ᠨᠢᠭᠡᠳᠦᠭᠡᠷ ᠲᠧᠰᠠᠯᠦ᠋ᠨᠢᠺ ᠳᠥᠷᠪᠡ
ᠠᠷᠢᠭᠤᠨ ᠪᠠᠢᠳᠠᠯ ᠪᠠ ᠬᠠᠢᠷᠠ
1 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡ ᠡᠵᠡᠨ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠭᠤᠶᠤᠵᠤ ᠢᠳᠬᠠᠶᠠ᠃ ᠬᠡᠷᠬᠢᠨ ᠠᠮᠢᠳᠤᠷᠠᠵᠤ ᠪᠤᠷᠬᠠᠨ ᠢ ᠪᠠᠶᠠᠰᠬᠠᠬᠤ ᠶᠣᠰᠣᠲᠠᠢ ᠶᠢ ᠲᠠ ᠨᠠᠷ ᠪᠢᠳᠡᠨ ᠡᠴᠡ ᠰᠤᠷᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠶᠣᠰᠣᠭᠠᠷ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠲᠤᠯᠠ ᠨᠡᠩ ᠢᠯᠡᠭᠦᠦ ᠲᠡᠷᠡ ᠶᠣᠰᠣᠭᠠᠷ ᠠᠮᠢᠳᠤᠷᠠ᠃ 2 ᠤᠴᠢᠷ ᠨᠢ᠂ ᠡᠵᠡᠨ ᠢᠰᠦ᠋ᠰ ᠤᠨ ᠡᠮᠦᠨᠡ ᠡᠴᠡ ᠪᠢᠳᠡ ᠲᠠ ᠨᠠᠷ ᠲᠤ ᠶᠠᠮᠠᠷ ᠵᠠᠷᠯᠢᠭ ᠤᠳ ᠥᠭᠭᠥᠭᠰᠡᠨ ᠢ ᠲᠠ ᠨᠠᠷ ᠮᠡᠳᠡᠨᠡ᠃ 3 ᠪᠤᠷᠬᠠᠨ ᠤ ᠰᠠᠨᠠᠭᠠ ᠪᠣᠯ᠄ ᠲᠠ ᠨᠠᠷ ᠤᠨ ᠠᠷᠢᠭᠤᠨ ᠪᠠᠢᠳᠠᠯ᠂ ᠲᠤᠬᠠᠢᠯᠠᠪᠠᠯ ᠰᠠᠳᠤᠷ ᠰᠠᠮᠠᠭᠤᠨ ᠠᠴᠠ ᠵᠠᠢᠳᠠᠬᠤ᠂ 4 ᠬᠥᠮᠦᠨ ᠪᠦᠷᠢ ᠪᠡᠶᠡ ᠪᠡᠨ ᠠᠷᠢᠭᠤᠨ ᠪᠠ ᠬᠦᠨᠳᠦᠯᠡᠯ ᠲᠡᠢ ᠪᠠᠢᠯᠭᠠᠬᠤ 2 5 (ᠪᠤᠷᠬᠠᠨ ᠢ ᠲᠠᠨᠢᠳᠠᠭ ᠦᠭᠡᠢ ᠬᠠᠷᠢᠴᠤᠳ ᠮᠡᠲᠦ ᠰᠢᠨᠤᠨ ᠲᠠᠴᠢᠶᠠᠬᠤ ᠦᠭᠡᠢ ᠪᠠᠷ)᠂ 6 ᠪᠠᠰᠠ ᠬᠡᠨ ᠴᠤ ᠡᠨᠡ ᠲᠠᠯᠠ ᠪᠠᠷ ᠦᠯᠦ ᠭᠠᠵᠢᠬᠤ᠂ ᠠᠬᠠ ᠳᠡᠭᠦᠦ᠂ ᠡᠰᠡᠪᠡᠯ ᠡᠭᠡᠴᠢ ᠳᠡᠭᠦᠦ ᠪᠡᠨ ᠦᠯᠦ ᠠᠰᠢᠭᠯᠠᠬᠤ (ᠤᠴᠢᠷ ᠨᠢ ᠪᠢᠳᠡᠨ ᠦ ᠤᠷᠢᠳᠴᠢᠯᠠᠨ ᠬᠡᠯᠡᠵᠦ ᠠᠩ᠋ᠬᠠᠷᠤᠭᠤᠯᠤᠭᠰᠠᠨ ᠶᠣᠰᠣᠭᠠᠷ ᠡᠵᠡᠨ ᠡᠳᠡᠭᠡᠷ ᠶᠠᠪᠤᠳᠠᠯ ᠢ ᠰᠢᠳᠬᠡᠨᠡ) ᠵᠡᠷᠭᠡ ᠶᠤᠮ᠃ 7 ᠤᠴᠢᠷ ᠨᠢ᠂ ᠪᠤᠷᠬᠠᠨ ᠪᠢᠳᠡᠨ ᠢ ᠪᠤᠵᠠᠷ ᠪᠠᠢᠳᠠᠯ ᠳᠤ ᠪᠤᠰᠤ᠂ ᠬᠠᠷᠢᠨ ᠠᠷᠢᠭᠤᠨ ᠳᠤ ᠳᠠᠭᠤᠳᠠᠭᠰᠠᠨ ᠪᠢᠯᠡ᠃ 8 ᠲᠡᠢᠮᠦ ᠶᠢᠨ ᠲᠤᠯᠠᠳᠠ ᠡᠨᠡ ᠵᠠᠷᠯᠢᠭ ᠢ ᠣᠭᠣᠷᠣᠭᠴᠢ ᠨᠢ ᠬᠥᠮᠦᠨ ᠢ ᠣᠭᠣᠷᠴᠤ ᠪᠠᠢᠭᠠ ᠪᠤᠰᠤ᠂ ᠬᠠᠷᠢᠨ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠨ ᠰᠣᠶᠣᠷᠬᠠᠳᠠᠭ ᠪᠤᠷᠬᠠᠨ ᠢ ᠣᠭᠣᠷᠴᠤ ᠪᠠᠢᠭᠠ ᠶᠤᠮ᠃
9 ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠬᠠᠢᠷᠠ ᠶᠢᠨ ᠲᠠᠯᠠ ᠪᠠᠷ ᠲᠠ ᠨᠠᠷ ᠲᠤ ᠪᠢᠴᠢᠬᠦ ᠬᠡᠷᠡᠭ ᠦᠭᠡᠢ ᠪᠠᠢᠨᠠ᠃ ᠤᠴᠢᠷ ᠨᠢ᠂ ᠪᠡᠶᠡ ᠪᠡᠶᠡ ᠪᠡᠨ ᠬᠠᠢᠷᠠᠯᠠᠬᠤ ᠶᠢ ᠲᠠ ᠨᠠᠷ ᠪᠤᠷᠬᠠᠨ ᠢᠶᠠᠷ ᠵᠢᠭᠠᠯᠭᠠᠭᠰᠠᠨ ᠪᠥᠭᠡᠳ 10 ᠪᠦᠬᠦ ᠮᠠᠺᠧᠳᠣᠨᠢᠶᠠ ᠶᠢᠨ ᠪᠦᠬᠦ ᠠᠬᠠ ᠳᠡᠭᠦᠦ ᠶᠢᠨ ᠳᠤᠮᠳᠠ ᠦᠨᠡᠨ ᠳᠡᠭᠡᠨ ᠲᠡᠢᠨ ᠬᠦ ᠬᠢᠵᠦ ᠪᠠᠢᠨᠠ᠃ ᠭᠡᠪᠡᠴᠦ ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠢ ᠢᠳᠬᠠᠶᠠ᠂ ᠢᠯᠡᠭᠦᠦ ᠲᠡᠭᠡᠵᠦ ᠬᠢ᠃ 11 ᠪᠠᠰᠠ ᠪᠢᠳᠡᠨ ᠦ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠬᠥᠮᠦᠨ ᠪᠦᠷᠢ ᠲᠠᠢᠪᠤᠩ ᠠᠮᠢᠳᠤᠷᠠᠵᠤ᠂ ᠥᠪᠡᠷ ᠦᠨ ᠢᠶᠠᠨ ᠬᠡᠷᠡᠭ ᠲᠦ ᠰᠠᠨᠠᠭᠠ ᠲᠠᠯᠪᠢᠨ ᠥᠪᠡᠷ ᠦᠨ ᠭᠠᠷ ᠢᠶᠠᠷ ᠢᠶᠠᠨ ᠠᠵᠢᠯᠯᠠᠬᠤ ᠪᠠᠷ ᠴᠢᠷᠮᠠᠢ᠃ 12 ᠲᠡᠭᠡᠪᠡᠯ ᠲᠠ ᠨᠠᠷ ᠭᠠᠳᠠᠨᠠ ᠶᠢᠨ ᠬᠥᠮᠦᠰ ᠲᠦ ᠬᠦᠨᠳᠦᠳᠬᠡᠭᠳᠡᠨ ᠠᠮᠢᠳᠤᠷᠠᠬᠤ ᠪᠥᠭᠡᠳ ᠬᠡᠨ ᠳᠦ ᠴᠤ ᠲᠡᠭᠡᠭᠡᠷᠡ ᠪᠣᠯᠬᠤ ᠦᠭᠡᠢ᠃
ᠠᠮᠢᠯᠠᠯᠲᠠ
13 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠨᠣᠢᠷᠰᠣᠭᠰᠠᠨ ᠬᠥᠮᠦᠰ ᠦᠨ ᠲᠠᠯᠠ ᠪᠠᠷ ᠦᠯᠦ ᠮᠡᠳᠡᠬᠦ ᠪᠠ ᠡᠷᠡᠮᠡᠯᠵᠡᠯ ᠦᠭᠡᠢ ᠲᠡᠳᠡᠭᠡᠷ ᠬᠥᠮᠦᠨ ᠮᠡᠲᠦ ᠭᠠᠰᠢᠭᠤᠳᠠᠬᠤ ᠶᠢ ᠴᠢᠨᠢ ᠪᠢᠳᠡ ᠬᠦᠰᠡᠬᠦ ᠦᠭᠡᠢ᠃ 14 ᠪᠢᠳᠡ ᠢᠰᠦ᠋ᠰ ᠤᠨ ᠨᠠᠰᠤ ᠪᠠᠷᠠᠵᠤ ᠠᠮᠢᠯᠠᠭᠰᠠᠨ ᠢ ᠢᠲᠡᠭᠡᠳᠡᠭ᠃ ᠮᠥᠨ ᠪᠤᠷᠬᠠᠨ ᠪᠡᠷ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠨᠣᠢᠷᠰᠣᠭᠰᠠᠳ ᠢ ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠠᠪᠴᠢᠷᠠᠨᠠ ᠭᠡᠳᠡᠭ ᠢ ᠢᠲᠡᠭᠡᠳᠡᠭ᠃ 15 ᠪᠢᠳᠡ ᠡᠵᠡᠨ ᠦ ᠦᠭᠡ ᠪᠡᠷ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠄ ᠡᠵᠡᠨ ᠢᠷᠡᠲᠡᠯᠡ ᠠᠮᠢᠳᠤ ᠪᠠᠷ ᠦᠯᠡᠳᠡᠭᠴᠢᠳ ᠮᠠᠨᠢ ᠨᠣᠢᠷᠰᠣᠭᠰᠠᠳ ᠠᠴᠠ ᠬᠡᠷᠬᠢᠪᠡᠴᠦ ᠲᠦᠷᠦᠭᠦᠯᠡᠬᠦ ᠦᠭᠡᠢ᠃ 16 ᠤᠴᠢᠷ ᠨᠢ᠂ ᠵᠠᠷᠯᠢᠭ ᠤᠨ ᠬᠠᠰᠬᠢᠷᠤᠯᠲᠠ᠂ ᠲᠩᠷᠢ ᠶᠢᠨ ᠲᠡᠷᠢᠭᠦᠨ ᠡᠯᠴᠢ ᠶᠢᠨ ᠳᠠᠭᠤᠳᠠᠯᠲᠠ ᠪᠠ ᠪᠤᠷᠬᠠᠨ ᠤ ᠪᠦᠷᠢᠶᠡᠨ ᠳᠠᠭᠤᠨ ᠤ ᠬᠠᠮᠲᠤ ᠡᠵᠡᠨ ᠥᠪᠡᠷ ᠢᠶᠡᠨ ᠲᠩᠷᠢ ᠡᠴᠡ ᠪᠠᠭᠤᠵᠤ ᠢᠷᠡᠬᠦ ᠳᠦ᠂ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠦᠬᠦᠭᠰᠡᠳ ᠲᠦᠷᠦᠭᠦᠨ ᠳᠦᠨᠢ ᠪᠣᠰᠴᠤ᠂ 17 ᠳᠠᠷᠠᠭᠠ ᠨᠢ᠂ ᠠᠮᠢᠳᠤ ᠦᠯᠡᠳᠡᠭᠴᠢᠳ ᠮᠠᠨᠢ ᠲᠡᠳᠡᠨ ᠲᠡᠢ ᠬᠠᠮᠲᠤ ᠡᠭᠦᠯᠡᠰ ᠦᠨ ᠳᠣᠲᠣᠷᠠ ᠠᠪᠠᠴᠢᠭᠳᠠᠵᠤ᠂ ᠣᠭᠲᠠᠷᠭᠤᠢ ᠳᠤ ᠡᠵᠡᠨ ᠳᠦ ᠪᠠᠷᠠᠭᠠᠯᠬᠠᠨᠠ᠃ ᠢᠩᠭᠢᠭᠡᠳ ᠪᠢᠳᠡ ᠡᠵᠡᠨ ᠲᠡᠢ ᠦᠷᠭᠦᠯᠵᠢᠳᠡ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ᠃ 18 ᠲᠡᠢᠮᠦ ᠡᠴᠡ ᠡᠨᠡ ᠦᠭᠡ ᠪᠡᠷ ᠪᠡᠶᠡ ᠪᠡᠶᠡ ᠪᠡᠨ ᠲᠠᠢᠳᠬᠤᠷᠠᠭᠤᠯᠵᠠᠭᠠ᠃