ᠭᠠᠯᠠᠲ᠋ᠢᠶᠠ ᠵᠢᠷᠭᠤᠭᠠ
ᠠᠴᠢᠶᠠᠯᠠᠯ ᠢᠶᠠᠨ ᠬᠤᠪᠢᠶᠠᠵᠤ ᠡᠭᠦᠷ
1 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠬᠥᠮᠦᠨ ᠦ ᠭᠡᠮ ᠨᠢᠭᠦᠯ ᠢ ᠣᠯᠵᠤ ᠦᠵᠡᠭᠰᠡᠨ ᠪᠣᠯ᠂ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠲᠠ ᠨᠠᠷ ᠵᠥᠭᠡᠯᠡᠨ ᠰᠡᠳᠬᠢᠯ ᠢᠶᠠᠷ ᠲᠡᠢᠮᠦ ᠬᠥᠮᠦᠨ ᠢ ᠵᠠᠰᠠᠵᠤ᠂ ᠮᠥᠨ ᠥᠪᠡᠷ ᠢᠶᠡᠨ ᠴᠤ ᠤᠷᠤᠭᠤ ᠲᠠᠲᠠᠭᠳᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠪᠣᠯᠭᠣᠮᠵᠢᠯᠠᠭᠠᠷᠠᠢ᠃ 2 ᠲᠠ ᠨᠠᠷ ᠨᠢᠭᠡ ᠨᠢᠭᠡᠨ ᠦ ᠪᠠᠨ ᠠᠴᠢᠶᠠᠨ ᠠᠴᠠ ᠡᠭᠦᠷ᠂ ᠲᠡᠭᠡᠪᠡᠯ ᠾᠷᠢᠰᠲ᠋ᠣᠰ ᠤᠨ ᠬᠠᠤᠯᠢ ᠪᠡᠶᠡᠯᠡᠭᠳᠡᠨᠡ᠃ 3 ᠬᠡᠷᠪᠡ ᠬᠥᠮᠦᠨ ᠥᠪᠡᠷ ᠢᠶᠡᠨ ᠣᠨᠴᠠ ᠦᠭᠡᠢ ᠪᠠᠢᠲᠠᠯᠠ ᠪᠠᠨ ᠣᠨᠴᠠᠭᠠᠢ ᠭᠡᠵᠦ ᠪᠣᠳᠣᠬᠤ ᠶᠤᠮ ᠪᠣᠯ ᠪᠡᠶᠡ ᠪᠡᠨ ᠬᠠᠭᠤᠷᠴᠤ ᠪᠠᠢᠭᠠ ᠶᠤᠮ᠃ 4 ᠬᠥᠮᠦᠨ ᠪᠣᠯᠭᠠᠨ ᠦᠢᠯᠡ ᠶᠠᠪᠤᠳᠠᠯ ᠢᠶᠠᠨ ᠰᠢᠯᠭᠠᠵᠤ ᠦᠵᠡ᠂ ᠲᠡᠭᠡᠪᠡᠯ ᠪᠤᠰᠤᠳ ᠲᠠᠢ ᠬᠠᠷᠢᠴᠠᠭᠤᠯᠬᠤ ᠪᠠᠷ ᠪᠤᠰᠤ᠂ ᠬᠠᠷᠢᠨ ᠦᠢᠯᠡᠰ ᠢᠶᠡᠷ ᠢᠶᠠᠨ ᠪᠠᠬᠠᠷᠬᠠᠬᠤ ᠪᠣᠯᠣᠨᠠ᠃ 5 ᠤᠴᠢᠷ ᠨᠢ ᠬᠥᠮᠦᠨ ᠪᠣᠯᠭᠠᠨ ᠥᠪᠡᠷ ᠢᠶᠡᠨ ᠡᠭᠦᠷᠬᠦ ᠠᠴᠢᠶᠠ ᠲᠠᠢ ᠶᠤᠮ᠃
6 ᠦᠭᠡ ᠵᠢᠭᠠᠯᠭᠠᠭᠴᠢ ᠨᠢ ᠵᠢᠭᠠᠳᠠᠭ ᠬᠥᠮᠦᠨ ᠲᠡᠢ ᠪᠡᠨ ᠠᠯᠢᠪᠠ ᠰᠠᠢᠨ ᠰᠠᠢᠬᠠᠨ ᠢᠶᠠᠨ ᠬᠤᠪᠢᠶᠠᠯᠴᠠᠭᠲᠤᠨ᠃
