ᠭᠠᠯᠠᠲ᠋ᠢᠶᠠ ᠭᠤᠷᠪᠠ
ᠬᠠᠤᠯᠢ ᠪᠠᠷ ᠪᠤᠶᠤ ᠢᠲᠡᠭᠡᠯ ᠢᠶᠡᠷ
1 ᠥ᠂ ᠤᠬᠠᠭᠠᠨ ᠦᠭᠡᠢ ᠭᠠᠯᠠᠲ᠋ᠢᠴᠤᠳ ᠡ᠂ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠢ ᠲᠠ ᠨᠠᠷ ᠤᠨ ᠨᠢᠳᠦᠨ ᠦ ᠡᠮᠦᠨᠡ ᠲᠣᠳᠣᠷᠬᠠᠢ ᠦᠵᠡᠭᠦᠯᠦᠭᠰᠡᠨ ᠪᠠᠢᠲᠠᠯᠠ᠂ ᠲᠠ ᠨᠠᠷ ᠬᠡᠨ ᠳᠦ ᠬᠠᠭᠤᠷᠲᠠᠭᠳᠠᠭᠰᠠᠨ ᠪᠤᠢ︖ 2 ᠪᠢ ᠲᠠ ᠨᠠᠷ ᠠᠴᠠ ᠵᠥᠪᠬᠡᠨ ᠡᠭᠦᠨ ᠢ ᠯᠠ ᠯᠠᠪᠯᠠᠶᠠ᠄ ᠲᠠ ᠨᠠᠷ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠬᠦᠷᠲᠡᠭᠰᠡᠨ ᠨᠢ ᠬᠠᠤᠯᠢ ᠶᠢ ᠳᠠᠭᠠᠳᠠᠭ ᠠᠴᠠ ᠪᠣᠯᠣᠭᠰᠠᠨ ᠤᠤ︖ ᠡᠰᠡᠪᠡᠯ ᠰᠣᠨᠣᠰᠣᠭᠰᠠᠨ ᠢᠶᠠᠨ ᠢᠲᠡᠭᠡᠳᠡᠭ ᠡᠴᠡ ᠪᠣᠯᠣᠭᠰᠠᠨ ᠤᠤ︖ 3 ᠲᠠ ᠨᠠᠷ ᠡᠢᠮᠦ ᠤᠬᠠᠭᠠᠨ ᠦᠭᠡᠢ ᠭᠡᠵᠢ ᠤᠤ︖ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠡᠬᠢᠯᠡᠭᠰᠡᠨ ᠪᠠᠢᠲᠠᠯᠠ ᠪᠠᠨ ᠣᠳᠣ ᠮᠢᠬᠠᠨ ᠪᠡᠶᠡ ᠪᠡᠷ ᠲᠡᠭᠦᠰᠬᠡᠬᠦ ᠭᠡᠵᠦ ᠪᠠᠢᠨᠠ ᠤᠤ︖ 4 ᠲᠠ ᠨᠠᠷ ᠤᠨ ᠥᠩᠭᠡᠷᠡᠭᠡᠭᠰᠡᠨ ᠲᠡᠢᠮᠦ ᠣᠯᠠᠨ ᠦᠢᠯᠡ ᠶᠠᠪᠤᠳᠠᠯ ᠲᠠᠯᠠᠭᠠᠷ ᠪᠣᠯᠪᠠ ᠤᠤ︖ 5 ᠪᠤᠷᠬᠠᠨ ᠲᠠ ᠨᠠᠷ ᠲᠤ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠰᠣᠶᠣᠷᠬᠠᠵᠤ᠂ ᠲᠠ ᠨᠠᠷ ᠤᠨ ᠳᠤᠮᠳᠠ ᠬᠦᠴᠦᠲᠦ ᠦᠢᠯᠡᠰ ᠢ ᠦᠢᠯᠡᠳᠴᠦ ᠪᠠᠢᠬᠤ ᠨᠢ ᠬᠠᠤᠯᠢ ᠶᠢ ᠳᠠᠭᠠᠳᠠᠭ ᠠᠴᠠ ᠴᠢᠨᠢ ᠪᠣᠯᠣᠭᠰᠠᠨ ᠤᠤ︖ ᠡᠰᠡᠪᠡᠯ ᠰᠣᠨᠣᠰᠣᠭᠰᠠᠨ ᠢᠶᠠᠨ ᠢᠲᠡᠭᠡᠳᠡᠭ ᠡᠴᠡ ᠴᠢᠨᠢ ᠪᠣᠯᠣᠭᠰᠠᠨ ᠤᠤ︖
