ᠲᠣᠭᠠᠯᠠᠯᠭᠠ ᠬᠣᠶᠠᠷ
ᠣᠪᠣᠭ ᠤᠳ ᠤᠨ ᠬᠤᠸᠠᠷᠠᠨ ᠤ ᠪᠠᠢᠷᠢᠰᠢᠯ
1 ᠶᠣᠬᠣᠸᠠ ᠮᠣᠰᠧ᠂ ᠠᠷᠣᠨ ᠨᠠᠷ ᠲᠤ ᠠᠢᠯᠠᠳᠤᠨ᠄ 2 《ᠢᠰᠷᠧᠯᠴᠦᠳ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠷᠤᠭᠤ ᠬᠠᠷᠠᠨ ᠲᠡᠭᠦᠨ ᠦ ᠲᠣᠭᠣᠷᠢᠨ ᠳᠤ ᠮᠠᠢᠬᠠᠨ ᠢᠶᠠᠨ ᠪᠣᠰᠬᠠᠵᠤ᠂ ᠬᠥᠮᠦᠨ ᠪᠦᠷᠢ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠯᠪᠠᠭᠠ ᠶᠢᠨ ᠬᠠᠵᠠᠭᠤ ᠳᠤ ᠥᠪᠡᠷ ᠦᠨ ᠢᠶᠠᠨ ᠲᠤᠭ ᠤᠨ ᠳᠣᠣᠷᠠ ᠪᠠᠭᠤᠳᠠᠯᠯᠠᠬᠤ ᠶᠣᠰᠣᠲᠠᠢ᠃ 3 ᠨᠠᠷᠠ ᠮᠠᠨᠳᠤᠬᠤ ᠵᠡᠭᠦᠨ ᠵᠦᠭ ᠲᠦ ᠶᠦᠳᠠ ᠶᠢᠨ ᠬᠤᠸᠠᠷᠠᠨ ᠲᠤᠭ ᠤᠨ ᠢᠶᠠᠨ ᠳᠣᠣᠷᠠ ᠳᠠᠢᠴᠢᠳ ᠤᠨ ᠪᠠᠭ ᠤᠳ ᠢᠶᠠᠷ ᠢᠶᠠᠨ ᠪᠠᠭᠤᠳᠠᠯᠯᠠᠨᠠ᠃ ᠶᠦᠳᠠᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠠᠮᠢᠨᠠᠳᠠᠪ ᠤᠨ ᠬᠦᠦ ᠨᠠᠾᠱᠣᠨ ᠪᠥᠭᠡᠳ 4 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠳᠣᠯᠣᠭᠠᠨ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤ ᠶᠤᠮ᠃ 5 ᠲᠡᠭᠦᠨ ᠦ ᠳᠡᠷᠭᠡᠳᠡ ᠢᠰᠠᠺᠠᠷ ᠣᠪᠣᠭ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠃ ᠢᠰᠠᠺᠠᠷᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠽᠦᠶᠠᠷ ᠤᠨ ᠬᠦᠦ ᠨᠧᠲ᠋ᠠᠨᠧᠯ ᠪᠥᠭᠡᠳ 6 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠲᠠᠪᠤᠨ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠶᠤᠮ᠃ 7 ᠳᠡᠷᠭᠡᠳᠡ ᠨᠢ ᠽᠧᠪᠦ᠋ᠯᠣᠨ ᠣᠪᠣᠭ ᠪᠠᠢᠬᠤ ᠶᠣᠰᠣᠲᠠᠢ᠃ ᠽᠧᠪᠦ᠋ᠯᠣᠨᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠾᠧᠯᠣᠨ ᠤ ᠬᠦᠦ ᠡᠯᠢᠶᠠᠪ ᠪᠥᠭᠡᠳ 8 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠲᠠᠪᠤᠨ ᠲᠦᠮᠡ ᠳᠣᠯᠣᠭᠠᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠶᠤᠮ᠃ 9 ᠲᠡᠢᠨ ᠬᠦ ᠶᠦᠳᠠ ᠶᠢᠨ ᠬᠤᠸᠠᠷᠠᠨ ᠤ ᠬᠠᠮᠤᠭ ᠳᠠᠢᠴᠢᠳ ᠤᠨ ᠲᠣᠭᠠ ᠠᠷᠪᠠᠨ ᠨᠠᠢ᠌ᠮᠠᠨ ᠲᠦᠮᠡ ᠵᠢᠷᠭᠤᠭᠠᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ᠂ ᠲᠡᠳᠡ ᠪᠤᠰᠤᠳ ᠤᠨ ᠲᠦᠷᠦᠭᠦᠨ ᠳᠦ ᠬᠥᠳᠡᠯᠬᠦ ᠪᠣᠯᠣᠨᠠ᠃
10 ᠡᠮᠦᠨᠡ ᠲᠠᠯᠠ ᠳᠤᠨᠢ ᠷᠧᠣᠪᠧᠨ ᠤ ᠬᠤᠸᠠᠷᠠᠨ ᠲᠤᠭ ᠤᠨ ᠢᠶᠠᠨ ᠳᠣᠣᠷᠠ ᠳᠠᠢᠴᠢᠳ ᠤᠨ ᠪᠠᠭ ᠤᠳ ᠢᠶᠠᠷ ᠢᠶᠠᠨ ᠪᠠᠭᠤᠳᠠᠯᠯᠠᠨᠠ᠃ ᠷᠧᠣᠪᠧᠨᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠱᠧᠳᠧᠣᠷ ᠤᠨ ᠬᠦᠦ ᠡᠯᠢᠽᠦ᠋ᠷ ᠪᠥᠭᠡᠳ 11 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠳᠥᠷᠪᠡᠨ ᠲᠦᠮᠡ ᠵᠢᠷᠭᠤᠭᠠᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠶᠤᠮ᠃ 12 ᠲᠡᠭᠦᠨ ᠦ ᠳᠡᠷᠭᠡᠳᠡ ᠰᠢᠮᠧᠶᠣᠨ ᠣᠪᠣᠭ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠃ ᠰᠢᠮᠧᠶᠣᠨᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠽᠦᠷᠢᠱᠠᠳᠠᠢ ᠶᠢᠨ ᠬᠦᠦ ᠱᠧᠯᠦ᠋ᠮᠢᠶᠧᠯ ᠪᠥᠭᠡᠳ 13 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠲᠠᠪᠤᠨ ᠲᠦᠮᠡ ᠶᠢᠰᠦᠨ ᠮᠢᠩ᠋ᠭᠠ ᠭᠤᠷᠪᠠᠨ ᠵᠠᠭᠤ ᠶᠤᠮ᠃ 14 ᠳᠡᠷᠭᠡᠳᠡ ᠨᠢ ᠭᠠᠳ᠋ ᠣᠪᠣᠭ ᠪᠠᠢᠬᠤ ᠶᠣᠰᠣᠲᠠᠢ᠃ ᠭᠠᠳ᠋ᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠳ᠋ᠧᠣᠶᠧᠯ ᠤᠨ ᠬᠦᠦ ᠡᠯᠢᠶᠠᠰᠠᠹ ᠪᠥᠭᠡᠳ 15 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠳᠥᠷᠪᠡᠨ ᠲᠦᠮᠡ ᠲᠠᠪᠤᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤ ᠲᠠᠪᠢ ᠶᠤᠮ᠃ 16 ᠲᠡᠢᠨ ᠬᠦ ᠷᠧᠣᠪᠧᠨ ᠤ ᠬᠤᠸᠠᠷᠠᠨ ᠤ ᠬᠠᠮᠤᠭ ᠳᠠᠢᠴᠢᠳ ᠤᠨ ᠲᠣᠭᠠ ᠠᠷᠪᠠᠨ ᠲᠠᠪᠤᠨ ᠲᠦᠮᠡ ᠨᠢᠭᠡᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠲᠠᠪᠢ᠂ ᠲᠡᠳᠡ ᠬᠣᠶᠠᠳᠤᠭᠠᠷ ᠲᠤ ᠬᠥᠳᠡᠯᠬᠦ ᠪᠣᠯᠣᠨᠠ᠃
17 ᠳᠠᠷᠠᠭᠠ ᠨᠢ ᠯᠧᠸᠢᠴᠦᠳ ᠦᠨ ᠬᠤᠸᠠᠷᠠᠨ ᠲᠠᠢ ᠬᠠᠮᠲᠤ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠬᠤᠸᠠᠷᠠᠨ ᠨᠤᠭᠤᠳ ᠤᠨ ᠭᠣᠣᠯ ᠳᠤᠮᠳᠠᠭᠤᠷ ᠬᠥᠳᠡᠯᠬᠦ ᠪᠣᠯᠣᠨᠠ᠃ ᠣᠪᠣᠭ ᠪᠦᠷᠢ ᠪᠠᠭᠤᠳᠠᠯᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠥᠪᠡᠷ ᠦᠨ ᠢᠶᠠᠨ ᠲᠤᠭ ᠤᠨ ᠳᠣᠣᠷᠠ ᠪᠠᠢᠷᠢᠨ ᠳᠠᠭᠠᠨ ᠪᠠᠢᠭᠰᠠᠭᠠᠷ ᠬᠥᠳᠡᠯᠬᠦ ᠪᠣᠯᠣᠨᠠ᠃
