ᠲᠣᠭᠠᠯᠠᠯᠭᠠ ᠬᠣᠷᠢᠨ ᠲᠠᠪᠤ
ᠮᠣᠶᠠᠪ ᠢᠰᠷᠧᠯ ᠢ ᠤᠷᠤᠭᠤ ᠲᠠᠲᠠᠪᠠ
1 ᠢᠰᠷᠧᠯ ᠬᠤᠸᠠᠢᠰᠠ ᠮᠣᠳᠣᠨ ᠣᠢ ᠳᠤ ᠰᠠᠭᠤᠬᠤ ᠵᠠᠭᠤᠷᠠ ᠠᠷᠠᠳ ᠲᠦᠮᠡᠨ ᠮᠣᠶᠠᠪ ᠤᠨ ᠥᠬᠢᠳ ᠲᠠᠢ ᠰᠠᠳᠤᠷᠯᠠᠵᠤ ᠪᠤᠵᠠᠷᠲᠤᠪᠠ᠃ 2 ᠲᠡᠷᠡ ᠡᠮᠡᠭᠲᠡᠢᠴᠦᠳ ᠠᠷᠠᠳ ᠣᠯᠠᠨ ᠢ ᠪᠤᠷᠬᠠᠳ ᠤᠨ ᠢᠶᠠᠨ ᠲᠠᠬᠢᠯ ᠳᠤ ᠤᠷᠢᠭᠰᠠᠨ ᠳᠤ᠂ ᠠᠷᠠᠳ ᠲᠦᠮᠡᠨ ᠢᠳᠡᠵᠦ᠂ ᠲᠡᠳᠡᠨ ᠦ ᠪᠤᠷᠬᠠᠳ ᠲᠤ ᠪᠥᠬᠥᠢᠵᠡᠢ᠃ 3 ᠡᠢᠨ ᠬᠦ ᠢᠰᠷᠧᠯ ᠫᠧᠶᠣᠷ ᠨᠤᠲᠤᠭ ᠤᠨ ᠪᠠᠯ ᠲᠠᠢ ᠨᠡᠢᠯᠡᠭᠰᠡᠨ ᠪᠠᠢᠯᠠ᠃ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠢᠰᠷᠧᠯ ᠤᠨ ᠡᠰᠡᠷᠭᠦ ᠳᠦᠷᠡᠯᠵᠡᠪᠡ᠃ 4 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠲᠡᠳᠡᠭᠡᠷ ᠠᠷᠠᠳ ᠣᠯᠠᠨ ᠤ ᠤᠳᠤᠷᠢᠳᠤᠭᠴᠢᠳ ᠢ ᠪᠦᠭᠦᠳᠡ ᠶᠢ ᠨᠢ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠢᠶᠡᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠳᠡᠭᠦᠵᠢᠯᠡᠭᠲᠦᠨ᠃ ᠲᠡᠢᠨ ᠬᠦ ᠶᠣᠬᠣᠸᠠ ᠶᠢᠨ ᠳᠣᠭᠰᠢᠨ ᠬᠢᠯᠢᠩ ᠢᠰᠷᠧᠯ ᠡᠴᠡ ᠡᠷᠭᠢᠬᠦ ᠶᠤᠮ》 ᠭᠡᠪᠡ᠃ 5 ᠲᠡᠭᠡᠭᠡᠳ ᠮᠣᠰᠧ ᠢᠰᠷᠧᠯ ᠤᠨ ᠰᠢᠭᠦᠭᠴᠢᠳ ᠲᠤ᠄ 《ᠲᠠ ᠨᠠᠷ ᠤᠨ ᠬᠥᠮᠦᠨ ᠪᠦᠷᠢ ᠫᠧᠶᠣᠷ ᠤᠨ ᠪᠠᠯ ᠲᠠᠢ ᠨᠡᠢᠯᠡᠭᠰᠡᠨ ᠬᠥᠮᠦᠰ ᠢ ᠠᠯᠠᠭᠲᠤᠨ》 ᠭᠡᠯᠡ᠃
