ᠭᠠᠯᠠᠲ᠋ᠢᠶᠠ ᠲᠠᠪᠤ
ᠾᠷᠢᠰᠲ᠋ᠣᠰᠲᠠᠨ ᠤ ᠡᠷᠬᠡ ᠴᠢᠯᠥᠭᠡ
1 ᠡᠷᠬᠡ ᠴᠢᠯᠥᠭᠡᠨ ᠦ ᠲᠥᠯᠥᠭᠡ ᠾᠷᠢᠰᠲ᠋ᠣᠰ ᠪᠢᠳᠡᠨ ᠢ ᠴᠢᠯᠥᠭᠡᠯᠡᠭᠰᠡᠨ᠃ ᠲᠠ ᠨᠠᠷ ᠪᠠᠲᠤ ᠵᠣᠭᠰᠣᠭᠲᠤᠨ᠂ ᠪᠣᠭᠣᠯ ᠤᠨ ᠪᠤᠭᠤᠯᠠᠭᠠ ᠳᠤ ᠳᠠᠬᠢᠨ ᠤᠷᠤᠭᠤᠵᠠᠢ᠃
2 ᠠᠩ᠋ᠬᠠᠷᠤᠭᠲᠤᠨ᠂ ᠫᠠᠦ᠋ᠯ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠬᠡᠷᠪᠡ ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠪᠡᠯ ᠾᠷᠢᠰᠲ᠋ᠣᠰ ᠲᠠ ᠨᠠᠷ ᠲᠤ ᠶᠠᠮᠠᠷ ᠴᠤ ᠲᠤᠰᠠ ᠦᠭᠡᠢ ᠪᠣᠯᠣᠨᠠ᠃ 3 ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠬᠦ ᠬᠥᠮᠦᠨ ᠪᠦᠬᠦᠨ ᠳᠦ ᠳᠠᠬᠢᠨ ᠭᠡᠷᠡᠴᠢᠯᠡᠶᠡ᠃ ᠲᠡᠢᠮᠦ ᠬᠥᠮᠦᠨ ᠪᠦᠲᠦᠨ ᠬᠠᠤᠯᠢ ᠶᠢ ᠭᠦᠢᠴᠡᠳᠬᠡᠬᠦ ᠡᠭᠦᠷᠭᠡ ᠲᠠᠢ᠃ 4 ᠬᠠᠤᠯᠢ ᠪᠠᠷ ᠵᠥᠪᠲᠥᠭᠡᠭᠳᠡᠬᠦ ᠭᠡᠵᠦ ᠣᠷᠣᠯᠳᠤᠳᠠᠭ ᠲᠠ ᠨᠠᠷ ᠾᠷᠢᠰᠲ᠋ᠣᠰ ᠠᠴᠠ ᠠᠩᠭᠢᠵᠢᠷᠠᠵᠤ᠂ ᠢᠪᠡᠭᠡᠯ ᠡᠴᠡ ᠤᠨᠠᠭᠰᠠᠨ᠃ 5 ᠬᠠᠷᠢᠨ ᠪᠢᠳᠡ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠠᠴᠢ ᠪᠠᠷ᠂ ᠢᠲᠡᠭᠡᠯ ᠢᠶᠡᠷ ᠵᠥᠪᠲᠥᠭᠡᠭᠳᠡᠬᠦ ᠡᠷᠡᠮᠡᠯᠵᠡᠯ ᠢ ᠬᠦᠯᠢᠶᠡᠵᠦ ᠪᠠᠢᠨᠠ᠃ 6 ᠤᠴᠢᠷ ᠨᠢ᠂ ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠬᠦ ᠨᠢ ᠴᠤ᠂ ᠦᠯᠦ ᠬᠥᠨᠳᠡᠭᠦᠯᠬᠦ ᠨᠢ ᠴᠤ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠳᠣᠲᠣᠷᠠ ᠶᠠᠮᠠᠷ ᠴᠤ ᠴᠢᠬᠤᠯᠠ ᠦᠭᠡᠢ ᠶᠤᠮ᠂ ᠴᠢᠬᠤᠯᠠ ᠲᠠᠢ ᠨᠢ ᠬᠠᠢᠷᠠ ᠪᠠᠷ ᠠᠵᠢᠯᠯᠠᠳᠠᠭ ᠢᠲᠡᠭᠡᠯ ᠮᠥᠨ᠃
7 ᠰᠠᠢᠨ ᠭᠦᠶᠦᠵᠦ ᠪᠠᠢᠭᠰᠠᠨ ᠲᠠ ᠨᠠᠷ ᠢ ᠬᠡᠨ ᠬᠠᠰᠢᠵᠤ᠂ ᠦᠨᠡᠨ ᠢ ᠳᠠᠭᠠᠬᠤ ᠶᠢ ᠴᠢᠨᠢ ᠪᠣᠯᠢᠭᠤᠯᠬᠤ ᠭᠡᠰᠡᠨ ᠶᠤᠮ ᠪᠤᠢ︖ 8 ᠡᠢᠮᠦᠷᠬᠦ ᠢᠳᠬᠠᠯ ᠨᠢ ᠲᠠ ᠨᠠᠷ ᠢ ᠳᠠᠭᠤᠳᠠᠭᠰᠠᠨ ᠨᠢᠭᠡᠨ ᠡᠴᠡ ᠭᠠᠷᠤᠭᠰᠠᠨ ᠪᠢᠰᠢ᠃ 9 ᠵᠢᠭᠠᠬᠠᠨ ᠢᠰᠭᠡᠭᠦᠷ ᠨᠢ ᠭᠤᠯᠢᠷ ᠢ ᠪᠦᠬᠦᠯᠢ ᠳᠦᠨᠢ ᠢᠰᠭᠡᠳᠡᠭ᠃ 10 ᠲᠠ ᠨᠠᠷ ᠣᠨᠳᠣᠣ ᠰᠠᠨᠠᠭᠠ ᠶᠢ ᠠᠪᠳᠠᠭ ᠦᠭᠡᠢ ᠭᠡᠳᠡᠭ ᠢ ᠪᠢ ᠡᠵᠡᠨ ᠦ ᠳᠣᠲᠣᠷᠠ ᠢᠲᠡᠭᠡᠵᠦ ᠪᠠᠢᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠢ ᠦᠢᠮᠡᠭᠦᠯᠦᠭᠴᠢ ᠨᠢ ᠬᠡᠨ ᠴᠤ ᠪᠠᠢ᠂ ᠰᠢᠳᠬᠡᠯ ᠬᠦᠯᠢᠶᠡᠬᠦ ᠪᠣᠯᠣᠨᠠ᠃ 11 ᠠᠬᠠ ᠳᠡᠭᠦᠦ ᠨᠠᠷ ᠡ︕ ᠬᠡᠷᠪᠡ ᠪᠢ ᠣᠳᠣ ᠪᠣᠯᠲᠠᠯᠠ ᠬᠥᠪᠴᠢᠷᠬᠡᠢ ᠬᠥᠨᠳᠡᠯᠲᠡ ᠶᠢ ᠳᠡᠯᠭᠡᠷᠡᠭᠦᠯᠦᠭᠰᠡᠭᠡᠷ ᠪᠠᠢᠭᠰᠠᠨ ᠪᠣᠯ ᠶᠠᠭᠤᠨ ᠳᠤ ᠬᠠᠪᠴᠢᠭᠳᠠᠬᠤ ᠪᠢᠯᠡ︖ ᠲᠡᠭᠡᠪᠡᠯ ᠵᠠᠭᠠᠯᠮᠠᠢ ᠶᠢᠨ ᠪᠦᠳᠦᠷᠢᠯ ᠴᠤ ᠪᠠᠢᠬᠤ ᠦᠭᠡᠢ ᠪᠠᠢᠭᠰᠠᠨ᠃ 12 ᠲᠠ ᠨᠠᠷ ᠢ ᠦᠢᠮᠡᠭᠦᠯᠦᠭᠴᠢᠳ ᠨᠢ ᠪᠦᠷ ᠥᠪᠡᠷ ᠢ ᠪᠠᠨ ᠠᠭᠳᠠᠯᠠᠬᠤ ᠪᠣᠯᠲᠤᠭᠠᠢ᠃
13 ᠠᠬᠠ ᠳᠡᠭᠦᠦ ᠨᠠᠷ ᠡ︕ ᠲᠠ ᠨᠠᠷ ᠡᠷᠬᠡ ᠴᠢᠯᠥᠭᠡ ᠤᠷᠤᠭᠤ ᠳᠠᠭᠤᠳᠠᠭᠳᠠᠭᠰᠠᠨ᠃ ᠭᠡᠬᠦ ᠳᠡᠭᠡᠨ ᠲᠡᠷᠡ ᠡᠷᠬᠡ ᠴᠢᠯᠥᠭᠡ ᠶᠢ ᠨᠢᠭᠦᠯᠲᠦ ᠤᠭ ᠴᠢᠨᠠᠷ 6 ᠤᠨ ᠢᠶᠠᠨ ᠲᠥᠯᠥᠭᠡ ᠪᠦᠦ ᠵᠠᠪᠰᠢ︕ ᠬᠠᠷᠢᠨ ᠨᠢᠭᠡ ᠨᠢᠭᠡᠨ ᠳᠡᠭᠡᠨ ᠬᠠᠢᠷᠠ ᠪᠠᠷ ᠵᠠᠷᠤᠭᠳᠠᠵᠠᠭᠠ︕ 14 ᠪᠦᠬᠦᠢᠯᠡ ᠬᠠᠤᠯᠢ ᠨᠢ 《ᠬᠥᠷᠰᠢ ᠪᠠᠨ ᠥᠪᠡᠷ ᠦᠨ ᠢᠶᠠᠨ ᠪᠡᠶᠡ ᠮᠡᠲᠦ ᠬᠠᠢᠷᠠᠯᠠ》 ᠬᠡᠮᠡᠬᠦ ᠭᠠᠭᠴᠠ ᠦᠭᠡᠨ ᠳᠦ ᠪᠠᠭᠲᠠᠨᠠ᠃ 15 