18 ᠪᠠᠷᠠᠭᠤᠨ ᠲᠠᠯᠠ ᠳᠤᠨᠢ ᠡᠹᠷᠠᠢᠮ ᠤᠨ ᠬᠤᠸᠠᠷᠠᠨ ᠲᠤᠭ ᠤᠨ ᠢᠶᠠᠨ ᠳᠣᠣᠷᠠ ᠳᠠᠢᠴᠢᠳ ᠤᠨ ᠪᠠᠭ ᠤᠳ ᠢᠶᠠᠷ ᠢᠶᠠᠨ ᠪᠠᠭᠤᠳᠠᠯᠯᠠᠨᠠ᠃ ᠡᠹᠷᠠᠢᠮᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠠᠮᠢᠾᠦ᠋ᠳ᠋ ᠤᠨ ᠬᠦᠦ ᠡᠯᠢᠱᠠᠮᠠ ᠪᠥᠭᠡᠳ 19 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠳᠥᠷᠪᠡᠨ ᠲᠦᠮᠡ ᠨᠢᠭᠡ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠶᠤᠮ᠃ 20 ᠲᠡᠭᠦᠨ ᠦ ᠳᠡᠷᠭᠡᠳᠡ ᠮᠠᠨᠠᠰᠧ ᠣᠪᠣᠭ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠃ ᠮᠠᠨᠠᠰᠧᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠫᠧᠳᠠᠽᠦ᠋ᠷ ᠤᠨ ᠬᠦᠦ ᠭᠠᠮᠠᠯᠢᠶᠧᠯ ᠪᠥᠭᠡᠳ 21 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠭᠤᠷᠪᠠᠨ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ ᠬᠣᠶᠠᠷ ᠵᠠᠭᠤ ᠶᠤᠮ᠃ 22 ᠳᠡᠷᠭᠡᠳᠡ ᠨᠢ ᠪᠢᠨᠶᠠᠮᠢᠨ ᠣᠪᠣᠭ ᠪᠠᠢᠬᠤ ᠶᠣᠰᠣᠲᠠᠢ᠃ ᠪᠢᠨᠶᠠᠮᠢᠨᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠭᠢᠳᠧᠶᠣᠨᠢ ᠶᠢᠨ ᠬᠦᠦ ᠠᠪᠢᠳᠠᠨ ᠪᠥᠭᠡᠳ 23 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠭᠤᠷᠪᠠᠨ ᠲᠦᠮᠡ ᠲᠠᠪᠤᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠶᠤᠮ᠃ 24 ᠲᠡᠢᠨ ᠬᠦ ᠡᠹᠷᠠᠢᠮ ᠤᠨ ᠬᠤᠸᠠᠷᠠᠨ ᠤ ᠬᠠᠮᠤᠭ ᠳᠠᠢᠴᠢᠳ ᠤᠨ ᠲᠣᠭᠠ ᠠᠷᠪᠠᠨ ᠲᠦᠮᠡ ᠨᠠᠢ᠌ᠮᠠᠨ ᠮᠢᠩ᠋ᠭᠠ ᠨᠢᠭᠡ ᠵᠠᠭᠤ᠂ ᠲᠡᠳᠡ ᠭᠤᠷᠪᠠᠳᠤᠭᠠᠷ ᠲᠤ ᠬᠥᠳᠡᠯᠬᠦ ᠪᠣᠯᠣᠨᠠ᠃
25 ᠬᠣᠢᠨᠠ ᠲᠠᠯᠠ ᠳᠤᠨᠢ ᠳ᠋ᠠᠨ ᠤ ᠬᠤᠸᠠᠷᠠᠨ ᠲᠤᠭ ᠤᠨ ᠢᠶᠠᠨ ᠳᠣᠣᠷᠠ ᠳᠠᠢᠴᠢᠳ ᠤᠨ ᠪᠠᠭ ᠤᠳ ᠢᠶᠠᠷ ᠢᠶᠠᠨ ᠪᠠᠭᠤᠳᠠᠯᠯᠠᠨᠠ᠃ ᠳ᠋ᠠᠨᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠠᠮᠢᠱᠠᠳᠠᠢ ᠶᠢᠨ ᠬᠦᠦ ᠠᠾᠢᠶᠧᠽᠧᠷ ᠪᠥᠭᠡᠳ 26 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠵᠢᠷᠭᠤᠭᠠᠨ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ ᠳᠣᠯᠣᠭᠠᠨ ᠵᠠᠭᠤ ᠶᠤᠮ᠃ 27 ᠲᠡᠭᠦᠨ ᠦ ᠳᠡᠷᠭᠡᠳᠡ ᠠᠱᠧᠷ ᠣᠪᠣᠭ ᠪᠠᠭᠤᠳᠠᠯᠯᠠᠬᠤ ᠪᠣᠯᠣᠨᠠ᠃ ᠠᠱᠧᠷᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠣᠬᠷᠠᠨ ᠤ ᠬᠦᠦ ᠫᠠᠭᠢᠶᠧᠯ ᠪᠥᠭᠡᠳ 28 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠳᠥᠷᠪᠡᠨ ᠲᠦᠮᠡ ᠨᠢᠭᠡᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠶᠤᠮ᠃ 29 ᠳᠡᠷᠭᠡᠳᠡ ᠨᠢ ᠨᠠᠹᠲ᠋ᠠᠯᠢ ᠣᠪᠣᠭ ᠪᠠᠢᠬᠤ ᠶᠣᠰᠣᠲᠠᠢ᠃ ᠨᠠᠹᠲ᠋ᠠᠯᠢᠴᠤᠳ ᠤᠨ ᠤᠳᠤᠷᠢᠳᠤᠭᠴᠢ ᠨᠢ ᠡᠨᠠᠨ ᠤ ᠬᠦᠦ ᠠᠾᠢᠷᠠ ᠪᠥᠭᠡᠳ 30 ᠳᠠᠢᠴᠢᠳ ᠤᠨ ᠲᠣᠭᠠ ᠨᠢ ᠲᠠᠪᠤᠨ ᠲᠦᠮᠡ ᠭᠤᠷᠪᠠᠨ ᠮᠢᠩ᠋ᠭᠠ ᠳᠥᠷᠪᠡᠨ ᠵᠠᠭᠤ ᠶᠤᠮ᠃ 31 ᠲᠡᠢᠨ ᠬᠦ ᠳ᠋ᠠᠨ ᠤ ᠬᠤᠸᠠᠷᠠᠨ ᠤ ᠬᠠᠮᠤᠭ ᠳᠠᠢᠴᠢᠳ ᠤᠨ ᠲᠣᠭᠠ ᠠᠷᠪᠠᠨ ᠲᠠᠪᠤᠨ ᠲᠦᠮᠡ ᠳᠣᠯᠣᠭᠠᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤ᠂ ᠲᠡᠳᠡ ᠰᠡᠭᠦᠯ ᠳᠦ ᠲᠤᠭ ᠤᠨ ᠢᠶᠠᠨ ᠳᠣᠣᠷᠠ ᠬᠥᠳᠡᠯᠬᠦ ᠪᠣᠯᠣᠨᠠ》 ᠭᠡᠯᠡ᠃
32 ᠡᠳᠡ ᠨᠠᠷ ᠪᠣᠯ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠳᠠᠭᠠᠤ ᠲᠣᠭᠠᠯᠠᠭᠤᠯᠤᠭᠰᠠᠨ ᠢᠰᠷᠧᠯᠴᠦᠳ ᠶᠤᠮ᠃ ᠬᠤᠸᠠᠷᠠᠨ ᠳᠤ ᠳᠠᠢᠴᠢᠳ ᠤᠨ ᠪᠠᠭ ᠤᠳ ᠢᠶᠠᠷ ᠢᠶᠠᠨ ᠲᠣᠭᠠᠯᠠᠭᠤᠯᠤᠭᠰᠠᠨ ᠡᠷᠡᠴᠦᠳ ᠪᠦᠭᠦᠳᠡ ᠵᠢᠷᠠᠨ ᠲᠦᠮᠡ ᠭᠤᠷᠪᠠᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤ ᠲᠠᠪᠢ ᠪᠠᠢᠪᠠ᠃ 33 ᠬᠠᠷᠢᠨ ᠯᠧᠸᠢᠴᠦᠳ ᠨᠢ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠲᠣᠭᠠᠯᠠᠭᠤᠯᠤᠭᠰᠠᠨ ᠦᠭᠡᠢ᠃ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
34 ᠲᠡᠢᠨ ᠬᠦ ᠢᠰᠷᠧᠯᠴᠦᠳ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠪᠦᠬᠦᠨ ᠦ ᠳᠠᠭᠠᠤ ᠦᠢᠯᠡᠳᠴᠦ᠂ ᠲᠡᠭᠦᠨ ᠦ ᠳᠠᠭᠠᠤ ᠬᠥᠮᠦᠨ ᠪᠣᠯᠭᠠᠨ ᠲᠤᠭ ᠤᠨ ᠢᠶᠠᠨ ᠳᠣᠣᠷᠠ ᠥᠪᠡᠷ ᠦᠨ ᠢᠶᠠᠨ ᠣᠪᠣᠭ᠂ ᠥᠪᠡᠷ ᠦᠨ ᠢᠶᠠᠨ ᠭᠡᠷ ᠪᠦᠯᠢ ᠪᠠᠷ ᠢᠶᠠᠨ ᠪᠠᠭᠤᠳᠠᠯᠯᠠᠵᠤ᠂ ᠲᠡᠭᠦᠨ ᠦ ᠳᠠᠭᠠᠤ ᠬᠥᠳᠡᠯᠦᠨ ᠶᠠᠪᠤᠳᠠᠭ ᠪᠠᠢᠪᠠ᠃