ᠮᠢᠺᠠ ᠲᠠᠪᠤ
1 ᠬᠠᠷᠢᠨ ᠣᠳᠣ ᠴᠡᠷᠢᠭ ᠢᠶᠠᠨ ᠳᠠᠢᠴᠢᠯᠠ᠂ ᠴᠡᠷᠢᠭ ᠤᠳ ᠢᠶᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠥᠬᠢᠨ ᠡ᠂ ᠪᠢᠳᠡ ᠪᠦᠰᠡᠯᠡᠭᠳᠡᠪᠡ ᠲᠡᠳᠡ ᠰᠢᠳᠠᠮ ᠢᠶᠠᠷ ᠢᠰᠷᠧᠯ ᠤᠨ ᠵᠠᠬᠢᠷᠤᠭᠴᠢ ᠶᠢᠨ ᠬᠠᠴᠠᠷ ᠳᠡᠭᠡᠷᠡ ᠴᠣᠬᠢᠨᠠ᠃
ᠪᠧᠲ᠋ᠯᠧᠾᠧᠮ ᠡᠴᠡ ᠭᠠᠷᠬᠤ ᠵᠠᠬᠢᠷᠤᠭᠴᠢ
2 ᠬᠠᠷᠢᠨ ᠪᠧᠲ᠋ᠯᠧᠾᠧᠮ ᠡᠹᠷᠠᠲ ᠡ ᠴᠢ ᠶᠦᠳᠠ ᠶᠢᠨ ᠠᠢᠮᠠᠭ ᠤᠳ ᠤᠨ ᠳᠤᠮᠳᠠ ᠥᠴᠦᠬᠡᠨ ᠴᠤ ᠢᠰᠷᠧᠯ ᠤᠨ ᠵᠠᠬᠢᠷᠤᠭᠴᠢ ᠪᠣᠯᠬᠤ ᠨᠢᠭᠡᠨ ᠨᠢ ᠴᠢᠮᠠ ᠠᠴᠠ ᠨᠠᠳᠠ ᠤᠷᠤᠭᠤ 12 ᠭᠠᠷᠴᠤ ᠢᠷᠡᠨᠡ᠂ ᠲᠡᠷᠡ ᠡᠷᠲᠡᠨ ᠡᠴᠡ ᠥᠨᠢ ᠡᠷᠲᠡᠨ ᠦ ᠡᠳᠦᠷ ᠤᠳ ᠠᠴᠠ ᠭᠠᠷᠤᠯ ᠲᠠᠢ᠃
3 ᠲᠡᠢᠮᠦ ᠡᠴᠡ ᠲᠥᠷᠥᠭᠦᠯᠵᠦ ᠪᠤᠢ ᠡᠮᠡᠭᠲᠡᠢ ᠲᠥᠷᠥᠭᠦᠯᠬᠦ ᠴᠠᠭ ᠬᠦᠷᠲᠡᠯᠡ ᠢᠰᠷᠧᠯ ᠲᠤᠱᠠ ᠲᠠᠢ ᠪᠠᠢᠭᠰᠠᠭᠠᠷ ᠢᠰᠷᠧᠯᠴᠦᠳ ᠤᠷᠤᠭᠤ ᠦᠯᠡᠳᠡᠭᠰᠡᠨ ᠠᠬᠠ ᠳᠡᠭᠦᠦᠰ ᠨᠢ ᠪᠤᠴᠠᠵᠤ ᠢᠷᠡᠬᠦ ᠪᠣᠯᠣᠨᠠ᠃
4 ᠲᠡᠷᠡ ᠪᠡᠷ ᠶᠣᠬᠣᠸᠠ ᠶᠢᠨ ᠬᠦᠴᠦ ᠪᠡᠷ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠵᠢᠪᠬᠤᠯᠠᠩᠲᠤ ᠨᠡᠷᠡ ᠪᠡᠷ ᠪᠣᠰᠣᠭᠠᠳ ᠰᠦᠷᠦᠭ ᠢᠶᠡᠨ ᠬᠠᠷᠢᠭᠤᠯᠵᠤ ᠲᠡᠳᠡ ᠨᠠᠷ ᠨᠢ ᠰᠠᠭᠤᠷᠢᠰᠢᠬᠤ ᠪᠣᠯᠣᠨᠠ᠂ ᠡᠳᠦᠭᠡ ᠲᠡᠷᠡ ᠳᠡᠯᠡᠬᠡᠢ ᠶᠢᠨ ᠬᠢᠵᠠᠭᠠᠷ ᠬᠦᠷᠲᠡᠯᠡ ᠠᠭᠤᠤ ᠪᠣᠯᠣᠨᠠ᠂
5 ᠲᠡᠷᠡ ᠪᠢᠳᠡᠨ ᠦ ᠡᠩᠬᠡ ᠠᠮᠤᠭᠤᠯᠠᠩ ᠪᠣᠯᠣᠨᠠ᠂ ᠠᠰᠢᠷᠢᠶᠠ ᠮᠠᠨ ᠤ ᠨᠤᠲᠤᠭ ᠲᠤ ᠣᠷᠣᠵᠤ ᠣᠷᠳᠣᠨ ᠨᠤᠭᠤᠳ ᠢ ᠮᠠᠨᠢ ᠲᠠᠯᠬᠢᠳᠠᠬᠤ ᠳᠤ ᠪᠢᠳᠡ ᠳᠣᠯᠣᠭᠠᠨ ᠬᠣᠨᠢᠴᠢᠨ᠂ ᠨᠠᠢ᠌ᠮᠠᠨ ᠤᠳᠤᠷᠢᠳᠤᠭᠴᠢ ᠶᠢ ᠲᠡᠭᠦᠨ ᠦ ᠡᠰᠡᠷᠭᠦ ᠪᠣᠰᠬᠠᠬᠤ ᠪᠣᠯᠣᠨᠠ᠃
6 ᠠᠰᠢᠷᠢᠶᠠ ᠨᠤᠲᠤᠭ ᠲᠤ ᠲᠡᠳᠡ ᠢᠯᠳᠦ ᠪᠡᠷ ᠨᠢᠮᠷᠣᠳ᠋ ᠤᠨ ᠨᠤᠲᠤᠭ ᠲᠤ ᠰᠤᠭᠤᠯᠤᠭᠰᠠᠨ ᠰᠡᠯᠡᠮᠡ ᠪᠡᠷ ᠬᠠᠷᠢᠭᠤ ᠪᠠᠷᠢᠨᠠ ᠠᠰᠢᠷᠢᠶᠠ ᠮᠠᠨ ᠤ ᠨᠤᠲᠤᠭ ᠢ ᠳᠣᠪᠲᠣᠯᠵᠤ᠂ ᠨᠤᠲᠤᠭ ᠳᠡᠪᠢᠰᠬᠡᠷ ᠢ ᠮᠢᠨᠢ ᠲᠠᠯᠬᠢᠳᠠᠬᠤ ᠳᠤ ᠲᠡᠷᠡ ᠪᠢᠳᠡᠨ ᠢ ᠲᠡᠭᠦᠨ ᠡᠴᠡ ᠠᠪᠤᠷᠠᠬᠤ ᠪᠣᠯᠣᠨᠠ᠃
7 ᠶᠠᠺᠣᠪ ᠤᠨ ᠦᠯᠡᠳᠡᠭᠰᠡᠳ ᠨᠢ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠳᠤᠮᠳᠠ ᠶᠣᠬᠣᠸᠠ ᠠᠴᠠ ᠪᠠᠭᠤᠭᠰᠠᠨ ᠰᠢᠭᠦᠳᠡᠷᠢ ᠮᠡᠲᠦ ᠡᠪᠡᠰᠦᠨ ᠳᠡᠭᠡᠷᠡ ᠣᠷᠣᠭᠰᠠᠨ ᠬᠤᠷᠠ ᠮᠡᠲᠦ ᠪᠠᠢᠬᠤ ᠪᠣᠯᠣᠨᠠ᠂ ᠲᠡᠷᠡ ᠬᠥᠮᠦᠨ ᠳᠦ ᠲᠦᠰᠢᠬᠦ ᠦᠭᠡᠢ᠂ ᠬᠥᠮᠦᠨ ᠦ ᠬᠥᠪᠡᠭᠦᠳ ᠲᠦ ᠨᠠᠢᠳᠠᠬᠤ ᠦᠭᠡᠢ᠂
8 ᠶᠠᠺᠣᠪ ᠤᠨ ᠦᠯᠡᠳᠡᠭᠰᠡᠳ ᠨᠢ ᠬᠠᠷᠢᠴᠤᠳ ᠤᠨ ᠳᠣᠲᠣᠷᠠ᠂ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠳᠤᠮᠳᠠ ᠣᠢ ᠶᠢᠨ ᠠᠷᠢᠶᠠᠲᠠᠳ ᠤᠨ ᠳᠤᠮᠳᠠᠬᠢ ᠠᠷᠰᠯᠠᠨ ᠬᠣᠨᠢᠨ ᠰᠦᠷᠦᠭ ᠦᠨ ᠳᠤᠮᠳᠠᠬᠢ ᠵᠠᠯᠠᠭᠤ ᠠᠷᠰᠯᠠᠨ ᠮᠡᠲᠦ ᠪᠠᠢᠬᠤ ᠪᠣᠯᠣᠨᠠ᠂ ᠲᠡᠷᠡ ᠥᠩᠭᠡᠷᠡᠨ ᠶᠠᠪᠤᠬᠤ ᠳᠠᠭᠠᠨ ᠲᠠᠯᠬᠢᠳᠠᠵᠤ ᠲᠠᠰᠤᠳᠠᠳᠠᠭ ᠲᠤᠯᠠ ᠲᠡᠭᠦᠨ ᠡᠴᠡ ᠠᠪᠤᠷᠠᠵᠤ ᠴᠢᠳᠠᠬᠤ ᠬᠡᠨ ᠴᠤ ᠠᠯᠠᠭᠠ᠃
