ᠲᠣᠭᠠᠯᠠᠯᠭᠠ ᠭᠤᠷᠪᠠ
ᠯᠧᠸᠢᠴᠦᠳ
1 ᠰᠢᠨᠠᠢ ᠠᠭᠤᠯᠠᠨ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠠᠢᠯᠠᠳᠬᠤ ᠦᠶᠡ ᠶᠢᠨ ᠠᠷᠣᠨ ᠪᠣᠯᠣᠨ ᠮᠣᠰᠧ ᠶᠢᠨ ᠦᠷᠡ ᠤᠳᠤᠮ ᠡᠨᠡ ᠪᠠᠢᠨᠠ᠄ 2 ᠠᠷᠣᠨ ᠤ ᠬᠥᠪᠡᠭᠦᠳ ᠦᠨ ᠨᠡᠷᠡᠰ ᠭᠡᠪᠡᠯ᠂ ᠤᠤᠭᠠᠨ ᠬᠦᠦ ᠨᠠᠳᠠᠪ᠂ ᠳᠠᠷᠠᠭᠠᠬᠢ ᠨᠢ ᠠᠪᠢᠾᠦ᠋᠂ ᠡᠯᠧᠶᠠᠽᠠᠷ᠂ ᠢᠲ᠋ᠠᠮᠠᠷ᠃ 3 ᠡᠳᠡᠭᠡᠷ ᠨᠢ ᠠᠷᠣᠨ ᠤ ᠬᠥᠪᠡᠭᠦᠳ ᠦᠨ ᠨᠡᠷᠡᠰ ᠶᠤᠮ᠃ ᠲᠡᠳᠡ ᠲᠠᠬᠢᠯᠴᠢ ᠶᠢᠨ ᠠᠯᠪᠠᠨ ᠳᠤ ᠦᠢᠯᠡᠴᠢᠯᠡᠬᠦ ᠪᠡᠷ ᠲᠣᠮᠢᠯᠠᠭᠳᠠᠵᠤ ᠲᠣᠰᠣᠯᠠᠭᠳᠠᠭᠰᠠᠨ ᠲᠠᠬᠢᠯᠴᠢᠳ ᠪᠣᠯᠵᠠᠢ᠃ 4 ᠬᠠᠷᠢᠨ ᠨᠠᠳᠠᠪ᠂ ᠠᠪᠢᠾᠦ᠋ ᠬᠣᠶᠠᠷ ᠰᠢᠨᠠᠢ ᠶᠢᠨ ᠴᠥᠯ ᠳᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠶᠣᠰᠣ ᠪᠤᠰᠤ ᠭᠠᠯ ᠢ ᠡᠷᠭᠦᠭᠰᠡᠨ ᠢᠶᠡᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠦᠬᠦᠭᠰᠡᠨ ᠪᠢᠯᠡ᠃ ᠲᠡᠷᠡ ᠬᠣᠶᠠᠭᠤᠯᠠ ᠦᠷᠡ ᠬᠡᠦᠬᠡᠳ ᠦᠭᠡᠢ ᠪᠣᠯᠬᠣᠷ ᠡᠯᠧᠶᠠᠽᠠᠷ᠂ ᠢᠲ᠋ᠠᠮᠠᠷ ᠡᠴᠢᠭᠡ ᠠᠷᠣᠨ ᠤ ᠪᠠᠨ ᠬᠠᠷᠢᠶᠠᠨ ᠳᠤ ᠲᠠᠬᠢᠯᠴᠢ ᠪᠠᠷ ᠦᠢᠯᠡᠴᠢᠯᠡᠵᠡᠢ᠃
5 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 6 《ᠯᠧᠸᠢ ᠣᠪᠣᠭ ᠢ ᠥᠪᠡᠷ ᠲᠡᠭᠡᠨ ᠣᠢᠷᠠᠲᠤᠭᠤᠯᠵᠤ᠂ ᠲᠡᠳᠡᠨ ᠢ ᠲᠠᠬᠢᠯᠴᠢ ᠠᠷᠣᠨ ᠤ ᠡᠮᠦᠨᠡ ᠪᠠᠢᠯᠭᠠᠵᠤ ᠲᠡᠭᠦᠨ ᠳᠦ ᠲᠤᠰᠠᠯᠠᠭᠤᠯ᠃ 7 ᠲᠡᠳᠡ ᠴᠠᠴᠠᠷ ᠤᠨ ᠠᠵᠢᠯ ᠢ ᠬᠢᠳᠡᠭ ᠢᠶᠡᠷ ᠢᠶᠠᠨ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠡᠮᠦᠨᠡ ᠠᠷᠣᠨ ᠪᠣᠯᠣᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠲᠥᠯᠥᠭᠡ ᠡᠭᠦᠷᠭᠡ ᠪᠡᠨ ᠪᠡᠶᠡᠯᠡᠭᠦᠯᠬᠦ ᠪᠣᠯᠣᠨᠠ᠃ 8 ᠲᠡᠳᠡ ᠪᠠᠰᠠ ᠴᠠᠴᠠᠷ ᠤᠨ ᠠᠵᠢᠯ ᠢ ᠬᠢᠳᠡᠭ ᠢᠶᠡᠷ ᠢᠶᠠᠨ ᠢᠰᠷᠧᠯᠴᠦᠳ ᠦᠨ ᠡᠮᠦᠨᠡ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠠᠯᠢᠪᠠ ᠬᠡᠷᠡᠭᠰᠡᠯ ᠢ ᠬᠠᠷᠢᠭᠤᠴᠠᠬᠤ ᠡᠭᠦᠷᠭᠡ ᠪᠡᠨ ᠪᠡᠶᠡᠯᠡᠭᠦᠯᠬᠦ ᠪᠣᠯᠣᠨᠠ᠃ 9 ᠡᠢᠮᠦ ᠡᠴᠡ ᠴᠢ ᠯᠧᠸᠢᠴᠦᠳ ᠢ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠲᠦ ᠥᠭ᠃ ᠲᠡᠳᠡ ᠪᠣᠯ ᠲᠡᠭᠦᠨ ᠳᠦ 1 ᠪᠦᠷᠢᠮᠦᠰᠦᠨ ᠵᠣᠷᠢᠭᠤᠯᠤᠭᠳᠠᠬᠤ ᠢᠰᠷᠧᠯᠴᠦᠳ ᠶᠤᠮ᠃ 10 ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠢ ᠯᠠ ᠲᠠᠬᠢᠯᠴᠢ ᠪᠠᠷ ᠲᠣᠮᠢᠯᠠᠵᠤ᠂ ᠥᠪᠡᠷ ᠦᠨ ᠬᠢᠨᠢ ᠠᠯᠪᠠ ᠶᠢ ᠭᠦᠢᠴᠡᠳᠬᠡᠭᠦᠯ᠃ ᠬᠠᠷᠢᠨ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠠᠷᠢᠭᠤᠨ ᠭᠠᠵᠠᠷ ᠲᠤ ᠣᠢᠷᠠᠲᠤᠵᠤ ᠣᠴᠢᠪᠠᠯ ᠴᠠᠭᠠᠵᠠᠯᠠᠭᠤᠯᠬᠤ ᠪᠣᠯᠣᠨᠠ》 ᠭᠡᠯᠡ᠃
11 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 12 《ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠥᠪᠡᠷ ᠢᠶᠡᠨ ᠯᠧᠸᠢᠴᠦᠳ ᠢ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠠᠴᠠ ᠰᠢᠯᠢᠨ ᠠᠪᠴᠤ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠᠬᠢ ᠤᠮᠠᠢ ᠶᠢ ᠨᠡᠭᠡᠭᠡᠭᠴᠢ ᠤᠤᠭᠠᠨ ᠪᠦᠷᠢ ᠶᠢ ᠣᠷᠣᠯᠠᠭᠤᠯᠤᠭᠰᠠᠨ ᠶᠤᠮ᠃ ᠲᠡᠢᠮᠦ ᠡᠴᠡ ᠯᠧᠸᠢᠴᠦᠳ ᠨᠢ ᠮᠢᠨᠦᠬᠢ ᠪᠠᠢᠬᠤ ᠪᠣᠯᠣᠨᠠ᠃ 13 ᠤᠴᠢᠷ ᠨᠢ ᠪᠦᠬᠦ ᠤᠤᠭᠠᠨ ᠲᠥᠷᠥᠭᠰᠡᠳ ᠮᠢᠨᠦᠬᠢ ᠪᠢᠯᠡ᠃ ᠶᠧᠵᠢᠫᠲ ᠲᠤ ᠤᠤᠭᠠᠨ ᠲᠥᠷᠥᠭᠰᠡᠳ ᠪᠦᠭᠦᠳᠡ ᠶᠢ ᠴᠣᠬᠢᠨ ᠤᠰᠠᠳᠬᠠᠭᠰᠠᠨ ᠲᠡᠷᠡ ᠡᠳᠦᠷ ᠲᠡᠭᠡᠨ ᠬᠥᠮᠦᠨ ᠡᠴᠡ ᠠᠪᠤᠭᠠᠳ ᠮᠠᠯ ᠠᠮᠢᠲᠠᠨ ᠬᠦᠷᠲᠡᠯᠡᠬᠢ ᠢᠰᠷᠧᠯ ᠤᠨ ᠪᠦᠬᠦ ᠤᠤᠭᠠᠨ ᠲᠥᠷᠥᠭᠰᠡᠳ ᠢ ᠪᠢ ᠲᠤᠰᠠᠭᠠᠷᠯᠠᠵᠤ ᠥᠪᠡᠷ ᠲᠡᠭᠡᠨ ᠠᠪᠤᠭᠰᠠᠨ᠃ ᠲᠡᠳᠡ ᠮᠢᠨᠦᠬᠢ ᠪᠠᠢᠬᠤ ᠪᠣᠯᠣᠨᠠ᠃ ᠪᠢ ᠪᠣᠯ ᠶᠣᠬᠣᠸᠠ》 ᠭᠡᠪᠡ᠃
14 ᠶᠣᠬᠣᠸᠠ ᠰᠢᠨᠠᠢ ᠶᠢᠨ ᠴᠥᠯ ᠳᠤ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 15 《ᠯᠧᠸᠢᠴᠦᠳ ᠢ ᠭᠡᠷ ᠪᠦᠯᠢ ᠨᠦᠭᠦᠳ ᠢᠶᠡᠷ ᠨᠢ᠂ ᠮᠥᠨ ᠠᠢᠮᠠᠭ ᠤᠳ ᠢᠶᠠᠷ ᠨᠢ ᠲᠣᠭᠠᠯᠠ᠃ ᠨᠢᠭᠡ ᠰᠠᠷᠠ ᠲᠠᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠡᠷᠡ ᠬᠦᠢᠰᠦᠲᠡᠨ ᠪᠦᠷᠢ ᠶᠢ ᠲᠣᠭᠠᠯᠠᠬᠤ ᠶᠣᠰᠣᠲᠠᠢ》 ᠭᠡᠰᠡᠨ ᠳᠦ᠂ 16 ᠮᠣᠰᠧ ᠥᠪᠡᠷ ᠲᠤᠨᠢ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ᠂ ᠶᠣᠬᠣᠸᠠ ᠶᠢᠨ ᠦᠭᠡᠨ ᠦ ᠳᠠᠭᠠᠤ ᠲᠡᠳᠡᠨ ᠢ ᠲᠣᠭᠠᠯᠠᠪᠠ᠃ 17 ᠯᠧᠸᠢ ᠶᠢᠨ ᠬᠥᠪᠡᠭᠦᠳ ᠦᠨ ᠨᠡᠷᠡᠰ ᠭᠡᠪᠡᠯ᠂ ᠭᠧᠷᠱᠣᠨ᠂ ᠺᠣᠬᠠᠲ᠂ ᠮᠧᠷᠠᠷᠢ᠃ 18 ᠭᠧᠷᠱᠣᠨ ᠠᠴᠠ ᠡᠭᠦᠰᠦᠭᠰᠡᠨ ᠠᠢᠮᠠᠭ ᠤᠳ ᠭᠡᠪᠡᠯ᠂ ᠯᠢᠪᠨᠢ᠂ ᠱᠢᠮᠧᠶᠢ ᠨᠠᠷ᠃ 19 ᠺᠣᠬᠠᠲ ᠠᠴᠠ ᠡᠭᠦᠰᠦᠭᠰᠡᠨ ᠠᠢᠮᠠᠭ ᠤᠳ ᠭᠡᠪᠡᠯ ᠠᠮᠷᠠᠮ᠂ ᠢᠽᠬᠠᠷ᠂ ᠾᠧᠪᠷᠣᠨ᠂ ᠦᠽᠢᠶᠧᠯ ᠨᠠᠷ᠃ 20 ᠮᠧᠷᠠᠷᠢ ᠡᠴᠡ ᠡᠭᠦᠰᠦᠭᠰᠡᠨ ᠠᠢᠮᠠᠭ ᠤᠳ ᠭᠡᠪᠡᠯ᠂ ᠮᠠᠯᠢ᠂ ᠮᠦᠱᠢ ᠨᠠᠷ᠃ ᠡᠳᠡ ᠨᠠᠷ ᠨᠢ ᠭᠡᠷ ᠪᠦᠯᠢ ᠨᠦᠭᠦᠳ ᠢᠶᠡᠷ ᠢᠶᠠᠨ ᠲᠣᠭᠠᠯᠠᠭᠤᠯᠤᠭᠰᠠᠨ ᠯᠧᠸᠢᠴᠦᠳ ᠦᠨ ᠠᠢᠮᠠᠭ ᠤᠳ ᠶᠤᠮ᠃
21 ᠭᠧᠷᠱᠣᠨ ᠠᠴᠠ ᠯᠢᠪᠨᠢᠴᠦᠳ ᠪᠣᠯᠣᠨ ᠱᠢᠮᠧᠶ᠋ᠢᠴᠦᠳ ᠦᠨ ᠠᠢᠮᠠᠭ ᠡᠭᠦᠰᠪᠡ᠃ ᠡᠳᠡᠭᠡᠷ ᠨᠢ ᠭᠧᠷᠱᠣᠨ ᠤ ᠠᠢᠮᠠᠭ ᠤᠳ ᠪᠥᠭᠡᠳ 22 ᠲᠡᠳᠡᠨ ᠡᠴᠡ ᠨᠢᠭᠡ ᠰᠠᠷᠠ ᠲᠠᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠦᠨ ᠲᠣᠭᠠ ᠨᠢ ᠳᠣᠯᠣᠭᠠᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠶᠤᠮ᠃ 23 ᠭᠧᠷᠱᠣᠨ ᠤ ᠠᠢᠮᠠᠭ ᠤᠳ ᠣᠷᠣᠰᠢᠬᠤᠢ ᠶᠢᠨ ᠴᠠᠴᠠᠷ ᠤᠨ ᠠᠷᠤ ᠲᠠᠯᠠ᠂ ᠲᠤᠬᠠᠢᠯᠠᠪᠠᠯ ᠪᠠᠷᠠᠭᠤᠨ ᠲᠠᠯᠠ ᠳᠤ ᠪᠠᠭᠤᠳᠠᠯᠯᠠᠳᠠᠭ ᠪᠥᠭᠡᠳ 24 ᠭᠧᠷᠱᠣᠨ ᠤ ᠠᠢᠮᠠᠭ ᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠯᠠᠶᠧᠯ ᠤᠨ ᠬᠦᠦ ᠡᠯᠢᠶᠠᠰᠠᠹ ᠪᠠᠢᠪᠠ᠃ 25 ᠭᠧᠷᠱᠣᠨᠴᠤᠳ ᠤᠨ ᠡᠭᠦᠷᠭᠡ ᠪᠣᠯ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠴᠠᠴᠠᠷ ᠪᠠ ᠮᠠᠢᠬᠠᠨ᠂ ᠲᠡᠭᠦᠨ ᠦ ᠪᠦᠷᠢᠶᠡᠰᠦ ᠨᠦᠭᠦᠳ᠂ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠡᠭᠦᠳᠡᠨ ᠦ ᠬᠥᠰᠢᠭᠡ᠂ 26 ᠴᠠᠴᠠᠷ ᠪᠠ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠲᠣᠭᠣᠷᠢᠭᠰᠠᠨ ᠬᠦᠷᠢᠶᠡᠨ ᠦ ᠬᠥᠰᠢᠭᠡ ᠨᠦᠭᠦᠳ᠂ ᠬᠦᠷᠢᠶᠡᠨ ᠦ ᠡᠭᠦᠳᠡᠨ ᠦ ᠬᠥᠰᠢᠭᠡ᠂ ᠣᠭᠣᠰᠣᠷ ᠤᠳ ᠵᠡᠷᠭᠡ ᠶᠢ ᠬᠠᠷᠢᠭᠤᠴᠠᠨᠠ᠃
