ᠶᠠᠺᠣᠪ ᠲᠠᠪᠤ
ᠢᠳᠬᠠᠯᠭᠠ᠄ ᠲᠡᠰᠪᠦᠷᠢ᠂ ᠳᠠᠭᠠᠳᠬᠠᠯ᠂ ᠠᠪᠤᠷᠠᠯ
1 ᠠᠩ᠋ᠬᠠᠷᠤᠭᠲᠤᠨ᠂ ᠪᠠᠶᠠᠴᠤᠳ ᠡ︕ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠢᠷᠡᠬᠦ ᠵᠣᠪᠠᠯᠠᠩ ᠤᠨ ᠤᠴᠢᠷ ᠲᠤ ᠭᠠᠰᠠᠯᠤᠨ ᠤᠬᠢᠯᠠ᠃ 2 ᠡᠳ᠋ ᠬᠥᠷᠥᠩᠭᠡ ᠴᠢᠨᠢ ᠢᠯᠵᠢᠷᠡᠵᠦ ᠬᠤᠪᠴᠠᠰᠤ ᠬᠤᠨᠠᠷ ᠴᠢᠨᠢ ᠬᠣᠷᠣᠬᠠᠢ ᠳᠤ ᠢᠳᠡᠭᠳᠡᠨ᠂ 3 ᠠᠯᠲᠠ ᠮᠥᠩᠭᠥ ᠴᠢᠨᠢ ᠵᠢᠪᠡᠷᠡᠵᠡᠢ᠃ ᠵᠢᠪᠡ ᠨᠢ ᠲᠠ ᠨᠠᠷ ᠢ ᠵᠠᠭᠠᠯᠳᠤᠬᠤ ᠭᠡᠷᠡᠴᠢ ᠪᠣᠯᠵᠤ᠂ ᠮᠢᠬᠠᠨ ᠪᠡᠶᠡ ᠶᠢ ᠴᠢᠨᠢ ᠭᠠᠯ ᠮᠡᠲᠦ ᠵᠠᠯᠭᠢᠨᠠ᠃ ᠲᠠ ᠨᠠᠷ ᠡᠴᠦᠰ ᠦᠨ ᠡᠳᠦᠷ ᠤᠳ ᠲᠤ ᠡᠳ᠋ ᠬᠥᠷᠥᠩᠭᠡ ᠨᠥᠭᠡᠴᠡᠯᠡᠵᠡᠢ᠃ 4 ᠠᠩ᠋ᠬᠠᠷᠤᠭᠲᠤᠨ᠂ ᠲᠠᠷᠢᠶᠠ ᠶᠢ ᠴᠢᠨᠢ ᠬᠤᠷᠢᠶᠠᠭᠰᠠᠨ ᠠᠵᠢᠯᠴᠢᠳ ᠠᠴᠠ ᠲᠠ ᠨᠠᠷ ᠤᠨ ᠵᠠᠯᠢᠯᠠᠵᠤ ᠠᠪᠤᠭᠰᠠᠨ ᠬᠥᠯᠥᠰᠥ ᠣᠷᠢᠯᠠᠵᠤ᠂ ᠪᠠᠰᠠ ᠬᠤᠷᠢᠶᠠᠭᠴᠢᠳ ᠤᠨ ᠣᠷᠢ ᠳᠠᠭᠤ ᠲᠦᠮᠡᠨ ᠴᠡᠷᠢᠭ ᠤᠨ ᠡᠵᠡᠨ ᠦ ᠰᠣᠨᠣᠷ ᠲᠤ ᠬᠦᠷᠴᠡᠢ᠃ 5 ᠲᠠ ᠨᠠᠷ ᠭᠠᠵᠠᠷ ᠳᠡᠭᠡᠷᠡ ᠲᠠᠩᠰᠤᠭ ᠲᠠᠪᠠᠲᠠᠢ ᠠᠮᠢᠳᠤᠷᠠᠵᠤ᠂ ᠨᠢᠳᠤᠯᠤᠭᠳᠠᠬᠤ ᠡᠳᠦᠷ 3 ᠲᠤ ᠵᠢᠷᠦᠬᠡ ᠪᠡᠨ ᠪᠣᠷᠳᠣᠵᠠᠢ᠃ 6 ᠲᠠ ᠨᠠᠷ ᠵᠥᠪᠲᠦ ᠬᠥᠮᠦᠨ ᠢ ᠶᠠᠯᠠᠯᠠᠨ ᠠᠯᠠᠪᠠ᠂ ᠲᠡᠷᠡ ᠲᠠ ᠨᠠᠷ ᠢ ᠡᠰᠡᠷᠭᠦᠴᠡᠭᠰᠡᠨ ᠦᠭᠡᠢ᠃
