ᠲᠣᠭᠠᠯᠠᠯᠭᠠ ᠠᠷᠪᠠᠨ ᠨᠠᠢ᠌ᠮᠠ
ᠲᠠᠬᠢᠯᠴᠢᠳ ᠪᠠ ᠯᠧᠸᠢᠴᠦᠳ ᠦᠨ ᠡᠭᠦᠷᠭᠡ
1 ᠶᠣᠬᠣᠸᠠ ᠠᠷᠣᠨ ᠳᠤ ᠠᠢᠯᠠᠳᠤᠨ᠄ 《ᠠᠷᠢᠭᠤᠨ ᠭᠠᠵᠠᠷ ᠤᠨ ᠡᠰᠡᠷᠭᠦ ᠬᠢᠭᠰᠡᠨ ᠭᠡᠮ ᠪᠤᠷᠤᠭᠤ ᠶᠢ ᠴᠢᠨᠦ ᠬᠥᠪᠡᠭᠦᠳ᠂ ᠮᠥᠨ ᠴᠢᠨᠦ ᠡᠴᠢᠭᠡ ᠶᠢᠨ ᠪᠦᠯᠢ ᠴᠢᠮᠠ ᠲᠠᠢ ᠬᠠᠮᠲᠤ ᠡᠭᠦᠷᠦᠨᠡ᠃ ᠬᠠᠷᠢᠨ ᠲᠠᠬᠢᠯᠴᠢ ᠶᠢᠨ ᠦᠢᠯᠡᠴᠢᠯᠡᠯ ᠳᠦ ᠬᠣᠯᠪᠣᠭᠳᠠᠬᠤ ᠭᠡᠮ ᠪᠤᠷᠤᠭᠤ ᠶᠢ ᠴᠢᠨᠦ ᠬᠥᠪᠡᠭᠦᠳ ᠯᠠ ᠴᠢᠮᠠ ᠲᠠᠢ ᠬᠠᠮᠲᠤ ᠡᠭᠦᠷᠦᠨᠡ᠃ 2 ᠡᠢᠮᠦ ᠡᠴᠡ ᠴᠢ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠣᠪᠣᠭ᠂ ᠥᠪᠡᠷ ᠦᠨ ᠴᠢᠨᠢ ᠠᠬᠠ ᠳᠡᠭᠦᠦᠰ ᠪᠣᠯᠬᠤ ᠯᠧᠸᠢ ᠣᠪᠣᠭ ᠤᠨ ᠬᠢᠨ ᠢ ᠬᠠᠵᠠᠭᠤ ᠳᠠᠭᠠᠨ ᠠᠪᠴᠢᠷᠠᠵᠤ ᠥᠪᠡᠷ ᠲᠡᠢ ᠪᠡᠨ ᠬᠠᠮᠲᠤ ᠪᠠᠢᠯᠭᠠᠨ᠂ ᠬᠥᠪᠡᠭᠦᠳ ᠲᠡᠢ ᠪᠡᠨ ᠬᠠᠮᠲᠤ ᠭᠡᠷᠡᠴᠢᠯᠡᠯ ᠦᠨ ᠴᠠᠴᠠᠷ ᠤᠨ ᠡᠮᠦᠨᠡ ᠦᠢᠯᠡᠴᠢᠯᠡᠵᠦ ᠪᠠᠢᠬᠤ ᠳᠠᠭᠠᠨ ᠲᠡᠳᠡᠨ ᠢᠶᠡᠷ ᠲᠤᠰᠠᠯᠠᠭᠤᠯ᠃ 3 ᠲᠡᠳᠡ ᠴᠢᠨᠦ ᠠᠯᠪᠠ ᠪᠣᠯᠣᠨ ᠪᠦᠬᠦ ᠣᠷᠣᠰᠢᠬᠤᠢ ᠶᠢᠨ ᠴᠠᠴᠠᠷ ᠤᠨ ᠠᠯᠪᠠᠨ ᠳᠤ ᠣᠷᠣᠯᠴᠠᠵᠤ ᠪᠣᠯᠣᠨᠠ᠂ ᠭᠡᠪᠡᠴᠦ ᠠᠷᠢᠭᠤᠨ ᠭᠠᠵᠠᠷ ᠤᠨ ᠬᠡᠷᠡᠭᠰᠡᠯ ᠤᠳ ᠪᠤᠶᠤ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠦ ᠣᠢᠷᠠᠲᠤᠵᠤ ᠪᠣᠯᠬᠤ ᠦᠭᠡᠢ᠃ ᠡᠰᠡ ᠪᠥᠭᠡᠰᠦ ᠲᠡᠳᠡ ᠨᠠᠷ ᠴᠤ᠂ ᠲᠠ ᠨᠠᠷ ᠴᠤ ᠦᠬᠦᠬᠦ ᠪᠣᠯᠣᠨᠠ᠃ 4 