6 ᠠᠪᠷᠠᠬᠠᠮ ᠴᠤ 《ᠪᠤᠷᠬᠠᠨ ᠳᠤ ᠢᠲᠡᠭᠡᠭᠰᠡᠨ ᠲᠤᠯᠠ ᠵᠥᠪ ᠲᠤ ᠲᠣᠭᠠᠴᠠᠭᠳᠠᠪᠠ᠃》 7 ᠡᠭᠦᠨ ᠲᠡᠢ ᠠᠳᠠᠯᠢ ᠪᠠᠷ᠂ ᠢᠲᠡᠭᠡᠯ ᠲᠡᠢ ᠨᠢ ᠠᠪᠷᠠᠬᠠᠮ ᠤᠨ ᠦᠷᠡ ᠤᠳᠤᠮ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠭᠲᠦᠨ᠃ 8 ᠪᠤᠷᠬᠠᠨ ᠬᠠᠷᠢᠴᠤᠳ ᠢ ᠢᠲᠡᠭᠡᠯ ᠢᠶᠡᠷ ᠨᠢ ᠵᠥᠪᠲᠥᠭᠡᠬᠦ ᠶᠢ ᠠᠷᠢᠭᠤᠨ ᠨᠣᠮ ᠤᠷᠢᠳᠴᠢᠯᠠᠨ ᠮᠡᠳᠡᠵᠦ᠂ ᠠᠪᠷᠠᠬᠠᠮ ᠳᠤ᠄ 《ᠪᠦᠬᠦ ᠦᠨᠳᠦᠰᠦᠲᠡᠨ ᠴᠢᠮᠠ ᠪᠠᠷ ᠳᠠᠮᠵᠢᠨ ᠢᠷᠥᠭᠡᠭᠳᠡᠨᠡ》 ᠬᠡᠮᠡᠬᠦ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠤᠷᠢᠳᠴᠢᠯᠠᠨ ᠲᠤᠩ᠋ᠬᠠᠭᠯᠠᠪᠠ᠃ 9 ᠲᠡᠢᠮᠦ ᠡᠴᠡ ᠢᠲᠡᠭᠡᠯ ᠲᠡᠢ ᠨᠢ ᠢᠲᠡᠭᠡᠯᠲᠦ ᠠᠪᠷᠠᠬᠠᠮ ᠲᠠᠢ ᠬᠠᠮᠲᠤ ᠢᠷᠥᠭᠡᠭᠳᠡᠵᠦ ᠪᠠᠢᠳᠠᠭ᠃
10 ᠬᠠᠷᠢᠨ ᠬᠠᠤᠯᠢ ᠶᠢ ᠪᠠᠷᠢᠮᠲᠠᠯᠠᠭᠴᠢ ᠪᠦᠬᠦᠨ ᠬᠠᠷᠢᠶᠠᠯ ᠤᠨ ᠳᠣᠣᠷᠠ ᠪᠠᠢᠳᠠᠭ᠃ ᠤᠴᠢᠷ ᠨᠢ᠂ 《ᠬᠠᠤᠯᠢ ᠶᠢᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠦᠬᠦᠨ ᠢ ᠪᠠᠢᠩ᠋ᠭᠤ ᠪᠡᠶᠡᠯᠡᠭᠦᠯᠳᠡᠭ ᠦᠭᠡᠢ ᠬᠥᠮᠦᠨ ᠪᠦᠬᠦᠨ ᠬᠠᠷᠢᠶᠠᠭᠳᠠᠨᠠ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠶᠤᠮ᠃ 