7 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠡᠵᠡᠨ ᠢᠷᠡᠲᠡᠯᠡ ᠲᠡᠰᠪᠦᠷᠢ ᠲᠠᠢ ᠪᠠᠢᠭᠠᠷᠠᠢ᠃ ᠠᠩ᠋ᠬᠠᠷᠤᠭᠲᠤᠨ᠂ ᠲᠠᠷᠢᠶᠠᠴᠢᠨ ᠭᠠᠵᠠᠷ ᠤᠨ ᠦᠨᠡᠲᠦ ᠦᠷᠡ ᠵᠢᠮᠢᠰ ᠢ ᠡᠷᠡᠮᠡᠯᠵᠡᠨ᠂ ᠡᠷᠲᠡ ᠶᠢᠨ ᠪᠣᠷᠣᠭᠠᠨ ᠪᠠ ᠣᠷᠣᠢ ᠶᠢᠨ ᠪᠣᠷᠣᠭᠠᠨ ᠣᠷᠣᠲᠠᠯᠠ ᠲᠡᠰᠪᠦᠷᠢ ᠲᠠᠢ ᠪᠠᠢᠳᠠᠭ᠃ 8 ᠲᠠ ᠨᠠᠷ ᠴᠤ ᠲᠡᠰᠪᠦᠷᠢ ᠲᠠᠢ ᠪᠠᠢᠵᠤ᠂ ᠰᠡᠳᠬᠢᠯ ᠢᠶᠠᠨ ᠪᠠᠲᠤ ᠪᠠᠢᠯᠭᠠᠭᠠᠷᠠᠢ᠃ ᠡᠵᠡᠨ ᠢᠷᠡᠬᠦ ᠣᠢᠷᠠᠲᠤᠯᠠ᠃ 9 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠡᠶᠡ ᠪᠡᠶᠡ ᠳᠡᠭᠡᠨ ᠪᠦᠦ ᠭᠣᠮᠣᠳᠠᠵᠠᠭᠠ᠃ ᠲᠡᠭᠡᠪᠡᠯ ᠰᠢᠭᠦᠭᠳᠡᠬᠦ ᠦᠭᠡᠢ ᠪᠠᠢᠬᠤ ᠪᠣᠯᠣᠨᠠ᠃ ᠬᠠᠷᠠ᠂ ᠰᠢᠭᠦᠭᠴᠢ ᠡᠭᠦᠳᠡᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠨᠠ᠃ 10 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠡᠵᠡᠨ ᠦ ᠨᠡᠷᠡ ᠪᠡᠷ ᠶᠠᠷᠢᠭᠰᠠᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠵᠣᠪᠠᠭᠤᠷᠢ ᠪᠠ ᠲᠡᠰᠪᠦᠷᠢ ᠶᠢᠨ ᠳᠠᠭᠤᠷᠢᠶᠠᠯ ᠪᠣᠯᠭᠠᠭᠲᠤᠨ᠃ 11 ᠬᠠᠷᠠ᠂ ᠲᠡᠰᠪᠦᠷᠢ ᠲᠠᠢ ᠬᠥᠮᠦᠰ ᠢ ᠪᠢᠳᠡ ᠪᠤᠶᠠᠨ ᠲᠠᠢ ᠭᠡᠳᠡᠭ᠃ ᠲᠠ ᠨᠠᠷ ᠶᠣᠪ ᠤᠨ ᠲᠡᠰᠪᠦᠷᠢ ᠶᠢᠨ ᠲᠤᠬᠠᠢ ᠰᠣᠨᠣᠰᠴᠤ᠂ ᠡᠵᠡᠨ ᠦ ᠰᠣᠶᠣᠷᠬᠠᠭᠰᠠᠨ ᠲᠡᠭᠦᠰᠬᠡᠯ ᠢ ᠬᠠᠷᠠᠭᠰᠠᠨ᠃ ᠡᠵᠡᠨ ᠪᠣᠯ ᠡᠨᠡᠷᠢᠯ ᠶᠡᠬᠡᠲᠡᠢ᠂ ᠨᠢᠭᠦᠯᠡᠰᠦᠩᠭᠦᠢ ᠶᠤᠮ᠃
