ᠲᠣᠭᠠᠯᠠᠯᠭᠠ ᠠᠷᠪᠠᠨ ᠨᠢᠭᠡ
ᠶᠣᠬᠣᠸᠠ ᠶᠢᠨ ᠢᠯᠡᠭᠡᠭᠰᠡᠨ ᠭᠠᠯ
1 ᠠᠷᠠᠳ ᠲᠦᠮᠡᠨ ᠦ ᠭᠣᠮᠣᠳᠠᠯ ᠭᠠᠷᠭᠠᠭᠰᠠᠨ ᠬᠣᠷᠣᠨ ᠮᠠᠭᠤ ᠦᠭᠡ ᠶᠣᠬᠣᠸᠠ ᠶᠢᠨ ᠰᠣᠨᠣᠷ ᠲᠤ ᠬᠦᠷᠴᠡᠢ᠃ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠳᠦᠷᠡᠯᠵᠡᠵᠦ᠂ ᠶᠣᠬᠣᠸᠠ ᠶᠢᠨ ᠭᠠᠯ ᠲᠡᠳᠡᠨ ᠦ ᠳᠤᠮᠳᠠ ᠨᠣᠴᠣᠨ ᠬᠤᠸᠠᠷᠠᠨ ᠤ ᠵᠠᠬᠠ ᠶᠢ ᠰᠢᠲᠠᠭᠠᠪᠠ᠃ 2 ᠠᠷᠠᠳ ᠲᠦᠮᠡᠨ ᠮᠣᠰᠧ ᠤᠷᠤᠭᠤ ᠬᠠᠰᠬᠢᠷᠴᠤ᠂ ᠮᠣᠰᠧ ᠶᠣᠬᠣᠸᠠ ᠳᠤ ᠭᠤᠶᠤᠭᠰᠠᠨ ᠳᠤ᠂ ᠭᠠᠯ ᠤᠨᠲᠠᠷᠠᠭᠰᠠᠨ ᠪᠠᠢᠨᠠ᠃ 3 ᠶᠣᠬᠣᠸᠠ ᠶᠢᠨ ᠭᠠᠯ ᠲᠡᠳᠡᠨ ᠦ ᠳᠤᠮᠳᠠ ᠰᠢᠲᠠᠭᠰᠠᠨ ᠤᠴᠢᠷ ᠠᠴᠠ ᠲᠡᠷᠡ ᠭᠠᠵᠠᠷ ᠨᠢ ᠲᠠᠪᠧᠷᠠ ᠬᠡᠮᠡᠨ ᠳᠠᠭᠤᠳᠠᠭᠳᠠᠬᠤ ᠪᠣᠯᠵᠠᠢ᠃
ᠶᠣᠬᠣᠸᠠ ᠶᠢᠨ ᠢᠯᠡᠭᠡᠭᠰᠡᠨ ᠪᠥᠳᠥᠨᠡ ᠰᠢᠪᠠᠭᠤ
4 ᠲᠡᠳᠡᠨ ᠦ ᠳᠤᠮᠳᠠᠬᠢ ᠲᠡᠨᠦᠭᠦᠯᠴᠢᠳ ᠥᠭᠡᠷᠡ ᠬᠣᠭᠣᠯᠠᠨ ᠳᠤ ᠳᠤᠷᠠᠯᠠᠵᠤ᠂ ᠪᠤᠰᠤᠳ ᠢᠰᠷᠧᠯᠴᠦᠳ ᠨᠢ ᠴᠤ ᠳᠠᠬᠢᠨ ᠤᠬᠢᠯᠠᠵᠤ᠄ 《ᠬᠡᠨ ᠪᠢᠳᠡᠨ ᠳᠦ ᠢᠳᠡᠬᠦ ᠮᠢᠬᠠ ᠥᠭᠭᠥᠨᠡ ᠪᠤᠢ︖ 5 ᠶᠧᠵᠢᠫᠲ ᠲᠤ ᠦᠨᠡ ᠦᠭᠡᠢ ᠪᠠᠷ ᠢᠳᠡᠵᠦ ᠪᠠᠢᠭᠰᠠᠨ ᠵᠢᠭᠠᠰᠤ᠂ ᠥᠷᠭᠡᠰᠦᠲᠦ ᠬᠡᠮᠬᠡ᠂ ᠲᠠᠷᠪᠤᠰ᠂ ᠭᠣᠭᠣᠳ᠂ ᠰᠣᠩᠭᠢᠨᠠ᠂ ᠰᠠᠷᠢᠮᠰᠠᠭ ᠢᠶᠠᠨ ᠰᠠᠨᠠᠵᠤ ᠪᠠᠢᠨᠠ᠃ 6 ᠬᠠᠷᠢᠨ ᠣᠳᠣ ᠮᠠᠨᠨᠠ ᠠᠴᠠ ᠣᠨᠳᠣᠣ ᠬᠠᠷᠠᠬᠤ ᠶᠠᠭᠤᠮᠠ ᠠᠯᠠᠭᠠ ᠤᠴᠢᠷ ᠠᠴᠠ ᠪᠢᠳᠡᠨ ᠳᠦ ᠢᠳᠡᠬᠦ ᠳᠤᠷᠠᠰᠢᠯ ᠴᠤ ᠦᠭᠡᠢ ᠪᠣᠯᠵᠠᠢ 47 》 ᠭᠡᠵᠡᠭᠡᠪᠡ᠃
