ᠧᠹᠧᠰ ᠲᠠᠪᠤ
1 ᠲᠠ ᠨᠠᠷ ᠪᠣᠯ ᠬᠠᠢᠷᠠᠯᠠᠭᠳᠠᠳᠠᠭ ᠬᠡᠦᠬᠡᠳ ᠮᠥᠨ᠃ ᠡᠢᠮᠦ ᠡᠴᠡ ᠪᠤᠷᠬᠠᠨ ᠢ ᠳᠠᠭᠤᠷᠢᠶᠠᠭᠴᠢ ᠪᠣᠯᠣᠭᠲᠤᠨ᠃ 2 ᠬᠠᠢᠷᠠᠯᠠᠵᠤ ᠠᠮᠢᠳᠤᠷᠠᠵᠠᠭᠠ᠂ ᠾᠷᠢᠰᠲ᠋ᠣᠰ ᠴᠤ ᠪᠢᠳᠡᠨ ᠢ ᠬᠠᠢᠷᠠᠯᠠᠨ᠂ ᠪᠢᠳᠡᠨ ᠦ ᠲᠥᠯᠥᠭᠡ ᠪᠡᠶᠡ ᠪᠡᠨ ᠵᠣᠷᠢᠭᠤᠯᠵᠤ ᠪᠤᠷᠬᠠᠨ ᠤ ᠡᠮᠦᠨᠡ ᠠᠩᠬᠢᠯᠤᠭᠤᠨ ᠦᠨᠦᠷᠲᠦ ᠡᠷᠭᠦᠯ ᠪᠠ ᠲᠠᠬᠢᠯ ᠪᠣᠯᠣᠭᠰᠠᠨ ᠶᠤᠮ᠃
3 ᠬᠠᠷᠢᠨ ᠰᠠᠳᠤᠷ ᠰᠠᠮᠠᠭᠤᠨ᠂ ᠠᠯᠢᠪᠠ ᠠᠷᠢᠭᠤᠨ ᠪᠤᠰᠤ ᠶᠠᠪᠤᠳᠠᠯ ᠪᠤᠶᠤ ᠰᠢᠨᠤᠯ ᠤᠨ ᠨᠡᠷᠡ ᠴᠤ ᠲᠠ ᠨᠠᠷ ᠤᠨ ᠳᠤᠮᠳᠠ ᠪᠦᠦ ᠪᠠᠢᠭ᠃ ᠲᠡᠳᠡᠭᠡᠷ ᠨᠢ ᠠᠷᠢᠭᠤᠨ ᠬᠥᠮᠦᠰ ᠲᠦ ᠨᠡᠢᠴᠡᠬᠦ ᠦᠭᠡᠢ᠃ 4 ᠢᠴᠢᠭᠦᠷᠢ ᠦᠭᠡᠢ᠂ ᠮᠤᠩ᠋ᠬᠠᠭ᠂ ᠮᠠᠷᠵᠠᠩ ᠶᠠᠷᠢᠶᠠ ᠴᠤ ᠵᠣᠬᠢᠰ ᠦᠭᠡᠢ᠂ ᠣᠷᠣᠨ ᠳᠤᠨᠢ ᠲᠠᠯᠠᠷᠬᠠᠯ ᠤᠨ ᠦᠭᠡ ᠶᠠᠷᠢ᠃ 5 ᠲᠠ ᠨᠠᠷ ᠡᠭᠦᠨ ᠢ ᠵᠠᠪᠠᠯ ᠮᠡᠳᠡᠵᠡᠭᠡ᠂ ᠰᠠᠳᠤᠷᠯᠠᠭᠴᠢ᠂ ᠠᠷᠢᠭᠤᠨ ᠪᠤᠰᠤ ᠬᠥᠮᠦᠨ᠂ ᠰᠢᠨᠤᠬᠠᠢᠷᠠᠭᠴᠢ᠂ ᠲᠤᠬᠠᠢᠯᠠᠪᠠᠯ ᠰᠢᠲᠦᠭᠡᠨ ᠰᠢᠲᠦᠭᠴᠢ ᠨᠢ ᠪᠦᠭᠦᠳᠡᠭᠡᠷ ᠢᠶᠡᠨ ᠾᠷᠢᠰᠲ᠋ᠣᠰ ᠪᠠ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠥᠪ ᠣᠯᠬᠤ ᠦᠭᠡᠢ᠃
