ᠲᠣᠭᠠᠯᠠᠯᠭᠠ ᠭᠤᠴᠢᠨ ᠬᠣᠶᠠᠷ
ᠶᠣᠷᠳᠠᠨ ᠤ ᠵᠡᠭᠦᠨ ᠲᠠᠯᠠ ᠶᠢᠨ ᠣᠪᠣᠭ ᠤᠳ
1 ᠷᠧᠣᠪᠧᠨᠴᠤᠳ ᠪᠣᠯᠣᠨ ᠭᠠᠳ᠋ᠴᠤᠳ ᠮᠠᠰᠢ ᠣᠯᠠᠨ ᠮᠠᠯ ᠰᠦᠷᠦᠭ ᠲᠡᠢ ᠪᠠᠢᠯᠠ᠃ ᠲᠡᠳᠡ ᠬᠠᠷᠠᠬᠤ ᠳᠤ᠂ ᠶᠠᠽᠧᠷ ᠤᠨ ᠨᠤᠲᠤᠭ ᠪᠣᠯᠣᠨ ᠭᠢᠯᠧᠶᠠᠳ᠋ ᠤᠨ ᠨᠤᠲᠤᠭ ᠨᠢ ᠮᠠᠯ ᠰᠦᠷᠦᠭ ᠲᠦ ᠶᠠᠭ ᠰᠠᠢᠬᠠᠨ ᠲᠣᠬᠢᠷᠠᠬᠤ ᠭᠠᠵᠠᠷ ᠪᠠᠢᠪᠠ︕ 2 ᠡᠢᠮᠦ ᠡᠴᠡ ᠲᠡᠳᠡ ᠮᠣᠰᠧ᠂ ᠲᠠᠬᠢᠯᠴᠢ ᠡᠯᠧᠶᠠᠽᠠᠷ ᠪᠣᠯᠣᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠤᠳᠤᠷᠢᠳᠤᠭᠴᠢᠳ ᠲᠤ ᠣᠴᠢᠨ᠄ 3 《ᠠᠲ᠋ᠠᠷᠣᠲ᠂ ᠳ᠋ᠢᠪᠣᠨ᠂ ᠶᠠᠽᠧᠷ᠂ ᠨᠢᠮᠷᠠ᠂ ᠾᠧᠱᠪᠣᠨ᠂ ᠡᠯᠧᠶᠠᠯᠧ᠂ ᠰᠧᠪᠠᠮ᠂ ᠨᠧᠪᠣ ᠪᠣᠯᠣᠨ ᠪᠧᠶᠣᠨ ᠵᠡᠷᠭᠡ 4 ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠡᠮᠦᠨᠡ ᠶᠣᠬᠣᠸᠠ ᠶᠢᠨ ᠡᠵᠡᠯᠡᠭᠰᠡᠨ ᠨᠤᠲᠤᠭ ᠨᠢ ᠮᠠᠯ ᠰᠦᠷᠦᠭ ᠲᠦ ᠲᠣᠬᠢᠷᠠᠬᠤ ᠨᠤᠲᠤᠭ ᠪᠢᠯᠡ᠃ ᠲᠠᠨ ᠤ ᠵᠠᠷᠤᠴᠠ ᠪᠢᠳᠡ ᠮᠠᠯ ᠰᠦᠷᠦᠭ ᠲᠡᠢ᠂ 5 ᠪᠢᠳᠡ ᠲᠠᠨ ᠤ ᠨᠢᠳᠦᠨ ᠳᠦ ᠲᠠᠭᠠᠯᠠᠭᠳᠠᠭᠰᠠᠨ ᠪᠣᠯ᠂ ᠡᠨᠡ ᠨᠤᠲᠤᠭ ᠢ ᠵᠠᠷᠤᠴᠠ ᠪᠢᠳᠡᠨ ᠳᠡᠭᠡᠨ ᠡᠵᠡᠮᠰᠢᠯ ᠪᠣᠯᠭᠠᠨ ᠥᠭᠭᠥᠨᠡ ᠤᠤ︖ ᠪᠢᠳᠡᠨ ᠢ ᠶᠣᠷᠳᠠᠨ ᠭᠣᠣᠯ ᠤᠨ ᠴᠠᠭᠠᠨᠠ ᠪᠦᠦ ᠠᠪᠴᠤ ᠶᠠᠪᠤ》 ᠭᠡᠵᠡᠢ᠃
