ᠧᠹᠧᠰ ᠵᠢᠷᠭᠤᠭᠠ
1 ᠬᠡᠦᠬᠡᠳ ᠤᠳ ᠡ᠂ ᠡᠵᠡᠨ ᠦ ᠳᠣᠲᠣᠷᠠ ᠡᠴᠢᠭᠡ ᠡᠬᠡ ᠳᠡᠭᠡᠨ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢ᠂ ᠡᠨᠡ ᠨᠢ ᠵᠥᠪ ᠶᠤᠮ᠃ 2 《ᠡᠴᠢᠭᠡ ᠡᠬᠡ ᠪᠡᠨ ᠬᠦᠨᠳᠦᠯᠡ᠂》 ᠡᠨᠡ ᠨᠢ ᠠᠮᠠᠯᠠᠯᠲᠠ ᠪᠦᠬᠦᠢ ᠠᠩ᠋ᠬᠠᠨ ᠤ ᠵᠠᠷᠯᠢᠭ ᠶᠤᠮ᠃ 3 《ᠲᠡᠭᠡᠪᠡᠯ ᠴᠢ ᠭᠠᠵᠠᠷ ᠳᠡᠭᠡᠷᠡ ᠰᠠᠢᠨ ᠢ ᠠᠮᠰᠠᠨ᠂ ᠤᠷᠲᠤ ᠨᠠᠰᠤᠯᠠᠬᠤ ᠪᠣᠯᠣᠨᠠ᠃》
4 ᠡᠴᠢᠭᠡ ᠨᠦᠭᠦᠳ ᠡ᠂ ᠬᠡᠦᠬᠡᠳ ᠤᠳ ᠢᠶᠠᠨ ᠪᠦᠦ ᠠᠭᠤᠷᠯᠠᠭᠤᠯ᠂ ᠬᠠᠷᠢᠨ ᠡᠵᠡᠨ ᠦ ᠰᠠᠬᠢᠯᠭᠠ ᠪᠠ ᠰᠤᠷᠭᠠᠮᠵᠢ ᠪᠠᠷ ᠬᠥᠮᠦᠵᠢᠭᠦᠯᠦᠭᠲᠦᠨ᠃
5 ᠪᠣᠭᠣᠯᠴᠤᠳ ᠡ᠂ ᠾᠷᠢᠰᠲ᠋ᠣᠰ ᠲᠤ ᠬᠠᠨᠳᠤᠳᠠᠭ ᠰᠢᠭ᠋ ᠢᠶᠠᠷ ᠮᠢᠬᠠᠨ ᠪᠡᠶᠡ ᠶᠢᠨ ᠡᠵᠡᠨ ᠡᠴᠡ ᠪᠡᠨ ᠡᠮᠢᠶᠡᠨ ᠴᠡᠴᠡᠷᠡᠵᠦ᠂ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠳᠤᠭᠤᠯᠭᠠᠪᠤᠷᠢᠲᠠᠢ ᠪᠠᠢᠵᠠᠭᠠ᠃ 6 ᠬᠥᠮᠦᠨ ᠦ ᠳᠤᠷᠠ ᠳᠤ ᠨᠡᠢᠴᠡᠭᠦᠯᠵᠦ ᠨᠢᠳᠦᠨ ᠳᠦ ᠦᠵᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠪᠤᠰᠤ᠂ ᠬᠠᠷᠢᠨ ᠾᠷᠢᠰᠲ᠋ᠣᠰ ᠤᠨ ᠵᠠᠷᠤᠴᠠ ᠪᠣᠯᠣᠭᠰᠠᠨ ᠳᠠᠭᠠᠨ ᠰᠡᠳᠬᠢᠯ ᠡᠴᠡ ᠪᠡᠨ ᠪᠤᠷᠬᠠᠨ ᠤ ᠰᠠᠨᠠᠭᠠ ᠶᠢ ᠪᠡᠶᠡᠯᠡᠭᠦᠯᠦᠭᠰᠡᠭᠡᠷ᠂ 7 ᠬᠥᠮᠦᠨ ᠳᠦ ᠪᠢᠰᠢ᠂ ᠬᠠᠷᠢᠨ ᠡᠵᠡᠨ ᠳᠦ ᠮᠡᠲᠦ ᠦᠨᠡᠨ ᠰᠠᠨᠠᠭᠠᠨ ᠠᠴᠠ ᠪᠠᠨ ᠵᠠᠷᠤᠭᠳᠠᠭᠠᠷᠠᠢ᠃ 8 ᠪᠣᠭᠣᠯ ᠴᠤ ᠪᠠᠢ᠂ ᠴᠢᠯᠥᠭᠡᠲᠦ ᠬᠥᠮᠦᠨ ᠴᠤ ᠪᠠᠢ᠂ ᠰᠠᠢᠨ ᠢ ᠦᠢᠯᠡᠳᠦᠭᠴᠢ ᠪᠣᠯᠭᠠᠨ ᠡᠵᠡᠨ ᠡᠴᠡ ᠰᠠᠢᠨ ᠢ ᠬᠦᠷᠲᠡᠨᠡ ᠭᠡᠳᠡᠭ ᠢ ᠮᠡᠳᠡᠲᠦᠭᠡᠢ᠃
