ᠬᠥᠪᠡᠭᠦᠨ ᠭᠢᠳᠧᠶᠣᠨ ᠲᠤᠯᠤᠯᠳᠤᠭᠠᠨ ᠠᠴᠠ ᠪᠤᠴᠠᠨ ᠾᠧᠷᠧᠰ ᠤᠨ ᠳᠠᠪᠠᠭᠠ ᠪᠠᠷ ᠢᠷᠡᠬᠦ ᠳᠡᠭᠡᠨ 14 ᠰᠦᠺᠣᠲ ᠤᠨ ᠨᠢᠭᠡᠨ ᠵᠠᠯᠠᠭᠤ ᠶᠢ ᠪᠠᠷᠢᠵᠤ ᠪᠠᠢᠴᠠᠭᠠᠭᠰᠠᠨ ᠳᠤ᠂ ᠲᠡᠷᠡ ᠵᠠᠯᠠᠭᠤ ᠰᠦᠺᠣᠲ ᠤᠨ ᠨᠣᠶᠠᠨ᠂ ᠠᠬᠠᠯᠠᠭᠴᠢ ᠳᠠᠯᠠᠨ ᠳᠣᠯᠣᠭᠠᠨ ᠬᠥᠮᠦᠨ ᠦ ᠨᠡᠷᠡ ᠶᠢ ᠪᠢᠴᠢᠵᠦ ᠥᠭᠪᠡ᠃ 15 ᠭᠢᠳᠧᠶᠣᠨ ᠰᠦᠺᠣᠲ᠋ᠴᠤᠳ ᠳᠡᠭᠡᠷᠡ ᠢᠷᠡᠵᠦ᠄ 《ᠬᠠᠷᠠ᠂ ᠽᠧᠪᠠ᠂ ᠽᠠᠯᠮᠣᠨᠠ ᠨᠠᠷ ᠡ᠊ᠨᠳᠡ ᠪᠠᠢᠨᠠ᠃ ᠲᠠ ᠨᠠᠷ᠄ 〈ᠽᠧᠪᠠ ᠪᠣᠯᠣᠨ ᠽᠠᠯᠮᠣᠨᠠ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠣᠷᠣᠴᠢᠬᠠᠭᠠᠳ ᠪᠠᠢᠨᠠ ᠤᠤ︖ ᠶᠠᠭᠤᠨ ᠳᠤ ᠪᠢᠳᠡ ᠶᠠᠳᠠᠷᠠᠭᠰᠠᠨ ᠲᠠᠨ ᠤ ᠬᠢᠨ ᠳᠤ ᠬᠣᠭᠣᠯᠠ ᠬᠦᠨᠡᠰᠦ ᠥᠭᠬᠦ ᠪᠢᠯᠡ︖〉 ᠭᠡᠵᠦ ᠨᠠᠮᠠᠶᠢ ᠱᠣᠣᠯᠠᠵᠤ ᠪᠠᠢᠭᠰᠠᠨ》 ᠭᠡᠳ᠂ 16 ᠬᠣᠲᠠ ᠶᠢᠨ ᠠᠬᠠᠯᠠᠭᠴᠢᠳ ᠢ ᠪᠠᠷᠢᠪᠴᠢᠯᠠᠵᠤ᠂ ᠭᠣᠪᠢ ᠶᠢᠨ ᠥᠷᠭᠡᠰᠦ ᠪᠣᠯᠣᠨ ᠬᠠᠯᠠᠭᠠᠢ ᠪᠠᠷ ᠰᠦᠺᠣᠲ᠋ᠴᠤᠳ ᠢ ᠭᠡᠰᠬᠡᠪᠡ᠃ 17 ᠮᠥᠨ ᠫᠧᠨᠢᠶᠧᠯ ᠤᠨ ᠴᠠᠮᠬᠠᠭ ᠢ ᠨᠤᠷᠠᠭᠠᠨ᠂ ᠬᠣᠲᠠ ᠶᠢᠨ ᠬᠢᠨ ᠢ ᠠᠯᠠᠭᠰᠠᠨ ᠪᠠᠢᠯᠠ᠃
18 ᠳᠠᠷᠠᠭᠠ ᠨᠢ ᠽᠧᠪᠠ ᠪᠣᠯᠣᠨ ᠽᠠᠯᠮᠣᠨᠠ ᠨᠠᠷ ᠠᠴᠠ᠄ 《ᠲᠠ ᠨᠠᠷ ᠤᠨ ᠲᠠᠪᠣᠷ ᠲᠤ ᠠᠯᠠᠭᠰᠠᠨ ᠬᠥᠮᠦᠰ ᠶᠠᠮᠠᠷᠰᠢᠤ ᠬᠥᠮᠦᠰ ᠪᠠᠢᠭᠰᠠᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 