ᠬᠡᠷᠪᠡ ᠲᠠ ᠨᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠠᠵᠠᠵᠤ ᠬᠠᠳᠤᠷᠴᠤ ᠪᠠᠢᠪᠠᠯ ᠪᠡᠶᠡ ᠪᠡᠶᠡ ᠳᠡᠭᠡᠨ ᠤᠰᠠᠳᠬᠠᠭᠳᠠᠨᠠ᠃ ᠲᠡᠭᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠭᠲᠤᠨ᠃
ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠠᠮᠢᠳᠤᠷᠠ
16 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠳᠠᠭᠠᠵᠤ ᠶᠠᠪᠤ᠂ ᠲᠡᠭᠡᠪᠡᠯ ᠯᠠᠪ ᠨᠢᠭᠦᠯᠲᠦ ᠤᠭ ᠴᠢᠨᠠᠷ ᠤᠨ ᠬᠦᠰᠡᠯ ᠢᠶᠡᠨ ᠬᠠᠩ᠋ᠭᠠᠬᠤ ᠭᠡᠬᠦ ᠦᠭᠡᠢ ᠪᠠᠢᠬᠤ ᠪᠣᠯᠣᠨᠠ᠃ 17 ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠨᠢᠭᠦᠯᠲᠦ ᠤᠭ ᠴᠢᠨᠠᠷ ᠤᠨ ᠬᠦᠰᠡᠯ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠡᠰᠡᠷᠭᠦᠴᠡᠳᠡᠭ ᠪᠥᠭᠡᠳ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠬᠦᠰᠡᠯ ᠮᠢᠬᠠᠨ ᠪᠡᠶᠡ ᠶᠢ ᠡᠰᠡᠷᠭᠦᠴᠡᠳᠡᠭ᠂ ᠲᠡᠷᠡ ᠬᠣᠶᠠᠷ ᠬᠠᠷᠢᠯᠴᠠᠨ ᠳᠠᠢᠰᠤᠩᠨᠠᠭᠠᠳ ᠲᠠ ᠨᠠᠷ ᠤᠨ ᠬᠢᠬᠦ ᠳᠤᠷᠠᠲᠠᠢ ᠶᠠᠭᠤᠮᠠ ᠶᠢ ᠬᠢᠯᠭᠡᠳᠡᠭ ᠦᠭᠡᠢ ᠪᠢᠯᠡ᠃ 18 ᠭᠡᠪᠡᠴᠦ ᠲᠠ ᠨᠠᠷ ᠠᠷᠢᠭᠤᠨ ᠰᠦᠨᠡᠰᠦᠨ ᠳᠦ ᠬᠥᠲᠥᠯᠥᠭᠳᠡᠵᠦ ᠪᠠᠢᠪᠠᠯ ᠬᠠᠤᠯᠢ ᠶᠢᠨ ᠳᠣᠣᠷᠠ ᠪᠠᠢᠭᠠ ᠪᠤᠰᠤ ᠪᠣᠯᠣᠨᠠ᠃ 19 ᠮᠢᠬᠠᠨ ᠪᠡᠶᠡ ᠶᠢᠨ ᠦᠢᠯᠡ ᠶᠠᠪᠤᠳᠠᠯ ᠲᠣᠳᠣᠷᠬᠠᠢ ᠪᠠᠢᠳᠠᠭ᠃ ᠡᠳᠡᠭᠡᠷ ᠨᠢ ᠰᠠᠳᠤᠷ ᠰᠠᠮᠠᠭᠤᠨ᠂ ᠴᠡᠪᠡᠷ ᠪᠤᠰᠤ᠂ ᠲᠠᠴᠢᠶᠠᠩ᠋ᠭᠤᠢ ᠶᠠᠪᠤᠳᠠᠯ ᠤᠳ᠂ 20 ᠬᠥᠷᠥᠭ ᠰᠢᠲᠦᠭᠡᠨ ᠳᠦ ᠮᠥᠷᠭᠥᠬᠦ᠂ ᠶᠧᠯᠧᠢ ᠭᠠᠷᠭᠠᠬᠤ᠂ ᠬᠣᠷᠣᠰᠣᠯ᠂ ᠬᠡᠷᠡᠭᠦᠯ᠂ ᠠᠲᠠᠭᠠᠷᠬᠠᠯ᠂ ᠬᠢᠯᠢᠩᠨᠡᠯ᠂ ᠪᠦᠯᠦᠭᠯᠡᠯ᠂ ᠬᠠᠭᠠᠷᠠᠯ᠂ ᠲᠡᠷᠰ ᠦᠵᠡᠯ᠂ 21 ᠵᠢᠲᠥᠭᠡᠷᠬᠡᠯ᠂ ᠰᠣᠭᠲᠣᠭᠤᠷᠠᠯ᠂ ᠨᠠᠢᠷ ᠴᠡᠩᠭᠡᠯ ᠭᠡᠬᠦ ᠮᠡᠲᠦ ᠶᠤᠮ᠃ ᠤᠷᠢᠳᠤ ᠨᠢ ᠬᠡᠯᠡᠭᠰᠡᠨᠴᠢᠯᠡᠨ ᠣᠳᠣ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠡᠳᠡᠭᠡᠷ ᠢ ᠦᠢᠯᠡᠳᠦᠭᠴᠢᠳ ᠨᠢ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠥᠪᠯᠡᠬᠦ ᠪᠣᠯᠣᠮᠵᠢ ᠦᠭᠡᠢ᠃
22 ᠬᠠᠷᠢᠨ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠦᠷᠡ ᠵᠢᠮᠢᠰ ᠪᠣᠯ ᠬᠠᠢᠷᠠ᠂ ᠪᠠᠶᠠᠰᠬᠤᠯᠠᠩ᠂ ᠠᠮᠤᠭᠤᠯᠠᠩ᠂ ᠲᠡᠪᠴᠢᠶᠡᠷᠢ᠂ ᠡᠶᠡᠯᠰᠡᠭ᠂ ᠨᠢᠩᠵᠢᠨ᠂ ᠢᠲᠡᠭᠡᠯ᠂ 23 ᠳᠥᠯᠭᠡᠨ᠂ ᠪᠡᠶᠡ ᠪᠡᠨ ᠪᠠᠷᠢᠬᠤ ᠪᠢᠯᠡ᠃ ᠡᠳᠡᠭᠡᠷ ᠢ ᠬᠠᠮᠢᠶᠠᠷᠴᠤ ᠡᠷᠬᠡᠰᠢᠶᠡᠵᠦ ᠴᠢᠳᠠᠬᠤ ᠬᠠᠤᠯᠢ ᠪᠠᠢᠬᠤ ᠦᠭᠡᠢ᠃ 24 ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠤᠨ ᠬᠢᠨ ᠨᠢᠭᠦᠯᠲᠦ ᠤᠭ ᠴᠢᠨᠠᠷ ᠢᠶᠠᠨ ᠰᠢᠨᠤᠯ ᠲᠠᠴᠢᠶᠠᠯ ᠲᠠᠢ ᠬᠠᠮᠲᠤ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠤᠯᠤᠭᠰᠠᠨ ᠶᠤᠮ᠃ 25 ᠪᠢᠳᠡ ᠠᠷᠢᠭᠤᠨ ᠰᠦᠨᠡᠰᠦ ᠲᠠᠢ ᠬᠠᠮᠲᠤ ᠠᠮᠢᠳᠤᠷᠠᠬᠤ ᠳᠠᠭᠠᠨ ᠮᠥᠨ ᠠᠷᠢᠭᠤᠨ ᠰᠦᠨᠡᠰᠦ ᠲᠠᠢ ᠬᠠᠮᠲᠤ ᠶᠠᠪᠤᠵᠠᠭᠠᠶᠠ᠃ 26 ᠪᠢᠲᠡᠭᠡᠢ ᠣᠩᠭᠢᠷᠠᠵᠤ ᠬᠣᠭᠣᠷᠣᠨᠳᠣ ᠪᠠᠨ ᠰᠥᠷᠭᠡᠦᠴᠡᠯᠳᠦᠨ ᠪᠡᠶᠡ ᠪᠡᠶᠡ ᠲᠠᠢ ᠪᠠᠨ ᠠᠲᠠᠭᠠᠷᠬᠠᠵᠠᠭᠠ᠃