7 ᠮᠠᠨᠨᠠ ᠨᠢ ᠦᠨᠦᠷᠲᠦ ᠨᠣᠭᠣᠭᠠ ᠶᠢᠨ ᠦᠷᠡ ᠰᠢᠭ᠂ ᠠᠩᠬᠢᠯᠤᠭᠤᠨ ᠳᠠᠪᠠᠷᠬᠠᠢ 48 ᠠᠳᠠᠯᠢ ᠥᠩᠭᠡ ᠲᠠᠢ ᠪᠠᠢᠪᠠ᠃ 8 ᠠᠷᠠᠳ ᠲᠦᠮᠡᠨ ᠡᠷᠭᠢᠨ ᠲᠣᠭᠣᠷᠢᠨ ᠢᠶᠠᠷ ᠶᠠᠪᠤᠵᠤ᠂ ᠲᠡᠭᠦᠨ ᠢ ᠬᠤᠷᠢᠶᠠᠭᠠᠳ ᠲᠡᠭᠡᠷᠮᠡ ᠶᠢᠨ ᠴᠢᠯᠠᠭᠤᠨ ᠳᠤ ᠨᠤᠨᠲᠠᠭᠯᠠᠬᠤ᠂ ᠡᠰᠡᠪᠡᠯ ᠣᠭᠣᠷ ᠲᠤ ᠨᠦᠳᠦᠭᠰᠡᠨ ᠦ ᠳᠠᠷᠠᠭᠠ᠂ ᠲᠣᠭᠣᠭᠠᠨ ᠳᠤ ᠪᠤᠴᠠᠯᠭᠠᠬᠤ ᠪᠤᠶᠤ ᠪᠣᠣᠪᠣ ᠬᠢᠳᠡᠭ᠂ ᠠᠮᠲᠠ ᠨᠢ ᠲᠣᠰᠣ ᠲᠠᠢ ᠵᠢᠩᠨᠡᠭᠰᠡᠨ ᠪᠣᠣᠪᠣ ᠲᠠᠢ ᠠᠳᠠᠯᠢ ᠪᠠᠢᠪᠠ᠃ 9 ᠡᠨᠡ ᠮᠠᠨᠨᠠ ᠰᠥᠨᠢ ᠪᠠᠷ ᠰᠢᠭᠦᠳᠡᠷᠢ ᠲᠠᠢ ᠬᠠᠮᠲᠤ ᠬᠤᠸᠠᠷᠠᠨ ᠳᠤ ᠪᠠᠭᠤᠳᠠᠭ ᠪᠠᠢᠯᠠ᠃
10 ᠠᠷᠠᠳ ᠣᠯᠠᠨ ᠭᠡᠷ ᠪᠦᠯᠢ ᠨᠦᠭᠦᠳ ᠢᠶᠡᠷ ᠢᠶᠠᠨ ᠬᠥᠮᠦᠨ ᠪᠦᠷᠢ ᠮᠠᠢᠬᠠᠨ ᠤ ᠪᠠᠨ ᠡᠭᠦᠳᠡᠨ ᠳᠦ ᠤᠬᠢᠯᠠᠵᠤ ᠪᠠᠢᠬᠤ ᠶᠢ ᠮᠣᠰᠧ ᠰᠣᠨᠣᠰᠴᠠᠢ᠃ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠶᠡᠬᠡᠳᠡ ᠳᠦᠷᠡᠯᠵᠡᠭᠰᠡᠨ ᠪᠥᠭᠡᠳ ᠮᠣᠰᠧ ᠮᠠᠰᠢ ᠵᠣᠪᠠᠨᠢᠭᠰᠠᠨ ᠪᠠᠢᠯᠠ᠃ 11 ᠮᠣᠰᠧ ᠶᠣᠬᠣᠸᠠ ᠳᠤ᠄ 《ᠲᠠ ᠵᠠᠷᠤᠴᠠ ᠪᠠᠨ ᠶᠠᠭᠤᠨ ᠳᠤ ᠡᠢᠨ ᠬᠦ ᠵᠣᠪᠠᠭᠠᠨᠠ ᠪᠤᠢ︖ ᠲᠠ ᠶᠠᠭᠠᠬᠢᠭᠠᠳ ᠨᠠᠮᠠᠶᠢ ᠲᠠᠭᠠᠯᠠᠬᠤ ᠪᠠᠨ ᠪᠣᠯᠢᠵᠤ ᠡᠨᠡ ᠪᠦᠬᠦ ᠠᠷᠠᠳ ᠲᠦᠮᠡᠨ ᠦ ᠠᠴᠢᠶᠠ ᠶᠢ ᠨᠠᠳᠠ ᠳᠡᠭᠡᠷᠡ ᠲᠣᠬᠣᠭᠰᠠᠨ ᠶᠤᠮ ᠪᠤᠢ︖ 12 ᠡᠨᠡ ᠪᠦᠬᠦ ᠠᠷᠠᠳ ᠲᠦᠮᠡᠨ ᠢ ᠬᠡᠪᠡᠯᠢ ᠳᠡᠭᠡᠨ ᠲᠡᠭᠡᠭᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠨᠢ ᠪᠢ ᠭᠡᠵᠢ ᠤᠤ︖ ᠲᠡᠷᠡ ᠬᠥᠮᠦᠰ ᠢ ᠪᠢ ᠲᠥᠷᠥᠭᠦᠯᠦᠭᠰᠡᠨ ᠭᠡᠵᠢ ᠤᠤ︖ ᠲᠠ ᠨᠠᠳᠠ ᠳᠤ᠄ 〈ᠬᠥᠬᠥᠭᠦᠯ ᠬᠡᠦᠬᠡᠳ ᠢ ᠠᠰᠠᠷᠠᠳᠠᠭ ᠡᠬᠡ ᠮᠡᠲᠦ ᠲᠡᠳᠡᠨ ᠢ ᠴᠡᠭᠡᠵᠢᠨ ᠳᠡᠭᠡᠨ ᠲᠡᠪᠡᠷᠢᠵᠦ᠂ ᠮᠢᠨᠦ ᠡᠴᠢᠭᠡ ᠡᠪᠦᠭᠡᠳ ᠲᠤᠨᠢ ᠠᠮᠠᠯᠠᠭᠰᠠᠨ ᠭᠠᠵᠠᠷ ᠤᠷᠤᠭᠤ ᠠᠪᠴᠤ ᠶᠠᠪᠤᠭᠲᠤᠨ〉 ᠭᠡᠵᠦ ᠬᠡᠯᠡᠬᠦ ᠨᠢ ᠤᠤ︖ 13 ᠪᠢ ᠡᠨᠡ ᠪᠦᠬᠦ ᠠᠷᠠᠳ ᠲᠦᠮᠡᠨ ᠳᠦ ᠥᠭᠬᠦ ᠮᠢᠬᠠ ᠶᠢ ᠬᠠᠮᠢᠭᠠ ᠠᠴᠠ ᠣᠯᠬᠤ ᠪᠤᠢ︖ ᠲᠡᠳᠡ᠄ 〈ᠢᠳᠡᠬᠦ ᠮᠢᠬᠠ ᠥᠭᠭᠥᠭᠡᠴᠢ〉 ᠭᠡᠵᠦ ᠮᠢᠨᠦ ᠡᠮᠦᠨᠡ ᠤᠬᠢᠯᠠᠨ ᠬᠠᠰᠬᠢᠷᠴᠤ ᠪᠠᠢᠨᠠ ᠰᠢᠦ᠃ 14 ᠪᠢ ᠭᠠᠭᠴᠠᠭᠠᠷ ᠢᠶᠠᠨ ᠡᠨᠡ ᠪᠦᠬᠦ ᠠᠷᠠᠳ ᠲᠦᠮᠡᠨ ᠢ ᠳᠠᠭᠠᠭᠠᠬᠤ ᠴᠢᠳᠠᠪᠤᠷᠢ ᠦᠭᠡᠢ᠂ ᠨᠠᠳᠠ ᠳᠤ ᠬᠡᠲᠦᠷᠬᠡᠢ ᠬᠦᠨᠳᠦ ᠪᠠᠢᠨᠠ᠃ 15 ᠬᠡᠷᠪᠡ ᠲᠠ ᠨᠠᠳᠠ ᠳᠤ ᠢᠩᠭᠢᠵᠦ ᠬᠠᠨᠳᠤᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠣᠯ᠂ ᠨᠠᠮᠠᠶᠢ ᠨᠢᠭᠡᠮᠦᠰᠦᠨ ᠦᠬᠦᠭᠦᠯᠦᠭᠡᠴᠢ︕ ᠬᠡᠷᠪᠡ ᠪᠢ ᠲᠠᠨ ᠤ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠣᠭᠰᠠᠨ ᠪᠣᠯ ᠨᠠᠮᠠᠶᠢ ᠡᠨᠡ ᠬᠦᠨᠳᠦ ᠵᠣᠪᠠᠭᠤᠷᠢ ᠡᠴᠡ ᠬᠡᠯᠲᠦᠷᠢᠭᠦᠯᠦᠭᠡᠴᠢ》 ᠭᠡᠯᠡ᠃
