ᠧᠹᠧᠰ ᠬᠣᠶᠠᠷ
ᠢᠪᠡᠭᠡᠯ ᠦᠨ ᠠᠪᠤᠷᠠᠯ
1 ᠲᠠ ᠨᠠᠷ ᠴᠤ ᠭᠡᠮ ᠨᠢᠭᠦᠯ ᠡᠴᠡ ᠪᠣᠯᠵᠤ ᠦᠬᠦᠭᠰᠡᠨ ᠪᠠᠢᠪᠠ᠃ 2 ᠲᠡᠷᠡ ᠦᠶᠡ ᠳᠦ ᠲᠠ ᠨᠠᠷ ᠭᠡᠮ ᠨᠢᠭᠦᠯ ᠳᠦ ᠠᠪᠲᠠᠨ ᠡᠨᠡ ᠶᠢᠷᠲᠢᠨᠴᠦ ᠶᠢᠨ ᠬᠡᠪ ᠶᠣᠰᠣ ᠪᠠᠷ ᠣᠭᠲᠠᠷᠭᠤᠢ ᠶᠢᠨ ᠬᠦᠴᠦᠲᠦ ᠲᠣᠯᠣᠭᠠᠢᠯᠠᠭᠴᠢ᠂ ᠲᠤᠬᠠᠢᠯᠠᠪᠠᠯ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠦᠷᠡ ᠬᠡᠦᠬᠡᠳ ᠦᠨ ᠳᠤᠮᠳᠠ ᠣᠳᠣ ᠠᠵᠢᠯᠯᠠᠵᠤ ᠪᠠᠢᠭᠠ ᠰᠦᠨᠡᠰᠦ ᠶᠢ ᠳᠠᠭᠠᠵᠤ ᠠᠮᠢᠳᠤᠷᠠᠭᠰᠠᠭᠠᠷ ᠪᠠᠢᠭᠰᠠᠨ᠃ 3 ᠪᠢᠳᠡ ᠴᠤ ᠲᠡᠳᠡᠨ ᠦ ᠳᠤᠮᠳᠠ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠢᠭᠦᠯᠲᠦ ᠤᠭ ᠴᠢᠨᠠᠷ 6 ᠤᠨ ᠢᠶᠠᠨ ᠲᠠᠴᠢᠶᠠᠯ ᠳᠤ ᠠᠪᠲᠠᠨ ᠠᠮᠢᠳᠤᠷᠠᠵᠤ᠂ ᠨᠢᠭᠦᠯᠲᠦ ᠤᠭ ᠴᠢᠨᠠᠷ ᠪᠠ ᠰᠡᠳᠬᠢᠯ ᠤᠨ ᠬᠦᠰᠡᠯ ᠢᠶᠡᠷ ᠬᠢᠳᠡᠭ ᠪᠠᠢᠭᠰᠠᠨ᠃ ᠪᠢᠳᠡ ᠤᠤᠯ ᠨᠢ ᠪᠤᠰᠤᠳ ᠲᠠᠢ ᠠᠳᠠᠯᠢ ᠪᠠᠷ ᠠᠭᠤᠷ ᠬᠢᠯᠢᠩ ᠤᠨ ᠦᠷᠡ ᠬᠡᠦᠬᠡᠳ ᠪᠠᠢᠪᠠ᠃ 4 ᠬᠠᠷᠢᠨ ᠡᠯᠪᠡᠭ ᠢᠪᠡᠭᠡᠯ ᠲᠡᠢ ᠪᠤᠷᠬᠠᠨ ᠪᠢᠳᠡᠨ ᠢ ᠬᠠᠢᠷᠠᠯᠠᠳᠠᠭ ᠲᠡᠷᠡ ᠬᠦ ᠬᠠᠢᠷᠠ ᠪᠠᠷ ᠢᠶᠠᠨ 5 ᠨᠢᠭᠦᠯ ᠡᠴᠡ ᠪᠣᠯᠵᠤ ᠦᠬᠦᠭᠰᠡᠨ ᠪᠢᠳᠡᠨ ᠢ ᠾᠷᠢᠰᠲ᠋ᠣᠰ ᠲᠠᠢ ᠬᠠᠮᠲᠤ ᠠᠮᠢᠳᠤᠷᠠᠭᠤᠯᠤᠨ (ᠲᠠ ᠨᠠᠷ ᠢᠪᠡᠭᠡᠯ ᠢᠶᠡᠷ ᠠᠪᠤᠷᠠᠭᠳᠠᠭᠰᠠᠨ ᠶᠤᠮ︕)᠂ 6 ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠲᠡᠭᠦᠨ ᠲᠡᠢ ᠬᠠᠮᠲᠤ ᠠᠮᠢᠯᠠᠭᠤᠯᠵᠤ᠂ ᠲᠩᠷᠢ ᠳᠡᠭᠡᠷᠡ ᠲᠡᠭᠦᠨ ᠲᠡᠢ ᠬᠠᠮᠲᠤ ᠰᠠᠭᠤᠯᠭᠠᠭᠰᠠᠨ ᠶᠤᠮ᠃ 7 ᠡᠢᠨ ᠬᠦ ᠪᠤᠷᠬᠠᠨ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠪᠢᠳᠡᠨ ᠢ ᠨᠢᠭᠦᠯᠡᠰᠦᠨ᠂ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠦᠯᠡᠮᠵᠢ ᠢᠪᠡᠭᠡᠯ ᠢᠶᠡᠨ ᠢᠷᠡᠭᠡᠳᠦᠢ ᠶᠢᠨ ᠪᠦᠬᠦ ᠴᠠᠭ ᠦᠶᠡ ᠳᠦ ᠦᠵᠡᠭᠦᠯᠬᠦ ᠭᠡᠰᠡᠨ ᠪᠠᠢᠨᠠ᠃ 8 ᠲᠠ ᠨᠠᠷ ᠢᠪᠡᠭᠡᠯ ᠢᠶᠡᠷ ᠢᠲᠡᠭᠡᠵᠦ ᠠᠪᠤᠷᠠᠭᠳᠠᠪᠠ᠃ ᠡᠨᠡ ᠨᠢ ᠥᠪᠡᠷᠰᠡᠳ ᠦᠨ ᠴᠢᠨᠢ ᠠᠴᠢ ᠪᠠᠷ ᠪᠢᠰᠢ᠂ 9 ᠦᠢᠯᠡᠰ ᠦᠨ ᠴᠢᠨᠢ ᠠᠴᠢ ᠪᠠᠷ ᠴᠤ ᠪᠢᠰᠢ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠰᠣᠶᠣᠷᠬᠠᠯ ᠤᠴᠢᠷ ᠠᠴᠠ ᠬᠡᠨ ᠴᠤ ᠰᠠᠭᠰᠠᠭᠤᠷᠠᠵᠤ ᠪᠣᠯᠬᠤ ᠦᠭᠡᠢ ᠶᠤᠮ᠃ 10 ᠪᠢᠳᠡ ᠪᠣᠯ ᠪᠤᠷᠬᠠᠨ ᠤ ᠪᠦᠲᠦᠭᠡᠯ᠂ ᠰᠠᠢᠨ ᠦᠢᠯᠡᠰ ᠦᠨ ᠲᠥᠯᠥᠭᠡ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠪᠦᠲᠦᠭᠡᠭᠳᠡᠭᠰᠡᠨ ᠶᠤᠮ᠃ ᠪᠤᠷᠬᠠᠨ ᠲᠡᠷᠡ ᠦᠢᠯᠡᠰ ᠢ ᠤᠷᠢᠳᠠ ᠠᠴᠠ ᠪᠡᠯᠡᠳᠬᠡᠨ ᠪᠢᠳᠡᠨ ᠢᠶᠡᠷ ᠬᠢᠯᠭᠡᠬᠦ ᠭᠡᠰᠡᠨ ᠶᠤᠮ᠃
ᠨᠢᠭᠡᠳᠦᠭᠰᠡᠨ ᠴᠢᠭᠤᠯᠭᠠᠨ
11 ᠡᠢᠮᠦ ᠡᠴᠡ ᠲᠠ ᠨᠠᠷ ᠮᠢᠬᠠᠨ ᠪᠡᠶᠡ ᠶᠢᠨ ᠬᠤᠪᠢ ᠳᠤ ᠬᠠᠷᠢᠴᠤᠳ ᠪᠠᠢᠭᠰᠠᠨ ᠦᠶᠡ ᠪᠡᠨ ᠰᠠᠨᠠᠭᠲᠤᠨ᠂ ᠥᠪᠡᠷ ᠢ ᠪᠠᠨ 《ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠴᠢᠳ》 (ᠬᠥᠮᠦᠨ ᠦ ᠭᠠᠷ ᠢᠶᠠᠷ ᠮᠢᠬᠠᠨ ᠪᠡᠶᠡ ᠪᠡᠨ ᠬᠥᠨᠳᠡᠭᠦᠯᠦᠭᠴᠢᠳ) ᠬᠡᠮᠡᠭᠴᠢᠳ ᠲᠠ ᠨᠠᠷ ᠢ 《ᠡᠰᠡ ᠬᠥᠨᠳᠡᠭᠦᠯᠦᠭᠴᠢᠳ》 ᠬᠡᠮᠡᠳᠡᠭ ᠪᠠᠢᠪᠠ᠃ 12 ᠲᠡᠷᠡ ᠦᠶᠡ ᠳᠦ ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠠᠴᠠ ᠠᠩᠭᠢᠳᠠ᠂ ᠢᠰᠷᠧᠯ ᠤᠯᠤᠰ ᠠᠴᠠ ᠰᠠᠯᠤᠩᠭᠢᠳᠠ᠂ ᠠᠮᠠᠯᠠᠯᠲᠠ ᠶᠢᠨ ᠭᠡᠷᠡ ᠡᠴᠡ ᠭᠠᠳᠠᠭᠤᠷ ᠪᠠᠢᠭᠰᠠᠨ ᠪᠥᠭᠡᠳ ᠡᠨᠡ ᠶᠢᠷᠲᠢᠨᠴᠦ ᠳᠦ ᠡᠷᠡᠮᠡᠯᠵᠡᠯ ᠦᠭᠡᠢ᠂ ᠪᠤᠷᠬᠠᠨ ᠦᠭᠡᠢ ᠠᠮᠢᠳᠤᠷᠠᠵᠤ ᠪᠠᠢᠪᠠ᠃ 13 ᠵᠠᠢᠳᠠᠭᠤ ᠪᠠᠢᠭᠰᠠᠨ ᠲᠠ ᠨᠠᠷ ᠣᠳᠣ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠲᠡᠭᠦᠨ ᠦ ᠴᠢᠰᠤ ᠪᠠᠷ ᠣᠢᠷᠠᠲᠤᠵᠠᠢ᠃
14 ᠾᠷᠢᠰᠲ᠋ᠣᠰ ᠪᠣᠯ ᠪᠢᠳᠡᠨ ᠦ ᠡᠩᠬᠡ ᠲᠠᠢᠪᠤᠩ ᠮᠥᠨ᠃ ᠲᠡᠷᠡ ᠪᠡᠷ ᠬᠣᠭᠣᠷᠣᠨᠳᠣᠬᠢ ᠬᠡᠷᠡᠮ ᠢ ᠨᠤᠷᠠᠭᠠᠵᠤ ᠬᠣᠶᠠᠷ ᠲᠠᠯᠠ ᠶᠢ ᠨᠢᠭᠡᠳᠭᠡᠭᠡᠳ᠂ ᠥᠪᠡᠷ ᠦᠨ ᠢᠶᠠᠨ ᠪᠡᠶᠡ ᠪᠡᠷ ᠥᠰᠢᠶᠡᠷᠬᠡᠯ ᠢ ᠵᠠᠢᠯᠠᠭᠤᠯᠤᠨ᠂ 15 ᠣᠯᠠᠨ ᠱᠠᠭᠠᠷᠳᠠᠯᠭᠠ ᠲᠠᠢ᠂ ᠣᠯᠠᠨ ᠵᠠᠷᠯᠢᠭ ᠲᠠᠢ ᠬᠠᠤᠯᠢ ᠶᠢ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠵᠠᠢ᠂ ᠡᠨᠡ ᠨᠢ ᠲᠡᠷᠡ ᠬᠣᠶᠠᠷ ᠢ ᠥᠪᠡᠷ ᠦᠨ ᠢᠶᠠᠨ ᠳᠣᠲᠣᠷᠠ ᠨᠢᠭᠡ ᠰᠢᠨᠡ ᠬᠥᠮᠦᠨ ᠪᠣᠯᠭᠠᠭᠠᠳ ᠡᠩᠬᠡ ᠲᠠᠢᠪᠤᠩ ᠢ ᠪᠦᠲᠦᠭᠡᠨ᠂ 16 ᠥᠰᠢᠶᠡᠷᠬᠡᠯ ᠢ ᠵᠠᠭᠠᠯᠮᠠᠢ ᠪᠠᠷ ᠰᠥᠨᠥᠭᠡᠵᠦ᠂ ᠲᠡᠷᠡ ᠬᠣᠶᠠᠷ ᠢ ᠵᠠᠭᠠᠯᠮᠠᠢ ᠪᠠᠷ ᠨᠢᠭᠡ ᠪᠡᠶᠡ ᠪᠣᠯᠭᠠᠨ ᠪᠤᠷᠬᠠᠨ ᠲᠠᠢ ᠡᠪᠯᠡᠷᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠶᠤᠮ᠃ 17 ᠲᠡᠷᠡᠴᠢᠯᠡᠨ ᠢᠰᠦ᠋ᠰ ᠢᠷᠡᠵᠦ ᠡᠩᠬᠡ ᠲᠠᠢᠪᠤᠩ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠵᠠᠢᠳᠠᠭᠤ ᠪᠠᠢᠭᠰᠠᠨ ᠲᠠ ᠨᠠᠷ ᠲᠤ᠂ ᠪᠠᠰᠠ ᠣᠢᠷᠠ ᠪᠠᠢᠭᠰᠠᠨ ᠲᠡᠳᠡᠨ ᠳᠦ ᠤᠯᠠᠮᠵᠢᠯᠠᠪᠠ᠃ 18 ᠲᠡᠢᠨ ᠬᠦ ᠪᠢᠳᠡ ᠬᠣᠶᠠᠭᠤᠯᠠ ᠪᠠᠨ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠨᠢᠭᠡ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠳᠣᠲᠣᠷᠠ ᠡᠴᠢᠭᠡ ᠤᠷᠤᠭᠤ ᠣᠴᠢᠬᠤ ᠪᠣᠯᠵᠠᠢ᠃ 19 ᠡᠢᠨ ᠬᠦ ᠲᠠ ᠨᠠᠷ ᠴᠤ ᠬᠠᠷᠢ ᠶᠢᠨ ᠬᠢ ᠪᠠ ᠭᠠᠳᠠᠨᠠ ᠶᠢᠨ ᠬᠢ ᠪᠠᠢᠬᠤ ᠪᠠᠨ ᠪᠣᠯᠢᠵᠤ᠂ ᠠᠷᠢᠭᠤᠨ ᠬᠥᠮᠦᠰ ᠦᠨ ᠬᠠᠮᠲᠤ ᠡᠷᠬᠡ ᠨᠢᠭᠡᠲᠡᠢ ᠢᠷᠭᠡᠳ᠂ ᠪᠤᠷᠬᠠᠨ ᠤ ᠪᠦᠯᠢ ᠪᠣᠯᠣᠯᠠ᠃ 20 ᠲᠠ ᠨᠠᠷ ᠪᠣᠯ ᠰᠢᠳᠠᠷ ᠱᠠᠪᠢ ᠨᠠᠷ ᠪᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠪᠣᠰᠬᠠᠭᠳᠠᠭᠰᠠᠳ ᠪᠥᠭᠡᠳ ᠲᠤᠯᠭᠠᠭᠤᠷᠢ ᠴᠢᠯᠠᠭᠤ ᠨᠢ ᠾᠷᠢᠰᠲ᠋ᠣᠰ ᠶᠤᠮ᠃ 21 ᠲᠡᠭᠦᠨ ᠦ ᠳᠣᠲᠣᠷᠠ ᠪᠦᠬᠦᠢᠯᠡ ᠪᠠᠷᠢᠯᠭᠠ ᠬᠣᠯᠪᠣᠯᠳᠤᠨ ᠥᠰᠴᠦ᠂ ᠡᠵᠡᠨ ᠦ ᠳᠣᠲᠣᠷᠠᠬᠢ ᠥᠷᠭᠥᠭᠡ ᠪᠣᠯᠵᠤ ᠪᠠᠢᠨᠠ᠃ 22 ᠲᠡᠭᠦᠨ ᠦ ᠳᠣᠲᠣᠷᠠ ᠲᠠ ᠨᠠᠷ ᠴᠤ ᠬᠠᠮᠲᠤᠷᠠᠨ ᠪᠠᠢᠭᠤᠯᠤᠭᠳᠠᠵᠤ᠂ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠪᠤᠷᠬᠠᠨ ᠤ ᠣᠷᠣᠰᠢᠬᠤ ᠭᠠᠵᠠᠷ ᠪᠣᠯᠵᠤ ᠪᠤᠢ᠃