6 ᠲᠠ ᠨᠠᠷ ᠬᠡᠨ ᠦ ᠴᠤ ᠬᠣᠭᠣᠰᠣᠨ ᠦᠭᠡᠨ ᠳᠦ ᠪᠦᠦ ᠮᠡᠬᠡᠯᠡᠭᠳᠡ᠂ ᠡᠭᠦᠨ ᠡᠴᠡ ᠪᠣᠯᠵᠤ ᠪᠤᠷᠬᠠᠨ ᠤ ᠬᠢᠯᠢᠩ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠬᠡᠦᠬᠡᠳ ᠦᠨ ᠳᠡᠭᠡᠷᠡ ᠪᠠᠭᠤᠳᠠᠭ᠃ 7 ᠲᠡᠢᠮᠦ ᠡᠴᠡ ᠪᠢᠲᠡᠭᠡᠢ ᠲᠡᠳᠡᠨ ᠦ ᠬᠠᠮᠰᠠᠭᠠᠲᠠᠨ ᠪᠣᠯᠣᠭᠠᠷᠠᠢ᠃ 8 ᠲᠠ ᠨᠠᠷ ᠤᠷᠢᠳᠤ ᠨᠢ ᠬᠠᠷᠠᠩ᠋ᠭᠤᠢ ᠪᠠᠢᠭᠰᠠᠨ᠂ ᠡᠳᠦᠭᠡ ᠡᠵᠡᠨ ᠦ ᠳᠣᠲᠣᠷᠠ ᠭᠡᠷᠡᠯ ᠪᠣᠯᠣᠯᠠ᠃ ᠭᠡᠷᠡᠯ ᠦᠨ ᠬᠡᠦᠬᠡᠳ ᠦᠨ ᠶᠣᠰᠣᠭᠠᠷ ᠶᠠᠪᠤ᠃ 9 (ᠭᠡᠷᠡᠯ ᠦᠨ ᠦᠷᠡ ᠵᠢᠮᠢᠰ ᠪᠣᠯ ᠠᠯᠢᠪᠠ ᠰᠠᠢᠨ ᠰᠠᠢᠬᠠᠨ᠂ ᠵᠥᠪ᠂ ᠦᠨᠡᠨ ᠪᠢᠯᠡ᠃) 10 ᠡᠵᠡᠨ ᠳᠦ ᠶᠠᠭᠤ ᠲᠠᠭᠠᠯᠠᠭᠳᠠᠬᠤ ᠶᠢ ᠬᠠᠢᠵᠤ ᠮᠡᠳᠡᠭᠲᠦᠨ᠃ 11 ᠬᠠᠷᠠᠩ᠋ᠭᠤᠢ᠂ ᠦᠷᠡ ᠠᠰᠢᠭ ᠦᠭᠡᠢ ᠦᠢᠯᠡ ᠶᠠᠪᠤᠳᠠᠯ ᠳᠤ ᠪᠦᠦ ᠣᠷᠣᠯᠴᠠ᠂ ᠬᠠᠷᠢᠨ ᠲᠡᠳᠡᠭᠡᠷ ᠢ ᠢᠯᠡᠴᠢᠯᠡᠭᠲᠦᠨ᠃ 12 ᠲᠡᠳᠡᠨ ᠦ ᠳᠠᠯᠳᠠᠭᠤᠷ ᠬᠢᠳᠡᠭ ᠵᠦᠢᠯᠡᠰ ᠨᠢ ᠬᠡᠯᠡᠬᠦ ᠳᠦ ᠴᠤ ᠰᠢᠪᠰᠢᠭ ᠲᠠᠢ᠃ 13 ᠬᠠᠷᠢᠨ ᠭᠡᠷᠡᠯ ᠳᠦ ᠢᠯᠡᠴᠢᠯᠡᠭᠳᠡᠭᠰᠡᠨ ᠪᠦᠬᠦᠨ ᠢᠯᠡ ᠭᠠᠷᠤᠨᠠ᠃ 14 ᠢᠯᠡ ᠭᠠᠷᠤᠭᠴᠢ ᠪᠦᠬᠦᠨ ᠭᠡᠷᠡᠯ ᠪᠢᠯᠡ᠂ ᠡᠢᠮᠦ ᠡᠴᠡ᠄ 《ᠰᠡᠷᠢ᠂ ᠨᠣᠢᠷᠰᠣᠭᠴᠢ ᠡ︕ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠪᠣᠰᠣᠭᠠᠴᠢ᠂ ᠾᠷᠢᠰᠲ᠋ᠣᠰ ᠴᠢᠨᠦ ᠳᠡᠭᠡᠷᠡ ᠭᠡᠶᠢᠭᠦᠯᠦᠨᠡ》 ᠭᠡᠪᠡ᠃
15 ᠲᠠ ᠨᠠᠷ ᠤᠬᠠᠭᠠᠨ ᠦᠭᠡᠢ ᠬᠥᠮᠦᠨ ᠪᠤᠰᠤ᠂ ᠬᠠᠷᠢᠨ ᠤᠬᠠᠭᠠᠯᠢᠭ ᠬᠥᠮᠦᠨ ᠪᠣᠯᠵᠤ ᠬᠡᠷᠬᠢᠨ ᠠᠮᠢᠳᠤᠷᠠᠵᠤ ᠪᠤᠢ ᠪᠠᠨ ᠠᠩ᠋ᠬᠠᠷᠴᠤ ᠦᠵᠡᠭᠲᠦᠨ᠃ 16 ᠴᠠᠭ ᠢᠶᠠᠨ ᠠᠰᠢᠭᠯᠠ 7 ᠂ ᠴᠠᠭ ᠦᠶᠡ ᠮᠠᠭᠤ ᠰᠢᠦ᠃ 17 ᠲᠡᠢᠮᠦ ᠡᠴᠡ ᠪᠣᠳᠣᠯ ᠦᠭᠡᠢ ᠪᠦᠦ ᠶᠠᠪᠤ᠂ ᠡᠵᠡᠨ ᠦ ᠰᠠᠨᠠᠭᠠ ᠶᠠᠭᠤ ᠪᠣᠯᠬᠤ ᠶᠢ ᠣᠢᠯᠠᠭᠠᠭᠲᠤᠨ᠃ 18 ᠠᠷᠢᠬᠢᠨ ᠳᠤ ᠪᠦᠦ ᠰᠣᠭᠲᠣ᠂ ᠲᠡᠭᠦᠨ ᠳᠦ ᠵᠠᠮᠪᠠᠷᠠᠭᠠ ᠦᠭᠡᠶᠢᠳᠡᠯ ᠪᠠᠢᠳᠠᠭ᠃ ᠡᠭᠦᠨ ᠦ ᠣᠷᠣᠨ ᠳᠤ ᠲᠠ ᠨᠠᠷ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠡᠩ ᠪᠠᠢᠵᠠᠭᠠ᠃ 19 ᠰᠢᠯᠦᠭ᠂ ᠮᠠᠭᠲᠠᠭᠤ᠂ ᠰᠦᠨᠡᠰᠦᠯᠢᠭ ᠳᠠᠭᠤᠤ ᠪᠠᠷ ᠶᠠᠷᠢᠯᠴᠠᠵᠤ ᠡᠵᠡᠨ ᠢ ᠰᠡᠳᠬᠢᠯ ᠡᠴᠡ ᠪᠡᠨ ᠳᠠᠭᠤᠯᠠᠨ ᠮᠠᠭᠲᠠᠵᠤ᠂ 20 ᠠᠯᠢᠪᠠ ᠴᠠᠭ ᠲᠤ᠂ ᠠᠯᠢᠪᠠ ᠵᠦᠢᠯ ᠳᠤ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠨᠡᠷᠡ ᠪᠡᠷ ᠡᠴᠢᠭᠡ ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠭᠠᠷᠠᠢ᠃
21 ᠾᠷᠢᠰᠲ᠋ᠣᠰ ᠠᠴᠠ ᠡᠮᠢᠶᠡᠵᠦ ᠪᠡᠶᠡ ᠪᠡᠶᠡ ᠳᠡᠭᠡᠨ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢ᠃
ᠠᠷᠢᠭᠤᠨ ᠭᠡᠷ ᠪᠦᠯᠢ