9 ᠭᠠᠷ ᠴᠢᠨᠢ ᠳᠠᠢᠰᠤᠨ ᠨᠤᠭᠤᠳ ᠤᠨ ᠢᠶᠠᠨ ᠳᠡᠭᠡᠷᠡ ᠡᠷᠭᠦᠭᠳᠡᠵᠦ ᠬᠠᠮᠤᠭ ᠳᠠᠢᠰᠤᠨ ᠴᠢᠨᠢ ᠤᠰᠠᠳᠬᠤ ᠪᠣᠯᠣᠨᠠ᠃
10 ᠶᠣᠬᠣᠸᠠ ᠠᠢᠯᠠᠳᠴᠤ ᠪᠠᠢᠨᠠ᠄ 《ᠲᠡᠷᠡ ᠡᠳᠦᠷ ᠪᠢ ᠮᠣᠷᠢᠳ ᠢ ᠴᠢᠨᠢ ᠤᠰᠠᠳᠬᠠᠵᠤ ᠲᠡᠷᠭᠡ ᠨᠦᠭᠦᠳ ᠢ ᠴᠢᠨᠢ ᠬᠡᠮᠬᠡᠴᠢᠨᠡ
11 ᠲᠠᠨ ᠤ ᠨᠤᠲᠤᠭ ᠤᠨ ᠬᠣᠲᠠ ᠨᠤᠭᠤᠳ ᠢ ᠤᠰᠠᠳᠬᠠᠵᠤ ᠪᠦᠬᠦ ᠪᠡᠬᠢᠯᠡᠯᠲᠡ ᠶᠢ ᠴᠢᠨᠢ ᠨᠤᠷᠠᠭᠠᠨᠠ
12 ᠭᠠᠷ ᠠᠴᠠ ᠴᠢᠨᠢ ᠪᠢ ᠬᠠᠮᠤᠭ ᠶᠧᠯᠧᠴᠢᠳ ᠢ ᠤᠰᠠᠳᠬᠠᠵᠤ ᠴᠢ ᠮᠡᠷᠭᠡᠴᠢ ᠦᠭᠡᠢ ᠪᠣᠯᠣᠨᠠ
13 ᠲᠠᠨ ᠤ ᠬᠢᠨ ᠡᠴᠡ ᠰᠡᠢᠯᠦᠮᠡᠯ ᠬᠥᠷᠥᠭ ᠤᠳ᠂ ᠰᠢᠲᠦᠭᠡᠨ ᠦ ᠪᠠᠭᠠᠨᠠ ᠨᠤᠭᠤᠳ ᠢ ᠴᠢᠨᠢ ᠤᠰᠠᠳᠬᠠᠬᠤ ᠲᠤᠯᠠ ᠴᠢ ᠭᠠᠷ ᠤᠨ ᠢᠶᠠᠨ ᠪᠦᠲᠦᠭᠡᠯ ᠳᠦ ᠮᠥᠷᠭᠥᠬᠦ ᠪᠡᠨ ᠪᠣᠯᠢᠨᠠ
14 ᠲᠠᠨ ᠤ ᠬᠢᠨ ᠡᠴᠡ ᠪᠢ ᠠᠱᠧᠷᠠ ᠶᠢᠨ ᠱᠣᠩ ᠢ ᠰᠤᠭᠤ ᠲᠠᠲᠠᠵᠤ ᠬᠣᠲᠠ ᠨᠤᠭᠤᠳ ᠢ ᠴᠢᠨᠢ ᠰᠦᠢᠷᠡᠭᠦᠯᠦᠨᠡ
15 ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠪᠠᠢᠭᠰᠠᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠡᠴᠡ ᠪᠢ ᠠᠭᠤᠷ ᠬᠢᠯᠢᠩ ᠲᠠᠢ ᠪᠠᠷ ᠥᠰᠢᠶᠡ ᠠᠪᠤᠨᠠ᠃》