ᠹᠢᠯᠢᠫᠣᠢ ᠬᠣᠶᠠᠷ
ᠾᠷᠢᠰᠲ᠋ᠣᠰ ᠲᠠᠢ ᠨᠢᠭᠡᠳᠦᠨ ᠠᠮᠢᠳᠤᠷᠠᠬᠤ
1 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠲᠤ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠᠬᠢ ᠵᠣᠷᠢᠭᠵᠢᠭᠤᠯᠤᠯ᠂ ᠬᠠᠢᠷᠠ ᠶᠢᠨ ᠲᠠᠢᠪᠤᠰᠢᠷᠠᠯ᠂ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠨᠥᠬᠥᠷᠯᠡᠯ᠂ ᠥᠷᠥ ᠡᠪᠡᠳᠦᠯ ᠪᠠ ᠨᠢᠭᠦᠯᠡᠰᠦᠯ ᠪᠠᠢᠳᠠᠭ ᠪᠣᠯ᠂ 2 ᠲᠠ ᠨᠠᠷ ᠢᠵᠢᠯ ᠰᠠᠨᠠᠭᠠ᠂ ᠢᠵᠢᠯ ᠬᠠᠢᠷᠠ᠂ ᠢᠵᠢᠯ ᠰᠡᠳᠬᠢᠯ ᠲᠠᠢ ᠪᠠᠢᠵᠤ᠂ ᠰᠠᠨᠠᠭᠠ ᠪᠠᠨ ᠨᠢᠭᠡᠳᠭᠡᠭᠡᠳ 3 ᠪᠦᠯᠦᠭᠯᠡᠬᠦ ᠵᠠᠩ ᠢᠶᠠᠷ ᠪᠤᠰᠤ᠂ ᠨᠡᠷᠡᠯᠬᠡᠦ ᠵᠠᠩ ᠢᠶᠠᠷ ᠴᠤ ᠪᠤᠰᠤ᠂ ᠳᠠᠷᠤᠤᠬᠠᠨ ᠢᠶᠠᠷ ᠨᠢᠭᠡ ᠨᠢᠭᠡ ᠪᠡᠨ ᠥᠪᠡᠷᠰᠡᠳ ᠡᠴᠡ ᠪᠡᠨ ᠳᠡᠭᠡᠷᠡ ᠪᠣᠯᠭᠠᠨ ᠦᠵᠡᠵᠦ᠂ 4 ᠬᠥᠮᠦᠨ ᠪᠣᠯᠭᠠᠨ ᠵᠥᠪᠬᠡᠨ ᠥᠪᠡᠷᠰᠡᠳ ᠦᠨ ᠢᠶᠠᠨ ᠶᠠᠪᠤᠳᠠᠯ ᠢ ᠪᠢᠰᠢ᠂ ᠪᠤᠰᠤᠳ ᠤᠨ ᠶᠠᠪᠤᠳᠠᠯ ᠳᠤ ᠴᠤ ᠠᠩ᠋ᠬᠠᠷᠤᠯ ᠲᠠᠯᠪᠢᠨ ᠮᠢᠨᠦ ᠪᠠᠶᠠᠷ ᠬᠥᠷ ᠢ ᠲᠡᠭᠦᠯᠳᠡᠷᠵᠢᠭᠦᠯᠦᠭᠲᠦᠨ᠃ 5 ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠪᠠᠢᠭᠠ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠪᠠᠢᠬᠤ ᠪᠣᠯᠲᠤᠭᠠᠢ᠃ 6 ᠲᠡᠷᠡ ᠪᠤᠷᠬᠠᠨ ᠤ ᠮᠥᠨ ᠴᠢᠨᠠᠷ 3 ᠲᠠᠢ ᠪᠠᠢᠲᠠᠯᠠ ᠪᠠᠨ ᠪᠤᠷᠬᠠᠨ ᠲᠠᠢ ᠰᠠᠴᠠᠭᠤ ᠪᠠᠢᠬᠤ ᠶᠢ ᠰᠠᠨᠠᠭᠠᠷᠬᠠᠭᠰᠠᠨ ᠦᠭᠡᠢ᠂ 