22 ᠡᠬᠡᠨᠡᠷ ᠤᠳ ᠡ᠂ ᠡᠵᠡᠨ ᠳᠦ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠳᠠᠭ ᠰᠢᠭ᠋ ᠨᠥᠬᠥᠷ ᠲᠡᠭᠡᠨ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠭᠠᠷᠠᠢ᠃ 23 ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠨᠥᠬᠥᠷ ᠨᠢ ᠡᠬᠡᠨᠡᠷ ᠦᠨ ᠢᠶᠠᠨ ᠲᠡᠷᠢᠭᠦᠨ ᠨᠢ ᠶᠤᠮ᠂ ᠡᠨᠡ ᠨᠢ ᠾᠷᠢᠰᠲ᠋ᠣᠰ ᠪᠣᠯ ᠴᠢᠭᠤᠯᠭᠠᠨ ᠤ ᠲᠡᠷᠢᠭᠦᠨ ᠪᠠᠢᠳᠠᠭ ᠲᠠᠢ ᠠᠳᠠᠯᠢ᠃ ᠲᠡᠷᠡ ᠮᠥᠨ ᠴᠤ ᠥᠪᠡᠷ ᠦᠨ ᠢᠶᠠᠨ ᠪᠡᠶᠡ ᠪᠣᠯᠬᠤ ᠴᠢᠭᠤᠯᠭᠠᠨ ᠤ ᠠᠪᠤᠷᠠᠭᠴᠢ ᠪᠢᠯᠡ᠃ 24 ᠴᠢᠭᠤᠯᠭᠠᠨ ᠾᠷᠢᠰᠲ᠋ᠣᠰ ᠲᠤ ᠵᠠᠬᠢᠷᠤᠭᠳᠠᠳᠠᠭ ᠤᠨ ᠠᠳᠠᠯᠢ ᠪᠠᠷ ᠡᠬᠡᠨᠡᠷ ᠤᠳ ᠴᠤ ᠠᠯᠢᠪᠠ ᠵᠦᠢᠯ ᠳᠤ ᠨᠥᠬᠥᠷ ᠲᠡᠭᠡᠨ ᠵᠠᠬᠢᠷᠤᠭᠳᠠ᠃
25 ᠨᠥᠬᠥᠷ ᠤᠳ ᠡ᠂ ᠾᠷᠢᠰᠲ᠋ᠣᠰ ᠴᠢᠭᠤᠯᠭᠠᠨ ᠢ ᠬᠠᠢᠷᠠᠯᠠᠵᠤ᠂ ᠴᠢᠭᠤᠯᠭᠠᠨ ᠤ ᠲᠥᠯᠥᠭᠡ ᠪᠡᠶᠡ ᠪᠡᠨ ᠵᠣᠷᠢᠭᠤᠯᠤᠭᠰᠠᠨ ᠶᠣᠰᠣᠭᠠᠷ ᠡᠬᠡᠨᠡᠷ ᠢᠶᠡᠨ ᠬᠠᠢᠷᠠᠯᠠᠭᠲᠤᠨ᠃ 26 ᠾᠷᠢᠰᠲ᠋ᠣᠰ ᠲᠡᠭᠡᠭᠰᠡᠨ ᠢᠶᠡᠷ ᠢᠶᠠᠨ ᠴᠢᠭᠤᠯᠭᠠᠨ ᠢ ᠤᠰᠤ ᠪᠠᠷ ᠤᠬᠢᠶᠠᠨ ᠴᠡᠪᠡᠷᠯᠡᠵᠦ ᠦᠭᠡ ᠪᠡᠷ ᠠᠷᠢᠭᠤᠰᠬᠠᠭᠠᠳ 27 ᠵᠢᠪᠬᠤᠯᠠᠩᠲᠤ ᠴᠢᠭᠤᠯᠭᠠᠨ᠂ ᠲᠤᠬᠠᠢᠯᠠᠪᠠᠯ ᠲᠣᠯᠪᠣ᠂ ᠦᠷᠴᠢᠯᠡᠭᠡ ᠦᠭᠡᠢ ᠪᠠᠷ ᠠᠷᠢᠭᠤᠨ ᠬᠢᠭᠡᠳ ᠥ ᠦᠭᠡᠢ ᠴᠢᠭᠤᠯᠭᠠᠨ ᠢ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠᠬᠤ ᠭᠡᠰᠡᠨ᠃ 28 ᠡᠢᠨ ᠬᠦ ᠨᠥᠬᠥᠷ ᠤᠳ ᠴᠤ ᠥᠪᠡᠷ ᠦᠨ ᠪᠡᠶᠡ ᠪᠡᠨ ᠬᠠᠢᠷᠠᠯᠠᠳᠠᠭ ᠰᠢᠭ᠋ ᠡᠬᠡᠨᠡᠷ ᠢᠶᠡᠨ ᠬᠠᠢᠷᠠᠯᠠᠬᠤ ᠶᠣᠰᠣᠲᠠᠢ᠃ ᠡᠬᠡᠨᠡᠷ ᠢᠶᠡᠨ ᠬᠠᠢᠷᠠᠯᠠᠭᠴᠢ ᠨᠢ ᠥᠪᠡᠷ ᠢ ᠪᠠᠨ ᠬᠠᠢᠷᠠᠯᠠᠭᠴᠢ ᠶᠤᠮ᠃ 29 ᠬᠥᠮᠦᠨ ᠥᠪᠡᠷ ᠦᠨ ᠪᠡᠶᠡ ᠪᠡᠨ ᠶᠡᠷᠦ ᠬᠣᠷᠣᠰᠳᠠᠭ ᠦᠭᠡᠢ᠂ ᠬᠠᠷᠢᠨ ᠲᠡᠵᠢᠭᠡᠵᠦ ᠬᠠᠯᠠᠮᠵᠢᠯᠠᠳᠠᠭ᠃ ᠡᠨᠡ ᠨᠢ ᠾᠷᠢᠰᠲ᠋ᠣᠰ ᠴᠢᠭᠤᠯᠭᠠᠨ ᠳᠤ ᠬᠠᠨᠳᠤᠳᠠᠭ ᠲᠠᠢ ᠠᠳᠠᠯᠢ ᠪᠥᠭᠡᠳ 30 ᠲᠡᠭᠦᠨ ᠦ ᠪᠡᠶᠡ ᠶᠢᠨ ᠡᠷᠬᠡᠲᠡᠨ ᠨᠦᠭᠦᠳ ᠪᠣᠯ ᠪᠢᠳᠡ ᠮᠥᠨ᠃ 31 《ᠡᠢᠮᠦ ᠡᠴᠡ ᠬᠥᠮᠦᠨ ᠡᠴᠢᠭᠡ ᠡᠬᠡ ᠪᠡᠨ ᠣᠷᠬᠢᠭᠠᠳ ᠡᠬᠡᠨᠡᠷ ᠲᠡᠢ ᠪᠡᠨ ᠨᠡᠢᠯᠡᠨ᠂ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠮᠢᠬᠠᠨ ᠪᠡᠶᠡ ᠪᠣᠯᠣᠨᠠ᠃》 32 ᠡᠨᠡ ᠨᠢ ᠶᠡᠬᠡ ᠨᠢᠭᠤᠴᠠ ᠪᠢᠯᠡ᠂ ᠬᠠᠷᠢᠨ ᠪᠢ ᠾᠷᠢᠰᠲ᠋ᠣᠰ ᠪᠣᠯᠣᠨ ᠴᠢᠭᠤᠯᠭᠠᠨ ᠲᠠᠢ ᠬᠣᠯᠪᠣᠭᠳᠠᠭᠤᠯᠤᠨ ᠬᠡᠯᠡᠵᠦ ᠪᠠᠢᠨᠠ᠃ 33 ᠲᠠ ᠨᠠᠷ ᠴᠤ ᠭᠡᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠥᠪᠡᠷ ᠢ ᠪᠠᠨ ᠬᠠᠢᠷᠠᠯᠠᠳᠠᠭ ᠰᠢᠭ᠋ ᠡᠬᠡᠨᠡᠷ ᠢᠶᠡᠨ ᠬᠠᠢᠷᠠᠯᠠᠭᠲᠤᠨ᠃ ᠡᠬᠡᠨᠡᠷ ᠨᠢ ᠨᠥᠬᠥᠷ ᠢᠶᠡᠨ ᠬᠦᠨᠳᠦᠳᠬᠡᠬᠦ ᠪᠣᠯᠲᠤᠭᠠᠢ᠃