ᠨᠢᠭᠡᠳᠦᠭᠡᠷ ᠲᠧᠰᠠᠯᠦ᠋ᠨᠢᠺ ᠲᠠᠪᠤ
ᠡᠵᠡᠨ ᠢᠷᠡᠬᠦ ᠳᠦ ᠪᠡᠯᠡᠬᠡᠨ ᠪᠠᠢ
1 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠡᠷᠡ ᠴᠠᠭ ᠬᠤᠭᠤᠴᠠᠭᠠᠨ ᠤ ᠲᠠᠯᠠ ᠪᠠᠷ ᠪᠢᠴᠢᠬᠦ ᠬᠡᠷᠡᠭ ᠦᠭᠡᠢ ᠪᠠᠢᠨᠠ᠃ 2 ᠤᠴᠢᠷ ᠨᠢ᠂ ᠡᠵᠡᠨ ᠦ ᠡᠳᠦᠷ ᠪᠣᠯ ᠰᠥᠨᠢ ᠶᠢᠨ ᠬᠤᠯᠠᠭᠠᠢᠴᠢ ᠮᠡᠲᠦ ᠢᠷᠡᠬᠦ ᠶᠢ ᠲᠠ ᠨᠠᠷ ᠥᠪᠡᠷᠰᠡᠳ ᠢᠶᠡᠨ ᠲᠣᠳᠣᠷᠬᠠᠢ ᠮᠡᠳᠡᠨᠡ᠃ 3 ᠬᠥᠮᠦᠰ᠄ 《ᠠᠮᠤᠷ ᠪᠠᠢᠨᠠ᠂ ᠠᠶᠤᠯ ᠦᠭᠡᠢ》 ᠭᠡᠵᠦ ᠪᠠᠢᠲᠠᠯᠠ᠂ ᠵᠢᠷᠮᠦᠰᠦᠨ ᠪᠦᠰᠡᠭᠦᠢ ᠳᠦ ᠲᠥᠷᠥᠯᠲᠡ ᠶᠢᠨ ᠡᠪᠡᠷᠰᠢᠶᠡᠯ ᠢᠷᠡᠬᠦ ᠮᠡᠲᠦ ᠭᠡᠨᠡᠳᠲᠡ ᠶᠢᠨ ᠰᠦᠢᠷᠡᠯ ᠲᠡᠳᠡᠨ ᠳᠦ ᠬᠦᠷᠴᠦ ᠢᠷᠡᠨᠡ᠃ ᠲᠡᠳᠡ ᠶᠡᠷᠦ ᠮᠤᠯᠲᠤᠷᠠᠬᠤ ᠦᠭᠡᠢ᠃ 4 ᠬᠠᠷᠢᠨ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ᠂ ᠲᠠ ᠨᠠᠷ ᠬᠠᠷᠠᠩ᠋ᠭᠤᠢ ᠳᠣᠲᠣᠷᠠ ᠪᠠᠢᠳᠠᠭ ᠪᠢᠰᠢ ᠪᠣᠯᠬᠣᠷ ᠲᠡᠷᠡ ᠡᠳᠦᠷ ᠨᠢ ᠬᠤᠯᠠᠭᠠᠢᠴᠢ ᠮᠡᠲᠦ ᠲᠠ ᠨᠠᠷ ᠢ ᠴᠣᠴᠢᠷᠳᠠᠭᠤᠯᠬᠤ ᠪᠢᠰᠢ᠃ 5 ᠲᠠ ᠨᠠᠷ ᠪᠦᠭᠦᠳᠡᠭᠡᠷ ᠢᠶᠡᠨ ᠭᠡᠷᠡᠯ ᠦᠨ ᠬᠡᠦᠬᠡᠳ ᠤᠳ᠂ ᠡᠳᠦᠷ ᠦᠨ ᠬᠡᠦᠬᠡᠳ ᠤᠳ ᠮᠥᠨ᠃ ᠪᠢᠳᠡ ᠰᠥᠨᠢ ᠶᠢᠨ ᠬᠢ ᠪᠢᠰᠢ᠂ ᠬᠠᠷᠠᠩ᠋ᠭᠤᠢ ᠶᠢᠨ ᠬᠢ ᠴᠤ ᠪᠢᠰᠢ᠃ 6 ᠡᠢᠮᠦ ᠡᠴᠡ ᠪᠢᠳᠡ ᠪᠤᠰᠤᠳ ᠲᠠᠢ ᠠᠳᠠᠯᠢ ᠤᠨᠲᠠᠵᠤ ᠪᠣᠯᠬᠤ ᠦᠭᠡᠢ᠂ ᠰᠡᠷᠡᠮᠵᠢ ᠲᠠᠢ᠂ ᠰᠡᠷᠭᠡᠢ ᠪᠠᠢᠵᠠᠭᠠᠶᠠ᠃ 7 ᠤᠴᠢᠷ ᠨᠢ᠂ ᠤᠨᠲᠠᠭᠴᠢᠳ ᠰᠥᠨᠢ ᠤᠨᠲᠠᠵᠤ᠂ ᠰᠣᠭᠲᠣᠭᠴᠢᠳ ᠴᠤ ᠰᠥᠨᠢ ᠰᠣᠭᠲᠣᠳᠠᠭ᠃ 8 ᠬᠠᠷᠢᠨ ᠪᠢᠳᠡ ᠡᠳᠦᠷ ᠦᠨ ᠬᠢ ᠲᠤᠯᠠ ᠰᠡᠷᠭᠡᠢ ᠪᠠᠢᠵᠤ᠂ ᠢᠲᠡᠭᠡᠯ ᠪᠠ ᠬᠠᠢᠷᠠ ᠶᠢᠨ ᠡᠯᠢᠭᠡᠪᠴᠢ᠂ ᠠᠪᠤᠷᠠᠯ ᠤᠨ ᠡᠷᠡᠮᠡᠯᠵᠡᠯ ᠲᠡᠢ ᠳᠤᠭᠤᠯᠠᠭᠠ ᠶᠢ ᠡᠮᠦᠰᠴᠡᠭᠡᠶᠡ᠃ 9 ᠤᠴᠢᠷ ᠨᠢ᠂ ᠪᠤᠷᠬᠠᠨ ᠪᠢᠳᠡᠨ ᠢ ᠬᠢᠯᠢᠩ ᠳᠤ ᠬᠦᠷᠭᠡᠬᠦ ᠪᠤᠰᠤ᠂ ᠬᠠᠷᠢᠨ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢᠶᠠᠷ ᠳᠠᠮᠵᠢᠭᠤᠯᠤᠨ ᠠᠪᠤᠷᠠᠯ ᠳᠤ ᠬᠦᠷᠭᠡᠬᠦ ᠪᠡᠷ ᠲᠣᠭᠲᠠᠭᠠᠭᠰᠠᠨ ᠪᠥᠭᠡᠳ 10 ᠪᠢᠳᠡ ᠰᠡᠷᠢᠭᠰᠡᠨ ᠴᠤ ᠪᠠᠢ᠂ ᠤᠨᠲᠠᠭᠰᠠᠨ ᠴᠤ ᠪᠠᠢ᠂ ᠾᠷᠢᠰᠲ᠋ᠣᠰ ᠥᠪᠡᠷ ᠲᠡᠢ ᠪᠡᠨ ᠬᠠᠮᠲᠤ ᠠᠮᠢᠳᠤᠷᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠪᠢᠳᠡᠨ ᠦ ᠲᠥᠯᠥᠭᠡ ᠨᠠᠰᠤ ᠪᠠᠷᠠᠭᠰᠠᠨ ᠶᠤᠮ᠃ 11 ᠡᠢᠮᠦ ᠡᠴᠡ ᠲᠠ ᠨᠠᠷ ᠣᠳᠣ ᠶᠢᠨ ᠬᠢᠵᠦ ᠪᠠᠢᠭᠠ ᠪᠠᠷ ᠢᠶᠠᠨ ᠪᠡᠶᠡ ᠪᠡᠶᠡ ᠪᠡᠨ ᠵᠣᠷᠢᠭᠵᠢᠭᠤᠯᠵᠤ᠂ ᠪᠡᠶᠡ ᠪᠡᠶᠡ ᠪᠡᠨ ᠪᠣᠰᠬᠠᠨ ᠪᠠᠢᠭᠤᠯᠤᠭᠲᠤᠨ᠃
ᠠᠮᠢᠳᠤᠷᠠᠯ ᠤᠨ ᠵᠢᠭᠠᠪᠤᠷᠢ ᠨᠤᠭᠤᠳ
