ᠷᠦᠲ ᠳᠥᠷᠪᠡ
ᠷᠦᠲ ᠤᠨ ᠢᠷᠥᠭᠡᠯ ᠲᠡᠢ ᠭᠡᠷᠯᠡᠯᠲᠡ
1 ᠪᠣᠶᠠᠽ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠥᠭᠡᠳᠡ ᠣᠴᠢᠭᠠᠳ ᠰᠠᠭᠤᠵᠤ ᠪᠠᠢᠲᠠᠯᠠ᠂ ᠪᠣᠶᠠᠽ ᠤᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠨᠥᠭᠥᠭᠡ ᠥᠪ ᠵᠣᠯᠢᠭᠴᠢ ᠥᠩᠭᠡᠷᠡᠨ ᠶᠠᠪᠤᠵᠤ ᠪᠠᠢᠪᠠ᠃ ᠪᠣᠶᠠᠽ ᠲᠡᠭᠦᠨ ᠳᠦ᠄ 《ᠬᠥᠶᠶ᠂ ᠠᠬᠠ ᠳᠡᠭᠦᠦ᠂ ᠡ᠊ᠨᠳᠡ ᠢᠷᠡᠭᠡᠳ ᠰᠠᠭᠤ》 ᠭᠡᠬᠦ ᠳᠦ᠂ ᠲᠡᠷᠡ ᠢᠷᠡᠵᠦ ᠰᠠᠭᠤᠯᠠ᠃ 2 ᠲᠡᠷᠡ ᠪᠠᠰᠠ ᠬᠣᠲᠠ ᠶᠢᠨ ᠠᠬᠠᠮᠠᠳ ᠤᠳ ᠠᠴᠠ ᠠᠷᠪᠠᠨ ᠬᠥᠮᠦᠨ ᠠᠪᠴᠢᠷᠠᠨ᠄ 《ᠡ᠊ᠨᠳᠡ ᠰᠠᠭᠤᠭᠠᠷᠠᠢ》 ᠭᠡᠰᠡᠨ ᠳᠦ᠂ ᠲᠡᠳᠡ ᠴᠤ ᠰᠠᠭᠤᠵᠠᠭᠠᠪᠠ᠃ 3 ᠲᠡᠭᠡᠭᠡᠳ ᠲᠡᠷᠡ ᠥᠪ ᠵᠣᠯᠢᠭᠴᠢ ᠪᠣᠯᠬᠤ ᠬᠥᠮᠦᠨ ᠳᠦ ᠬᠠᠨᠳᠤᠨ᠄ 《ᠮᠣᠶᠠᠪ ᠤᠨ ᠨᠤᠲᠤᠭ ᠠᠴᠠ ᠪᠤᠴᠠᠵᠤ ᠢᠷᠡᠭᠰᠡᠨ ᠨᠠᠶᠣᠮᠢ ᠪᠢᠳᠡᠨ ᠦ ᠠᠬᠠ ᠳᠡᠭᠦᠦ ᠡᠯᠢᠮᠧᠯᠧᠺ ᠤᠨ ᠬᠡᠰᠡᠭ ᠲᠠᠯᠠᠪᠠᠢ ᠶᠢ ᠬᠤᠳᠠᠯᠳᠤᠬᠤ ᠭᠡᠵᠦ ᠪᠠᠢᠨᠠ᠃ 4 ᠲᠡᠢᠮᠦ ᠡᠴᠡ ᠪᠢ ᠲᠠᠨ ᠳᠤ ᠡᠭᠦᠨ ᠢ ᠳᠤᠭᠤᠯᠭᠠᠵᠤ ᠯᠠᠪᠯᠠᠬᠤ ᠭᠡᠰᠡᠨ ᠶᠤᠮ᠃ ᠲᠠ ᠡ᠊ᠨᠳᠡ ᠰᠠᠭᠤᠭᠴᠢᠳ ᠪᠣᠯᠣᠨ ᠮᠠᠨ ᠤ ᠠᠷᠠᠳ ᠲᠦᠮᠡᠨ ᠦ ᠠᠬᠠᠯᠠᠭᠴᠢᠳ ᠤᠨ ᠡᠮᠦᠨᠡ ᠲᠡᠷᠡ ᠲᠠᠯᠠᠪᠠᠢ ᠶᠢ ᠬᠤᠳᠠᠯᠳᠤᠵᠤ ᠠᠪᠤᠨᠠ ᠤᠤ︖ ᠬᠡᠷᠪᠡ ᠲᠠ ᠲᠡᠭᠦᠨ ᠦ ᠥᠪ ᠢ ᠵᠣᠯᠢᠨ ᠠᠪᠤᠶᠠ ᠭᠡᠪᠡᠯ ᠵᠣᠯᠢᠨ ᠠᠪᠤᠭᠲᠤᠨ᠂ ᠦᠭᠡᠢ ᠪᠣᠯ ᠨᠠᠳᠠ ᠳᠤ ᠬᠡᠯᠡᠭᠡᠷᠡᠢ᠂ ᠪᠢ ᠮᠡᠳᠡᠵᠦ ᠠᠪᠤᠶᠠ︕ ᠤᠴᠢᠷ ᠨᠢ ᠴᠢᠮᠠ ᠠᠴᠠ ᠥᠭᠡᠷᠡ ᠡᠨᠡ ᠥᠪ ᠢ ᠵᠣᠯᠢᠨ ᠠᠪᠬᠤ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠪᠥᠭᠡᠳ ᠳᠠᠷᠠᠭᠠ ᠶᠢᠨ ᠬᠢᠨᠢ ᠪᠢ ᠶᠤᠮ》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠡᠨᠡ ᠥᠪ ᠢ ᠪᠢ ᠵᠣᠯᠢᠵᠤ ᠠᠪᠤᠶᠠ》 ᠭᠡᠪᠡ᠃ 5 ᠲᠡᠭᠡᠲᠡᠯᠡ ᠪᠣᠶᠠᠽ᠄ 《ᠴᠢ ᠨᠠᠶᠣᠮᠢ ᠶᠢᠨ ᠭᠠᠷ ᠠᠴᠠ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ ᠶᠢ ᠬᠤᠳᠠᠯᠳᠤᠨ ᠠᠪᠬᠤ ᠲᠡᠷᠡ ᠡᠳᠦᠷ ᠲᠡᠭᠡᠨ ᠮᠥᠨ ᠥᠭᠡᠳᠡ ᠪᠣᠯᠣᠭᠴᠢ ᠶᠢᠨ ᠠᠪᠠᠭᠠᠢ ᠮᠣᠶᠠᠪ ᠬᠥᠮᠦᠨ ᠷᠦᠲ ᠢ ᠠᠪᠴᠤ᠂ ᠥᠭᠡᠳᠡ ᠪᠣᠯᠣᠭᠴᠢ ᠶᠢᠨ ᠨᠡᠷᠡ ᠶᠢ ᠥᠪ ᠳᠡᠭᠡᠷᠡ ᠨᠢ ᠪᠣᠰᠬᠠ》 ᠭᠡᠰᠡᠨ ᠳᠦ᠂ 6 ᠲᠡᠷᠡ ᠣᠢᠷᠠ ᠥᠪ ᠵᠣᠯᠢᠭᠴᠢ ᠨᠢ᠄ 《ᠪᠢ ᠥᠪ ᠢ ᠨᠢ ᠵᠣᠯᠢᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠨᠢ ᠡ᠂ ᠮᠢᠨᠦ ᠥᠪ ᠢ ᠬᠣᠬᠢᠷᠠᠭᠤᠯᠬᠤ ᠪᠤᠢ᠃ ᠴᠢ ᠥᠪᠡᠷ ᠢᠶᠡᠨ ᠵᠣᠯᠢᠨ ᠠᠪ᠂ ᠪᠢ ᠵᠣᠯᠢᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ》 ᠭᠡᠪᠡ᠃