16 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠢᠰᠷᠧᠯ ᠤᠨ ᠠᠬᠠᠮᠠᠳ ᠤᠳ ᠤᠨ ᠳᠤᠮᠳᠠ ᠠᠴᠠ ᠠᠷᠠᠳ ᠲᠦᠮᠡᠨ ᠦ ᠠᠬᠠᠮᠠᠳ᠂ ᠡᠰᠡᠪᠡᠯ ᠤᠳᠤᠷᠢᠳᠤᠭᠴᠢ ᠭᠡᠭᠳᠡᠬᠦ ᠳᠠᠯᠠᠨ ᠬᠥᠮᠦᠨ ᠢ ᠨᠠᠳᠠ ᠤᠷᠤᠭᠤ ᠴᠤᠭᠯᠠᠭᠤᠯᠤᠯ᠂ ᠲᠡᠳᠡᠨ ᠢ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠷᠤᠭᠤ ᠠᠪᠴᠢᠷᠠᠵᠤ᠂ ᠲᠡᠨᠳᠡ ᠥᠪᠡᠷ ᠲᠡᠢ ᠪᠡᠨ ᠬᠠᠮᠲᠤ ᠵᠣᠭᠰᠣᠭᠠ᠃ 17 ᠪᠢ ᠳᠣᠭᠣᠭᠰᠢ ᠪᠠᠭᠤᠵᠤ᠂ ᠲᠡᠨᠳᠡ ᠴᠢᠮᠠ ᠲᠠᠢ ᠶᠠᠷᠢᠨᠠ᠂ ᠴᠢᠨᠦ ᠳᠡᠭᠡᠷᠡ ᠪᠠᠢᠭᠠ ᠰᠦᠨᠡᠰᠦᠨ ᠡᠴᠡ ᠠᠪᠴᠤ᠂ ᠲᠡᠳᠡᠨ ᠦ ᠳᠡᠭᠡᠷᠡ ᠲᠠᠯᠪᠢᠬᠤ ᠪᠣᠯᠣᠨᠠ᠃ ᠡᠢᠨ ᠬᠦ ᠲᠡᠳᠡ ᠠᠷᠠᠳ ᠲᠦᠮᠡᠨ ᠦ ᠠᠴᠢᠶᠠ ᠶᠢ ᠴᠢᠮᠠ ᠲᠠᠢ ᠬᠠᠮᠲᠤ ᠡᠭᠦᠷᠦᠯᠴᠡᠵᠦ᠂ ᠴᠢ ᠲᠡᠷᠡ ᠠᠴᠢᠶᠠ ᠶᠢ ᠭᠠᠭᠴᠠᠭᠠᠷ ᠢᠶᠠᠨ ᠡᠭᠦᠷᠬᠦ ᠦᠭᠡᠢ ᠪᠠᠢᠬᠤ ᠪᠣᠯᠣᠨᠠ᠃ 18 ᠮᠥᠨ ᠠᠷᠠᠳ ᠣᠯᠠᠨ ᠳᠤ᠄ 〈ᠮᠠᠷᠭᠠᠰᠢ ᠮᠢᠬᠠ ᠢᠳᠡᠬᠦ ᠲᠤᠯᠠ ᠥᠪᠡᠷᠰᠡᠳ ᠢ ᠪᠠᠨ ᠠᠷᠢᠭᠤᠰᠬᠠ᠃ ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠰᠣᠨᠣᠷ ᠲᠤ᠄ ᠬᠡᠨ ᠪᠢᠳᠡᠨ ᠳᠦ ᠢᠳᠡᠬᠦ ᠮᠢᠬᠠ ᠥᠭᠬᠦ ᠶᠤᠮ ᠪᠤᠢ︖ ᠪᠢᠳᠡ ᠶᠧᠵᠢᠫᠲ ᠲᠤ ᠪᠠᠢᠭᠰᠠᠨ ᠨᠢ ᠳᠡᠭᠡᠷᠡ ᠪᠠᠢᠬᠤ ᠰᠠᠨ ᠭᠡᠵᠦ ᠤᠬᠢᠯᠠᠭᠰᠠᠨ ᠪᠢᠯᠡ᠃ ᠡᠢᠮᠦ ᠡᠴᠡ ᠶᠣᠬᠣᠸᠠ ᠲᠠ ᠨᠠᠷ ᠲᠤ ᠢᠳᠡᠬᠦ ᠮᠢᠬᠠ ᠥᠭᠬᠦ ᠳᠦ᠂ 19 ᠲᠠ ᠨᠠᠷ ᠨᠢᠭᠡ ᠡᠳᠦᠷ᠂ ᠬᠣᠶᠠᠷ ᠡᠳᠦᠷ ᠪᠢᠰᠢ᠂ ᠲᠠᠪᠤᠨ ᠡᠳᠦᠷ᠂ ᠠᠷᠪᠠᠨ ᠡᠳᠦᠷ᠂ ᠡᠰᠡᠪᠡᠯ ᠬᠣᠷᠢᠨ ᠡᠳᠦᠷ ᠴᠤ ᠪᠢᠰᠢ᠂ 20 ᠬᠠᠷᠢᠨ ᠪᠦᠲᠦᠨ ᠰᠠᠷᠠ ᠶᠢᠨ ᠲᠤᠷᠰᠢ ᠬᠠᠮᠠᠷ ᠤᠨ ᠢᠶᠠᠨ ᠨᠦᠬᠡ ᠪᠡᠷ ᠪᠤᠯᠲᠠᠢᠲᠠᠯᠠ᠂ ᠵᠢᠪᠡᠭᠦᠷᠬᠡᠲᠡᠯᠡ ᠪᠡᠨ ᠲᠡᠭᠦᠨ ᠢ ᠢᠳᠡᠬᠦ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠲᠠ ᠨᠠᠷ ᠥᠪᠡᠷᠰᠡᠳ ᠦᠨ ᠴᠢᠨᠢ ᠳᠤᠮᠳᠠ ᠪᠠᠢᠭᠠ ᠶᠣᠬᠣᠸᠠ ᠶᠢ ᠣᠭᠣᠷᠴᠤ᠂ ᠲᠡᠭᠦᠨ ᠦ ᠡᠮᠦᠨᠡ ᠪᠢᠳᠡ ᠶᠠᠭᠤᠨ ᠳᠤ ᠶᠧᠵᠢᠫᠲ ᠡᠴᠡ ᠡᠢᠨ ᠬᠦ ᠭᠠᠷᠪᠠ ᠡ ᠭᠡᠵᠦ ᠤᠬᠢᠯᠠᠭᠰᠠᠨ ᠪᠢᠯᠡ〉 ᠭᠡᠵᠦ ᠬᠡᠯᠡᠭᠡᠷᠡᠢ》 ᠭᠡᠪᠡ᠃ 21 ᠮᠣᠰᠧ ᠬᠠᠷᠢᠭᠤᠯᠤᠨ᠄ 《ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠭᠠ ᠠᠷᠠᠳ ᠣᠯᠠᠨ ᠤ ᠳᠤᠮᠳᠠ ᠶᠠᠪᠠᠭᠠᠨ ᠡᠷᠡᠴᠦᠳ ᠨᠢ ᠴᠤ ᠵᠢᠷᠠᠨ ᠲᠦᠮᠡ ᠭᠠᠷᠤᠢ ᠪᠠᠢᠬᠤ ᠳᠤ᠂ ᠲᠠ ᠲᠡᠳᠡᠨ ᠦ ᠪᠦᠲᠦᠨ ᠰᠠᠷᠠ ᠢᠳᠡᠬᠦ ᠮᠢᠬᠠ ᠶᠢ ᠥᠭᠭᠥᠨᠡ ᠭᠡᠵᠦ ᠠᠢᠯᠠᠳᠤᠯᠠ᠂ 22 ᠶᠡᠷᠦ ᠨᠢ ᠲᠡᠳᠡᠨ ᠦ ᠲᠥᠯᠥᠭᠡ ᠰᠦᠷᠦᠭ ᠬᠣᠨᠢ᠂ ᠰᠦᠷᠦᠭ ᠦᠬᠡᠷ ᠢ ᠨᠢᠳᠤᠯᠤᠭᠰᠠᠨ ᠴᠤ ᠲᠡᠳᠡᠨ ᠢ ᠬᠠᠩ᠋ᠭᠠᠵᠤ ᠴᠢᠳᠠᠨᠠ ᠤᠤ︖ ᠲᠡᠳᠡᠨ ᠦ ᠲᠥᠯᠥᠭᠡ ᠳᠠᠯᠠᠢ ᠶᠢᠨ ᠬᠠᠮᠤᠭ ᠵᠢᠭᠠᠰᠤ ᠶᠢ ᠴᠤᠭᠯᠠᠭᠤᠯᠤᠭᠰᠠᠨ ᠴᠤ ᠲᠡᠳᠡᠨ ᠢ ᠬᠠᠩ᠋ᠭᠠᠵᠤ ᠴᠢᠳᠠᠨᠠ ᠤᠤ︖》 ᠭᠡᠬᠦ ᠳᠦ᠂ 23 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠶᠣᠬᠣᠸᠠ ᠶᠢᠨ ᠭᠠᠷ ᠪᠣᠭᠣᠨᠢᠳᠠᠬᠤ ᠤᠤ︖ ᠣᠳᠣ ᠴᠢ ᠮᠢᠨᠦ ᠦᠭᠡ ᠶᠢᠨ ᠪᠡᠶᠡᠯᠡᠬᠦ ᠡᠰᠡᠬᠦ ᠶᠢ ᠦᠵᠡᠬᠦ ᠪᠣᠯᠣᠨᠠ》 ᠭᠡᠵᠦ ᠠᠢᠯᠠᠳᠪᠠ᠃
24 ᠮᠣᠰᠧ ᠭᠠᠷᠴᠤ᠂ ᠠᠷᠠᠳ ᠣᠯᠠᠨ ᠳᠤ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠬᠡᠯᠡᠭᠡᠳ ᠠᠷᠠᠳ ᠣᠯᠠᠨ ᠤ ᠠᠬᠠᠮᠠᠳ ᠪᠣᠯᠬᠤ ᠳᠠᠯᠠᠨ ᠬᠥᠮᠦᠨ ᠢ ᠴᠤᠭᠯᠠᠭᠤᠯᠤᠨ᠂ ᠣᠷᠣᠰᠢᠬᠤᠢ ᠶᠢᠨ ᠴᠠᠴᠠᠷ ᠢ ᠲᠣᠭᠣᠷᠢᠭᠤᠯᠤᠨ ᠵᠣᠭᠰᠣᠭᠠᠪᠠ᠃ 25 ᠶᠣᠬᠣᠸᠠ ᠡᠭᠦᠯᠡᠨ ᠳᠣᠲᠣᠭᠤᠷ ᠪᠠᠭᠤᠨ ᠢᠷᠡᠵᠦ᠂ ᠮᠣᠰᠧ ᠲᠠᠢ ᠶᠠᠷᠢᠨ ᠲᠡᠭᠦᠨ ᠦ ᠳᠡᠭᠡᠷᠡᠬᠢ ᠰᠦᠨᠡᠰᠦᠨ ᠡᠴᠡ ᠠᠪᠴᠤ ᠳᠠᠯᠠᠨ ᠠᠬᠠᠮᠠᠳ ᠲᠤ ᠰᠣᠶᠣᠷᠬᠠᠪᠠ᠃ ᠰᠦᠨᠡᠰᠦ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠬᠤ ᠳᠤ᠂ ᠲᠡᠳᠡ ᠡᠰᠢ ᠦᠵᠡᠭᠦᠯᠵᠡᠭᠡᠭᠰᠡᠨ᠂ ᠬᠠᠷᠢᠨ ᠳᠠᠬᠢᠭᠠᠳ ᠡᠰᠢ ᠦᠵᠡᠭᠦᠯᠦᠭᠰᠡᠨ ᠦᠭᠡᠢ᠃
26 ᠲᠡᠭᠡᠬᠦ ᠳᠦ ᠬᠤᠸᠠᠷᠠᠨ ᠳᠤ ᠦᠯᠡᠳᠡᠭᠰᠡᠨ ᠬᠣᠶᠠᠷ ᠬᠥᠮᠦᠨ ᠦ ᠳᠡᠭᠡᠷᠡ ᠴᠤ ᠨᠥᠭᠥᠭᠡ ᠰᠦᠨᠡᠰᠦ ᠪᠠᠭᠤᠪᠠ᠃ ᠨᠢᠭᠡ ᠶᠢ ᠨᠢ ᠡᠯᠳᠠᠳ᠋᠂ ᠨᠥᠭᠥᠭᠡ ᠶᠢ ᠨᠢ ᠮᠧᠳᠠᠳ᠋ ᠭᠡᠳᠡᠭ᠃ ᠲᠡᠳᠡ ᠠᠬᠠᠮᠠᠳ ᠤᠨ ᠲᠣᠭᠠᠨ ᠳᠤ ᠣᠷᠣᠭᠰᠠᠨ ᠪᠣᠯᠪᠠᠴᠤ ᠴᠠᠴᠠᠷ ᠤᠷᠤᠭᠤ ᠣᠴᠢᠭᠰᠠᠨ ᠦᠭᠡᠢ᠃ ᠲᠡᠳᠡ ᠬᠤᠸᠠᠷᠠᠨ ᠳᠤ ᠡᠰᠢ ᠦᠵᠡᠭᠦᠯᠦᠭᠰᠡᠨ ᠠᠵᠢ᠃ 27 ᠲᠡᠭᠡᠲᠡᠯᠡ ᠨᠢᠭᠡ ᠵᠠᠯᠠᠭᠤ ᠮᠣᠰᠧ ᠤᠷᠤᠭᠤ ᠭᠦᠶᠦᠨ ᠢᠷᠡᠵᠦ᠄ 《ᠡᠯᠳᠠᠳ᠋᠂ ᠮᠧᠳᠠᠳ᠋ ᠬᠣᠶᠠᠷ ᠬᠤᠸᠠᠷᠠᠨ ᠳᠤ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠨᠠ》 ᠭᠡᠵᠦ ᠳᠤᠭᠤᠯᠭᠠᠭᠰᠠᠨ ᠳᠤ᠂ 28 ᠮᠣᠰᠧ ᠶᠢᠨ ᠰᠢᠯᠢᠳᠡᠭ ᠲᠤᠰᠠᠯᠠᠭᠴᠢ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠬᠠᠷᠢᠭᠤ ᠳᠤᠨᠢ᠄ 《ᠡᠵᠡᠨᠲᠡᠨ ᠮᠣᠰᠧ ᠮᠢᠨᠢ᠂ ᠲᠡᠳᠡᠨ ᠢ ᠬᠣᠷᠢᠭᠯᠠᠭᠠᠴᠢ》 ᠭᠡᠪᠡ᠃ 29 ᠮᠣᠰᠧ᠄ 《ᠴᠢ ᠮᠢᠨᠦ ᠡᠮᠦᠨᠡ ᠡᠴᠡ ᠬᠠᠷᠠᠳᠠᠵᠤ ᠪᠠᠢᠨᠠ ᠤᠤ︖ ᠶᠣᠬᠣᠸᠠ ᠪᠦᠬᠦ ᠠᠷᠠᠳ ᠲᠦᠮᠡᠨ ᠢᠶᠡᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠪᠣᠯᠭᠠᠵᠤ᠂ ᠲᠡᠳᠡᠨ ᠦ ᠳᠡᠭᠡᠷᠡ ᠥᠪᠡᠷ ᠦᠨ ᠢᠶᠠᠨ ᠰᠦᠨᠡᠰᠦ ᠶᠢ ᠰᠣᠶᠣᠷᠬᠠᠬᠤ ᠪᠣᠯᠲᠤᠭᠠᠢ》 ᠭᠡᠵᠦ ᠬᠡᠯᠡᠪᠡ᠃ 30 ᠲᠡᠭᠡᠭᠡᠳ ᠮᠣᠰᠧ ᠢᠰᠷᠧᠯ ᠤᠨ ᠠᠬᠠᠮᠠᠳ ᠤᠳ ᠲᠠᠢ ᠬᠠᠮᠲᠤ ᠬᠤᠸᠠᠷᠠᠨ ᠤᠷᠤᠭᠤ ᠪᠤᠴᠠᠭᠰᠠᠨ ᠪᠠᠢᠨᠠ᠃