11 ᠪᠤᠷᠬᠠᠨ ᠤ ᠡᠮᠦᠨᠡ ᠬᠡᠨ ᠴᠤ ᠬᠠᠤᠯᠢ ᠪᠠᠷ ᠵᠥᠪᠲᠥᠭᠡᠭᠳᠡᠳᠡᠭ᠌ ᠦᠭᠡᠢ ᠨᠢ ᠲᠣᠳᠣᠷᠬᠠᠢ᠃ ᠤᠴᠢᠷ ᠨᠢ᠂ 《ᠵᠥᠪᠲᠦ ᠬᠥᠮᠦᠨ ᠢᠲᠡᠭᠡᠯ ᠢᠶᠡᠷ ᠠᠮᠢᠳᠤᠷᠠᠨᠠ》 ᠭᠡᠰᠡᠨ᠃ 12 ᠬᠠᠷᠢᠨ ᠬᠠᠤᠯᠢ ᠪᠣᠯ ᠢᠲᠡᠭᠡᠯ ᠡᠴᠡ ᠰᠠᠯᠤᠩᠭᠢᠳᠠ ᠪᠠᠢᠳᠠᠭ᠂ ᠤᠴᠢᠷ ᠨᠢ 《ᠡᠳᠡᠭᠡᠷ ᠢ ᠦᠢᠯᠡᠳᠦᠭᠴᠢ ᠨᠢ ᠡᠳᠡᠭᠡᠷ ᠢᠶᠡᠷ ᠠᠮᠢᠳᠤᠷᠠᠨᠠ》 ᠭᠡᠰᠡᠨ ᠶᠤᠮ᠃ 13 《ᠮᠣᠳᠣᠨ ᠳᠤ ᠡᠯᠭᠦᠭᠳᠡᠭᠰᠡᠨ ᠪᠣᠯᠭᠠᠨ ᠬᠠᠷᠢᠶᠠᠯ ᠲᠠᠢ》 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠲᠡᠢ ᠠᠳᠠᠯᠢ᠂ ᠾᠷᠢᠰᠲ᠋ᠣᠰ ᠪᠢᠳᠡᠨ ᠦ ᠣᠷᠣᠨ ᠳᠤ ᠬᠠᠷᠢᠶᠠᠯ ᠠᠮᠰᠠᠵᠤ ᠬᠠᠤᠯᠢ ᠶᠢᠨ ᠲᠡᠷᠡ ᠬᠠᠷᠢᠶᠠᠯ ᠠᠴᠠ ᠪᠢᠳᠡᠨ ᠢ ᠵᠣᠯᠢᠶᠠᠰᠤᠯᠠᠨ ᠠᠪᠤᠭᠰᠠᠨ ᠶᠤᠮ᠃ 14 ᠡᠢᠨ ᠬᠦ ᠠᠪᠷᠠᠬᠠᠮ ᠳᠤ ᠬᠦᠷᠲᠡᠭᠡᠭᠰᠡᠨ ᠢᠷᠥᠭᠡᠯ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠢᠶᠠᠷ ᠳᠠᠮᠵᠢᠨ ᠬᠠᠷᠢᠴᠤᠳ ᠲᠤ ᠬᠦᠷᠴᠦ᠂ ᠪᠢᠳᠡ ᠠᠮᠠᠯᠠᠭᠳᠠᠭᠰᠠᠨ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠢᠲᠡᠭᠡᠯ ᠢᠶᠡᠷ ᠬᠦᠷᠲᠡᠬᠦ ᠪᠣᠯᠣᠯᠠ᠃
ᠬᠠᠤᠯᠢ ᠪᠠ ᠠᠮᠠᠯᠠᠯᠲᠠ
