ᠬᠣᠰᠧᠶᠠ ᠶᠢᠰᠦ
ᠰᠢᠳᠬᠡᠯ ᠦᠨ ᠡᠳᠦᠷ
1 ᠪᠦᠦ ᠪᠠᠶᠠᠰ᠂ ᠢᠰᠷᠧᠯ ᠡ᠂ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠰᠢᠭ ᠪᠦᠦ ᠴᠡᠩᠭᠡ︕ ᠪᠤᠷᠬᠠᠨ ᠢᠶᠠᠨ ᠣᠷᠬᠢᠨ ᠴᠢ ᠵᠠᠪᠬᠠᠢᠷᠠᠭᠰᠠᠨ ᠪᠦᠬᠦᠢᠯᠡ ᠦᠲᠦᠷᠮᠡ ᠳᠡᠭᠡᠷᠡ ᠪᠡᠨ ᠶᠠᠩ᠋ᠬᠠᠨ ᠤ ᠬᠥᠯᠥᠰᠥ ᠶᠢ ᠳᠤᠷᠠᠲᠠᠢ ᠠᠪᠤᠭᠰᠠᠨ ᠲᠤᠯᠠ
2 ᠦᠲᠦᠷᠮᠡ ᠴᠤ᠂ ᠦᠵᠦᠮ ᠦᠨ ᠰᠢᠬᠠᠭᠤᠷᠭᠠ ᠴᠤ ᠲᠡᠳᠡᠨ ᠢ ᠲᠡᠵᠢᠭᠡᠬᠦ ᠦᠭᠡᠢ ᠳᠠᠷᠠᠰᠤ ᠴᠤ ᠲᠡᠳᠡᠨ ᠳᠦ ᠬᠠᠩ᠋ᠭᠠᠯᠲᠠ ᠦᠭᠡᠢ᠃
3 ᠶᠣᠬᠣᠸᠠ ᠶᠢᠨ ᠭᠠᠵᠠᠷ ᠲᠤ ᠲᠡᠳᠡ ᠦᠯᠡᠳᠡᠬᠦ ᠦᠭᠡᠢ ᠡᠹᠷᠠᠢᠮ ᠶᠧᠵᠢᠫᠲ ᠤᠷᠤᠭᠤ ᠡᠷᠭᠢᠨ ᠠᠰᠢᠷᠢᠶᠠ ᠳᠤ ᠪᠤᠵᠠᠷ ᠢ ᠢᠳᠡᠬᠦ ᠪᠣᠯᠣᠨᠠ
4 ᠲᠡᠳᠡ ᠲᠡᠨᠳᠡ ᠶᠣᠬᠣᠸᠠ ᠳᠤ ᠳᠠᠷᠠᠰᠤ ᠡᠷᠭᠦᠵᠦ ᠴᠢᠳᠠᠬᠤ ᠦᠭᠡᠢ ᠲᠠᠬᠢᠯ ᠤᠳ ᠨᠢ ᠲᠡᠭᠦᠨ ᠳᠦ ᠲᠠᠭᠠᠯᠠᠭᠳᠠᠬᠤ ᠦᠭᠡᠢ ᠲᠡᠳᠡᠭᠡᠷ ᠲᠠᠬᠢᠯ ᠨᠢ ᠭᠠᠰᠢᠭᠤᠳᠠᠭᠰᠠᠳ ᠤᠨ ᠬᠣᠭᠣᠯᠠ ᠮᠡᠲᠦ ᠲᠡᠭᠦᠨ ᠡᠴᠡ ᠢᠳᠡᠭᠴᠢᠳ ᠪᠦᠭᠦᠳᠡ ᠪᠤᠵᠠᠷᠯᠠᠭᠳᠠᠬᠤ ᠪᠣᠯᠣᠨᠠ ᠡᠳᠡᠭᠡᠷ ᠢᠶᠡᠷ ᠥᠯ ᠯᠠ ᠵᠠᠯᠭᠠᠨᠠ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠣᠷᠣᠵᠤ ᠦᠯᠦ ᠪᠣᠯᠣᠨᠠ᠃
5 ᠲᠣᠪᠯᠠᠭᠳᠠᠭᠰᠠᠨ ᠡᠳᠦᠷ ᠤᠳ ᠢᠶᠠᠷ᠂ ᠶᠣᠬᠣᠸᠠ ᠶᠢᠨ ᠪᠠᠶᠠᠷ ᠤᠳ ᠢᠶᠠᠷ ᠲᠠ ᠨᠠᠷ ᠶᠠᠭᠤ ᠬᠢᠬᠦ ᠪᠤᠢ︖
6 ᠠᠩ᠋ᠬᠠᠷᠤᠭᠲᠤᠨ᠂ ᠲᠡᠳᠡ ᠰᠦᠢᠷᠡᠯ ᠡᠴᠡ ᠵᠢᠭᠤᠲᠠᠭᠰᠠᠨ ᠴᠤ ᠶᠧᠵᠢᠫᠲ ᠲᠡᠳᠡᠨ ᠢ ᠴᠤᠭᠯᠠᠭᠤᠯᠤᠨ ᠠᠪᠴᠤ ᠮᠧᠮᠹᠢᠰ ᠲᠡᠳᠡᠨ ᠢ ᠪᠤᠯᠠᠰᠢᠯᠠᠬᠤ ᠪᠣᠯᠣᠨᠠ ᠮᠥᠩᠭᠥᠨ ᠡᠷᠳᠡᠨᠢᠰ ᠨᠢ ᠬᠣᠭ ᠤᠨ ᠤᠷᠭᠤᠮᠠᠯ ᠳᠤ ᠪᠦᠷᠬᠦᠭᠳᠡᠵᠦ ᠮᠠᠢᠬᠠᠨ ᠨᠤᠭᠤᠳ ᠨᠢ ᠦᠭᠦᠷᠭᠡᠨᠡ ᠪᠡᠷ ᠳᠦᠭᠦᠷᠬᠦ ᠪᠣᠯᠣᠨᠠ᠃
7 ᠰᠢᠳᠬᠡᠯ ᠦᠨ ᠡᠳᠦᠷ ᠤᠳ ᠢᠷᠡᠯᠡ ᠥᠰᠢᠶᠡ ᠠᠪᠤᠯᠲᠠ ᠶᠢᠨ ᠡᠳᠦᠷ ᠤᠳ ᠢᠷᠡᠯᠡ ᠢᠰᠷᠧᠯ ᠮᠡᠳᠡᠭᠲᠦᠨ ᠭᠡᠮ ᠨᠢᠭᠦᠯ ᠴᠢᠨᠢ ᠶᠡᠬᠡ᠂ ᠳᠠᠢᠰᠤᠩᠨᠠᠯ ᠴᠢᠨᠢ ᠶᠡᠬᠡ ᠪᠣᠯᠬᠣᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠮᠤᠯᠭᠤᠤ᠂ ᠰᠦᠨᠡᠰᠦᠯᠢᠭ ᠬᠥᠮᠦᠨ ᠭᠠᠯᠵᠠᠭᠤ ᠳᠤ ᠲᠣᠭᠠᠴᠠᠭᠳᠠᠨᠠ᠃
8 ᠪᠤᠷᠬᠠᠨ ᠲᠠᠢ ᠬᠠᠮᠲᠤ ᠡᠹᠷᠠᠢᠮ ᠢ ᠬᠠᠷᠠᠭᠤᠯᠳᠠᠭᠴᠢ ᠨᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠷᠢᠨ ᠲᠡᠭᠦᠨ ᠦ ᠪᠦᠬᠦ ᠵᠠᠮ ᠳᠡᠭᠡᠷᠡ ᠠᠩᠴᠢᠨ ᠤ ᠤᠷᠠᠬᠠ ᠪᠤᠢ ᠪᠤᠷᠬᠠᠨ ᠤ ᠬᠢᠨᠢ ᠭᠡᠷ ᠲᠦ ᠴᠤ ᠳᠠᠢᠰᠤᠩᠨᠠᠯ ᠪᠤᠢ᠃