7 ᠤᠷᠢᠳᠤ ᠴᠠᠭ ᠲᠤ ᠢᠰᠷᠧᠯ ᠳᠤ ᠥᠪ ᠵᠣᠯᠢᠨ ᠠᠪᠬᠤ ᠪᠣᠯᠣᠨ ᠭᠠᠵᠠᠷ ᠰᠣᠯᠢᠯᠴᠠᠬᠤ ᠲᠠᠯᠠ ᠪᠠᠷ ᠶᠠᠪᠤᠳᠠᠯ ᠪᠣᠯᠭᠠᠨ ᠢ ᠪᠠᠲᠤᠯᠠᠬᠤ ᠳᠠᠭᠠᠨ ᠨᠢᠭᠡ ᠨᠢ ᠨᠥᠭᠥᠭᠡ ᠳᠡᠭᠡᠨ ᠱᠠᠬᠠᠢ ᠪᠠᠨ ᠲᠠᠢᠯᠵᠤ ᠥᠭᠳᠡᠭ ᠵᠠᠩᠰᠢᠯ ᠲᠠᠢ ᠪᠠᠢᠪᠠ᠃ ᠡᠨᠡ ᠪᠣᠯ ᠢᠰᠷᠧᠯ ᠤᠨ ᠪᠠᠲᠤᠯᠠᠭᠠ ᠲᠠᠢ ᠪᠣᠯᠭᠠᠬᠤ ᠠᠷᠭᠠ ᠶᠤᠮ᠃ 8 ᠡᠢᠨ ᠬᠦ ᠥᠪ ᠢ ᠵᠣᠯᠢᠭᠴᠢ ᠨᠢ ᠪᠣᠶᠠᠽ ᠲᠤ᠄ 《ᠴᠢ ᠥᠪᠡᠷ ᠲᠡᠭᠡᠨ ᠠᠪᠤᠭᠠᠷᠠᠢ》 ᠭᠡᠵᠦ ᠬᠡᠯᠡᠭᠡᠳ ᠱᠠᠬᠠᠢ ᠪᠠᠨ ᠲᠠᠢᠯᠪᠠ᠃ 9 ᠪᠣᠶᠠᠽ ᠠᠬᠠᠮᠠᠳ ᠤᠳ ᠬᠢᠭᠡᠳ ᠪᠦᠬᠦ ᠠᠷᠠᠳ ᠲᠤ᠄ 《ᠪᠢ ᠨᠠᠶᠣᠮᠢ ᠶᠢᠨ ᠭᠠᠷ ᠠᠴᠠ ᠡᠯᠢᠮᠧᠯᠧᠺ᠂ ᠺᠢᠯᠢᠶᠣᠨ ᠪᠣᠯᠣᠨ ᠮᠠᠯᠣᠨ ᠳᠤ ᠬᠠᠷᠢᠶᠠᠯᠠᠭᠳᠠᠬᠤ ᠪᠦᠬᠦᠨ ᠢ ᠬᠤᠳᠠᠯᠳᠤᠨ ᠠᠪᠤᠯᠠ᠂ ᠥᠨᠥᠳᠥᠷ ᠲᠠ ᠨᠠᠷ ᠡᠭᠦᠨ ᠦ ᠭᠡᠷᠡᠴᠢ ᠪᠣᠯᠣᠯᠠ᠃ 10 ᠪᠠᠰᠠ ᠥᠭᠡᠳᠡ ᠪᠣᠯᠣᠭᠴᠢ ᠶᠢᠨ ᠨᠡᠷᠡ ᠶᠢ ᠥᠪ ᠳᠡᠭᠡᠷᠡ ᠨᠢ ᠪᠣᠰᠬᠠᠬᠤ 2 ᠶᠢᠨ ᠲᠤᠯᠠᠳᠠ᠂ ᠪᠢ ᠮᠠᠯᠣᠨ ᠤ ᠡᠬᠡᠨᠡᠷ ᠮᠣᠶᠠᠪ ᠡᠮᠡᠭᠲᠡᠢ ᠷᠦᠲ ᠢ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠨ ᠠᠪᠤᠯᠠ᠃ ᠡᠢᠨ ᠬᠦ ᠥᠭᠡᠳᠡ ᠪᠣᠯᠣᠭᠴᠢ ᠶᠢᠨ ᠨᠡᠷᠡ ᠨᠢ ᠠᠬᠠ ᠳᠡᠭᠦᠦ ᠲᠥᠷᠥᠯ ᠰᠠᠳᠤᠨ ᠪᠣᠯᠣᠨ ᠲᠥᠷᠥᠭᠰᠡᠨ ᠨᠤᠲᠤᠭ ᠠᠴᠠ ᠪᠠᠨ ᠲᠠᠰᠤᠯᠤᠭᠳᠠᠬᠤ ᠦᠭᠡᠢ ᠪᠠᠢᠬᠤ ᠪᠣᠯᠣᠨᠠ᠃ ᠥᠨᠥᠳᠥᠷ ᠲᠠ ᠨᠠᠷ ᠡᠭᠦᠨ ᠦ ᠭᠡᠷᠡᠴᠢ ᠪᠣᠯᠣᠯᠠ》 ᠭᠡᠪᠡ᠃ 11 ᠬᠠᠭᠠᠯᠭᠠᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠠᠷᠠᠳ ᠤᠳ ᠪᠣᠯᠣᠨ ᠠᠬᠠᠮᠠᠳ ᠤᠳ ᠪᠦᠭᠦᠳᠡᠭᠡᠷ ᠢᠶᠡᠨ᠄ 《ᠪᠢᠳᠡ ᠭᠡᠷᠡᠴᠢ ᠮᠥᠨ᠃ ᠲᠠᠨ ᠤ ᠭᠡᠷ ᠲᠦ ᠣᠷᠣᠬᠤ ᠲᠡᠷᠡ ᠡᠮᠡᠭᠲᠡᠢ ᠶᠢ ᠶᠣᠬᠣᠸᠠ ᠢᠰᠷᠧᠯ ᠤᠨ ᠭᠡᠷ ᠢ ᠪᠣᠰᠬᠠᠭᠰᠠᠨ ᠷᠠᠾᠢᠯ᠂ ᠯᠧᠶᠠ ᠬᠣᠶᠠᠷ ᠲᠠᠢ ᠠᠳᠠᠯᠢᠬᠠᠨ ᠪᠣᠯᠭᠠᠬᠤ ᠪᠣᠯᠲᠤᠭᠠᠢ᠃ ᠲᠠ ᠡᠹᠷᠠᠲ ᠲᠤ ᠬᠦᠴᠦᠷᠬᠡᠭᠵᠢᠵᠦ᠂ ᠪᠧᠲ᠋ᠯᠧᠾᠧᠮ ᠳᠤ ᠠᠯᠳᠠᠷᠰᠢᠬᠤ ᠪᠣᠯᠲᠤᠭᠠᠢ᠃ 12 ᠮᠥᠨ ᠶᠣᠬᠣᠸᠠ ᠡᠨᠡ ᠵᠠᠯᠠᠭᠤ ᠪᠦᠰᠡᠭᠦᠢ ᠪᠠᠷ ᠳᠠᠮᠵᠢᠭᠤᠯᠤᠨ ᠲᠠᠨ ᠳᠤ ᠦᠷᠡ ᠤᠳᠤᠮ ᠰᠣᠶᠣᠷᠬᠠᠵᠤ᠂ ᠲᠠᠨ ᠤ ᠭᠡᠷ ᠢ ᠲᠠᠮᠠᠷ ᠤᠨ ᠶᠦᠳᠠ ᠳᠤ ᠲᠥᠷᠥᠭᠦᠯᠵᠦ ᠥᠭᠭᠥᠭᠰᠡᠨ ᠫᠧᠷᠧᠽ ᠤᠨ ᠭᠡᠷ ᠲᠡᠢ ᠠᠳᠠᠯᠢ ᠪᠣᠯᠭᠠᠬᠤ ᠪᠣᠯᠲᠤᠭᠠᠢ》 ᠭᠡᠵᠡᠭᠡᠪᠡ᠃
13 ᠡᠢᠨ ᠬᠦ ᠪᠣᠶᠠᠽ ᠷᠦᠲ ᠢ ᠠᠪᠴᠤ᠂ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠪᠠ᠃ ᠪᠣᠶᠠᠽ ᠲᠡᠭᠦᠨ ᠲᠡᠢ ᠡᠩᠭᠡᠷ ᠵᠥᠷᠢᠭᠦᠯᠦᠭᠰᠡᠨ ᠳᠦ᠂ ᠶᠣᠬᠣᠸᠠ ᠲᠡᠭᠦᠨ ᠢ ᠵᠢᠷᠮᠦᠰᠦᠨ ᠪᠣᠯᠭᠠᠵᠤ ᠥᠭᠴᠡᠢ᠃ ᠲᠡᠭᠡᠭᠡᠳ ᠲᠡᠷᠡ ᠬᠦᠦ ᠲᠥᠷᠥᠭᠦᠯᠪᠡ᠃ 14 ᠡᠮᠡᠭᠲᠡᠢᠴᠦᠳ ᠨᠠᠶᠣᠮᠢ ᠳᠤ᠄ 《ᠶᠣᠬᠣᠸᠠ ᠮᠠᠭᠲᠠᠭᠳᠠᠬᠤ ᠪᠣᠯᠲᠤᠭᠠᠢ︕ ᠲᠡᠷᠡ ᠴᠢᠮᠠᠶᠢ ᠥᠪ ᠵᠣᠯᠢᠭᠴᠢ ᠦᠭᠡᠢ ᠣᠷᠬᠢᠭᠰᠠᠨ ᠦᠭᠡᠢ᠂ ᠡᠨᠡ ᠬᠦᠦ ᠴᠢᠨᠢ ᠢᠰᠷᠧᠯ ᠳᠤ ᠠᠯᠳᠠᠷᠰᠢᠬᠤ ᠪᠣᠯᠲᠤᠭᠠᠢ︕ 15 ᠲᠡᠷᠡ ᠠᠮᠢ ᠠᠮᠢᠳᠤᠷᠠᠯ ᠢ ᠴᠢᠨᠢ ᠰᠡᠷᠭᠦᠭᠡᠭᠴᠢ᠂ ᠥᠨᠳᠥᠷ ᠨᠠᠰᠤᠨ ᠤ ᠴᠢᠨᠢ ᠲᠡᠳᠬᠦᠭᠴᠢ ᠪᠣᠯᠣᠨᠠ᠃ ᠲᠡᠭᠦᠨ ᠢ ᠲᠥᠷᠥᠭᠦᠯᠦᠭᠴᠢ ᠨᠢ ᠴᠢᠮᠠᠶᠢ ᠬᠠᠢᠷᠠᠯᠠᠳᠠᠭ ᠴᠢᠨᠦ ᠪᠡᠷᠢ᠂ ᠲᠡᠷᠡ ᠴᠢᠮᠠ ᠳᠤ ᠳᠣᠯᠣᠭᠠᠨ ᠬᠥᠪᠡᠭᠦᠨ ᠡᠴᠡ ᠴᠤ ᠢᠯᠡᠭᠦᠦ ᠶᠤᠮ》 ᠭᠡᠵᠡᠭᠡᠪᠡ᠃
ᠳ᠋ᠠᠸᠢᠳ᠋ ᠬᠠᠭᠠᠨ ᠤ ᠤᠭᠰᠠᠭᠠ ᠶᠢᠨ ᠡᠬᠢᠯᠡᠯ
16 ᠡᠢᠨ ᠬᠦ ᠨᠠᠶᠣᠮᠢ ᠬᠡᠦᠬᠡᠳ ᠢ ᠠᠪᠴᠤ᠂ ᠡᠪᠦᠷ ᠳᠡᠭᠡᠷᠡ ᠪᠡᠨ ᠲᠡᠪᠡᠷᠢᠭᠡᠳ ᠥᠪᠡᠷ ᠦᠨ ᠬᠢ ᠮᠡᠲᠦ ᠬᠠᠯᠠᠮᠵᠢᠯᠠᠭᠰᠠᠨ ᠳᠤ᠂ 17 ᠬᠥᠷᠰᠢ ᠡᠮᠡᠭᠲᠡᠢᠴᠦᠳ ᠨᠢ᠄ 《ᠨᠠᠶᠣᠮᠢ ᠳᠤ ᠬᠦᠦ ᠲᠥᠷᠥᠵᠡᠢ》 ᠭᠡᠳ ᠲᠡᠭᠦᠨ ᠳᠦ ᠣᠪᠧᠳ᠋ ᠭᠡᠳᠡᠭ ᠨᠡᠷᠡ ᠥᠭᠪᠡ᠃ ᠲᠡᠷᠡ ᠪᠣᠯ ᠳ᠋ᠠᠸᠢᠳ᠋ ᠤᠨ ᠡᠴᠢᠭᠡ ᠪᠣᠯᠬᠤ ᠢᠱᠠᠢ ᠶᠢᠨ ᠡᠴᠢᠭᠡ ᠶᠤᠮ᠃
18 ᠡᠨᠡ ᠪᠣᠯ ᠫᠧᠷᠧᠽ ᠤᠨ ᠭᠡᠷ ᠦᠨ ᠴᠠᠳᠢᠭ᠄ ᠫᠧᠷᠧᠽ ᠤᠨ ᠬᠦᠦ ᠾᠧᠽᠷᠣᠨ᠂ 19 ᠾᠧᠽᠷᠣᠨ ᠤ ᠬᠦᠦ ᠷᠠᠮ᠂ ᠷᠠᠮ ᠤᠨ ᠬᠦᠦ ᠠᠮᠢᠨᠠᠳᠠᠪ᠂ 20 ᠠᠮᠢᠨᠠᠳᠠᠪ ᠤᠨ ᠬᠦᠦ ᠨᠠᠾᠱᠣᠨ᠂ ᠨᠠᠾᠱᠣᠨ ᠤ ᠬᠦᠦ ᠰᠠᠯᠮᠣᠨ᠂ 21 ᠰᠠᠯᠮᠣᠨ ᠤ ᠬᠦᠦ ᠪᠣᠶᠠᠽ᠂ ᠪᠣᠶᠠᠽ ᠤᠨ ᠬᠦᠦ ᠣᠪᠧᠳ᠋᠂ 22 ᠣᠪᠧᠳ᠋ ᠤᠨ ᠬᠦᠦ ᠢᠱᠠᠢ᠂ ᠢᠱᠠᠢ ᠶᠢᠨ ᠬᠦᠦ ᠳ᠋ᠠᠸᠢᠳ᠋᠃