12 ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠡ᠂ ᠶᠠᠭᠤᠨ ᠠᠴᠠ ᠤᠷᠢᠳ ᠪᠦᠦ ᠲᠠᠩ᠋ᠭᠠᠷᠢᠭᠯᠠ᠃ ᠲᠩᠷᠢ ᠪᠠᠷ ᠴᠤ᠂ ᠭᠠᠵᠠᠷ ᠢᠶᠠᠷ ᠴᠤ᠂ ᠪᠤᠰᠤᠳ ᠶᠠᠭᠤ ᠪᠠᠷ ᠴᠤ ᠪᠦᠦ ᠲᠠᠩ᠋ᠭᠠᠷᠢᠭᠯᠠ᠃ ᠲᠠ ᠨᠠᠷ ᠲᠡᠢᠮᠦ ᠪᠣᠯ ᠲᠡᠢᠮᠦ᠂ ᠦᠭᠡᠢ ᠪᠣᠯ ᠦᠭᠡᠢ ᠪᠠᠷ ᠨᠢ ᠬᠡᠯᠡᠭᠡᠷᠡᠢ᠃ ᠲᠡᠭᠡᠪᠡᠯ ᠲᠠ ᠨᠠᠷ ᠰᠢᠭᠦᠭᠳᠡᠬᠦ ᠦᠭᠡᠢ ᠶᠤᠮ᠃
13 ᠲᠠ ᠨᠠᠷ ᠤᠨ ᠳᠤᠮᠳᠠ ᠵᠣᠪᠠᠯᠠᠩ ᠲᠠᠢ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠷᠡ ᠬᠥᠮᠦᠨ ᠳᠠᠭᠠᠳᠬᠠᠭᠠᠷᠠᠢ᠃ ᠪᠠᠶᠠᠷ ᠲᠠᠢ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠷᠡ ᠬᠥᠮᠦᠨ ᠮᠠᠭᠲᠠᠭᠠᠷᠠᠢ᠃ 14 ᠲᠠ ᠨᠠᠷ ᠤᠨ ᠳᠤᠮᠳᠠ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠷᠡ ᠪᠡᠷ ᠴᠢᠭᠤᠯᠭᠠᠨ ᠤ ᠠᠬᠠᠯᠠᠭᠴᠢᠳ ᠢ ᠵᠠᠯᠠᠭᠠᠷᠠᠢ᠂ ᠠᠬᠠᠯᠠᠭᠴᠢᠳ ᠡᠵᠡᠨ ᠦ ᠨᠡᠷᠡ ᠪᠡᠷ ᠲᠡᠭᠦᠨ ᠢ ᠲᠣᠰᠣᠯᠠᠵᠤ᠂ 〔ᠲᠡᠭᠦᠨ ᠦ ᠲᠥᠯᠥᠭᠡ〕 ᠳᠠᠭᠠᠳᠬᠠᠭᠠᠷᠠᠢ᠃ 15 ᠢᠲᠡᠭᠡᠯ ᠲᠡᠢ ᠳᠠᠭᠠᠳᠬᠠᠯ ᠨᠢ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠢ ᠠᠪᠤᠷᠠᠬᠤ ᠪᠥᠭᠡᠳ ᠡᠵᠡᠨ ᠲᠡᠭᠦᠨ ᠢ ᠪᠣᠰᠬᠠᠨᠠ᠃ ᠬᠡᠷᠪᠡ ᠲᠡᠷᠡ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠪᠣᠯ ᠬᠡᠯᠲᠦᠷᠢᠭᠦᠯᠦᠭᠳᠡᠬᠦ ᠪᠣᠯᠣᠨᠠ᠃ 16 ᠲᠡᠢᠮᠦ ᠡᠴᠡ ᠪᠡᠶᠡ ᠪᠡᠶᠡ ᠳᠡᠭᠡᠨ ᠨᠢᠭᠦᠯ ᠢᠶᠡᠨ ᠥᠴᠢᠭᠯᠡᠵᠦ᠂ ᠪᠡᠶᠡ ᠪᠡᠶᠡ ᠶᠢᠨ ᠢᠶᠠᠨ ᠲᠥᠯᠥᠭᠡ ᠳᠠᠭᠠᠳᠬᠠᠭᠠᠷᠠᠢ᠃ ᠲᠡᠭᠡᠪᠡᠯ ᠲᠠ ᠨᠠᠷ ᠡᠳᠡᠭᠡᠷᠡᠨᠡ᠂ ᠵᠥᠪᠲᠦ ᠬᠥᠮᠦᠨ ᠦ ᠭᠤᠶᠤᠯᠲᠠ ᠬᠦᠴᠦᠲᠡᠢ ᠪᠥᠭᠡᠳ ᠶᠡᠬᠡ ᠦᠢᠯᠡᠳᠦᠯ ᠲᠡᠢ ᠶᠤᠮ᠃ 17 ᠧᠯᠢᠶᠠ ᠪᠢᠳᠡᠨ ᠲᠡᠢ ᠠᠳᠠᠯᠢᠬᠠᠨ ᠴᠢᠨᠠᠷ ᠲᠠᠢ ᠬᠥᠮᠦᠨ ᠪᠣᠯᠪᠠᠴᠤ ᠪᠣᠷᠣᠭᠠᠨ ᠣᠷᠣᠭᠤᠯᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠳᠠᠭᠠᠳᠬᠠᠨ ᠳᠠᠭᠠᠳᠬᠠᠭᠰᠠᠨ ᠢᠶᠠᠷ ᠭᠠᠵᠠᠷ ᠳᠡᠭᠡᠷᠡ ᠭᠤᠷᠪᠠᠨ ᠵᠢᠯ ᠵᠢᠷᠭᠤᠭᠠᠨ ᠰᠠᠷᠠ ᠶᠢᠨ ᠲᠤᠷᠰᠢ ᠪᠣᠷᠣᠭᠠᠨ ᠣᠷᠣᠭᠰᠠᠨ ᠦᠭᠡᠢ᠃ 18 ᠲᠡᠷᠡ ᠳᠠᠬᠢᠭᠠᠳ ᠳᠠᠭᠠᠳᠬᠠᠭᠰᠠᠨ ᠳᠤ᠂ ᠲᠩᠷᠢ ᠪᠣᠷᠣᠭᠠᠨ ᠣᠷᠣᠭᠤᠯᠵᠤ᠂ ᠭᠠᠵᠠᠷ ᠦᠷᠡ ᠵᠢᠮᠢᠰ ᠤᠷᠭᠤᠭᠤᠯᠵᠠᠢ᠃
19 ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠡ᠂ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠴᠠ ᠬᠡᠨ ᠨᠢᠭᠡ ᠨᠢ ᠦᠨᠡᠨ ᠡᠴᠡ ᠲᠥᠭᠡᠷᠢᠭᠰᠡᠨ ᠬᠥᠮᠦᠨ ᠢ ᠡᠷᠭᠢᠭᠦᠯᠵᠦ ᠠᠪᠴᠢᠷᠠᠭᠰᠠᠨ ᠢᠶᠠᠷ ᠲᠡᠷᠡ ᠬᠥᠮᠦᠨ 20 ᠨᠢᠭᠡᠨ ᠨᠢᠭᠦᠯᠲᠦ ᠬᠥᠮᠦᠨ ᠢ ᠲᠥᠭᠡᠷᠢᠭᠰᠡᠨ ᠵᠠᠮ ᠠᠴᠠ ᠨᠢ ᠡᠷᠭᠢᠭᠦᠯᠵᠦ᠂ ᠲᠡᠭᠦᠨ ᠦ ᠰᠦᠨᠡᠰᠦ ᠶᠢ ᠦᠬᠦᠯ ᠡᠴᠡ ᠠᠪᠤᠷᠠᠬᠤ ᠪᠥᠭᠡᠳ ᠮᠥᠨ ᠦᠯᠡᠮᠵᠢ ᠣᠯᠠᠨ ᠨᠢᠭᠦᠯ ᠢ ᠳᠠᠯᠳᠠᠯᠠᠬᠤ ᠪᠣᠯᠣᠨᠠ ᠭᠡᠳᠡᠭ ᠢ ᠮᠡᠳᠡᠭᠲᠦᠨ᠃