15 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢ ᠡᠭᠡᠯ ᠬᠥᠮᠦᠨ ᠦ ᠶᠣᠰᠣ ᠪᠠᠷ ᠬᠡᠯᠡᠶᠡ᠃ ᠬᠥᠮᠦᠨ ᠦ ᠭᠡᠷᠡ ᠴᠤ ᠭᠡᠰᠡᠨ ᠲᠣᠭᠲᠠᠴᠢᠬᠠᠭᠰᠠᠨ ᠶᠤᠮ ᠪᠣᠯ ᠬᠡᠨ ᠴᠤ ᠡᠭᠦᠨ ᠢ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠳᠠᠭ ᠦᠭᠡᠢ᠂ ᠶᠠᠭᠤᠮᠠ ᠨᠡᠮᠡᠳᠡᠭ ᠴᠤ ᠦᠭᠡᠢ᠃ 16 ᠲᠡᠷᠡ ᠬᠦ ᠠᠮᠠᠯᠠᠯᠲᠠ ᠶᠢ ᠠᠪᠷᠠᠬᠠᠮ ᠪᠠ ᠲᠡᠭᠦᠨ ᠦ ᠦᠷᠡ ᠳᠦ ᠠᠢᠯᠠᠳᠤᠭᠰᠠᠨ᠃ ᠡᠭᠦᠨ ᠦ ᠲᠤᠬᠠᠢ ᠠᠷᠢᠭᠤᠨ ᠨᠣᠮ ᠣᠯᠠᠨ ᠢ ᠵᠢᠭᠠᠨ 《ᠦᠷᠡᠰ》 ᠭᠡᠰᠡᠨ ᠦᠭᠡᠢ᠂ ᠬᠠᠷᠢᠨ ᠨᠢᠭᠡ ᠶᠢ ᠯᠠ ᠵᠢᠭᠠᠨ 《ᠦᠷᠡ》 ᠭᠡᠰᠡᠨ᠃ ᠲᠡᠷᠡ ᠪᠣᠯ ᠾᠷᠢᠰᠲ᠋ᠣᠰ ᠮᠥᠨ᠃ 17 ᠪᠢ ᠡᠭᠦᠨ ᠢ ᠲᠣᠳᠣᠷᠬᠠᠢᠯᠠᠶᠠ᠄ ᠪᠤᠷᠬᠠᠨ ᠤ ᠤᠷᠢᠳᠴᠢᠯᠠᠨ ᠲᠣᠭᠲᠠᠭᠠᠭᠰᠠᠨ ᠭᠡᠷᠡ ᠶᠢ ᠲᠡᠭᠦᠨ ᠡᠴᠡ ᠳᠥᠷᠪᠡᠨ ᠵᠠᠭᠤ ᠭᠤᠴᠢᠨ ᠵᠢᠯ ᠤᠨ ᠬᠣᠢᠨᠠ ᠡᠭᠦᠰᠦᠭᠰᠡᠨ ᠬᠠᠤᠯᠢ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠮᠥᠨ ᠲᠡᠷᠡ ᠬᠦ ᠠᠮᠠᠯᠠᠯᠲᠠ ᠶᠢ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠵᠤ ᠴᠢᠳᠠᠳᠠᠭ ᠦᠭᠡᠢ᠃ 18 ᠥᠪ ᠨᠢ ᠬᠠᠤᠯᠢ ᠶᠢ ᠳᠠᠭᠠᠬᠤ ᠲᠠᠢ ᠬᠣᠯᠪᠣᠭᠠ ᠲᠠᠢ ᠶᠤᠮ ᠪᠣᠯ ᠠᠮᠠᠯᠠᠯᠲᠠ ᠲᠠᠢ ᠬᠣᠯᠪᠣᠭᠠ ᠦᠭᠡᠢ ᠪᠠᠢᠭᠰᠠᠨ᠃ ᠬᠠᠷᠢᠨ ᠪᠤᠷᠬᠠᠨ ᠠᠪᠷᠠᠬᠠᠮ ᠳᠤ ᠠᠮᠠᠯᠠᠯᠲᠠ ᠪᠠᠷ ᠥᠪ ᠢᠶᠡᠨ ᠰᠣᠶᠣᠷᠬᠠᠵᠠᠢ᠃
