ᠶᠣᠨᠠ ᠭᠤᠷᠪᠠ
ᠲᠤᠩ᠋ᠬᠠᠭᠯᠠᠯ᠂ ᠭᠡᠮᠰᠢᠯ
1 ᠶᠣᠬᠣᠸᠠ ᠶᠢᠨ ᠦᠭᠡ ᠶᠣᠨᠠ ᠳᠤ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠢᠷᠡᠵᠦ᠄ 2 《ᠪᠣᠰᠣᠭᠠᠳ ᠶᠡᠬᠡ ᠬᠣᠲᠠ ᠨᠢᠨᠧᠸᠧ ᠤᠷᠤᠭᠤ ᠣᠴᠢᠵᠤ᠂ ᠮᠢᠨᠦ ᠴᠢᠮᠠ ᠳᠤ ᠶᠠᠷᠢᠬᠤ ᠦᠭᠡ ᠶᠢ ᠲᠤᠩ᠋ᠬᠠᠭᠯᠠ》 ᠭᠡᠬᠦ ᠳᠦ᠂ 3 ᠶᠣᠨᠠ ᠪᠣᠰᠴᠤ᠂ ᠶᠣᠬᠣᠸᠠ ᠶᠢᠨ ᠦᠭᠡᠨ ᠦ ᠳᠠᠭᠠᠤ ᠨᠢᠨᠧᠸᠧ ᠤᠷᠤᠭᠤ ᠶᠠᠪᠤᠪᠠ᠃ ᠨᠢᠨᠧᠸᠧ ᠨᠢ ᠭᠤᠷᠪᠠᠨ ᠡᠳᠦᠷ ᠶᠠᠪᠤᠵᠤ ᠲᠤᠭᠤᠯᠬᠤ ᠪᠠᠷ ᠠᠤᠭᠠ ᠲᠣᠮᠣ ᠬᠣᠲᠠ ᠪᠠᠢᠪᠠ᠃ 4 ᠶᠣᠨᠠ ᠬᠣᠲᠠ ᠳᠤ ᠣᠷᠣᠭᠠᠳ ᠨᠢᠭᠡᠯᠬᠡᠨ ᠡᠳᠦᠷ ᠶᠠᠪᠤᠵᠤ᠄ 《ᠳᠥᠴᠢ ᠬᠣᠨᠣᠭ ᠤᠨ ᠳᠠᠷᠠᠭᠠ ᠨᠢᠨᠧᠸᠧ ᠨᠤᠷᠠᠬᠤ ᠪᠣᠯᠣᠨᠠ》 ᠭᠡᠵᠦ ᠲᠤᠩ᠋ᠬᠠᠭᠯᠠᠪᠠ᠃ 5 ᠨᠢᠨᠧᠸᠧ ᠶᠢᠨ ᠬᠢᠨ ᠪᠤᠷᠬᠠᠨ ᠳᠤ ᠢᠲᠡᠭᠡᠵᠡᠭᠡᠪᠡ᠃ ᠲᠡᠳᠡ ᠪᠠᠴᠠᠭ ᠪᠠᠷᠢᠯᠲᠠ ᠶᠢ ᠵᠠᠷᠯᠠᠵᠤ᠂ ᠶᠡᠬᠡ ᠪᠠᠭᠠ ᠦᠭᠡᠢ ᠪᠦᠭᠦᠳᠡᠭᠡᠷ ᠲᠠᠭᠠᠷ ᠨᠥᠮᠥᠷᠴᠡᠢ᠃
6 ᠡᠨᠡ ᠮᠡᠳᠡᠭᠡ ᠨᠢᠨᠧᠸᠧ ᠶᠢᠨ ᠬᠠᠭᠠᠨ ᠳᠤ ᠬᠦᠷᠬᠦ ᠳᠦ᠂ ᠲᠡᠷᠡ ᠪᠡᠷ ᠰᠡᠨᠲᠢ ᠡᠴᠡ ᠪᠡᠨ ᠪᠣᠰᠣᠭᠠᠳ ᠳᠡᠪᠡᠯ ᠢᠶᠡᠨ ᠲᠠᠢᠯᠤᠨ᠂ ᠲᠠᠭᠠᠷ ᠨᠥᠮᠥᠷᠥᠨ ᠦᠨᠡᠰᠦᠨ ᠳᠡᠭᠡᠷᠡ ᠰᠠᠭᠤᠪᠠ᠃ 7 ᠬᠠᠭᠠᠨ ᠥᠪᠡᠷ ᠦᠨ ᠢᠶᠠᠨ ᠪᠣᠯᠣᠨ ᠨᠣᠶᠠᠳ ᠤᠨ ᠢᠶᠠᠨ ᠨᠡᠷᠡ ᠪᠡᠷ ᠨᠢᠨᠧᠸᠧ ᠳᠠᠶᠠᠭᠠᠷ ᠵᠠᠷᠯᠢᠭ ᠭᠠᠷᠭᠠᠨ ᠲᠤᠩ᠋ᠬᠠᠭᠯᠠᠵᠤ᠄ 《ᠬᠥᠮᠦᠨ᠂ ᠠᠮᠢᠲᠠᠨ᠂ ᠦᠬᠡᠷ᠂ ᠬᠣᠨᠢ ᠪᠦᠭᠦᠳᠡᠭᠡᠷ ᠶᠠᠭᠤ ᠴᠤ ᠠᠮᠰᠠᠵᠤ ᠪᠣᠯᠬᠤ ᠦᠭᠡᠢ᠂ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠂ ᠤᠰᠤ ᠤᠤᠭᠤᠵᠤ ᠪᠣᠯᠬᠤ ᠦᠭᠡᠢ᠃ 8 ᠬᠥᠮᠦᠨ ᠠᠮᠢᠲᠠᠨ ᠲᠠᠭᠠᠷ ᠨᠥᠮᠥᠷᠴᠦ᠂ ᠪᠤᠷᠬᠠᠨ ᠢ ᠬᠦᠴᠦᠯᠡᠨ ᠳᠠᠭᠤᠳᠠᠵᠤ᠂ ᠬᠥᠮᠦᠨ ᠪᠣᠯᠭᠠᠨ ᠬᠣᠷᠣᠨ ᠮᠠᠭᠤ ᠵᠠᠮ ᠠᠴᠠ ᠪᠠᠨ᠂ ᠭᠠᠷ ᠤᠨ ᠢᠶᠠᠨ ᠬᠦᠴᠦᠷᠬᠡᠭᠯᠡᠯ ᠡᠴᠡ ᠡᠷᠭᠢᠲᠦᠭᠡᠢ︕ 9 ᠬᠡᠨ ᠮᠡᠳᠡᠬᠦ ᠪᠢᠯᠡ︖ ᠪᠤᠷᠬᠠᠨ ᠰᠠᠨᠠᠭᠠ ᠪᠠᠨ ᠡᠷᠭᠢᠭᠦᠯᠵᠦ᠂ ᠵᠥᠭᠡᠯᠡᠷᠡᠨ᠂ ᠳᠣᠭᠰᠢᠨ ᠬᠢᠯᠢᠩ ᠢᠶᠠᠨ ᠡᠷᠭᠢᠭᠦᠯᠪᠡᠯ ᠪᠢᠳᠡ ᠤᠰᠠᠳᠬᠤ ᠦᠭᠡᠢ ᠮᠠᠭᠠᠳ》 ᠭᠡᠪᠡ᠃
10 ᠪᠤᠷᠬᠠᠨ ᠲᠡᠳᠡᠨ ᠦ ᠦᠢᠯᠡᠰ ᠢ ᠬᠠᠷᠠᠬᠤ ᠳᠤ᠂ ᠲᠡᠳᠡ ᠬᠣᠷᠣᠨ ᠮᠠᠭᠤ ᠵᠠᠮ ᠠᠴᠠ ᠪᠠᠨ ᠡᠷᠭᠢᠭᠰᠡᠨ ᠪᠠᠢᠯᠠ᠃ ᠡᠢᠮᠦ ᠡᠴᠡ ᠪᠤᠷᠬᠠᠨ ᠵᠥᠭᠡᠯᠡᠷᠡᠵᠦ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠯᠭᠠᠬᠤ ᠭᠡᠰᠡᠨ ᠭᠠᠮᠰᠢᠭ ᠢᠶᠠᠨ ᠪᠠᠭᠤᠯᠭᠠᠭᠠ ᠦᠭᠡᠢ᠃