ᠧᠹᠧᠰ ᠳᠥᠷᠪᠡ
ᠡᠪ ᠨᠢᠭᠡᠳᠦᠯ ᠢ ᠪᠠᠷᠢᠮᠲᠠᠯᠠ
1 ᠡᠵᠡᠨ ᠦ ᠳᠣᠲᠣᠷᠠᠬᠢ ᠬᠣᠷᠢᠭᠳᠠᠯ ᠪᠢ ᠲᠠ ᠨᠠᠷ ᠢ ᠢᠳᠬᠠᠶᠠ᠄ ᠳᠠᠭᠤᠳᠠᠭᠳᠠᠭᠰᠠᠨ ᠲᠤᠯᠠ ᠳᠠᠭᠤᠳᠠᠭᠴᠢ ᠶᠢᠨ ᠰᠠᠨᠠᠭᠠᠨ ᠳᠤ ᠨᠡᠢᠴᠡᠭᠦᠯᠦᠨ ᠠᠮᠢᠳᠤᠷᠠᠭᠠᠷᠠᠢ᠃ 2 ᠲᠤᠢᠯ ᠤᠨ ᠳᠠᠷᠤᠤ᠂ ᠤᠶᠠᠬᠠᠨ ᠪᠠᠢᠵᠤ᠂ ᠲᠡᠪᠴᠢᠶᠡᠷᠢ ᠲᠠᠢ ᠪᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠠᠢᠷᠠ ᠶᠢᠨ ᠰᠡᠳᠬᠢᠯ ᠢᠶᠠᠷ ᠬᠦᠯᠢᠶᠡᠨ ᠠᠪ᠂ 3 ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠡᠪ ᠨᠢᠭᠡᠳᠦᠯ ᠢ ᠡᠩᠬᠡ ᠲᠠᠢᠪᠤᠩ ᠤᠨ ᠬᠣᠯᠪᠣᠭᠠᠰᠤ ᠪᠠᠷ ᠬᠢᠴᠢᠶᠡᠩᠭᠦᠢᠯᠡᠨ ᠪᠠᠷᠢᠮᠲᠠᠯᠠ᠃ 4 ᠲᠠ ᠨᠠᠷ ᠳᠠᠭᠤᠳᠠᠭᠳᠠᠬᠤ ᠳᠠᠭᠠᠨ ᠨᠢᠭᠡ ᠡᠷᠡᠮᠡᠯᠵᠡᠯ ᠤᠷᠤᠭᠤ ᠳᠠᠭᠤᠳᠠᠭᠳᠠᠭᠰᠠᠨ ᠲᠠᠢ ᠠᠳᠠᠯᠢ ᠪᠠᠷ ᠪᠡᠶᠡ ᠪᠣᠯ ᠨᠢᠭᠡ᠂ ᠠᠷᠢᠭᠤᠨ ᠰᠦᠨᠡᠰᠦ ᠴᠤ ᠨᠢᠭᠡ᠂ 5 ᠡᠵᠡᠨ ᠴᠤ ᠨᠢᠭᠡ᠂ ᠢᠲᠡᠭᠡᠯ ᠴᠤ ᠨᠢᠭᠡ᠂ ᠤᠬᠢᠶᠠᠯ ᠴᠤ ᠨᠢᠭᠡ ᠪᠥᠭᠡᠳ 6 ᠪᠦᠬᠦᠨ ᠦ ᠳᠡᠭᠡᠷᠡ᠂ ᠪᠦᠬᠦᠨ ᠦ ᠳᠤᠮᠳᠠᠭᠤᠷ᠂ ᠪᠦᠬᠦᠨ ᠦ ᠳᠣᠲᠣᠷᠠ ᠪᠠᠢᠳᠠᠭ ᠪᠦᠬᠦᠨ ᠦ ᠡᠴᠢᠭᠡ ᠪᠤᠷᠬᠠᠨ ᠴᠤ ᠨᠢᠭᠡ ᠪᠢᠯᠡ᠃