ᠲᠡᠳᠡ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠵᠤ᠂ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠠᠯᠪᠠ᠂ ᠴᠠᠴᠠᠷ ᠤᠨ ᠠᠯᠢᠪᠠ ᠠᠵᠢᠯ ᠳᠤ ᠣᠷᠣᠯᠴᠠᠵᠤ ᠪᠣᠯᠣᠨᠠ᠂ ᠭᠡᠪᠡᠴᠦ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠲᠠ ᠨᠠᠷ ᠲᠤ ᠣᠢᠷᠠᠲᠤᠵᠤ ᠪᠣᠯᠬᠤ ᠦᠭᠡᠢ᠃ 5 ᠲᠠ ᠨᠠᠷ ᠯᠠ ᠠᠷᠢᠭᠤᠨ ᠭᠠᠵᠠᠷ ᠤᠨ ᠠᠯᠪᠠ ᠪᠣᠯᠣᠨ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠠᠯᠪᠠᠨ ᠳᠤ ᠣᠷᠣᠯᠴᠠᠬᠤ ᠶᠣᠰᠣᠲᠠᠢ᠃ ᠲᠡᠭᠡᠪᠡᠯ ᠢᠰᠷᠧᠯᠴᠦᠳ ᠦᠨ ᠳᠡᠭᠡᠷᠡ ᠠᠭᠤᠷ ᠬᠢᠯᠢᠩ ᠳᠠᠬᠢᠵᠤ ᠪᠠᠭᠤᠬᠤ ᠦᠭᠡᠢ᠃ 6 ᠬᠠᠷᠠ᠂ ᠪᠢ ᠥᠪᠡᠷ ᠢᠶᠡᠨ ᠴᠢᠨᠦ ᠠᠬᠠ ᠳᠡᠭᠦᠦᠰ ᠪᠣᠯᠬᠤ ᠯᠧᠸᠢᠴᠦᠳ ᠢ ᠲᠠ ᠨᠠᠷ ᠲᠤ ᠵᠣᠷᠢᠭᠤᠯᠤᠭᠰᠠᠨ ᠪᠡᠯᠡᠭ ᠪᠣᠯᠭᠠᠨ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠠᠴᠠ ᠠᠪᠤᠭᠰᠠᠨ︕ ᠲᠡᠳᠡ ᠪᠣᠯ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠠᠵᠢᠯ ᠢ ᠬᠢᠬᠦ ᠪᠡᠷ ᠶᠣᠬᠣᠸᠠ ᠳᠤ ᠲᠣᠮᠢᠯᠠᠭᠳᠠᠭᠰᠠᠨ ᠪᠢᠯᠡ᠃ 7 ᠬᠠᠷᠢᠨ ᠴᠢᠨᠦ ᠬᠥᠪᠡᠭᠦᠳ ᠯᠠ ᠴᠢᠮᠠ ᠲᠠᠢ ᠬᠠᠮᠲᠤ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠯᠣᠨ ᠬᠥᠰᠢᠭᠡᠨ ᠦ ᠳᠣᠲᠣᠷᠠᠬᠢ ᠪᠦᠬᠦ ᠵᠦᠢᠯ ᠢ ᠬᠠᠷᠢᠭᠤᠴᠠᠵᠤ᠂ ᠲᠠᠬᠢᠯᠴᠢ ᠶᠢᠨ ᠠᠯᠪᠠ ᠶᠢ ᠭᠦᠢᠴᠡᠳᠬᠡᠬᠦ ᠪᠣᠯᠣᠨᠠ᠃ ᠪᠢ ᠲᠠᠬᠢᠯᠴᠢ ᠶᠢᠨ ᠠᠯᠪᠠ ᠶᠢ ᠲᠠ ᠨᠠᠷ ᠲᠤ ᠯᠠ ᠪᠡᠯᠡᠭ ᠪᠣᠯᠭᠠᠨ ᠰᠣᠶᠣᠷᠬᠠᠨᠠ᠃ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠣᠢᠷᠠᠲᠤᠨ ᠣᠴᠢᠪᠠᠯ ᠦᠬᠦᠬᠦ ᠪᠣᠯᠣᠨᠠ》 ᠭᠡᠵᠡᠢ᠃
8 ᠶᠣᠬᠣᠸᠠ ᠠᠷᠣᠨ ᠳᠤ ᠠᠢᠯᠠᠳᠤᠨ᠄ 《ᠬᠠᠷᠠ᠂ ᠨᠠᠳᠠ ᠳᠤ ᠪᠠᠷᠢᠬᠤ ᠡᠷᠭᠦᠯ ᠤᠳ ᠢ ᠬᠠᠷᠢᠭᠤᠴᠠᠬᠤ ᠡᠭᠦᠷᠭᠡ ᠶᠢ ᠪᠢ ᠴᠢᠮᠠ ᠳᠤ ᠥᠭᠭᠥᠯᠡ᠃ ᠢᠰᠷᠧᠯᠴᠦᠳ ᠦᠨ ᠨᠠᠳᠠ ᠳᠤ ᠥᠭᠬᠦ ᠠᠷᠢᠭᠤᠨ ᠡᠷᠭᠦᠯ ᠤᠳ ᠢ ᠪᠢ ᠪᠦᠭᠦᠳᠡ ᠶᠢ ᠨᠢ ᠴᠢᠮᠠ ᠳᠤ ᠪᠣᠯᠣᠨ ᠴᠢᠨᠦ ᠬᠥᠪᠡᠭᠦᠳ ᠲᠦ ᠠᠷᠢᠭᠤᠨ ᠬᠤᠪᠢ᠂ ᠪᠠᠢᠩ᠋ᠭᠤ ᠶᠢᠨ ᠬᠤᠪᠢ ᠪᠣᠯᠭᠠᠨ ᠥᠭᠭᠥᠨᠡ᠃ 9 ᠭᠠᠯ ᠳᠤ ᠣᠷᠣᠭᠠ ᠦᠭᠡᠢ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠠᠯᠢᠪᠠ ᠡᠷᠭᠦᠯ ᠦᠨ ᠳᠤᠮᠳᠠ ᠠᠴᠠ ᠲᠡᠳᠡᠨ ᠦ ᠨᠠᠳᠠ ᠳᠤ ᠠᠪᠴᠢᠷᠠᠬᠤ ᠪᠦᠬᠦ ᠢᠳᠡᠭᠡᠨ ᠲᠠᠬᠢᠯ᠂ ᠪᠦᠬᠦ ᠨᠢᠭᠦᠯ ᠦᠨ ᠲᠠᠬᠢᠯ᠂ ᠪᠦᠬᠦ ᠭᠡᠮ ᠦᠨ ᠲᠠᠬᠢᠯ ᠵᠡᠷᠭᠡ ᠶᠢᠨ ᠠᠯᠢᠪᠠ ᠡᠷᠭᠦᠯ ᠨᠢ ᠴᠢᠨᠦ ᠬᠤᠪᠢ ᠪᠣᠯᠣᠨᠠ᠃ ᠡᠳᠡᠭᠡᠷ ᠨᠢ ᠴᠢ ᠪᠣᠯᠣᠨ ᠴᠢᠨᠦ ᠬᠥᠪᠡᠭᠦᠳ ᠲᠦ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠣᠯᠬᠣᠷ 10 ᠴᠢ ᠡᠳᠡᠭᠡᠷ ᠢ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠭᠡᠵᠦ ᠦᠵᠡᠭᠡᠳ ᠢᠳᠡᠬᠦ ᠶᠣᠰᠣᠲᠠᠢ᠃ ᠡᠷᠡ ᠬᠦᠢᠰᠦᠲᠡᠨ ᠨᠢ ᠯᠠ ᠡᠳᠡᠭᠡᠷ ᠢ ᠢᠳᠡᠵᠦ ᠪᠣᠯᠣᠨᠠ᠃ ᠡᠳᠡᠭᠡᠷ ᠨᠢ ᠲᠠ ᠨᠠᠷ ᠲᠤ ᠠᠷᠢᠭᠤᠨ ᠶᠤᠮ᠃ 11 ᠪᠠᠰᠠ ᠢᠰᠷᠧᠯᠴᠦᠳ ᠦᠨ ᠳᠠᠯᠠᠯᠵᠤ ᠡᠷᠭᠦᠬᠦ ᠠᠯᠢᠪᠠ ᠬᠠᠨᠳᠢᠪ ᠠᠴᠠ ᠲᠤᠰᠠᠭᠠᠷᠯᠠᠭᠳᠠᠭᠰᠠᠨ ᠬᠤᠪᠢ ᠪᠦᠷᠢ ᠨᠢ ᠴᠢᠨᠦᠬᠢ ᠪᠣᠯᠣᠨᠠ᠃ ᠡᠳᠡᠭᠡᠷ ᠢ ᠪᠢ ᠴᠢᠮᠠ ᠳᠤ ᠪᠣᠯᠣᠨ ᠴᠢᠨᠦ ᠬᠥᠪᠡᠭᠦᠳ᠂ ᠥᠬᠢᠳ ᠲᠤ ᠪᠠᠢᠩ᠋ᠭᠤ ᠶᠢᠨ ᠬᠤᠪᠢ ᠪᠣᠯᠭᠠᠨ ᠥᠭᠭᠥᠭᠰᠡᠨ᠃ ᠴᠢᠨᠦ ᠭᠡᠷ ᠪᠦᠯᠢ ᠶᠢᠨ ᠴᠡᠪᠡᠷ ᠬᠥᠮᠦᠨ ᠪᠣᠯᠭᠠᠨ ᠡᠭᠦᠨ ᠢ ᠢᠳᠡᠵᠦ ᠪᠣᠯᠣᠨᠠ᠃ 12 ᠲᠡᠳᠡᠨ ᠦ ᠶᠣᠬᠣᠸᠠ ᠨᠠᠳᠠ ᠳᠤ ᠪᠠᠷᠢᠬᠤ ᠠᠯᠢᠪᠠ ᠣᠬᠢ ᠰᠠᠢᠨ ᠲᠣᠰᠣ᠂ ᠣᠬᠢ ᠰᠠᠢᠨ ᠦᠵᠦᠮ ᠦᠨ ᠳᠠᠷᠠᠰᠤ ᠪᠣᠯᠣᠨ ᠦᠷᠡ ᠲᠠᠷᠢᠶᠠ ᠵᠡᠷᠭᠡ ᠠᠩ᠋ᠬᠠᠨ ᠤ ᠦᠷᠡ ᠵᠢᠮᠢᠰ ᠢ ᠪᠢ ᠴᠢᠮᠠ ᠳᠤ ᠥᠭᠭᠥᠨᠡ᠃ 13 ᠲᠡᠳᠡᠨ ᠦ ᠭᠠᠵᠠᠷ ᠲᠤ ᠪᠣᠯᠪᠠᠰᠤᠷᠠᠭᠰᠠᠨ ᠠᠩ᠋ᠬᠠᠨ ᠤ ᠦᠷᠡ ᠵᠢᠮᠢᠰ ᠡᠴᠡ ᠶᠣᠬᠣᠸᠠ ᠨᠠᠳᠠ ᠳᠤ ᠠᠪᠴᠢᠷᠠᠬᠤ ᠪᠣᠯᠭᠠᠨ ᠨᠢ ᠴᠢᠨᠦ ᠬᠤᠪᠢ ᠪᠣᠯᠣᠨᠠ᠂ ᠴᠢᠨᠦ ᠭᠡᠷ ᠪᠦᠯᠢ ᠶᠢᠨ ᠴᠡᠪᠡᠷ ᠬᠥᠮᠦᠨ ᠪᠣᠯᠭᠠᠨ ᠡᠳᠡᠭᠡᠷ ᠢ ᠢᠳᠡᠵᠦ ᠪᠣᠯᠣᠨᠠ᠃ 14 ᠢᠰᠷᠧᠯ ᠤᠨ ᠳᠣᠲᠣᠷᠠ ᠨᠠᠳᠠ ᠳᠤ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠵᠦᠢᠯ ᠪᠣᠯᠭᠠᠨ ᠴᠢᠨᠦ ᠬᠤᠪᠢ ᠪᠣᠯᠣᠨᠠ᠃ 15 ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠤᠮᠠᠢ ᠶᠢ ᠨᠡᠭᠡᠭᠡᠭᠴᠢ ᠮᠢᠬᠠᠨ ᠪᠡᠶᠡᠲᠦ ᠪᠣᠯᠭᠠᠨ ᠨᠢ ᠬᠥᠮᠦᠨ ᠮᠠᠯ ᠢᠯᠭᠠᠯ ᠦᠭᠡᠢ ᠪᠦᠭᠦᠳᠡᠭᠡᠷ ᠴᠢᠨᠦ ᠬᠤᠪᠢ ᠪᠣᠯᠣᠨᠠ᠃ ᠭᠡᠬᠦ ᠳᠡᠭᠡᠨ ᠬᠥᠮᠦᠨ ᠦ ᠤᠤᠭᠠᠨ ᠦᠷᠡ ᠶᠢ ᠴᠢ ᠵᠠᠪᠠᠯ ᠵᠣᠯᠢᠨ ᠠᠪᠴᠤ ᠪᠤᠴᠠᠭᠠᠬᠤ ᠪᠥᠭᠡᠳ ᠪᠤᠵᠠᠷ ᠠᠮᠢᠲᠠᠳ ᠤᠨ ᠤᠤᠭᠠᠨ ᠲᠥᠯ ᠢ ᠴᠤ ᠵᠣᠯᠢᠬᠤ ᠶᠣᠰᠣᠲᠠᠢ᠃ 16 ᠬᠡᠷᠪᠡ ᠡᠳᠡᠭᠡᠷ ᠨᠢ ᠨᠢᠭᠡ ᠰᠠᠷᠠ ᠲᠠᠢ ᠪᠣᠯ ᠴᠢ ᠲᠠᠪᠤᠨ ᠮᠥᠩᠭᠥᠨ ᠱᠧᠺᠧᠯ 63 ᠢᠶᠠᠷ ᠲᠡᠭᠦᠨ ᠢ ᠵᠣᠯᠢᠵᠤ ᠪᠤᠴᠠᠭᠠᠵᠤ ᠪᠣᠯᠣᠨᠠ᠃ ᠠᠷᠢᠭᠤᠨ ᠭᠠᠵᠠᠷ ᠤᠨ ᠪᠠᠷᠢᠮᠵᠢᠶᠠ ᠪᠠᠷ ᠨᠢᠭᠡ ᠱᠧᠺᠧᠯ ᠨᠢ ᠬᠣᠷᠢᠨ ᠭᠧᠷᠠ ᠶᠤᠮ᠃ 17 ᠬᠠᠷᠢᠨ ᠦᠬᠡᠷ᠂ ᠬᠣᠨᠢ᠂ ᠡᠰᠡᠪᠡᠯ ᠢᠮᠠᠭᠠᠨ ᠤ ᠤᠤᠭᠠᠨ ᠲᠥᠯ ᠨᠢ ᠠᠷᠢᠭᠤᠨ ᠪᠣᠯᠬᠣᠷ ᠲᠡᠭᠦᠨ ᠢ ᠵᠣᠯᠢᠬᠤ ᠶᠣᠰᠣ ᠦᠭᠡᠢ᠃ ᠡᠳᠡᠭᠡᠷ ᠦᠨ ᠴᠢᠰᠤ ᠶᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠠᠴᠤᠵᠤ᠂ ᠥᠭᠡᠬᠦ ᠶᠢ ᠨᠢ ᠶᠣᠬᠣᠸᠠ ᠳᠤ ᠲᠠᠭᠠᠯᠠᠭᠳᠠᠬᠤ ᠠᠩᠬᠢᠯᠤᠭᠤᠨ ᠦᠨᠦᠷ᠂ ᠭᠠᠯ ᠤᠨ ᠲᠠᠬᠢᠯ ᠪᠣᠯᠭᠠᠨ ᠰᠢᠲᠠᠭᠠ᠃ 18 ᠭᠡᠪᠡᠴᠦ ᠮᠢᠬᠠ ᠨᠢ ᠴᠢᠨᠦ ᠬᠤᠪᠢ ᠪᠣᠯᠣᠨᠠ᠃ ᠡᠨᠡ ᠨᠢ ᠳᠠᠯᠠᠯᠬᠤ ᠡᠷᠭᠦᠯ ᠦᠨ ᠡᠪᠴᠢᠭᠦᠦ ᠴᠤ᠂ ᠪᠠᠷᠠᠭᠤᠨ ᠭᠤᠶᠠ ᠴᠤ ᠴᠢᠨᠦ ᠬᠤᠪᠢ ᠪᠣᠯᠳᠠᠭ ᠲᠠᠢ ᠠᠳᠠᠯᠢ ᠶᠤᠮ᠃ 19 ᠢᠰᠷᠧᠯᠴᠦᠳ ᠦᠨ ᠶᠣᠬᠣᠸᠠ ᠨᠠᠳᠠ ᠳᠤ ᠡᠷᠭᠦᠳᠡᠭ ᠠᠷᠢᠭᠤᠨ ᠡᠷᠭᠦᠯ ᠤᠳ ᠠᠴᠠ ᠲᠤᠰᠠᠭᠠᠷᠯᠠᠭᠳᠠᠭᠰᠠᠨ ᠪᠦᠬᠦᠨ ᠢ ᠪᠢ ᠴᠢᠮᠠ ᠳᠤ ᠪᠣᠯᠣᠨ ᠴᠢᠨᠦ ᠬᠥᠪᠡᠭᠦᠳ ᠥᠬᠢᠳ ᠲᠤ ᠪᠠᠢᠩ᠋ᠭᠤ ᠶᠢᠨ ᠬᠤᠪᠢ ᠪᠣᠯᠭᠠᠨ ᠥᠭᠭᠥᠯᠡ᠃ ᠡᠨᠡ ᠨᠢ ᠴᠢ ᠪᠣᠯᠣᠨ ᠴᠢᠮᠠ ᠲᠠᠢ ᠬᠠᠮᠲᠤ ᠪᠤᠢ ᠦᠷᠡ ᠤᠳᠤᠮ ᠤᠨ ᠴᠢᠨᠢ ᠲᠥᠯᠥᠭᠡᠬᠢ ᠶᠣᠬᠣᠸᠠ ᠮᠢᠨᠦ ᠣᠷᠣᠰᠢᠬᠤᠢ ᠳᠤ ᠢᠮᠠᠭᠲᠠ ᠪᠠᠢᠬᠤ ᠳᠠᠪᠤᠰᠤᠨ ᠭᠡᠷᠡ 64 ᠶᠤᠮ》 ᠭᠡᠪᠡ᠃ 20 ᠶᠣᠬᠣᠸᠠ ᠠᠷᠣᠨ ᠳᠤ ᠠᠢᠯᠠᠳᠤᠨ᠄ 《ᠴᠢᠮᠠ ᠳᠤ ᠲᠡᠳᠡᠨ ᠦ ᠨᠤᠲᠤᠭ ᠲᠤ ᠥᠪ ᠪᠠᠢᠬᠤ ᠦᠭᠡᠢ᠂ ᠲᠡᠳᠡᠨ ᠦ ᠳᠤᠮᠳᠠ ᠬᠤᠪᠢ ᠴᠤ ᠦᠭᠡᠢ᠃ ᠬᠠᠷᠢᠨ ᠪᠢ ᠥᠪᠡᠷ ᠢᠶᠡᠨ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠴᠢᠨᠦ ᠬᠤᠪᠢ᠂ ᠴᠢᠨᠦ ᠥᠪ ᠪᠣᠯᠣᠨᠠ᠃
21 ᠬᠠᠷᠠ᠂ ᠪᠢ ᠢᠰᠷᠧᠯ ᠤᠨ ᠪᠦᠬᠦ ᠠᠷᠪᠠᠨ ᠤ ᠨᠢᠭᠡ ᠶᠢ ᠯᠧᠸᠢᠴᠦᠳ ᠲᠦ ᠥᠪ ᠪᠣᠯᠭᠠᠨ ᠥᠭᠭᠥᠨᠡ᠃ ᠡᠨᠡ ᠨᠢ ᠲᠡᠳᠡᠨ ᠦ ᠦᠢᠯᠡᠴᠢᠯᠡᠯ᠂ ᠲᠤᠬᠠᠢᠯᠠᠪᠠᠯ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠲᠡᠳᠡᠨ ᠦ ᠬᠢᠳᠡᠭ ᠠᠵᠢᠯ ᠤᠨ ᠬᠠᠷᠢᠭᠤ ᠶᠤᠮ᠃ 22 ᠢᠰᠷᠧᠯᠴᠦᠳ ᠣᠳᠣ ᠠᠴᠠ ᠡᠬᠢᠯᠡᠨ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠣᠢᠷᠠᠲᠤᠵᠤ ᠪᠣᠯᠬᠤ ᠦᠭᠡᠢ᠂ ᠡᠰᠡ ᠪᠥᠭᠡᠰᠦ ᠨᠢᠭᠦᠯ ᠢᠶᠡᠨ ᠡᠭᠦᠷᠴᠦ ᠦᠬᠦᠬᠦ ᠪᠣᠯᠣᠨᠠ᠃ 23 ᠭᠠᠭᠴᠠ ᠬᠦ ᠯᠧᠸᠢᠴᠦᠳ ᠯᠠ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠦᠢᠯᠡᠴᠢᠯᠡᠬᠦ ᠪᠥᠭᠡᠳ ᠲᠡᠨᠳᠡ ᠪᠣᠯᠣᠭᠰᠠᠨ ᠭᠡᠮ ᠪᠤᠷᠤᠭᠤ ᠳᠤ ᠬᠠᠷᠢᠭᠤᠴᠠᠯᠭᠠ ᠲᠠᠢ ᠪᠠᠢᠬᠤ ᠪᠣᠯᠣᠨᠠ᠃ ᠡᠨᠡ ᠨᠢ ᠲᠠ ᠨᠠᠷ ᠤᠨ ᠦᠶᠡ ᠶᠢᠨ ᠦᠶᠡ ᠳᠦ ᠰᠠᠬᠢᠬᠤ ᠡᠭᠦᠷᠢᠳᠡ ᠶᠢᠨ ᠵᠢᠷᠤᠮ ᠶᠤᠮ᠃ ᠲᠡᠳᠡ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠥᠪ ᠥᠪᠯᠡᠬᠦ ᠦᠭᠡᠢ᠃ 24 ᠣᠷᠣᠨ ᠳᠤᠨᠢ ᠢᠰᠷᠧᠯᠴᠦᠳ ᠦᠨ ᠶᠣᠬᠣᠸᠠ ᠨᠠᠳᠠ ᠳᠤ ᠡᠷᠭᠦᠳᠡᠭ ᠡᠷᠭᠦᠯ ᠦᠨ ᠠᠷᠪᠠᠨ ᠤ ᠨᠢᠭᠡ ᠶᠢ ᠪᠢ ᠲᠡᠳᠡᠨ ᠦ ᠥᠪ ᠪᠣᠯᠭᠠᠨ ᠥᠭᠬᠦ ᠤᠴᠢᠷ ᠠᠴᠠ ᠪᠢ ᠲᠡᠳᠡᠨ ᠦ ᠲᠤᠬᠠᠢ ᠳᠤ᠄ 〈ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠠᠴᠠ ᠥᠪ ᠥᠪᠯᠡᠬᠦ ᠦᠭᠡᠢ〉 ᠭᠡᠵᠦ ᠬᠡᠯᠡᠭᠰᠡᠨ》 ᠭᠡᠪᠡ᠃
25 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 26 《ᠯᠧᠸᠢᠴᠦᠳ ᠲᠦ ᠵᠠᠬᠢ᠄ ᠮᠢᠨᠦ ᠲᠠ ᠨᠠᠷ ᠲᠤ ᠥᠪ ᠪᠣᠯᠭᠠᠨ ᠥᠭᠬᠦ ᠠᠷᠪᠠᠨ ᠤ ᠨᠢᠭᠡ ᠶᠢ ᠢᠰᠷᠧᠯᠴᠦᠳ ᠡᠴᠡ ᠬᠦᠯᠢᠶᠡᠨ ᠠᠪᠤᠪᠠᠯ᠂ ᠲᠠ ᠨᠠᠷ ᠡᠭᠦᠨ ᠦ ᠪᠠᠨ ᠠᠷᠪᠠᠨ ᠤ ᠨᠢᠭᠡ ᠶᠢ ᠶᠣᠬᠣᠸᠠ ᠳᠤ ᠡᠷᠭᠦᠯ ᠪᠣᠯᠭᠠᠨ ᠡᠷᠭᠦ᠃ 27 ᠲᠠ ᠨᠠᠷ ᠤᠨ ᠡᠷᠭᠦᠯ ᠢ ᠪᠢ ᠦᠲᠦᠷᠮᠡ ᠡᠴᠡ ᠭᠠᠷᠤᠭᠰᠠᠨ ᠦᠷᠡ ᠲᠠᠷᠢᠶᠠ᠂ ᠦᠵᠦᠮ ᠦᠨ ᠳᠠᠷᠠᠰᠤᠨ ᠤ ᠰᠢᠬᠠᠭᠤᠷᠭᠠ ᠠᠴᠠ ᠭᠠᠷᠤᠭᠰᠠᠨ ᠳᠡᠭᠡᠵᠢ 65 ᠳᠤ ᠲᠣᠭᠠᠴᠠᠬᠤ ᠪᠣᠯᠣᠨᠠ᠃ 28 ᠲᠡᠢᠨ ᠬᠦ ᠲᠠ ᠨᠠᠷ ᠴᠤ ᠢᠰᠷᠧᠯᠴᠦᠳ ᠡᠴᠡ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠠᠷᠪᠠᠨ ᠤ ᠨᠢᠭᠡ ᠪᠦᠷᠢ ᠡᠴᠡ ᠪᠡᠨ ᠶᠣᠬᠣᠸᠠ ᠳᠤ ᠡᠷᠭᠦᠯ ᠡᠷᠭᠦ᠃ ᠡᠳᠡᠭᠡᠷ ᠠᠷᠪᠠᠨ ᠤ ᠨᠢᠭᠡ ᠡᠴᠡ ᠶᠣᠬᠣᠸᠠ ᠶᠢᠨ ᠬᠤᠪᠢ ᠶᠢ ᠲᠠᠬᠢᠯᠴᠢ ᠠᠷᠣᠨ ᠳᠤ ᠥᠭ᠃ 29 ᠲᠠ ᠨᠠᠷ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠪᠦᠬᠦᠨ ᠡᠴᠡ ᠪᠡᠨ ᠳᠡᠭᠡᠵᠢ᠂ ᠬᠠᠮᠤᠭ ᠤᠨ ᠠᠷᠢᠭᠤᠨ ᠢ ᠨᠢ ᠶᠣᠬᠣᠸᠠ ᠶᠢᠨ ᠬᠤᠪᠢ ᠪᠣᠯᠭᠠᠵᠤ ᠡᠷᠭᠦᠬᠦ ᠶᠣᠰᠣᠲᠠᠢ᠃ 30 ᠯᠧᠸᠢᠴᠦᠳ ᠲᠦ ᠵᠠᠬᠢ᠄ ᠲᠠ ᠨᠠᠷ ᠳᠡᠭᠡᠵᠢ ᠪᠠᠨ ᠠᠪᠴᠤ ᠡᠷᠭᠦᠪᠡᠯ ᠪᠢ ᠡᠭᠦᠨ ᠢ ᠯᠧᠸᠢᠴᠦᠳ ᠦᠨ ᠦᠲᠦᠷᠮᠡ ᠶᠢᠨ ᠣᠯᠵᠠ᠂ ᠦᠵᠦᠮ ᠦᠨ ᠳᠠᠷᠠᠰᠤᠨ ᠤ ᠰᠢᠬᠠᠭᠤᠷᠭᠠ ᠶᠢᠨ ᠣᠯᠵᠠᠨ ᠳᠤ ᠲᠣᠭᠠᠴᠠᠨᠠ᠃ 31 ᠦᠯᠡᠳᠡᠪᠦᠷᠢ ᠶᠢ ᠨᠢ ᠲᠠ ᠨᠠᠷ ᠪᠣᠯᠣᠨ ᠲᠠᠨ ᠤ ᠭᠡᠷ ᠦᠨ ᠬᠢᠨ ᠬᠠᠮᠢᠭᠠ ᠴᠤ ᠢᠳᠡᠵᠦ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠳᠠᠬᠢ ᠲᠠ ᠨᠠᠷ ᠤᠨ ᠠᠵᠢᠯ ᠤᠨ ᠬᠥᠯᠥᠰᠥ ᠨᠢ ᠡᠨᠡ ᠶᠤᠮ᠃ 32 ᠡᠭᠦᠨ ᠦ ᠳᠡᠭᠡᠵᠢ ᠶᠢ ᠡᠷᠭᠦᠪᠡᠯ᠂ ᠲᠠ ᠨᠠᠷ ᠡᠭᠦᠨ ᠦ ᠤᠯᠠᠮ ᠢᠶᠠᠷ ᠭᠡᠮ ᠨᠢᠭᠦᠯ ᠡᠭᠦᠷᠬᠦ ᠦᠭᠡᠢ᠃ ᠬᠠᠷᠢᠨ ᠢᠰᠷᠧᠯᠴᠦᠳ ᠦᠨ ᠠᠷᠢᠭᠤᠨ ᠡᠷᠭᠦᠯ ᠤᠳ ᠢ ᠪᠤᠵᠠᠷᠯᠠᠵᠤ ᠪᠣᠯᠬᠤ ᠦᠭᠡᠢ᠂ ᠡᠰᠡ ᠪᠥᠭᠡᠰᠦ ᠲᠠ ᠨᠠᠷ ᠦᠬᠦᠬᠦ ᠪᠣᠯᠣᠨᠠ》 ᠭᠡᠯᠡ᠃