ᠬᠣᠶᠠᠳᠤᠭᠠᠷ ᠲᠧᠰᠠᠯᠦ᠋ᠨᠢᠺ ᠭᠤᠷᠪᠠ
ᠳᠠᠭᠠᠳᠬᠠᠭᠲᠤᠨ᠂ ᠠᠵᠢᠯᠯᠠᠭᠲᠤᠨ
1 ᠨᠡᠮᠡᠵᠦ ᠬᠡᠯᠡᠶᠡ᠂ ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡᠨ ᠦ ᠲᠥᠯᠥᠭᠡ ᠳᠠᠭᠠᠳᠬᠠᠭᠠᠷᠠᠢ᠃ ᠡᠵᠡᠨ ᠦ ᠦᠭᠡ ᠲᠠᠨ ᠤ ᠲᠡᠨᠳᠡᠬᠢ ᠰᠢᠭ ᠦᠳᠲᠡᠷ ᠲᠦᠷᠭᠡᠨ ᠳᠡᠯᠭᠡᠷᠡᠵᠦ ᠠᠯᠳᠠᠷᠰᠢᠭᠠᠰᠠᠢ᠂ 2 ᠪᠢᠳᠡᠨ ᠢ ᠶᠣᠰᠣ ᠦᠭᠡᠢ ᠮᠠᠭᠤ ᠬᠥᠮᠦᠰ ᠡᠴᠡ ᠭᠡᠲᠦᠯᠭᠡᠭᠳᠡᠭᠡᠰᠡᠢ ᠭᠡᠵᠦ ᠭᠤᠶᠤ᠃ ᠤᠴᠢᠷ ᠨᠢ᠂ ᠢᠲᠡᠭᠡᠯ ᠬᠥᠮᠦᠨ ᠪᠣᠯᠭᠠᠨ ᠳᠤ ᠪᠠᠢᠳᠠᠭ ᠪᠢᠰᠢ ᠶᠤᠮ᠃ 3 ᠬᠠᠷᠢᠨ ᠡᠵᠡᠨ ᠪᠣᠯ ᠢᠲᠡᠭᠡᠮᠵᠢᠲᠠᠢ᠂ ᠲᠡᠷᠡ ᠲᠠ ᠨᠠᠷ ᠢ ᠪᠡᠬᠢᠵᠢᠭᠦᠯᠦᠨ᠂ ᠮᠠᠭᠤ ᠨᠢᠭᠡᠨ ᠡᠴᠡ ᠬᠠᠮᠠᠭᠠᠯᠠᠨᠠ᠃ 4 ᠪᠢᠳᠡᠨ ᠦ ᠵᠠᠬᠢᠭᠰᠠᠨ ᠢ ᠲᠠ ᠨᠠᠷ ᠪᠡᠶᠡᠯᠡᠭᠦᠯᠵᠦ ᠪᠠᠢᠭᠠ᠂ ᠪᠡᠶᠡᠯᠡᠭᠦᠯᠬᠦ ᠪᠣᠯᠣᠨᠠ ᠭᠡᠳᠡᠭ ᠲᠦ ᠪᠢᠳᠡ ᠡᠵᠡᠨ ᠦ ᠳᠣᠲᠣᠷᠠ ᠢᠲᠡᠭᠡᠯ ᠲᠡᠢ ᠪᠠᠢᠨᠠ᠃
5 ᠡᠵᠡᠨ ᠲᠠ ᠨᠠᠷ ᠤᠨ ᠵᠢᠷᠦᠬᠡ ᠶᠢ ᠪᠤᠷᠬᠠᠨ ᠤ ᠬᠠᠢᠷᠠ ᠪᠠ ᠾᠷᠢᠰᠲ᠋ᠣᠰ ᠤᠨ ᠲᠡᠪᠴᠢᠶᠡᠷᠢ ᠤᠷᠤᠭᠤ ᠬᠠᠨᠳᠤᠭᠤᠯᠬᠤ ᠪᠣᠯᠲᠤᠭᠠᠢ᠃ 6 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠨᠡᠷᠡ ᠪᠡᠷ ᠲᠠ ᠨᠠᠷ ᠲᠤ ᠵᠠᠬᠢᠶᠠ᠃ ᠪᠦᠲᠦᠯ ᠦᠭᠡᠢ ᠠᠮᠢᠳᠤᠷᠠᠳᠠᠭ᠂ ᠪᠢᠳᠡᠨ ᠡᠴᠡ ᠠᠪᠤᠭᠰᠠᠨ ᠤᠯᠠᠮᠵᠢᠯᠠᠯ ᠢ ᠳᠠᠭᠠᠳᠠᠭ ᠦᠭᠡᠢ ᠠᠯᠢᠪᠠ ᠠᠬᠠ ᠳᠡᠭᠦᠦ ᠡᠴᠡ ᠬᠣᠯᠠᠳᠠᠵᠠᠭᠠ᠃ 