6 ᠮᠣᠰᠧ ᠭᠠᠳ᠋ᠴᠤᠳ ᠪᠣᠯᠣᠨ ᠷᠧᠣᠪᠧᠨᠴᠤᠳ ᠲᠤ᠄ 《ᠠᠬᠠ ᠳᠡᠭᠦᠦᠰ ᠴᠢᠨᠢ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤᠬᠤ ᠭᠡᠵᠦ ᠪᠠᠢᠲᠠᠯᠠ ᠲᠠ ᠨᠠᠷ ᠡ᠊ᠨᠳᠡ ᠰᠠᠭᠤᠨᠠ ᠭᠡᠵᠢ ᠤᠤ︖ 7 ᠲᠠ ᠨᠠᠷ ᠶᠠᠭᠤᠨ ᠳᠤ ᠶᠣᠬᠣᠸᠠ ᠶᠢᠨ ᠥᠭᠭᠥᠭᠰᠡᠨ ᠨᠤᠲᠤᠭ ᠤᠷᠤᠭᠤ ᠭᠠᠲᠤᠯᠤᠨ ᠣᠴᠢᠬᠤ ᠭᠡᠵᠦ ᠪᠤᠢ ᠢᠰᠷᠧᠯᠴᠦᠳ ᠦᠨ ᠵᠢᠷᠦᠬᠡ ᠶᠢ ᠮᠣᠬᠣᠭᠠᠨᠠ ᠪᠤᠢ︖ 8 ᠲᠠᠨ ᠤ ᠡᠴᠢᠭᠡᠴᠦᠦᠯ ᠴᠤ ᠲᠡᠭᠡᠭᠰᠡᠨ᠃ ᠲᠡᠷᠡ ᠭᠠᠵᠠᠷ ᠢ ᠲᠠᠩᠨᠠᠭᠤᠯᠬᠤ ᠪᠠᠷ ᠺᠠᠳᠧᠱ ᠪᠠᠷᠨᠧᠶᠠ ᠠᠴᠠ ᠲᠡᠳᠡᠨ ᠢ ᠶᠠᠪᠤᠭᠤᠯᠬᠤ ᠳᠤ᠂ 9 ᠲᠡᠳᠡ ᠡᠱᠺᠣᠯ ᠤᠨ ᠬᠥᠨᠳᠡᠢ ᠬᠦᠷᠲᠡᠯᠡ ᠶᠠᠪᠤᠵᠤ ᠲᠡᠷᠡ ᠨᠤᠲᠤᠭ ᠢ ᠦᠵᠡᠭᠰᠡᠨ ᠦ ᠪᠠᠨ ᠳᠠᠷᠠᠭᠠ᠂ ᠢᠰᠷᠧᠯᠴᠦᠳ ᠦᠨ ᠵᠢᠷᠦᠬᠡ ᠶᠢ ᠮᠣᠬᠣᠭᠠᠭᠰᠠᠨ ᠢᠶᠠᠷ ᠲᠡᠳᠡ ᠶᠣᠬᠣᠸᠠ ᠶᠢᠨ ᠥᠭᠭᠥᠭᠰᠡᠨ ᠨᠤᠲᠤᠭ ᠲᠤ ᠣᠷᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠢᠯᠡ᠃ 10 ᠲᠡᠷᠡ ᠦᠶᠡ ᠳᠦ ᠶᠣᠬᠣᠸᠠ ᠠᠭᠤᠷᠯᠠᠵᠤ ᠲᠠᠩ᠋ᠭᠠᠷᠢᠭᠯᠠᠨ᠄ 11 〈ᠨᠠᠮᠠᠶᠢ ᠪᠦᠷᠢᠨ ᠳᠠᠭᠠᠭᠠ ᠦᠭᠡᠢ ᠲᠤᠯᠠ ᠶᠧᠵᠢᠫᠲ ᠡᠴᠡ ᠭᠠᠷᠴᠤ ᠢᠷᠡᠭᠰᠡᠨ ᠬᠥᠮᠦᠰ ᠦᠨ ᠳᠣᠲᠣᠷᠠᠬᠢ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠬᠥᠮᠦᠰ ᠮᠢᠨᠦ ᠠᠪᠷᠠᠬᠠᠮ᠂ ᠢᠰᠠᠺ᠂ ᠶᠠᠺᠣᠪ ᠲᠤ ᠠᠮᠠᠯᠠᠭᠰᠠᠨ ᠲᠡᠷᠡ ᠨᠤᠲᠤᠭ ᠢ ᠬᠠᠷᠠᠬᠤ ᠦᠭᠡᠢ᠂ 12 ᠬᠠᠷᠢᠨ ᠺᠧᠨᠢᠽ ᠬᠥᠮᠦᠨ ᠶᠧᠹᠦ᠋ᠨᠧ ᠶᠢᠨ ᠬᠦᠦ ᠺᠠᠯᠧᠪ᠂ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠯᠠ ᠶᠣᠬᠣᠸᠠ ᠶᠢ ᠪᠦᠷᠢᠨ ᠳᠠᠭᠠᠭᠰᠠᠨ ᠤᠴᠢᠷ ᠠᠴᠠ ᠬᠠᠷᠠᠬᠤ ᠪᠣᠯᠣᠨᠠ〉 ᠭᠡᠰᠡᠨ᠃ 13 ᠲᠡᠢᠨ ᠬᠦ ᠶᠣᠬᠣᠸᠠ ᠢᠰᠷᠧᠯ ᠳᠤ ᠠᠭᠤᠷᠯᠠᠵᠤ᠂ ᠥᠪᠡᠷ ᠦᠨ ᠬᠢᠨᠢ ᠮᠡᠯᠮᠡᠢ ᠳᠦ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠦᠶᠡ ᠶᠢᠨ ᠬᠢᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠤᠰᠠᠳᠬᠤ ᠬᠦᠷᠲᠡᠯᠡ ᠲᠡᠳᠡᠨ ᠢ ᠴᠥᠯ ᠳᠤ ᠳᠥᠴᠢᠨ ᠵᠢᠯ ᠲᠡᠨᠦᠭᠦᠴᠢᠯᠡᠭᠦᠯᠦᠭᠰᠡᠨ ᠶᠤᠮ᠃ 14 ᠣᠳᠣ ᠨᠢᠭᠦᠯᠲᠦ ᠬᠥᠮᠦᠰ ᠦᠨ ᠦᠷᠡ ᠤᠳᠤᠮ ᠲᠠ ᠨᠠᠷ ᠡᠴᠢᠭᠡᠴᠦᠦᠯ ᠦᠨ ᠢᠶᠠᠨ ᠬᠣᠢᠨᠠ ᠠᠴᠠ ᠣᠷᠣᠭᠰᠠᠨ ᠪᠠᠢᠨᠠ︕ ᠡᠢᠨ ᠬᠦ ᠲᠠ ᠨᠠᠷ ᠢᠰᠷᠧᠯ ᠤᠨ ᠡᠰᠡᠷᠭᠦ ᠰᠢᠲᠠᠵᠤ ᠪᠤᠢ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠢ ᠤᠯᠠᠮ ᠶᠡᠬᠡ ᠪᠡᠷ ᠰᠢᠷᠦᠭᠦᠰᠭᠡᠵᠦ ᠪᠠᠢᠨᠠ᠃ 15 ᠬᠡᠷᠪᠡ ᠲᠠ ᠨᠠᠷ ᠲᠡᠭᠦᠨ ᠢ ᠳᠠᠭᠠᠬᠤ ᠠᠴᠠ ᠡᠷᠭᠢᠪᠡᠯ᠂ ᠲᠡᠷᠡ ᠳᠠᠬᠢᠨ ᠡᠨᠡ ᠪᠦᠬᠦ ᠠᠷᠠᠳ ᠲᠦᠮᠡᠨ ᠢ ᠴᠥᠯ ᠳᠤ ᠬᠠᠶᠠᠬᠤ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡ ᠲᠠ ᠨᠠᠷ ᠤᠨ ᠤᠯᠠᠮ ᠢᠶᠠᠷ ᠤᠰᠠᠳᠬᠤ ᠪᠣᠯᠣᠨᠠ》 ᠭᠡᠯᠡ᠃
16 ᠲᠡᠳᠡ ᠮᠣᠰᠧ ᠤᠷᠤᠭᠤ ᠳᠥᠭᠥᠨ ᠢᠷᠡᠵᠦ᠄ 《ᠪᠢᠳᠡ ᠡ᠊ᠨᠳᠡ ᠵᠥᠪᠬᠡᠨ ᠮᠠᠯ ᠰᠦᠷᠦᠭ ᠲᠡᠭᠡᠨ ᠬᠠᠰᠢᠶᠠ ᠪᠠᠷᠢᠵᠤ᠂ ᠪᠠᠭᠠᠴᠤᠳ ᠲᠠᠭᠠᠨ ᠬᠣᠲᠠ ᠪᠣᠰᠬᠠᠨᠠ᠃ 17 ᠡᠭᠦᠨ ᠦ ᠳᠠᠷᠠᠭᠠ ᠪᠢᠳᠡ ᠵᠡᠪᠰᠡᠭᠯᠡᠵᠦ᠂ ᠢᠰᠷᠧᠯᠴᠦᠳ ᠦᠨ ᠲᠦᠷᠦᠭᠦᠨ ᠳᠦ ᠶᠠᠪᠤᠬᠤ ᠳᠤ ᠪᠡᠯᠡᠨ ᠪᠠᠢᠬᠤ ᠪᠣᠯᠣᠨᠠ᠃ ᠬᠠᠷᠢᠨ ᠪᠢᠳᠡ ᠢᠰᠷᠧᠯᠴᠦᠳ ᠢ ᠰᠠᠭᠤᠬᠤ ᠭᠠᠵᠠᠷ ᠲᠤᠨᠢ ᠠᠪᠠᠴᠢᠬᠤ ᠬᠦᠷᠲᠡᠯᠡ᠂ ᠡᠨᠡ ᠨᠤᠲᠤᠭ ᠤᠨ ᠤᠤᠭᠠᠯᠢ ᠬᠥᠮᠦᠰ ᠦᠨ ᠳᠤᠮᠳᠠ ᠮᠠᠨ ᠤ ᠪᠠᠭᠠᠴᠤᠳ ᠪᠡᠬᠢᠯᠡᠭᠳᠡᠭᠰᠡᠨ ᠬᠣᠲᠠ ᠶᠢᠨ ᠳᠣᠲᠣᠷᠠ ᠰᠠᠭᠤᠬᠤ ᠪᠣᠯᠣᠨᠠ᠃ 18 ᠢᠰᠷᠧᠯ ᠤᠨ ᠬᠥᠮᠦᠨ ᠪᠦᠷᠢ ᠥᠪ ᠢᠶᠡᠨ ᠡᠵᠡᠮᠰᠢᠲᠡᠯᠡ ᠪᠢᠳᠡ ᠭᠡᠷ ᠣᠷᠣᠨ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠴᠤ ᠦᠭᠡᠢ᠂ 19 ᠶᠣᠷᠳᠠᠨ ᠤ ᠨᠥᠭᠥᠭᠡ ᠲᠠᠯᠠ ᠳᠤ ᠲᠡᠳᠡᠨ ᠲᠡᠢ ᠬᠠᠮᠲᠤ ᠥᠪ ᠡᠵᠡᠮᠰᠢᠬᠦ ᠴᠤ ᠦᠭᠡᠢ᠃ ᠤᠴᠢᠷ ᠨᠢ ᠪᠢᠳᠡᠨ ᠳᠦ ᠨᠣᠭᠳᠠᠭᠰᠠᠨ ᠥᠪ ᠶᠣᠷᠳᠠᠨ ᠤ ᠨᠠᠭᠠᠳᠤ ᠲᠠᠯᠠ᠂ ᠨᠠᠷᠠ ᠮᠠᠨᠳᠤᠬᠤ ᠳᠣᠷᠣᠨᠠ ᠵᠦᠭ ᠲᠦ ᠪᠠᠢᠬᠤ ᠶᠤᠮ》 ᠭᠡᠯᠡ᠃
20 ᠮᠣᠰᠧ ᠲᠡᠳᠡᠨ ᠳᠦ᠄ 《ᠬᠡᠷᠪᠡ ᠲᠠ ᠨᠠᠷ ᠲᠡᠢᠨ ᠬᠦ ᠦᠢᠯᠡᠳᠦᠨ᠂ ᠳᠠᠢᠨ ᠳᠤ ᠶᠠᠪᠤᠬᠤ ᠪᠠᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠵᠡᠪᠰᠡᠭᠯᠡᠵᠦ᠂ 21 ᠲᠠᠨ ᠤ ᠵᠡᠪᠰᠡᠭᠯᠡᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠶᠣᠷᠳᠠᠨ ᠢ ᠭᠠᠲᠤᠯᠤᠨ ᠶᠠᠪᠤᠵᠤ᠂ ᠶᠣᠬᠣᠸᠠ ᠳᠠᠢᠰᠤᠨ ᠨᠤᠭᠤᠳ ᠢᠶᠠᠨ ᠡᠮᠦᠨᠡ ᠡᠴᠡ ᠪᠡᠨ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠬᠤ ᠬᠦᠷᠲᠡᠯᠡ᠂ 22 ᠶᠣᠬᠣᠸᠠ ᠳᠤ ᠲᠡᠷᠡ ᠨᠤᠲᠤᠭ ᠵᠠᠬᠢᠷᠤᠭᠳᠠᠬᠤ ᠬᠦᠷᠲᠡᠯᠡ ᠳᠠᠢᠲᠤᠪᠠᠯ᠂ ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠴᠤ᠂ ᠢᠰᠷᠧᠯ ᠤᠨ ᠡᠮᠦᠨᠡ ᠴᠤ ᠭᠡᠮ ᠪᠤᠷᠤᠭᠤ ᠦᠭᠡᠢ ᠪᠠᠷ ᠪᠤᠴᠠᠵᠤ ᠢᠷᠡᠬᠦ ᠪᠥᠭᠡᠳ ᠡᠨᠡ ᠨᠤᠲᠤᠭ ᠴᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠠ ᠨᠠᠷ ᠤᠨ ᠡᠵᠡᠮᠰᠢᠯ ᠪᠣᠯᠣᠨᠠ᠃ 23 ᠭᠡᠪᠡᠴᠦ ᠲᠠ ᠨᠠᠷ ᠢᠩᠭᠢᠬᠦ ᠦᠭᠡᠢ ᠪᠣᠯ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠪᠣᠯᠬᠤ ᠪᠥᠭᠡᠳ ᠨᠢᠭᠦᠯ ᠴᠢᠨᠢ ᠲᠠ ᠨᠠᠷ ᠢ ᠣᠯᠵᠤ ᠠᠪᠤᠨᠠ ᠭᠡᠳᠡᠭ ᠢ ᠮᠡᠳᠡᠲᠦᠭᠡᠢ᠃ 24 ᠲᠠ ᠨᠠᠷ ᠪᠠᠭᠠᠴᠤᠳ ᠲᠠᠭᠠᠨ ᠬᠣᠲᠠ ᠪᠣᠰᠬᠠᠵᠤ᠂ ᠮᠠᠯ ᠰᠦᠷᠦᠭ ᠲᠡᠭᠡᠨ ᠬᠠᠰᠢᠶᠠ ᠪᠠᠷᠢᠵᠤ ᠪᠣᠯᠣᠨᠠ᠂ ᠭᠡᠪᠡᠴᠦ ᠠᠮᠠᠯᠠᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯᠬᠦ ᠶᠣᠰᠣᠲᠠᠢ》 ᠭᠡᠪᠡ᠃
25 ᠭᠠᠳ᠋ᠴᠤᠳ ᠪᠠ ᠷᠧᠣᠪᠧᠨᠴᠤᠳ ᠮᠣᠰᠧ ᠳᠤ ᠬᠠᠷᠢᠭᠤᠯᠤᠨ᠄ 《ᠲᠠᠨ ᠤ ᠵᠠᠷᠤᠴᠠ ᠪᠢᠳᠡ ᠡᠵᠡᠨᠲᠡᠨ ᠲᠠᠨ ᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠡᠶᠡᠯᠡᠭᠦᠯᠦᠨᠡ᠃ 26 ᠮᠠᠨ ᠤ ᠡᠬᠡᠨᠡᠷ ᠬᠡᠦᠬᠡᠳ᠂ ᠮᠠᠯ ᠰᠦᠷᠦᠭ ᠪᠦᠭᠦᠳᠡᠭᠡᠷ ᠡ᠊ᠨᠳᠡ ᠭᠢᠯᠧᠶᠠᠳ᠋ ᠤᠨ ᠬᠣᠲᠠ ᠨᠤᠭᠤᠳ ᠲᠤ ᠦᠯᠡᠳᠡᠨᠡ᠃ 27 ᠬᠠᠷᠢᠨ ᠲᠠᠨ ᠤ ᠵᠠᠷᠤᠴᠠ ᠪᠢᠳᠡ ᠡᠵᠡᠨᠲᠡᠨ ᠲᠠᠨ ᠤ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠥᠮᠦᠨ ᠪᠦᠷᠢ ᠳᠠᠢᠨ ᠳᠤ ᠵᠡᠪᠰᠡᠭᠯᠡᠭᠡᠳ ᠭᠠᠲᠤᠯᠤᠨ ᠶᠠᠪᠤᠵᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠳᠠᠢᠲᠤᠶᠠ》 ᠭᠡᠯᠡ᠃
28 ᠡᠢᠮᠦ ᠡᠴᠡ ᠮᠣᠰᠧ ᠲᠡᠳᠡᠨ ᠦ ᠲᠤᠬᠠᠢ ᠲᠠᠬᠢᠯᠴᠢ ᠡᠯᠧᠶᠠᠽᠠᠷ᠂ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠪᠣᠯᠣᠨ ᠢᠰᠷᠧᠯ ᠤᠨ ᠣᠪᠣᠭ᠂ ᠪᠦᠯᠢ ᠶᠢᠨ ᠤᠳᠤᠷᠢᠳᠤᠭᠴᠢᠳ ᠲᠤ ᠲᠤᠰᠢᠶᠠᠯ ᠭᠠᠷᠭᠠᠪᠠ᠃ 29 ᠮᠣᠰᠧ ᠲᠡᠳᠡᠨ ᠳᠦ᠄ 《ᠭᠠᠳ᠋ᠴᠤᠳ ᠪᠣᠯᠣᠨ ᠷᠧᠣᠪᠧᠨᠴᠤᠳ ᠤᠨ ᠬᠥᠮᠦᠨ ᠪᠦᠷᠢ ᠳᠠᠢᠨ ᠳᠤ ᠵᠡᠪᠰᠡᠭᠯᠡᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠶᠣᠷᠳᠠᠨ ᠢ ᠭᠠᠲᠤᠯᠤᠭᠠᠳ ᠲᠡᠷᠡ ᠨᠤᠲᠤᠭ ᠲᠠ ᠨᠠᠷ ᠲᠤ ᠵᠠᠬᠢᠷᠤᠭᠳᠠᠪᠠᠯ᠂ ᠲᠠ ᠨᠠᠷ ᠲᠡᠳᠡᠨ ᠳᠦ ᠭᠢᠯᠧᠶᠠᠳ᠋ ᠤᠨ ᠨᠤᠲᠤᠭ ᠢ ᠡᠵᠡᠮᠰᠢᠯ ᠪᠣᠯᠭᠠᠨ ᠥᠭᠭᠥᠭᠡᠷᠡᠢ᠃ 30 ᠬᠡᠷᠪᠡ ᠲᠡᠳᠡ ᠵᠡᠪᠰᠡᠭᠯᠡᠨ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠭᠠᠲᠤᠯᠬᠤ ᠦᠭᠡᠢ ᠪᠣᠯ᠂ ᠲᠡᠳᠡ ᠺᠠᠨᠠᠨ ᠨᠤᠲᠤᠭ ᠲᠤ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠥᠪ ᠢᠶᠡᠨ ᠬᠦᠷᠲᠡᠬᠦ ᠪᠣᠯᠣᠨᠠ》 ᠭᠡᠪᠡ᠃ 31 ᠭᠠᠳ᠋ᠴᠤᠳ ᠪᠣᠯᠣᠨ ᠷᠧᠣᠪᠧᠨᠴᠤᠳ ᠬᠠᠷᠢᠭᠤᠯᠤᠨ᠄ 《ᠲᠠᠨ ᠤ ᠵᠠᠷᠤᠴᠠ ᠪᠢᠳᠡ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠲᠡᠢᠨ ᠬᠦ ᠦᠢᠯᠡᠳᠬᠦ ᠪᠣᠯᠣᠨᠠ᠃ 32 ᠪᠢᠳᠡ ᠵᠡᠪᠰᠡᠭᠯᠡᠭᠡᠳ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠺᠠᠨᠠᠨ ᠨᠤᠲᠤᠭ ᠤᠷᠤᠭᠤ ᠭᠠᠲᠤᠯᠤᠨ ᠣᠴᠢᠬᠤ ᠪᠣᠯᠣᠨᠠ᠃ ᠭᠡᠪᠡᠴᠦ ᠪᠢᠳᠡᠨ ᠦ ᠡᠵᠡᠮᠰᠢᠬᠦ ᠥᠪ ᠶᠣᠷᠳᠠᠨ ᠤ ᠨᠠᠭᠠᠳᠤ ᠲᠠᠯᠠ ᠳᠤ ᠬᠡᠪ ᠢᠶᠡᠷ ᠢᠶᠠᠨ ᠪᠠᠢᠬᠤ ᠪᠣᠯᠣᠨᠠ》 ᠭᠡᠵᠡᠭᠡᠯᠡ᠃
33 ᠢᠩᠭᠢᠭᠡᠳ ᠮᠣᠰᠧ ᠭᠠᠳ᠋ᠴᠤᠳ᠂ ᠷᠧᠣᠪᠧᠨᠴᠤᠳ ᠪᠣᠯᠣᠨ ᠶᠣᠰᠧᠹ ᠤᠨ ᠬᠦᠦ ᠮᠠᠨᠠᠰᠧ ᠶᠢᠨ ᠣᠪᠣᠭ ᠤᠨ ᠬᠠᠭᠠᠰ ᠲᠤ ᠠᠮᠣᠷᠢᠴᠤᠳ ᠤᠨ ᠬᠠᠭᠠᠨ ᠰᠢᠬᠣᠨ ᠤ ᠬᠠᠭᠠᠨᠴᠢᠯᠠᠯ᠂ ᠮᠥᠨ ᠪᠠᠱᠠᠨ ᠤ ᠬᠠᠭᠠᠨ ᠣᠭ ᠤᠨ ᠬᠠᠭᠠᠨᠴᠢᠯᠠᠯ ᠤᠨ ᠪᠦᠬᠦ ᠨᠤᠲᠤᠭ ᠳᠡᠪᠢᠰᠬᠡᠷ ᠳᠣᠲᠣᠷᠠᠬᠢ ᠬᠣᠲᠠ ᠨᠤᠭᠤᠳ ᠢ ᠬᠣᠲᠠ ᠶᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠭᠠᠵᠠᠷ ᠲᠠᠢ ᠬᠠᠮᠲᠤ ᠥᠭᠴᠡᠢ᠃ 34 ᠭᠠᠳ᠋ᠴᠤᠳ ᠤᠨ ᠪᠣᠰᠬᠠᠭᠰᠠᠨ ᠬᠣᠲᠠ ᠨᠤᠭᠤᠳ ᠨᠢ ᠳ᠋ᠢᠪᠣᠨ᠂ ᠠᠲ᠋ᠠᠷᠣᠲ᠂ ᠠᠷᠣᠶᠧᠷ᠂ 35 ᠠᠲ᠋ᠷᠣᠲ ᠱᠣᠹᠠᠨ᠂ ᠶᠠᠽᠧᠷ᠂ ᠶᠣᠭᠪᠧᠬᠠ᠂ 36 ᠪᠧᠲ ᠨᠢᠮᠷᠠ᠂ ᠪᠧᠲ ᠾᠠᠷᠠᠨ ᠵᠡᠷᠭᠡ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠨᠤᠭᠤᠳ ᠶᠤᠮ᠃ ᠲᠡᠳᠡ ᠮᠠᠯ ᠰᠦᠷᠦᠭ ᠲᠡᠭᠡᠨ ᠴᠤ ᠬᠠᠰᠢᠶᠠ ᠪᠠᠷᠢᠪᠠ᠃ 37 ᠷᠧᠣᠪᠧᠨᠴᠤᠳ ᠤᠨ ᠪᠣᠰᠬᠠᠭᠰᠠᠨ ᠬᠣᠲᠠ ᠨᠤᠭᠤᠳ ᠨᠢ ᠾᠧᠱᠪᠣᠨ᠂ ᠡᠯᠧᠶᠠᠯᠧ᠂ ᠺᠢᠷᠢᠶᠠᠲ᠋ᠠᠢᠮ᠂ 38 ᠨᠧᠪᠣ᠂ ᠪᠠᠯ ᠮᠧᠶᠣᠨ᠂ ᠰᠢᠪᠮᠠ ᠵᠡᠷᠭᠡ ᠶᠤᠮ᠃ ᠬᠣᠵᠢᠮ ᠨᠢ ᠲᠡᠳᠡ ᠡᠳᠡᠭᠡᠷ ᠬᠣᠲᠠ ᠶᠢ ᠪᠣᠰᠬᠠᠭᠰᠠᠨ ᠤ ᠳᠠᠷᠠᠭᠠ᠂ ᠰᠢᠨᠡ ᠨᠡᠷᠡ ᠥᠭᠭᠥᠭᠰᠡᠨ ᠤᠴᠢᠷ ᠠᠴᠠ ᠬᠣᠲᠠ ᠶᠢᠨ ᠨᠡᠷᠡᠰ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠪᠠᠢᠨᠠ᠃ 39 ᠮᠠᠨᠠᠰᠧ ᠶᠢᠨ ᠬᠦᠦ ᠮᠠᠺᠢᠷ ᠤᠨ ᠦᠷᠡ ᠤᠳᠤᠮ ᠭᠢᠯᠧᠶᠠᠳ᠋ ᠤᠷᠤᠭᠤ ᠶᠠᠪᠤᠵᠤ᠂ ᠲᠡᠭᠦᠨ ᠢ ᠡᠵᠡᠯᠡᠨ᠂ ᠲᠡᠨᠳᠡ ᠪᠠᠢᠭᠰᠠᠨ ᠠᠮᠣᠷᠢᠴᠤᠳ ᠢ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠪᠠ᠃ 40 ᠡᠢᠮᠦ ᠡᠴᠡ ᠮᠣᠰᠧ ᠮᠠᠨᠠᠰᠧ ᠶᠢᠨ ᠦᠷᠡ ᠤᠳᠤᠮ ᠮᠠᠺᠢᠷᠴᠤᠳ ᠲᠤ ᠭᠢᠯᠧᠶᠠᠳ᠋ ᠢ ᠥᠭᠭᠥᠭᠰᠡᠨ ᠳᠦ᠂ ᠲᠡᠳᠡ ᠲᠡᠨᠳᠡ ᠰᠠᠭᠤᠷᠢᠰᠢᠪᠠ᠃ 41 ᠮᠠᠨᠠᠰᠧ ᠶᠢᠨ ᠤᠳᠤᠮ ᠶᠠᠢᠷ ᠴᠤ ᠶᠠᠪᠤᠭᠠᠳ ᠲᠡᠨᠳᠡᠬᠢ ᠶᠢᠨ ᠲᠣᠰᠬᠣᠳ ᠢ ᠡᠵᠡᠯᠡᠨ᠂ ᠲᠡᠳᠡᠭᠡᠷ ᠢ ᠬᠠᠸᠣᠲ ᠶᠠᠢᠷ 89 ᠭᠡᠵᠦ ᠨᠡᠷᠡᠯᠡᠪᠡ᠃ 42 ᠮᠥᠨ ᠨᠣᠪᠠ ᠴᠤ ᠶᠠᠪᠤᠵᠤ᠂ ᠺᠧᠨᠠᠲ ᠪᠣᠯᠣᠨ ᠲᠡᠭᠦᠨ ᠦ ᠡᠷᠭᠢᠨ ᠲᠣᠭᠣᠷᠢᠨ ᠳᠠᠬᠢ ᠲᠣᠰᠬᠣᠳ ᠢ ᠡᠵᠡᠯᠡᠭᠡᠳ ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠪᠡᠷ ᠨᠣᠪᠠ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠠᠢᠨᠠ᠃