7 ᠪᠦᠦ ᠡ᠊ᠨᠳᠡᠭᠦᠷᠡ᠃ ᠪᠤᠷᠬᠠᠨ ᠪᠣᠯ ᠪᠠᠰᠤᠮᠵᠢᠯᠠᠭᠳᠠᠰᠢ ᠦᠭᠡᠢ᠂ ᠬᠥᠮᠦᠨ ᠲᠠᠷᠢᠭᠰᠠᠨ ᠢᠶᠠᠨ ᠬᠤᠷᠢᠶᠠᠬᠤ ᠪᠣᠯᠣᠨᠠ᠃ 8 ᠮᠢᠬᠠᠨ ᠪᠡᠶᠡ ᠳᠡᠭᠡᠨ ᠲᠠᠷᠢᠭᠴᠢ ᠨᠢ ᠮᠢᠬᠠᠨ ᠪᠡᠶᠡ 7 ᠡᠴᠡ ᠪᠡᠨ ᠮᠥᠬᠥᠯ ᠢ ᠬᠤᠷᠢᠶᠠᠬᠤ ᠪᠥᠭᠡᠳ ᠠᠷᠢᠭᠤᠨ ᠰᠦᠨᠡᠰᠦᠨ ᠳᠦ ᠲᠠᠷᠢᠭᠴᠢ ᠨᠢ ᠠᠷᠢᠭᠤᠨ ᠰᠦᠨᠡᠰᠦᠨ ᠡᠴᠡ ᠮᠥᠩᠬᠡ ᠠᠮᠢ ᠶᠢ ᠬᠤᠷᠢᠶᠠᠨᠠ᠃ 9 ᠰᠠᠢᠨ ᠢ ᠦᠢᠯᠡᠳᠴᠦ ᠪᠠᠢᠬᠤ ᠳᠠᠭᠠᠨ ᠪᠦᠦ ᠮᠣᠬᠣ᠃ ᠰᠢᠨᠲᠠᠷᠠᠬᠤ ᠦᠭᠡᠢ ᠪᠣᠯ ᠲᠣᠪᠯᠠᠭᠰᠠᠨ ᠴᠠᠭ ᠲᠤ ᠬᠤᠷᠢᠶᠠᠬᠤ ᠪᠣᠯᠣᠨᠠ᠃ 10 ᠲᠡᠢᠮᠦ ᠡᠴᠡ ᠪᠣᠯᠣᠮᠵᠢ ᠲᠠᠢ ᠴᠠᠭ ᠲᠠᠭᠠᠨ᠂ ᠬᠥᠮᠦᠨ ᠪᠦᠬᠦᠨ ᠳᠦ᠂ ᠢᠯᠠᠩ᠋ᠭᠤᠶᠠ ᠢᠲᠡᠭᠡᠯᠲᠦ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠳᠤ ᠰᠠᠢᠨ ᠢ ᠦᠢᠯᠡᠳᠴᠡᠭᠡᠶᠡ᠃
ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠬᠦ ᠪᠤᠰᠤ᠂ ᠰᠢᠨᠡ ᠪᠡᠷ ᠪᠦᠲᠦᠭᠡᠭᠳᠡᠬᠦ ᠨᠢ ᠴᠢᠬᠤᠯᠠ
11 ᠥᠪᠡᠷ ᠦᠨ ᠭᠠᠷ ᠢᠶᠠᠷ ᠢᠶᠠᠨ ᠲᠠ ᠨᠠᠷ ᠲᠤ ᠬᠡᠴᠢᠨᠡᠨ ᠲᠣᠮᠣ ᠲᠣᠮᠣ ᠦᠰᠦᠭ ᠢᠶᠡᠷ ᠪᠢᠴᠢᠵᠦ ᠪᠠᠢᠬᠤ ᠶᠢ ᠮᠢᠨᠢ ᠬᠠᠷᠠᠭᠠᠴᠢ᠃ 12 ᠮᠢᠬᠠᠨ ᠪᠡᠶᠡ ᠶᠢᠨ ᠲᠠᠯᠠ ᠪᠠᠷ ᠰᠠᠢᠬᠠᠨ ᠬᠠᠷᠠᠭᠳᠠᠬᠤ ᠳᠤᠷᠠᠲᠠᠢ ᠬᠥᠮᠦᠰ ᠲᠠ ᠨᠠᠷ ᠲᠤ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠬᠦ ᠶᠢ ᠠᠯᠪᠠᠳᠠᠵᠤ ᠪᠠᠢᠳᠠᠭ ᠤᠨ ᠭᠠᠭᠴᠠ ᠰᠢᠯᠲᠠᠭᠠᠨ ᠨᠢ ᠲᠡᠳᠡ ᠾᠷᠢᠰᠲ᠋ᠣᠰ ᠤᠨ ᠵᠠᠭᠠᠯᠮᠠᠢ ᠶᠢᠨ ᠤᠴᠢᠷ ᠢᠶᠠᠷ ᠬᠠᠪᠴᠢᠭᠳᠠᠬᠤ ᠳᠤᠷᠠ ᠦᠭᠡᠢ ᠡᠴᠡ ᠪᠣᠯᠣᠭᠰᠠᠨ ᠶᠤᠮ᠃ 13 ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠴᠢᠳ ᠥᠪᠡᠷᠰᠡᠳ ᠢᠶᠡᠨ ᠴᠤ ᠬᠠᠤᠯᠢ ᠶᠢ ᠰᠠᠬᠢᠳᠠᠭ ᠦᠭᠡᠢ ᠬᠢᠷᠢ ᠨᠢ ᠲᠠ ᠨᠠᠷ ᠤᠨ ᠬᠥᠪᠴᠢᠷᠬᠡᠢ ᠪᠡᠨ ᠬᠥᠨᠳᠡᠭᠦᠯᠬᠦ ᠶᠢ ᠬᠦᠰᠡᠵᠦ ᠪᠠᠢᠭᠠ ᠨᠢ ᠮᠢᠬᠠᠨ ᠪᠡᠶᠡ ᠪᠡᠷ ᠴᠢᠨᠢ ᠪᠠᠬᠠᠷᠬᠠᠬᠤ ᠶᠢᠨ ᠲᠥᠯᠥᠭᠡ ᠶᠤᠮ᠃ 14 ᠬᠠᠷᠢᠨ ᠮᠢᠨᠦ ᠬᠤᠪᠢ ᠳᠤ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠵᠠᠭᠠᠯᠮᠠᠢ 8 ᠡᠴᠡ ᠥᠭᠡᠷᠡ ᠪᠠᠬᠠᠷᠬᠠᠯ ᠭᠡᠵᠦ ᠦᠭᠡᠢ᠂ ᠲᠡᠷᠡ ᠵᠠᠭᠠᠯᠮᠠᠢ ᠳᠤ ᠶᠢᠷᠲᠢᠨᠴᠦ ᠨᠠᠳᠠ ᠳᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠪᠥᠭᠡᠳ ᠪᠢ ᠴᠤ ᠶᠢᠷᠲᠢᠨᠴᠦ ᠳᠦ ᠴᠣᠪᠳᠣᠯᠠᠭᠳᠠᠪᠠ᠃ 15 ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠬᠦ ᠪᠠ ᠦᠯᠦ ᠬᠥᠨᠳᠡᠭᠦᠯᠬᠦ ᠨᠢ ᠴᠢᠬᠤᠯᠠ ᠪᠢᠰᠢ᠂ ᠰᠢᠨᠡ ᠪᠡᠷ ᠪᠦᠲᠦᠭᠡᠭᠳᠡᠬᠦ ᠨᠢ ᠴᠢᠬᠤᠯᠠ ᠶᠤᠮ᠃ 16 ᠡᠨᠡ ᠵᠠᠷᠴᠢᠮ ᠢ ᠳᠠᠭᠠᠳᠠᠭ ᠬᠥᠮᠦᠰ ᠪᠠ ᠪᠤᠷᠬᠠᠨ ᠤ ᠢᠰᠷᠧᠯ ᠳᠤ ᠠᠮᠤᠭᠤᠯᠠᠩ ᠪᠠ ᠡᠨᠡᠷᠢᠯ ᠪᠠᠭᠤᠬᠤ ᠪᠣᠯᠲᠤᠭᠠᠢ᠃
17 ᠬᠣᠢᠰᠢᠳᠠ ᠨᠠᠮᠠᠶᠢ ᠬᠡᠨ ᠴᠤ ᠪᠦᠦ ᠲᠦᠢᠪᠡᠭᠡ᠃ ᠮᠢᠨᠦ ᠪᠡᠶᠡ ᠳᠦ ᠢᠰᠦ᠋ᠰ ᠤᠨ ᠣᠷᠣᠮ ᠲᠡᠮᠳᠡᠭ ᠪᠤᠢ᠃
18 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡᠨ ᠦ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠢᠪᠡᠭᠡᠯ ᠲᠠ ᠨᠠᠷ ᠤᠨ ᠰᠦᠨᠡᠰᠦ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃ ᠠᠮᠧᠨ︕