27 ᠺᠣᠬᠠᠲ ᠠᠴᠠ ᠠᠮᠷᠠᠮᠴᠤᠳ ᠤᠨ ᠠᠢᠮᠠᠭ᠂ ᠢᠽᠠᠬᠠᠷᠴᠤᠳ ᠤᠨ ᠠᠢᠮᠠᠭ᠂ ᠾᠧᠪᠷᠣᠨᠴᠤᠳ ᠤᠨ ᠠᠢᠮᠠᠭ᠂ ᠦᠽᠢᠶᠧᠯᠴᠦᠳ ᠦᠨ ᠠᠢᠮᠠᠭ ᠡᠭᠦᠰᠴᠡᠢ᠃ ᠡᠳᠡᠭᠡᠷ ᠨᠢ ᠺᠣᠬᠠᠲ ᠤᠨ ᠠᠢᠮᠠᠭ ᠤᠳ ᠶᠤᠮ᠃ 28 ᠨᠢᠭᠡ ᠰᠠᠷᠠ ᠲᠠᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠡᠷᠠᠴᠤᠳ ᠤᠨ ᠲᠣᠭᠠ ᠨᠢ ᠨᠠᠢ᠌ᠮᠠᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤ ᠪᠢᠯᠡ᠃ ᠲᠡᠳᠡ ᠠᠷᠢᠭᠤᠨ ᠭᠠᠵᠠᠷ ᠲᠤ ᠠᠯᠪᠠ ᠲᠠᠢ᠃ 29 ᠺᠣᠬᠠᠲ ᠤᠨ ᠠᠢᠮᠠᠭ ᠤᠳ ᠴᠠᠴᠠᠷ ᠤᠨ ᠡᠮᠦᠨᠡ ᠲᠠᠯᠠ ᠳᠤ ᠪᠠᠭᠤᠳᠠᠯᠯᠠᠳᠠᠭ ᠪᠥᠭᠡᠳ 30 ᠺᠣᠬᠠᠲ ᠤᠨ ᠠᠢᠮᠠᠭ ᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠦᠽᠢᠶᠧᠯ ᠤᠨ ᠬᠦᠦ ᠡᠯᠢᠽᠠᠹᠠᠨ ᠪᠠᠢᠯᠠ᠃ 31 ᠲᠡᠳᠡ ᠠᠪᠳᠠᠷᠠ᠂ ᠰᠢᠷᠡᠭᠡ᠂ ᠳ᠋ᠧᠩ ᠤᠨ ᠲᠠᠯᠪᠢᠭᠤᠷ᠂ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠬᠢᠭᠡᠳ ᠲᠠᠬᠢᠯᠴᠢᠳ ᠤᠨ ᠦᠢᠯᠡᠴᠢᠯᠡᠯ ᠳᠦ ᠬᠡᠷᠡᠭᠯᠡᠳᠡᠭ ᠠᠷᠢᠭᠤᠨ ᠭᠠᠵᠠᠷ ᠤᠨ ᠡᠳ᠋ ᠵᠦᠢᠯᠡᠰ᠂ ᠬᠥᠰᠢᠭᠡ ᠵᠡᠷᠭᠡ ᠶᠢ ᠬᠠᠷᠢᠭᠤᠴᠠᠬᠤ ᠡᠭᠦᠷᠭᠡ ᠲᠠᠢ᠃ 32 ᠯᠧᠸᠢᠴᠦᠳ ᠦᠨ ᠤᠳᠤᠷᠢᠳᠤᠭᠴᠢᠳ ᠤᠨ ᠲᠡᠷᠢᠭᠦᠨ ᠨᠢ ᠲᠠᠬᠢᠯᠴᠢ ᠠᠷᠣᠨ ᠤ ᠬᠦᠦ ᠡᠯᠧᠶᠠᠽᠠᠷ ᠶᠤᠮ᠃ ᠲᠡᠷᠡ ᠠᠷᠢᠭᠤᠨ ᠭᠠᠵᠠᠷ ᠤᠨ ᠬᠠᠷᠢᠭᠤᠴᠠᠭᠴᠢᠳ ᠢ ᠬᠢᠨᠠᠳᠠᠭ ᠪᠠᠢᠯᠠ᠃
33 ᠮᠧᠷᠠᠷᠢ ᠡᠴᠡ ᠮᠠᠯᠢᠴᠤᠳ ᠤᠨ ᠠᠢᠮᠠᠭ᠂ ᠮᠦᠱᠢᠴᠦᠳ ᠦᠨ ᠠᠢᠮᠠᠭ ᠡᠭᠦᠰᠴᠡᠢ᠃ ᠡᠳᠡᠭᠡᠷ ᠨᠢ ᠮᠧᠷᠠᠷᠢ ᠶᠢᠨ ᠠᠢᠮᠠᠭ ᠤᠳ ᠪᠢᠯᠡ᠃ 34 ᠨᠢᠭᠡ ᠰᠠᠷᠠ ᠲᠠᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠪᠦᠬᠦ ᠡᠷᠡᠴᠦᠳ ᠦᠨ ᠲᠣᠭᠠ ᠵᠢᠷᠭᠤᠭᠠᠨ ᠮᠢᠩ᠋ᠭᠠ ᠬᠣᠶᠠᠷ ᠵᠠᠭᠤ ᠪᠥᠭᠡᠳ 35 ᠮᠧᠷᠠᠷᠢ ᠶᠢᠨ ᠠᠢᠮᠠᠭ ᠤᠳ ᠤᠨ ᠭᠡᠷ ᠪᠦᠯᠢ ᠨᠦᠭᠦᠳ ᠦᠨ ᠤᠳᠤᠷᠢᠳᠤᠭᠴᠢ ᠨᠢ ᠠᠪᠢᠬᠠᠢᠯ ᠤᠨ ᠬᠦᠦ ᠽᠦᠷᠢᠶᠧᠯ ᠪᠠᠢᠪᠠ᠃ ᠮᠢᠷᠠᠷᠢᠴᠤᠳ ᠴᠠᠴᠠᠷ ᠤᠨ ᠬᠣᠢᠲᠤ ᠲᠠᠯᠠ ᠳᠤ ᠪᠠᠭᠤᠳᠠᠯᠯᠠᠨᠠ᠂ 36 ᠲᠡᠳᠡᠨ ᠦ ᠡᠭᠦᠷᠭᠡ ᠪᠣᠯ ᠴᠠᠴᠠᠷ ᠤᠨ ᠳ᠋ᠦᠨᠵᠡ ᠨᠦᠭᠦᠳ᠂ ᠬᠥᠨᠳᠡᠯᠡᠪᠴᠢ ᠮᠣᠳᠣᠳ᠂ ᠪᠠᠭᠠᠨᠠ ᠨᠤᠭᠤᠳ᠂ ᠤᠭᠯᠠᠭᠤᠷ ᠤᠳ᠂ ᠪᠦᠬᠦ ᠬᠡᠷᠡᠭᠰᠡᠯ ᠪᠣᠯᠣᠨ ᠪᠤᠰᠤᠳ ᠬᠡᠷᠡᠭᠴᠡᠭᠡ ᠲᠠᠢ ᠵᠦᠢᠯ᠂ 37 ᠮᠥᠨ ᠬᠠᠰᠢᠶᠠ ᠶᠢ ᠲᠣᠭᠣᠷᠢᠭᠰᠠᠨ ᠪᠠᠭᠠᠨᠠ ᠨᠤᠭᠤᠳ᠂ ᠤᠭᠯᠠᠭᠤᠷ ᠤᠳ᠂ ᠮᠠᠢᠬᠠᠨ ᠤ ᠭᠠᠳᠠᠰᠤ ᠨᠤᠭᠤᠳ ᠪᠠ ᠣᠭᠣᠰᠣᠷ ᠤᠳ ᠵᠡᠷᠭᠡ ᠶᠢ ᠬᠠᠷᠢᠭᠤᠴᠠᠨᠠ᠃
38 ᠮᠣᠰᠧ᠂ ᠠᠷᠣᠨ ᠪᠠ ᠠᠷᠣᠨ ᠤ ᠬᠥᠪᠡᠭᠦᠳ ᠴᠠᠴᠠᠷ ᠤᠨ ᠤᠷᠳᠤ᠂ ᠨᠠᠷᠠ ᠮᠠᠨᠳᠤᠬᠤ ᠵᠦᠭ᠂ ᠵᠡᠭᠦᠨ ᠲᠠᠯᠠ ᠳᠤ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠃ ᠲᠡᠳᠡ ᠢᠰᠷᠧᠯᠴᠦᠳ ᠦᠨ ᠡᠮᠦᠨᠡ ᠡᠴᠡ ᠠᠷᠢᠭᠤᠨ ᠭᠠᠵᠠᠷ ᠢ ᠬᠠᠷᠢᠭᠤᠴᠠᠨᠠ᠃ ᠬᠡᠷᠪᠡ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠣᠢᠷᠠᠲᠤᠵᠤ ᠣᠴᠢᠪᠠᠯ ᠴᠠᠭᠠᠵᠠᠯᠠᠭᠤᠯᠬᠤ ᠪᠣᠯᠣᠨᠠ᠃ 39 ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠮᠣᠰᠧ᠂ ᠠᠷᠣᠨ ᠨᠠᠷ ᠯᠧᠸᠢᠴᠦᠳ ᠢ ᠠᠢᠮᠠᠭ ᠤᠳ ᠢᠶᠠᠷ ᠨᠢ ᠲᠣᠭᠠᠯᠠᠬᠤ ᠳᠤ᠂ ᠨᠢᠭᠡ ᠰᠠᠷᠠ ᠲᠠᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠪᠦᠬᠦ ᠡᠷᠡᠴᠦᠳ ᠦᠨ ᠲᠣᠭᠠ ᠬᠣᠶᠠᠷ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ ᠪᠠᠢᠯᠠ᠃