12 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡ ᠲᠠ ᠨᠠᠷ ᠠᠴᠠ ᠭᠤᠶᠤᠶᠠ᠂ ᠲᠠ ᠨᠠᠷ ᠤᠨ ᠳᠤᠮᠳᠠ ᠵᠦᠳᠡᠷᠡᠵᠦ ᠡᠵᠡᠨ ᠦ ᠳᠣᠲᠣᠷᠠ ᠲᠠ ᠨᠠᠷ ᠢ ᠮᠠᠩᠯᠠᠢᠯᠠᠨ ᠶᠠᠪᠤᠵᠤ᠂ ᠲᠠ ᠨᠠᠷ ᠢ ᠰᠡᠷᠡᠮᠵᠢᠯᠡᠭᠦᠯᠳᠡᠭ᠌ ᠬᠥᠮᠦᠰ ᠢ ᠠᠩ᠋ᠬᠠᠷᠴᠤ᠂ 13 ᠠᠵᠢᠯ ᠢ ᠨᠢ ᠪᠣᠳᠣᠭᠠᠳ ᠬᠠᠢᠷᠠ ᠶᠢᠨ ᠰᠡᠳᠬᠢᠯ ᠢᠶᠠᠷ ᠲᠡᠳᠡᠨ ᠢ ᠡᠷᠬᠢᠮᠯᠡᠨ ᠬᠦᠨᠳᠦᠳᠬᠡ᠃ ᠲᠠ ᠨᠠᠷ ᠪᠡᠶᠡ ᠪᠡᠶᠡ ᠲᠠᠢ ᠪᠠᠨ ᠡᠪ ᠲᠡᠢ ᠠᠮᠢᠳᠤᠷᠠᠭᠠᠷᠠᠢ᠃ 14 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠲᠠ ᠨᠠᠷ ᠲᠤ ᠵᠥᠪᠯᠡᠶᠡ᠃ ᠪᠦᠲᠦᠯ ᠦᠭᠡᠢ ᠬᠥᠮᠦᠰ ᠢ ᠰᠡᠷᠡᠮᠵᠢᠯᠡᠭᠦᠯᠵᠦ᠂ ᠠᠶᠤᠮᠠᠬᠠᠢ ᠬᠥᠮᠦᠰ ᠢ ᠵᠣᠷᠢᠭᠵᠢᠭᠤᠯᠤᠨ᠂ ᠭᠤᠢᠪᠢᠮᠠᠲᠠᠭᠠᠢ ᠬᠥᠮᠦᠰ ᠢ ᠲᠦᠰᠢᠵᠦ᠂ ᠬᠥᠮᠦᠨ ᠪᠦᠬᠦᠨ ᠳᠦ ᠲᠡᠪᠴᠢᠶᠡᠷᠢ ᠲᠠᠢ ᠪᠠᠢ᠃ 15 ᠠᠩ᠋ᠬᠠᠷᠤᠭᠲᠤᠨ᠂ ᠲᠠ ᠨᠠᠷ ᠤᠨ ᠬᠡᠨ ᠨᠢ ᠴᠤ ᠪᠢᠲᠡᠭᠡᠢ ᠮᠠᠭᠤ ᠶᠢ ᠮᠠᠭᠤ ᠪᠠᠷ ᠬᠠᠷᠢᠭᠤᠯ᠃ ᠪᠡᠶᠡ ᠪᠡᠶᠡ ᠳᠡᠭᠡᠨ ᠴᠤ᠂ ᠪᠦᠬᠦ ᠬᠥᠮᠦᠨ ᠳᠦ ᠴᠤ ᠦᠷᠭᠦᠯᠵᠢᠳᠡ ᠰᠠᠢᠨ ᠢ ᠦᠢᠯᠡᠳᠬᠦ ᠪᠡᠷ ᠲᠡᠮᠡᠦᠯᠦᠭᠲᠦᠨ᠃ 16 ᠦᠷᠭᠦᠯᠵᠢ ᠪᠠᠶᠠᠰᠤᠭᠲᠤᠨ᠂ 17 ᠲᠠᠰᠤᠷᠠᠯᠲᠠ ᠦᠭᠡᠢ ᠳᠠᠭᠠᠳᠬᠠᠭᠲᠤᠨ᠂ 18 ᠠᠯᠢᠪᠠ ᠳᠤ ᠲᠠᠯᠠᠷᠬᠠᠭᠠᠷᠠᠢ᠂ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠲᠠ ᠨᠠᠷ ᠲᠤ ᠬᠠᠨᠳᠤᠭᠰᠠᠨ ᠪᠤᠷᠬᠠᠨ ᠤ ᠬᠦᠰᠡᠯ ᠪᠣᠯ ᠡᠨᠡ ᠮᠥᠨ᠃ 19 ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠪᠦᠦ ᠳᠠᠷᠤ 3 ᠃ 20 ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢ ᠪᠦᠦ ᠬᠥᠩᠭᠡᠪᠴᠢᠯᠡ᠃ 21 ᠪᠦᠭᠦᠳᠡ ᠶᠢ ᠰᠢᠯᠭᠠᠵᠤ᠂ ᠰᠠᠢᠨ ᠢ ᠨᠢ ᠪᠠᠷᠢᠮᠲᠠᠯᠠ᠂ 22 ᠶᠠᠩᠵᠤ ᠪᠦᠷᠢ ᠶᠢᠨ ᠮᠠᠭᠤ ᠠᠴᠠ ᠵᠠᠢᠯᠠ᠃
23 ᠠᠮᠤᠭᠤᠯᠠᠩ ᠤᠨ ᠪᠤᠷᠬᠠᠨ ᠥᠪᠡᠷ ᠢᠶᠡᠨ ᠲᠠ ᠨᠠᠷ ᠢ ᠪᠦᠲᠦᠨ ᠢᠶᠡᠷ ᠠᠷᠢᠭᠤᠰᠬᠠᠵᠤ᠂ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢᠷᠡᠲᠡᠯᠡ ᠲᠠ ᠨᠠᠷ ᠤᠨ ᠪᠦᠲᠦᠨ ᠰᠦᠨᠡᠰᠦ᠂ ᠰᠠᠨᠠᠭᠠ᠂ ᠪᠡᠶᠡ ᠥ ᠦᠭᠡᠢ ᠬᠠᠮᠠᠭᠠᠯᠠᠭᠳᠠᠬᠤ ᠪᠣᠯᠲᠤᠭᠠᠢ᠃ 24 ᠲᠠ ᠨᠠᠷ ᠢ ᠳᠠᠭᠤᠳᠠᠭᠴᠢ ᠨᠢ ᠢᠲᠡᠭᠡᠮᠵᠢᠲᠠᠢ ᠪᠣᠯᠬᠣᠷ ᠥᠪᠡᠷ ᠢᠶᠡᠨ ᠪᠡᠯᠡᠶᠡᠭᠦᠯᠦᠨᠡ᠃
25 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡᠨ ᠦ ᠲᠥᠯᠥᠭᠡ ᠳᠠᠭᠠᠳᠬᠠᠭᠠᠷᠠᠢ᠃
26 ᠬᠠᠮᠤᠭ ᠠᠬᠠ ᠳᠡᠭᠦᠦ ᠳᠦ ᠠᠷᠢᠭᠤᠨ ᠦᠨᠦᠰᠦᠯᠲᠡ ᠪᠡᠷ ᠮᠡᠨᠳᠦ ᠬᠦᠷᠭᠡᠭᠡᠷᠡᠢ᠃ 27 ᠪᠢ ᠡᠵᠡᠨ ᠦ ᠡᠮᠦᠨᠡ ᠡᠴᠡ ᠲᠠ ᠨᠠᠷ ᠲᠤ ᠵᠠᠬᠢᠶᠠ᠂ ᠡᠨᠡ ᠵᠠᠬᠢᠳᠠᠯ ᠢ ᠪᠦᠬᠦ ᠠᠬᠠ ᠳᠡᠭᠦᠦ ᠨᠠᠷ ᠲᠤ ᠤᠩ᠋ᠰᠢᠭᠤᠯ᠃
28 ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