ᠷᠦᠲ ᠬᠣᠶᠠᠷ
ᠷᠦᠲ ᠤᠨ ᠬᠥᠳᠡᠯᠮᠦᠷᠢ ᠪᠠ ᠪᠣᠶᠠᠽ ᠤᠨ ᠲᠠᠭᠠᠯᠠᠯ
1 ᠨᠠᠶᠣᠮᠢ ᠶᠢᠨ ᠨᠥᠬᠥᠷ ᠦᠨ ᠬᠢᠨᠢ ᠬᠠᠮᠢᠶᠠᠲᠠᠨ ᠪᠣᠯᠬᠤ ᠬᠦᠴᠦ ᠲᠠᠢ᠂ ᠬᠥᠷᠥᠩᠭᠡ ᠲᠠᠢ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠬᠥᠮᠦᠨ ᠡᠯᠢᠮᠧᠯᠧᠺ ᠤᠨ ᠠᠢᠮᠠᠭ ᠤᠨ ᠬᠢ ᠪᠥᠭᠡᠳ ᠨᠡᠷᠡ ᠶᠢ ᠨᠢ ᠪᠣᠶᠠᠽ ᠭᠡᠳᠡᠭ ᠪᠠᠢᠪᠠ᠃ 2 ᠮᠣᠶᠠᠪ ᠡᠮᠡᠭᠲᠡᠢ ᠷᠦᠲ ᠨᠠᠶᠣᠮᠢ ᠳᠤ᠄ 《ᠪᠢ ᠲᠠᠷᠢᠶᠠᠨ ᠲᠠᠯᠠᠪᠠᠢ ᠤᠷᠤᠭᠤ ᠶᠠᠪᠤᠭᠠᠳ ᠦᠵᠡᠬᠦ ᠤᠤ︖ ᠬᠡᠨ ᠨᠢᠭᠡᠨ ᠦ ᠲᠠᠭᠠᠯᠠᠯ ᠢ ᠣᠯᠪᠠᠯ ᠪᠢ ᠲᠡᠭᠦᠨ ᠦ ᠠᠷᠤ ᠠᠴᠠ ᠶᠠᠪᠤᠵᠤ᠂ ᠣᠷᠬᠢᠭᠳᠠᠭᠰᠠᠨ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠶᠢ ᠲᠡᠭᠦᠵᠦ ᠠᠪᠤᠶᠠ》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠥᠬᠢᠨ ᠮᠢᠨᠢ᠂ ᠶᠠᠪᠤ︕》 ᠭᠡᠪᠡ᠃ 3 ᠡᠢᠨ ᠬᠦ ᠷᠦᠲ ᠭᠠᠷᠴᠤ᠂ ᠲᠠᠷᠢᠶᠠ ᠬᠠᠳᠤᠭᠴᠢᠳ ᠤᠨ ᠠᠷᠤ ᠠᠴᠠ ᠶᠠᠪᠤᠵᠤ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠶᠢ ᠲᠡᠭᠦᠵᠦ ᠪᠠᠢᠭᠠᠳ ᠡᠯᠢᠮᠧᠯᠧᠺ ᠤᠨ ᠠᠢᠮᠠᠭ ᠤᠨ ᠪᠣᠶᠠᠽ ᠤᠨ ᠲᠠᠷᠢᠶᠠᠨ ᠲᠠᠯᠠᠪᠠᠢ ᠳᠡᠭᠡᠷᠡ ᠰᠠᠨᠠᠭᠠᠨ ᠳᠤ ᠦᠭᠡᠢ ᠬᠦᠷᠴᠦ ᠢᠷᠡᠵᠡᠢ᠃ 4 ᠶᠠᠭ ᠲᠡᠷᠡ ᠦᠶᠡ ᠳᠦ ᠪᠣᠶᠠᠽ ᠪᠧᠲ᠋ᠯᠧᠾᠧᠮ ᠡᠴᠡ ᠢᠷᠡᠭᠰᠡᠨ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠲᠠᠷᠢᠶᠠ ᠬᠠᠳᠤᠭᠴᠢᠳ ᠲᠤ᠄ 《ᠶᠣᠬᠣᠸᠠ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠶᠣᠬᠣᠸᠠ ᠲᠠᠨ ᠢ ᠢᠪᠡᠭᠡᠬᠦ ᠪᠣᠯᠲᠤᠭᠠᠢ》 ᠭᠡᠵᠡᠭᠡᠪᠡ᠃ 5 ᠪᠣᠶᠠᠽ ᠲᠠᠷᠢᠶᠠ ᠬᠠᠳᠤᠭᠴᠢᠳ ᠢ ᠬᠠᠷᠢᠭᠤᠴᠠᠭᠰᠠᠨ ᠵᠠᠷᠤᠴᠠ ᠠᠴᠠ ᠪᠠᠨ᠄ 《ᠲᠡᠷᠡ ᠵᠠᠯᠠᠭᠤ ᠪᠦᠰᠡᠭᠦᠢ ᠬᠡᠨ ᠦ ᠭᠡᠷ ᠦᠨ ᠬᠢᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 6 ᠲᠠᠷᠢᠶᠠ ᠬᠠᠳᠤᠭᠴᠢᠳ ᠢ ᠬᠠᠷᠢᠭᠤᠴᠠᠭᠰᠠᠨ ᠵᠠᠷᠤᠴᠠ᠄ 《ᠲᠡᠷᠡ ᠪᠣᠯ ᠮᠣᠶᠠᠪ ᠤᠨ ᠨᠤᠲᠤᠭ ᠠᠴᠠ ᠨᠠᠶᠣᠮᠢ ᠲᠠᠢ ᠬᠠᠮᠲᠤ ᠢᠷᠡᠭᠰᠡᠨ ᠮᠣᠶᠠᠪ ᠤᠨ ᠵᠠᠯᠠᠭᠤ ᠪᠦᠰᠡᠭᠦᠢ᠃ 7 ᠲᠡᠷᠡ ᠡᠮᠡᠭᠲᠡᠢ᠄ 〈ᠲᠠᠷᠢᠶᠠ ᠬᠠᠳᠤᠭᠴᠢᠳ ᠤᠨ ᠠᠷᠤ ᠠᠴᠠ ᠶᠠᠪᠤᠵᠤ ᠪᠣᠭᠣᠵᠢᠯᠠᠭᠰᠠᠨ ᠲᠠᠷᠢᠶᠠᠨ ᠳᠤᠮᠳᠠ ᠣᠷᠬᠢᠭᠳᠠᠭᠰᠠᠨ ᠲᠦᠷᠦᠭᠦᠦ ᠶᠢ ᠲᠡᠭᠦᠬᠦ ᠶᠢ ᠵᠥᠪᠰᠢᠶᠡᠷᠡᠭᠡᠴᠢ〉 ᠭᠡᠰᠡᠨ᠃ ᠲᠡᠷᠡ ᠥᠷᠯᠥᠭᠡ ᠢᠷᠡᠭᠡᠳ ᠣᠳᠣ ᠬᠦᠷᠲᠡᠯᠡ ᠪᠠᠢᠭᠰᠠᠭᠠᠷ ᠪᠠᠢᠨᠠ᠂ ᠣᠪᠣᠬᠠᠢ ᠳᠤ ᠲᠦᠷ ᠵᠠᠭᠤᠷᠠ ᠯᠠ ᠠᠮᠠᠷᠠᠭᠰᠠᠨ》 ᠭᠡᠪᠡ᠃
8 ᠪᠣᠶᠠᠽ ᠷᠦᠲ ᠲᠤ᠄ 《ᠰᠣᠨᠣᠰᠴᠤ ᠪᠠᠢᠨᠠ ᠤᠤ︖ ᠥᠬᠢᠨ ᠮᠢᠨᠢ᠃ ᠥᠭᠡᠷᠡ ᠲᠠᠷᠢᠶᠠᠨ ᠲᠠᠯᠠᠪᠠᠢ ᠳᠤ ᠣᠴᠢᠬᠤ ᠬᠡᠷᠡᠭ ᠦᠭᠡᠢ᠂ ᠡ᠊ᠨᠳᠡ ᠡᠴᠡ ᠪᠦᠦ ᠶᠠᠪᠤ᠂ ᠮᠢᠨᠦ ᠰᠢᠪᠡᠭᠴᠢᠨ ᠥᠬᠢᠳ ᠤᠨ ᠣᠢᠷᠠ ᠵᠠᠭᠤᠷᠠ ᠪᠠᠢᠭᠠᠷᠠᠢ᠃ 9 ᠴᠢ ᠡᠷᠡᠴᠦᠳ ᠦᠨ ᠬᠠᠳᠤᠵᠤ ᠪᠠᠢᠭᠠ ᠲᠠᠯᠠᠪᠠᠢ ᠤᠷᠤᠭᠤ ᠨᠢᠳᠦ ᠬᠠᠶᠠᠵᠤ᠂ ᠡᠮᠡᠭᠲᠡᠢᠴᠦᠳ ᠦᠨ ᠠᠷᠤ ᠠᠴᠠ ᠪᠠᠷᠠᠭᠠᠳᠠᠨ ᠶᠠᠪᠤᠭᠠᠷᠠᠢ᠃ ᠪᠢ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠴᠢᠮᠠ ᠳᠤ ᠣᠢᠷᠠᠲᠤᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠲᠤᠰᠢᠶᠠᠶᠠ᠃ ᠴᠢ ᠤᠮᠳᠠᠭᠠᠰᠪᠠᠯ ᠤᠰᠤᠨ ᠤ ᠰᠠᠪᠠ ᠤᠷᠤᠭᠤ ᠣᠴᠢᠵᠤ ᠵᠠᠷᠤᠴᠠ ᠨᠠᠷ ᠤᠨ ᠤᠳᠬᠤᠭᠰᠠᠨ ᠠᠴᠠ ᠤᠤᠭᠤᠵᠤ ᠪᠣᠯᠣᠨᠠ︕》 ᠭᠡᠬᠦ ᠳᠦ᠂ 10 ᠲᠡᠷᠡ ᠡᠮᠡᠭᠲᠡᠢ ᠬᠥᠰᠡᠷ ᠤᠨᠠᠨ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠪᠥᠬᠥᠢᠵᠦ᠄ 《ᠪᠢ ᠬᠠᠷᠢ ᠬᠥᠮᠦᠨ ᠪᠠᠢᠲᠠᠯᠠ ᠪᠠᠨ ᠶᠠᠭᠠᠬᠢᠭᠠᠳ ᠲᠠᠨ ᠤ ᠲᠠᠭᠠᠯᠠᠯ ᠢ ᠣᠯᠵᠤ᠂ ᠲᠠ ᠨᠠᠮᠠᠶᠢ ᠠᠩᠵᠠᠭᠠᠷᠠᠪᠠ ᠡ︖》 ᠭᠡᠪᠡ᠃ 11 ᠪᠣᠶᠠᠽ ᠬᠠᠷᠢᠭᠤ ᠳᠤᠨᠢ᠄ 《ᠨᠥᠬᠥᠷ ᠢᠶᠡᠨ ᠥᠭᠡᠳᠡ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ ᠬᠠᠳᠠᠮ ᠡᠬᠡ ᠳᠡᠭᠡᠨ ᠬᠢᠭᠰᠡᠨ ᠪᠦᠭᠦᠳᠡ ᠶᠢ ᠴᠢᠨᠢ᠂ ᠮᠥᠨ ᠬᠡᠷᠬᠢᠨ ᠡᠴᠢᠭᠡ ᠡᠬᠡ ᠲᠥᠷᠥᠭᠰᠡᠨ ᠨᠤᠲᠤᠭ ᠢᠶᠠᠨ ᠣᠷᠬᠢᠨ᠂ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠠᠷᠠᠳ ᠲᠦᠮᠡᠨ ᠤᠷᠤᠭᠤ ᠢᠷᠡᠭᠰᠡᠨ ᠦ ᠴᠢᠨᠢ ᠲᠤᠬᠠᠢ ᠪᠢ ᠪᠦᠷ ᠰᠣᠨᠣᠰᠣᠭᠰᠠᠨ᠃ 12 ᠶᠣᠬᠣᠸᠠ ᠴᠢᠨᠦ ᠬᠢᠭᠰᠡᠨ ᠢ ᠬᠠᠷᠢᠭᠤᠯᠬᠤ ᠪᠣᠯᠲᠤᠭᠠᠢ᠃ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠥᠪᠡᠷ ᠦᠨ ᠬᠢᠨᠢ ᠳᠠᠯᠠᠪᠴᠢᠨ ᠳᠣᠣᠷᠠ ᠬᠣᠷᠭᠣᠳᠠᠬᠤ ᠭᠠᠵᠠᠷ ᠬᠠᠢᠵᠤ ᠢᠷᠡᠭᠰᠡᠨ ᠴᠢᠮᠠ ᠳᠤ ᠲᠡᠭᠦᠰ ᠱᠠᠩ ᠰᠣᠶᠣᠷᠬᠠᠬᠤ ᠪᠣᠯᠲᠤᠭᠠᠢ》 ᠭᠡᠬᠦ ᠳᠦ᠂ 13 ᠲᠡᠷᠡ᠄ 《ᠲᠠᠨ ᠤ ᠲᠠᠭᠠᠯᠠᠯ ᠦᠷᠭᠦᠯᠵᠢ ᠨᠠᠳᠠ ᠳᠡᠭᠡᠷᠡ ᠪᠠᠢᠬᠤ ᠪᠣᠯᠲᠤᠭᠠᠢ᠂ ᠡᠵᠡᠨᠲᠡᠨ ᠮᠢᠨᠢ᠂ ᠲᠠᠨ ᠤ ᠰᠢᠪᠡᠭᠴᠢᠳ ᠤᠨ ᠨᠢᠭᠡᠨ ᠲᠡᠢ ᠨᠢ ᠴᠤ ᠲᠡᠩᠴᠡᠰᠢ ᠦᠭᠡᠢ ᠰᠢᠪᠡᠭᠴᠢᠨ ᠨᠠᠮᠠᠶᠢ ᠲᠠ ᠦᠨᠡᠬᠡᠷ ᠲᠠᠢᠳᠬᠤᠷᠠᠭᠤᠯᠵᠤ᠂ ᠬᠠᠯᠠᠮᠵᠢ ᠶᠢᠨ ᠦᠭᠡ ᠬᠡᠯᠡᠯᠡ》 ᠭᠡᠵᠦ ᠶᠠᠷᠢᠪᠠ᠃
