ᠶᠠᠺᠣᠪ ᠭᠤᠷᠪᠠ
ᠬᠡᠯᠡ ᠪᠡᠨ ᠵᠠᠬᠢᠷ
1 ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ᠂ ᠲᠠ ᠨᠠᠷ ᠠᠴᠠ ᠣᠯᠠᠨ ᠬᠥᠮᠦᠨ ᠪᠠᠭᠰᠢ ᠪᠣᠯᠣᠭᠤᠵᠠᠢ᠂ ᠪᠠᠭᠰᠢᠯᠠᠳᠠᠭ ᠪᠢᠳᠡ ᠢᠯᠡᠭᠦᠦ ᠬᠦᠨᠳᠦ ᠰᠢᠭᠦᠭᠳᠡᠨᠡ ᠭᠡᠳᠡᠭ ᠢ ᠮᠡᠳᠡᠭᠲᠦᠨ᠃ 2 ᠤᠴᠢᠷ ᠨᠢ ᠪᠢᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠣᠯᠠᠨ ᠠᠯᠳᠠᠭᠠ ᠭᠠᠷᠭᠠᠳᠠᠭ᠃ ᠬᠡᠷᠪᠡ ᠬᠡᠨ ᠨᠢᠭᠡ ᠨᠢ ᠦᠭᠡ ᠶᠠᠷᠢᠶᠠᠨ ᠳᠡᠭᠡᠷᠡ ᠠᠯᠳᠠᠭᠠ ᠭᠠᠷᠭᠠᠬᠤ ᠦᠭᠡᠢ ᠪᠣᠯ ᠲᠡᠷᠡ ᠨᠢ ᠪᠦᠬᠦ ᠪᠡᠶᠡ ᠪᠡᠨ ᠴᠤ ᠵᠢᠯᠣᠭᠣᠳᠬᠤ ᠴᠢᠳᠠᠯ ᠲᠠᠢ ᠲᠡᠭᠦᠰ ᠬᠥᠮᠦᠨ ᠮᠥᠨ᠃ 3 ᠪᠢᠳᠡ ᠮᠣᠷᠢᠳ ᠢ ᠵᠠᠯᠠᠬᠤ ᠭᠡᠵᠦ ᠠᠮᠠᠨ ᠳᠤᠨᠢ ᠠᠮᠠᠭᠠᠢ ᠬᠢᠪᠡᠯ ᠪᠦᠲᠦᠨ ᠪᠡᠶᠡ ᠶᠢ ᠨᠢ ᠬᠥᠲᠥᠯᠵᠦ ᠴᠢᠳᠠᠨᠠ᠃ 4 ᠣᠩ᠋ᠭᠣᠴᠠ ᠶᠢ ᠦᠵᠡ᠂ ᠣᠩ᠋ᠭᠣᠴᠠ ᠬᠡᠳᠦᠢᠪᠡᠷ ᠮᠤᠨᠳᠠᠭ ᠲᠣᠮᠣ ᠴᠤ᠂ ᠳᠣᠭᠰᠢᠨ ᠰᠠᠯᠬᠢᠨ ᠳᠤ ᠲᠦᠯᠬᠢᠭᠳᠡᠭᠰᠡᠨ ᠴᠤ᠂ ᠥᠴᠦᠬᠡᠨ ᠪᠠᠭᠠ ᠵᠠᠯᠠᠭᠤᠷ ᠢᠶᠠᠷ ᠵᠠᠯᠠᠭᠤᠷᠴᠢᠨ ᠤ ᠰᠠᠨᠠᠭᠰᠠᠨ ᠵᠦᠭ ᠲᠦ ᠬᠥᠲᠥᠯᠥᠭᠳᠡᠨᠡ᠃ 5 ᠲᠡᠭᠦᠨᠴᠢᠯᠡᠨ ᠬᠡᠯᠡ ᠬᠡᠳᠦᠢᠪᠡᠷ ᠪᠢᠴᠢᠬᠠᠨ ᠡᠷᠬᠡᠲᠡᠨ ᠪᠣᠯᠪᠠᠴᠤ ᠶᠡᠬᠡ ᠦᠭᠡ ᠬᠡᠯᠡᠵᠦ ᠪᠠᠷᠳᠠᠮᠨᠠᠳᠠᠭ᠃
6 ᠬᠡᠯᠡ ᠪᠣᠯ ᠭᠠᠯ᠂ ᠬᠡᠯᠡ ᠪᠣᠯ ᠪᠢᠳᠡᠨ ᠦ ᠡᠷᠬᠡᠲᠡᠨ ᠨᠦᠭᠦᠳ ᠦᠨ ᠳᠤᠮᠳᠠ ᠪᠠᠢᠷᠢᠯᠠᠭᠰᠠᠨ ᠵᠥᠪ ᠪᠤᠰᠤ ᠶᠢᠨ ᠶᠢᠷᠲᠢᠨᠴᠦ ᠶᠤᠮ᠃ ᠲᠡᠷᠡ ᠨᠢ ᠪᠦᠲᠦᠨ ᠪᠡᠶᠡ ᠶᠢ ᠪᠤᠵᠠᠷᠯᠠᠵᠤ ᠠᠮᠢᠳᠤᠷᠠᠯ ᠤᠨ ᠵᠠᠮ ᠢ ᠰᠢᠲᠠᠭᠠᠵᠤ᠂ ᠥᠪᠡᠷ ᠢᠶᠡᠨ ᠲᠠᠮᠤ ᠳᠤ ᠰᠢᠲᠠᠭᠠᠭᠳᠠᠳᠠᠭ᠃ 7 ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠡᠯᠡ ᠲᠥᠷᠥᠯ ᠦᠨ ᠠᠷᠢᠶᠠᠲᠠᠨ ᠵᠢᠭᠦᠷᠲᠡᠨ᠂ ᠮᠥᠯᠬᠥᠭᠴᠢ᠂ ᠳᠠᠯᠠᠢ ᠶᠢᠨ ᠠᠮᠢᠲᠠᠨ ᠢ ᠨᠣᠮᠣᠬᠠᠳᠬᠠᠭᠰᠠᠨ ᠪᠥᠭᠡᠳ ᠨᠣᠮᠣᠬᠠᠳᠬᠠᠵᠤ ᠪᠠᠢᠨᠠ᠃ 8 ᠬᠠᠷᠢᠨ ᠬᠡᠯᠡ ᠶᠢ ᠨᠣᠮᠣᠬᠠᠳᠬᠠᠵᠤ ᠴᠢᠳᠠᠬᠤ ᠬᠥᠮᠦᠨ ᠭᠡᠵᠦ ᠦᠭᠡᠢ᠂ ᠬᠡᠯᠡ ᠪᠣᠯ ᠬᠢᠵᠠᠭᠠᠷᠯᠠᠭᠳᠠᠰᠢ ᠦᠭᠡᠢ ᠤᠷᠰᠢᠭ᠂ ᠲᠡᠭᠦᠨ ᠳᠦ ᠦᠬᠦᠯ ᠦᠨ ᠬᠣᠣᠷ ᠳᠦᠭᠦᠷᠡᠩ᠃ 9 ᠪᠢᠳᠡ ᠬᠡᠯᠡ ᠪᠡᠷ ᠡᠵᠡᠨ ᠪᠣᠯᠣᠨ ᠡᠴᠢᠭᠡ ᠶᠢ ᠮᠠᠭᠲᠠᠵᠤ᠂ ᠪᠠᠰᠠ ᠪᠤᠷᠬᠠᠨ ᠤ ᠲᠥᠷᠬᠥ ᠪᠡᠷ ᠪᠦᠲᠦᠭᠡᠭᠳᠡᠭᠰᠡᠨ ᠬᠥᠮᠦᠨ ᠢ ᠬᠠᠷᠢᠶᠠᠳᠠᠭ᠃ 10 ᠨᠢᠭᠡ ᠯᠠ ᠠᠮᠠᠨ ᠠᠴᠠ ᠮᠠᠭᠲᠠᠭᠠᠯ ᠴᠤ᠂ ᠬᠠᠷᠢᠶᠠᠯ ᠴᠤ ᠭᠠᠷᠳᠠᠭ᠃ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠡ᠂ ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ᠃ 11 ᠨᠢᠭᠡ ᠪᠤᠯᠠᠭ ᠤᠨ ᠡᠬᠢ ᠡᠴᠡ ᠠᠮᠲᠠᠲᠤ ᠪᠠ ᠭᠠᠰᠢᠭᠤᠨ ᠤᠰᠤ ᠵᠡᠷᠭᠡᠪᠡᠷ ᠭᠠᠷᠳᠠᠭ ᠪᠢᠯᠡ ᠤᠤ︖ 12 ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠡ᠂ ᠢᠨᠵᠢᠷ ᠤᠨ ᠮᠣᠳᠣᠨ ᠳᠤ ᠴᠢᠳᠦᠨ ᠰᠠᠭᠤᠵᠤ᠂ ᠦᠵᠦᠮ ᠦᠨ ᠮᠣᠳᠣᠨ ᠳᠤ ᠢᠨᠵᠢᠷ ᠤᠨ ᠵᠢᠮᠢᠰ ᠰᠠᠭᠤᠵᠤ ᠴᠢᠳᠠᠨᠠ ᠤᠤ︖ ᠬᠤᠵᠢᠷ ᠲᠠᠢ ᠤᠰᠤ ᠠᠮᠲᠠᠲᠤ ᠤᠰᠤ ᠵᠡᠷᠭᠡᠪᠡᠷ ᠭᠠᠷᠳᠠᠭ ᠪᠤᠯᠠᠭ ᠭᠡᠵᠦ ᠦᠭᠡᠢ᠃