6 ᠢᠩᠭᠢᠭᠡᠳ ᠲᠡᠳᠡ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠤ ᠡᠮᠦᠨᠡ ᠤᠬᠢᠯᠠᠵᠤ ᠪᠠᠢᠲᠠᠯᠠ ᠨᠢᠭᠡᠨ ᠢᠰᠷᠧᠯ ᠬᠥᠮᠦᠨ ᠮᠣᠰᠧ ᠶᠢᠨ ᠨᠢᠳᠦᠨ ᠡᠮᠦᠨᠡ᠂ ᠮᠥᠨ ᠪᠦᠬᠦ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠨᠢᠳᠦᠨ ᠡᠮᠦᠨᠡ ᠭᠡᠷ ᠪᠦᠯᠢ ᠳᠡᠭᠡᠨ ᠨᠢᠭᠡᠨ ᠮᠢᠳᠢᠶᠠᠨ ᠡᠮᠡᠭᠲᠡᠢ ᠶᠢ ᠠᠪᠴᠢᠷᠠᠪᠠ︕ 7 ᠲᠠᠬᠢᠯᠴᠢ ᠠᠷᠣᠨ ᠤ ᠠᠴᠢ᠂ ᠡᠯᠧᠶᠠᠽᠠᠷ ᠤᠨ ᠬᠦᠦ ᠹᠢᠨᠧᠬᠠᠰ ᠡᠭᠦᠨ ᠢ ᠬᠠᠷᠠᠭᠠᠳ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠳᠤᠮᠳᠠ ᠠᠴᠠ ᠭᠠᠷᠤᠨ ᠭᠠᠷ ᠲᠠᠭᠠᠨ ᠵᠢᠳᠠ ᠠᠪᠴᠤ᠂ 8 ᠮᠠᠢᠬᠠᠨ ᠤᠷᠤᠭᠤ ᠨᠢ ᠣᠷᠣᠵᠤ ᠨᠥᠭᠥᠭᠡ ᠢᠰᠷᠧᠯ ᠡᠷᠡ ᠶᠢᠨ ᠠᠷᠤ ᠠᠴᠠ ᠨᠥᠭᠥᠭᠡ ᠡᠮᠡᠭᠲᠡᠢ ᠶᠢᠨ ᠬᠡᠪᠡᠯᠢ ᠳᠤ ᠬᠦᠷᠲᠡᠯᠡ ᠴᠣᠭᠣ ᠰᠦᠯᠪᠡᠨ ᠬᠣᠶᠠᠭᠤᠯᠠ ᠶᠢ ᠨᠡᠪᠲᠡ ᠵᠢᠳᠠᠯᠠᠪᠠ᠃ ᠲᠡᠢᠨ ᠬᠦ ᠢᠰᠷᠧᠯᠴᠦᠳ ᠦᠨ ᠳᠡᠭᠡᠷᠡᠬᠢ ᠭᠠᠮᠰᠢᠭ ᠵᠣᠭᠰᠣᠯᠠ᠃ 9 ᠭᠠᠮᠰᠢᠭ ᠢᠶᠠᠷ ᠦᠬᠦᠭᠰᠡᠳ ᠨᠢ ᠬᠣᠶᠠᠷ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠ ᠪᠠᠢᠪᠠ᠃
10 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 11 《ᠲᠠᠬᠢᠯᠴᠢ ᠠᠷᠣᠨ ᠤ ᠠᠴᠢ᠂ ᠡᠯᠧᠶᠠᠽᠠᠷ ᠤᠨ ᠬᠦᠦ ᠹᠢᠨᠧᠬᠠᠰ ᠢᠰᠷᠧᠯᠴᠦᠳ ᠡᠴᠡ ᠮᠢᠨᠦ ᠠᠭᠤᠷ ᠬᠢᠯᠢᠩ ᠢ ᠡᠷᠭᠢᠭᠦᠯᠵᠡᠢ᠃ ᠲᠡᠷᠡ ᠮᠢᠨᠦ ᠡᠮᠦᠨᠡ ᠡᠴᠡ ᠲᠡᠳᠡᠨ ᠦ ᠳᠤᠮᠳᠠ ᠮᠢᠨᠦ ᠬᠠᠷᠠᠳᠠᠯᠲᠠ ᠶᠢ ᠶᠠᠪᠤᠭᠤᠯᠤᠭᠰᠠᠨ 72 ᠤᠴᠢᠷ ᠠᠴᠠ ᠪᠢ ᠢᠰᠷᠧᠯᠴᠦᠳ ᠢ ᠵᠢᠲᠥᠭᠡ ᠪᠡᠷ ᠢᠶᠠᠨ ᠤᠰᠠᠳᠬᠠᠭᠠ ᠦᠭᠡᠢ᠃ 12 ᠡᠢᠮᠦ ᠡᠴᠡ ᠲᠡᠭᠦᠨ ᠳᠦ ᠬᠡᠯᠡᠭᠲᠦᠨ᠄ ᠬᠠᠷᠠ᠂ ᠪᠢ ᠲᠡᠭᠦᠨ ᠳᠦ ᠠᠮᠤᠷ ᠲᠠᠢᠪᠤᠩ ᠤᠨ ᠭᠡᠷᠡ ᠪᠡᠨ ᠥᠭᠴᠦ ᠪᠠᠢᠨᠠ᠃ 13 ᠡᠨᠡ ᠨᠢ ᠲᠡᠷᠡ ᠪᠣᠯᠣᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠳᠤ ᠲᠠᠬᠢᠯᠴᠢ ᠶᠢᠨ ᠲᠤᠰᠢᠶᠠᠯ ᠢ ᠮᠥᠩᠬᠡᠳᠡ ᠪᠠᠲᠤᠵᠢᠭᠤᠯᠬᠤ ᠭᠡᠷᠡ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠲᠡᠷᠡ ᠪᠤᠷᠬᠠᠨ ᠤ ᠲᠥᠯᠥᠭᠡ ᠬᠠᠷᠠᠳᠠᠵᠤ᠂ ᠢᠰᠷᠧᠯᠴᠦᠳ ᠦᠨ ᠲᠥᠯᠥᠭᠡ ᠭᠡᠮ ᠦᠨ ᠬᠡᠯᠲᠦᠷᠢᠭᠦᠯᠦᠯᠭᠡ ᠬᠢᠭᠰᠡᠨ ᠶᠤᠮ》 ᠭᠡᠪᠡ᠃
14 ᠮᠢᠳᠢᠶᠠᠨ ᠡᠮᠡᠭᠲᠡᠢ ᠲᠡᠢ ᠬᠠᠮᠲᠤ ᠠᠯᠠᠭᠤᠯᠤᠭᠰᠠᠨ ᠡᠷᠡ ᠶᠢᠨ ᠨᠡᠷᠡ ᠶᠢ ᠽᠢᠮᠷᠢ ᠭᠡᠳᠡᠭ᠃ ᠲᠡᠷᠡ ᠪᠣᠯ ᠰᠠᠯᠦ᠋ ᠶᠢᠨ ᠬᠦᠦ ᠪᠥᠭᠡᠳ ᠰᠢᠮᠧᠶᠣᠨᠴᠤᠳ ᠤᠨ ᠨᠢᠭᠡ ᠪᠦᠯᠢ ᠶᠢᠨ ᠤᠳᠤᠷᠢᠳᠤᠭᠴᠢ ᠪᠠᠢᠪᠠ᠃ 15 ᠠᠯᠠᠭᠤᠯᠤᠭᠰᠠᠨ ᠮᠢᠳᠢᠶᠠᠨ ᠡᠮᠡᠭᠲᠡᠢ ᠶᠢᠨ ᠨᠡᠷᠡ ᠨᠢ ᠺᠣᠽᠪᠢ ᠭᠡᠳᠡᠭ᠂ ᠲᠡᠷᠡ ᠮᠢᠳᠢᠶᠠᠨ ᠤ ᠨᠢᠭᠡ ᠪᠦᠯᠢ ᠶᠢᠨ ᠲᠣᠯᠣᠭᠠᠢᠯᠠᠭᠴᠢ ᠽᠦᠷ ᠦᠨ ᠥᠬᠢᠨ ᠪᠠᠢᠯᠠ᠃
16 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 17 《ᠮᠢᠳᠢᠶᠠᠨᠴᠤᠳ ᠲᠠᠢ ᠳᠠᠢᠰᠤᠩᠨᠠᠨ᠂ ᠲᠡᠳᠡᠨ ᠢ ᠴᠣᠬᠢ᠃ 18 ᠤᠴᠢᠷ ᠨᠢ ᠲᠡᠳᠡ ᠫᠧᠶᠣᠷ 73 ᠤᠨ ᠬᠡᠷᠡᠭ᠂ ᠲᠤᠬᠠᠢᠯᠠᠪᠠᠯ ᠮᠢᠳᠢᠶᠠᠨ ᠤ ᠤᠳᠤᠷᠢᠳᠤᠭᠴᠢ ᠶᠢᠨ ᠥᠬᠢᠨ ᠺᠣᠽᠪᠢ ᠶᠢᠨ ᠬᠡᠷᠡᠭ ᠢᠶᠡᠷ ᠮᠡᠬᠡᠯᠡᠵᠦ ᠲᠠ ᠨᠠᠷ ᠢ ᠳᠠᠢᠰᠤᠩᠨᠠᠵᠠᠢ᠃ ᠲᠡᠳᠡᠨ ᠦ ᠥᠬᠢᠨ ᠳᠡᠭᠦᠦ ᠺᠣᠽᠪᠢ ᠫᠧᠶᠣᠷ ᠤᠨ ᠬᠡᠷᠡᠭ ᠢᠶᠡᠷ ᠭᠠᠮᠰᠢᠭ ᠲᠣᠬᠢᠶᠠᠯᠳᠤᠭᠰᠠᠨ ᠡᠳᠦᠷ ᠠᠯᠠᠭᠳᠠᠭᠰᠠᠨ ᠶᠤᠮ》 ᠭᠡᠪᠡ᠃