14 ᠬᠣᠭᠣᠯᠠᠨ ᠤ ᠴᠠᠭ ᠪᠣᠯᠬᠤ ᠳᠤ᠂ ᠪᠣᠶᠠᠽ ᠲᠡᠭᠦᠨ ᠳᠦ᠄ 《ᠨᠠᠰᠢ ᠪᠠᠨ ᠢᠷᠡ᠂ ᠪᠣᠣᠪᠣ ᠠᠴᠠ ᠢᠳᠡ᠂ ᠪᠣᠣᠪᠣ ᠪᠠᠨ ᠼᠤᠤ ᠳᠤ ᠳᠦᠷᠦ》 ᠭᠡᠰᠡᠨ ᠳᠦ᠂ ᠲᠡᠷᠡ ᠲᠠᠷᠢᠶᠠ ᠬᠠᠳᠤᠭᠴᠢᠳ ᠤᠨ ᠳᠡᠷᠭᠡᠳᠡ ᠰᠠᠭᠤᠪᠠ᠃ ᠪᠣᠶᠠᠽ ᠲᠡᠭᠦᠨ ᠳᠦ ᠬᠠᠭᠤᠷᠤᠭᠰᠠᠨ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠥᠭᠭᠥᠭᠰᠡᠨ ᠳᠦ᠂ ᠲᠡᠷᠡ ᠢᠳᠡᠵᠦ ᠴᠠᠳᠤᠭᠠᠳ ᠪᠠᠰᠠ ᠦᠯᠡᠳᠡᠭᠡᠵᠡᠢ᠃ 15 ᠷᠦᠲ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠲᠡᠭᠦᠬᠦ ᠪᠡᠷ ᠪᠣᠰᠬᠤ ᠳᠤ᠂ ᠪᠣᠶᠠᠽ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠲᠤᠰᠢᠶᠠᠨ᠄ 《ᠲᠡᠷᠡ ᠡᠮᠡᠭᠲᠡᠢ ᠶᠡᠦᠵᠢᠯᠡᠭᠰᠡᠨ ᠲᠠᠷᠢᠶᠠᠨ ᠳᠤᠮᠳᠠ ᠣᠷᠬᠢᠭᠳᠠᠭᠰᠠᠨ ᠲᠦᠷᠦᠭᠦᠦ ᠶᠢ ᠲᠡᠭᠦᠭᠰᠡᠨ ᠴᠤ ᠲᠡᠭᠦᠨ ᠢ ᠪᠦᠦ ᠢᠴᠢᠭᠡ︕ 16 ᠬᠠᠷᠢᠨ ᠶᠡᠦᠵᠢ ᠲᠠᠢ ᠲᠠᠷᠢᠶᠠᠨ ᠠᠴᠠ ᠬᠡᠰᠡᠭ ᠲᠦᠷᠦᠭᠦᠦ ᠶᠢ ᠭᠠᠷᠭᠠᠵᠤ᠂ ᠵᠣᠷᠢᠭᠤᠳᠠ ᠭᠠᠵᠠᠷ ᠲᠤ ᠤᠨᠠᠭᠠᠨ ᠲᠡᠭᠦᠨ ᠢᠶᠡᠷ ᠲᠡᠭᠦᠯᠭᠡ︕ ᠲᠡᠭᠦᠨ ᠢ ᠪᠦᠦ ᠵᠠᠩᠨᠠ》 ᠭᠡᠪᠡ᠃ 17 ᠢᠩᠭᠢᠭᠡᠳ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠲᠠᠷᠢᠶᠠᠨ ᠲᠠᠯᠠᠪᠠᠢ ᠳᠤ ᠲᠦᠷᠦᠭᠦᠦ ᠲᠡᠭᠦᠵᠦ᠂ ᠲᠡᠭᠦᠭᠰᠡᠨ ᠲᠦᠷᠦᠭᠦᠦ ᠪᠡᠨ ᠴᠣᠬᠢᠵᠤ ᠠᠪᠬᠤ ᠳᠤ᠂ ᠨᠢᠭᠡ ᠡᠹᠠ ᠠᠷᠪᠠᠢ ᠪᠣᠯᠪᠠ᠃ 18 ᠲᠡᠷᠡ ᠡᠭᠦᠨ ᠢ ᠠᠪᠴᠤ᠂ ᠬᠣᠲᠠ ᠤᠷᠤᠭᠤ ᠪᠠᠨ ᠪᠤᠴᠠᠭᠠᠳ ᠬᠠᠳᠠᠮ ᠡᠬᠡ ᠳᠡᠭᠡᠨ ᠲᠡᠭᠦᠭᠰᠡᠨ ᠢᠶᠡᠨ ᠦᠵᠡᠭᠦᠯᠪᠡ᠃ ᠮᠥᠨ ᠢᠳᠡᠵᠦ ᠴᠠᠳᠤᠭᠠᠳ ᠦᠯᠡᠳᠡᠭᠡᠵᠦ ᠬᠠᠳᠠᠭᠠᠯᠠᠭᠰᠠᠨ ᠢᠶᠠᠨ ᠲᠡᠭᠦᠨ ᠳᠦ ᠥᠭᠴᠡᠢ᠃ 19 ᠬᠠᠳᠠᠮ ᠡᠬᠡ ᠨᠢ᠄ 《ᠴᠢ ᠥᠨᠥᠳᠥᠷ ᠬᠠᠮᠢᠭᠠ ᠠᠴᠠ ᠲᠡᠭᠦᠪᠡ︖ ᠬᠠᠮᠢᠭᠠ ᠠᠵᠢᠯᠯᠠᠭᠰᠠᠨ ᠪᠤᠢ︖ ᠴᠢᠮᠠᠶᠢ ᠠᠩ᠋ᠬᠠᠷᠤᠭᠰᠠᠨ ᠲᠡᠷᠡ ᠬᠥᠮᠦᠨ ᠢᠪᠡᠭᠡᠭᠳᠡᠬᠦ ᠪᠣᠯᠲᠤᠭᠠᠢ》 ᠭᠡᠪᠡ᠃ ᠢᠩᠭᠢᠭᠡᠳ ᠲᠡᠷᠡ ᠬᠠᠮᠢᠭᠠ ᠠᠵᠢᠯᠯᠠᠭᠰᠠᠨ ᠲᠤᠬᠠᠢ ᠪᠠᠨ ᠬᠠᠳᠠᠮ ᠡᠬᠡ ᠳᠡᠭᠡᠨ ᠳᠤᠭᠤᠯᠭᠠᠨ᠄ 《ᠥᠨᠥᠳᠥᠷ ᠪᠢ ᠪᠣᠶᠠᠽ ᠭᠡᠳᠡᠭ ᠬᠥᠮᠦᠨ ᠦ ᠳᠦ ᠠᠵᠢᠯᠯᠠᠭᠰᠠᠨ》 ᠭᠡᠵᠦ ᠶᠠᠷᠢᠲᠠᠯᠠ᠂ 20 ᠨᠠᠶᠣᠮᠢ ᠪᠡᠷᠢ ᠳᠡᠭᠡᠨ᠄ 《ᠶᠣᠬᠣᠸᠠ ᠲᠡᠭᠦᠨ ᠢ ᠢᠪᠡᠭᠡᠬᠦ ᠪᠣᠯᠲᠤᠭᠠᠢ︕ ᠲᠡᠭᠦᠨ ᠦ ᠬᠠᠢᠷᠠ ᠡᠨᠡᠷᠢᠯ ᠠᠮᠢᠳᠤᠷᠠᠭᠰᠠᠳ ᠢ ᠴᠤ᠂ ᠦᠬᠦᠭᠰᠡᠳ ᠢ ᠴᠤ ᠣᠷᠬᠢᠭᠠ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠬᠡᠯᠡᠪᠡ᠃ ᠲᠡᠭᠡᠭᠡᠳ ᠨᠠᠶᠣᠮᠢ ᠲᠡᠭᠦᠨ ᠳᠦ᠄ 《ᠲᠡᠷᠡ ᠬᠥᠮᠦᠨ ᠴᠢᠨᠢ ᠪᠢᠳᠡᠨ ᠦ ᠣᠢᠷᠠ ᠶᠢᠨ ᠲᠥᠷᠥᠯ᠂ ᠮᠠᠨ ᠤ ᠭᠡᠷ ᠪᠦᠯᠢ ᠶᠢᠨ ᠥᠪ ᠵᠣᠯᠢᠭᠴᠢ 1 ᠰᠢᠦ》 ᠭᠡᠪᠡ᠃ 21 ᠲᠡᠭᠡᠲᠡᠯᠡ ᠮᠣᠶᠠᠪ ᠡᠮᠡᠭᠲᠡᠢ ᠷᠦᠲ᠄ 《ᠲᠡᠷᠡ ᠬᠥᠮᠦᠨ ᠪᠠᠰᠠ ᠨᠠᠳᠠ ᠳᠤ᠄ 〈ᠮᠢᠨᠦ ᠵᠠᠷᠤᠴᠠ ᠨᠠᠷ ᠪᠦᠬᠦ ᠤᠷᠭᠤᠴᠠ ᠶᠢ ᠮᠢᠨᠢ ᠬᠤᠷᠢᠶᠠᠵᠤ ᠳᠠᠭᠤᠰᠬᠤ ᠪᠣᠯᠲᠠᠯᠠ ᠴᠢ ᠲᠡᠳᠡᠨ ᠦ ᠣᠢᠷᠠ ᠵᠠᠭᠤᠷᠠ ᠪᠠᠢᠭᠠᠷᠠᠢ〉 ᠭᠡᠵᠦ ᠬᠡᠯᠡᠭᠰᠡᠨ》 ᠭᠡᠪᠡ᠃ 22 ᠨᠠᠶᠣᠮᠢ ᠥᠪᠡᠷ ᠦᠨ ᠪᠡᠷᠢ ᠷᠦᠲ ᠲᠤ᠄ 《ᠥᠬᠢᠨ ᠮᠢᠨᠢ᠂ ᠲᠡᠷᠡ ᠬᠥᠮᠦᠨ ᠦ ᠰᠢᠪᠡᠭᠴᠢᠳ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠨᠢ ᠰᠠᠢᠨ ᠰᠢᠦ᠂ ᠲᠡᠭᠡᠪᠡᠯ ᠴᠢ ᠥᠭᠡᠷᠡ ᠬᠥᠮᠦᠨ ᠦ ᠲᠠᠯᠠᠪᠠᠢ ᠳᠤ ᠡᠷᠡᠴᠦᠳ ᠢᠶᠡᠷ ᠳᠣᠷᠣᠮᠵᠢᠯᠠᠭᠤᠯᠬᠤ ᠦᠭᠡᠢ ᠪᠣᠯᠣᠨᠠ》 ᠭᠡᠪᠡ᠃ 23 ᠲᠡᠭᠡᠭᠡᠳ ᠲᠡᠷᠡ ᠪᠡᠷ ᠠᠷᠪᠠᠢ ᠪᠣᠯᠣᠨ ᠪᠤᠭᠤᠳᠠᠢ ᠶᠢᠨ ᠬᠤᠷᠢᠶᠠᠯᠲᠠ ᠳᠠᠭᠤᠰᠲᠠᠯᠠ ᠲᠦᠷᠦᠭᠦᠦ ᠲᠡᠭᠦᠬᠦ ᠶᠢᠨ ᠲᠤᠯᠠᠳᠠ ᠪᠣᠶᠠᠽ ᠤᠨ ᠰᠢᠪᠡᠭᠴᠢᠳ ᠤᠨ ᠣᠢᠷᠠ ᠵᠠᠭᠤᠷᠠ ᠪᠠᠢᠭᠰᠠᠨ᠃ ᠡᠢᠨ ᠬᠦ ᠲᠡᠷᠡ ᠬᠠᠳᠠᠮ ᠡᠬᠡ ᠲᠠᠢ ᠪᠠᠨ ᠬᠠᠮᠲᠤ ᠪᠠᠢᠯᠠ᠃