7 ᠪᠢᠳᠡᠨ ᠢ ᠬᠡᠷᠬᠢᠨ ᠳᠠᠭᠤᠷᠢᠶᠠᠬᠤ ᠶᠣᠰᠣᠲᠠᠢ ᠶᠢ ᠲᠠ ᠨᠠᠷ ᠥᠪᠡᠷᠰᠡᠳ ᠢᠶᠡᠨ ᠮᠡᠳᠡᠨᠡ᠃ ᠪᠢᠳᠡ ᠲᠠ ᠨᠠᠷ ᠤᠨ ᠳᠤᠮᠳᠠ ᠪᠠᠢᠬᠤ ᠳᠠᠭᠠᠨ ᠪᠦᠲᠦᠯ ᠦᠭᠡᠢ ᠪᠠᠢᠳᠠᠯ ᠭᠠᠷᠭᠠᠭᠰᠠᠨ ᠦᠭᠡᠢ᠃ 8 ᠬᠡᠨ ᠦ ᠴᠤ ᠬᠣᠭᠣᠯᠠ ᠶᠢ ᠦᠨᠡ ᠦᠭᠡᠢ ᠪᠠᠷ ᠢᠳᠡᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠲᠠ ᠨᠠᠷ ᠤᠨ ᠬᠡᠨ ᠨᠢᠭᠡᠨ ᠳᠦᠨᠢ ᠳᠠᠷᠤᠭᠠᠰᠤ ᠪᠣᠯᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠡᠳᠦᠷ ᠰᠥᠨᠢ ᠦᠭᠡᠢ᠂ ᠶᠠᠳᠠᠷᠠᠵᠤ ᠵᠦᠳᠡᠷᠡᠨ ᠠᠵᠢᠯᠯᠠᠳᠠᠭ ᠪᠠᠢᠯᠠ᠃ 9 ᠪᠢᠳᠡᠨ ᠳᠦ ᠡᠷᠬᠡ ᠮᠡᠳᠡᠯ ᠪᠠᠢᠬᠤ ᠦᠭᠡᠢ ᠳᠡᠭᠡᠨ ᠪᠢᠰᠢ᠂ ᠬᠠᠷᠢᠨ ᠲᠠ ᠨᠠᠷ ᠲᠤ ᠵᠢᠱᠢᠶᠡ ᠦᠵᠡᠭᠦᠯᠦᠨ ᠪᠢᠳᠡᠨ ᠢ ᠳᠠᠭᠤᠷᠢᠶᠠᠯᠭᠠᠬᠤ ᠭᠡᠰᠡᠨ ᠳᠡᠭᠡᠨ ᠲᠡᠭᠡᠭᠰᠡᠨ ᠶᠤᠮ᠃ 10 ᠪᠢᠳᠡ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠳᠠᠭᠠᠨ᠄ 《ᠬᠡᠨ ᠬᠡᠷᠪᠡ ᠠᠵᠢᠯᠯᠠᠬᠤ ᠳᠤᠷᠠ ᠦᠭᠡᠢ ᠪᠣᠯ ᠪᠦᠦ ᠢᠳᠡ》 ᠭᠡᠵᠦ ᠵᠠᠬᠢᠳᠠᠭ ᠪᠠᠢᠭᠰᠠᠨ᠃ 11 ᠬᠠᠷᠢᠨ ᠲᠠ ᠨᠠᠷ ᠤᠨ ᠵᠠᠷᠢᠮ ᠨᠢ ᠪᠦᠲᠦᠯ ᠦᠭᠡᠢ ᠠᠮᠢᠳᠤᠷᠠᠳᠠᠭ᠂ ᠬᠢᠬᠦ ᠪᠡᠨ ᠬᠢᠬᠦ ᠦᠭᠡᠢ᠂ ᠬᠥᠨᠳᠡᠯᠡᠨ ᠦ ᠬᠡᠷᠡᠭ ᠲᠦ ᠣᠷᠣᠯᠴᠠᠳᠠᠭ ᠭᠡᠵᠦ ᠪᠢᠳᠡ ᠰᠣᠨᠣᠰᠴᠤ ᠪᠠᠢᠨᠠ᠃ 12 ᠡᠳᠡᠭᠡᠷ ᠬᠥᠮᠦᠰ ᠲᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠵᠠᠬᠢᠨ ᠢᠳᠬᠠᠶᠠ᠂ ᠨᠠᠮ ᠵᠢᠮ ᠠᠵᠢᠯ ᠢᠶᠠᠨ ᠬᠢᠵᠦ᠂ ᠢᠳᠡᠬᠦ ᠬᠦᠨᠡᠰᠦ ᠪᠡᠨ ᠥᠪᠡᠷ ᠢᠶᠡᠨ ᠣᠯ᠃ 13 ᠠᠬᠠ ᠳᠡᠭᠦᠦ ᠨᠠᠷ ᠡ︕ ᠬᠠᠷᠢᠨ ᠲᠠ ᠨᠠᠷ ᠰᠠᠢᠨ ᠢ ᠦᠢᠯᠡᠳᠴᠦ ᠪᠦᠦ ᠰᠢᠨᠲᠠᠷᠠ᠃
14 ᠬᠡᠷᠪᠡ ᠡᠨᠡ ᠵᠠᠬᠢᠳᠠᠯ ᠳᠠᠬᠢ ᠪᠢᠳᠡᠨ ᠦ ᠬᠡᠯᠡᠭᠰᠡᠨ ᠦᠭᠡ ᠶᠢ ᠳᠠᠭᠠᠬᠤ ᠦᠭᠡᠢ ᠬᠥᠮᠦᠨ ᠪᠠᠢᠪᠠᠯ ᠲᠡᠭᠦᠨ ᠢ ᠠᠩ᠋ᠬᠠᠷ᠂ ᠲᠡᠭᠦᠨ ᠲᠡᠢ ᠨᠡᠢᠯᠡᠬᠦ ᠪᠡᠨ ᠪᠣᠯᠢ᠃ ᠲᠡᠭᠡᠪᠡᠯ ᠲᠡᠷᠡ ᠢᠴᠢᠬᠦ ᠪᠣᠯᠣᠨᠠ᠃ 15 ᠭᠡᠪᠡᠴᠦ ᠲᠡᠭᠦᠨ ᠢ ᠳᠠᠢᠰᠤᠨ ᠮᠡᠲᠦ ᠪᠦᠦ ᠪᠣᠳᠣ᠂ ᠠᠬᠠ ᠳᠡᠭᠦᠦ ᠳᠡᠭᠡᠨ ᠬᠠᠨᠳᠤᠬᠤ ᠰᠢᠭ᠋ ᠢᠳᠬᠠᠭᠲᠤᠨ᠃
16 ᠠᠮᠤᠭᠤᠯᠠᠩ ᠤᠨ ᠡᠵᠡᠨ ᠥᠪᠡᠷ ᠢᠶᠡᠨ ᠠᠯᠢᠪᠠ ᠴᠠᠭ᠂ ᠶᠠᠮᠠᠷᠪᠠ ᠲᠣᠬᠢᠶᠠᠯᠳᠤᠯ ᠳᠤ ᠴᠤ ᠲᠠ ᠨᠠᠷ ᠲᠤ ᠠᠮᠤᠭᠤᠯᠠᠩ ᠢ ᠰᠣᠶᠣᠷᠬᠠᠬᠤ ᠪᠣᠯᠲᠤᠭᠠᠢ᠃ ᠡᠵᠡᠨ ᠲᠠ ᠪᠦᠬᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃
17 ᠫᠠᠦ᠋ᠯ ᠪᠢ ᠥᠪᠡᠷ ᠦᠨ ᠭᠠᠷ ᠢᠶᠠᠷ ᠡᠨᠡ ᠮᠡᠨᠳᠦᠴᠢᠯᠡᠭᠡ ᠶᠢ ᠪᠢᠴᠢᠵᠦ ᠪᠠᠢᠨᠠ᠃ ᠮᠢᠨᠦ ᠵᠠᠬᠢᠳᠠᠯ ᠪᠣᠯᠭᠠᠨ ᠳᠤ ᠡᠨᠡ ᠲᠡᠮᠳᠡᠭ ᠪᠤᠢ᠂ ᠪᠢ ᠢᠩᠭᠢᠵᠦ ᠪᠢᠴᠢᠳᠡᠭ᠃ 18 ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ ᠲᠠ ᠪᠦᠬᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