《ᠲᠡᠳᠡ ᠨᠠᠷ ᠲᠠᠨ ᠲᠠᠢ ᠠᠳᠠᠯᠢ ᠪᠦᠭᠦᠳᠡ ᠯᠠ ᠬᠠᠭᠠᠨ ᠤ ᠬᠥᠪᠡᠭᠦᠨ ᠦ ᠲᠥᠷᠬᠥ ᠲᠠᠢ ᠪᠠᠢᠭᠰᠠᠨ》 ᠭᠡᠵᠦ ᠲᠡᠳᠡ ᠬᠡᠯᠡᠪᠡ᠃ 19 ᠭᠢᠳᠧᠶᠣᠨ᠄ 《ᠲᠡᠳᠡ ᠪᠣᠯ ᠮᠢᠨᠦ ᠠᠬᠠ ᠳᠡᠭᠦᠦ ᠨᠠᠷ᠂ ᠮᠢᠨᠦ ᠡᠬᠡ ᠶᠢᠨ ᠬᠥᠪᠡᠭᠦᠳ ᠪᠠᠢᠭᠰᠠᠨ᠃ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠲᠠ ᠨᠠᠷ ᠲᠡᠳᠡᠨ ᠢ ᠠᠮᠢᠳᠤ ᠦᠯᠡᠳᠡᠭᠡᠭᠰᠡᠨ ᠪᠣᠯ᠂ ᠪᠢ ᠲᠠ ᠨᠠᠷ ᠢ ᠠᠯᠠᠬᠤ ᠦᠭᠡᠢ ᠪᠠᠢᠬᠤ ᠰᠠᠨ》 ᠭᠡᠳ 20 ᠤᠤᠭᠠᠨ ᠬᠥᠪᠡᠭᠦᠨ ᠶᠧᠲ᠋ᠧᠷ ᠲᠡᠭᠡᠨ᠄ 《ᠲᠡᠳᠡᠨ ᠢ ᠠᠯᠠᠭᠲᠤᠨ》 ᠭᠡᠵᠦ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠵᠠᠯᠠᠭᠤ ᠬᠥᠪᠡᠭᠦᠨ ᠢᠯᠳᠦ ᠪᠡᠨ ᠰᠤᠭᠤᠯᠤᠭᠰᠠᠨ ᠦᠭᠡᠢ᠃ ᠨᠠᠰᠤᠨ ᠳᠤ ᠬᠦᠷᠦᠭᠡ ᠦᠭᠡᠢ ᠪᠣᠯᠬᠣᠷ ᠠᠶᠤᠭᠰᠠᠨ ᠠᠵᠢ᠃ 21 ᠲᠡᠭᠡᠬᠦ ᠳᠦ ᠽᠧᠪᠠ᠂ ᠽᠠᠯᠮᠣᠨᠠ ᠨᠠᠷ᠄ 《ᠲᠠ ᠥᠪᠡᠷ ᠢᠶᠡᠨ ᠪᠢᠳᠡᠨ ᠢ ᠠᠯᠠᠭᠲᠤᠨ᠃ ᠬᠥᠮᠦᠨ ᠬᠥᠮᠦᠨ ᠦ ᠬᠦᠴᠦ ᠢᠯᠭᠠᠭᠠ ᠲᠠᠢ》 ᠭᠡᠬᠦ ᠳᠦ᠂ ᠭᠢᠳᠧᠶᠣᠨ ᠪᠣᠰᠴᠤ᠂ ᠽᠧᠪᠠ ᠪᠣᠯᠣᠨ ᠽᠠᠯᠮᠣᠨᠠ ᠨᠠᠷ ᠢ ᠠᠯᠠᠭᠠᠳ ᠲᠡᠳᠡᠨ ᠦ ᠲᠡᠮᠡᠭᠡᠳ ᠦᠨ ᠬᠦᠵᠦᠭᠦᠨ ᠳᠦ ᠪᠠᠢᠭᠰᠠᠨ ᠬᠠᠪᠢᠷᠭᠠᠨ ᠰᠠᠷᠠᠨ ᠴᠢᠮᠡᠭ ᠢ ᠮᠤᠯᠲᠤᠯᠤᠨ ᠠᠪᠤᠭᠰᠠᠨ ᠪᠠᠢᠨᠠ᠃
ᠭᠢᠳᠧᠶᠣᠨ ᠤ ᠦᠯᠡᠳᠡᠭᠡᠭᠰᠡᠨ ᠡᠹᠣᠳ