9 ᠭᠧᠪᠧᠶᠠ ᠶᠢᠨ ᠡᠳᠦᠷ ᠤᠳ ᠤᠨ ᠬᠢ ᠲᠠᠢ ᠠᠳᠠᠯᠢ ᠲᠡᠳᠡ ᠢᠯᠵᠠᠷᠠᠯ ᠳᠤ ᠭᠦᠨ ᠣᠷᠣᠵᠠᠢ ᠲᠡᠳᠡᠨ ᠦ ᠭᠡᠮ ᠢ ᠪᠤᠷᠬᠠᠨ ᠰᠠᠨᠠᠵᠤ᠂ ᠨᠢᠭᠦᠯ ᠤᠳ ᠢ ᠨᠢ ᠰᠢᠳᠬᠡᠬᠦ ᠪᠣᠯᠣᠨᠠ᠃
10 ᠢᠰᠷᠧᠯ ᠢ ᠣᠯᠬᠤ ᠮᠠᠨᠢ ᠴᠥᠯ ᠳᠤ ᠦᠵᠦᠮ ᠣᠯᠬᠤ ᠮᠡᠲᠦ ᠡᠴᠢᠭᠡ ᠡᠪᠦᠭᠡᠳ ᠢ ᠴᠢᠨᠢ ᠦᠵᠡᠬᠦ ᠮᠠᠨᠢ ᠢᠨᠵᠢᠷ ᠤᠨ ᠮᠣᠳᠣᠨ ᠤ ᠠᠩ᠋ᠬᠠᠨ ᠤ ᠵᠢᠮᠢᠰ ᠢ ᠦᠵᠡᠬᠦ ᠮᠡᠲᠦ ᠪᠠᠢᠪᠠ ᠭᠡᠪᠡᠴᠦ ᠲᠡᠳᠡ ᠪᠠᠯ ᠫᠧᠶᠣᠷ ᠲᠤ ᠣᠴᠢᠵᠤ᠂ ᠢᠴᠢᠭᠦᠷᠢ ᠳᠤ ᠥᠪᠡᠷᠰᠡᠳ ᠢ ᠪᠠᠨ ᠵᠣᠷᠢᠭᠤᠯᠤᠨ ᠬᠠᠢᠷᠠᠯᠠᠭᠰᠠᠨ ᠶᠠᠭᠤᠮᠠ ᠲᠠᠢ ᠪᠠᠨ ᠠᠳᠠᠯᠢ ᠵᠢᠭᠰᠢᠭᠦᠷᠢ ᠪᠣᠯᠪᠠ᠃
11 ᠡᠹᠷᠠᠢᠮ ᠤᠨ ᠢᠷᠠᠭᠤ ᠠᠯᠳᠠᠷ ᠰᠢᠪᠠᠭᠤ ᠮᠡᠲᠦ ᠨᠢᠰᠦᠨ ᠣᠳᠴᠤ ᠲᠥᠷᠥᠯᠲᠡ ᠴᠤ᠂ ᠦᠷᠡ ᠲᠣᠭᠲᠠᠯᠲᠠ ᠴᠤ᠂ ᠵᠢᠷᠮᠦᠰᠦᠯᠡᠯᠲᠡ ᠴᠤ ᠠᠯᠠᠭᠠ ᠪᠣᠯᠣᠨᠠ︕
12 ᠬᠡᠦᠬᠡᠳ ᠤᠳ ᠢᠶᠠᠨ ᠥᠰᠭᠡᠭᠰᠡᠨ ᠴᠤ ᠬᠥᠮᠦᠨ ᠪᠣᠯᠭᠠᠨ ᠢ ᠨᠢ ᠪᠢ ᠬᠠᠭᠠᠴᠠᠭᠤᠯᠤᠨᠠ ᠲᠡᠳᠡᠨ ᠡᠴᠡ ᠣᠳᠬᠤ ᠦᠶᠡ ᠳᠦ ᠮᠢᠨᠢ ᠲᠡᠳᠡ ᠭᠠᠰᠠᠯᠠᠩᠲᠠᠶᠠ︕
13 ᠪᠢ ᠬᠠᠷᠠᠬᠤ ᠳᠤ ᠡᠹᠷᠠᠢᠮ ᠦᠵᠡᠰᠬᠦᠯᠡᠩᠲᠦ ᠨᠤᠭᠤ ᠳᠤ ᠲᠠᠷᠢᠭᠳᠠᠭᠰᠠᠨ ᠲᠢᠷ ᠲᠠᠢ ᠠᠳᠠᠯᠢ ᠪᠠᠢᠪᠠᠴᠤ ᠦᠷᠡ ᠬᠡᠦᠬᠡᠳ ᠤᠳ ᠢᠶᠠᠨ ᠭᠠᠷᠭᠠᠨ ᠠᠯᠠᠭᠤᠷᠴᠢᠨ ᠳᠤ ᠥᠭᠬᠦ ᠪᠣᠯᠣᠨᠠ᠃
14 ᠥᠭᠬᠦ ᠶᠠᠭᠤᠮᠠ ᠪᠠᠨ ᠲᠡᠳᠡᠨ ᠳᠦ ᠥᠭᠭᠥᠭᠡᠴᠢ᠂ ᠶᠣᠬᠣᠸᠠ ᠡ᠂ ᠦᠷᠡ ᠲᠣᠭᠲᠠᠬᠤ ᠦᠭᠡᠢ ᠤᠮᠠᠢ᠂ ᠬᠠᠷᠠ ᠳᠡᠯᠡᠩ ᠢ ᠥᠭᠭᠥᠭᠡᠴᠢ᠃
15 ᠲᠡᠳᠡᠨ ᠦ ᠭᠢᠯᠭᠠᠯ ᠳᠤ ᠦᠢᠯᠡᠳᠦᠭᠰᠡᠨ ᠪᠦᠬᠦ ᠬᠣᠷᠣᠨ ᠮᠠᠭᠤ ᠠᠴᠠ ᠪᠣᠯᠵᠤ ᠲᠡᠨᠳᠡ ᠪᠢ ᠲᠡᠳᠡᠨ ᠢ ᠦᠵᠡᠨ ᠶᠠᠳᠠᠪᠠ︕ ᠲᠡᠳᠡᠨ ᠦ ᠦᠢᠯᠡᠰ ᠮᠠᠭᠤ ᠪᠣᠯᠬᠣᠷ ᠪᠢ ᠲᠡᠳᠡᠨ ᠢ ᠭᠡᠷ ᠡᠴᠡ ᠪᠡᠨ ᠬᠥᠭᠡᠭᠡᠨ ᠲᠡᠳᠡᠨ ᠢ ᠳᠠᠬᠢᠨ ᠬᠠᠢᠷᠠᠯᠠᠬᠤ ᠦᠭᠡᠢ ᠲᠡᠳᠡᠨ ᠦ ᠨᠣᠶᠠᠳ ᠨᠢ ᠪᠦᠭᠦᠳᠡ ᠲᠡᠷᠰᠯᠡᠭᠴᠢᠳ ᠪᠢᠯᠡ᠃
16 ᠡᠹᠷᠠᠢᠮ ᠴᠠᠪᠴᠢᠭᠳᠠᠵᠤ ᠦᠨᠳᠦᠰᠦ ᠨᠢ ᠬᠤᠪᠠᠬᠠᠢᠷᠠᠭᠰᠠᠨ ᠲᠡᠳᠡ ᠶᠠᠮᠠᠷ ᠴᠤ ᠵᠢᠮᠢᠰ ᠭᠠᠷᠭᠠᠬᠤ ᠦᠭᠡᠢ ᠬᠡᠦᠬᠡᠳ ᠲᠥᠷᠥᠭᠦᠯᠦᠭᠰᠡᠨ ᠴᠤ ᠪᠢ ᠬᠡᠪᠡᠯᠢ ᠶᠢᠨ ᠬᠢᠨᠢ ᠬᠠᠢᠷᠠᠲᠤ ᠦᠷᠡ ᠶᠢ ᠰᠥᠨᠥᠭᠡᠨᠡ᠃
17 ᠮᠢᠨᠦ ᠪᠤᠷᠬᠠᠨ ᠥᠪᠡᠷ ᠦᠨ ᠬᠢ ᠶᠢ ᠨᠢ ᠰᠣᠨᠣᠰᠳᠠᠭ ᠦᠭᠡᠢ ᠲᠡᠳᠡᠨ ᠢ ᠣᠭᠣᠷᠣᠨᠠ ᠲᠡᠳᠡ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠲᠡᠨᠦᠭᠦᠯᠴᠢᠳ ᠪᠣᠯᠣᠨᠠ᠃