ᠨᠢᠭᠡᠳᠦᠭᠡᠷ ᠲᠧᠰᠠᠯᠦ᠋ᠨᠢᠺ ᠬᠣᠶᠠᠷ
ᠴᠢᠭᠤᠯᠭᠠᠨ ᠪᠠᠢᠭᠤᠯᠬᠤ ᠵᠢᠳᠬᠦᠯ
1 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡ ᠲᠠᠨ ᠤ ᠲᠡᠨᠳᠡ ᠣᠴᠢᠭᠰᠠᠨ ᠨᠢ ᠲᠠᠯᠠᠭᠠᠷ ᠪᠢᠰᠢ ᠶᠢ ᠲᠠ ᠨᠠᠷ ᠮᠡᠳᠡᠨᠡ᠃ 2 ᠲᠠ ᠨᠠᠷ ᠤᠨ ᠮᠡᠳᠡᠳᠡᠭᠴᠢᠯᠡᠨ ᠪᠢᠳᠡ ᠹᠢᠯᠢᠫᠣᠢ ᠳᠤ ᠵᠣᠪᠠᠵᠤ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠲᠠᠨ ᠤ ᠲᠡᠨᠳᠡ ᠴᠢᠩᠭ᠍ᠠ ᠡᠰᠡᠷᠭᠦᠴᠡᠯ ᠦᠨ ᠳᠤᠮᠳᠠ ᠪᠤᠷᠬᠠᠨ ᠢᠶᠠᠷ ᠢᠶᠠᠨ ᠵᠣᠷᠢᠭᠵᠢᠵᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠲᠤᠩ᠋ᠬᠠᠭᠯᠠᠭᠰᠠᠨ᠃ 3 ᠲᠡᠢᠨ ᠬᠦ ᠪᠢᠳᠡ ᠪᠤᠷᠤᠭᠤ᠂ ᠴᠡᠪᠡᠷ ᠪᠤᠰᠤ ᠪᠠ ᠵᠠᠯᠢ ᠮᠡᠬᠡ ᠪᠡᠷ ᠢᠳᠬᠠᠳᠠᠭ ᠦᠭᠡᠢ᠂ 4 ᠬᠠᠷᠢᠨ ᠪᠤᠷᠬᠠᠨ ᠤ ᠪᠢᠳᠡᠨ ᠢ ᠰᠢᠯᠭᠠᠵᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠬᠠᠷᠢᠭᠤᠴᠠᠭᠤᠯᠤᠭᠰᠠᠨ ᠶᠣᠰᠣᠭᠠᠷ ᠢᠳᠬᠠᠳᠠᠭ᠃ ᠮᠥᠨ ᠪᠢᠳᠡ ᠬᠥᠮᠦᠨ ᠢ ᠪᠠᠶᠠᠰᠬᠠᠬᠤ ᠪᠠᠷ ᠪᠤᠰᠤ᠂ ᠬᠠᠷᠢᠨ ᠪᠢᠳᠡᠨ ᠦ ᠰᠡᠳᠬᠢᠯ ᠢ ᠰᠢᠯᠭᠠᠭᠴᠢ ᠪᠤᠷᠬᠠᠨ ᠢ ᠪᠠᠶᠠᠰᠬᠠᠬᠤ ᠪᠠᠷ ᠶᠠᠷᠢᠵᠤ ᠪᠠᠢᠳᠠᠭ᠃ 5 ᠪᠠᠰᠠ ᠲᠠ ᠨᠠᠷ ᠤᠨ ᠮᠡᠳᠡᠳᠡᠭᠴᠢᠯᠡᠨ ᠪᠢᠳᠡ ᠪᠢᠯᠳᠠᠤᠴᠢᠯᠠᠬᠤ ᠦᠭᠡ ᠬᠡᠯᠡᠭᠡ ᠦᠭᠡᠢ᠂ ᠳᠠᠯᠳᠠ ᠰᠢᠨᠤᠯ ᠶᠡᠷᠦ ᠡᠪᠦᠷᠯᠡᠭᠰᠡᠨ ᠦᠭᠡᠢ᠂ ᠪᠤᠷᠬᠠᠨ ᠭᠡᠷᠡᠴᠢ ᠪᠣᠯᠣᠨᠠ᠃ 6 ᠪᠢᠳᠡ ᠲᠠ ᠨᠠᠷ ᠠᠴᠠ ᠪᠤᠶᠤ ᠪᠤᠰᠤᠳ ᠠᠴᠠ ᠬᠥᠮᠦᠨ ᠦ ᠬᠦᠨᠳᠦᠳᠬᠡᠯ ᠢ ᠣᠯᠣᠶᠠ ᠭᠡᠰᠡᠨ ᠦᠭᠡᠢ᠂ 7 ᠪᠢᠳᠡ ᠾᠷᠢᠰᠲ᠋ᠣᠰ ᠤᠨ ᠰᠢᠳᠠᠷ ᠱᠠᠪᠢ ᠶᠢᠨ ᠡᠷᠬᠡ ᠪᠡᠷ ᠢᠶᠠᠨ ᠱᠠᠭᠠᠷᠳᠠᠵᠤ ᠪᠣᠯᠬᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠠ ᠨᠠᠷ ᠤᠨ ᠳᠤᠮᠳᠠ ᠬᠡᠦᠬᠡᠳ ᠤᠳ ᠢᠶᠠᠨ ᠪᠦᠪᠡᠢᠯᠡᠳᠡᠭ ᠡᠬᠡ ᠮᠡᠲᠦ ᠡᠶᠡᠯᠳᠡᠭ ᠪᠠᠢᠪᠠ᠃ 8 ᠲᠠ ᠨᠠᠷ ᠪᠢᠳᠡᠨ ᠦ ᠬᠠᠢᠷᠠᠲᠠᠢ ᠬᠥᠮᠦᠰ ᠪᠣᠯᠬᠣᠷ ᠪᠢᠳᠡ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠪᠠᠢᠲᠤᠭᠠᠢ᠂ ᠠᠮᠢ ᠪᠠᠨ ᠴᠤ ᠥᠭᠬᠦ ᠳᠤᠷᠠᠲᠠᠢ ᠪᠣᠯᠲᠠᠯᠠ ᠲᠠ ᠨᠠᠷ ᠢ ᠬᠠᠢᠷᠠᠯᠠᠭᠰᠠᠨ ᠶᠤᠮ᠃
9 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠪᠢᠳᠡᠨ ᠦ ᠵᠦᠳᠡᠷᠡᠯ ᠪᠠ ᠵᠢᠳᠬᠦᠯ ᠢ ᠮᠠᠷᠲᠠᠭᠰᠠᠨ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ᠂ ᠲᠠ ᠨᠠᠷ ᠤᠨ ᠬᠡᠨ ᠳᠦᠨᠢ ᠴᠤ ᠲᠡᠭᠡᠭᠡᠷᠡ ᠪᠣᠯᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠪᠢᠳᠡ ᠡᠳᠦᠷ ᠰᠥᠨᠢ ᠦᠭᠡᠢ ᠠᠵᠢᠯᠯᠠᠵᠤ᠂ ᠪᠤᠷᠬᠠᠨ ᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠲᠠ ᠨᠠᠷ ᠲᠤ ᠤᠯᠠᠮᠵᠢᠯᠠᠭᠰᠠᠨ᠃ 10 ᠢᠲᠡᠭᠡᠭᠴᠢ ᠲᠠ ᠨᠠᠷ ᠤᠨ ᠡᠮᠦᠨᠡ ᠪᠢᠳᠡ ᠬᠡᠴᠢᠨᠡᠨ ᠠᠷᠢᠭᠤᠬᠠᠨ᠂ ᠵᠥᠪ᠂ ᠥ ᠦᠭᠡᠢ ᠪᠠᠢᠭᠰᠠᠨ ᠢ ᠲᠠ ᠨᠠᠷ ᠪᠣᠯᠣᠨ ᠪᠤᠷᠬᠠᠨ ᠭᠡᠷᠡᠴᠢᠯᠡᠨᠡ᠃ 11 ᠲᠠ ᠨᠠᠷ ᠤᠨ ᠮᠡᠳᠡᠳᠡᠭᠴᠢᠯᠡᠨ᠂ ᠪᠢᠳᠡ ᠲᠠ ᠨᠠᠷ ᠤᠨ ᠬᠥᠮᠦᠨ ᠨᠢᠭᠡ ᠪᠦᠷᠢ ᠳᠤ᠂ ᠡᠴᠢᠭᠡ ᠨᠢ ᠬᠡᠦᠬᠡᠳ ᠲᠡᠭᠡᠨ ᠬᠠᠨᠳᠤᠳᠠᠭ ᠤᠨ ᠠᠳᠠᠯᠢ ᠪᠠᠷ ᠬᠠᠨᠳᠤᠨ᠂ 12 ᠵᠣᠷᠢᠭᠵᠢᠭᠤᠯᠵᠤ ᠲᠠᠢᠳᠬᠤᠷᠠᠭᠤᠯᠤᠨ ᠰᠠᠨᠠᠭᠤᠯᠳᠠᠭ ᠪᠠᠢᠭᠰᠠᠨ᠃ ᠡᠨᠡ ᠨᠢ ᠥᠪᠡᠷ ᠦᠨ ᠢᠶᠠᠨ ᠬᠠᠭᠠᠨᠴᠢᠯᠠᠯ ᠪᠠ ᠠᠯᠳᠠᠷ ᠤᠷᠤᠭᠤ ᠳᠠᠭᠤᠳᠠᠭᠴᠢ ᠪᠤᠷᠬᠠᠨ ᠤ ᠡᠮᠦᠨᠡ ᠲᠠ ᠨᠠᠷ ᠢ ᠵᠣᠬᠢᠰᠲᠠᠢ ᠠᠮᠢᠳᠤᠷᠠᠭᠠᠰᠠᠢ ᠭᠡᠰᠡᠨ ᠳᠡᠭᠡᠨ ᠶᠤᠮ᠃
13 ᠲᠠ ᠨᠠᠷ ᠪᠢᠳᠡᠨ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠪᠤᠷᠬᠠᠨ ᠤ ᠦᠭᠡ ᠶᠢ ᠠᠪᠬᠤ ᠳᠠᠭᠠᠨ ᠬᠥᠮᠦᠨ ᠦ ᠦᠭᠡ ᠪᠤᠰᠤ᠂ ᠬᠠᠷᠢᠨ ᠦᠨᠡᠨ ᠪᠠᠢᠳᠠᠭ ᠢᠶᠠᠷ ᠨᠢ ᠪᠤᠷᠬᠠᠨ ᠤ ᠦᠭᠡ ᠭᠡᠵᠦ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠲᠤᠯᠠ ᠪᠢᠳᠡ ᠪᠤᠷᠬᠠᠨ ᠳᠤ ᠲᠠᠰᠤᠷᠠᠯᠲᠠ ᠦᠭᠡᠢ ᠲᠠᠯᠠᠷᠬᠠᠳᠠᠭ᠃ ᠡᠨᠡ ᠦᠭᠡ ᠨᠢ ᠢᠲᠡᠭᠡᠭᠴᠢ ᠲᠠ ᠨᠠᠷ ᠤᠨ ᠳᠣᠲᠣᠷᠠ ᠢᠳᠡᠪᠬᠢᠲᠡᠢ ᠠᠵᠢᠯᠯᠠᠵᠤ ᠪᠠᠢᠳᠠᠭ᠃ 14 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ᠂ ᠶᠦᠳᠠᠢ ᠳᠤ ᠪᠠᠢᠭᠠ ᠪᠤᠷᠬᠠᠨ ᠤ ᠴᠢᠭᠤᠯᠭᠠᠨ ᠨᠤᠭᠤᠳ ᠢ ᠳᠠᠭᠤᠷᠢᠶᠠᠭᠴᠢᠳ ᠪᠣᠯᠣᠭᠰᠠᠨ᠂ ᠤᠴᠢᠷ ᠨᠢ᠂ ᠲᠡᠳᠡ ᠶᠦᠳᠠᠢᠴᠤᠳ ᠲᠤ ᠬᠠᠪᠴᠢᠭᠳᠠᠭᠰᠠᠨ ᠲᠠᠢ ᠠᠳᠠᠯᠢ ᠲᠠ ᠨᠠᠷ ᠡᠬᠡ ᠣᠷᠣᠨ ᠨᠢᠭᠡᠳᠡᠨ ᠳᠡᠭᠡᠨ ᠬᠠᠪᠴᠢᠭᠳᠠᠭᠰᠠᠨ ᠶᠤᠮ᠃ 15 ᠶᠦᠳᠠᠢᠴᠤᠳ ᠡᠵᠡᠨ ᠢᠰᠦ᠋ᠰ ᠪᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠠᠯᠠᠵᠤ᠂ ᠪᠢᠳᠡᠨ ᠢ ᠬᠥᠭᠡᠭᠡᠭᠰᠡᠨ᠃ ᠲᠡᠳᠡ ᠪᠤᠷᠬᠠᠨ ᠤ ᠳᠤᠷᠠ ᠦᠭᠡᠶᠢᠴᠡᠯ ᠢ ᠬᠦᠷᠭᠡᠵᠦ ᠪᠦᠬᠦ ᠬᠥᠮᠦᠨ ᠲᠡᠢ ᠳᠠᠢᠰᠤᠩᠨᠠᠨ᠂ 16 ᠪᠢᠳᠡᠨ ᠦ ᠬᠠᠷᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠠᠪᠤᠷᠠᠬᠤ ᠶᠢᠨ ᠲᠥᠯᠥᠭᠡ ᠦᠭᠡ ᠶᠠᠷᠢᠬᠤ ᠶᠢ ᠬᠠᠷᠰᠢᠯᠠᠵᠤ ᠪᠠᠢᠨᠠ᠃ ᠡᠢᠨ ᠬᠦ ᠲᠡᠳᠡᠨ ᠦ ᠭᠡᠮ ᠨᠢᠭᠦᠯ ᠳᠦᠭᠦᠷᠴᠦ ᠪᠤᠷᠬᠠᠨ ᠤ ᠬᠢᠯᠢᠩ ᠡᠴᠦᠰ ᠲᠡᠭᠡᠨ ᠲᠡᠳᠡᠨ ᠦ ᠳᠡᠭᠡᠷᠡ 1 ᠪᠠᠭᠤᠯᠠ᠃
ᠤᠴᠠᠷᠠᠨ ᠵᠣᠯᠭᠠᠬᠤ ᠶᠢᠨ ᠲᠡᠮᠡᠦᠯᠦᠯ
17 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡ ᠲᠠ ᠨᠠᠷ ᠠᠴᠠ ᠰᠡᠳᠬᠢᠯ ᠢᠶᠠᠷ ᠪᠤᠰᠤ᠂ ᠪᠡᠶᠡ ᠪᠡᠷ ᠢᠶᠠᠨ ᠲᠦᠷ ᠵᠠᠭᠤᠷᠠ ᠰᠠᠯᠵᠤ ᠥᠨᠥᠴᠢᠷᠡᠭᠰᠡᠨ ᠢᠶᠡᠷ ᠨᠢᠭᠤᠷ ᠵᠣᠯᠭᠠᠬᠤ ᠶᠢ ᠶᠡᠬᠡᠳᠡ ᠬᠦᠰᠡᠵᠦ ᠮᠠᠰᠢ ᠴᠢᠷᠮᠠᠢᠭᠰᠠᠨ ᠪᠢᠯᠡ᠃ 18 ᠲᠡᠢᠮᠦ ᠡᠴᠡ ᠪᠢᠳᠡ ᠲᠠᠨ ᠤ ᠲᠡᠨᠳᠡ ᠣᠴᠢᠬᠤ ᠭᠡᠰᠡᠨ᠂ ᠫᠠᠦ᠋ᠯ ᠪᠢ ᠨᠢᠭᠡ ᠪᠢᠰᠢ ᠤᠳᠠᠭᠠ ᠲᠡᠭᠡᠭᠰᠡᠨ ᠪᠣᠯᠪᠠᠴᠤ ᠰᠠᠲ᠋ᠠᠨ ᠪᠢᠳᠡᠨ ᠢ ᠰᠠᠭᠠᠲᠠᠭᠠᠵᠠᠢ᠃ 19 ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠢᠷᠡᠬᠦ ᠳᠦ᠂ ᠲᠡᠭᠦᠨ ᠦ ᠡᠮᠦᠨᠡᠬᠢ ᠪᠢᠳᠡᠨ ᠦ ᠡᠷᠡᠮᠡᠯᠵᠡᠯ᠂ ᠪᠠᠶᠠᠰᠤᠯ ᠪᠤᠶᠤ ᠰᠠᠢᠷᠬᠠᠬᠤ ᠲᠢᠲᠢᠮ ᠨᠢ ᠶᠠᠭᠤ ᠪᠤᠢ︖ ᠲᠠ ᠨᠠᠷ ᠪᠢᠰᠢ ᠭᠡᠵᠢ ᠤᠤ︖ 20 ᠲᠠ ᠨᠠᠷ ᠪᠣᠯ ᠪᠢᠳᠡᠨ ᠦ ᠠᠯᠳᠠᠷ ᠪᠠ ᠪᠠᠶᠠᠰᠤᠯ ᠮᠥᠨ᠃