22 ᠢᠰᠷᠧᠯᠴᠦᠳ ᠭᠢᠳᠧᠶᠣᠨ ᠳᠤ᠄ 《ᠲᠠ ᠪᠢᠳᠡᠨ ᠢ ᠮᠢᠳᠢᠶᠠᠨ ᠤ ᠰᠠᠪᠠᠷ ᠠᠴᠠ ᠠᠪᠤᠷᠠᠭᠰᠠᠨ᠃ ᠲᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠲᠠᠨ ᠤ ᠬᠥᠪᠡᠭᠦᠳ ᠪᠣᠯᠣᠨ ᠲᠠᠨ ᠤ ᠠᠴᠢ ᠨᠠᠷ ᠴᠤ ᠪᠢᠳᠡᠨ ᠢ ᠵᠠᠬᠢᠷᠬᠤ ᠪᠣᠯᠣᠭᠠᠰᠠᠢ》 ᠭᠡᠵᠡᠭᠡᠭᠰᠡᠨ ᠳᠦ᠂ 23 ᠭᠢᠳᠧᠶᠣᠨ ᠲᠡᠳᠡᠨ ᠳᠦ᠄ 《ᠪᠢ ᠲᠠ ᠨᠠᠷ ᠢ ᠵᠠᠬᠢᠷᠬᠤ ᠦᠭᠡᠢ᠃ ᠮᠢᠨᠦ ᠬᠥᠪᠡᠭᠦᠨ ᠴᠤ ᠲᠠ ᠨᠠᠷ ᠢ ᠵᠠᠬᠢᠷᠬᠤ ᠦᠭᠡᠢ᠃ ᠲᠠ ᠨᠠᠷ ᠢ ᠵᠠᠬᠢᠷᠤᠭᠴᠢ ᠨᠢ ᠶᠣᠬᠣᠸᠠ ᠪᠢᠯᠡ》 ᠭᠡᠪᠡ᠃ 24 ᠭᠢᠳᠧᠶᠣᠨ᠄ 《ᠲᠠ ᠨᠠᠷ ᠠᠴᠠ ᠨᠢᠭᠡ ᠵᠦᠢᠯ ᠢ ᠬᠦᠰᠡᠶᠡ᠃ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦᠨ ᠣᠯᠵᠠᠨ ᠠᠴᠠ ᠪᠠᠨ ᠡᠭᠡᠮᠦᠭ ᠢᠶᠡᠨ ᠠᠪᠴᠢᠷᠠᠵᠤ᠂ ᠨᠠᠳᠠ ᠳᠤ ᠥᠭᠭᠥᠨᠡ ᠤᠤ︖》 ᠭᠡᠰᠡᠨ ᠳᠦ᠂ (ᠲᠡᠳᠡ ᠪᠣᠯ ᠢᠱᠮᠠᠶᠧᠯᠴᠤᠳ᠂ ᠠᠯᠲᠠᠨ ᠡᠭᠡᠮᠦᠭ ᠵᠡᠭᠦᠳᠡᠭ ᠪᠠᠢᠪᠠ᠃) 25 ᠲᠡᠳᠡ᠄ 《ᠳᠤᠷᠠᠲᠠᠶᠠ ᠥᠭᠭᠥᠨᠡ》 ᠭᠡᠳ ᠨᠢᠭᠡᠨ ᠳᠡᠪᠡᠯ ᠢ ᠳᠡᠯᠭᠡᠵᠦ᠂ ᠬᠥᠮᠦᠨ ᠪᠦᠷᠢ ᠣᠯᠵᠠᠨ ᠠᠴᠠ ᠪᠠᠨ ᠨᠢᠭᠡ ᠨᠢᠭᠡ ᠡᠭᠡᠮᠦᠭ ᠢ ᠳᠡᠭᠡᠷᠡ ᠨᠢ ᠬᠠᠶᠠᠪᠠ᠃ 26 ᠲᠡᠭᠦᠨ ᠦ ᠬᠦᠰᠡᠮᠵᠢᠯᠡᠭᠰᠡᠨ ᠠᠯᠲᠠᠨ ᠡᠭᠡᠮᠦᠭ ᠤᠳ ᠢ ᠡᠢᠨ ᠬᠦ ᠴᠤᠭᠯᠠᠭᠤᠯᠬᠤ ᠳᠤ᠂ ᠮᠢᠩ᠋ᠭᠠ ᠳᠣᠯᠣᠭᠠᠨ ᠵᠠᠭᠤᠨ ᠱᠧᠺᠧᠯ 8 ᠠᠯᠲᠠ ᠪᠣᠯᠪᠠ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠬᠠᠪᠢᠷᠭᠠᠨ ᠰᠠᠷᠠᠨ ᠴᠢᠮᠡᠭ ᠤᠳ ᠪᠣᠯᠣᠨ ᠤᠨᠵᠢᠯᠭᠠ ᠨᠤᠭᠤᠳ᠂ ᠮᠢᠳᠢᠶᠠᠨ ᠤ ᠬᠠᠭᠠᠳ ᠤᠨ ᠡᠮᠦᠰᠴᠦ ᠪᠠᠢᠭᠰᠠᠨ ᠨᠢᠯ ᠶᠠᠭᠠᠨ ᠨᠥᠮᠥᠷᠭᠡ ᠬᠢᠭᠡᠳ ᠲᠡᠳᠡᠨ ᠦ ᠲᠡᠮᠡᠭᠡᠳ ᠦᠨ ᠬᠦᠵᠦᠭᠦᠨ ᠦ ᠵᠡᠭᠦᠯᠲᠡ ᠴᠢᠮᠡᠭ ᠴᠤ ᠪᠠᠢᠪᠠ᠃ 27 ᠭᠢᠳᠧᠶᠣᠨ ᠲᠡᠳᠡᠭᠡᠷ ᠠᠯᠲᠠ ᠪᠠᠷ ᠡᠹᠣᠳ ᠪᠦᠲᠦᠭᠡᠵᠦ᠂ ᠣᠹᠷᠠ ᠬᠣᠲᠠ ᠳᠠᠭᠠᠨ ᠲᠠᠯᠪᠢᠭᠰᠠᠨ ᠪᠠᠢᠯᠠ᠃ ᠲᠡᠭᠡᠭᠰᠡᠨ ᠢᠶᠡᠷ ᠪᠦᠬᠦ ᠢᠰᠷᠧᠯ ᠲᠡᠨᠳᠡ ᠣᠴᠢᠵᠤ ᠲᠡᠭᠦᠨ ᠢ ᠨᠢ ᠰᠢᠲᠦᠨ ᠵᠠᠪᠬᠠᠢᠷᠠᠵᠠᠭᠠᠪᠠ᠃ ᠲᠡᠷᠡ ᠨᠢ ᠭᠢᠳᠧᠶᠣᠨ ᠪᠣᠯᠣᠨ ᠲᠡᠭᠦᠨ ᠦ ᠭᠡᠷ ᠦᠨ ᠬᠢᠨ ᠳᠤ ᠵᠠᠩ᠋ᠭᠤᠤ ᠪᠣᠯᠣᠭᠰᠠᠨ ᠶᠤᠮ᠃ 28 ᠮᠢᠳᠢᠶᠠᠨ ᠢᠩᠭᠢᠵᠦ ᠢᠰᠷᠧᠯᠴᠦᠳ ᠲᠦ ᠳᠡᠢᠯᠦᠭᠳᠡᠭᠡᠳ ᠳᠠᠬᠢᠭᠠᠳ ᠲᠣᠯᠣᠭᠠᠢ ᠥᠨᠳᠡᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠯᠠ᠃ ᠭᠢᠳᠧᠶᠣᠨ ᠤ ᠡᠳᠦᠷ ᠤᠳ ᠢᠶᠠᠷ ᠲᠡᠷᠡ ᠨᠤᠲᠤᠭ ᠳᠥᠴᠢᠨ ᠵᠢᠯ ᠠᠮᠤᠷ ᠲᠠᠢᠪᠤᠩ ᠪᠠᠢᠵᠠᠢ᠃
29 ᠶᠣᠶᠠᠱ ᠤᠨ ᠬᠥᠪᠡᠭᠦᠨ ᠶᠧᠷᠦ᠋ᠪᠠᠯ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠠᠮᠢᠳᠤᠷᠠᠪᠠ᠃ 30 ᠭᠢᠳᠧᠶᠣᠨ ᠣᠯᠠᠨ ᠡᠬᠡᠨᠡᠷ ᠲᠡᠢ ᠪᠣᠯᠬᠣᠷ ᠳᠠᠯᠠᠨ ᠬᠦᠦ ᠲᠠᠢ ᠪᠠᠢᠯᠠ᠃ 31 ᠱᠧᠺᠧᠮ ᠳᠤ ᠪᠠᠢᠭᠰᠠᠨ ᠲᠠᠲᠠᠪᠤᠷᠢ ᠡᠮᠡ ᠨᠢ ᠴᠤ ᠲᠡᠭᠦᠨ ᠳᠦ ᠬᠥᠪᠡᠭᠦᠨ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠳᠦ᠂ ᠲᠡᠭᠦᠨ ᠢ ᠠᠪᠢᠮᠧᠯᠧᠺ ᠭᠡᠵᠦ ᠨᠡᠷᠡᠯᠡᠪᠡ᠃ 32 ᠶᠣᠶᠠᠱ ᠤᠨ ᠬᠥᠪᠡᠭᠦᠨ ᠭᠢᠳᠧᠶᠣᠨ ᠥᠨᠳᠥᠷ ᠨᠠᠰᠤᠯᠠᠨ ᠥᠭᠡᠳᠡ ᠪᠣᠯᠣᠭᠰᠠᠨ ᠳᠤ᠂ ᠬᠥᠮᠦᠰ ᠲᠡᠭᠦᠨ ᠢ ᠠᠪᠢᠶᠧᠽᠧᠷᠴᠤᠳ ᠤᠨ ᠨᠤᠲᠤᠭ ᠳᠠᠬᠢ ᠣᠹᠷᠠ ᠳᠤ ᠪᠤᠢ ᠡᠴᠢᠭᠡ ᠶᠣᠶᠠᠱ ᠤᠨ ᠬᠢᠨᠢ ᠪᠤᠯᠠᠰᠢᠨ ᠳᠤ ᠬᠥᠳᠡᠭᠡᠯᠡᠭᠦᠯᠵᠡᠢ᠃ 33 ᠭᠢᠳᠧᠶᠣᠨ ᠨᠠᠰᠤ ᠪᠠᠷᠠᠩ᠋ᠭᠤᠲᠠ ᠢᠰᠷᠧᠯᠴᠦᠳ ᠪᠠᠯ ᠤᠳ ᠢ ᠳᠠᠭᠠᠨ ᠵᠠᠪᠬᠠᠢᠷᠠᠵᠤ᠂ ᠪᠠᠯ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠨ 9 ᠲᠡᠭᠦᠨ ᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠪᠣᠯᠭᠠᠪᠠ᠃ 34 ᠬᠠᠷᠢᠨ ᠢᠰᠷᠧᠯᠴᠦᠳ ᠡᠷᠭᠢᠨ ᠲᠣᠭᠣᠷᠢᠨ ᠤ ᠳᠠᠢᠰᠤᠨ ᠨᠤᠭᠤᠳ ᠤᠨ ᠬᠢᠨᠢ ᠰᠠᠪᠠᠷ ᠠᠴᠠ ᠴᠢᠯᠥᠭᠡᠯᠡᠵᠦ ᠥᠭᠭᠥᠭᠰᠡᠨ ᠶᠣᠬᠣᠸᠠ ᠪᠤᠷᠬᠠᠨ ᠢᠶᠠᠨ ᠰᠠᠨᠠᠬᠤ ᠪᠠᠨ ᠪᠣᠯᠢᠪᠠ᠃ 35 ᠲᠡᠳᠡ ᠮᠥᠨ ᠶᠧᠷᠦ᠋ᠪᠠᠯ ᠭᠡᠭᠳᠡᠳᠡᠭ ᠭᠢᠳᠧᠶᠣᠨ ᠤ ᠢᠰᠷᠧᠯ ᠳᠤ ᠦᠵᠡᠭᠦᠯᠦᠭᠰᠡᠨ ᠬᠠᠮᠤᠭ ᠰᠠᠢᠨ ᠰᠠᠢᠬᠠᠨ ᠤ ᠠᠴᠢ ᠬᠠᠷᠢᠭᠤ ᠶᠢ ᠲᠡᠭᠦᠨ ᠦ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠳᠤ ᠦᠵᠡᠭᠦᠯᠦᠭᠰᠡᠨ ᠦᠭᠡᠢ᠃