ᠹᠢᠯᠢᠫᠣᠢ ᠭᠤᠷᠪᠠ
ᠬᠣᠭᠣᠰᠣᠨ ᠨᠠᠢᠳᠠᠪᠤᠷᠢ
1 ᠨᠡᠮᠡᠵᠦ ᠬᠡᠯᠡᠶᠡ᠂ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ᠂ ᠡᠵᠡᠨ ᠦ ᠳᠣᠲᠣᠷᠠ ᠪᠠᠶᠠᠷᠯᠠᠭᠠᠷᠠᠢ᠂ ᠠᠳᠠᠯᠢ ᠦᠭᠡ ᠪᠡᠨ ᠳᠠᠪᠲᠠᠨ ᠪᠢᠴᠢᠬᠦ ᠨᠢ ᠮᠢᠨᠦ ᠬᠤᠪᠢ ᠳᠤ ᠶᠠᠷᠰᠢᠭ ᠪᠢᠰᠢ᠂ ᠲᠠ ᠨᠠᠷ ᠤᠨ ᠬᠤᠪᠢ ᠳᠤ ᠴᠤ ᠲᠣᠳᠣᠷᠬᠠᠢ ᠪᠣᠯᠬᠤ ᠶᠤᠮ᠃
2 ᠲᠠ ᠨᠠᠷ 《ᠨᠣᠬᠠᠳ》 ᠡᠴᠡ ᠪᠣᠯᠭᠣᠮᠵᠢᠯᠠ᠂ ᠮᠠᠭᠤ ᠶᠢ ᠦᠢᠯᠡᠳᠦᠭᠴᠢᠳ ᠡᠴᠡ ᠪᠣᠯᠭᠣᠮᠵᠢᠯᠠᠨ᠂ ᠪᠡᠶᠡ ᠳᠡᠭᠡᠷᠡ ᠣᠭᠲᠣᠯᠣᠭᠴᠢᠳ ᠠᠴᠠ ᠪᠣᠯᠭᠣᠮᠵᠢᠯᠠᠭᠲᠤᠨ᠃ 3 ᠪᠤᠷᠬᠠᠨ ᠤ ᠰᠦᠨᠡᠰᠦ ᠳᠣᠲᠣᠷᠠ ᠮᠥᠷᠭᠥᠨ᠂ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠢᠶᠠᠷ ᠪᠠᠬᠠᠷᠬᠠᠵᠤ ᠮᠢᠬᠠᠨ ᠪᠡᠶᠡ ᠳᠦ ᠨᠠᠢᠳᠠᠳᠠᠭ ᠦᠭᠡᠢ ᠪᠢᠳᠡ ᠨᠠᠷ ᠯᠠ ᠵᠢᠩᠬᠢᠨᠢ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠴᠢᠳ ᠮᠥᠨ᠃ 4 ᠬᠠᠷᠢᠨ ᠨᠠᠳᠠ ᠳᠤ ᠴᠤ ᠮᠢᠬᠠᠨ ᠪᠡᠶᠡ ᠳᠡᠭᠡᠨ ᠨᠠᠢᠳᠠᠬᠤ ᠤᠴᠢᠷ ᠪᠤᠢ ᠯᠠ ᠳᠠ᠂ ᠬᠡᠷᠪᠡ ᠪᠤᠰᠤᠳ ᠬᠥᠮᠦᠨ ᠮᠢᠬᠠᠨ ᠪᠡᠶᠡ ᠳᠡᠭᠡᠨ ᠨᠠᠢᠳᠠᠬᠤ ᠤᠴᠢᠷ ᠲᠠᠢ ᠭᠡᠵᠦ ᠦᠵᠡᠳᠡᠭ ᠶᠤᠮ ᠪᠣᠯ᠂ ᠮᠢᠨᠦ ᠬᠤᠪᠢ ᠳᠤ ᠪᠣᠯ ᠪᠦᠷ ᠴᠤ ᠢᠯᠡᠭᠦᠦ ᠶᠤᠮ᠃ 5 ᠪᠢ ᠨᠠᠢ᠌ᠮᠠᠳᠤᠭᠠᠷ ᠡᠳᠦᠷ ᠳᠡᠭᠡᠷᠡ ᠪᠡᠨ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠰᠡᠨ ᠪᠥᠭᠡᠳ ᠢᠰᠷᠧᠯ ᠦᠨᠳᠦᠰᠦᠲᠡᠨ ᠦ ᠪᠢᠨᠶᠠᠮᠢᠨ ᠣᠪᠣᠭ ᠤᠨ ᠬᠢ᠂ ᠢᠪᠷᠠᠢ ᠬᠥᠮᠦᠨ ᠡᠴᠡ ᠲᠥᠷᠥᠭᠰᠡᠨ ᠢᠪᠷᠠᠢ ᠬᠥᠮᠦᠨ ᠪᠥᠭᠡᠳ ᠬᠠᠤᠯᠢ ᠶᠢᠨ ᠬᠤᠪᠢ ᠳᠤ ᠪᠣᠯ ᠹᠠᠷᠢᠰᠠᠢ ᠬᠥᠮᠦᠨ; 6 ᠬᠠᠯᠠᠭᠤᠨ ᠰᠡᠳᠬᠢᠯ ᠤᠨ ᠬᠤᠪᠢ ᠳᠤ ᠴᠢᠭᠤᠯᠭᠠᠨ ᠢ ᠬᠠᠪᠴᠢᠭᠴᠢ; ᠬᠠᠤᠯᠢ ᠶᠢᠨ ᠪᠠᠷᠢᠮᠵᠢᠶᠠ ᠶᠢᠨ ᠬᠤᠪᠢ ᠳᠤ ᠭᠡᠮ ᠵᠢᠮ ᠦᠭᠡᠢ᠃
7 ᠨᠠᠳᠠ ᠳᠤ ᠡᠳᠡᠭᠡᠷ ᠣᠯᠣᠯᠲᠠ ᠪᠠᠢᠭᠰᠠᠨ ᠪᠦᠬᠦᠨ ᠢ ᠾᠷᠢᠰᠲ᠋ᠣᠰ ᠠᠴᠠ ᠪᠣᠯᠵᠤ ᠪᠢ ᠠᠯᠳᠠᠭᠳᠠᠯ ᠭᠡᠵᠦ ᠦᠵᠡᠳᠡᠭ ᠪᠣᠯᠵᠠᠢ᠃ 8 ᠲᠡᠷᠡ ᠴᠤ ᠪᠠᠢᠲᠤᠭᠠᠢ᠂ ᠮᠢᠨᠦ ᠡᠵᠡᠨ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠢ ᠲᠠᠨᠢᠵᠤ ᠮᠡᠳᠡᠬᠦ ᠨᠢ ᠬᠠᠮᠤᠭ ᠤᠨ ᠡᠷᠬᠢᠮ ᠤᠴᠢᠷ ᠠᠴᠠ ᠪᠢ ᠬᠠᠮᠤᠭ ᠶᠠᠭᠤᠮᠠ ᠪᠠᠨ ᠴᠥᠮ ᠠᠯᠳᠠᠭᠳᠠᠯ ᠭᠡᠵᠦ ᠦᠵᠡᠳᠡᠭ᠃ ᠾᠷᠢᠰᠲ᠋ᠣᠰ ᠠᠴᠠ ᠪᠣᠯᠵᠤ ᠪᠢ ᠪᠦᠬᠦᠨ ᠢᠶᠡᠨ ᠠᠯᠳᠠᠵᠤ᠂ ᠲᠡᠳᠡᠭᠡᠷ ᠢ ᠬᠣᠭ ᠭᠡᠵᠦ ᠦᠵᠡᠳᠡᠭ ᠨᠢ ᠾᠷᠢᠰᠲ᠋ᠣᠰ ᠢ ᠣᠯᠵᠤ᠂ 9 ᠲᠡᠭᠦᠨ ᠦ ᠳᠣᠲᠣᠷᠠ ᠣᠯᠳᠠᠭᠳᠠᠬᠤ ᠭᠡᠰᠡᠨ ᠳᠡᠭᠡᠨ ᠶᠤᠮ᠃ ᠪᠢ ᠡᠢᠮᠦᠷᠬᠦ ᠵᠥᠪᠲᠦ ᠶᠢ ᠥᠪᠡᠷ ᠢᠶᠡᠨ ᠬᠠᠤᠯᠢ ᠡᠴᠡ ᠣᠯᠣᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠾᠷᠢᠰᠲ᠋ᠣᠰ ᠲᠤ ᠢᠲᠡᠭᠡᠭᠰᠡᠨ ᠢᠶᠡᠷ᠂ ᠲᠤᠬᠠᠢᠯᠠᠪᠠᠯ ᠢᠲᠡᠭᠡᠯ ᠢᠶᠡᠷ ᠢᠶᠠᠨ ᠪᠤᠷᠬᠠᠨ ᠠᠴᠠ ᠣᠯᠣᠭᠰᠠᠨ ᠶᠤᠮ᠃ 10 ᠡᠢᠮᠦ ᠡᠴᠡ ᠮᠢᠨᠦ ᠵᠣᠷᠢᠯᠭᠠ ᠪᠣᠯ ᠾᠷᠢᠰᠲ᠋ᠣᠰ ᠪᠠ ᠲᠡᠭᠦᠨ ᠦ ᠠᠮᠢᠯᠠᠯᠲᠠ ᠶᠢᠨ ᠬᠦᠴᠦ ᠶᠢ ᠲᠠᠨᠢᠬᠤ᠂ ᠲᠡᠭᠦᠨ ᠦ ᠵᠣᠪᠠᠯᠠᠩ ᠠᠴᠠ ᠬᠤᠪᠢᠶᠠᠯᠴᠠᠬᠤ᠂ ᠲᠡᠭᠦᠨ ᠦ ᠦᠬᠦᠯ ᠢ ᠳᠠᠭᠤᠷᠢᠶᠠᠬᠤ ᠶᠢ ᠮᠡᠳᠡᠵᠦ᠂ 11 ᠵᠠᠪᠠᠯ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠯ ᠳᠤ ᠬᠦᠷᠬᠦ ᠶᠠᠪᠤᠳᠠᠯ ᠪᠣᠯᠣᠨᠠ᠃
ᠬᠠᠮᠤᠭ ᠤᠨ ᠥᠨᠳᠥᠷ ᠬᠠᠷᠠᠯᠲᠠ
12 ᠪᠢ ᠡᠳᠡᠭᠡᠷ ᠢ ᠣᠯᠴᠢᠬᠠᠭᠰᠠᠨ ᠪᠢᠰᠢ᠂ ᠥᠪᠡᠷ ᠢᠶᠡᠨ ᠲᠡᠭᠦᠰ ᠪᠣᠯᠴᠢᠬᠠᠭᠰᠠᠨ ᠴᠤ ᠪᠢᠰᠢ᠂ ᠬᠠᠷᠢᠨ ᠡᠳᠡᠭᠡᠷ ᠢ ᠣᠯᠣᠭᠤᠯᠬᠤ ᠪᠠᠷ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠨᠠᠮᠠᠶᠢ ᠣᠯᠵᠤ ᠠᠪᠤᠭᠰᠠᠨ ᠲᠤᠯᠠ ᠪᠢ ᠴᠤ ᠣᠯᠵᠤ ᠠᠪᠬᠤ ᠪᠠᠷ ᠬᠥᠭᠡᠭᠡᠴᠡᠯᠳᠦᠵᠦ ᠪᠠᠢᠨᠠ᠃ 13 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢ ᠣᠯᠣᠭᠠᠳ ᠠᠪᠴᠢᠬᠠᠭᠰᠠᠨ ᠭᠡᠵᠦ ᠪᠣᠳᠣᠬᠤ ᠦᠭᠡᠢ᠂ ᠬᠠᠷᠢᠨ ᠨᠢᠭᠡ ᠶᠢ ᠯᠠ ᠪᠡᠶᠡᠯᠡᠭᠦᠯᠵᠦ ᠪᠠᠢᠨᠠ᠃ ᠲᠤᠬᠠᠢᠯᠠᠪᠠᠯ᠂ ᠠᠷᠤ ᠳᠠᠬᠢ ᠪᠠᠨ ᠮᠠᠷᠲᠠᠵᠤ ᠡᠮᠦᠨᠡᠰᠢ ᠪᠠᠨ ᠲᠡᠮᠡᠦᠯᠳᠡᠭ ᠪᠥᠭᠡᠳ 14 ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠢᠶᠠᠷ ᠳᠠᠮᠵᠢᠨ ᠳᠡᠭᠡᠭᠰᠢ ᠪᠠᠨ ᠳᠠᠭᠤᠳᠠᠭᠴᠢ ᠪᠤᠷᠬᠠᠨ ᠤ ᠱᠠᠩᠨᠠᠯ ᠢ ᠬᠦᠷᠲᠡᠬᠦ ᠪᠡᠷ ᠪᠠᠷᠢᠶᠠ ᠲᠡᠰᠢ ᠭᠦᠶᠦᠵᠦ ᠪᠠᠢᠨᠠ᠃ 15 ᠲᠥᠯᠥᠪᠰᠢᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠢᠩᠭᠢᠵᠦ ᠪᠣᠳᠣᠭᠠᠰᠠᠢ᠃ ᠬᠡᠷᠪᠡ ᠲᠠ ᠨᠠᠷ ᠶᠠᠮᠠᠷ ᠨᠢᠭᠡ ᠲᠠᠯᠠ ᠪᠠᠷ ᠥᠭᠡᠷᠡ ᠪᠣᠳᠣᠯ ᠲᠠᠢ ᠪᠠᠢᠭᠰᠠᠨ ᠴᠤ ᠪᠤᠷᠬᠠᠨ ᠮᠥᠨ ᠶᠠᠭᠠᠬᠢᠵᠤ ᠪᠣᠳᠣᠬᠤ ᠶᠣᠰᠣᠲᠠᠢ ᠶᠢ ᠲᠠ ᠨᠠᠷ ᠲᠤ ᠢᠯᠡᠷᠬᠡᠶᠢᠯᠡᠬᠦ ᠪᠣᠯᠣᠨᠠ᠃ 16 ᠪᠢᠳᠡ ᠶᠠᠮᠠᠷ ᠲᠦᠪᠰᠢᠨ ᠳᠤ ᠬᠦᠷᠦᠭᠰᠡᠨ ᠪᠣᠯ ᠲᠡᠷᠡ ᠶᠣᠰᠣᠭᠠᠷ ᠢᠶᠠᠨ ᠯᠠ ᠶᠠᠪᠤᠵᠠᠭᠠᠶᠠ᠃
17 ᠨᠠᠮᠠᠶᠢ ᠳᠠᠭᠤᠷᠢᠶᠠᠭᠠᠷᠠᠢ᠂ ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠮᠥᠨ ᠲᠠ ᠨᠠᠷ ᠲᠤ ᠦᠵᠡᠭᠦᠯᠦᠭᠰᠡᠨ ᠪᠢᠳᠡᠨ ᠦ ᠦᠯᠢᠭᠡᠷ ᠵᠢᠱᠢᠶᠡ ᠶᠣᠰᠣᠭᠠᠷ ᠶᠠᠪᠤᠳᠠᠭ ᠬᠥᠮᠦᠰ ᠢ ᠠᠩ᠋ᠬᠠᠷᠤᠭᠲᠤᠨ᠃ 18 ᠤᠴᠢᠷ ᠨᠢ᠂ ᠣᠯᠠᠨ ᠬᠥᠮᠦᠨ ᠾᠷᠢᠰᠲ᠋ᠣᠰ ᠤᠨ ᠵᠠᠭᠠᠯᠮᠠᠢ ᠶᠢ ᠳᠠᠢᠰᠤᠩᠨᠠᠨ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃ ᠲᠡᠳᠡᠨ ᠦ ᠲᠤᠬᠠᠢ ᠪᠢ ᠲᠠ ᠨᠠᠷ ᠲᠤ ᠣᠯᠠᠨᠲᠠ ᠶᠠᠷᠢᠭᠰᠠᠨ ᠪᠥᠭᠡᠳ ᠣᠳᠣ ᠪᠢ ᠨᠢᠯᠪᠤᠰᠤ ᠤᠨᠠᠭᠠᠨ ᠶᠠᠷᠢᠵᠤ ᠪᠠᠢᠨᠠ᠃ 19 ᠲᠡᠳᠡᠨ ᠦ ᠲᠡᠭᠦᠰᠬᠡᠯ ᠪᠣᠯ ᠰᠥᠨᠥᠯ᠂ ᠲᠡᠳᠡᠨ ᠦ ᠪᠤᠷᠬᠠᠨ ᠪᠣᠯ ᠬᠣᠳᠣᠭᠣᠳᠣ᠃ ᠲᠡᠳᠡ ᠢᠴᠢᠭᠦᠷᠢ ᠪᠠᠨ ᠢᠷᠠᠭᠤ ᠠᠯᠳᠠᠷ ᠭᠡᠵᠦ ᠦᠵᠡᠨ ᠭᠠᠵᠠᠷ ᠳᠡᠭᠡᠷᠡᠬᠢ ᠶᠠᠪᠤᠳᠠᠯ ᠢ ᠯᠠ ᠪᠣᠳᠣᠳᠠᠭ᠃ 20 ᠭᠡᠪᠡᠴᠦ ᠪᠢᠳᠡ ᠪᠣᠯ ᠲᠩᠷᠢ ᠶᠢᠨ ᠬᠠᠷᠢᠶᠠᠲᠤ ᠮᠥᠨ᠃ ᠲᠡᠨᠳᠡ ᠡᠴᠡ ᠢᠷᠡᠬᠦ ᠠᠪᠤᠷᠠᠭᠴᠢ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢ ᠪᠢᠳᠡ ᠲᠡᠰᠪᠦᠷᠢ ᠲᠠᠢ ᠬᠦᠯᠢᠶᠡᠵᠦ ᠪᠠᠢᠨᠠ᠃ 21 ᠲᠡᠷᠡ ᠬᠠᠮᠤᠭ ᠶᠠᠭᠤᠮᠠ ᠶᠢ ᠡᠷᠬᠡᠰᠢᠶᠡᠯ ᠳᠡᠭᠡᠨ ᠣᠷᠣᠭᠤᠯᠵᠤ ᠴᠢᠳᠠᠳᠠᠭ ᠬᠦᠴᠦ ᠪᠡᠷ ᠢᠶᠠᠨ ᠪᠢᠳᠡᠨ ᠦ ᠡᠭᠡᠯ ᠳᠣᠣᠷᠠᠳᠤ ᠪᠡᠶᠡ ᠶᠢ ᠠᠯᠳᠠᠷ ᠰᠤᠤᠲᠤ ᠪᠡᠶᠡ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠢᠶᠠᠷ ᠬᠤᠪᠢᠷᠠᠭᠠᠬᠤ ᠪᠣᠯᠣᠨᠠ᠃