9 ᠡᠵᠡᠳ ᠴᠤ ᠪᠣᠭᠣᠯ ᠤᠳ ᠲᠠᠭᠠᠨ ᠠᠳᠠᠯᠢᠬᠠᠨ ᠦᠢᠯᠡᠳᠦᠭᠡᠷᠡᠢ᠃ ᠲᠡᠳᠡᠨ ᠢ ᠰᠦᠷᠳᠡᠭᠦᠯᠬᠦ ᠪᠡᠨ ᠪᠣᠯᠢ᠂ ᠲᠡᠳᠡᠨ ᠳᠦ ᠴᠤ᠂ ᠲᠠ ᠨᠠᠷ ᠲᠤ ᠴᠤ ᠲᠩᠷᠢ ᠳᠠᠬᠢ ᠡᠵᠡᠨ ᠪᠠᠢᠳᠠᠭ ᠪᠠ ᠲᠡᠭᠦᠨ ᠳᠦ ᠠᠯᠠᠭᠴᠢᠯᠠᠯ ᠭᠡᠵᠦ ᠦᠭᠡᠢ ᠭᠡᠳᠡᠭ ᠢ ᠮᠡᠳᠡᠲᠦᠭᠡᠢ᠃
ᠠᠷᠢᠭᠤᠨ ᠠᠮᠢᠳᠤᠷᠠᠯ
10 ᠪᠠᠰᠠ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠶᠡ᠂ ᠲᠠ ᠨᠠᠷ ᠡᠵᠡᠨ ᠦ ᠳᠣᠲᠣᠷᠠ᠂ ᠮᠥᠨ ᠴᠤ ᠲᠡᠭᠦᠨ ᠦ ᠬᠦᠴᠦ ᠴᠢᠳᠠᠯ ᠢᠶᠠᠷ ᠪᠡᠬᠢᠵᠢᠭᠲᠦᠨ᠃ 11 ᠰᠠᠲ᠋ᠠᠨ ᠤ ᠣᠪ ᠮᠡᠬᠡ ᠶᠢᠨ ᠡᠰᠡᠷᠭᠦ ᠵᠣᠭᠰᠣᠵᠤ ᠴᠢᠳᠠᠬᠤ ᠶᠢᠨ ᠲᠤᠯᠠᠳᠠ ᠲᠠ ᠨᠠᠷ ᠪᠤᠷᠬᠠᠨ ᠤ ᠢᠵᠢ ᠪᠦᠷᠢᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠶᠢ ᠡᠮᠦᠰᠦᠭᠲᠦᠨ᠃ 12 ᠤᠴᠢᠷ ᠨᠢ ᠮᠠᠨ ᠤ ᠲᠡᠮᠡᠴᠡᠯ ᠪᠣᠯ ᠮᠢᠬᠠ ᠴᠢᠰᠤᠲᠠᠨ ᠤ ᠡᠰᠡᠷᠭᠦ ᠪᠢᠰᠢ᠂ ᠬᠠᠷᠢᠨ ᠬᠠᠷᠠᠩ᠋ᠭᠤᠢ ᠶᠢᠷᠲᠢᠨᠴᠦ ᠶᠢᠨ ᠵᠠᠬᠢᠷᠤᠭᠴᠢᠳ᠂ ᠡᠷᠬᠡ ᠮᠡᠳᠡᠭᠴᠢᠳ᠂ ᠬᠦᠴᠦᠲᠡᠳ ᠪᠠ ᠲᠩᠷᠢ ᠳᠠᠬᠢ ᠮᠠᠭᠤ ᠰᠦᠨᠡᠰᠦ ᠨᠦᠭᠦᠳ ᠦᠨ ᠡᠰᠡᠷᠭᠦ ᠪᠠᠢᠳᠠᠭ᠃ 13 ᠡᠢᠮᠦ ᠡᠴᠡ ᠲᠠ ᠨᠠᠷ ᠮᠠᠭᠤ ᠡᠳᠦᠷ ᠤᠳ ᠲᠤ ᠡᠰᠡᠷᠭᠦᠴᠡᠵᠦ ᠳᠡᠢᠯᠬᠦ ᠶᠢᠨ ᠲᠤᠯᠠᠳᠠ᠂ ᠠᠯᠢᠪᠠ ᠶᠢ ᠳᠠᠪᠠᠭᠰᠠᠨ ᠤ ᠳᠠᠷᠠᠭᠠ ᠪᠠᠲᠤ ᠵᠣᠭᠰᠣᠬᠤ ᠶᠢᠨ ᠲᠤᠯᠠᠳᠠ᠂ ᠪᠤᠷᠬᠠᠨ ᠤ ᠢᠵᠢ ᠪᠦᠷᠢᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠶᠢ ᠣᠯᠵᠤ ᠠᠪ᠃ 14 ᠲᠡᠢᠨ ᠬᠦ ᠪᠠᠲᠤ ᠵᠣᠭᠰᠣᠭᠲᠤᠨ᠂ ᠪᠦᠰᠡᠯᠡᠭᠦᠷᠭᠡ ᠳᠡᠭᠡᠨ ᠦᠨᠡᠨ ᠦ ᠪᠦᠰᠡ ᠶᠢ ᠪᠦᠰᠡᠯᠡ᠂ ᠴᠡᠭᠡᠵᠢᠨ ᠪᠡᠶᠡ ᠳᠡᠭᠡᠨ ᠵᠥᠪ ᠦᠨ ᠡᠯᠢᠭᠡᠪᠴᠢ ᠶᠢ ᠡᠮᠦᠰ᠂ 15 ᠬᠥᠯ ᠳᠡᠭᠡᠨ ᠡᠩᠬᠡ ᠲᠠᠢᠪᠤᠩ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡᠨ ᠦ ᠪᠡᠯᠡᠳᠬᠡᠯ ᠢ ᠤᠷᠢᠶᠠ᠂ 16 ᠡᠨᠡ ᠪᠦᠬᠦᠨ ᠦ ᠳᠡᠭᠡᠷᠡ ᠮᠠᠭᠤ ᠨᠢᠭᠡᠨ ᠦ ᠬᠠᠮᠤᠭ ᠭᠠᠯᠲᠤ ᠰᠤᠮᠤ ᠶᠢ ᠤᠨᠲᠠᠷᠠᠭᠠᠵᠤ ᠴᠢᠳᠠᠬᠤ ᠢᠲᠡᠭᠡᠯ ᠦᠨ ᠪᠠᠮᠪᠠᠢ ᠶᠢ ᠪᠠᠷᠢ᠃ 17 ᠠᠪᠤᠷᠠᠯ ᠤᠨ ᠳᠤᠭᠤᠯᠠᠭᠠ ᠪᠠ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠰᠡᠯᠡᠮᠡ᠂ ᠲᠤᠬᠠᠢᠯᠠᠪᠠᠯ ᠪᠤᠷᠬᠠᠨ ᠤ ᠦᠭᠡ ᠶᠢ ᠭᠠᠷᠳᠠᠵᠤ ᠠᠪ᠃
18 ᠠᠯᠢᠪᠠ ᠳᠠᠭᠠᠳᠬᠠᠯ ᠪᠠ ᠭᠤᠶᠤᠯᠲᠠ ᠪᠠᠷ ᠠᠯᠢᠪᠠ ᠴᠠᠭ ᠲᠤ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠳᠣᠲᠣᠷᠠ ᠳᠠᠭᠠᠳᠬᠠ᠂ ᠲᠡᠭᠡᠬᠦ ᠶᠢᠨ ᠲᠤᠯᠠᠳᠠ ᠠᠯᠢᠪᠠ ᠲᠡᠰᠪᠦᠷᠢᠯᠡᠯ ᠢᠶᠡᠷ ᠠᠯᠢᠪᠠ ᠠᠷᠢᠭᠤᠨ ᠬᠥᠮᠦᠨ ᠦ ᠲᠥᠯᠥᠭᠡᠬᠢ ᠭᠤᠶᠤᠯᠲᠠ ᠪᠠᠷ ᠰᠡᠷᠡᠮᠵᠢ ᠲᠠᠢ ᠪᠠᠢᠭᠲᠤᠨ᠃ 19 ᠠᠮᠠ ᠨᠡᠭᠡᠭᠡᠬᠦ ᠳᠦ ᠮᠢᠨᠢ ᠦᠭᠡ ᠰᠣᠶᠣᠷᠬᠠᠭᠳᠠᠬᠤ ᠪᠣᠯᠲᠤᠭᠠᠢ ᠭᠡᠵᠦ ᠮᠢᠨᠦ ᠲᠥᠯᠥᠭᠡ ᠴᠤ ᠭᠤᠶᠤᠭᠠᠷᠠᠢ᠃ ᠦᠭᠡ ᠰᠣᠶᠣᠷᠬᠠᠭᠳᠠᠪᠠᠯ ᠪᠢ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢᠨ ᠨᠢᠭᠤᠴᠠ ᠶᠢ ᠵᠣᠷᠢᠭᠲᠠᠢ ᠪᠠᠷ ᠮᠡᠳᠡᠭᠦᠯᠬᠦ ᠪᠣᠯᠣᠨᠠ᠃ 20 ᠡᠭᠦᠨ ᠦ ᠲᠥᠯᠥᠭᠡ ᠪᠢ ᠭᠢᠨᠵᠢ ᠲᠠᠢ ᠪᠠᠷ ᠡᠯᠴᠢᠨ ᠰᠠᠢᠳ ᠤᠨ ᠠᠵᠢᠯ ᠢ ᠬᠢᠵᠦ ᠪᠠᠢᠨᠠ᠃ ᠡ᠊ᠨᠳᠡ ᠴᠤ ᠶᠠᠷᠢᠬᠤ ᠶᠣᠰᠣᠲᠠᠢ ᠪᠠᠨ ᠵᠣᠷᠢᠭᠲᠠᠢ ᠶᠠᠷᠢᠬᠤ ᠶᠢᠨ ᠮᠢᠨᠢ ᠲᠥᠯᠥᠭᠡ ᠭᠤᠶᠤ᠃
21 ᠬᠠᠷᠢᠨ ᠲᠠ ᠨᠠᠷ ᠴᠤ ᠮᠢᠨᠦ ᠪᠠᠢᠳᠠᠯ ᠤᠨ ᠲᠤᠬᠠᠢ᠂ ᠪᠠᠰᠠ ᠮᠢᠨᠦ ᠶᠠᠭᠤ ᠬᠢᠵᠦ ᠪᠤᠢ ᠶᠢ ᠮᠡᠳᠡᠬᠦ ᠬᠡᠷᠡᠭᠲᠡᠢ᠃ ᠡᠨᠡ ᠪᠦᠬᠦᠨ ᠢ ᠮᠢᠨᠢ ᠡᠵᠡᠨ ᠦ ᠳᠣᠲᠣᠷᠠᠬᠢ ᠬᠠᠢᠷᠠᠲᠤ ᠳᠡᠭᠦᠦ ᠪᠥᠭᠡᠳ ᠢᠲᠡᠭᠡᠮᠵᠢᠲᠦ ᠳᠡᠮᠴᠢ ᠲᠦᠬᠢᠺ ᠲᠠ ᠨᠠᠷ ᠲᠤ ᠮᠡᠳᠡᠭᠦᠯᠬᠦ ᠪᠣᠯᠣᠨᠠ᠃ 22 ᠲᠡᠷᠡ ᠪᠢᠳᠡᠨ ᠦ ᠪᠠᠢᠳᠠᠯ ᠢ ᠮᠡᠳᠡᠭᠦᠯᠵᠦ᠂ ᠲᠠ ᠨᠠᠷ ᠤᠨ ᠰᠡᠳᠬᠢᠯ ᠢ ᠲᠠᠢᠪᠤᠰᠢᠷᠠᠭᠤᠯᠤᠨᠠ᠂ ᠲᠡᠭᠦᠨ ᠢ ᠲᠠ ᠨᠠᠷ ᠲᠤ ᠶᠠᠪᠤᠭᠤᠯᠤᠭᠰᠠᠨ ᠤ ᠮᠢᠨᠢ ᠵᠣᠷᠢᠯᠭᠠ ᠨᠢ ᠶᠠᠭ ᠡᠢᠮᠦ ᠪᠢᠯᠡ᠃
23 ᠡᠴᠢᠭᠡ ᠪᠤᠷᠬᠠᠨ ᠪᠣᠯᠣᠨ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠠᠮᠤᠭᠤᠯᠠᠩ ᠪᠠ ᠬᠠᠢᠷᠠ ᠨᠢ ᠢᠲᠡᠭᠡᠯ ᠦᠨ ᠬᠠᠮᠲᠤ ᠠᠬᠠ ᠳᠡᠭᠦᠦ ᠨᠠᠷ ᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠂ 24 ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠲᠤ ᠬᠤᠪᠢᠷᠠᠰᠢ ᠦᠭᠡᠢ ᠬᠠᠢᠷᠠᠲᠠᠢ ᠪᠠᠢᠳᠠᠭ ᠬᠥᠮᠦᠨ ᠪᠦᠬᠦᠨ ᠳᠦ ᠢᠪᠡᠭᠡᠯ ᠪᠠᠢᠬᠤ ᠪᠣᠯᠲᠤᠭᠠᠢ᠃