7 ᠬᠠᠷᠢᠨ ᠥᠪᠡᠷ ᠢ ᠪᠠᠨ ᠬᠣᠭᠣᠰᠣᠯᠠᠨ ᠵᠠᠷᠤᠴᠠ ᠶᠢᠨ ᠮᠥᠨ ᠴᠢᠨᠠᠷ 4 ᠢ ᠠᠪᠴᠤ᠂ ᠬᠥᠮᠦᠨ ᠲᠡᠢ ᠠᠳᠠᠯᠢ ᠪᠣᠯᠣᠭᠠᠳ ᠬᠥᠮᠦᠨ ᠦ ᠲᠥᠷᠬᠥ ᠲᠠᠢ ᠢᠯᠡᠷᠡᠵᠡᠢ᠃ 8 ᠲᠡᠷᠡ ᠥᠪᠡᠷ ᠢ ᠪᠠᠨ ᠳᠣᠷᠣᠭᠰᠢᠯᠠᠭᠤᠯᠵᠤ᠂ ᠨᠠᠰᠤ ᠪᠠᠷᠠᠲᠠᠯᠠ ᠪᠠᠨ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠭᠰᠠᠭᠠᠷ ᠵᠠᠭᠠᠯᠮᠠᠢ ᠳᠡᠭᠡᠷᠡ ᠨᠥᠭᠴᠢᠵᠡᠢ᠃ 9 ᠲᠡᠢᠮᠦ ᠡᠴᠡ ᠪᠤᠷᠬᠠᠨ ᠲᠡᠭᠦᠨ ᠢ ᠦᠯᠡᠮᠵᠢ ᠶᠡᠬᠡ ᠳᠡᠭᠡᠳᠦᠯᠡᠵᠦ ᠬᠠᠮᠤᠭ ᠨᠡᠷᠡ ᠡᠴᠡ ᠳᠡᠭᠡᠳᠦ ᠨᠡᠷᠡ ᠶᠢ ᠲᠡᠭᠦᠨ ᠳᠦ ᠰᠣᠶᠣᠷᠬᠠᠭᠰᠠᠨ ᠳᠤ᠂ 10 ᠢᠰᠦ᠋ᠰ ᠤᠨ ᠨᠡᠷᠡ ᠳᠦ ᠲᠩᠷᠢ ᠳᠡᠭᠡᠷᠡᠬᠢ᠂ ᠭᠠᠵᠠᠷ ᠳᠡᠭᠡᠷᠡᠬᠢ᠂ ᠭᠠᠵᠠᠷ ᠳᠣᠣᠷᠠᠬᠢ ᠬᠠᠮᠤᠭ ᠡᠪᠦᠳᠦᠭ ᠰᠥᠭᠥᠳᠴᠦ᠂ 11 ᠬᠠᠮᠤᠭ ᠬᠡᠯᠡ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢ ᠡᠵᠡᠨ ᠭᠡᠵᠦ ᠥᠴᠢᠨ᠂ ᠡᠴᠢᠭᠡ ᠪᠤᠷᠬᠠᠨ ᠳᠤ ᠠᠯᠳᠠᠷ ᠰᠤᠤ ᠶᠢ ᠡᠷᠭᠦᠬᠦ ᠪᠣᠯᠣᠯᠠ᠃
12 ᠡᠢᠮᠦ ᠡᠴᠡ ᠬᠠᠢᠷᠠᠲᠤ ᠨᠤᠭᠤᠳ ᠮᠢᠨᠢ᠂ ᠲᠠ ᠨᠠᠷ ᠦᠷᠭᠦᠯᠵᠢ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠭᠰᠠᠨ ᠤ ᠪᠠᠨ ᠠᠳᠠᠯᠢ ᠵᠥᠪᠬᠡᠨ ᠨᠠᠮᠠᠶᠢ ᠪᠠᠢᠬᠤ ᠳᠤ ᠲᠡᠳᠦᠢ ᠦᠭᠡᠢ᠂ ᠡᠳᠦᠭᠡ ᠪᠠᠢᠬᠤ ᠦᠭᠡᠢ ᠪᠠᠢᠬᠤ ᠳᠤ ᠴᠤ ᠨᠡᠩ ᠢᠯᠡᠭᠦᠦ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠷ ᠡᠮᠢᠶᠡᠨ ᠴᠡᠴᠡᠷᠡᠵᠦ ᠥᠪᠡᠷᠰᠡᠳ ᠦᠨ ᠢᠶᠠᠨ ᠠᠪᠤᠷᠠᠯ ᠢ ᠪᠡᠶᠡᠯᠡᠭᠦᠯᠦᠭᠲᠦᠨ᠃ 13 ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠠᠵᠢᠯᠯᠠᠭᠴᠢ ᠪᠤᠷᠬᠠᠨ ᠥᠪᠡᠷ ᠦᠨ ᠢᠶᠠᠨ ᠲᠠᠭᠠᠯᠠᠯ ᠢ ᠲᠠ ᠨᠠᠷ ᠢᠶᠠᠷ ᠡᠷᠡᠮᠡᠯᠵᠡᠭᠦᠯᠦᠨ ᠦᠢᠯᠡᠳᠦᠭᠦᠯᠳᠡᠭ᠌᠃
14 ᠪᠦᠬᠦᠨ ᠢ ᠭᠣᠮᠣᠷᠬᠠᠯ ᠦᠭᠡᠢ᠂ ᠮᠠᠷᠭᠤᠭᠠᠨ ᠦᠭᠡᠢ ᠪᠠᠷ ᠬᠢᠭᠲᠦᠨ᠃ 15 ᠢᠩᠭᠢᠭᠰᠡᠨ ᠢᠶᠡᠷ ᠲᠠ ᠨᠠᠷ ᠭᠡᠮ ᠵᠢᠮ ᠦᠭᠡᠢ᠂ ᠬᠣᠯᠢᠴᠠ ᠦᠭᠡᠢ ᠴᠠᠢᠯᠭᠠᠨ ᠪᠠᠢᠵᠤ᠂ ᠡᠨᠡ ᠬᠦ ᠬᠠᠵᠠᠭᠠᠢ ᠪᠤᠷᠤᠭᠤ ᠦᠶᠡ ᠶᠢᠨ ᠬᠢᠨ ᠤ ᠳᠤᠮᠳᠠ ᠪᠤᠷᠬᠠᠨ ᠤ ᠥ ᠰᠡᠪ ᠦᠭᠡᠢ ᠬᠡᠦᠬᠡᠳ ᠤᠳ ᠪᠣᠯᠣᠭᠠᠳ ᠶᠢᠷᠲᠢᠨᠴᠦ ᠳᠦ ᠣᠳᠣ ᠮᠡᠲᠦ ᠭᠡᠷᠡᠯᠲᠦᠵᠦ᠂ 16 ᠠᠮᠢ ᠶᠢᠨ ᠦᠭᠡ ᠶᠢ ᠢᠯᠡᠷᠬᠡᠶᠢᠯᠡᠬᠦ 5 ᠪᠣᠯᠲᠤᠭᠠᠢ᠃ ᠲᠡᠭᠡᠪᠡᠯ ᠪᠢ ᠬᠣᠭᠣᠰᠣᠨ ᠭᠦᠶᠦᠭᠰᠡᠨ ᠪᠢᠰᠢ᠂ ᠬᠣᠭᠣᠰᠣᠨ ᠵᠦᠳᠡᠷᠡᠭᠰᠡᠨ ᠪᠢᠰᠢ ᠬᠡᠮᠡᠨ ᠾᠷᠢᠰᠲ᠋ᠣᠰ ᠤᠨ ᠡᠳᠦᠷ ᠣᠮᠣᠭᠰᠢᠵᠤ ᠴᠢᠳᠠᠬᠤ ᠪᠣᠯᠣᠨᠠ᠃ 17 ᠬᠠᠷᠢᠨ ᠲᠠ ᠨᠠᠷ ᠤᠨ ᠢᠲᠡᠭᠡᠯ ᠦᠨ ᠲᠠᠬᠢᠯ ᠪᠠ ᠮᠥᠷᠭᠥᠯ ᠦᠨ ᠲᠥᠯᠥᠭᠡ ᠪᠢ ᠰᠠᠴᠤᠯᠢ ᠪᠣᠯᠵᠤ ᠡᠷᠭᠦᠭᠳᠡᠭᠰᠡᠨ ᠴᠤ ᠪᠠᠶᠠᠷᠯᠠᠬᠤ ᠪᠥᠭᠡᠳ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠶᠠᠷᠯᠠᠬᠤ ᠪᠣᠯᠣᠨᠠ᠃ 18 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠴᠤ ᠪᠠᠶᠠᠷᠯᠠ᠂ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠶᠠᠷᠯᠠᠭᠠᠷᠠᠢ᠃
ᠲᠢᠮᠣᠲ᠂ ᠧᠫᠠᠹᠷᠸᠳᠢᠲ ᠤᠨ ᠦᠯᠢᠭᠡᠷ ᠳᠠᠭᠤᠷᠢᠶᠠᠯ
19 ᠲᠠ ᠨᠠᠷ ᠤᠨ ᠪᠠᠢᠳᠠᠯ ᠢ ᠮᠡᠳᠡᠭᠡᠳ ᠤᠷᠮᠠᠰᠢᠬᠤ ᠶᠢᠨ ᠲᠥᠯᠥᠭᠡ ᠲᠢᠮᠣᠲ ᠢ ᠤᠳᠠᠯ ᠦᠭᠡᠢ ᠲᠠᠨ ᠤ ᠲᠡᠨᠳᠡ ᠶᠠᠪᠤᠭᠤᠯᠬᠤ ᠶᠢ ᠪᠢ ᠡᠵᠡᠨ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠬᠦᠰᠡᠵᠦ ᠪᠠᠢᠨᠠ᠃ 20 ᠲᠠ ᠨᠠᠷ ᠤᠨ ᠪᠠᠢᠳᠠᠯ ᠳᠤ ᠰᠡᠳᠬᠢᠯ ᠨᠢᠭᠡᠲᠡᠢ ᠪᠠᠷ ᠦᠨᠡᠨ ᠬᠦ ᠰᠠᠨᠠᠭᠠ ᠲᠠᠯᠪᠢᠳᠠᠭ ᠬᠥᠮᠦᠨ ᠨᠠᠳᠠ ᠳᠤ ᠲᠢᠮᠣᠲ ᠠᠴᠠ ᠥᠭᠡᠷᠡ ᠦᠭᠡᠢ᠃ 21 ᠬᠥᠮᠦᠨ ᠪᠦᠷᠢ ᠬᠤᠪᠢ ᠪᠠᠨ ᠬᠢᠴᠢᠶᠡᠭᠡᠳ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠬᠢ ᠶᠢ ᠬᠢᠴᠢᠶᠡᠳᠡᠭ ᠦᠭᠡᠢ᠃ 22 ᠲᠢᠮᠣᠲ ᠤᠨ ᠨᠡᠷᠡ ᠠᠯᠳᠠᠷ ᠤᠨ ᠲᠤᠬᠠᠢ ᠲᠠ ᠨᠠᠷ ᠰᠠᠢᠨ ᠮᠡᠳᠡᠨᠡ᠂ ᠬᠦᠦ ᠨᠢ ᠡᠴᠢᠭᠡ ᠳᠡᠭᠡᠨ ᠵᠠᠷᠤᠭᠳᠠᠬᠤ ᠰᠢᠭ᠋ ᠢᠶᠠᠷ ᠲᠢᠮᠣᠲ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠲᠥᠯᠥᠭᠡ ᠵᠠᠷᠤᠭᠳᠠᠭᠰᠠᠨ ᠪᠠᠢᠨᠠ᠃ 23 ᠡᠢᠮᠦ ᠡᠴᠡ ᠪᠠᠢᠳᠠᠯ ᠤᠨ ᠢᠶᠠᠨ ᠶᠠᠮᠠᠷ ᠪᠣᠯᠬᠤ ᠶᠢ ᠮᠡᠳᠡᠮᠡᠭᠴᠡ ᠪᠡᠨ ᠪᠢ ᠲᠡᠭᠦᠨ ᠢ ᠢᠯᠡᠭᠡᠬᠦ ᠰᠠᠨᠠᠭᠠ ᠲᠠᠢ᠂ 24 ᠮᠥᠨ ᠪᠡᠶᠡ ᠪᠡᠷ ᠢᠶᠠᠨ ᠴᠤ ᠤᠳᠠᠯ ᠦᠭᠡᠢ ᠣᠴᠢᠨᠠ ᠭᠡᠳᠡᠭ ᠲᠦ ᠡᠵᠡᠨ ᠦ ᠳᠣᠲᠣᠷᠠ ᠢᠲᠡᠭᠡᠯ ᠲᠡᠢ ᠪᠠᠢᠨᠠ᠃
25 ᠲᠡᠷᠡᠴᠢᠯᠡᠨ ᠮᠢᠨᠦ ᠳᠡᠭᠦᠦ᠂ ᠬᠠᠮᠲᠤᠷᠠᠨ ᠠᠵᠢᠯᠯᠠᠭᠴᠢ᠂ ᠬᠠᠮᠲᠤ ᠪᠠᠢᠯᠳᠤᠭᠴᠢ᠂ ᠲᠠ ᠨᠠᠷ ᠤᠨ ᠡᠯᠴᠢ ᠬᠢᠭᠡᠳ ᠮᠢᠨᠦ ᠬᠡᠷᠡᠭᠴᠡᠭᠡ ᠶᠢ ᠬᠠᠩ᠋ᠭᠠᠭᠴᠢ ᠧᠫᠠᠹᠷᠸᠳᠢᠲ ᠢ ᠲᠠ ᠨᠠᠷ ᠤᠷᠤᠭᠤ ᠢᠯᠡᠭᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠨᠠᠳᠠ ᠳᠤ ᠰᠠᠨᠠᠭᠳᠠᠪᠠ᠃ 26 ᠲᠡᠷᠡ ᠲᠠ ᠪᠦᠭᠦᠳᠡ ᠶᠢ ᠰᠠᠨᠠᠭᠠᠯᠵᠠᠭᠰᠠᠭᠠᠷ ᠪᠠᠢᠭᠠ ᠪᠥᠭᠡᠳ ᠡᠪᠡᠳᠴᠢᠯᠡᠭᠰᠡᠨ ᠢ ᠨᠢ ᠲᠠ ᠨᠠᠷ ᠰᠣᠨᠣᠰᠴᠢᠬᠠᠯᠠ ᠭᠡᠳ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠨᠠ᠃ 27 ᠦᠨᠡᠨ ᠳᠡᠭᠡᠨ ᠲᠡᠷᠡ ᠡᠪᠡᠳᠴᠢᠯᠡᠭᠡᠳ ᠦᠬᠦᠬᠦ ᠰᠢᠬᠠᠭᠰᠠᠨ᠂ ᠬᠠᠷᠢᠨ ᠪᠤᠷᠬᠠᠨ ᠲᠡᠭᠦᠨ ᠢ ᠥᠷᠥ ᠡᠪᠡᠳᠴᠡᠢ᠃ ᠲᠡᠭᠦᠨ ᠢᠶᠡᠷ ᠦᠯᠦ ᠪᠠᠷᠠᠮ᠂ ᠨᠠᠮᠠᠶᠢ ᠴᠤ ᠥᠷᠥ ᠡᠪᠡᠳᠦᠭᠰᠡᠨ ᠢᠶᠡᠷ ᠨᠠᠳᠠ ᠳᠤ ᠭᠤᠨᠢᠭ ᠳᠡᠭᠡᠷᠡ ᠭᠤᠨᠢᠭ ᠳᠠᠪᠬᠤᠷᠯᠠᠭᠠ ᠦᠭᠡᠢ ᠶᠤᠮ᠃ 28 ᠪᠢ ᠧᠫᠠᠹᠷᠸᠳᠢᠲ ᠢ ᠠᠷᠠᠢ ᠶᠠᠭᠠᠷᠠᠤ ᠢᠯᠡᠭᠡᠯᠡ᠃ ᠲᠡᠢᠨ ᠬᠦ ᠲᠠ ᠨᠠᠷ ᠲᠡᠭᠦᠨ ᠲᠡᠢ ᠳᠠᠬᠢᠨ ᠠᠭᠤᠯᠵᠠᠵᠤ ᠪᠠᠶᠠᠷᠯᠠᠬᠤ ᠪᠥᠭᠡᠳ ᠮᠢᠨᠦ ᠭᠤᠨᠢᠭ ᠴᠤ ᠬᠥᠩᠭᠡᠷᠡᠬᠦ ᠪᠣᠯᠣᠨᠠ᠃ 29 ᠲᠠ ᠨᠠᠷ ᠡᠵᠡᠨ ᠦ ᠳᠣᠲᠣᠷᠠ ᠲᠡᠭᠦᠨ ᠢ ᠬᠠᠮᠤᠭ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢᠶᠠᠷ ᠬᠦᠯᠢᠶᠡᠨ ᠠᠪ᠂ ᠡᠢᠮᠦᠷᠬᠦ ᠬᠥᠮᠦᠨ ᠢ ᠬᠦᠨᠳᠦᠯᠡᠭᠡᠷᠡᠢ᠃ 30 ᠲᠡᠷᠡ ᠾᠷᠢᠰᠲ᠋ᠣᠰ ᠤᠨ ᠠᠵᠢᠯ ᠤᠨ ᠲᠥᠯᠥᠭᠡ ᠠᠮᠢ ᠪᠠᠨ ᠪᠣᠳᠣᠯ ᠦᠭᠡᠢ ᠪᠠᠷ ᠦᠷᠡᠭᠳᠡᠬᠦ ᠰᠢᠬᠠᠲᠠᠯᠠ ᠪᠠᠨ ᠲᠠ ᠨᠠᠷ ᠢ ᠣᠷᠣᠯᠠᠵᠤ ᠨᠠᠳᠠ ᠳᠤ ᠦᠢᠯᠡᠴᠢᠯᠡᠭᠰᠡᠨ ᠪᠢᠯᠡ᠃