ᠳᠡᠭᠡᠷᠡ ᠡᠴᠡ ᠢᠷᠡᠬᠦ ᠮᠡᠷᠭᠡᠨ ᠤᠬᠠᠭᠠᠨ
13 ᠲᠠ ᠨᠠᠷ ᠤᠨ ᠳᠣᠲᠣᠷᠠᠬᠢ ᠰᠡᠴᠡᠨ ᠮᠡᠷᠭᠡᠨ ᠨᠢ ᠬᠡᠨ ᠪᠤᠢ︖ ᠲᠡᠷᠡ ᠬᠥᠮᠦᠨ ᠰᠠᠢᠨ ᠦᠢᠯᠡ᠂ ᠲᠤᠬᠠᠢᠯᠠᠪᠠᠯ ᠮᠡᠷᠭᠡᠨ ᠤᠬᠠᠭᠠᠨ ᠠᠴᠠ ᠭᠠᠷᠤᠭᠰᠠᠨ ᠤᠶᠠᠬᠠᠨ ᠵᠠᠩ ᠢᠶᠠᠷ ᠦᠢᠯᠡ ᠶᠠᠪᠤᠳᠠᠯ ᠢᠶᠠᠨ ᠦᠵᠡᠭᠦᠯᠦᠭᠲᠦᠨ᠃ 14 ᠬᠡᠷᠪᠡ ᠲᠠ ᠨᠠᠷ ᠤᠨ ᠰᠡᠳᠬᠢᠯ ᠳᠤ ᠬᠣᠣᠷᠲᠤ ᠠᠲᠠᠭᠠ ᠪᠣᠯᠣᠨ ᠬᠤᠪᠢᠨᠴᠢᠷ ᠪᠣᠳᠣᠯ ᠪᠠᠢᠪᠠᠯ᠂ ᠪᠦᠦ ᠰᠠᠢᠷᠬᠠ᠂ ᠦᠨᠡᠨ ᠦ ᠡᠰᠡᠷᠭᠦ ᠬᠤᠳᠠᠯ ᠪᠦᠦ ᠶᠠᠷᠢ᠃ 15 ᠲᠡᠢᠮᠦ ᠮᠡᠷᠭᠡᠨ ᠤᠬᠠᠭᠠᠨ ᠪᠣᠯ ᠳᠡᠭᠡᠷᠡ ᠡᠴᠡ ᠢᠷᠡᠭᠰᠡᠨ ᠪᠢᠰᠢ᠂ ᠬᠠᠷᠢᠨ ᠭᠠᠵᠠᠷ ᠤᠨ ᠬᠢ᠂ ᠠᠳᠤᠭᠤᠰᠤᠨ ᠤ ᠬᠢ ᠪᠠ ᠴᠢᠳᠬᠥᠷ ᠦᠨ ᠬᠢ ᠶᠤᠮ᠃ 16 ᠬᠠᠮᠢᠭᠠ ᠠᠲᠠᠭᠠ ᠪᠣᠯᠣᠨ ᠬᠤᠪᠢᠨᠴᠢᠷ ᠪᠣᠳᠣᠯ ᠪᠠᠢᠪᠠᠯ ᠲᠡᠨᠳᠡ ᠦᠢᠮᠡᠭᠡᠨ ᠪᠠ ᠵᠦᠢᠯ ᠪᠦᠷᠢ ᠶᠢᠨ ᠮᠠᠭᠤ ᠠᠵᠢᠯᠯᠠᠭᠠ ᠪᠠᠢᠳᠠᠭ᠃ 17 ᠳᠡᠭᠡᠷᠡ ᠡᠴᠡ ᠢᠷᠡᠬᠦ ᠮᠡᠷᠭᠡᠨ ᠤᠬᠠᠭᠠᠨ ᠨᠢ ᠡᠬᠢᠯᠡᠭᠡᠳ ᠠᠷᠢᠭᠤᠬᠠᠨ᠂ ᠳᠠᠷᠠᠭᠠ ᠨᠢ ᠠᠮᠤᠭᠤᠯᠠᠩ᠂ ᠵᠥᠭᠡᠯᠡᠨ᠂ ᠨᠣᠮᠣᠬᠠᠨ ᠪᠥᠭᠡᠳ ᠡᠨᠡᠷᠢᠩᠭᠦᠢ ᠪᠠ ᠰᠠᠢᠨ ᠦᠷᠡ ᠵᠢᠮᠢᠰ ᠢᠶᠠᠷ ᠳᠦᠭᠦᠷᠡᠩ ᠪᠠᠢᠳᠠᠭ᠂ ᠬᠡᠯᠪᠡᠢᠭᠦᠦ ᠦᠵᠡᠯ ᠪᠠ ᠬᠣᠶᠠᠷ ᠨᠢᠭᠤᠷ ᠭᠡᠵᠦ ᠪᠠᠢᠬᠤ ᠦᠭᠡᠢ᠃ 18 ᠡᠩᠬᠡ ᠠᠮᠤᠭᠤᠯᠠᠩ ᠪᠣᠯᠭᠠᠭᠴᠢᠳ ᠨᠢ ᠡᠩᠬᠡ ᠠᠮᠤᠭᠤᠯᠠᠩ ᠢᠶᠠᠷ ᠲᠠᠷᠢᠵᠤ ᠵᠥᠪ ᠦᠨ ᠦᠷᠡ ᠵᠢᠮᠢᠰ ᠢ ᠬᠤᠷᠢᠶᠠᠳᠠᠭ᠃