ᠲᠣᠭᠠᠯᠠᠯᠭᠠ ᠬᠣᠷᠢᠨ ᠳᠣᠯᠣᠭᠠ
ᠽᠧᠯᠣᠹᠧᠬᠠᠳ᠋ ᠤᠨ ᠥᠬᠢᠳ
1 ᠶᠣᠰᠧᠹ ᠤᠨ ᠬᠦᠦ ᠮᠠᠨᠠᠰᠧ ᠡᠴᠡ ᠭᠠᠷᠤᠯ ᠲᠠᠢ ᠪᠥᠭᠡᠳ ᠮᠠᠨᠠᠰᠧ ᠶᠢᠨ ᠭᠤᠴᠢ᠂ ᠮᠠᠺᠢᠷ ᠤᠨ ᠵᠢᠴᠢ᠂ ᠭᠢᠯᠧᠶᠠᠳ᠋ ᠤᠨ ᠠᠴᠢ᠂ ᠾᠧᠹᠧᠷ ᠤᠨ ᠬᠦᠦ ᠽᠧᠯᠣᠹᠧᠬᠠᠳ᠋ ᠤᠨ ᠥᠬᠢᠳ ᠣᠢᠷᠠᠲᠤᠨ ᠢᠷᠡᠵᠡᠢ᠃ ᠲᠡᠷᠡ ᠥᠬᠢᠳ ᠢ ᠮᠠᠯᠠ᠂ ᠨᠣᠶᠠ᠂ ᠬᠣᠭᠯᠠ᠂ ᠮᠢᠯᠺᠠ᠂ ᠲᠢᠷᠽᠠ ᠭᠡᠳᠡᠭ᠃ 2 ᠲᠡᠳᠡ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠡᠭᠦᠳᠡᠨ ᠳᠦ ᠮᠣᠰᠧ᠂ ᠲᠠᠬᠢᠯᠴᠢ ᠡᠯᠧᠶᠠᠽᠠᠷ᠂ ᠤᠳᠤᠷᠢᠳᠤᠭᠴᠢᠳ ᠪᠣᠯᠣᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠡᠮᠦᠨᠡ ᠵᠣᠭᠰᠣᠭᠠᠳ᠄ 3 《ᠮᠠᠨ ᠤ ᠡᠴᠢᠭᠡ ᠴᠥᠯ ᠳᠤ ᠨᠠᠰᠤ ᠪᠠᠷᠠᠭᠰᠠᠨ᠂ ᠬᠠᠷᠢᠨ ᠲᠡᠷᠡ ᠶᠣᠬᠣᠸᠠ ᠶᠢᠨ ᠡᠰᠡᠷᠭᠦ ᠴᠤᠭᠯᠠᠷᠠᠭᠰᠠᠨ ᠺᠣᠷᠠ ᠶᠢᠨ ᠪᠦᠯᠦᠭ ᠲᠦ ᠣᠷᠣᠭᠰᠠᠨ ᠦᠭᠡᠢ᠂ ᠭᠠᠭᠴᠠ ᠬᠦ ᠥᠪᠡᠷ ᠦᠨ ᠢᠶᠠᠨ ᠭᠡᠮ ᠨᠢᠭᠦᠯ ᠢᠶᠡᠷ ᠨᠠᠰᠤ ᠪᠠᠷᠠᠭᠰᠠᠨ᠃ ᠬᠠᠷᠢᠨ ᠲᠡᠭᠦᠨ ᠳᠦ ᠬᠦᠦ ᠪᠠᠢᠭᠰᠠᠨ ᠦᠭᠡᠢ᠃ 4 ᠬᠦᠦ ᠦᠭᠡᠢ ᠪᠣᠯᠬᠣᠷ ᠮᠠᠨ ᠤ ᠡᠴᠢᠭᠡ ᠶᠢᠨ ᠨᠡᠷᠡ ᠠᠢᠮᠠᠭ ᠤᠨ ᠬᠢᠨ ᠤ ᠪᠠᠨ ᠳᠣᠲᠣᠷᠠ ᠠᠴᠠ ᠠᠷᠢᠯᠬᠤ ᠶᠣᠰᠣᠲᠠᠢ ᠭᠡᠵᠢ ᠤᠤ︖ ᠡᠴᠢᠭᠡ ᠶᠢᠨ ᠮᠠᠨᠢ ᠠᠬᠠ ᠳᠡᠭᠦᠦᠰ ᠲᠡᠢ ᠠᠳᠠᠯᠢ ᠪᠠᠷ ᠪᠢᠳᠡᠨ ᠳᠦ ᠴᠤ ᠥᠪ ᠥᠭᠭᠥᠭᠡᠴᠢ》 ᠭᠡᠪᠡ᠃
5 ᠮᠣᠰᠧ ᠲᠡᠳᠡᠨ ᠦ ᠬᠡᠷᠡᠭ ᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠪᠠᠴᠢᠪᠠ᠃ 6 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 7 《ᠽᠧᠯᠣᠹᠧᠬᠠᠳ᠋ ᠤᠨ ᠥᠬᠢᠳ ᠵᠥᠪ ᠵᠣᠬᠢᠰᠲᠠᠢ ᠵᠦᠢᠯ ᠢ ᠬᠡᠯᠡᠵᠦ ᠪᠠᠢᠨᠠ᠃ ᠴᠢ ᠵᠠᠪᠠᠯ ᠲᠡᠳᠡᠨ ᠳᠦ ᠡᠴᠢᠭᠡ ᠶᠢᠨ ᠬᠢᠨᠢ ᠬᠠᠮᠢᠶᠠᠲᠠᠨ ᠨᠤᠭᠤᠳ ᠲᠠᠢ ᠬᠠᠮᠲᠤ ᠥᠪ ᠥᠮᠴᠢ ᠣᠯᠭᠣᠵᠤ᠂ ᠡᠴᠢᠭᠡ ᠶᠢᠨ ᠬᠢᠨᠢ ᠥᠪ ᠢ ᠲᠡᠳᠡᠨ ᠳᠦ ᠰᠢᠯᠵᠢᠭᠦᠯᠦᠭᠲᠦᠨ᠃ 8 ᠢᠰᠷᠧᠯᠴᠦᠳ ᠲᠦ ᠴᠤ ᠵᠠᠬᠢ᠄ ᠬᠡᠷᠪᠡ ᠬᠥᠮᠦᠨ ᠬᠦᠦ ᠦᠭᠡᠢ ᠦᠬᠦᠪᠡᠯ᠂ ᠲᠠ ᠨᠠᠷ ᠥᠪ ᠢ ᠨᠢ ᠲᠡᠭᠦᠨ ᠦ ᠥᠬᠢᠨ ᠳᠤ ᠰᠢᠯᠵᠢᠭᠦᠯ᠃ 9 ᠥᠬᠢᠨ ᠴᠤ ᠦᠭᠡᠢ ᠪᠠᠢᠪᠠᠯ ᠥᠪ ᠢ ᠨᠢ ᠲᠡᠭᠦᠨ ᠦ ᠠᠬᠠ ᠳᠡᠭᠦᠦ ᠨᠠᠷ ᠲᠤ ᠥᠭ᠃ 10 ᠠᠬᠠ ᠳᠡᠭᠦᠦ ᠴᠤ ᠦᠭᠡᠢ ᠪᠠᠢᠪᠠᠯ ᠥᠪ ᠢ ᠨᠢ ᠲᠡᠭᠦᠨ ᠦ ᠡᠴᠢᠭᠡ ᠶᠢᠨ ᠠᠬᠠ ᠳᠡᠭᠦᠦ ᠨᠠᠷ ᠲᠤ ᠥᠭ᠃ 11 ᠡᠴᠢᠭᠡ ᠶᠢᠨ ᠬᠢᠨᠢ ᠠᠬᠠ ᠳᠡᠭᠦᠦ ᠴᠤ ᠦᠭᠡᠢ ᠪᠠᠢᠪᠠᠯ ᠥᠪ ᠢ ᠨᠢ ᠲᠡᠭᠦᠨ ᠦ ᠠᠢᠮᠠᠭ ᠤᠨ ᠬᠠᠮᠤᠭ ᠤᠨ ᠣᠢᠷᠠ ᠶᠢᠨ ᠬᠠᠮᠢᠶᠠᠲᠠᠨ ᠳᠤ ᠥᠭᠴᠦ ᠲᠡᠭᠦᠨ ᠦ ᠡᠵᠡᠮᠰᠢᠯ ᠪᠣᠯᠭᠠ᠃ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠡᠭᠦᠨ ᠢ ᠲᠠ ᠨᠠᠷ ᠢᠰᠷᠧᠯᠴᠦᠳ ᠦᠨ ᠰᠠᠬᠢᠬᠤ ᠶᠣᠰᠣ ᠵᠢᠷᠤᠮ ᠪᠣᠯᠭᠠᠭᠲᠤᠨ》 ᠭᠡᠪᠡ᠃
ᠮᠣᠰᠧ ᠶᠢᠨ ᠵᠠᠯᠭᠠᠮᠵᠢᠯᠠᠭᠴᠢ ᠶᠣᠱᠦ᠋ᠶᠠ
12 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠴᠢ ᠡᠨᠡ ᠠᠪᠠᠷᠢᠮ ᠠᠭᠤᠯᠠ ᠥᠭᠡᠳᠡ ᠭᠠᠷᠴᠤ᠂ ᠮᠢᠨᠦ ᠢᠰᠷᠧᠯᠴᠦᠳ ᠲᠦ ᠥᠭᠭᠥᠭᠰᠡᠨ ᠨᠤᠲᠤᠭ ᠢ ᠬᠠᠷᠠ᠃ 13 ᠲᠡᠭᠦᠨ ᠢ ᠬᠠᠷᠠᠭᠰᠠᠨ ᠤ ᠳᠠᠷᠠᠭᠠ᠂ ᠴᠢ ᠠᠬᠠ ᠠᠷᠣᠨ ᠤ ᠪᠠᠨ ᠠᠳᠠᠯᠢ ᠡᠴᠢᠭᠡ ᠡᠪᠦᠭᠡᠳ ᠤᠷᠤᠭᠤ ᠪᠠᠨ ᠣᠳᠬᠤ ᠪᠣᠯᠣᠨᠠ᠃ 14 ᠤᠴᠢᠷ ᠨᠢ ᠲᠠ ᠨᠠᠷ ᠽᠢᠨ ᠤ ᠴᠥᠯ ᠳᠤ ᠮᠢᠨᠦ ᠦᠭᠡᠨ ᠳᠦ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠪᠠᠢᠭᠰᠠᠨ᠃ ᠨᠡᠢᠲᠡ ᠴᠢᠭᠤᠯᠭᠠᠨ ᠲᠡᠷᠰᠯᠡᠬᠦ ᠦᠶᠡ ᠳᠦ᠂ ᠲᠡᠷᠡ ᠤᠰᠤᠨ ᠤ ᠳᠡᠷᠭᠡᠳᠡ ᠲᠠ ᠨᠠᠷ ᠲᠡᠳᠡᠨ ᠦ ᠨᠢᠳᠦᠨ ᠦ ᠡᠮᠦᠨᠡ ᠨᠠᠮᠠᠶᠢ ᠠᠷᠢᠭᠤᠨ ᠨᠢᠭᠡᠨ ᠬᠡᠮᠡᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠦᠭᠡᠢ》 ᠭᠡᠪᠡ᠃ ᠲᠡᠷᠡ ᠤᠰᠤ ᠽᠢᠨ ᠤ ᠴᠥᠯ ᠦᠨ ᠮᠧᠷᠢᠪᠠ ᠺᠠᠳᠧᠱ ᠲᠤ ᠪᠠᠢᠭᠰᠠᠨ ᠪᠢᠯᠡ᠃ 15 ᠮᠣᠰᠧ ᠶᠣᠬᠣᠸᠠ ᠳᠤ ᠶᠠᠷᠢᠵᠤ᠄ 16 《ᠪᠦᠬᠦ ᠮᠢᠬᠠᠨ ᠪᠡᠶᠡᠲᠦ ᠬᠥᠮᠦᠨ ᠳᠦ ᠠᠮᠢ ᠰᠦᠨᠡᠰᠦ ᠬᠠᠢᠷᠠᠯᠠᠭᠴᠢ ᠪᠤᠷᠬᠠᠨ ᠶᠣᠬᠣᠸᠠ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠳᠡᠭᠡᠷᠡ ᠨᠢᠭᠡ ᠬᠥᠮᠦᠨ ᠢ ᠲᠣᠮᠢᠯᠠᠬᠤ ᠪᠣᠯᠲᠤᠭᠠᠢ᠃ 17 ᠲᠡᠭᠡᠪᠡᠯ ᠲᠡᠷᠡ ᠬᠥᠮᠦᠨ ᠲᠡᠳᠡᠨ ᠢ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠳᠠᠭᠠᠭᠤᠯᠤᠨ ᠪᠤᠴᠠᠬᠤ ᠪᠠ ᠲᠡᠳᠡᠨ ᠢ ᠭᠠᠷᠭᠠᠵᠤ ᠲᠡᠳᠡᠨ ᠢ ᠪᠤᠴᠠᠭᠠᠬᠤ ᠪᠣᠯᠬᠣᠷ ᠶᠣᠬᠣᠸᠠ ᠶᠢᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠬᠣᠨᠢᠴᠢᠨ ᠦᠭᠡᠢ ᠰᠦᠷᠦᠭ ᠮᠡᠲᠦ ᠪᠣᠯᠬᠤ ᠦᠭᠡᠢ》 ᠭᠡᠪᠡ᠃ 18 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠴᠢ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠶᠢ ᠠᠪᠴᠤ ᠢᠷᠡ᠂ ᠮᠢᠨᠦ ᠰᠦᠨᠡᠰᠦ ᠲᠡᠭᠦᠨ ᠳᠦ ᠪᠤᠢ᠃ ᠲᠡᠭᠦᠨ ᠳᠡᠭᠡᠷᠡ ᠭᠠᠷ ᠢᠶᠠᠨ ᠲᠠᠯᠪᠢᠨ 19 ᠲᠠᠬᠢᠯᠴᠢ ᠡᠯᠧᠶᠠᠽᠠᠷ ᠪᠣᠯᠣᠨ ᠪᠦᠬᠦ ᠴᠢᠭᠤᠯᠭᠠᠨ ᠤ ᠡᠮᠦᠨᠡ ᠵᠣᠭᠰᠣᠭᠠᠵᠤ᠂ ᠲᠡᠳᠡᠨ ᠦ ᠨᠢᠳᠦᠨ ᠡᠮᠦᠨᠡ ᠲᠡᠭᠦᠨ ᠢ ᠲᠣᠮᠢᠯᠠ᠃ 20 ᠴᠢ ᠡᠷᠬᠡ ᠮᠡᠳᠡᠯ ᠢᠶᠡᠨ ᠲᠡᠭᠦᠨ ᠳᠦ ᠰᠢᠯᠵᠢᠭᠦᠯᠵᠦ ᠢᠰᠷᠧᠯᠴᠦᠳ ᠦᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠢ ᠪᠦᠬᠦᠯᠢ ᠳᠦᠨᠢ ᠲᠡᠭᠦᠨ ᠳᠦ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠣᠯᠭᠠᠭᠲᠤᠨ᠃ 21 ᠲᠡᠷᠡ ᠪᠡᠷ ᠲᠠᠬᠢᠯᠴᠢ ᠡᠯᠧᠶᠠᠽᠠᠷ ᠲᠤ ᠣᠴᠢᠵᠤ ᠲᠡᠭᠦᠨ ᠦ ᠡᠮᠦᠨᠡ ᠵᠣᠭᠰᠣᠪᠠᠯ ᠡᠯᠧᠶᠠᠽᠠᠷ ᠲᠡᠭᠦᠨ ᠦ ᠲᠥᠯᠥᠭᠡ ᠦᠷᠢᠮ 74 ᠤᠨ ᠰᠢᠢᠳᠪᠦᠷᠢ ᠶᠢ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠨᠠ᠃ ᠡᠢᠨ ᠬᠦ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠪᠣᠯᠣᠨ ᠶᠣᠱᠦ᠋ᠶᠠ ᠲᠡᠭᠦᠨ ᠦ ᠦᠭᠡ ᠪᠡᠷ ᠭᠠᠷᠴᠤ ᠲᠡᠭᠦᠨ ᠦ ᠦᠭᠡ ᠪᠡᠷ ᠪᠤᠴᠠᠬᠤ ᠪᠣᠯᠣᠨᠠ》 ᠭᠡᠯᠡ᠃ 22 ᠮᠣᠰᠧ ᠶᠣᠬᠣᠸᠠ ᠶᠢᠨ ᠥᠪᠡᠷ ᠲᠤᠨᠢ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠭᠦᠢᠴᠡᠳᠬᠡᠪᠡ᠃ ᠲᠡᠷᠡ ᠪᠡᠷ ᠶᠣᠱᠦ᠋ᠶᠠ ᠶᠢ ᠠᠪᠴᠢᠷᠠᠵᠤ ᠲᠠᠬᠢᠯᠴᠢ ᠡᠯᠧᠶᠠᠽᠠᠷ ᠪᠣᠯᠣᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠡᠮᠦᠨᠡ ᠵᠣᠭᠰᠣᠭᠠᠵᠤ᠂ 23 ᠲᠡᠭᠦᠨ ᠦ ᠳᠡᠭᠡᠷᠡ ᠭᠠᠷ ᠢᠶᠠᠨ ᠲᠠᠯᠪᠢᠨ ᠲᠣᠮᠢᠯᠠᠪᠠ᠃ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠪᠠᠷ ᠳᠠᠮᠵᠢᠭᠤᠯᠤᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠪᠣᠯᠣᠭᠰᠠᠨ ᠪᠠᠢᠨᠠ᠃