19 ᠲᠡᠭᠡᠪᠡᠯ ᠬᠠᠤᠯᠢ ᠭᠡᠵᠦ ᠶᠠᠭᠤ ᠶᠤᠮ ᠪᠤᠢ︖ ᠠᠮᠠᠯᠠᠭᠰᠠᠨ ᠨᠥᠭᠥᠭᠡ ᠦᠷᠡ ᠢᠷᠡᠲᠡᠯᠡ ᠭᠡᠮ ᠪᠤᠷᠤᠭᠤ ᠶᠢ ᠣᠢᠯᠠᠭᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠨᠡᠮᠡᠭᠳᠡᠭᠰᠡᠨ ᠵᠦᠢᠯ ᠶᠤᠮ᠃ ᠲᠡᠷᠡ ᠬᠠᠤᠯᠢ ᠲᠩᠷᠢ ᠡᠯᠴᠢᠳ ᠢᠶᠠᠷ ᠳᠠᠮᠵᠢᠨ ᠢᠷᠡᠭᠰᠡᠨ ᠪᠥᠭᠡᠳ ᠵᠠᠭᠤᠴᠢ ᠶᠢᠨ ᠭᠠᠷ ᠲᠤ ᠲᠣᠭᠲᠠᠭᠰᠠᠨ ᠪᠢᠯᠡ᠃ 20 ᠵᠠᠭᠤᠴᠢ ᠨᠢ ᠭᠠᠭᠴᠠ ᠲᠠᠯᠠ ᠶᠢᠨ ᠬᠢ ᠪᠢᠰᠢ᠂ ᠬᠠᠷᠢᠨ ᠪᠤᠷᠬᠠᠨ ᠪᠣᠯ ᠭᠠᠭᠴᠠᠬᠠᠨ ᠶᠤᠮ᠃
21 ᠲᠡᠭᠡᠪᠡᠯ ᠬᠠᠤᠯᠢ ᠨᠢ ᠪᠤᠷᠬᠠᠨ ᠤ ᠠᠮᠠᠯᠠᠯᠲᠠ ᠶᠢ ᠡᠰᠡᠷᠭᠦᠴᠡᠳᠡᠭ ᠭᠡᠵᠢ ᠤᠤ︖ ᠣᠭᠲᠣ ᠲᠡᠢᠮᠦ ᠪᠢᠰᠢ᠃ ᠬᠡᠷᠪᠡ ᠰᠣᠶᠣᠷᠬᠠᠭᠳᠠᠭᠰᠠᠨ ᠬᠠᠤᠯᠢ ᠨᠢ ᠠᠮᠢ ᠥᠭᠬᠦ ᠴᠢᠳᠠᠯ ᠲᠠᠢ ᠪᠠᠢᠭᠰᠠᠨ ᠪᠣᠯ᠂ ᠬᠥᠮᠦᠨ ᠲᠡᠷᠡ ᠬᠠᠤᠯᠢ ᠪᠠᠷ ᠵᠥᠪᠲᠥᠭᠡᠭᠳᠡᠬᠦ ᠪᠠᠢᠭᠰᠠᠨ᠃ 22 ᠬᠠᠷᠢᠨ ᠠᠷᠢᠭᠤᠨ ᠨᠣᠮ ᠨᠢ ᠪᠦᠬᠦᠨ ᠢ ᠨᠢᠭᠦᠯ ᠦᠨ ᠳᠣᠣᠷᠠ ᠬᠣᠷᠢᠭᠰᠠᠨ ᠲᠤᠯᠠ ᠢᠲᠡᠭᠡᠭᠴᠢᠳ ᠲᠡᠷᠡ ᠬᠦ ᠠᠮᠠᠯᠠᠭᠰᠠᠨ ᠢ ᠨᠢ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠲᠤ ᠢᠲᠡᠭᠡᠳᠡᠭ ᠢᠶᠡᠷ ᠢᠶᠠᠨ ᠬᠦᠷᠲᠡᠬᠦ ᠪᠣᠯᠣᠯᠠ᠃
ᠪᠣᠭᠣᠯ ᠪᠢᠰᠢ᠂ ᠪᠤᠷᠬᠠᠨ ᠤ ᠬᠡᠦᠬᠡᠳ
23 ᠲᠡᠷᠡ ᠬᠦ ᠢᠲᠡᠭᠡᠯ ᠢᠷᠡᠬᠦ ᠡᠴᠡ ᠡᠮᠦᠨᠡ ᠪᠢᠳᠡ ᠬᠠᠤᠯᠢ ᠳᠤ ᠬᠦᠯᠢᠶᠡᠰᠦᠯᠡᠭᠳᠡᠨ ᠢᠲᠡᠭᠡᠯ ᠢᠯᠡᠷᠡᠲᠡᠯᠡ ᠬᠣᠷᠢᠭᠳᠠᠵᠤ ᠪᠠᠢᠭᠰᠠᠨ᠃ 24 ᠡᠢᠨ ᠬᠦ ᠪᠢᠳᠡᠨ ᠢ ᠢᠲᠡᠭᠡᠯ ᠢᠶᠡᠷ ᠵᠥᠪᠲᠥᠭᠡᠭᠳᠡᠬᠦ ᠬᠥᠮᠦᠨ ᠪᠣᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠾᠷᠢᠰᠲ᠋ᠣᠰ ᠤᠷᠤᠭᠤ ᠬᠦᠷᠭᠡᠭᠰᠡᠨ 4 ᠰᠠᠬᠢᠯᠭᠠᠵᠢᠭᠤᠯᠤᠭᠴᠢ ᠨᠢ ᠬᠠᠤᠯᠢ ᠪᠢᠯᠡ᠃ 25 ᠬᠠᠷᠢᠨ ᠢᠲᠡᠭᠡᠯ ᠢᠷᠡᠴᠢᠬᠡᠭᠰᠡᠨ ᠲᠤᠯᠠ ᠪᠢᠳᠡ ᠰᠠᠬᠢᠯᠭᠠᠵᠢᠭᠤᠯᠤᠭᠴᠢ ᠶᠢᠨ ᠳᠣᠣᠷᠠ ᠪᠠᠢᠬᠤ ᠪᠠᠨ ᠪᠣᠯᠢᠪᠠ᠃
26 ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠲᠤ ᠢᠲᠡᠭᠡᠳᠡᠭ ᠢᠶᠡᠷ ᠢᠶᠠᠨ ᠴᠥᠮ ᠢᠶᠡᠷ ᠪᠤᠷᠬᠠᠨ ᠤ ᠬᠡᠦᠬᠡᠳ ᠤᠳ ᠪᠣᠯᠣᠯᠠ᠃ 27 ᠤᠴᠢᠷ ᠨᠢ᠂ ᠤᠬᠢᠶᠠᠯ ᠬᠦᠷᠲᠡᠵᠦ ᠾᠷᠢᠰᠲ᠋ᠣᠰ ᠲᠤ ᠣᠷᠣᠭᠰᠠᠨ ᠬᠥᠮᠦᠨ ᠪᠦᠬᠦᠨ ᠾᠷᠢᠰᠲ᠋ᠣᠰ ᠢ ᠡᠮᠦᠰᠦᠭᠰᠡᠨ ᠪᠠᠢᠳᠠᠭ᠃ 28 ᠡ᠊ᠨᠳᠡ ᠶᠦᠳᠠᠢ ᠬᠥᠮᠦᠨ ᠪᠤᠶᠤ ᠭᠷᠧᠭ ᠬᠥᠮᠦᠨ᠂ ᠪᠣᠭᠣᠯ ᠪᠤᠶᠤ ᠴᠢᠯᠥᠭᠡᠲᠦ ᠬᠥᠮᠦᠨ᠂ ᠡᠷᠡᠭᠲᠡᠢ ᠪᠤᠶᠤ ᠡᠮᠡᠭᠲᠡᠢ ᠭᠡᠬᠦ ᠢᠯᠭᠠᠯ ᠦᠭᠡᠢ᠂ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠲᠠ ᠨᠠᠷ ᠴᠥᠮ ᠨᠢᠭᠡ ᠪᠢᠯᠡ᠃ 29 ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠤᠨ ᠬᠢ ᠶᠤᠮ ᠪᠣᠯ᠂ ᠠᠪᠷᠠᠬᠠᠮ ᠤᠨ ᠦᠷᠡ ᠪᠥᠭᠡᠳ ᠠᠮᠠᠯᠠᠯᠲᠠ ᠶᠢᠨ ᠶᠣᠰᠣᠭᠠᠷ ᠥᠪ ᠵᠠᠯᠭᠠᠮᠵᠢᠯᠠᠭᠴᠢᠳ ᠮᠥᠨ᠃