31 ᠬᠠᠷᠢᠨ ᠶᠣᠬᠣᠸᠠ ᠠᠴᠠ ᠭᠠᠷᠤᠭᠰᠠᠨ ᠰᠠᠯᠬᠢ ᠳᠠᠯᠠᠢ ᠠᠴᠠ ᠪᠥᠳᠥᠨᠡ ᠰᠢᠪᠠᠭᠤᠳ ᠢ ᠠᠪᠴᠢᠷᠠᠨ ᠬᠤᠸᠠᠷᠠᠨ ᠤ ᠳᠡᠷᠭᠡᠳᠡᠭᠦᠷ᠂ ᠡᠷᠭᠢᠨ ᠲᠣᠭᠣᠷᠢᠨ ᠢᠶᠠᠷ ᠨᠢ ᠪᠠᠭᠤᠯᠭᠠᠭᠰᠠᠨ ᠳᠤ᠂ ᠲᠡᠳᠡᠭᠡᠷ ᠨᠢ ᠬᠤᠸᠠᠷᠠᠨ ᠤ ᠡᠷᠭᠢᠨ ᠲᠣᠭᠣᠷᠢᠨ ᠠᠴᠠ ᠠᠪᠤᠭᠠᠳ ᠨᠢᠭᠡ ᠡᠳᠦᠷ ᠠᠶᠠᠯᠠᠬᠤ ᠵᠠᠢ ᠳᠤ ᠬᠦᠷᠲᠡᠯᠡ ᠭᠠᠵᠠᠷ ᠤᠨ ᠭᠠᠳᠠᠷᠭᠤ ᠳᠡᠭᠡᠷᠡ ᠬᠣᠶᠠᠷ ᠲᠣᠬᠣᠢ ᠵᠤᠵᠠᠭᠠᠨ ᠤᠪᠤᠭᠠᠷᠠᠭᠰᠠᠨ ᠪᠠᠢᠪᠠ᠃ 32 ᠠᠷᠠᠳ ᠣᠯᠠᠨ ᠪᠣᠰᠴᠠᠭᠠᠵᠤ ᠪᠦᠲᠦᠨ ᠡᠳᠦᠷ᠂ ᠪᠦᠲᠦᠨ ᠰᠥᠨᠢ᠂ ᠮᠥᠨ ᠳᠠᠷᠠᠭᠠ ᠶᠢᠨ ᠪᠦᠲᠦᠨ ᠡᠳᠦᠷ ᠪᠥᠳᠥᠨᠡ ᠰᠢᠪᠠᠭᠤᠳ ᠴᠤᠭᠯᠠᠭᠤᠯᠬᠤ ᠳᠤ᠂ ᠪᠠᠭᠠ ᠴᠤᠭᠯᠠᠭᠤᠯᠤᠭᠰᠠᠨ ᠨᠢ ᠴᠤ ᠠᠷᠪᠠᠨ ᠬᠣᠮᠧᠷ 49 ᠣᠯᠵᠠᠢ᠃ ᠲᠡᠳᠡ ᠴᠤᠭᠯᠠᠭᠤᠯᠤᠭᠰᠠᠨ ᠢᠶᠠᠨ ᠡᠷᠭᠢᠨ ᠲᠣᠭᠣᠷᠢᠨ ᠳᠠᠭᠠᠨ ᠳᠡᠯᠭᠡᠪᠡ᠃ 33 ᠬᠠᠷᠢᠨ ᠲᠡᠳᠡᠨ ᠢ ᠰᠢᠳᠦᠨ ᠦ ᠬᠣᠭᠣᠷᠣᠨᠳᠣᠬᠢ ᠮᠢᠬᠠ ᠪᠠᠨ ᠵᠠᠵᠢᠯᠵᠤ ᠠᠮᠵᠢᠬᠤ ᠠᠴᠠ ᠡᠮᠦᠨᠡ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠠᠷᠠᠳ ᠣᠯᠠᠨ ᠤ ᠡᠰᠡᠷᠭᠦ ᠳᠦᠷᠡᠯᠵᠡᠭᠰᠡᠨ ᠪᠥᠭᠡᠳ ᠶᠣᠬᠣᠸᠠ ᠠᠷᠠᠳ ᠣᠯᠠᠨ ᠢ ᠮᠠᠰᠢ ᠬᠦᠨᠳᠦ ᠭᠠᠮᠰᠢᠭ ᠢᠶᠠᠷ ᠴᠣᠬᠢᠭᠰᠠᠨ ᠪᠠᠢᠨᠠ᠃ 34 ᠲᠡᠨᠳᠡ ᠰᠢᠨᠤᠯ ᠳᠤ ᠠᠪᠲᠠᠭᠰᠠᠨ ᠬᠥᠮᠦᠰ ᠢ ᠣᠷᠣᠰᠢᠭᠤᠯᠤᠭᠰᠠᠨ ᠤ ᠤᠯᠠᠮ ᠢᠶᠠᠷ ᠲᠡᠷᠡ ᠭᠠᠵᠠᠷ ᠢ ᠺᠢᠪᠷᠣᠲ ᠬᠠᠲ᠋ᠠᠸᠠ 50 ᠭᠡᠵᠦ ᠨᠡᠷᠡᠯᠡᠵᠢ᠃ 35 ᠠᠷᠠᠳ ᠣᠯᠠᠨ ᠺᠢᠪᠷᠣᠲ ᠬᠠᠲ᠋ᠠᠸᠠ ᠠᠴᠠ ᠬᠠᠽᠧᠷᠣᠲ ᠤᠷᠤᠭᠤ ᠨᠡᠭᠦᠵᠦ᠂ ᠬᠠᠽᠧᠷᠣᠲ ᠲᠤ ᠰᠠᠭᠤᠭᠰᠠᠨ ᠪᠠᠢᠪᠠ᠃