7 ᠾᠷᠢᠰᠲ᠋ᠣᠰ ᠤᠨ ᠬᠡᠮᠵᠢᠵᠦ ᠥᠭᠭᠥᠭᠰᠡᠨ ᠰᠣᠶᠣᠷᠬᠠᠯ ᠤᠨ ᠶᠣᠰᠣᠭᠠᠷ ᠪᠢᠳᠡᠨ ᠦ ᠬᠥᠮᠦᠨ ᠪᠦᠷᠢ ᠳᠤ ᠰᠣᠶᠣᠷᠬᠠᠭᠰᠠᠨ ᠢᠪᠡᠭᠡᠯ ᠪᠣᠯ ᠲᠤᠰ ᠲᠤᠰ ᠤᠨ ᠶᠤᠮ᠃ 8 ᠲᠡᠢᠮᠦ ᠡᠴᠡ 《ᠲᠡᠷᠡ ᠥᠨᠳᠥᠷ ᠲᠦ ᠳᠡᠪᠰᠢᠬᠦ ᠳᠡᠭᠡᠨ ᠣᠯᠵᠠᠯᠠᠭᠳᠠᠭᠰᠠᠳ ᠢ ᠣᠯᠵᠠᠯᠠᠵᠤ ᠬᠥᠮᠦᠰ ᠲᠦ ᠰᠣᠶᠣᠷᠬᠠᠯ ᠤᠳ ᠢ ᠰᠣᠶᠣᠷᠬᠠᠪᠠ》
ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠳᠠᠭ᠃ 9 《ᠥᠨᠳᠥᠷ ᠲᠦ ᠳᠡᠪᠰᠢᠭᠰᠡᠨ》 ᠭᠡᠳᠡᠭ ᠨᠢ᠂ ᠲᠡᠷᠡ ᠪᠡᠷ ᠳᠣᠣᠷᠠ ᠭᠠᠵᠠᠷ ᠲᠤ ᠪᠠᠭᠤᠭᠠᠳ ᠪᠠᠢᠭᠰᠠᠨ ᠭᠡᠰᠡᠨ ᠰᠠᠨᠠᠭᠠ ᠪᠢᠰᠢ ᠤᠤ︖ 10 ᠪᠠᠭᠤᠵᠤ ᠢᠷᠡᠭᠰᠡᠨ ᠲᠡᠷᠡ ᠮᠠᠨᠢ ᠬᠠᠮᠤᠭ ᠶᠠᠭᠤᠮᠠ ᠶᠢᠨ ᠳᠣᠲᠣᠷᠠ ᠳᠦᠭᠦᠷᠡᠩ ᠪᠠᠢᠬᠤ ᠶᠢᠨ ᠲᠤᠯᠠᠳᠠ ᠬᠠᠮᠤᠭ ᠲᠩᠷᠢ ᠡᠴᠡ ᠳᠡᠭᠡᠭᠰᠢ ᠭᠠᠷᠤᠭᠰᠠᠨ᠃ 11 ᠲᠡᠷᠡ ᠥᠪᠡᠷ ᠢᠶᠡᠨ ᠵᠠᠷᠢᠮ ᠢ ᠨᠢ ᠰᠢᠳᠠᠷ ᠱᠠᠪᠢ᠂ ᠵᠠᠷᠢᠮ ᠢ ᠨᠢ ᠡᠰᠢ ᠦᠵᠡᠭᠦᠯᠦᠭᠴᠢ᠂ ᠵᠠᠷᠢᠮ ᠢ ᠨᠢ ᠪᠠᠶᠠᠷ ᠤᠨ ᠮᠡᠳᠡᠭᠡᠴᠢᠨ᠂ ᠵᠠᠷᠢᠮ ᠢ ᠨᠢ ᠬᠣᠨᠢᠴᠢᠨ ᠪᠠ ᠪᠠᠭᠰᠢ ᠪᠠᠷ ᠲᠣᠮᠢᠯᠠᠵᠤ ᠰᠣᠶᠣᠷᠬᠠᠭᠰᠠᠨ ᠨᠢ 12 ᠾᠷᠢᠰᠲ᠋ᠣᠰ ᠤᠨ ᠪᠡᠶᠡ ᠶᠢ ᠪᠣᠰᠬᠠᠨ ᠪᠠᠢᠭᠤᠯᠬᠤ ᠶᠢᠨ ᠲᠥᠯᠥᠭᠡ ᠦᠢᠯᠡᠴᠢᠯᠡᠭᠦᠯᠬᠦ ᠬᠡᠷᠡᠭ ᠲᠡᠢ ᠠᠵᠢᠯ ᠳᠤ ᠠᠷᠢᠭᠤᠨ ᠬᠥᠮᠦᠰ ᠢ ᠪᠡᠯᠡᠳᠬᠡᠭᠰᠡᠭᠡᠷ᠂ 13 ᠪᠤᠷᠬᠠᠨ ᠤ ᠬᠦᠦ ᠶᠢᠨ ᠲᠤᠬᠠᠢ ᠢᠲᠡᠭᠡᠯ ᠪᠠ ᠮᠡᠳᠡᠯᠭᠡ ᠶᠢᠨ ᠲᠠᠯᠠ ᠪᠠᠷ ᠪᠢᠳᠡᠨ ᠢ ᠨᠡᠢᠯᠡᠭᠦᠯᠵᠦ᠂ ᠲᠡᠭᠦᠰ ᠬᠥᠮᠦᠨ ᠪᠣᠯᠭᠠᠭᠠᠳ ᠾᠷᠢᠰᠲ᠋ᠣᠰ ᠤᠨ ᠲᠡᠭᠦᠯᠳᠡᠷ ᠬᠡᠮᠵᠢᠶᠡᠨ ᠳᠦ ᠬᠦᠷᠭᠡᠬᠦ ᠭᠡᠰᠡᠨ ᠳᠡᠭᠡᠨ ᠶᠤᠮ᠃ 14 ᠲᠡᠢᠨ ᠬᠦ ᠪᠢᠳᠡ ᠪᠠᠯᠴᠢᠷ ᠪᠠᠢᠬᠤ ᠪᠠᠨ ᠪᠣᠯᠢᠵᠤ ᠬᠥᠮᠦᠨ ᠦ ᠮᠡᠬᠡ᠂ ᠠᠷᠭᠠ ᠵᠠᠯᠢ ᠳᠤ ᠠᠪᠲᠠᠬᠤ ᠦᠭᠡᠢ᠂ ᠶᠠᠩᠵᠤ ᠶᠠᠩᠵᠤ ᠶᠢᠨ ᠰᠤᠷᠭᠠᠯ ᠤᠨ ᠰᠠᠯᠬᠢᠨ ᠳᠤ ᠭᠤᠢᠪᠢᠬᠤ ᠦᠭᠡᠢ᠂ ᠡᠰᠢ ᠲᠡᠰᠢ ᠬᠡᠶᠢᠰᠬᠦ ᠦᠭᠡᠢ ᠪᠠᠷ 15 ᠬᠠᠢᠷᠠ ᠶᠢᠨ ᠳᠣᠲᠣᠷᠠ ᠦᠨᠡᠨ ᠢ ᠬᠡᠯᠡᠨ᠂ ᠲᠡᠷᠢᠭᠦᠨ ᠪᠣᠯᠬᠤ ᠾᠷᠢᠰᠲ᠋ᠣᠰ ᠲᠤ ᠬᠦᠷᠲᠡᠯᠡ ᠪᠦᠬᠦ ᠲᠠᠯᠠ ᠪᠠᠷ ᠥᠰᠬᠦ ᠶᠣᠰᠣᠲᠠᠢ᠃ 16 ᠾᠷᠢᠰᠲ᠋ᠣᠰ ᠢᠶᠠᠷ ᠲᠡᠷᠢᠭᠦᠨ ᠪᠣᠯᠭᠠᠵᠤ ᠦᠶᠡ ᠮᠥᠴᠢ ᠪᠦᠷᠢ ᠶᠢᠨ ᠳᠡᠮᠵᠢᠯᠭᠡ ᠪᠡᠷ᠂ ᠡᠷᠬᠡᠲᠡᠨ ᠪᠣᠯᠭᠠᠨ ᠤ ᠲᠤᠰ ᠲᠤᠰ ᠤᠨ ᠦᠢᠯᠡᠳᠦᠯ ᠢᠶᠡᠷ ᠬᠣᠯᠪᠣᠯᠳᠤᠨ ᠨᠡᠢᠯᠡᠵᠦ᠂ ᠪᠦᠲᠦᠨ ᠪᠡᠶᠡ ᠶᠢ ᠥᠰᠭᠡᠨ ᠪᠣᠢᠵᠢᠭᠤᠯᠵᠤ᠂ ᠬᠠᠢᠷᠠ ᠶᠢᠨ ᠳᠣᠲᠣᠷᠠ ᠥᠪᠡᠷ ᠢ ᠪᠠᠨ ᠪᠣᠰᠬᠠᠨ ᠪᠠᠢᠭᠤᠯᠳᠠᠭ᠃
ᠠᠷᠢᠭᠤᠨ ᠠᠮᠢᠳᠤᠷᠠᠯ
17 ᠣᠳᠣ ᠪᠢ ᠡᠵᠡᠨ ᠦ ᠳᠣᠲᠣᠷᠠ ᠲᠠ ᠨᠠᠷ ᠲᠤ ᠪᠠᠲᠤᠯᠠᠨ ᠬᠡᠯᠡᠶᠡ᠃ ᠬᠠᠷᠢᠴᠤᠳ ᠰᠢᠭ᠋ ᠬᠡᠢ ᠪᠣᠳᠣᠯ ᠲᠠᠢ ᠪᠠᠷ ᠠᠮᠢᠳᠤᠷᠠᠳᠠᠭ ᠢᠶᠠᠨ ᠪᠣᠯᠢ᠃ 18 ᠲᠡᠳᠡ ᠮᠡᠳᠡᠯᠭᠡ ᠦᠭᠡᠢ᠂ ᠬᠠᠲᠠᠭᠤ ᠵᠢᠷᠦᠬᠡ ᠲᠠᠢ ᠪᠣᠯᠬᠣᠷ ᠤᠬᠠᠭᠠᠨ ᠨᠢ ᠬᠠᠷᠠᠩ᠋ᠭᠤᠢᠯᠠᠨ ᠪᠤᠷᠬᠠᠨ ᠤ ᠠᠮᠢ ᠡᠴᠡ ᠰᠠᠯᠤᠩᠭᠢᠷᠠᠭᠰᠠᠨ ᠪᠠᠢᠳᠠᠭ ᠪᠥᠭᠡᠳ 19 ᠮᠢᠨᠴᠦᠭᠦᠷᠡᠨ᠂ ᠪᠡᠶᠡ ᠪᠡᠨ ᠲᠠᠴᠢᠶᠠᠯ ᠳᠤ ᠲᠤᠰᠢᠶᠠᠨ ᠶᠠᠩᠵᠤ ᠪᠦᠷᠢ ᠶᠢᠨ ᠠᠷᠢᠭᠤᠨ ᠪᠤᠰᠤ ᠶᠢ ᠰᠢᠨᠤᠯ ᠲᠠᠢ ᠪᠠᠷ ᠦᠢᠯᠡᠳᠳᠡᠭ᠃ 20 ᠭᠡᠪᠡᠴᠦ ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠢ ᠲᠡᠷᠡ ᠮᠡᠲᠦ ᠪᠡᠷ ᠰᠤᠷᠤᠭᠰᠠᠨ ᠪᠢᠰᠢ᠂ 21 ᠲᠠ ᠨᠠᠷ ᠲᠡᠭᠦᠨ ᠦ ᠲᠤᠬᠠᠢ ᠦᠨᠡᠬᠡᠷ ᠰᠣᠨᠣᠰᠴᠤ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠦᠨᠡᠨ ᠢ ᠪᠠᠢᠭᠠ ᠪᠠᠷ ᠨᠢ ᠰᠤᠷᠤᠭᠰᠠᠨ ᠶᠤᠮ ᠪᠣᠯ᠂ 22 《ᠤᠷᠢᠳᠤ ᠶᠢᠨ ᠦᠢᠯᠡ ᠶᠠᠪᠤᠳᠠᠯ ᠤᠨ ᠢᠶᠠᠨ ᠶᠣᠰᠣᠭᠠᠷ ᠪᠠᠴᠢᠲᠤ ᠰᠢᠨᠤᠯ ᠢ ᠳᠠᠭᠠᠭᠰᠠᠭᠠᠷ ᠢᠯᠵᠢᠷᠡᠵᠦ ᠪᠤᠢ ᠬᠠᠭᠤᠴᠢᠨ ᠬᠥᠮᠦᠨ ᠢᠶᠡᠨ ᠲᠠᠢᠯ᠂ 23 ᠣᠶᠤᠨ ᠰᠠᠨᠠᠭᠠ ᠪᠠᠷ ᠢᠶᠠᠨ ᠰᠢᠨᠡᠴᠢᠯᠡᠭᠳᠡᠵᠦ ᠪᠠᠢ᠂ 24 ᠪᠤᠷᠬᠠᠨ ᠤ ᠦᠯᠢᠭᠡᠷ ᠬᠡᠪ ᠢᠶᠡᠷ ᠦᠨᠡᠨ ᠦ ᠵᠥᠪ ᠪᠠ ᠠᠷᠢᠭᠤᠨ ᠢᠶᠠᠷ ᠪᠦᠲᠦᠭᠡᠭᠳᠡᠭᠰᠡᠨ ᠰᠢᠨᠡ ᠬᠥᠮᠦᠨ ᠢᠶᠡᠨ ᠡᠮᠦᠰ》 ᠭᠡᠳᠡᠭ ᠢ ᠰᠤᠷᠤᠭᠰᠠᠨ᠃
25 ᠡᠢᠮᠦ ᠡᠴᠡ ᠬᠤᠳᠠᠯ ᠢᠶᠠᠨ ᠬᠠᠶᠠ᠂ ᠬᠥᠮᠦᠨ ᠪᠣᠯᠭᠠᠨ ᠬᠥᠷᠰᠢ ᠳᠡᠭᠡᠨ ᠦᠨᠡᠨ ᠢ ᠶᠠᠷᠢ᠂ ᠤᠴᠢᠷ ᠨᠢ᠂ ᠪᠢᠳᠡ ᠨᠢᠭᠡ ᠪᠡᠶᠡ ᠶᠢᠨ ᠡᠷᠬᠡᠲᠡᠨ ᠨᠦᠭᠦᠳ ᠶᠤᠮ᠃ 26 ᠠᠭᠤᠷᠯᠠᠪᠠᠴᠤ ᠨᠢᠭᠦᠯ ᠪᠦᠦ ᠦᠢᠯᠡᠳ᠂ ᠠᠭᠤᠷ ᠲᠠᠢ ᠪᠠᠷ ᠨᠠᠷᠠ ᠪᠦᠦ ᠵᠢᠷᠭᠠᠭᠠ᠂ 27 ᠰᠠᠲ᠋ᠠᠨ ᠳᠤ ᠵᠠᠪᠰᠢᠶᠠᠨ ᠪᠦᠦ ᠥᠭ᠃ 28 ᠬᠤᠯᠠᠭᠠᠢᠴᠢ ᠬᠤᠯᠠᠭᠠᠢᠯᠠᠬᠤ ᠪᠠᠨ ᠪᠣᠯᠢ᠂ ᠥᠪᠡᠷ ᠦᠨ ᠢᠶᠠᠨ ᠭᠠᠷ ᠢᠶᠠᠷ ᠬᠥᠳᠡᠯᠮᠦᠷᠢᠯᠡᠵᠦ ᠰᠠᠢᠨ ᠢ ᠦᠢᠯᠡᠳ᠂ ᠲᠡᠭᠡᠪᠡᠯ ᠭᠠᠴᠢᠭᠳᠠᠯ ᠲᠠᠢ ᠬᠥᠮᠦᠨ ᠳᠦ ᠥᠭᠴᠦ ᠴᠢᠳᠠᠬᠤ ᠪᠣᠯᠣᠨᠠ᠂ 29 ᠠᠮᠠᠨ ᠠᠴᠠ ᠪᠠᠨ ᠨᠢᠭᠡ ᠴᠤ ᠮᠠᠭᠤ ᠦᠭᠡ ᠶᠢ ᠪᠦᠦ ᠭᠠᠷᠭᠠ᠂ ᠬᠠᠷᠢᠨ ᠬᠥᠮᠦᠨ ᠢ ᠪᠣᠰᠬᠠᠨ ᠪᠠᠢᠭᠤᠯᠬᠤ ᠳᠤ ᠲᠤᠰᠠ ᠪᠣᠯᠬᠤ ᠰᠠᠢᠨ ᠢ ᠯᠠ ᠶᠠᠷᠢ᠂ ᠡᠢᠨ ᠬᠦ ᠦᠭᠡ ᠴᠢᠨᠢ ᠰᠣᠨᠣᠰᠣᠭᠴᠢᠳ ᠲᠤ ᠢᠪᠡᠭᠡᠯ ᠢ ᠳᠠᠮᠵᠢᠭᠤᠯᠬᠤ ᠪᠣᠯᠣᠨᠠ᠃ 30 ᠪᠤᠷᠬᠠᠨ ᠤ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠪᠦᠦ ᠵᠣᠪᠠᠭᠠ᠂ ᠵᠣᠯᠢᠨ ᠠᠪᠬᠤ ᠡᠳᠦᠷ ᠦᠨ ᠲᠥᠯᠥᠭᠡ ᠲᠠ ᠨᠠᠷ ᠢ ᠲᠠᠮᠠᠭᠠᠯᠠᠭᠰᠠᠨ ᠨᠢ ᠲᠡᠷᠡ ᠪᠢᠯᠡ᠃ 31 ᠠᠯᠢᠪᠠ ᠬᠣᠷᠣᠰᠣᠯ᠂ ᠠᠭᠤᠷ ᠬᠢᠯᠢᠩ᠂ ᠬᠡᠷᠡᠭᠦᠯ᠂ ᠭᠦᠳᠬᠡᠯ ᠢᠶᠡᠨ ᠠᠯᠢᠪᠠ ᠮᠠᠭᠤ ᠰᠠᠨᠠᠭᠠ ᠶᠢᠨ ᠢᠶᠠᠨ ᠬᠠᠮᠲᠤ ᠬᠠᠶᠠᠵᠠᠭᠠ᠃ 32 ᠲᠠ ᠨᠠᠷ ᠪᠡᠶᠡ ᠪᠡᠶᠡ ᠳᠡᠭᠡᠨ ᠡᠶᠡᠯᠳᠡᠭ ᠨᠢᠩᠵᠢᠨ ᠰᠡᠳᠬᠢᠯ ᠢᠶᠠᠷ ᠬᠠᠨᠳᠤ᠂ ᠪᠤᠷᠬᠠᠨ ᠲᠠ ᠨᠠᠷ ᠢ ᠾᠷᠢᠰᠲ᠋ᠣᠰ ᠤᠨ ᠳᠣᠲᠣᠷᠠ ᠥᠷᠥᠰᠢᠶᠡᠭᠰᠡᠨ ᠦ ᠠᠳᠠᠯᠢ ᠨᠢᠭᠡ ᠨᠢᠭᠡᠨ ᠢᠶᠡᠨ ᠥᠷᠥᠰᠢᠶᠡ᠃