40 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠢᠰᠷᠧᠯᠴᠦᠳ ᠦᠨ ᠨᠢᠭᠡ ᠰᠠᠷᠠ ᠲᠠᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠤᠤᠭᠠᠨ ᠡᠷᠡ ᠬᠦᠢᠰᠦᠲᠡᠨ ᠪᠦᠷᠢ ᠶᠢ ᠲᠣᠭᠠᠯᠠᠵᠤ᠂ ᠨᠡᠷᠡᠰ ᠢ ᠨᠢ ᠪᠦᠷᠢᠳᠬᠡ᠃ 41 ᠴᠢ ᠯᠧᠸᠢᠴᠦᠳ ᠢ ᠢᠰᠷᠧᠯᠴᠦᠳ ᠦᠨ ᠤᠤᠭᠠᠨ ᠲᠥᠷᠥᠭᠰᠡᠳ ᠪᠦᠭᠦᠳᠡ ᠶᠢᠨ ᠣᠷᠣᠨ ᠳᠤ᠂ ᠮᠥᠨ ᠯᠧᠸᠢᠴᠦᠳ ᠦᠨ ᠮᠠᠯ ᠰᠦᠷᠦᠭ ᠢ ᠢᠰᠷᠧᠯᠴᠦᠳ ᠦᠨ ᠮᠠᠯ ᠰᠦᠷᠦᠭ ᠦᠨ ᠠᠩᠬᠠ ᠲᠥᠷᠥᠭᠰᠡᠳ ᠪᠦᠭᠦᠳᠡ ᠶᠢᠨ ᠣᠷᠣᠨ ᠳᠤ ᠮᠢᠨᠦ ᠡᠮᠦᠨᠡ ᠡᠴᠡ ᠬᠦᠯᠢᠶᠡᠨ ᠠᠪ᠂ ᠪᠢ ᠪᠣᠯ ᠶᠣᠬᠣᠸᠠ》 ᠭᠡᠰᠡᠨ ᠳᠦ᠂ 42 ᠮᠣᠰᠧ ᠶᠣᠬᠣᠸᠠ ᠶᠢᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠢᠰᠷᠧᠯᠴᠦᠳ ᠦᠨ ᠬᠥᠪᠡᠭᠦᠳ ᠦᠨ ᠳᠤᠮᠳᠠᠬᠢ ᠪᠦᠬᠦ ᠤᠤᠭᠠᠨ ᠲᠥᠷᠥᠭᠰᠡᠳ ᠢ ᠲᠣᠭᠠᠯᠠᠵᠠᠢ᠃ 43 ᠨᠢᠭᠡ ᠰᠠᠷᠠ ᠲᠠᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠨᠡᠷᠡ ᠪᠡᠨ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠪᠦᠬᠦ ᠤᠤᠭᠠᠨ ᠡᠷᠡᠴᠦᠳ ᠬᠣᠶᠠᠷ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ ᠬᠣᠶᠠᠷ ᠵᠠᠭᠤ ᠳᠠᠯᠠᠨ ᠭᠤᠷᠪᠠ ᠪᠠᠢᠯᠠ᠃
44 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 45 《ᠴᠢ ᠯᠧᠸᠢᠴᠦᠳ ᠢ ᠢᠰᠷᠧᠯᠴᠦᠳ ᠦᠨ ᠤᠤᠭᠠᠨ ᠲᠥᠷᠥᠭᠰᠡᠳ ᠪᠦᠭᠦᠳᠡ ᠶᠢᠨ ᠣᠷᠣᠨ ᠳᠤ᠂ ᠯᠧᠸᠢᠴᠦᠳ ᠦᠨ ᠮᠠᠯ ᠰᠦᠷᠦᠭ ᠢ ᠢᠰᠷᠧᠯᠴᠦᠳ ᠦᠨ ᠮᠠᠯ ᠰᠦᠷᠦᠭ ᠦᠨ ᠣᠷᠣᠨ ᠳᠤ ᠬᠦᠯᠢᠶᠡᠨ ᠠᠪ᠃ ᠯᠧᠸᠢᠴᠦᠳ ᠨᠢ ᠮᠢᠨᠦᠬᠢ ᠪᠠᠢᠬᠤ ᠪᠣᠯᠣᠨᠠ᠃ ᠪᠢ ᠪᠣᠯ ᠶᠣᠬᠣᠸᠠ᠃ 46 ᠯᠧᠸᠢᠴᠦᠳ ᠦᠨ ᠲᠣᠭᠠ ᠠᠴᠠ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠢᠰᠷᠧᠯᠴᠦᠳ ᠦᠨ ᠬᠣᠶᠠᠷ ᠵᠠᠭᠤ ᠳᠠᠯᠠᠨ ᠭᠤᠷᠪᠠᠨ ᠤᠤᠭᠠᠨ ᠲᠥᠷᠥᠭᠰᠡᠳ ᠦᠨ ᠲᠥᠯᠥᠪᠥᠷᠢ ᠳᠤ᠂ 47 ᠴᠢ ᠬᠥᠮᠦᠨ ᠪᠦᠷᠢ ᠶᠢᠨ ᠲᠥᠯᠥᠭᠡ ᠲᠠᠪᠤᠨ ᠱᠧᠺᠧᠯ ᠠᠪ᠃ ᠠᠷᠢᠭᠤᠨ ᠭᠠᠵᠠᠷ ᠤᠨ ᠪᠠᠷᠢᠮᠵᠢᠶᠠ ᠪᠠᠷ ᠨᠢᠭᠡ ᠱᠧᠺᠧᠯ ᠨᠢ ᠬᠣᠷᠢᠨ ᠭᠧᠷᠠ ᠪᠣᠯᠣᠨᠠ᠃ 48 ᠡᠳᠡᠭᠡᠷ ᠮᠥᠩᠭᠥ ᠶᠢ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠬᠥᠮᠦᠰ ᠢ ᠵᠣᠯᠢᠬᠤ ᠲᠥᠯᠥᠪᠥᠷᠢ ᠪᠣᠯᠭᠠᠨ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠲᠦ ᠥᠭ》 ᠭᠡᠪᠡ᠃ 49 ᠮᠣᠰᠧ ᠯᠧᠸᠢᠴᠦᠳ ᠢᠶᠡᠷ ᠣᠷᠣᠯᠠᠭᠤᠯᠤᠭᠰᠠᠨ ᠬᠥᠮᠦᠰ ᠦᠨ ᠲᠣᠭᠠ ᠠᠴᠠ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠬᠥᠮᠦᠰ ᠢ ᠵᠣᠯᠢᠬᠤ ᠮᠥᠩᠭᠥ ᠶᠢ ᠴᠤᠭᠯᠠᠭᠤᠯᠤᠭᠰᠠᠨ ᠳᠤ᠂ 50 ᠢᠰᠷᠧᠯ ᠤᠨ ᠤᠤᠭᠠᠨ ᠲᠥᠷᠥᠭᠰᠡᠳ ᠡᠴᠡ ᠠᠪᠤᠭᠰᠠᠨ ᠮᠥᠩᠭᠥ ᠨᠢ ᠠᠷᠢᠭᠤᠨ ᠭᠠᠵᠠᠷ ᠤᠨ ᠪᠠᠷᠢᠮᠵᠢᠶᠠ ᠪᠠᠷ ᠨᠢᠭᠡ ᠮᠢᠩ᠋ᠭᠠ ᠭᠤᠷᠪᠠᠨ ᠵᠠᠭᠤ ᠵᠢᠷᠠᠨ ᠲᠠᠪᠤᠨ ᠱᠧᠺᠧᠯ ᠪᠠᠢᠯᠠ᠃ 51 ᠮᠣᠰᠧ ᠲᠡᠷᠡ ᠲᠥᠯᠥᠪᠥᠷᠢ ᠶᠢᠨ ᠮᠥᠩᠭᠥ ᠶᠢ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠲᠦ ᠥᠭᠴᠡᠢ᠃ ᠡᠢᠨ ᠬᠦ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠦᠭᠡ ᠶᠢᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